z heten die ellende	wider morgen gvot getan 
wine der Gotlinde	chom ze hove gegan 
do sach er beidenthalben	div grozlichen ser 
daz weinte innechliche	der vil getriwe Rvedeger
So we mich	sprach der reke	daz ich den lip gewan 
daz disen grozen iamer	 chan niemen vnderstan	[84b]
swie gern ichz friden wolde	der kvnich tvt ez niht 
wand er der sinen læide	 ie mer vn– mer gesiht
Do sant an Dietriche	der gvote Rvedeger 
ob siz noch chvnden wenden	an dem kvnige her 
do enbot im der von Berne	 wer moht ez vnderstan 
ez enwil der kvnich Ezel	nieman schaiden lan
Do sach ein kvene recke	Rvedergern stan
mit wæinvnden ovgen	 vnt hetez vil getan 
der sprach zer chvniginne	 nv seht ir wie er stat 
der doch gewalt den mæisten	hie bi Ezeln hat
vnt dem ez allez dienet	livt vnd lant 
wie ist so vil der bvrge	an Rvedeger gewant 
der er von dem kvnige	vil manige haben mach 
er slvoch in disem stvrme	noch nie loblichen slach
Mich dvncket	er rvoche	 wie ez hier vmbe gat 
sit daz er den vollen	nach sinen willen hat 
man giht im er si chvener	danne ieman mvge sin 
daz ist in disen sorgen	worden loslichen schin
Mit trvrigem mvote	 der vil getriwe man 
den er daz reden horte	der helt der blichte in an 
er gedaht	dv solt ez arnen	dv gihst ich si verzagt 
dv hast div dinen mere	ze hove ze lvte gesagt
Die fveest begvnder twingen	do lief er in an
vnd slvoch so chreftichliche	den Hivonischen man 
daz er im vor den fvezen	 lack vil schiere tot 
do waz aver gemeret	 des kvnich Ezeln not
Hin	dv zage mere	 sprach do Rvedeger 
ich han doch genvoge	 leit vn– herzen ser 
daz ich hie niht envihte	zwev wizzet dv mir daz 
ia wer ich den gesten	 von grozen schvlden gehaz
vnd allez daz ich mohte	daz het ich getan 
niwan daz ich die reken	her gefveret han 
ia was ich ir gelæite	in mines herren lant 
des ensol mit in niht striten	min vil ellendes hant
Do sprach zem marcraven		 Ezel der kvnich her 
wie habt ir vns geholfen	vil edel Rvedeger 
wan wir so vil der væigen	 hie ze lande han 
wir bedvrfen ir niht mere	 ir hapt vil vbel getan
Do sprach der ritter edele	 ia beswart er mir den mvot 
vn– hat mir geitewizet	ere vnd vovt 
des ich von dinen handen	so vil han genomen 
daz ist dem lvgenere	ein tæil ze vnstaten komen
Do kom div kvniginne	vn– het ez ovch gesehen 
daz von des heldes zorne	dem Hevne waz geschehen 
si klagt ez vngefvoge	ir ovgen wurden naz 
si sprach zvo Rvedegere	 wie habe wir verdienet daz
daz ir mir vnt dem kvnige	meret vnser leit 
nv habt ir	edel Rvedeger	vns allez her geseit 
ir woldet dvrch vns wagen	die ere vn– daz leben 
ich hort iv vil der reken	den bris vil grozlichen geben	[85a]
Ich mane iv der genaden	 vn– ir mir hant gesworn 
do ir mir zvo Ezeln rietet	riter vz erkorn 
daz ir mir woldet dienen	 vntz an vnser æines tot 
der wart mir arm wibe	 nie so grozlichen not
Daz ist ane lavgen	ich swor iv	edel wip 
daz ich dvrch ivch wagte	die ere vn– ovch den lip 
daz ich die sele flieze	des han ich niht gesworn 
zvo dirre hochgezite	batich die fvrsten wol geborn
Si sprach	gedenke	Rvedeger	der <grozen> triwe din 
der stete vnd ovch der eide	daz dv den schaden min	
