o biten si der naht	vnd fuoren vber Rin 
von helden kvnde nimmer	wirs geiaget sin 
ein tier daz si da sluogen	daz weinende edeliu wip 
ia mvosten sin enkelten	vil guoter wigande lip
Von grozer vbermvoten		mvget ir horen sagen 
vnde von islicher rache	 ez hiez Hagne tragen
Sifriden also toten	von Niblunge lant
fvr eine kemenaten	 da er Kriemhilde vant
Er hiez in tovgenliche	legen an div ture 
daz si in da vinden solde	so si gienge herfure
hin ce mettine	 ê daz ez wurde tac	[39a]
der div frovwe <Chriemhilt>	vil selten eine verlach
Man lute da ze dem mvnster	nach gewoneheit 
Kriemhilt div vil schoene	wacte mænige meit 
ein lieht bat si ir bringen	vn– ovch ir gewant 
do kom ein kamerere		 da er Sifriden vant
Er sach in bluotes roten	sin wat was elliv naz 
daz er sin herre were	 nie enwesser daz 
hin der kemenaten	 daz lieht truoch an der hant 
bi dem vil leidiv mære	vrovwe Kriemhilt ervant
Do si mit ir vrovwen	ce kirche wolde gan 
do sprach der kamerere	 vrowe	ir svlt stille stan 
ez lit vor dem gademe	ein riter tot erslagen	
ovwe	sprach vro Kriemhilt	waz wil du solcher mere sagen
E si rehte erfunde	daz ez were ir man 
an die Hagnen vrage	denken si began 
wie er solde in fristen	erst do wart ir leit 
von ir was allen vrovden	mit sime tode widerseit
Si seic zvo der erden	daz si niht ensprach 
die schoenen vrovdelosen	ligen man do sach 
Kriemhilde iamer	 wart vnmazen groz 
do schrei si nach unkreften	daz al div kemenate erdoz
Do sprach daz gesinde		waz ob ez ist ein gast	
daz bluot ir uz dem mvnde	vor herzen iamer brast 
do sprach si	nein	ez ist Sifrit	min vil lieber man 
ez hat geraten Brunhilt		daz ez Hagne hat getan
Div vrowe bat sich wisen		da si den helt vant 
si huop sin schoene hovbet		 mit ir vil wizen hant 
swie rot ez was von bluote	si het in schier erkant 
do lac vil iemerliche	der helt von Niderlant
Do rief truorechlichen	di kvneginne milt 
we mir dises leides	nu ist dir doch din schilt
mit swerten niht verhovwen	dv bist ermorderot 
wes ich wer ez het getan	ich riete im immer sinen tot
Allez ir gesinde	klagete vnde scre
mit ir lieben vrovwen	wand in was vil we
vmb ir edelen herren	der da was verlorn 
gerochen hete Hagene	vil vbele Brunhilde zorn
Do sprach div iamerhafte	 ir sult hine gan
vn– weket harte balde	die Sifrides man 
ir svlt ovch Sigmunde	minen iamer sagen 
ob er mir helfen welle	den kuenen Sifriden klagen
Do lief ein bote balde	da er si ligen vant 
Sifrides helde	 von Niblvnge lant 
mit den vil leiden mæren	ir vrovde er in benam 
si woldenz niht gelovben	 ê man daz weinen vernam
Der bote kom ovch schiere	da der kvnich lac 
Sigmvnt der herre	des slafes niene phlac 
ich wene sin herze im seite	daz im was geschehen 
daz er Sifriden	nimmer solde <mer> gesehen
Wachet	herre Sigmvnt	mich bat nach iv gan [39b]
Kriemhilt min frowe	der ist ein leit getan 
daz ir vor allen leiden	an ir herze gat 
daz sult ir klagen helfen	wan ez sere ivch bestat
Vf rihte sich do Sigmunt	er sprach	waz sint div leit
der schoenen Kriemhilde	so dv hast geseit	
er sprach mit weinen	ich kan ivz niht verdagen 
ia ist von Niderlanden	der kuene Sifrit erslagen
Do sprach der kvnich Sigmvnt	 lat daz schinphen sin
