n der selben zite	do was ir schif gegan
der bvrch also nahen	do sach der kvnich stan
oben in den venstren	manich schoene meit 
daz er si niht erkande	daz was im werlich leit
Er fragte Sifriden	den gesellen sin 
ist iv iht daz kvnde	ob disiv <magedin> 
die dort nider schowent	gen vns vf die fluot 
swie ir herre heize	si sint vil hohe gemvot
Do sprach der herre Sifrit	 nu sult ir tovgen spehen
vnder den iunchfrowen	 vnde sult mir danne iehen 
welhe ir nemen woldet	 hetet irs gewalt	
daz tuon ich	sprach Gunther	 ein riter kuene vnde balt
Ich sihe ir eine	in einem venster stan
in snewizer wete	div ist so wol getan 
die wellent miniv ovgen	durch ir schoenen lip 
ob ich gewalt des hete	si muese werden min wip
Dir hat erwelt vil rehte	diner ovgen schin 
ist ist div edel Prunhilt	daz schone magedin 
nach der din herze ringet	din sin vnd ovch din mvot	
alle ir geberde	dunket Gvnther guot
Do hiez div kvniginne	vz den venstren stan
ir herliche meide	si solden da niht stan 
den fremden an ze <sehenne>	des waren si bereit 
waz do die fruewen taten	 daz ist vns sider geseit
Gen den vnkvnden		strichen si ir lip 
des ie site heten	watlichiv wip 
an div engen venster	komen si gegan 
da si die helde sahen	daz was dvrh schowen getan
Rehte in einer maze	den helden vil gemeit
von sneblanker varwe	ir ros vnd ovch ir cleit
waren vil geliche	ir schilde wol getan 
die lvhte von den handen	den wetlichen man
Ir satel wol gesteinet	ir furbuoge smal	
si riten herliche	 fur Prunhilde sal	
daran hiengen schellen	von lihtem golde rot 
si chomen zvo dem lande	als ez ir ellen in gebot
Mit im kom <do> Danchwart	vnd ovch Hagne	[16b]
wier horen sagen	wie die degne
von rabenswarzer varwe	truogen richiv kleit 
ir schilde waren niwe	michel guot vnde breit
Von India dem lande	sach man si steine tragen 
do kos man an ir wæte	vil herlichen wagen 
si liezen an huote	daz schifel di der fluot 
sus riten zuo der burge	die helde kuene vnde guot
Sehs vnd ahzech turne	si sahen drinne stan 
dri palas wite	 vnd einen sal wol getan
von edelem marmelsteine	gruone alsam ein gras 
darinne selbe Prvnhilt	mit ir ingesinde was
Div burch was entslozen	vil wite vf getan 
do liefen in enkegen	die Prvnhilde man
vnd enphiengen die geste	in ir frovwen lant 
ir ros hiez man behalden	vnd ir schilde vor der hant
Do sprach ein kamerere	gebet vns div swert
vnd die liehten brvnne	 des sit ir vngewert	
sprach von Troien Hagne	 wir wellens selbe tragen 
do begvnde Sifrit	den hovesite sagen
In dirre burch phliget man	 daz wil ich iv sagen	
daz neheine geste	svlen wafen tragen 
lat si tragen hinnen	daz ist wol getan 
der volgte vngerne	 Hagne	Gvnthers man
Man hiez den gesten senken	vnd schafen gvot gemach 
manigen snellen rechen	man ze hove sach
in furstlicher wete	allenthalben gan 
doch wart michel schovwen	an die kuenen getan
Ir svlt mich lazen hoeren	sprach diu kvnigin 
wer die vnkvnden	reken mvgen sin 
die dortsihe	so herliken stan 
vnd durch wes liebe	die helde her gevarn han
Do sprach ein ir gesinde	 frovwe	ich mach wol iehen 
daz ich ir deheinen	 mer habe gesehen 
wan Sifride geliche	einer darunder <stat> 
den svlt ir wol enpfahen	daz ist	frovwe	min rat
Do sprach div kvniginne	 nv brinch mir min gewant 
vnd ist der starke Sifrit	komen in min lant
durch willen miner minne	ez gat im an den lip 
