loedelins reken	 die warn alle gar 
mit tvsent halspergen	 hvoben si sich dar
da Dancwart mit den knehten	 ob den tischen saz 
da hvop sich vnder helden	der aller groziste haz
Also der herre Bloedel	fvr die tische gie 
Dancwart der marschalch	 in vlizeclich enphie 
willekomen her ze hvse	min her Bloedelin 
ia wundert mich der mere	waz sol disiv rede sin
Ia darftv mich niht grvezen	so sprach Bloedelin 
wan komen min	 mvoz din ende sin
dvrch Hagnen dinen brvoder	der Sifriden slvoch 
des enkiltest dv zen Hvnen	vn– ander degne genvoc
Neina	herre Bloedel	sprach do Dancwart 
so moeht vns balde riwen	disiv hovevart 
ich waz ein wenich kindel	do Sifrit vloz den lip 
ich weiz niht waz mir wizet	des kvnic Eceln wip
la enweiz ich dir der mere	niht me ze sagen 
ez taten dine mage	Gvnther vn– Hagne 
nv wert ich vil ellenden	ir kvnnet niht genesen 
ir mvezet mit dem tode	phant Kriemhilde wesen
So enwelt ir niht erwinden	sprach Dancwart 
so riwet mich min vlegen	daz were baz gespart	
der snelle degne kvene	 von dem tische spranch 
er zoch ein scharfez wafen	daz waz michel vn– lanch
Do slvog er Bloedeline	einen swindent swertes slach 
daz im daz hovbet schiere	vor den fvezen lach	[76a]
daz si din morgengabe	sprach Dancwart der degne 
zvo Nvodunges brvte	der dv mit minne woldest phlegen
Man mach si morgen meheln	einen andern man 
wil er die brvtmiete	dem wirt alsam getan	
ein vil getriwer Hvne	hete im daz geseit 
daz in div kvnigin	 riet so grozlichiv lait
Do sahen Bloedelins man	ir herre la erslagen 
do wolden si den gesten	niht langer daz vertragen 
mit vf erbvrten swerten	si sprvngen fvr div kint
in grimmen mvote	daz gerov vil manigen sint
Lvte rief do Dancwart	daz gesinde allez an 
ir sehet wol	edel knehte	wie ez vmb vns wil gan 
nv wert ivch	ellenden	 deswar des gat vns not 
swie vns die edle Kriemhilt	so rehte gvetlich enpot
Die niht swert heten	die reihten fvr die banch 
vn– hvoben von den fvezen	manigen schamel lanch 
der Bvrgonden knehte	 wolden niht vertragen 
da wart von swern stveln	bvln harte vil geslagen
Wie grimme sich do werten	div ellenden kint 
si triwen vz dem hvse	die gewafenden sint 
doch beleip ir tot darinne	fvnf hvndert <oder> baz 
do waz daz ingesinde	von blvote rot vn– naz
Disiv starchen mere	wurden dan geseit
Eceln reken		ez waz in grimme leit	
daz erslagen were	Bloedel vn– sine man 
daz hete Hagnen brvoder	mit den knehten getan
E ez der kvnic erfvnde	die Hvnen dvrh ir haz
der garten sich zwai tvsent	oder dannoch baz 
si giengen z den knehten	daz mvoz et also wesen	
vn– liezen des gesindes	inndert einen genesen
Die vngetriwen brahten	fvrz hvs ein michel her 
die ellenden knehte	stvonden wol ze wer 
waz half ir baldez eilen	si mvosen ligen tot 
darnach in kvrzen stvnden	sich hvop ein vreislicher not
Hie mvget ir hoem wunder	 bi vngefvoge sagen 
nivn tvsent knehte	die lagen tot erslagen 
darvber ritter zwelfe	der Dancwartes man 
man sach in alterseine	noch bi den vienden stan
Der schal was geswiftet	der doz waz gelegen 
do blicte vber ahsel	Dancwart der degn 
er sprach	owe der vrivnde	die ich verlorn han 
nv mvoz ich leider eine	 bi minen vienden stan
Div swert genote vieln	 vf sin eins lip 
daz mvose sit beweinen	vil maniges heldes wip 
den schilt den rvcte er hoher	den vezzel nider baz 
do vrumte er vil der ringe	 von blvote vliezende naz
So we mir dirre leide	 sprach Aldrians kint 
nv wichet	Hvnen reken	ir lat mich an den wint 
daz der lvft erkvele	mich stvrmmveden man	[76b]
do sach man den reken	vil harte vroelichen gan
Also der stritemvede	vz dem hvse spat 
waz iteniwer swerte	vf seim helme erklanch 
die niht gesehen heten	waz wunders tet sin hant 
die sprvngen enkegne hin	von dem Bvrgonden lant
Nv wolde got	sprach Dancwart	moeht ich den boten han 
der minen brvoder Hagnen	 kvnde wizzen lan 
daz ich vor disen reken	 sten in soelher not 
er hvlfe mir von hinnen	 oder er gelege bi mir tot
Do sprachen Hvnen reken		der bote mvostv sin 
so wir dich tragen toten	fvr den brvoder din 
so silhet im erste leide	der Gvnthers man 
dv hast dem kvnige Ecele	so grozen schaden hie getan
Er sprach	nv lat daz dron	vn– wihet hoher baz 
ia getvon ich eteslichem	noh die ringe naz 
ich wil div mere selbe	hin ze hove sagen 
vn– wil ovch minen herren	minen grozen kvmber klagen
Er leidete sich so sere	den Eceln man 
daz si in mit den swerten	torsten niht hestan 
do schvzzen si der gere	so vil in sinen rant 
daz er in dvrch die swere	mvose lazen von der hant
Do wandens in betwingen	do er niht schildes trvoch 
hei waz er tiefer wunden	dvrch die helme slvoch 
des mvose vor im striche	manich kvener man 
darvmbe lop vil grozen	 der kvene Dancwart gewan
Ze beiden sinen siten	sprvngen si im zvo 
ia kom ir eteslicher	in den strit ze vrvo 
do gie er vor den vienden	alsam ein eberswin
ze walde tvot vor hvnden	 wie moht er kvener gesein
Sin vart <div> wart erniwet	von heizem blvote naz 
wie kvnd ein einich reke	gestriten immer baz
mit sinen vinden	dann er hete getan 
man sach Hagnen brvoder	ze hove herlichen gan
Trvhsatze vn– schenchen	die horten swerte klanch 
vil maniger do daz trinchen	von der hende swanch
vn– eteliche spise	die man ze hove trvoch 
do kom im vor der stiegen	der starken viende genvoch
Wie nv ir trvhsetzen	sprach der mvede degne 
ia soldet ir der geste	vil gvetlichen phlegen 
vn– soldet den herren	gvote spise tragen 
vn– liezet mich div mere	minen lieben herren sagen
Swelher dvrch sein eilen	im fvr die stiegen spranch 
der slvog er etelichen	so sweren swertes swanch 
daz si dvrch die vorhte	vf hoher mvosen stan 
ez het sin starchez ellen	vil michel wunders getan