v lazen daz beliben	wie si gebaren hie 
hochgemvoter reken	die gefuoren nie
so rehte herlichen	 in deheines kvniges lant 
si heten swaz si wolten	beide wafen vn– gewant
Der vogt von dem Rine	cleidete sine man 
sechzech vn– tvsent	als ich vernomen han	
vn– nivn tvsent chnehte	gen der hohcit 
die si da heime liezen	die beweint ez sit
Do truoch man daz gereite	ze Wormez vzer den hof 
do sprach da von Spire	ein alter bischof
zvo der schoenen voten	 vnser vruvnde wellent varn
gen der hohcite	got mvose si da bewarn
Do sprach zuo zir kinden	div edele vote 
ir soltet hie beliben	helde guote 
mir ist getrovmet hint	 von engestlicher not 
wie allez daz gefuegele	 in disme lande were tot
Swer sic an trovme wendet	 sprach do Hagne 
der enweiz der rehten mere	niht ze sagene 
wenne ez im zen eren	 volleclichen ste 
ich wil daz min herre	ze hove nach urlovbe gê
Wir svln vil gerne riten	in Ecelen lant 
da mag wol dienen kvnige	guoter helde hant 
da wir da schovwen mvozen	Criemhilt hohcit	
Hagne riet die reise	idoch <gerov> ez in sit
Er hetez widerraten	wan daz Gernot
mit vngefuoge	im also missebot 
er mant in Sifrides	<vrov> Kriemhilt man 
er sprach	da von wil Hagne	die groze hovereise lan
Do sprach von Trony Hagne	 durch vorhte ich niht entvo 
swenne ir gebietet	helde	so svlt ir grifen zvo 
ia rite ich mit iv gerne	in Ecelen lant	
sit wart von im <verhavwen>	manich helm vn– rant
Div schif bereitet waren	da was vil manic man 
swaz si cleider heten	die truoch man dar an 
si waren vil vnmuozech	 vor abendes zit 
si huoben sich von hvse	vil harte vroliche sit
Die gecelt vn– ovch die hutten	spien man an daz gras
anderthalp des Rines	da daz geseze was 
den kvnich bat noch beliben	sin vil schoenes wip 
sie truote noch des nahtes	den sinen wetlichen lip
Bvsunen fleutieren	huob sic des morgens fruo 
daz si varen solden	 do grifen si do zvo 
swer liep hete an arme	der trivte vrivndes lip 
des schit sit vil mit leide	des kvniges Ecelen wip
Div kint der schoenen voten	die heten einen man 
kuone vn– getriwen	do si do wolten dan 
do sagt ez dem kvnegen	sinen mvot	[59b]
er sprach	des mvoz ich truoren	daz ir die houereise tuot
Er was geheizen Rumolt		vn– was im helt zer hant 
er sprach	wem welt ir lazen	lûte vnd ovch div lant 
daz nieman kan erwenden		iv reken iwern mvot 
Kriemhilte mere		nie geduhten mich guot
Daz lant si dir bevolhen	vn– ovch min kindelin 
vn– diene wol den vrovwen	 daz ist der wille min 
swem dv sehest weinen	dem troste sinen lip 
ia tvot vns nimmer leide	 des kvnic Ecelen wip
Div ros bereitet waren	 den kvnigen vn– ir man 
mit minneclichem kvsse	schiet vil maniger dan 
dem in hohen mvote	 lebete do der lip 
daz muose sit beweinen	 vil manich wetlich wip
Do man die snellen reken	sach zen rossen gan 
do kos man vil der vrowen	trurichlichen stan 
daz ir vil langez scheiden	seite in wol der mvot 
vf grozen schaden ze komen	daz herze nieman sampfte tuot
Die snellen Bvrgonden	sich vz huoben 
do wart in dem lande	ein michel voben 
beidenthalp dr berge		weinde wip vn– man 
swe dort ir volch tete	 si fuoren vrolich dan
Die Niblvnges helde	komen mit in dan
in tvsent halspergen	die heime heten lan
manige schoene vrovwen	die si gesahen nimmer me 
Sifrides wunde	taten Kriemhilde we
Do schichten si die reisen	gen dem Movme dan 
vf durch Ostervranchen	 die Gvnthers man 
dar leitete sich Hagne	dem was ez wol bekant 
ir marschach was Dancwart	der helt von Burgonden lant
Do si von Ostervranken	gen Swanevelde riten 
da mohte man si kiesen	an herlichen siten 
die fursten vnd ir mage	die helde lobesam 
an dem zwelften morgen	 der kvnich zer Tuonovwe kom
Do reit von Troni Hagne	zaller vorderost 