ich furhte in niht so sere	daz ich werde sin wip
Prunhilt div schone	 wart schiere wol gekleit 
do gie mit ir dannen	manigiv schoniv meit 
wol hvndert oder mere	gezieret was ir lip 
die gesten wolden schovwen	div wetlichen wip
Da mite giengen degne	vz Islant 
Prvnhilde reken	 die truogen swert enhant 
funfhvndert oder mere	 daz was den gesten leit 
do stuonden von dem sedele	die kuenen helde gemeit
Do div kvneginne	Sifriden sach 
zuo dem gaste	<si> zvhtechlichen sprach 
sit willekomen	her Sifrit	her in dizze lant	[17a]
waz meint iwer reise	 daz het ich gerne bechant
Vil michel <genade>	 frov Prvnhilt 
daz ir mich ruochet gruozen	fursten tohter milt 
vor disem edeln reken	 der hie vor mir stat 
wan der ist min herre	 der ern het ich gerne rat
Er ist kvnich ze Rine	 was sol ich sagen mer 
durch dine liebe	sin wir gevarn her 
er wil dich gerne minnen	 swaz im da von geschiht 
bedenke dichs becite	er lat dich sin niht
Er ist geheizen Gunther	ein kvnich rich vnd her 
erwurb er dine minne	schone gert er nih mer 
durch dich mit im	ich her gevarn han 
werer niht min herre	ich hetez nimmer getan
Si sprach	er ist din herre	vnd du sin man 
wil er min geteiltiv	 spil also bestan 
behabe er die meisterschaft	so wird ich sin wip 
gewinne aber ich	 ez get iv allen an den lip
Do sprach von Trony Hagne	 frove	lat vns sehen
iwer spil geteiltiv	end iv mvoste iehen
Gvnther min herre	 da mvoz ez herte sin 
er trowet wol erwerben	ein alse schvone kvnigin
Den stein sol er werfen	vnd springen darnach 
den ger mit mir schiezen	lat iv sin niht ze gach 
ir mvget hie wol verliesen	die ere vnd ovch den lip 
des svlt ir ivch bedenken	sprach daz minnechliche wip
Sifrit der snelle	zvo deme kvnige trat 
allen sinen willen	er in reden bat
gen der kvniginne	 er sold an angest sin 
ich sol dich wol behueten	vor ir mit den listen min
Do sprach der kvnich Gvnther	 kvneginne her 
nv teilt swaz ir gebietet	vnd werez dannoch mer 
ich bestvend ez allez	dvrch iwren schoenen lip 
min hovbet ich verlivse	ir enwerdet min wip
Do div kvniginne	sin rede vernam 
der spile bat si gahen	als ir daz gezamn 
si hiez ir ze strite	bringen ir gewant 
ein brunne von golde	vnd einen gvoten schildes rant
Ein wafenhemde sidin	leite an div meit 
daz in deheime strite	wafen nie versneit 
von pfelle vz der Libya	ez was wol getan 
von porten lieht gewurhte	schein liehte daran
Die zit wart den reken	in gelfpe vil gedruot 
Danchwart vnd Hagne	 waren vngefruot 
wi ez dem kvnige ergienge	des sorgte in der mvot 
si dahten	vnser reise	ist vns gesten niht ze gvot
Die wile was ovch Sifrit	der wetliche man 
end ez ienman wesse	 zuo dem schife gegan 
da er sin tarnkappe	 verborgen vant 
darin slovf er schiere	do was er niemen bechant
Er ilte hin widere	do sach er reken vil [17b]
da div kvniginne	 teilte ir hohiv spil 
da gie er tovgenlichen	daz in da niemen sach
aller di da waren	 von listen daz geschach
Der rinch was beceiget	da soldez spil geschehen
vor manigen kvenen reken	die daz solden sehen	
wol siben hvndert	 sach man wafen tragen	
swem da gelvnge	 daz si die warheit solden sagen
Do was ovch chomen Prunhilt	gewafent man die vant 
sam ob si wolde striten	vm elliv kvniges lant 
ia truoch si ob den siden	manigen goldes zein 
darunder minnechlichen	ir liehtiv varwe schein
Do kom ir gesinde	 vnd truogen dar zehant
