o die geste warn	alle dan gevarn 
do sprach zuo sim	gesinde	Sigmvndes barn 
wir svln ovch vns bereiten	heim in vnser lant	
liep was ez sinem wibe	do ez div vrowe rehte ervant
Die fvrsten zuo im giengen	vnd sprachen alle dri 
wizzet	kvnich Sifrit	daz iv immer si
mit triwen vnser dienst	bereit vnz in den tot	
do neig er den herren	do man imz so guetlich erbot
Wir svln ovch mit iv teilen	sprach Giselher daz kint 
lant vnde burge	die vnser eigen sint 
swaz vns der witene	mac wesen vndertan 
der svlt ir teil vil guoten	mit samt Kriemhilde han
Der svn Sigmvndes		 zvo den fvrsten sprach 
do er der herren willen	gehorte vnde gesach 
got laziv iwer erbe	immer selich sin 
ia tuon ich ir ze rate	mit der lieben vrowen min
Do sprach div vrowe Kriemhilt	 habet ir der erben rat 
vmbe Bvrgonden degene	ez niht so lihte stat 
si mug ein kvnich gerne	fuoren in sin lant 
ia sol si mit mir teilen	miner lieben bruoder hant
Do sprach der herre Gernot	 nim dir swen dv wil 
die gerne mit dir riten	der vindestu hie vil 
vz drizech hvndert reken	nim dir tusent man 
die sin din heimgesinde	Kriemhilt senden began
nach Hagenen von Trony	 vnde nach Ortwin 
ob die vnd ir mage	Kriemhilde wolden sin 
darvmbe gewan Hagene	zorneclichez leben 
er sprach	ia mag vns Gvnther	nimmer hin gegeben
Ander ingesinde	lat iv volgen mite 
wan ir wol bekennet	der Tronyere site 
wir muozen bi den kvnigen	hie ze houe <bestan> 
wir svln ir langen dienen	den wir her gevolget han
Daz liezen si beliben	vnde bereiten sich dan 
ir edel ingesinde	 vro Kriemhilt zvo ir gewan 
zwo vnd drizech meide	vnd funf hvndert man 
Ekehart der graue	volgete Kriemhilde dan
Vrlop si do namen	beidiv riter vnde kneht 
meide vnde vrowen	 daz was vil michel reht 
gescheiden kvssende	wurden si zehant 
si rumten vrolichen	des kvnich Gvnthers lant
Do beleiten si ir mage	verre vf den wegen 
man hiez in allenthalben	ir nahtselde legen 
swa siz gerne namen	 durch der kvnige lant 
boten wurden balde	Sigmvnde dan gesant	[27a]
daz er wizzen solde	 vnd frov Sigelint 
daz sin svn koeme	vnde vrov voten kint 
Kiemhilt div vil schoene	von Wormez vber Rin 
do kvnden in div mere	 nimmer lieber gesin
Wol mich	sprach do Sigmvnt	daz ich gelebet han 
daz div schoene Chriemhilt	 sol hie gekronet gan 
des muosen wol getiwert	sin div erbe min 
min svn Sifrit	 sol hie selbe kvnich sin
Do gap div vrowe Siglint	manigen samit rot 
silber vnde golt swere	was ir botenbrot 
si vrovte sich der mere	div si do vernam 
sich chleidete ir gesinde	mit flize wol als in gezam
Man seite wer da koeme	mit im in daz lant 
do hiez si gesidele	rihten sa zehant 
daz zuo er gekronet	vor vrivnden solde gan 
do riten in engegene	des kvnich Sigmundes man
Ist ieman baz enphangen	dest mir vnbekant 
danne die helde	in Sigmvndes lant 
Siglint div schoene	Kriemhilde gegen reit
mit maniger schoenen frovwen	vn– ritteren gemeit
in einer tageweide	da man die geste sach 
die kvnden vnd die vremdem	liten vngemach 
vnze si kornen	zeiner burge wit 
div was geheizen Santen	da si krone truogen sit
Mit lachendem mvnde	Siglint vnd Sigmvnt
kvsten Kriemhilde	 durch liebe manige stvnt 
vnd ovch Sifriden	 in was ir leit benomen 
allez ir gesinde	was in grozlichen willekomen
Man bat die geste bringen	fur Sigmvndes sal 
die schoenen ivnchvrowen	huop man da zetal
nider von den moeren	da was manich man 
der den schoenen wiben	mit flize dienen began
Dos in ir grozen eren	sazen vnd heten genuoch 
waz goltvarwer gern	ir ingesinde truoch 
borten vnd edel gesteine	verwiert wol darin 
sus pflach vlizeclichen	ir div edel kvnigin
Do sprach vor sinen frivnden	der herre Sigmnvnt 
den Sifrides magen	tuon ich allen kvnt 
er sol vor disen reken	mine krone tragen	
div mere horten gerne	die von Niderlanden sagen
Er bevalch im sin krone	gerihte vnde lant 
sit was er ir herre	die er ze rehte vant
vnd dar er rihten solde	daz wart also getan 
daz man sere vorhte	der schoenen Kriemhilde man
In disen grozen eren	 lebter	daz ist war 
vnd rihte ovch vnder krone	an daz zehende iar 
daz div schoene vrowe	 einen svn gewan 
daz was des kvniges magen	nach willen wol ergan
Den ilte man do tovfen	vnd gap im einen namen 
Gvnther	nach sinem ovheim	des dorft er sich niht schamen 
geriet er nach den magen	daz wer im wol ergan	[27b]
do zoch man in mit flize	des was von schvlden getan
In den selben ziten	starp vro Siglint 
do nam den gewalt mit alle	der edelen voten kint 
der so riken vrowen	ob landen wol gezam 
daz klageten genuoge	do si der tot von in genam
Nv hete ovch dort die Rine	 so wir hoeren sagen	
bi Gvnther dem riken	 einen svn getragen
Pruonhilt div schoene	 in Burgonden lant 
durch des heldes liebe	wart er Sifrit genant
Mere zallen ziten	wart so vil geseit 
wie rehte lobelichen	die reken wol gemeit
lebeten zallen stvnden	in Sigmundes lant 
alsam tet ovch Gvnther	mit sinen magen vzerkant
Daz lant der Niblvnge	Sifride diente hie	
richer siner mage	wart neheiner nie	
vnd Schilbundes reken	vnd ir beider guot 
des truoch der kuene Syfrit	deste hoeher sinen muot
Hort den aller meisten	den ie helt gewan	
ane die es pflagen	hete der kvene man 
den er vor eime berge	mit siner hende erstreit 
darvmb er sluoch ce tode	manigen riter gemeit
Er hete den wunsch der eren	vnde were des niht geschehen 
so muese man von schvlden	dem edelen reken iehen 
daz er were der beste	der ie vf ors gesaz 
man vorhte sine sterke	 vnd tet vil billichen daz