er was den Niblvngen	ein helflicher trost 
do erbeizte der degen kûne	nider vf den sant 
sin ros er harte balde	zvo eime bovme gebant
Daz wazzer was engozzen	vn– div schif verborgen 
ez ergie den Niblvngen	zen grozen sorgen 
wie si komen vbere	 der wal was in ze bereit 
do erbeizte zvo der erden	vil manich riter gemeit
Leide	so sprach Hagne	mac dir hie wol geschehen	
vogt von dem Rine		nv maht dv selbe sehen 
daz wazzer ist enegozzen	vil starch ist im sin fluot 
ia wen wir hie verliesen	noch hivte manigen reken guot
Waz wizet ir mir	Hagne	sprach der kvnic her 
durch iwers selbe tvgende	<vntrostet> vns niht mer 
den fvrt svlt ir vns svochen	hinvber an daz lant 
daz wir von hinnen bringen	beide ros vnd <ovch> gewant 
Ja enist mir	sprach Hagne	min leben niht so leit 
daz ich mich welle ertrenken	in disen vnden breit 
ê sol von minen handen		ersterben manich man [60a]
in Ecelen landen		 des ich vil guoten willen han
Belibet bi dem wazzer	ir stolzen riter guot 
ich wil die vergen suochen	selbe bi der fluot 
die vns bringen vbere	in Gelpfrates lant	
do nam der starke Hagne	sinen guoten schildes rant
Er was wol gewafent	den schilt er dannen truoch 
sinen helm vf gebvnden	lieht was er genvoc 
do truoch er ob der brunne	ein wafen also breit 
daz ze beiden eken	vil harte vreislichen sneit
Do suohte er nah den vergen	wider vn– dan 
er horte wazzer giezen	losen er began 
in einem schoenen brvnnen	taten daz wisiv wip 
die wolten sich da kûlen	vn– badeten iren lip
Hagne wart ir innen	er sleich in tovgen nach 
do si daz versvnnen	do was in dannen gach 
daz si im entrunnen	des waren si vil her 
er nam in ir gewete	der helt schadete in niht mer
Do sprach daz eine merwip	 Hadburch was si genant 
edel riter Hagne	wir tvon dir hie bekant 
swenne ir vns gebet wider	vnser gewant 
wie iv ce den Hvnen	 iwer houereise ergant
Si swebten sam die vogele	vor im vf der fluot 
des hugten im ir sinne	starch vn– <gvot> 
swaz si im sagen <wolden>	er gelaubete in dester baz 
des er do hin ce in do gerte	wol beschieden si im daz
Si sprach	ir mvget wol riten	in Ecelen lant 
des sece ich iv ce burgen	 min triwe hie ze hant 
daz helde nie gefuoren	in deheiniv riche baz
nach also grozen eren	nv gelovbee werlichen daz
Der rede was do Hagne	in sime herzen her 
do gab er in ir kleider	vn– svmte sich niht mer 
do si an geleiten	ir wunderlich gewant 
do sageten sim rehte	die reise in Ecelen lant
Do sprach daz ander merwip	 div hiez Siglint 
ich wil dich warnen	Hagne	Aldrians kint 
durch der wete liebe	 hat min mvome dir gelogen 
kvmstv cen Hunen		 so bistv sere betrogen
Ia soltu wider keren	daz ist an der zit	
wan ir helde kuone	 also geladen sit 
daz ir sterben muozet	in Ecelen lant 
swelhe dar geritent	die habent den tot an der hant
Do sprach aber Hagne	 ir trieget ane not 
wie mohte ez sich gefuegen	daz wir alle tot
solden da beliben	 durch iemans haz	
si begvnden im div mere	sagen kvntlicher baz
Do sprach aber div eine	 ez mvoz also wesen 
daz iwer einer	 chan da niht genesen 
niwan des kvniges kapelan	daz ist vns wol bekant 
der kvmt gesunt widere	in Gunthers lant
Do sprach in grimmem muote	der kuene Hagne	[60b]
daz were minen herren	muolich ce sagene 
daz wir zen Hvnen solden	verliesen alle den lip 
nv ceig vns vberz wazzer	allerwisete wip
Si sprach	sit dv der verte	niht wellest haben rat 
swa oben bi dem wazzer		ein herberge stat 
darinne ist ein verge	vnd nindert anderswa	
der mere der er vragte	der gelovbet er sich da
Dem vngemvoten reken	 sprach div eine nach 
nv bitet noch	er Hagene	ia ist iv gar ze gach 
vernemet noch baz div mere	wie ir komet vber sant 
dirre march herre	der ist Else genant
Sin bruoder der ist geheizen	der degen Gelpfart 
