An dem vierdem morgen	zwen vnt drizech man 
sach man ce hove riten	daz wart do chvnt getan [331a] 
Gvnther dem vil richen	im wære widerseit 
von lvge erwohsen vrovn Criemhilde	div aller grozzesten leit 
Vrlovp si namen	daz si fvr solden gan 
vnd iahen daz siz wæren	Livdegeres man 
den ê hete betwngen	div Sifrides hant 
vnd in ce gisel brahte	in daz Gvntheres lant 
Di boten er do grvzte	vnd hiez si sitzen gan 
ir einer sprach dar vnder	herre lat vns stan 
vnze wir sagen mære	die iv enbotten sint 
ia habt ir ce <vinde>	daz wizzet maniger mvter chint 
Iv widersaget Livdegast	vnd Livdeger 
den ir da wilen tatet	div grozlichen ser 
di wellent zv ziv riten	mit her in diz lant 
der chvenich begonde zvrnen	do er div mære bevant 
Do hiez man di meinræten	zen herbergen varn 
wi mohte sich her Sifrit	do da vor bewarn 
er oder andr iemen	daz si da trvgen an 
daz wart sit in selben	ce grozem leide getan 
Der chvnich mit sinen vrivnden	rvonende gie 
Hagen von Tronege	in nie gerwen lie 
noch heten ez gescheiden	genvge skveniges man 
done wolt et Hagene	nie des tages ab gegan 
Eines tages si Sifriden	rwoende vant 
do begonde vragen	der helt von Niderlant 
wi gat so trvrechliche	der chvnich vnt sine man 
daz hilf ich im imer rechen	hat im iemen iht getan 
Do sprach der herre Gvnther	mir ist von schvlden leit 
Livdegast vnd Livdeter	di habent mir widerseit 
si wellent offenlichen	riten in min lant 
do sprach der degen chvne	daz sol div Sifrides hant 
nach allen iwern eren	mit vlize vnderstan 
ich getvn noch den dægenen	als ich han ê getan 
ich gelege in wehste	ir bverge vnd ovch ir lant 
ê daz ich erwinde	des sin min hovbet iwer pfant 
Ir vnt iwer recken	svlt hi heime bestan 
vnd lat mich zv <zin> riten	mit den di ich han 
daz ich iv gerne diene	daz laz ich ivch sehen 
von mir sol eweren vienden	daz wizzet leide geschehen 
So wol mich dirre mære	sprach der chvenich do 
als ob er ernstliche	der helffe wære vro 
mit valsche neig im tieffe	der vngetriwe man 
do sprach der herre Sifrit	ir svlt vil chleine sorge han [331b] 
Do schichten si di reise	mit den chnehten dan 
Sifride vnd den sinen	ce sehen was ez getan 
do hiez er sich bereiten	di von Niderlant 
di Sifrides recken	svchten stritechlich gewant 
Do sprach der starche Sifrit	min vater Sigemvnt 
ir svlt hi beliben	wir chomen in chvrcer stvnt 
git vns got gelveche	her wider an den Rin 
ir svlt bi dem chvnige	hie vil vroliche sin 
Div zeichen si an bvnden	also si wolden dan 
da waren genvge	di Gvntheres man 
dine wessen niht der mære	<da> von ez was geschehen 
man mohte groz gesinde	do bi Sifride sehen 
Ir helme vnd ovch ir prvenne	si bvnden vf di march 
sich bereite vome lande	vil manich ritter starch 
so gi von Tronege Hagene	da er Criemhilde vant 
vnt bat im geben vrlovp	si wolden rvmen daz lant 
Nv wol mich sprach do Criemhilt	daz ich ie gewan den man 
der minen lieben vrivnden	wol tar vor gestan 
also min herre Sifrit	tvt den vrivnden min 
des wil ich hohes mvtes	sprach div chveneginne sin 
Vil lieber vrivnt Hagene	gedenchet ane daz 
daz ich iv gerne diene	vnd noch nie wart gehaz 
des lazzet mich geniezen	an minem liebem man 
ern sol des niht engelten	hab ich Prvnnhilde iht getan 
Daz hat mich sit gerwoen	sprach daz edel wip 
ovch hat er dar vmbe	cerblwoen minen lip 
daz ich iz ie geredete	daz beswæret ir den mvt 
daz hat vil wol errochen	der helt chvne vnd gvt 
Er sprach ir wert versvenet	noch wol nach disen tagen 
Criemhilt min liebiv vrowe	ia svlt ir mir sagen 
wi ich iv mvge gedienen	an Sifride iwerm man 
daz tvn ich gerne vrowe	wand iches niemen baz engan 
Ich wære an alle sorge	sprach daz edel wip 
