az was in einen ziten	do vro Helche erstarp
vn– der kvnich Ezel	vmbe ander vrovwen warp 
do rieten sine vrivnde	in Burgonden lant
zvo einer stolzen witwen	div was vrov Kriemhilt genant
Sit daz erstorben were	der schonen Helchen lip 
si sprachen	welt ir immer	gewinnen edel wip 
di hosten vnd die besten	 die kvnich ie gewan 
so nemt die selben vrowen	der starke Sifrit <was> ir man
Do sprach der kvnich rike	 wie mohte daz ergan 
sid ich bin heiden	vn– des tovffes niht han 
sist div vrovwe kristen	des enlobet siz niht 
ez mvese sin ein wunder	ob ez immer geschiht
Do sprachen die snellen	 ob siz lihte tvot
durch iwern namen hohen	vnd iwer michel gvot 
so sol manz doch versuochen	an daz vil edel wip 
ir mvget vil gerne minnen	ir vil wetlichen lip
Do sprach der kvnich edel	 wem ist iv bekant
vnder iv bi Rine	die lute vnd ovch daz lant	
do sprach der von Bechlarn	der guote Ruodiger 
ich han erkant von kinde	die vil edele kvnige her
Gvnther vn– Gernot	die edelen riter guot 
der dritte heizet Gyselher	ir islicher tvot
swaz er bester eren	vnde tvgende mach began 
ovch habent ir alte mage	noch daz selbe her getan
Do sprach aber Ecel	 vrivnt	dv sol mir sagen 
ob si in mime lande	 krone solde tragen 
vn– ist ir lip so schoene	so mir ist geseit 
minen besten vrivnden	sol ez nimmer werden leit
Si gelichet sich mit schoene	wol der vrovwen min 
Helchen der vil richen	ia kvnde niht gesin
in diser werlde schoener	 deheins kvniges wip 
den si lobet ze vrivnde	 der mach wol troesten sinen lip
Er sprach	so wirb ez Rvedeger	also liep ich dir si 
vn– sol ich Kriemhilde	geligen immer bi 
des wil ich dir lonen	 so ich beste kan 
vn– hast ovch minen willen	so rehte verre getan
Vz miner kamere	so haiz ich dir geben 
daz dv vnd dine gesellen	vrolichen mvgen leben 
von rossen vnd von kleideren	allez daz dv wil 
des heize ich iv bereiten	zvo der botschefte vil
Des antwrte Ruedeger		der markgraue rich 
gerte ich dines gvotes	daz were vnlobelich 
ich wil din bote gerne	 wesen an den Rin
mit min selbes gvote	 daz ich han von den henden din
Do sprach der kvnich rich	 nv wenne welt ir varn
nach der minneclichen	 got sol ivch bewarn
der reise an allen eren	vnd ovch die vrovwen min 
des helfe mir geluke	 daz si vns genedich muose sin
Do sprach aber Ruedeger	 ê wir rvomen daz lant 
wir mvezen ê bereiten	wafen vn– gewant	[45a]
also daz wirs ere	vor fvrsten mugen han 
ich wil fuern zvo dem Rine	funfhvndert wætlicher man
Swa man mich ce Burgonde	vnd die mine sehe 
daz ir islicher	danne wolde <iehen> 
daz nie kvnich deheiner	also manigen man
so verre baz gesande	danne dv ce Rine habest getan
Vnd ob duz	kvnich edel	darvmbe niht wil lan 
si was dem besten manne	Sifride vndertan 
dem Sigmvndes kinde	den hastv hie gesehen 
man moht im grozer eren	mit warheite iehen
Do sprach kvnich Ezel	 was si des reken wip 
so was wol also tiwer	des edelen fvrsten lip 
daz ich niht versmehen	die kvnniginne sol 
durch ir vil groze schoene	so gevellet si mir wol
Do sprach der marchgraue	 so wil ich iv daz sagen 
daz wir vns heben hinnen	in vier vnd zweinzech tagen 
ich enbivtez Goetelinde	der lieben vrovwen min 
daz ich nach Kriemhilde	selbe bote welle sin
Hin ze Bechlarn	 do sande Ruedeger 
wart div markgrauinne	trvrich vn– her 
er enbot ir daz er wolde	dem kvnige werben wip 
si gedahte minnechliken	an der schoenen Helchen lip
Do div marchgrauinne	die botschaft vernam 