immer woldest rechen	 vn– elliv minev læit	
do sprach der margrave		ich han iv e selten iht verseit
Ezel der riche	flegen ovch began 
si bvten sich ze fvoze	bæide fvr den man 
den edeln margraven	 vmmvotes man do sach 
der vil getriwe reke	harte iemerkliche do sprach
Owe mich gotes armen	daz ich ditz gelebt han 
aller miner eren	der mvoz ich ab stan 
triwen vnd zvhte	der got an mir gebot 
owe got von himel	daz mihs niht wendet der tot
Swelhs ich nv laze	vn– daz ander began 
so han ich boeslich	vn– vil vbel	getan 
laz aber ich si bæide	mich schendet elliv diet 
nv rvoche mich bewisen	der mir ze lebene geriet
Do baten si genote	der kvnich vn– ovch sin wip 
des mvosen sider reken	fliezen den lip
von Rvedegers hende	da ovch der helt erstarp 
ir mvgt daz hie wol hoern	daz er vil iæmerchlichen warb
Er weste schaden gewinnen	vn– vngefvogiv læit 
er hete dem kvnige	vil gerne verseit
vnd ovch der kvniginne	vil sere vorht er daz 
ob er ir æinen slvege	div werlt trvege im darvmbe haz
Do sprach zvo dem kvnige	der vil kvene man 
her kvnich	nv nemt hin widere	swaz ich von iv han 
daz lant mit den bvrgen	der sol mich <niht> bestan 
ich wil vf minen fvezen	in daz ellende gan
Do sprach der chvnik Ezel	 wer hvlfe danne mir 
daz lant zvo den lveten	daz gibich allez dir 
daz dv mich rechest	Rvedeger	an den vinden min 
dv solt ein kvnich gewaltich	bineben Ezeln sin
Do sprach aber Rvedeger		wie sol ichs ane van 
hæim ze minem hvse		ich si geladen han 
trincken vn– spise	ich in gvetlichen bot 
vnt gab im mine gabe	wie sol ich raten in den tot
Div livte wenent lihte	daz ich si verzagt 
deheinen minen dienst	han ich in versagt 
den vil edeln fvrsten	vnt ovch ir man 
ovch riwet mich div frivntschaft	<die> ich mit in geworben han
Giselher dem degene	gab ich die tohter min	[85b]
si kvnde in dirre werlde	niht baz verwendet sin
vf zvht vn– ovch vf ere	vf triwe vn– vf gvot 
ich gesach nie kvnich ivngen	so rehte tvgenlichen gemvot
Do sprach aber Kriemh'		vil edel Rvedeger 
nv la dich erbarmen	vnser beider ser 
min vn– ovch des kvniges	gedenche wol daran 
daz nie wirt dehæiner	 so læide geste mer gewan
Do sprach der margrave	wider daz edel wip 
ez mvoz hivte gelten	der Rveders lip
swaz ir vn– ovch min herre	mir liebes hapt getan 
darvmbe mvoz ich sterben	 daz chan niht langer bestan
Ich weiz wol daz moch hivte	min bvrge vn– och min lane
iv mvezen leidich werden	von ir etesliches hant 
ich bevilheiv vf genade	min wip vn– miniv kint
vn– ovch die vil ellenden	die ze Bechelaren sint
Nv lon dir got	Rvedeger	sprach der kvnich do 
er vn– div kvniginne	 si wurden bæidiv vro 
vns svln dine lvte	 vil wol enpholhen wesen 
ovch trowe ich minem heile	daz dv maht selbe wol genesen
Do liez er an die wage	<sele> vnd lip 
do begvnde wæinen	daz Ezeln wip 
er sprach	ich mvoz iv læisten	als ich gelopt han 
owe der minen frivnde	 die ich vngerne hie bestan
Man sach in von <dem> kvnige	vil trovrichlichen gan 
do vant er sine reken	vil nahen bi im stan 
er sprach	ir svlt ivch waffen	alle mine man 
die kvenen Bvrgonden		 die mvoz ich leider bestan
Si hiezen balde springen	da man ir gewaffen vant 