vn– also boesiv mere	durch den willen min 
daz ir saget ieman	daz er si erslagen 
wan daz kvnd ich nimmer	vor mime tode verklagen
Welt irz niht gelovben	daz ir mich horet sagen 
so vernemet selbe	 Kriemhilde klagen
vn– allez ir gesinde	den Sifrides tot	
vil sere srach do <Sigmvnt>	des gie im werlichen not
Mit hvndert siner manne	er von den betten spranch 
si zvchten zuo den handen	 div scharphen wafen lanch 
si liefen zuo den wuoffen	iemerlichen dan 
do komen tvsent reken	des kvenen <Sifrides> man
Do si so iamerliche	 die frovwen horten klagen 
do wanden svmeliche		si solden kleider tragen 
ia mohten si der sinne	 vor iamer niht gehaben 
in wart mikel swere	 in ir herze begraben
Do kom der kvnich Sigmvnt	da er Kriemhilde vant 
er sprach	owe der reise	here in dice lant 
wer hat mich mines kindes	vnd ivch des iwren man
bi also guoten vrivnden	alsvs mortlich getan
Sold ich den bekennen	sprach daz vil edel wip 
holt wurde im nimmer	min herze noch min lip 
ich riete im alse leides	daz al die frivnde sin
von minen schvlden		mvozen immer klagende sin
Sigmvnt der herre		den fursten vmbesloz 
do wart von sinen vrivnden	der iamer also groz 
daz von den starken wuofe	palas vnde sal
vnd din stat ze Wormeze	 ce beiden siten lute <ersal >
Do enkvnde nieman trosten	Sifrides wip 
man zoch vz den kleideren	sinen schoenen lip
vnde wuosch im sine wunde	man leite in vf den re 
do was sinen lûten	von starkern iamer vil we
Ez spraken sine reken	vz Niblvnge lant 
in sol immer reken	mit willen vnser hant 
er ist in disem huse	der ez hat getan	
do ilten sich wafenen	alle Sifrides man
Die vz erwelten degne	mit schilden komen dar 
einlif hvndert reken	die hete an siner schar
Sigmvnt der rike	 sines svnes tot
wold in gerne reken	als im sin friwe daz gebot
Si wessen wen si solden	mit strite do bestan 
si enteten Gvnthern	 vn– ovch sine man 
mit den her Sifrit	 an daz geieide reit	[40a]
Kiemhilt sach si gewafent	daz was ir ander herzeleit
Swie michel wer ir iamer	vn– swie starch ir not 
doch vorhte si harte	der Niblvnge tot
von ir bruoder mannen	daz si ez vnderstuont 
si warende si guotliche	so vrivnde liebe frivnde tuont
Ez sprach div iamers riche	 min her Sigmvnt 
wes welt ir beginnen	iv ist niht rehte kvnt 
ia hat kvnich Gvnther	so manigen kuenen man 
ir welt iv alle vliesen	welt ir die reken bestan
Mit vf erbvnden schilden	was in ce strite not 
div edel kvnginne	 si bat vnd ovch gebot
daz ez miden solden	die reken vil gemeit 
daz wolden si niht lazen	daz do ir herze vol durchsneit
Si sprach	min her Sigmvnt	ir sultez lazen stan 
vnz ez sich baz fuege	so wil ich minen man
immer mit iv reken		der mir in hat benomen 
wird ich des bewiset	ez muoz im schedlichen komen
Ez ist der vbermuoten	hie bi Rine vil 
da von ich iv des strites	raten niht enwil 
si habent wider einen	ie wol drizech man 
gote laze in gelingen	alse si vmb vns gedienet han
Ir svlt hie beliben	vnd dolt mit mir div leit 
vnz ez tagen begvnde	ir helde vil gemeit 
so helfet mir beserken	minen lieben man	
do spraken die degne	vrowe liep	daz si getan
Iv enkvnde nieman	 daz wunder vol sagen
von rittern vn von vrovwen	wie man die horte clagen	
so daz man des wuofes	 wart in der stat geware 