ein teil was ez ir leide	weinens si gezam 
obe si gewinnen solde	 vrovwen alsam ê 
so si dahte an Helken	 daz tet ir innerchlichen we
Rvedeger von Vngern	in siben tagen reit 
des was kvnich Ecel	vro vn– ovch gemeit 
da ce der stat ce Wiene	beræite man in die wat 
do mohte er siner reise	niht langer haben rat
Da ce Bechlarn	wartete im Goetelint 
vn– div iunge marchgrauin	Ruedegers kint 
sach ir vater gerne	 vnd die sine man 
do wart ein liebez bitten	von schoenen vrovwen getan
E der edel Ruedeger	ze Bechlarn reit
vz der stat ze Wiene	do waren in div kleit
rehte volleclichen	vf den sovmen komen 
die fuoren in der maze	daz in wart wenich iht genomen
Do si ce Bechlaren	komen in die stat 
die sinen reisegesellen	herbergen bat
der wirt vil minnechlichen	vn– schuof in guot gemach 
Goetlint div riche	 den wirt si gerne komen sach
Als tet sin liebiv <tohter>	div iunge marchgrauin 
der kvnde nimmer		 sin komen lieber sin 
die helde vz Hunen lande		 wie gerne si si sach 
mit lachenden mvte		div edel iunchvrovwe sprach
Si vns groze willekomen	min vater vn– sine man	
do wart ein schoene danken	mit vlize da getan
der iungen markgravin	 von edelen ritter gvot 
wol weste Goetlint	 des herren Ruodegers mvot	[45b]
Do si des nahtes	 bi Ruedegere lac 
wie guetliche vragen	div marchgrauinne pflac 
war in gesendet hete	der kvnich von Hûnen lant 
er sprach	min vrov Goetlint	ich tuonz iv gerne bekant
Da sol ich mime herren	werben ein ander wip 
sid div ist derstorben	der schoenen Helken lip 
ich wil nach Kriemhilde	riten an den Rin 
div sol hie zen Hvnen	vrowe vil gewaltich sin
Daz wolde got	sprach Goetlint	mohte daz geschehen 
sid wir ir so maniger	eren hoeren iehen 
si ergazte vns miner vrovwen	noch lihte in alten tagen 
wir mohten gerne si cen Hunen	lazen krone tragen
Do sprach der markgraue Ruediger	 truttinne min 
die mit mir svlen riten	hinnen an den Rin 
den sult ir minneclichen	bieten iwer guot 
so helde varent riche	so sint si hohe gemvot
Si sprach	ez ist neheiner	daz gerne von mir nimt 
ich engebe islichem	daz im wol gezimt 
ê ir hinnen scheidet	vn– ovch iwer man	
do sprach der marchgraue	 daz ist mir liebe getan
Hei waz man richer pfelle	von ir kammeren truoc 
der wart den edelen reken	ce teile do genvoc 
ir sulet vlizeclichen	von halse vnz vf die sporn 
die im darab gevielen	die het im Ruodeger derkorn
An dem sibenden morgen	von Bechlaren reit
der wirt min sinen reken	wafen vnde kleit
vorten si den vollen	durch der Beire lant 
si wurden vf der straze	durch rovben selten an gerant
Inre tagen zvelfen	si riten an den Rin 
do kvnden disiv mere	niht verholen sin 
man seite ez dem kvnige	vnd den sinen man 
da komen vremde geste	 der wirt do vragen began
ob ieman bekande	daz man im solde sagen 
man sach ir sovmere	harte swere tragen 
daz si vil riche waren	daz wart da wol bekant 
man schuof in herberge	 in der witen stat erhant
Do die vil vnkvnden	waren in bekomen 
do wart der selben herren	vaste war genomen 
si wunderte wannen fueren	die reken an den Rin 
der wirt Hagenen vragete	wer die herren mohten sin
Do sprach der helt von Trony	 ich han ir niht gesehen 
als wir si nv geschovwen	 ich han iv wol veriehen
von swannen si riten	 her in dize lant 
si svln sin vil vremde	 ich habe si schiere bekant
Den gesten herberge		waren nv genomen 
in vil richiv kleider	was der bote komen
vnd sine hergesellen	 ze hove si do riten 
si fuorten guotiv kleider	 vil harte spehe gesniten
