DO ERBITEN si der nahte	vnd fvren vber Rin 
von helden chvnde nimmer	wirs geiaget sin 
ein tier daz si slvgen	daz weinten edliv chint 
ia mvsen sin engelten	vil gvte wigande sint 
Von grozer vebermvete	mveget ir horen sagen 
vnd von eislicher rache	do hiez Hagen tragen 
Sifrit also toten	von Nibelvnge lant 
fver eine chæmenaten	da man Criemhilde vant 
Er hiez in tovgenlichen	legen an di tver 
daz sin da solde vinden	so si gienge da fver 
zer mettine	ê daz ez wrde tach 
der div vrowe Criemhilt	vil selten deheine verlach 
Man lvte da cem mvenster	nach gewoneheit 
vrov Criemhilt div schoene	wachte manige meit 
ein lieht bat si ir bringen	vnd ovch ir gewant 
do chom ein kamerære	da er Sifriden vant 
Er sah in blvtes rôten	sin wat was elliv naz 
daz ez sin herre wære	nine wesse er daz 
hin cer kemenaten	daz lieht trvg er an der hant 
von dem vil leiden mære	div vrov Criemhilt ervant 
Do si mit ir vrowen	cem mvnster wolde gan 
do sprach der chamerære	ir svlt stille stan 
ez lit vor disem gadme	ein ritter tot erslagen 
do begonde Criemhilt	vil harte vmmæzliche chlagen 
<ê> daz si reht erfvnde	daz iz wære ir man 
an di Hagenen vrage	denchen si began 
wi er in solde vristen	do wart ir erste leit 
von ir was allen vrevden	von sinem tode widerseit 
Do seich si zv der erden	daz si niht ensprach 
di schoenen vrevdelôsen	ligen man do sach 
Criemhilde iamer	wart vmmazen groz 
do erschre si nach vncreffte	daz al div chemenate erdoz 
Do sprach daz gesinde	waz ob ez ist ein gast 
daz blvt ir vz dem mvnde	von hercen iamer brast 
do sprach si ez ist Sifrit	der min vil [337b] lieber man 
ez hat geraten Prvennhilt	daz ez hat Hagen getan 
Do vrowe hiez sich wisen	da si den helt vant 
si hop sin hovbt schoene	mit ir vil wizzen hant 
swi rot ez wære von blvte	si het in schiere erchant 
do lach vil iæmerliche	der helt von Nibelvnge lant 
Do rief vil trvrechliche	div vrowe milt 
owe mich mines leides	nv ist dir <din> shilt 
mit swerten niht verhowen	div list ermorderot 
wesse ich wer iz het getan	ich riet im immer sinen tot 
Allez ir gesinde	chlagete vnd schre 
mit ir lieben vrowen	wande in was harte we 
vmb ir vil edeln herren	den si da heten velorn 
da het gerochen Hagene	harte Prvnnhilde zorn 
<Do> sprach div iamerhaffte	ir kamerære ir svlt hin gan 
vnd wechet harte balde	di Sifrides man 
ir svlt ovch Sigemvnde	minen iamer sagen 
ob er mir helffen welle	den chvenen Sifride chlagen 
Do lief ein bote balde	da er si ligen vant 
di Sifrides helde	von Nibelvnge lant 
mit den vil leiden maren	ir vrevd er in benam 
sine wolt es niht gelovben	vnz man daz weinen vernam 
Der bote chom ovch schiere	da der chvnich lach 
Sigemvnt der herre	der slaffes niht enpflach 
ich wæne sin herce im sagte	daz im was geschehen 
ern mohte sinen lieben svn	nimmer lebendich gesehen 
Vachet herre Sigemvnt	mich bat nach iv gan 
Criemhilt min vrowe	der ist ein leit getan 
daz ir vor allen leiden an ir herce gat 
daz svlt ir chlagen helffen	wand ez ivch sere bestat 
Vf rihte sich do Sigemvnt	er sprach waz sint div leit 
der schonen Criemhilde	div dv mir hast geseit 
der bote sprach mit weinen	ine chan iv niht verdagen 
ia ist von Niderlande	der chvene Sifrit erslagen 
Do sprach der herre Sigemvnt	lat iwer schimpfen sin 
vnd also bosiv mære	dvrch willen min 
daz ir ez saget iemen	daz er si erslagen 