ez der helm were		 od des schildes rant 
von ir ingesinde		 wart ez in dar getragen 
seid horten leidiv mere	 die stolzen ellende sagen
Gewaffent wart der Rvedeger	 mit fvmf hvndert man 
dar vber zwelf reken	sach man mit im gan 
die wolten pris erwerben	in des stvrmes not 
si enwessen niht der mere	daz in so nahent der tot
Do sach man Rvedegere	 vnder helme gan 
ez trvogen swert div scharpfen	des margraven man 
dar zvo vor ir handen	 die liehte schilde bræit 
daz sach der videlere	ez waz im grozlichen læit
Do sach der ivnge Giselher	sinen sweher gen
mit vf gebvnden helm	wie moht man do versten
waz er da mit mæinte	niwan allez gvot 
des wart der kvnich edel	so rehte froelich gemvot
Nv wol mich solher frivnde	sprach Giselher der degen 
die wir han gewunnen	nv vf disen wegen 
wir svln vil wol geniezen	mines wibes hie 
mir ist liep vf min triwe	daz ie der heirat ergie
Ich wæiz wes ir ivch troestet	sprach der spileman 
wa saht ir ie dvrch svone	so manigen helt gan
mit vf gebvnden helmen		die trvogen swert in der hant	[86a]
an vns wil dienen Rvedeger	sein bvrge vn– siniv lant
E daz der videlere	die rede do vol sprach 
Rvedegern den edeln	man vor dem hvse sach 
sinen schilt den gvoten	den satz er fvr den fvoz 
do mvos er sinen frivnden	versagen dienst vn– grvoz
Der edel margrave	 rief do in den sal 
ir chvone Nybelvnge	nv wert ivch vber al 
ir soldet min geniezen	nv engeltet ir min 
e do war wir frivnde	der triwe wil ich ledich sein
Do erschrahten dirre mere	die nothaften man 
wan ir deheiner frovde	nie da von gewan 
daz mit im wolde striten	dem si da waren holt 
si heten von veinden	vil michel arbeit gedolt
Nv ne welle got von himel	sprach Gvnther der degen 
daz ir ivch genaden	svlt an vns bewegen
vn– der vil grozen triwe	der wir doch heten mvot 
ich wil iv des getrovwen	 daz ir ez nimmer getvot
Iane mag ichz niht gelazen	sprach der kvene man 
ich mvoz mit iv striten	 wan ichs gelobt han 
nv wert ivch	chvene helde	so lieb iv si der lip 
mich woltez niht erlazen	des chvnich Ezeln wip
Ir widersagt vns nv ze spate	sprach der kvnich her 
nv mvoz iv got vergelten		vil edel Rvedeger 
triwe vn– minne		die ir vns hapt getan 
ob ir ez an dem ende	woldet gvotlicher lan
Wir soltenz immer dienen	daz ir vns hapt gegeben 
ich vnt mine mage	 ob ir vns liezet leben 
der herlichen gabe	do ir vns brahtet her
in Ezeln lant zen Hevnen	des gedenchet vil edel Rvedeger
Wie wol ich iv des gvnde	sprach Rvedeger der degen 
daz ich iv mine gabe	mit vollen solde geben 
also willechliche	 als ich des hete wan 
sone wurde mir darvmbe	nimmer schelten getan
Erwindet	edel Rvedeger	 sprach do Gernot 
wan ez wirt deheiner	gesten nie erbot
so rehte minnechlichen	als ir vns hapt getan 
des svlt ir wol geniezen	ob wir bi leben bestan
Daz wolde got	sprach Rvedeger	vil edel Gernot 
daz ir ze Rine wert	vnd ich were tot
mit etlichen eren	 seid ich iv sol bestan 
ez wart an ellenden	von frivnden noh nie wirs getan
Nv lone iv got	her Rvedeger	sprach do Gernot 
der vil richen gabe	mich riwet iwer tot 
sol an iv verderben	 so tvgentlicher mvot 