Do sprach der snelle Hagene	 als ich mich kan verstan 
wand ich den herren lange	niht gesehen han	[46a]
si varen wol gelike	sam ez sei Ruedeger
von hvnnissen landen	der degen kuene vnde her
Wie sol ich daz gelovben	sprach der kvnich zehant 
daz der von Bekelar	kome in dize lant	
als der kvnich Gvnther	die rede vol sprach 
Hagne der kuene	 den gvoten Ruedegeren sach
Er vnd sine vrivnde	si liefen alle dan 
do sach man von den rossen	funf hvndert riter stan 
do wurden wol enphangen	 die von Hunen lant 
boten nie getrvogen	also herlich gewant
Do sprach harte lûte	von Trony Hagne 
nv sin gote willekomen	dise degene 
der vogt von Bechellaren	vn– alle sine man	
der antfanch wart mit eren	den snellen Hunen getan
Des kvniges nehesten mage	die giengen da man sach 
Ortwin von Mece	 zvo Ruedegere sprach 
wir haben in aller wile	mere nie gesehen
geste so gerne	des wil ich werliche iehen
Des gruozes si do dancten	den reken vber al 
mit den hergesinden	 si giengen in den sal 
da si den kvnich fvnden	bi mangem kuenen man 
der herre stuont von sedele	daz was durch groze zuht getan
Wie rehte zuhtechlichen	 er zuo den boten gie 
Gvnther vn– Gernot		vil flizechlich enpfie
den gast mit sinen mannen	als im wol gezam 
den guoten Ruodiger	 er bi der hende genam
Er braht in zuo dem sedele	da er selbe saz 
den gesten hiez er senchen	 vil gerne tet man daz	
mete den vil guoten	vn– den besten win 
den man kvnde vinden	in dem lande al vm den Rin
Giselher vn– Gere	die waren beide komen 
Dancwart vn– Volker	die heten schiere vernomen 
vmbe dise geste	si waren vro gemvot	
si enphiengen vor dem kvnnige	die riter edele vn– guot
Do sprach zuo sime herren	von Trony Hagne 
ez solten immer dienen	dise degne
daz vns der markgraue	zuo liebe hat <getan> 
des solte lon enphahen	 der schoenen Goeteline man
Do sprach der kvnich Gunther	 ine kan daz niht verdagen 
wie si sich gehaben beide	daz sult ir mir sagen 
Ezel vn– Helche	vz der Hunen lant	
do sprach der marchgraue	 ich tuonz ich gerne bekant
Do stuont er von dem sedele	mit allen sinen man 
er sprach zuo dem kvnige	vn– mac daz si getan 
daz ir mir	furste	erlovbet	so wil ich niht verdagen
die mere	die ich bringe	sol ich iv willechlichen sagen
Er sprach	swaz man iv mere	bi iv enboten hat 
die erlovbe ich iv ze sagene	ane frivnde rat 
ir svlt si lazen hoeren	mich vnd mine man 
wan ich iv alle heren	 hie ze werbene gan	[46b]
Do sprach der bote biderbe	iv enbivtet an den Rin
getriwelichen dienest	der groze voget min 
darzuo allen frivnden	die ir mvget han 
ovch ist dise botschaft	mit grozen triwen getan
Iv bat der kvnich edele	clagen sine not 
si volc ist ane vrevde	min vrowe die ist tot 
Helche die vil rike	mines herren wip 
an der ist nv verweiset	vil maniger iunchfrovwen lip
kint der edelen fursten	die si gezogen hat 
da von ez inme lande	vil iemerlichen stat 
dine hant nv leider niemannen	der ir mit triwen phlege 
des wen ovch sich vil seine	des kvniges sorge gelege
Nv lon ime got	sprach Gvnther	daz er den dienst sin
so willechlichen enbutet	mir vn– den frivnden min 
den sinen gruoz ich gerne	hie uernomen han 
daz sulen gerne dienen	beide mage vn– mine man
Do sprach von Burgvnde	der reke Gernot 
die welt mach immer riwen	der schoenen Helken tot
durch ir vil manich tvgende	der si kvnde pflegen	
der rede gestvont im Hagene	 der degen
Do sprach aber Ruedeger	 der edel bote her 
sit ir mir	kvnich	erlovbet	ich sol iv sagen mer 