wand ine chvnd in nimmer	vor minem tode verchlagen 
<Welt> ir mir niht gelovben	daz ir mir horet sagen 
so mvget ir selbe hoeren	Criemhilde klagen 
vnt allez ir gesinde den Sifrides tot 
vil <ser> scrachte do Sige [338a] mvnt	des gie im werliche not 
Mit hvndert sinen mannen	er von dem bette spranch 
si zvchten zv den henden	div scharffen <waffen> lanch 
si lieffen zv dem wffe	vil iamerliche dan 
do chomen tvsent rechen	des chvenen Sifrides man 
Do si so iæmerliche	di vrowen horten chlagen 
do wanden svemeliche	si solden chleider tragen 
iane mohten si der sinne	vor leide niht gehaben 
in wart vil michel swære	in ir hercen begraben 
Do chom der chvene Sigemvnt	da er Criemhilde vant 
er sprach owe der reise	her in dize lant 
wer hat mich mines chindes	vnd ivch des iweren man 
bi also gvten frivnden	svs mortliche ane getan 
Hey sold ich den bechennen	sprach daz vil edel wip 
holt wrde im nimmer	min herce vnt ovch min lip 
ich geriete im also leide	daz di frivnde sin 
von den minen schvlden	mvsen weinende sin 
Sigemvnt der herre	den fvrsten vmbesloz 
do wart von sinen vrivnden	der iamer also groz 
daz von dem starchen wffe	palas vnde sal 
vnd ovch di stat ce Wormze	von ir weinen erschal 
Done niemen getroesten	daz Sifrides wip 
man zoch vz den chleidern	den sinen lip 
man wsch im sine wnden	vnd leit in vf den re 
so was den sinen livten	von grozem iamer starche we 
Do sprachen sine rechen	von Nibelvnge lant 
in sol immer rechen	mit willen vnser hant 
er ist in dirre bverge	der iz hat getan 
do ilten nach den waffen	alle Sifrides man 
Di vz erwelten degene	mit schilden chomen dar 
einlef hvndert rechen	di het an siner schar 
Sigemvnt der herre	sines svnes tot 
den wold er gerne rechen	des gie im wærlichen not 
Sine wessen wen si solden	mit strite do bestan 
sine tæren ez danne	Gvnther vnd sine man 
mit den der herre Sifrit	an daz geieide reit 
Criemhilt sach si gewaffent	daz was ir groezliche leit 
Swi michel wær ir iamer	vnd swi starch ir not 
do vorhte	der Nibelvnge tot 
von ir brvder mannen	daz si ez vnderstvnt 
si warnt si als gvetliche	so vrivnde liebe vrivnde tvnt 
Do sprach div iamers riche	min herre Sigemvnt 
wes welt ir beginnen	iv ist niht rehte chvnt 
ia hat der kvenich [338b] Gvnther	so manigen chvenen man 
ir welt ivch alle vliesen	svlt ir di rechen bestan 
Mit vf erbvnden schilden	in was ce strite not 
div edel kvneginne	bat vnd gebot 
daz siz miden solden	di rechen vil gemeit 
do siz niht lazen wolden	ei was ir wærlichen leit 
Si sprach herre Sigemvnt	ir svlt iz lazen vnderstan 
vnz ez sich baz gefvege	so wil ich minen man 
immer mit iv rechen	der mir in hat benomen 
wird ich des bewiset	ich sol im schædeliche chomen 
Ez ist der vebermveten	hie bi Rine vil 
da von ich iv des strites	raten niht en wil 
si habent wider einen	ie wol drizech man 
nv laz in got gelingen	als vmb vns gedienet han 
Ir svlt hie beliben	vnt dolt mit mir miniv leit 
als iz tagen beginne	ir helde vil gemeit 
so helffet mir besarchen	den minen lieben man 
do sprachen di degene	daz sol werden getan 
Iv enchvnde niemen	daz wnder vol sagen 
von rittern vnt <von> vrowen	wi man di horte chlagen 
so daz man des wffes	wart in der stat gewar 
di edelen bvrgære	di chomen gahende dar 
Si chlageten mit den gesten	want in was harte leit 