die edelen burgere	 komen gahende dare
Si klagten mit den gesten	wan in was harte leit 
Sifrides schvlde	in waren niht geseit 
durk was der edel reke	 verlos da sinen lip 
do weinden mit den vrovwen	der guoten burgere wip
Smide hiez man gahen	wurken einen sarch
von silber vnd von golde	michel vn– starch 
vn– hiez in vaste spengen	mit stale der was guot 
do was al den luten	 harte truorich der mvot
Div naht was ergangen	man seite ez wolde tagen 
do hiez div edel vrovwe	zuo dem mvnster tragen
Sifrit den herren	ir vil lieben man 
swaz er da frivnde hete	die sach man weininde gan 
Do sin zen mvnster brahten	wie vil da gloken klanc 
do horte man allenthalben	maniges phaphen sanch 
do kom der kvnich Gvnther	dar mit sinen man 
vn– ovch der grimme Hagene	daz wære bezzer verlan
Er sprach	liebiv swester	we der leide din 
daz wir niht mohten ane	 so grozes schades sin 
wir muozen in mer klagen	 Sifrides lip	
daz tuot ir ane schvlde	 sprach daz iamerafte wip
Wer iv darvmbe leide	 so wer ez niht geschehen 
ir hetet min vergezzen		des mag ich wol iehen	[40b]
da ich da wa	cheiden	vn– min lieber man 
ei wolde got der			wer ez selber mir getan
Si buten vaste ir logen		Kriemhilde begvnde iehen 
swelher si vnschuldet		der laze daz besehen 
der sol zuo der bare		vor den lvten gan 
da mach man die warheit	harte schiere bi versten
Daz ist ein michel wunder	dike ez noch geschihet	
swa man den mortmeilen	 bi den toten sihet 
so bluotent im die wunden	sam ovch da gesach 
da von man die schulde	da ze Hagenen gesach
Die wunden fluzen sere	alsam si taten ê 
die ê da sere klagten	des wart nv michel me 
do sprach kvnich Gvnther	 ich wilz ivch wizzen lan 
in sluogen schachere	Hagene hat ez niht getan
Mir sint die schachere	sprach si	vil wol bechant 
nv laze ez got <erreken>	von siner vrivnde hant 
Gunther vn– Hagne		 ia habet irz getan	
die Sifrides degne		heten do zuo strite wan
Kriemhilt twanc groz iamer	zuo der <selben> not
komen do die beide	da si in funden tot 
Gernot ir bruoder	vnd Giselher daz kint 
mit triwen si in klageten	ir ovgen wurden nazzer blint
Si weinden innerclike	Kriemhilde man 
man wolde messe singen	zuo dem mvnster <dan>
giengen allenthalben	man vn– wip 
die sint doch lihte enbarn	di weinende Sifrides lip
Gernot vn– Giselher	sprachen	swester min 
nu troeste dich nach tode	als ez idoch mvoz sin 
wir wellen dichs ergecen	die wile wir leben	
do kunde ir nieman	trost neheinen gegeben
Sin sarch was bereitet	wol vmb mitten tac 
man huop in von der bare	da er ufe lac 
in wolde noch diu frowe	lazen nihtbegraben 
des muosen al die lûte	michel arbeite haben
In einen riken pfelle	man den toten want 
ich wæne man da iemen	ane weinen vant 
do chlagte herzenliche	vote ein edel wip 
vnd al ir ingesinde	Sifrides wætlichen lip
Do man gehorte	 daz man zem mvnster sanch
vn– in besarket hete	do huop sich groz gedranch 
durch willen siner sele	waz man opfers truoc 
her hete bi den vienden	doch guoter vrivnde genuoc
Kriemhilt div arme	<zir> kamæreren sprach 
ir svlt durch min liebe	liden vngemach 
die im guotes gunnen	vnd mir wesen holt 
durch Sifrides sele	 sol man teilen sin golt
Dehein kint was so kleine	 daz wizze mohte haben 