waz iv min lieber herre	 her enboten hat 
sit im sin dinch nach Helchen	 so rehte kvmerlichen stat
Man sagete minen herren		 Criemhilt si ane man 
her Sifrit si erstorben	vn– ist daz so getan 
wolt ir ir des gunnen		so sol si krone tragen
vor Ecelen reken		daz hiez ir min herre sagen
Do sprach der kvnich riche	wol gezogen was sin mvot 
si hoeret minen willen	ob si ez gerne tuot 
den wil ich iv kvnden	 in disen drien tagen 
ê ich ez an ir fvnde	 zuowiv sol ich Ecelen versagen
Die wile man den gesten	hiez schaffen guot gemach 
in wart da so gedienet	daz Rudiger des iach 
daz er da hete vrivnde	vnter Gvnthers man 
Hagne im diente gerne	 er het im ê alsam getan
Alsus beleip do Rudiger	vnz an den driten tac 
der kvnich nach rate sande	 vil wislich er pflac	
vn– ob ez sine mage	duhte guot getan 
daz Kriemhilt nemen solte	den kvnich edelen zuo einem man
Sie rieten ez algemeine	niwan Hagne 
der sprach zuo Gvnther	 demn kuonen degne 
habt ir rehte sinne	so wirt ez wol behuot 
vn– ob sis volgen wolte	daz irz doch nimmer getuot
Warumbe	sprach do Gvnther	solt ichs volgen niht	
swaz der kvnneginne	liebes noch geschit 
daz sol ich ir wol gvnnen	wan si ist die swester min 
wir soltenz selbe werben	 ob ez ir ere mohte sin
Do sprach aber Hagne		 nv lat die rede stan 
het ir Ecelen kvnde	 als ich sin kvnde han	[47a]
sol si iv danne minnen	als ich iv hoere <iehen> 
so ist iv alreste	von schvlden ze sorgen geschehen
Warvmbe	sprach do Gvnther	ich chan vil wol bewaren daz 
daz ich im kom so nahe	daz ich deheinen haz
von ime dulten muose	 vn– wurde si sin wip	
do sprach aber Hagne	daz gerætet nimmer min lip
Man hiez nach Gernote	vn– Gyselhere gan 
ob die herren beide	duhte guot getan 
daz Kriemhilt solde nemen	den richen kvnich her 
noch widerreit ez Hagne	vn– nieman mer
Do sprach von Bvrgonden	Gyselher der degen 
nv mvget ir	frint Hagne	noch der triwen pflegen 
ergezet si der leide	vnd ir ir habet getan 
an swiv ir wol gelvnge	daz svldet ir beliben lan
Ia habet ir miner swester	getan so mænigiv leit	
so sprach aber Giselher	 der reke vil gemeit 
daz si des hete schvlde	daz si iv wære gram 
nie man noch einer vrovwen	vrovde mere benam
Daz ich daz wol bekenne	daz tvon ich iv kvnt 
vnd sol si nemen Ecele	vnd gelebet si an die stvnt 
si gett vns vil leide	swie siz getreit an 
ia wirt ir da dienende	vil manich wetlicher man
Des antwurte do		der kuene Gernot 
ez mach also beliben	vnz an ir beider tot 
daz wir niht komen	 in Ecelen lant 
wir svln ir sin getriwe	daz ist vns zen eren gewant
Do sprach aber Hagne		mir mac daz nieman gesagen 
sol div edel Kriemhilt	 Helken krone tragen 
si getvot vns leide	swie si gefuege daz 
ir svlt ez lan beliben	daz zimet iv reken mikel baz
Mit zorne sprach do Giselher	der schoene voten svn 
wir svln doch niht alle	meinechlichen tuon 
swaz eren ir geschehe	vro solten wir des sin 
swaz ir geredet Hagne	 ich diene ir durch die triwe min
Do daz gehorte Hagne		do wart er im gemvot 
Gernot vn– Giselher		die stolzen riterre guot 
vn– Gvnther der riche	 ze iungist rieten daz 
ob ez lobete Kriemhilt	si wolten ez lazen ane haz
Do sprach der furste Gere	 ich wilz der vrovwen sagen 
daz si ir den kvnich Ecele	laze wol behagen 
dem ist so manich reke	 mit vorhten vndertan 
er mach sich noch ergezen	si leides ie gewan
Do gie der snelle reke	da er Kriemhilte <sach> 
si enpfie in guotliche	wie balde er do sprach 