hie trag ich iwer waffen	daz ir mir gabt	helt gvot
Daz ist mir nie geswichen	in aller dirre not 
vnder sinen eken	 lit manich riter tot 
ez ist lvter vnd stete	herlich vnd gvot 
ich wene so riche gabe	 ein reke nimmer mer getvot
Vnde welt ir niht erwinden	ir welt zvo vns gan	[86b] 
slaht ir mir iht der frivnde	die ich hinne han 
mit iwer selbes swerte	nim ich iv den lip 
so riwet ir mich Rvedeger	vn– iwer herlichez wip
Daz wolde got	her Gernot	vnd meht ez ergan 
daz aller iwer wille	were hie getan 
vnd daz genesen were	iwer frivnde lip 
ia sol iv wol getruowen	beidiv mit tohter vnde min wip
Do sprach von Bvrgonden	der schoenen voten kint 
wie tvot ir so	her Rvedeger	di mit mir komen sint 
die sint iv alle wege	ir griffet vbel zvo 
die iwer schoene tohter	welt ir verwitwen ze frvo
Swenne ir vn– iwer reken	mit strite mich bestat 
wie reht vnfrivntliche	ir daz schinen lat 
daz ich iv wol <getrvwe>	fvr alle ander man 
da von ich ze wibe	iwer tohter mir gewan
Gedenchet iwer triwen	vil edel kvnich her 
gesende iv got von hinne	so sprach Rvedeger 
lat die ivnchvrowen	 niht engelten min 
dvrch iwer selber tvgende	 so rvochet ir genedich sin
Daz tet ich billich	sprach Giselher daz kint 
die hoehen mine mage	di noch hier inne sint 
svln die von iv sterben	so mvoz gescheiden sin
div vil stete frivntschaft	zvo dir vn– der tohter din
Nv mvoz vns got genaden	 sprach der kvene man 
do hvoben si die schilde	also si wolden dan
striten zvo den gesten	in Kriemhilt sal 
do rief vil lvte Hagene	von der stiege hin zetal
Belibet ein wile	 vil edel Rvedeger	
also sprach do Hagen	 wir wolden reden mer 
ich vn– mine herren	als vns des twinget not 
waz mack gehelfen Ezeln	vnser ellender tot
Ich sten in grozen sorgen	sprach aber Hagne 
den schilt den mir vrovwe Gotlint	gab ze tragene 
den habent mir die Hevnen	zerhovwen von der hant 
ich fvert in frivntliche	in daz Ezeln lant
Daz des got von himel	 rvochen wolde 
daz ich schilt so gvoten	noch tragen solde 
so den dv hast vor hende	vil edel Rvedeger 
so bedorfte ich in dem stvrme	deheiner <halsperge> mer
Vil gerne wer ich dir gvot	mit minem schilde 
getoerst ich drin gebieten	 vor Kriemhilde 
doch nim dv in hin	Hagen	vn– trag in an der hende 
hey soldestv in fvern	in der Bvrgonden lant
Do er im so willechlichen	den schilt ze geben bot 
do wart genvoger ovgen	 von <heizen> trehen rot 
ez waz div leste gabe	die sider immer mer
bot deheinem degene	von Bechlarn Rvedeger
Swie grimme Hagen were	vnt swie zornich gemvot 
ia erbarmet im div gabe	die der helt gvot
bi sinem lesten ziten	so nahen het getan	[87a]
vil manich riter edel	mit im trvren began
Nv lone in got von himel	vil edel Rvedeger 
ez wirt iwer geliche	deheiner nimmer mer 
der ellenden reken	so herlichen gebe 
so sol daz got gebieten	daz iwer tvgende immer lebe
So we mich dirre mere	so sprach aber Hagene 
wir heten ander swere	 so vil ze tragene 
svl wir mit frivnden striten	daz si got geklæit	
do sprach der marchgrave		 daz ist mir innechliche læit
Nv lon ich iv der gabe	vil edel Rvedeger 
swie halt gæin iv gebaren	 dise reken her 
daz nimmer ivch gerveret	 mit strite hie min hant 