daz im iemen næme	in stvrme sinen lip 
ob er niht wolde volgen	siner vebermvt 
so wære im sicher	der degen chvne vnd gvt 
Vrowe sprach do Hagene	vnt habt ir des wan 
daz man in mvege [332a] versniden	ir svlt mich wizzen lan 
mit wi getanen listen	ich daz sol vndersten 
ich wil <im> ce hvte	immer riten vnd gen 
Si sprach dv bist min mach	vnd ich pin <der> din 
ich bevilhe dir mit triwen	den lieben wine min 
daz tv mir wol behvetest	den min holden man 
Si sprach min man ist chvene	vnt dar zv starch genvch 
do er den lintrachen	an dem berge slvch 
ia badete sich in dem plvote	der reche vil gemeit 
da von in sit in stvrmen	nie dehein waffen versneit 
Iedoch pin ich in sorgen	swenn er in strite stat 
vnd vil der gershvezze	von helden hande gat 
daz ich da verliese	den minen lieben man 
hey waz ich grozzer sorge	<diche> vmbe Sifriden han 
Ich meld iz vf genade	vil lieber <vrivnt> 
daz dv dine triwe	behaltest ane mir 
da man da mach verhowen	den minen lieben man 
daz laz ich dich hoeren	deist vf genade getan 
Do von des trachen wnden	volz daz heize blvt 
vnd sich dar inne badete	der chvene ritter gvt 
do viel im zwihssen di herte	ein lindenblat vil breit 
da mach man in versniden	des ist mir sorgen vil bereit 
Do sprach von Tronege Hagene	vf daz sin gewant 
næt ir im ein chleinez ceichen	da ist mir bi bechant 
wa ich in mvege behevten	so wir in stvrme stan 
si wanden helt do vristen	ez was vf sinen tot getan 
Si sprach mit chleinen siden	næ ich vf sin gewant 
ein tovgenlichez crvece	da sol helt din hant 
den minen man behivten	so ez an di herte gat 
swenn er in den stvermen	vor sinen vienden stat 
Daz tvn ich sprach do Hagene	vil liebiv vrowe min 
do wand ovch des div vrowe	ez sol im vrvme sin 
do was da mit verraten	der Criemhilde man 
vrlovp nam do Hagene	do gie er vroeliche dan 
Des chveneges ingesinde	was alliz samt gemvt 
ich wæne immer recke	mer deheiner tvt 
so grozer meinræte	so da von im ergie 
do sich an sine triwe	Criemhilt div chveneginne lie 
Des andern morgens mit tvsent siner [332b] man 
reit der herre Sifrit	vil vroelichen dan 
er wand er solde rechen	der siner vrivnde leit 
Hagen im reit so nahen	daz er geschowete div chleit 
Als er gesach daz pilde	do schiet er tovgen dan 
di sageten ander mære	zwene siner man 
mit vride solde beliben	daz Gvntheres lant 
vnd si hete Livdger	zv dem chvenige gesant 
Wi vngerne Sifrit	do hin wider reit 
ern het etewaz errochen	siner vrivnde leit 
wand in vil chvm erwanden	di Gvntheres man 
do reit er zv dem kvenige	der wirt im danchen began 
Nv lon iv got des willen	vrivnt Sifrit 
daz ir so willechliche	tvt des ich ivch bit 
daz sol ich immer dienen	als ich von rehte sol 
vor allen minen vrivnden	so getrwe ich iv wol 
Nv wir der herverte	ledich worden sin 
so wil ich iagen riten	bern vnd swin 
hin cem Waschemwalde	als ich vil dike han getan 
daz het geraten Hagene	der vil vngetriwe man 
Allen minen gesten	sol man daz sagen 
daz wir vil vrv riten	di wellen mit mir iagen 
daz si sich bereiten	di aber hie bestan 
hovhssen mit den vrowen	daz si mir liebe getan 
Do sprach der herre Sifrit	mit herlichem site 
swenne ir iagen ritet	da wil ich gerne mite 
so svlt ir mir lihen	einen svcheman 
vnd etelichen bracken	so wil ich riten in den tan 
Welt ir niht nemen einen	sprach der kvenich cehant 
ich lih iv welt ir viere	den vil wol ist bechant 
der walt vnde ovch <di> stige	da div tier hine gant 
die ivch niht fverwise	cen herbergen riten lant 
Do reit zv sinem wibe	der recke vil gemeit 
schiere hete Hagene	dem kvenige geseit 
wir gewinnen wol	den tiwerlichen degen 
svs getaner vntriwe	solde niemer man gepflegen 