ir mvget mich gerne gruozen	vn– geben petenbrot 
ivch wil geluche scheiden	 vz aller iwer not
Ez hat durch iwer minne	vrowe	da her gesant
ein der aller beste	der ie kvnniges lant
gewan mit vollen eren	oder krone solde tragen 
ez werbent riter edele	daz hiez iv iwer bruoder sagen	[47b]
Do sprach die iamers rike	 iv sol verbieten got 
vn– allen minen frivnden	daz si deheinen spot
an mir armer voben	 waz solt ich einen man
der ie herzeliebe	 von guoten wibe gewan
Si widerreit ez sere	do komen aber sint
Gernot ir bruoder	vn– Giselher daz kint 
si baten minneclichen	vn– trosten ir den mvot 
ob si den kvnich geneme	daz wer ir werlichen guot
Vberwinden kvnde nieman	do daz edele wip 
daz si minnen wolte	deheines mannes lip 
do baten si die degne	 nv lazet doch geschehen 
ob ir anders niht getuot	daz ir den boten ruochet sehen
Daz wil ich niht versprehen	so sprach daz edele wip 
ich en sehe vil gerne	den Ruedegers lip
durch sine manige tvgende	vn– wer er her niht gesant 
swerz ander boten were	 dem wer ich immer vnbekant
Si sprach	ir svlten morgen	heizen her gan
zuo miner kemenaten	ich wil in hoeren lan
vil gar den minen willen	sol ich im selbe sagen	
ir war erniwet	 daz ir vil grozliche chlagen
Do gert ovch niht anders	der edele Ruediger 
wan daz er gesehe	die kvnneginne her 
er weste sich so <wise>	ob ez immer kunde ergan 
daz si sich den reken	 vberrede mvoze lan
Des anderen morgens fruo	do man die messe sanc 
die edelen boten komen	 do wart daz groz gedranc	
die mit Ruedigere	zuo houe wolten gan 
der sach man da gekleidet	vil manigen herlichen man
Criemhilt div schoene	vn– vil reine gemvot 
si warte Ruedigere	 dem edelen boten guot 
der vant si in der wete	die si alle tage truoch 
da bi truoch ir gesinde	richer cleider genvoch
Si gie im engegene	zuo der thuor stan
vn– enpfiench vil guotliche	den edelen man 
niwan selbe zwelfter	 er darin ze rat gie 
man bot im grozen dienst	in komen hoher boten nie
Man hiez den herren sizen	vn– die sine man 
die zvene marchgrauen	 die sach man vor ir stan 
Ekewart vn– Gern		die edelen riter guot 
durch die hvsfrowen	si sahen nieman wol gemvot
Si sahen vor ir sicen	vil manige schoene meit 
do pflac niwan iamers	die vrovwe vil gemeit 
ir wat was vor den brusten	von heizen trehen naz 
der edele marchgraue	 wol sach an Kriemhilde daz
Do sprach der bote here	 vil edel kvniges kint 
mir vn– minen gesellen	die mit mir komen sint 
svlt ir daz erlovben	 daz wir vor iv stan
vn– iv sagen div mere	 warnach her geriten han
Nv si iv erlovbet	sprach div kvnnegin 
swaz ir reden wellet	also stat min sin	[48a]
daz ich gerne hoere	ir sit ein bote guot	
die anderen do wol horten	den ir vngwilligen mvot
Do sprach von Bekelaren	der furste Ruediger 
mit triwen groze liebe	Ecel	ein kvnnich her 
hat iv enboten	vrovwe	her in dize lant 
er hat nach iwer minne	 vil guote reken her gesant
Er enbivtet iv minnecliche	liep ane leit 
steter frivntschefte	der si er iv bereit 
als ê tet vron Helchem	div im ze herzen lac 
ia hat er nach ir tvgenden	vil dike vnvrolichen tac
Do sprach div kvnniginne	 marchgrave Rudiger 
wer ieman der bekande	 minen scharphen ser 
des bete nmich niht truoten	noch deheinen man 
ia verlos ich einen	den vrovwe ie gewan
Waz mac ergecen leides	sprach der vil kuene man 
wan frivntliche liebe	swer die kan began 
vn– der dan ein kvset	 der im ze herce kvmt 
von hercenlichen leide	niht so grozlichen frumt