ob ir si alle slveget	 die von Bvrgonden lant
Des neig im mit zvhten	der gvote Rvedeger 
si wæinten allenthalben	daz disiv herzen ser
niemen scheiden chvnde	 daz waz ein michel not 
vater aller tvgende	lag an Rvedegere tot
Do sprach von dem hvse	Volker der spileman 
sit min geselle Hagen	den vride hat getan 
den svlt ir also stete	haben von miner hant 
daz hapt ir wol verdienet	do wir komen in daz lant
Vil edel marchgrave	ir svlt min bote sin 
dise rote bovge	gab mir div margravin 
daz <ich> si tragen solde	hiehgezit 
die mvgt ir selbe schowen	daz ir dez min gezivge sit
Daz wolde got der riche	sprach do Rvedeger 
daz iv div margravinne	noch solte geben mer 
div mer sag ich gerne	der trivtinne min 
gesihe ich si gesvnder	des svlt ir ane zwifel sin
Als er im daz gelobte	den schilt hvop Rvedeger 
des mvotes er ertobte	do en bæit er da niht mer 
do lief er zvo den gesten	einem degen gelich 
manigen slach vil swinden	slvoch der margrave rich
Die zwene stvonden hoher	 Volker vn– Hagene 
wan ez itn e gelobten	die zwene degene 
noch vant er als chvenen	bi den tvren stan 
daz Rvedeger des strites	mit grozen sorgen began
Dvrch mortrechen willen	so liezen si dar in 
Gvnther vn– Gernot	 si heten helde sin 
do stvond hoher Giselher	zwar ez waz im læit 
er versach sich noch des lebens	da von er Rvedegern mæit
Do sprvngen zvo den veinden		des margraven man 
man sach si nach ir herren	vil tvgentlichen gan 
div snidvnde wafen		si trvogen an der hant 
des brast da vil der helm	vn– manich herlicher rant
Do slvogen die vil mveden	vil manigen swinden slach
den von Bechelaren	 der eben vnt tiefe wack 
dvrch die vesten ringe	vast vntz vf daz werch 
si taten in dem stvrme	div vil herlichen werch
Daz edel ingesinde	 waz nv chomen gar dar in	[87b]
Volker vn– Hagen		die sprvngen balde da hin 
si gaben fride nieman	wan dem æinem man 
von ir bæider hende	daz blvot nider dvrch helme ran
Wie rehte gremliche	vil swerte drinne erklanch 
vil der schiltspange	zvo den slegen spranch 
der ræis vz ir schilt stæine	nider in daz blvot 
si vahten also grimme		daz manz nimmer mer getvot
Der vogt von Bechelern	gie wider vnde dan 
also der mit ellen	in stvrme werben kan 
dem tet des tages Rvedeger	harte wol gelich 
daz er ein rekhe were	vil chvene vn– lobelich
Hie stvonden dise reken	Gvnther vnd Gernot 
si slvogen in dem strite	vil manigen helt tot 
Giselher vn– Dancwart	 die zwene ez ringe wach 
des frvmten si vil manigen	hintz vf den ivngisten tack
Vil wol zaigte Rvedeger	 daz er waz starke genvoch 
chvonen vnde wol gewafent	hey was er helde slvoch 
daz sach ein Bvrgonde	zorns was im not 
da von begvnde nahen	 des edeln Rvedegers tot
Gernot der starcke	den helt den rief er an 
er sprach zem margraven	 ir welt mir miner man
niht genezen lazen	 vil edel Rvedeger 
daz mvet mich ane maze	ich chans niht an gesehen mer
Nv mag iv iwer gabe	wol ze schaden chomen 
sit ir mir miner frivnde	hapt so vil benomen 
nv wendet ivch her vmbe	vil edel chvene man 
iwer gabe wirt verdienet	so ich iz aller hoehste chan
E daz der margrave	zvo im vol chome dar 
des mvosen liehte ringe	werden missevar 
