er tach hete nv ende	vn– nahet in div naht 
die wegemveden reken	ir sorge an
wan si solden rvowen	vn– an ir bette gan 
daz bereitte Hagne	ez wart in schiere kvnt getan
Gvnther sprach ze dem wirte	 got laze ivch wol gelben 
wir wellen varn slafen	ir svlt vns vrlop geben 
swenn ir daz gebietet	so kome wir morgen frvo 
er schiet von sinen gesten	harte vroelichen do
Dringen allenthalben	die geste man do sach 
Volker der kvene		zvo den Hvnen sprach 
wie getvrret ir den reken	fvr die fveze gan 
vn– welt ir ivchs niht miden	so wirt iv leide getan
So slah ich eteslichem	so swern gigen slach 
hat er getriwen iemen	daz erz beweinen mac 
wan wihet ir vns rechen	ia dvnchet ez mich gvot 
ez heizent allez degne	vn– sint geliche niht gemvot
Do der videlere	 so zorneclichen sprach 
Hagne der kvene	hinder sich do sach 
er sprach	iv ratet rehte	der kvene spilman 
ir <Kriemhilde> helde	svlt ze herberge gan
Dez ir da habet gedingen	ich wene ez iemen tvo 
welt ir iht bebinnen	so komet vns morgen vrvo 
vn– lat vns ellenden	heint haben gemach 
ia wen ez von helden	mit solhem willen ie gesachach
Do brahte man die geste	in einen witen sal 
den fvnden si berihtet	den reken vber al
mit vil richen betten	lanch vnd breit 
in riet vrov Kriemhilt	div aller groezisten leit
Manigen kolter spehe	 von Arraz man da sach
der vil liehten pfelle	vn– manich bettedach
von arabischen siden	 die beste mohten sin 
dar vfe lagen listen	 die gaben herlichen schin
Dechlachen hermin		vil manigiv man da sach
vn– von swarzem zobele	darvnder si ir gemach
des nahtes schaffen solden	vntz an den liehten tac 
ein kvnich mit sime gesinde	nie so herlich gelach
Owe der nahtselde	 sprach Gyselhere daz kint 
vnd owe miner vrivnde	die mit vns komen sint 
swie et ez min swester	so gvetlich erbot 
ich fvrhte daz wir mvezen	alle von ir schvlde ligen tot
Nv lat iwer sorgen	sprach Hagne der degne 
ich wil noh heint selbe	der schiltwache phlegen 
ich trowe ich wol behveten	vntz vns kvmet der tach 
des sit gar an angest	so wend ez danne swer der mach
Do nigen si im alle	 vn– seiten im des danch	[72a]
si giengen zvo den betten	div wile <waz> niht lanch
daz sich geleit heten	die wetlichen man 
Hagne der chvene		 der helt sich wafen began
Do sprach der videler	Volker der degen 
versmahetez iv niht Hagne	so wold mit iv phegen
heint der schiltwach	vntz morgen vrvo 
der helt vil minneclichen	dancte Volker dvo
Nv lon iv got von himel	vil lieber Volker 
ze allen minen sorgen	so engerte ich niemen mer 
niwan ivch aleine	swa ich hete not 
ich sol ez wol verdienen	mich enwendes der tot
Do garten si sich bede	in liehtez ir gewant 
do nam ir ietweder	den schilt an sein hant
vn– giengen vz dem hvse	fvr die tvr stan 
do phlagen si der geste	daz waz mit triwen getan
Volker der snelle	 zvo dez sales want
sinen schilt den gvoten	laint er von der hant 
do gie er hin widere	sein gigen er genam 
do diend er sinen vrivnden	als ez dem helde gezam
Vnder die tvre dez hvzes	saz er vf den stæin 
kvener videlere	wart noch nie dehein 
do im der seiten do	so svezlich erclanch 
die stolzen ellenden	die seitens Volker danch
Do chlvngen sein sæiden	daz al daz hvz erdoz 
sin ellen zvo der fvoge	div warn beidiv groz 
svezzen vn– <senfter>	gigen er began	
do entswebete er an den beten	vil manigen sorgenden man
Do si entslafen warn	 vn– er daz ervant 
do nam der degen widere	den schilt an die hant 
vn– gie vz dem gadme	fvr den tvrn stan 
vn– hvote der ellende	vor den Kriemilde man
Dez nahtes wol enmitten	ine weiz ez e geschach 
daz Volker der kvene	schinen helmen sach
verre vz einer vinster	die <Kriemhilde> man
wolden an den gesten	schaden gerne han getan
Do sprach der videlere		vrivmt	her Hagne 
vns zimet disiv sorge	ensamt ze tragne 
ich sihe gewafent Ivte	vor dem hvse sten 
als ich mich versinne	si wellent vns besten
So swiget	sprach do Hagne	 lat si her naher baz 
e si vnser werden innen	 so wirt hie helmevaz
verruchet mit den swerten	von vnser zweier hant 
si werdent Chriemhilde	hin wider vil vbel gesant
Ein der Hvnen reken	 vil schiere daz geschach 
daz div tvr waz behvetet	wie balde er do sprach 
des wir da heten willen	ia enmag es niht ergan 
ich sihe den videlere	 an der schiltwache stan
Der treit vf sime hovbte	einen helmen glantz	[72b]
lvter vnd herte	starch vnd gantz 
ovch lohent im die ringe	sam daz viwer tvot 
bi im stet ovch Hagne	 des sint die geste wol behvot
Zehant si cherten wider	do Volker daz ersach 
wider sinen gesellen	er zorneclichen sprach 
nv lat mich zvo den reken	von dem hvse gan 
ich wil vragen mere	 der vrowen Kriemhilde man
Nein	dvrh min liebe	sprach do Hagne 
komet ir von dem hvse	 die snellen degne
bringent ivch mit swerten	lihte in solhe not 
daz ich iv mvese helfen	vn– wer ez aller miner mage tot
So wir danne beide	komen in den strit 
ir zwene oder fier	 in einer kvrzen zit
sprvngen zvo dem hvse	vn– teten vns div lait
an den slafenden	div nimmer wurden verchlæit
Do sprach aber Volker	 so lat daz geschehen 
daz wir si bringen innen	daz wir si han gesehen 
daz dez iht lovgnen	Kriemhilde man 
daz si vngetrivlich	vil gerne heten getan
Zehant do rief in Volker	hin engene 
wez get ir svs gewafent	snelle degne 
welt ir schachen riten	 Kriemhilde man 
dar svlt ir mich ze helfe	vn– minen hergesellen han
Dez antwurte im niemen	zornich waz sin mvot 
phi	ir zagen boez	sprach der helt gvot 
woldet ir slafende	 vns ermordert han 
daz ist so gvoten helden	noch vil selten her getan
Do wart der kvniginne	vil rehte daz geseit 
daz ir boten niht wurben	von schvlden waz ir lait 
do fvogte si ez anders	vil	grimmech waz ir mvot 
dez mvosen sit verderben	helde kvene vnd gvot