Vn– geruochet ir ze minnen	den edelen herren min 
zwelf vil richer krone	svlt ir gewaltich sin 
darzuo git iv min herre	wol drizech fursten lant 
div elliv hat betwungen	sin vil ellenthaftiv hant
Ir svlt ovch werden vrovwe	vber manigen werden man	
die miner vrovwen Helchen	waren vndertan 
vn– vber manige vrovwe	der si het gewalt 
von hoher fvrsten kvnne	sprach der kuene degen balt
Darzuo git iv min herre	daz heizet er iv sagen	
ob ir geruochet chrone	bi dem kvnige tragen 
gewalt den aller hohesten	den Helche ie gewan 
den svlt ir gewaltechlichen	haben vor Ecelen man
Do sprach div kvniginne	 wie mohte minen lip
immer des gelusten	 daz ich wurde heldes wip 
mir hat der tot an eime	so rehte leide getan 
des ich vnz an min ende	mvoz vnfrolichen stan
Do sprachen aber die Hunen	 kvnniginne rich 
ivwer leben wirt bi Ezele	so rehte lobelich 
daz ez ivch immer wune	ist daz ez ergat 
wan der kvnich rike	vil manigen cieren degen hat
Helchen iuncvrowen	 vn– ivwre megetin 
solten di bi ein ander	ein gesinde sin 
da bi moehten reken	 werden wol gemvot 
latez iv	vrovwe	raten	ez wirt iv werlichen guot
Si sprach in ir zvhten	 nu lat die rede stan
vnz morgen vruo		so sult ir her gan 
ich wil iv antwurten	des ir da habet muot	
des muosen do volgen	die recken kuene vn– guot
Do si zen herbergen	alle komen dan 
do hiez die edele vruewe	nach Giselhere gan
vn– ovch nach ir mvoter	den besten sagt si daz 
daz si gezeme weinens	vn– niht anders baz	[48b]
Do sprach ir bruoder Gyselher	swester	mir ist geseit	
vn– wilz ovch wol gelovben	daz alliu diniv leit
der kvnich Ecel wende	vn– nimes dvn zeinem man 
swaz ander ieman rate	so dvnchet ez mich guot getan
Er mac dich wol ergecen	sprach aber Gyselher 
von Roten zuo dem Rine	von der Elbe unz an daz mere 
so ist kvnich deheiner	so gewaltich niht 
dv mach dich vreuwen balde	so er din ze konen giht
Si sprach	lieber bruoder	zwiv ratestu mir daz 
clagen vn– weinen	mir immer zeme baz 
wie sold ich vor reken	da ze hove gan 
wart min lip ie schoene	des bin ich ane getan
Do sprach die vrovwe vote	ir lieben tohter <zuo> 
swaz dine bruoder raten	liebez kint	daz tuo 
volge dinen vrivnden	so mac dir wol geschehen 
ich han dich doch so lange	mit grozem iamer <gesehen>
Do bat si got vil dike	fuegen ir den rat 
daz si ce gebene hete	golt	silber vn– wat 
sam ê bi ir manne	 do er noch was gesvnt 
si gelebte doch nimmer	mere so vroliche stvnt
Si gedahte in ir sinne	vn– sol ich minen lip
geben eime heide		ich bin ein cristen wip	
des mvoz ich zer werlte	inmer schanden han 
git er mir alle riche	ez ist von mir vngetan
Da mit siz lie beliben	die naht vnz an den tac
div vrovwe an ir bette	 mit vil gedanken lac 
div ir vil lieben ovgen	getrvkenten nie 
vnz si aber den morgen	 hin ze mettin gie
Ze rehter messezite	 die kvnige waren komen 
si heten aber ir swester	vnder die hende genomen 
ia rietens ir ze minnen	den kvnich von Hivnen lant 
die vrovwen ir deheine	luzzel vrolicher vant
Do hiez man daz gewinnen	die Ecelen man 
die nv mit vrlovbe	gerne weren dan 
geworben oder gescheiden	swie ez do moehte sin 
ze hove komen do Rudiger	die helde <rieten> wider in
daz man rehte erfuore	des edelen fursten mvot 
vn– teten daz bi cite	daz divhtes alle guot 
ir wege weren verre	 wider in ir lant 
man brahte Rvedigeren	da man Kriemhilten vant
Vil minneclichen bitten	der reke do began
die edelen kvnniginne	si solte in hoeren lan
waz si enbieten wolte	in Ecelen lant 
