<Do> di geste waren	alle dan gevarn 
sprach ce sinem gesinde	Sigemvndes barn 
wir svln vns ovch bereiten	hæim in miniv lant 
liep was ez sinem wibe	do ez div vrowe reht ervant 
Si sprach zv z ir manne	wenne svl wir varn 
daz ich so harte gahe	daz heiz ich wol bewarn 
mir svln ê mine brveder	teilen mit div lant 
leit was ez Sifride	do erz an Criemhild ervant 
Di fvrsten zv zim giengen	vnt sprachen alle dri 
nv wizet daz her Sifrit	daz iv immer si 
mit triwen vnser dienest	bereit reht vnz an den tot 
do neig er den dægenen	do man imz so gvtlich erbot 
Wir svln ovch mit iv teilen	sprach Giselher daz chint 
lant vnt bvrge	di vnser eigen sint 
vnd swaz der witen riche	ist vns vndertan 
der svlt ir teil vil gvten	mit <samt> Criemhilde han 
Svn der Sigemvndes	zv den fvrsten sprach 
do er der herren willen	gehorte vnd sach 
got laz iv iwer erbe	immer sælich sin 
vnt ovch di lvete dar inne	ia getvt div liebe wine min 
des teiles wol ce rate	den ir ir woldet ge [322a] ben 
da si sol tragen chrone	vnt sol ich daz gelæben 
si mvz werden richer	danne iemen lebendiger si 
<swaz> ir svs gebietet	des pin ich iv dienestlichen bi 
Do sprach div vrowe Criemhilt	habt ir der erbe rat 
vmb Bvrgende dægene	so liht ez niht enstat 
si mvg ein chvnich gerne	fvren in sin lant 
ia sol si mit mir teilen	miner <liben> brvoder hant 
Do sprach der herre Gernot	nv nim dir swen dv wil 
di gerne mit dir ritent	der vindestv hi vil 
von drizech hvndert rechen	wir geben dir tvsent man 
di sin <din> heimgesinde	Criemhilt do senden began 
Nach Hagene von Tronege	vnd ovch nach Ortwin 
ob di vnt ovch ir mage	Criemhilde wolden sin 
do gewan dar vmbe Hagene	ein zornlichez leben 
er sprach iane mach vns Gvnther	ce werlde niemen gegeben 
Ander iwer gesinde	di lat iv volgen mite 
want ir doch wol bechennet	der Tronegære site 
wir mveezen bi den chvnigen	hiren hove bestan 
wir svln in langer dienen	den wir al her gevolget han 
Daz liezen si beliben	do bereiten si sich dan 
ir edel ingesinde	vrov Criemhilt zv zir gewan 
zw vnt drizech meide	vnt fvmpfhvndert man 
Eckewart der grave	der volgete Sifride dan 
Vrlovp si alle namen	beidiv ritter vnt chneht 
mægede vnd vrowen	daz was michel reht 
gescheiden chvssende	wrden si cehant 
si rvmten vroelichen	des kvnech Gvntheres lant 
Do beleiten si ir mage	vil verre vf den wegen 
man hiez in allenthalben	ir nahtsælde lægen 
swa si se gerne namen	al dvrch der chvnige lant 
do wrden botten balde	Sigemvnde dan gesant 
daz er daz wizen solde	vnt ovch Sigelint 
daz sin svn chomen wolde	vnd ovch vrovn Voten chint 
Criemhilt div vil schone	von Wormez vber Rin 
done chvnden in div mære	nimmer lieber gesin 
So wol mich sprach do Sigmvnt	daz ich gelæbet han 
daz Criemhilt div vil schone	sol hie gechronet gan 
des mvozen wol getiwert	sin al div erbe min 
min svn der edel Sifrit	sol hie selbe chvenech sin 
Do gap div edele Sigelint	vil manigen [322b] samit rot 
silber vnt golt vil swære	daz was ir bottenbrot 
si vrevte sich der mære	div si do vernam 
sich chleidete ir ingesinde	mit vlize als in do wol gezam 
Man sagete wer da chome	mit im in daz lant 
do hiezen si gesidele	rihten sa cehant 
dar zv er gecrhonet	vor vrivnden solde gan 