daz Sifrides schvlde	in niemen het geseit 
dvrch waz der edel reche	verlvr den sinen lip 
do weinten mit den vrowen	der gvten bvrgære wip 
Smide hiez man gahen	wrchen einen sarch 
von silber vnd von golde	vil michel vnd vil starch 
man hiez in vaste spengen	mit stahel daz was gvt 
do was allen livten	harte trvrech der mvt 
Div naht was cergangen	man sagte ez wolde tagen 
do hiez div edel vrowe	zv dem mvnster tragen 
Sifriden den herren	den vil lieben man 
swaz er da vrivnde hete	di sach man weinende gan 
Do si in cem mvnster brahten	vil der gloken chlanch 
do hort man allenthalben	vil maniges pfaffen sanch 
do chom der kvnich Gvnther	mit den sinen man 
vnd ovch der grimme Hagene	zv dem wffe gegan 
Er sprach vil liebiv swester	owe der leide din 
daz wir niht ane	des grozen schaden sin 
wir mvezen chlagen immer	den Sifrides lip 
daz tvt ir ane schvlde	sprach daz iamerhafte wip 
Wær iv dar vmbe leide	son wær es niht <gesche [339a] hen> 
ir hetet min vergezzen	des mag ich nv wol iehen 
da ich da wart gescheiden	vnt min lieber man 
daz wolde got sprach Criemhilt	vnd wær iz mir selber getan 
Si buten vaste ir lovgen	Criemhilt begonde iehen 
swelher sich vnschvldige	der laze daz gesehen 
der sol zv der bare	vor den livten gen 
da bi mach man di warheit	harte schiere versten 
Daz ist ein michel wnder	vil dicke ez noch geschiht 
swa man den mortmeilen	bi dem toten siht 
so blvtent im di wnden	als ovch da geschach 
da von man di schvlde	da ce Hagene gesach 
Di wnden vlvzzen sere	alsam si taten ê 
di ê da sere chlageten	des wart nv michel me 
do sprach der kvenich Gvnther	ich wilz ivch wizzen lan 
in slvgen schachære	Hagen hat es niht getan 
Mir sint di schachære	sprach si vil wol bechant 
nv lazzez got errechen	noch siner vrivnde hant 
Gvnther vnd Hagene	ia habt ir iz getan 
di Sifrides degene	heten gegen strite wan 
Do sprach aber Crimhilt	habt mit mir di not 
do chomen dise beide	da si in fvnden tot 
Gere ir brvder	vnd Giselher daz chint 
in triwen si in chlageten	mit den anderen sint 
Si weinten innechlichen	den Crimhilde man 
man solde messe singen	zv dem mvnster dan 
giengen allenthalben	wip man vnt chint 
di sin doch liht enbaren	di weinten Sifriden sint 
<Gernot> vnd Giselher	di sprachen swester min 
nv troste dich nach tode	als iz doch mvz sin 
wir wellen dichs ergeczen	di wile wir geleben 
done chvnde ir trost deheinen	cer werlde niemen gegeben [339b] 
Sin sarch der was bereitet	wol vmbe einen mittentach 
man hvp in von der bare	da er vffe lach 
ine wolde noch div <frowe>	lazen niht begraben 
des mvsen al di livte	michel arbeite haben 
In einen richen pfellel	man den toten want 
ich wene man da iemen	ane weinen vant 
do chlagete hercenliche	Vte ein edel wip 
vnd allez ir gesinde	den sinen wætlichen lip 
Do man daz gehorte	daz man cem mvenster sanch 
vnt man in gesarchet hete	do hvp sich groz gedranch 
dvrch willen siner sele	waz opffers man do trvch 
er hete bi den vinden	doch gvter vrivnde genvch 
Criemhilt div arme	cen kameræren sprach 
si svln dvrch mine liebe	liden vngemach 
di im iht gvtes gvennen	vnd mir wesen holt 
dvrch Sifrides sele	sol man teilen sin golt 
Dehein chint was da so chleine	daz iht witze mohte haben 
daz mvse gen cem opffer	ê wrde begraben 
baz danne hvndert messe	man da des tages sanch 
von Sifrides vrivnden	wart da grozer gedranch 