er niwan an ir niht anders	niwan lovgenen vant
daz si nimmer minnen wolte	mer deheinen man 
do sprach der marchgraue	 daz were missetan 
zuo wiv woldet ir verderben	einen also schoenen lip 
ir mvget noch mit eren	werden guotes mannes wip
Niht half daz si gebaten	vnz daz Rudiger
gesprach heinliche	 die kvnniginne her	[49a]
er wolte si ergezzen	swaz ir ie gesach 
ein teil begvnd ir semften	do ir grozer vngemach
Er sprach zer kvniginne	 lat ivwer weinen sin 
ob ir zen Hvnen hetet	nieman danne min 
getriwer miner mage		vn– ovch der minen man 
er muos es sere engelten	vn– het iv ieman iht getan
Da von wart do geringet	wol der vrowen mvot 
si sprach	so swert mir eide	swaz mir ieman getuot 
daz ir sit der nehste	der buoze miniv leit	
do sprach der marchgraue	 des bin ich	vrovwe	vil bereit
Mit allen sinen mannen	swuor ir do Rvdiger
mit triwen immer dienen	vn– daz die reken her
ir nimmer niht versageten	vnz Ecelen lant 
des si eren haben solte	des sichert ir do Rvdigers hant
Do gedahte div getriwe	sit ich vrivnde han
also vil gewinnen	so sol ich reden lan
die lûte swaz si wellent	ich iamerhaftez wip 
waz ob noch wirt errochen	des minen mannes lip
Si gedaht	sit daz Ecele	der reken hat so vil 
sol ich den gebieten	 so tuon ich swaz ich wil 
er ist ovch wol so riche	daz ich ze gebene han 
mich hat der leidege Hagene	mines guotes ane getan
Si sprach ze Ruedigere	het ich daz vernomen
daz er niht were ein heiden	so wer ich gerne komen 
swar er het willen	vn– neme in zeinen man	
do sprach der markgraue	 die rede svlt ir	vrovwe	lan
Er hat so vil der reken	in kristenlicher ê 
daz iv bi dem kvnnige	 nimmer wirdet we 
waz ob ir daz verdienet	daz er tovfet sinen lip 
des mvget ir gerne werden	des kvniges Ecelen wip
Do sprach aber ir bruoder	 nv lobez	swester min 
ivwer vngemvote	 daz svlt ir lazen sin	
si batens also lange	vnz daz doch ir trurich lip
lobete vor den helden	si wurde Ecelen wip
Si sprach	ich wil iv volgen	ich vil arme kvnigin 
daz ich var ze den Hvnen		so daz nv mach gesin 
swen ich han die frivnde		die mich fueren in sin lant	
des bot do vor den helden	 div schoene Kriemhilt die hant
Do sprach der marchgraue	 habet ir zwene man 
dar zuo han ich ir mere	ez wirdet wol getan 
daz wir ivch wol nach eren	bringen vber Rin 
irn svlt niht langer	vrowe	hie zen Burgonden sin
Ich han funf hvndert manne	vn– ovch der mage min 
die svln iv hie dienen	vn– da heime sin 
vrowe	swie ir gebietet	ich tuon iv selbe alsam 
swan ir mich mant der <mere>	daz ich michs nimmer gescham
Nv heizet iv bereiten	 iwer pfertcleit	
die Ruedigers ræte	 iv nimmer werdent leit	
vn– saget ez iwer magden	die ir da fueren welt 
ia chvmt vns vf der straze	vil maniger vzerwelter helt	[49b]
Si heten noch gesmide	daz man da vor treit
bi <Sifrides> ziten	daz si vil manige meit
mit eren mohte fueren	 swenne si wolde von dan 
hei waz man schoener setele	den schoenen vrovwen gewan
Ob si ie getrovgen	deheiniv richiv chleit 
der wart zuo zir verre	vil maniges nv bereit 
wan in von den kvnige	so vil gesaget wart 
si sluzzen vf die kisten	die ê stvnden wol bespart
Si waren vil vnmuozech	 wol viumphtehalben tac 
si svohten vz der valten	 des vil darinne lac 
Kriemhilde ir kameren	 ensliezen began 
si wolte machen riche	alle die Ruedigers man
Si hete noch des goldes	von Niblunge lant 
si wande ez zen Hovunen	solte teilen ir hant 
ez en kvnden hundert meule	dannen niht getragen	 