do ritten im engegene	des chvnich Sigemvndes man 
Ist iemen baz enpfangen	daz ist mir vmbechant 
danne di helde mære	in Sigemvndes lant 
Sigelint div schone	Criemhilt engegene reit 
mit maniger vrowen schonen	ir volgeten ritter gemeit 
in einer tageweide	da man di geste sach 
di chvnden vnt di vremden	liden vngemach 
vnz daz si chomen	ceiner bvrge wit 
div was gezeizen Santen	da si chrone trvgen sit 
Mit lachendem mvnde	Sigelint vnt Sigmvnt 
chvsten Criemhilt	dvrch liebe ce maniger stvnt 
vnt ovch Sifrit	in was ir leit benomen 
allez ir gesinde was in groze willechomen 
Man bat di geste <bringen>	fvr Sigmvndes sal 
di schonen ivnchvrowen	di hvp man da ce tal 
nider von den moeren	da was vil manich man 
do man den schonen vrowen	mit <vlize> dienen began 
Swi groz ir hohzit	bi dem Rine was bechant 
noch gap man den helden	hie vil bezer gewant 
denne si getrvgen	noch bi allen ir tagen 
man mohte michel wnder	von ir richeite sagen 
Do si in ir hohen eren	sazen vnd heten genvch 
waz golt varwer geren	ir ingesinde trvch 
perln vnd edel gesteine	verwieret wol dar in 
svs pflach ir vlizechlichen	Sigelint div edel chvenegin 
Do sprach vor sinen vrivnden	der herre Sigemvnt 
den Sifrides magen	tvn ich allen chvnt 
er sol vor disen recken	di mine chrone tragen 
div mære horten gerne	di von Niderlande sagen 
Er bevalch im sin gerihte	crone vnd ovch daz lant 
sit was er ir aller meister	di er ce rehte vant 
vnt dar er riten solde	daz wart also getan 
daz man sere vorhte	der shonen Crimhilden man 
In disen grozen eren	lebet er daz ist war 
vnd rihte vnder chrone	vnz an daz cehende iar 
daz div vil schone vrowe	einen svn gewan 
daz was des chvneges magen	nach ir willen ergan [323a] 
Den ilte man do tovffen	vnd gap im einen namen 
Gvnther nach sinem oheim	des en dorft er sich niht schamen 
geriet er nach den magen	daz wær im wol ergan 
do zoh man in mit vlize	daz was von shvlden getan 
In den selben ziten	starp vrov Sigelint 
do het den gewalt mit alle	der edeln Vote chint 
der so richen vrowen	ob landen wol gezam 
daz chlagten do genvge	<do> si der tot von in genam 
Nv het ovch dort bi Rine	so wir horen sagen 
bi Gvnther dem richen	eienen svn getragen 
Prvnnhilt div schoene	in Bvergvnden lant 
dvrch des heldes liebe	wart er Sifrit genant 
Wi rehte vlizechlichen	sin man hveten hiez 
Gvnther der edele	im magezogen liez 
di ez wol chvnden ziehen	ce einem biderbem man 
hey waz im vngelveche	sit der vrivnde an gewan 
Mære zallen ziten	der wart vil geseit 
wi rehte lobelichen	di recken vil gemeit 
lebten zallen stvnden	in Sigemvndes lant 
alsam tet ovch Gvnther	mit sinen magen vzer chant 
Daz lant cen Nibelvngen	Sifride diente hie 
richer siner mage	wart noch deheiner nie 
vnt ovch Nibelvnges recken	vnt ir beder gvt 
des trvch der vil chvene	deste hoehern mvt 
Hort den aller meisten	den helt ie gewan 
ane di es ê pflagen	hæte nv der chvene man 
den e vor einem berge	mit siner hende erstreit 
dar vmbe slvch er ce tode	vil manigen ritter gemeit 
Er heten wnsh der eren	vnt wære des niht geshehen 
so mvese man <von> schvlden	dem edeln rechen iehen 
daz <er> wære ein der beste	der vf oerss ie gasaz 
man vorhte sine sterche	vnt tet vil pilliche daz 