ein <herre> in Beierlande	vil mvelich ez iu stat 
welt ir durch sine marke	 ir svlt ivch wol bewarn
vn– sult ovch mit den vergen	vil bescheindenlichen varn
Der ist so grimmes mvotes	der lat ivch niht genesen 
irn welt mit guoten sinnen	bi dem helde wesen 
welt ir daz er ivch fuere	so gebet ir im den solt 
her huetet disses landes	 vn– ist Gelfrate holt
Vn– chomet er niht	ecite	so ruefet vber fluot
vn– iehet ir haizet Amelrich	des was ein helt gvot
der durch veintschefte	 ruomte dize lant 
so chvmet iv der verge	 swenne im der name wirt erkant
Der ubermvote Hagne	 den vrovwen do neich 
er en reite niht mere	 wan daz er stille sweich 
do gie er bi dem wazzer	hoher an den sant 
da er anderthalben	 ein herberge vant
Er begvnde ruofen	vaste vber die fluot 
nv hol mich hie	verge	sprach der degen guot 
so gib ich dir ze miete	 von golde einen bovc vil rot 
ia ist mir dirre verte	 werlichen not
Der verge waz so riche	daz er niht dienen zam 
da von er lon vil selten	von ieman da genam 
ovch waren sine chnehte	vil hohe gemvot 
noch stvont allez Hagne	 hie dishalp der fluot
Do ruoft er mit der kefte	daz al der wac erdoz
von des heldes sterke	div was michel vn– groz 
nv hol mich Almerichen	ich bin der Eisen man 
der durch starke vintschaft	von disem lande entran 
Vi hohe an eime swerte	ein bovc er im do bot	
lieht vn– schoene	 was er vol goldes rot	
daz man in vber fuorte	in Gelphates lant 
der vbermvote verge	nam selbe daz ruoder an die hant
Ovch was der selbe schifman	mvolich gesit 
div gir nach grozem guote	vil boser ende git 
do wolt er verdienen	daz Hagnen golt vil rot 
des leit er von dem degne	den swertgrimegen tot
Der verge fuor genote	 hinvber an den sant 
den er dannen horte	do er des niht envant 
do zvrnt er erliche	 do er Hagnen sach	[61a]
vil harte grimmeclichen	er do zuo dem helde sprach
Ir mvget wol sin geheizen	bi namen Amerlich 
des ich mich hie verwene	 den sit ir vngelich 
von vater vnd von mvoter	was er der bruoder min 
nv ir mich betrogen habet	ir mvoset dishalben sin
Nein	durch got den richen	sprach do Hagne 
ich bin ein vremder reke	 vn– sorge vf degene 
nv nemt hin vrivntliche	 minen solt 
daz ir mich vber fuoret		ich bin iv werlichen holt
Do sprach aber der verge	 desen mach niht gesin 
ez habent viende	 die lieben herren min 
darum ich niemen vremden	 fuor in dize lant 
so lieb dir si ze lebene	so trit vil balde vz an daz lant
Nvn tuot des niht	sprach Hagne	trûrich ist min mvot 
nemt von mir ze minnen		dize golt vil gvot 
vn– fuerent vns vber tvosent ros	vn– also manic man	
do sprach der grimme verge		daz wirdet nimmer getan
Er huop ein starkez ruoder	 michel vn– breit 
er slvoch vf Hagenen		 des wart er vngemeit	
daz er in dem schife	struhte an siniv knie 
so rehte grimmer verge	kom zvo dem Troniære nie
Do wolt er baz erzvrnen	den vbermvoten gast 
er sluoch im ein schalten	daz div gar zerbrast 
Hagnen vber hovbet		er was ein starker man	
da von der Eisen verge	den grozen schaden gewan
Mit grimmegem mvote	greif Hagne zehant
vil balde ze einer schaide	da er ein wafen vant 
er sluoch im ab daz havbet	vn– warf ez an den grunt 
div mere wurden schiere	den Burgonden kvnt
In den selben stvnden	da er den schifman sluoch 
daz schif floz enovwe	 daz was im leit genvoch 
ê erz gerihte widere	mveden er began 
do zoch vil kreftecliche	des kvnich Gvnthers man
Mit zvgen harte swinden	kerte ez der gast 
vnz im daz starche ruoder	an siner hant cebrast 
er wolde zvo den reken	 vz an einen sant 
da was da heinz mere	hei wie schiere erz gebant
mit eime schiltvezzel	das was ein borte smal 
gegen eime walde	 kerte er hin zetal 
do wand er sinen herren	an dem stade stan 