von alrotem golde	einen schildesrant
mit stalherten spangen	michel vn– breit 
darvnder spilen wolde	div uil minnechliche meit
Der meide schildevezel	 ein edel borte was 
darvof lagen steine	 gruene alsam ein gras
der luhte manigerleye	mitschine widerz golt 
er mvoste wesen kuene	dem div frovwe wurde holt
Der schilt was vnder bukeln	 als vns daz ist geseit	
drier spannen diche	 den tragen solde div meit 
von stale vnd ovch von golde	rich er was genuoch 
den ir kamerere	vierde selbe kvme getruoch
Also der degen Hagne	den schilt dar tragen sach 
mit grimmen mvote	der helt von Trony sprach 
wa nv	kvnich Gunther	wi verliesen wir den lip 
der ir da gert	div ist des tivvels wip
Do truoch man der frovwen	swære vnde groz
einen vil scharfen ger	den si ze allen ziten schoz 
starch vnd vngefuege	michel vnde breit 
der ze sinen eken	 vil freislichen sneit
Von des gers swere	hoeret wunder sagen 
vierdehap messe	 was dazvo geslagen 
den truogen kuone dri	Prunhilde man 
Gvnther der edele	darvmbe sorge gewan
Do sprach Hagnen bruoder	der kuene Danchwart 
mich riwet innerchlichen	disiv hovevart 
nv hiezen wir ie reken	 wie fliesen wir den lip 
svln vns in disem lande	nv verderben div wip
Mich muet harte sere	daz ich kom in daz lant 
hete min bruoder Hagene	sin wafen an der hant 
vnd ovch ich daz mine	so mohten samfte gan
mit ir ubermuete	alle Prunhilde man
Vvir solden vngevangen	wol rumen dice lant	
sprach sin bruoder Hagene	het wir daz gewant 
des wir ze not bedurfen	vnd div swert vil guot 
so wurde wol gesenftet	 der schoenen frovwen vbermuot
Wol horte div maget edele	waz der degen sprach 
mit smielindem mvnde		si vber ahsel sach 
nv er dvnket sich so chuone	so traget in ir gewant	[18a]
ir vil scharfen wafen	gebet den helden an die hant
Do si div swert gewunnen	so div meit gebot 
der vil kuone Danchwart	von freuden wart rot 
nv spilen swez si wellen	sprach der kuene man 
Gvnther ist vnbetvngen	 sit wir vnser wafen han
Brvnhilde sterke		 grozlichen schein 
man truoch ir zuo dem ringe	einen swern stein 
groz vnd vngefuoge	michel vnde wel 
in truogen kuene zwelfe	der kuenen helde vn– snel
Den warf si ze allen ziten	so si den ger verschoz 
der Burgonden sorge	 was vil harte groz 
wafen	sprach Hagne	 waz hat der kunich ze trvvt 
ia sol si in der helle	sin des vbelen tivvels bruot
An ir vil wize arme	si die ermel want 
si begvnde vazzen		den schilt an der hant 
den ger si hohe zvchte	do gie ez an den strit 
die ellenden geste	vorhten Prunhilde nit
Vnd were im Sifrit	niht da ze helfe komen 
so hete si Gvnthere	sinen lip benomen 
er gie dar tovgenliche	vnd ruort im sine hant 
Gvnther sine liste	harte sorchlich ervant
Er sprach	gip mir von handen	den schilt la mich tragen 
vnd merke rehte	waz dv mich hoerest sagen 
nv habe dv die gebærde	div werch wil ich began	
do er in bekande	 ez was im liebe getan
Do schoz vil kreftichlichen	div herliche meit
vf einen schilt niwen	 michel unde breit 
den truoch an siner hende	daz Siglinde kint 
daz fivr spranch von stale	sam ez wate der wint
Des starken gers snide	al durch den schilt gebrach 
daz man daz fiuuer lovgen	vz den ringen sach 
des svzzes beide struochten	die kreftige man 
wan div trankappe		si weren tot da bestan
Sifride dem kuene	 von mvnde brast daz bluot 
vil balde spranch er widere	do nam der helt guot