Do man da hete gesvngen	daz volch hvp sich von dan 
do sprach div vrowe Criemhilt	irn svlt eine lan 
hinte mich bewachen	den vz erwelten degen 
ez ist an sinem libe	al min vrevde gelegen 
Dri tage vnd dri nahte	wil ich lazen stan 
vnz ich mich geniete	mines vil lieben man 
waz ob daz got gebivtet	daz mich nimt ovch der tot 
so wære wol verendet	min armer Criemhilde not 
Cen herbergen giengen	di livte von der stat 
pfaffen vnd mvenche	si beliben bat 
vnd allez sin gesinde	daz es des heldes pflach 
si heten naht vil arge	vnt vil mlvelichen tach 
Ane ezzen vnd ane trinchen	beleip da manich man 
di ez da nemen wolden	den [340a] wart daz chvnt getan 
daz mans in den vollen gæbe	daz schvf her Sigemvnt 
do was den Nibelvngen	vil arbeite chvnt 
Di drie tagecite	so wir horen sagen 
di da chvnden singen	daz si mvsen tragen 
vil der arbeite	waz man in opfers trvch 
di vil arme waren	di wrden riche genvch 
Swaz man vant der armen	di es niht mohten han 
di hei man cem opfer	mit dem golde gan 
vz sin selbes kamern	do er niht solde leben 
vmb sine sele	wart manich tvsent march gegeben 
Vrbor vf der erden	teilten si in div lant 
swa so man div kloster	vnd gvte livte vant 
silbers vnd wæte	gap man den armen genvch 
si tet dem wol <geliche>	daz sim holden willen trvch 
An dem dritten morgen	ce der rehten messecit 
so was bi dem mvnster	der chirchof also wit 
von den lantlivten	weinens also vol 
si dienten im nach tode	also man lieben vrivnden sol 
In den tagen vieren	man hat gesaget daz 
ce drizech tvsent marchen	oder dannoch baz 
wart dvrch sine <sele>	den armen da gegebn 
do was gelegen ringe	sin groziv schone vnd ovch sin leben 
Do got da wart gedienet	daz man vol sanch 
mit vngefvegem leide	vil des volches ranch 
man hiez in vz dem mvenster	zv dem grabe tragen 
di sin vngern enbaren	di sah man weinen vnd chlagen 
Vil lvte schriende	daz livt gi mit im dan 
vro en was da niemen	weder wip noch man 
ê daz man in begrvobe	man sanch vnd las 
<hey> waz gvter pfaffen	ce siner pifilde was 
E daz cem grabe choeme	daz Sifrides wip 
do ranch so mit iamer	ir getriwer lip 
daz man si mit dem brvnnen	vil dicke da vergoz 
ez was ir vngemvete	vil harte vnmæzlichen groz 
Ez was ein michel wnder	daz si ie genas [340b] 
mit chlage ir helfende	manich vrowe was 
do sprach div chveneginne	ir Sifrides man 
ir svlt dvrch iwer triwe	an mir genade began 
Lat mir nach minem leide	daz chleine liep geschehen 
daz ich sin schoene hovbt	noch eines mveze sehen 
do bat sis also lange	mit iamers sinnen starch 
daz man cebrechen mvse	do den herlichen <sarch> 
Do brahte man di vrowen	da si in ligen vant 
si hvp sin schoene hovbt	mit ir vil wizzen hant 
do chvstes also toten	den edel ritter gvt 
div ir vil liehten ovgen	vor leide weinten blvt 
Ein iamergez scheiden	wart do da getan 
do trvch man si von dannen	sine chvnde niht gegan 
do vant man sinnelose	daz herliche wip 
vor leide moht ersterben	der ir vil wnnechlicher lip 
Do man den edelen herren	hete nv begraben 
leit ane maze	sah man di alle haben 
di mit im chomen waren	von Nibelvnge lant 
vil selten vroelichen	man do Sigemvnden vant 
Da was der etlicher	der drier tage lanch 
vor dem grozem leide	niht az noch entranch 
do mohten si dem libe	so gar geswichen niht 
si nerten sich nach sorgen	so noch genvgen gesiht 