do gie im hin enkegene	manic wetlicher man
Mit gruoze im wol enphiengen	die edelen riter guot 
do sahens in dem schiffe	riechen daz bluot
von einer starken wunden	die er den vergen sluoc 
do wart von degnen	 Hagne gevraget genvoc
Do der kvnich Gvnther	daz heize bluot ersach
sweben in dem schife	balde er do sprach 
saget mir	her Hagne	war ist der verge komen 
iwer starkez ellen	wen im den namen hat benomen
Do sprach er lovgenliche	 da ich daz schif vant [61b]
bi einer wilden widen	 da lostez min hant 
ich han deheinen vergen	hivte hie gesehen 
ez ist ovch niemen leide	von minen schulden geschehen
Do sprach von Burgonden	der herre Gernot 
hivte mvoz ich sorgen	vf lieber vriunde tot 
sit wir der schiflivte	niht bereit han 
wie wir komen vbere	des mvoz ich trûrich gestan
Lûte rief do Hagne	 leget nider vf das gras 
ir knehte	daz gereite	ich gedenke daz ich was
der aller beste verge	den man bi Rine vant 
ia trovwe ich ivch wol bringen	vber in Gelfrates lant
Daz si deste balder	 komen vber fluot 
div ros si an slvogen	der swimmen daz wart guot 
wan der starken vnden	deheinz in da benam 
etlichez ovwete	als im div muede gezam
Do truogen si ze	scife	 ir golt vnd ovch ir wat 
sit si der verte	niht mohten haben rat 
Hagne der was meister		des fuorer vf den sant
vil manigen zieren reken	in daz vnkvnde lant
Zem ersten braht er vber	 tvsent riter her 
darzuo sine reken	 dannoch was ir mer 
nivn tvsent knehte	fuort er an daz lant 
des tages was vnmuozich	des kuenen Troniares hant
Do er si wol gesvnde	brahte vber vluot 
do gedahte vremder mere	der snelle degen guot 
div im ê seiten	div wilde merwip 
des hete des kvniges kapelan	nach verlorn den lip
Bi dem kapelsovme	 er den pfaffen vant 
ob dem heilictvme	er leinte an siner hant 
des mohte er niht geniezen	do in Hagne sach 
der gotes arme priester	mvose liden vngemach
Er swanc in vz dem scheffe	darzvo wart im gah 
do riefen ir genuoge	 nv vaha	here	vah	
Giselher der iunge	zvrnen erz began 
ern woltez doch niht lazen	eren het im leide getan
Do sprach von Burgvnden	 der herre Gernot 
waz hilfet ivch nv	Hagne	des kapelans tot 
tetez ander ieman	 ez solt iv wesen leit 
vmb welhe schvlde	 habet ir dem priester widerseit
Der pfaffe swam genote	er wolte sein genesen 
ob im ieman hvlfe	 des mohte do niht wesen 
wan der starke Hagne	vil zornich was sin mvot 
er stiez in zvo dem grvnde	daz endvhte nieman gvot
Do der arme phaffe	der helfe niht ensach 
do kert er wider vbere	des leit er vngemach 
swie er niht swimmen kvnde	im half div gotes hant 
daz er kom gesvnder	 hin wider vz an daz lant
Do stuont der arme priester	vnde svochte sine wat 
da bi sach wol Hagne	daz sin niht wære rat 
daz im fur mere sagten	div wilden merwip	[62a]
er dahte	dise degene	die mvozen verliesen den lip
Do si daz schif entluoden	vn– gar getruogen dan
swaz dar vffe heten	 der drier kvnige man 
Hagne ez sluoch ze stvken	vn– warf ez an die fluot 
des hete michel wunder	 die reken kuene vn– guot
Zwiv tuot ir dar	bruoder	so sprach <Dancwart> 
wie svln wir komen vbere	so wir die widervart
riten von den Hvnen		ze lande an den Rin	
sit do sagt im Hagne	 daz des kvnde niht gesin
Do sprach von Troni Hagne	 ich tvonz vf den wan 
ob wir an diser reise	deheinen zagen han 
der vns entrinnen welle	durch zegliche not 
der muoz an disem wege	 liden schemlichen tot
Si fuort mit in einen	vz Burgonden lant 
zvo sinen handen einen helt	der was Volcher genant 
der reite spiheliche	allen sinen mvot 
swaz ie begie Hagne	daz duhte den videlere guot
Ir ros bereitet waren	ir sovmer wol geladen 
si hete an der verte	noch deheinen schaden
genomen des si mvote	wan des chvniges kapelan 
der muose vf sine fuoze	hin wider zuo dem Rine gan