ez muoze gen ce opher	 ê er wurde begraben 
wol hundert messe		man des tages sanch 
von Sifrides frivnden	wart do groz gedranch
Do man het gesvngen	daz volch sich huop dan	[41a]
do sprach vro Kriemhilt	 ir sult mich eine lan
heint mich wachen	 den vz erwelten degen 
er ist an sime libe	al min vrovde gelegen
Dri naht vnd dri tage	wil ich in lazen stan 
vnz ich mich geniete	mins vil lieben man 
waz ob got gebivtet	daz mich ovch nimet der tot 
so wer wol verendet	min armer Kriemhilde not
Ze herbergen giengen	die lûte von der stat 
pfaffen unde muniche	si beliben bat 
vnd allez sin gesinde	daz des heldes phlac 
si heten naht vil arge	vnd vil mvolichen tac
An ezzen vnd an trinken	beleib da manich man 
die ez nemen wolden	 den wart daz kvnt getan 
daz man ins den vollen gebe	daz schuof er Sigmvnt 
do was den Niblungen	vil michel arebeite kvnt
Swaz man vant der armen	die es niht mohten han 
die hiez man doch zem opher	mit golde gan
vz sin selbes kamer	 do er niht solde leben 
vmb sine sele	wart manich tusen marc gegeben
Urbor vf der erden	teiles in div lant 
swa man kloster	vnd guote livte vant 
silber gap man vnde wat	den armen da genvoc 
si tet dem wol geliche	daz sim holden willen truoc
An dem dritten morgen	ce rehter messezit
so was bi dem mvnster	der krihhof also wit
von den lantluten	weinens also vol 
si dienden im nach tode	als man lieben vrivnden sol
In den tagen vieren	 man hat geseit daz	
ce drizech tvsent marken	oder dannoch baz
wart durch sin sele	den armen da gegeben 
do was gelegen ringe	sin groziv schoene vn– ovch sin leben
Do gote wart gedient	vnd man vol gesanc 
mit vngefuegem leide	vil des volkes ranc 
man hiez in uz den mvnster	zuo dem grabe tragen 
man vant da niht anders	wan ein weinen vn– klagen
Lute scriende	daz gie mit im dan 
vro was da niemen	weder wip noch man 
ê man in begruebe	 man sanch vn– las 
hey was guoter phaffen	ze siner pevilde was
ê ce deme grabe koeme	Sifrides wip 
do ranc mit solhem iamer	ir getriwer lip 
daz man si mit dem brvnnen	dike da begoz 
ez was ir vngemuode	vil harte vnmazlichen groz
Ez was michel wunder	daz si ie genas 
mit klage ir helfende	da manich vrovwe was 
do sprach div kvnigin	 ir Sifrides man 
ir svlt durch iwer triwe	an mir genade began
Lat mir nach mime leide	ein kleine liep geschehen 
daz ich sin schoene hovbet	noch einst mvze sehen 
do bat sis also lange	mit iamers sinnen starch 
daz man cebrechen muose	 den vil herlichen sarch	[41b]
Do brahte man die vrovwen	da si in ligen vant 
si huop sin schuonez hovbet	mit ir vil wizzen hant
vnd kvste in also toten	den edelen riter guot 
ir vil liehten ovgen	von weinenden do bluot
Ein iærnerlichez scheiden	wart do da getan 
do truoch man si von dannen	si kvnde niht gegan 
do vant man sinnelose	 daz herliche wip 
vor leide moht ersterben	ir vil wunnechlicher lip
Do man den edelen herren	heten nv begraben 
leit ane maze	sach man die alle haben 
die mit im komen waren	von Niblvnge lant 
vil selten frolichen	man do Sigmvnden vant
Do was etelicher	der drier tage lanc
vor dem grozem leide	niht az noch entranch 
doch mochten si dem libe	so geswichen niht 
si nerten sich nach sorgen	so noch genuogen geschit