do sprvngen zvo ein ander	die eren gernde man 
ir ietweder schermin	fvr starche wunden began
Ir swert so scharpsch waren	sine chvnde niht gewegen 
do slvoch Gernoten	Rveger der degen
dvrch flinsherten helm	daz nider floz daz blvot 
daz vergalt im sere	der riter chven vnd gvot
Die Rvedegers gabe	an hende er hoeher wack 
swie wunt er wer zem tode	er slvog im einen slach
dvrch den schilt vil gvoten	vntz vf div helmgespan 
da von mvos ersterben	do der Gotlinden man
Ia wart nie wirs gelonet	so richer gabe mer 
do vielen beide erslagne	Gernot vnd Rvedeger 
gelich in dem stvrme	von ir beider hant 
alrest erzvrnde Hagne	do der den grozen schaden bevant
Do sprach der von Tronge	 ez ist vns vbel chomen 
wir haben an in bæiden	so grozen schaden genomen 
den wir nimmer vberwinden	ir livet vn– ovch ir lant 
die Rvedegeres helde	sint vnser ellenden phant
Owe mich mines brvoder	der tot ist hie gefrvmt 
waz mir der leiden mere	ze allen ziten chvnt 
ovch mvoz mich immer riwen	der edel Rvedeger	[88a]
der schade ist beidenthalben	vn– div grozlichen ser
Do der ivnge Giselher	sach sinen brvoder tot 
die do dar inne waren	die mvosen liden not 
der tot der svochte sere	da sin gesinde was 
der von Bechelarn	do langer einer niht genas
Gvnther vn– Giselher	 vnd ovch Hagene 
Dancwart vn– Volker	die gvoten degene 
die giengen da si fvnden	ligen die zwene man 
do wart da von den helden	mit iamer wainen began
Der tot vns sere rovbet	sprach Giselher daz chint 
nv lazet iwer wainen	 vnt ge wir an den wint 
daz vns die ringe erchvolen	vns stritmveden man 
ia wen vns got hie langer	niht ze lebene gan
Den sitzen	disen læinen	sach man manigen degen 
si waren aber mvezich	da warn tot gelegen
die Rvedegers helde	zergangen waz der doz 
so lange wert div stille	daz sin Ezeln verdroz
Owe dirre <dienste>	 sprach des chvniges wip 
dine sint niht so stete	daz vnser veinde lip 
mvege des engelten		 von Rvedegeres hant	
er wil si wider bringen	 in der Bvrgonde lant
Waz hilfet	chvnich Ezel	daz wir getæilet han
mit im swaz er wolde	der helt hat missetan 
der vns da solde rechen	der wil der svone pflegen	
des antwurt ir do Volker	der vil zierliche degen
Der rede enist so niht leider	vil edels kvniges wip 
getoerst ich heizen liegen	alsvs edeln lip 
so het ir tievelichen	 an Rvedeger gelogen 
er vnt die sine degene	sint an der svone gar betrogen
Er tet so willechliche	daz im der kvnich gebot 
daz er vnt sin gesinde	ist hie gelegen tot 
nv seht al vmbe	Kriemhilt	wem ir nv gebieten welt 
iv hat vntz an den ende	gedienet Rvedeger der helt
Welt ir daz niht gelovben	man sol ivchs sehen lan	
dvrch ir herzen sere	so ware dvo daz getan 
man trvoch den helt verhovwen	da in der kvnich sach 
den Ezeln degenen	so rehte leide nie geschach
Do si den margraven	toten sahen tragen 
enchvnde ein schriber	gebriefen noh gesagen
e manigen vngeberde	von wiben vn– ovch von man 
div sich von herzen iamer	alda zeigen began
Der Ezeln iamer	der wart also groz 
als eines lewen stimme	der riche kvnich erdoz
mit herzemleide woffe	 alsam tet ovch sin wip 
si chlagten vngefvoge	des gvoten Rvedegers lip