Alle ir vnmvze	di laze wir nv sin 
vnde sagen wi vrowe Criemhilt	vnt ovch ir magedin 
gegen Rine fvren	von Nibelvnge lant 
ni getrvgen moere	so manich riche gewant 
Vil der sovmschrine	man schiet zv den wægen 
do reit mit sinen vrivnden	Sifrit der dægen 
vnd ovch div chvneginne	dar si hæten vrevden wan 
sit wart ez in allen	ce grozem leide getan 
Da heime si do liezen	Sifrides chindelin 
vnt svn Criemhilde	daz mvs et also sin 
von ir hovereise	im erstvnt michel ser 
sin vater vnt sin mvter	gesach daz chindel nimmer mer 
Do reit ovch mit in dannen	der herre Sigemunt 
sold er rehte wizzen	wi ez nach der stvnt 
cer hogecite ergienge	er hete ir niht gesehen 
im chvnde ce lieben vrivnden	nimmer leider geschehen 
Di boten man fvr sande	di div mære sageten dar 
do reit ovch in engegen	mit wnnechlicher shar 
vil der <Voten> vrivnde	vnt der Gvntheres man 
der wirt gegen sinen gesten	vil sere sich vlizen began 
Er gie zv Prvnnhilt	da er <di> sitzen vant 
wi enpfie et ivch min swester	do ir chomet in min lant 
alsam sult ir enpfahen	daz Sifrides wip 
daz tvn ich von schvlden	gerne holt ist ir min lip 
Do sprach der kvenich riche	si chvment morgen vrv 
welt ir si enpfahen	da griffet balde zv 
daz wir in der bverge	niht erbiten hie 
mir chomen in <allen> wilen	so rehte liebe geste nie 
Ir mægede vnt ir vrowen	hiez do sa cehant 
<svchen> gvtev chleider	di besten di man vant 
di ir ingesinde vor gesten solden tragen 
daz taten si doch gerne	daz mach man lihte gesagen 
Ovch ilten in do dienen	di Gvntheres man 
alle sine rechen	der wirt zv sich gewan 
do reit div kveneginne	vil herliche dan 
da wart vil michel grvezen	die liebe geste getan 
Mit wi getanen vrevden	man di geste enpfie 
si dvhte daz vrov Crie [326b] mhilt	vrovn Prvnnhilde nie 
so rehte wol enpfienge	in Bvergvnde lant 
di si ê niht gesahen	den wart vil hoher mvot erchant 
Nv was ovch chomen Sifrit	mit den sinen man 
man sach di helde wenden	wider vnde dan 
des veldes allenthalben	mit vngefvegen scharn 
dringen vnd stovben	chvnde da niemen bewarn 
Do der wirt des landes	Sifride sach 
vnt ovch Sigemvnde	wi minnechlich er do sprach 
nv sit mir groze willechomen	vnt al di vrivnde min 
der iwer hovereise	svl wir hohgemvte sin 
Nv lon iv got sprach Sigemvnt	der ere gernde man 
sit daz ivch min svn Sifrit	ce vrivnde gewan 
do rieten mine sinne	daz ich ivch solde sæhen 
do sprach der chvnich Gvnther	mir ist liebe dar an geschehen 
Sifrit wart enpfangen	als im <da> wol gezam 
mit vil grozen eren	was im da niemen gram 
des half mit grozen zvehten	Giselher vnt Gernot 
ich wæne man ez gesten	noch nie so gvetlich erbot 
Do nahten zv ein ander	der zweir kvenege wip 
da wart vil satel lære	manich schoener vrowen lip 
wart von helde handen	erhaben vf daz gras 
di vrowen gerne dienten	waz der vmmvezegen was 
Do giengen zv ein ander	div minnechlichen wip 
des was in grozen vrevden	vil maniges ritters lip 
daz ir beider grvezen	so schone wart getan 
do sach man vil der rechen	bi ir ivnchvrowen stan 
Daz herliche gesinde	daz vie sich bi der hant 
in zvehte groze nigen	des man vil da vant 
vnd chvessen minnechlichen	von vrowen wolgetan 
daz was liep ce sæhene	Gvnthers vnd Sifrides man 
Sine bitten da niht langer	si ritten zv der stat 
der wirt daz sinen gesten	wol er ceigen bat 
daz man si gerne sæhe	in Bvrgvnden lant 
vil manigen pvneiz richen	man vor den ivnchvrowen vant 