div mere horte Hagne	do von Kriemhilde sagen
Er sprach	sit mir vro Kriemhit	nimmer wirdet holt 
so mvoz ovch hie beliben	daz Sifrides golt 
zewiv sold ich minen vienden	lan so michel guot 
ich waiz vil wol waz Kriemhilt	mit disme sazze getuot
Ob si in brehte hinnen	ich wil gelovben daz	
er wurde doch zerteilet	vf den minen hals 
si habent ovch niht der rosse	die in solten tragen 
in wil behalten Hagne	 daz sol man Kriemhilte sagen
Do si gehorte div mere	daz was ir grimme leit 
ez wart ovch den kvnnigen	 allen drien geseit 
si wolten ez gerne wenden	do des niht geschach	
Ruodiger der edele	 harte vroliken sprach
Richiv kvnniginne	ce wiv claget ir daz golt 
iv ist der kvnich Ecele	so grozlichen holt 
gesehent iv sin ovgen	 er git iv also vil 
daz vz verswendet nimmer	des ich iv	vrovwe	weren wil
Do sprach div vil edel kvniginne	 vil edeler Ruediger 
ez gewan nie kvniges tohter	 rihtume mer
danne der mich Hagne		hat ane getan	
do kom ir bruoder Gernot	hin zer kameren gegan
Mit gewalt des kvniges	den sluzel stiez er an die tur 
golt daz Kriemhilde	teilte man derfur
ze drizech tusent marken	oder dannoch baz 
er hiez ez nemen die geste	liep was Gvnthere daz
Do sprach von Bechelaren	der Gothelinde man 
ob ez min vrowe Kriemhilt	allez mohte han 
swaz sin ie gefueret	von Niblvnge lant 
sin solte luzel rovren	min oder der kvnniginne hant
Nv heizet ez behalten	wand ich niht enwil 
ia fuort ich von landen	des minen also vil 
daz wirs vf der strazen	haben guoten rat 
vn– vnser koste hinnen	harte herliche stat
Da vor in allen wilen	gefullet zwelef schrin
des aller besten goldes	daz inder mohte sin [50a]
hete die ir mage	daz fuorten si von dan 
vn– gecierde vil der vrowen	daz si cer uerten solten han
Gewalt des grimmen Hagne	 duhte si ce starch 
si het ir <ophergoldes>	noch wol tusent marc 
si teiltenz siner sele	ir vil lieben man 
daz duhte Rudigeren		min grozen triwen getan
Do sprach div clagende kvnigin	 wa sint die vriunde min 
die durch mine liebe	wellent ellende sin 
die svln mit mir riten	in der Hunen <lant> 
die nemen schatz minen	vn– kovvfen ros vn– ovch gewant
Do sprach zer kvnniginne	der marchgrave Ekewart 
sit daz ich aller erste	iwer gesinde wart 
so han iv mit triwen	 gedienet	sprach der degen 
vn– wil vns an min ende	des selben immer bi iv pflegen
Ich wil ovch mit mir fueren	funf hvndert miner man 
der ich iv ce dienste	mit rehten triwen gan 
wir sin vil vngescheiden	ezen tuo danne der tot	
der rede neich im Criemhilt	des gie ir werlichen not
Do zoch man dar die moere	si wolten varen dan 
da wart vil michel weinen	 von vrovden getan 
vote div vil rike	 vnd manic schoene meit 
die zeigten daz in were	nach frov Criemhilt leit
Hvndert richer mægde	fuort si mit ir dan 
die wurden so gecleidet	als in daz wol gezam 
do vielen in die trehne	von liehten ovgen nider 
si gelebete vil der vienden	ovch bi Ecelen sider
Do chom der herre Giselher	vn– ovch Gernot
mit ir gesinde	als in ir gesinde gebot 
do wolten si beleiten	ir lieben swester dan 
do fuorten <si> ir reken	wol tuset wetlicer man
Do kom der snelle Gere	vn– ovch Ortwin 
Kvmolt der kuchenmeister	da mite muose sin 
si schuofen die nahtselde	unz an Tuonawe stat 
do reit nihe furbaz Gvnther	wan ein lucel fur die stat
E si von Rine fuoren	si heten fur gesant
ir boten harte snelle	nider Hunen lant 
die dem kvnge sagten	daz im Ruediger
ze wibe <hete> erworben	die edelen kvniginne her