den ger	den si geschozen	im hete durch den rant 
den schoz do hin wider	des starken Sifrides hant
Daz fiwer stovp vz ringen	als ob ez tribe der wint 
den ger schoz mit ellen	daz Sigmvndes kint 
si mohte mit ir krefte	des schuzes niht gestan 
ez en hete nimmer	der kunich Gunther getan
Brunhilt div schoene	balde vf spranch 
edel riter Gvnther	des schuzzes habe danch 
si wande daz erz hete	mit siner kraft getan 
nein	si hete gevellet	ein verre kreftiger man
Do gie si hin balde	zornich was ir muot 
den stein huop vil hohe	div edel maget guot 
si swanch in kreftechliche	verre von der hant 
do spranch si nach dem wurfe	daz luote erklang ir gewant
Der stein was gevallen	zwelf klafter dan	[18b]
den wrf brach mit sprvngen	diu maget wolgetan 
dar gie der snelle Sifrit	da der stein gelach 
Gvnther in wegete		 der helt des wurfes pflach
Sifrit was kuene		 kreftich vnde lanch 
den stein warf er verrer	 dar zuo er witer spranch 
von sinen schoenen listen	 het er kraft genvoch 
daz er mit den sprvnge		den kvnich Gvnther truoch
Zvo ir ingesinde	ein teil si lûte sprach 
do si ze ende des ringes	den helt gesunden sach 
balde komet her naher	 mage vnde mine man 
ir svlt kvnich Gvnther	 alle werden vndertan
Do leiten die vil kuonen	div wafen von der hant 
si buten sich ze fuozen	von Burgonden lant
Gvnther dem richen		vil manich kuoner man 
si wanden	er hete	mit siner kraft div spil getan
Er gruoztes minechliche	ia was er tvgenden rich 
do man im bi der hende	div maget lobelich 
si erlobte im daz er solde	haben da gewalt 
des fruoten sich die degne	vil kuene vnde balt
Si bat den riter edele	mit ir dannen gan
in den palas witen	also daz wart getan 
do erbot manz den reken	mit dienste dester baz 
Danchwart vnd Hagne	muosen lazen ane haz
Sifrit der snelle	wise er was genuoch 
sin tarnkappe	er ze behalten truoch 
do gie er hin wider	da manich frovwe saz 
da er vnd ander degne	alles leides vergaz
So wol mich dirre mere	sprach Sifrit der degen 
daz iwer hohverten	also ist gelegen 
daz iemen lebet der iwer	 meister mvge sin 
nv svlt ir	maget edel	 uns hinnen volgen an den Rin
Do sprach div wolgetane	des mak niht ergan 
ez muozen ê bevinden	maget vnde mine man 
ia mag ich also lihte	gerumen niht min lant 
die minen beste frivnde	mvezen werden ê bestan
Do hiez si boten riten	allenthalben dan 
si besande ir frivnde	mage vnde man 
die bat si ze Isensteine	komen vnerwant 
vnd hiez in geben allen	rich unde herlich gewant
Si riten tegeliche	 spate vnde frvo
Prunhilde burge	scharhafte zuo 
iaria	sprach Hagene	waz haben wir getan 
wir erbeiten hie vbele	der schoene Brunhilde man
So si nu mit ir krefte	koment in daz lant 
der kvniginne wille	 ist vns vnbekant 
waz ob si also zvrnet	 daz wir sin verlorn 
so ist div maget edel vns	ze grozen sorgen geborn
Do sprach der starke Sifrit	 daz sol ich vndersten 
des ir da habet sorge	 des laze ich niht ergen 
ich sol in helfe bringen	her in dizze lant [19a]
von vzerwelten reken	 die iu noch nie wurden bechant
Ir svlt nach mir niht vragen	ich wil hinnen varn 
got muese iwer ere	die zit wol bewarn 
ich kuome schiere widere	vnd bringiv tusent man
der aller besten degne	der ich kvnde ie gewan
So sit et niht ze lange	sprach der kvnich do 
wir sin iwer helfe		billichen vro	
sprach	ich kvme widere	in vil kvrzen tagen 
ir mich habet gesendet	sult ir der kuniginne sagen