Vzer Tronege Hagene	vnt ovch Ortwin 
da si gewaldech wæren	daz taten si wol schin 
swaz si gebieten wolden	daz torste man niht lan 
von in wart [327a] michel dienest	den lieben gesten getan 
Vil schilde hort man hellen	da ce dem pvergetor 
von stichen vnd von stoezen	lange habt der vor 
der wirt mit sinen gesten	ê si chomen drin 
ia giench in div stvnde	mit grozer chverzwile hin 
Fver den palas richen	mit vrowen si do ritten 
manegen pfellel spæhen	gvt vnd wol gesniten 
sach man vber sætel	den vrowen wolgetan 
allenthalben hangen	do chomen Gvntheres man 
<Di> geste hiez man fveren	balde an ir gemach 
vnder <wilen> blicken	man Prvnnhilde sach 
<an> vrovn Criemhilde	div schoene was genvch 
ir varwe gegen dem golde	den glanz vil herlichen trvch 
Allenthalben schallen	ce Wormez in der stat 
horte manz gesinde	Gvnther do bat 
Danchwarten sinen marshalch	daz ir solde pflegen 
do begond er daz gesinde	harte gvetliche legen 
Dar vze vnt ovch dar inne	spisen man si lie 
ia <wart> vremder geste	baz gepflegen nie 
alles des si gerten	des was man in bereit 
der chvenech der was so riche	daz da niemen niht wart verseit 
Man diente vrivntliche	vnd an allen haz 
der wirt do ce tissche	mit sinen gesten saz 
man bat Sifride sitzen	als er het ê getan 
do gi mit im ce sedele	vil manich wætlicher man 
Wol zwelf hvndert recken	an dem ringe sin 
da ce tissche sazen	Prvnnhilt div chvnegin 
gedaht daz eigenholde	niht richer chvnde wesin 
si was im noch so wæge	daz si in gerne lie genæsin 
An einem abende	da der chvenech saz 
vil der richen chleider	wart von wine naz 
da si schenchen solden	zv den tisschen gan 
da wart vil voller dienest	mit grozem vlize getan 
So man ce hohziten	lange hat gepflegen 
vrowen vnt mægde	dihiez man schone legen 
von swannen si dar chomen	der wirt in willen trvch 
mit gvtlichen eren	man gap in allen genvch 
Do div naht het ende	vnt der tach ershein 
vz den sovmshrinen	vil manich edel stein 
erlvht in gvter wæte	di rvorte vrowen hant 
do wart dar fver gesvchet	vil manich herlich gewant 
ê daz wol ertagete	do chomen fver den sal 
vil ritter vnde chnehte	do hvp sich aber der shal 
vor einer vrvemesse	di man dem [327b] chvenige sanch 
da ritten ivnge helde	daz sin der chvenech sagete danch 
Vil crepfteliche lvte	manich pvsv^n erdoz 
von trvmben vnt von floyten	wart der shal so groz 
daz Wormez div vil wite	dar nach lvt ershal 
di hohgemvten helde	ce rossen chomen veberal 
Do hvp sich in dem lande	vil harte hohe ein spil 
von manigem gvtem rechen	der sah man da vil 
den ir tvmbiv herce	gaben hohen mvt 
da sah man vnder shilde	vil manigen cieren ritter gvt 
In div venster sazen	div herlichiv wip 
vnd vil der schoenen mægede	gecieret was ir lip 
si sahen chverzewile	von manigem chvenem man 
der wirt mit sinen vrivnden	selbe riten began 
Svs vertriben si di wile	div dvhte niht lanch 
man horte da cem tvome	maniger gloken chlanch 
do chomen in di moere	di vrowen ritten dan 
den edelen chveneginnen	den volgete manech chvene man 
Si stvnden vor dem mvenster	nider vf daz gras 
Prvnnhilt ir gesten	dannoch vil wæge was 
si giengen vnder crone	in daz mvenster wit 
div liebe wart sit gesheiden	daz frvmte grozlicher nit 
Do si gehorten messe	si fvren wider dan 
mit vil manigen eren	man sach sider gan 
ce tissche vroliche	ir vrevde nie gelach 
da cer hohgecite	vnz an den einlefften tach 