<· er> sweher Criemhilde	gie da er si vant 
er sprach cer chveneginne	wir svln in vnser lant 
wir wæn vnmære geste	bi dem Rine sin 
Criemhilt vil liebiv vrowe	nv vart ir zv den landen min 
Sit daz vns vntriwe	ane hat getan 
hi in disen landen	des iwern edeln man 
des svlt ir niht engelten	ich vil iv wæge sin 
dvrch mines svns liebe	des svlt [341a] ir ane zwivel sin 
Ir svlt haben vrowe	allen den gewalt 
den iv ê tæte chvnde	Sifrit der degen balt 
daz lant vnd ovch div chrone	daz si iv vndertan 
iv svln gerne dienen	alle Sifrides man 
Do saget man den chnehten	si solden riten dan 
do wart ein michel gahen	nach rossen getan 
bi ir starchen vienden	was in ze wesin leit 
den vrowen vnt den megden	hiez man svchen div chleit 
Do der kvnich Sigemvnt	wolde sin geriten 
do begonde Criemhilt	di ir mage biten 
daz si bi ir mvter	solde da bestan 
do sprach div vrowe herre	daz chvnde niemer ergan 
Wi mohten ich den immer	mit ovgen an gesehen 
von dem mir armem wibe	so leide ist geschehen 
do sprach der ivnge Giselher	vil liebiv swester min 
dv solt dvrch dine triwe	hi bi diner mvter sin 
Di dich da habent <beswæret>	vnde betrvebet den mvt 
der bedarftv niht ce dienste	nv zer min eines gvt 
si sprach zv dem rechen	iane mages niht geschehen 
vor leide mvoz ich sterben	swenne ich Hagenen mvse sehen 
Des tvn ich dir ce rate	vil liebiv swester min 
dv solt bi dinem brvder	Giselhere sin 
ia wil ich dich ergezzen	dines mannes tot 
do sprach div gotes arme	des wære Criemhilde not 
Do wz ir der ivnge Giselher	so gvetlich erbot 
do begonde vlêgen	Vote vnd Gernot 
vnd ir getriwe mage	si baten si da bestan 
si hete lvecel chvennes	vnder Sifrides man 
Si sint iv alle vremde	so sprach Gernot 
ezen lebet so starcher niemen	erne mveze ligen tot 
daz bedencht liebiv swester	vnd troestet iwern mvt 
belibt bi den vrivnden	daz wirt iv wærlichen gvt [341b] 
Si lobte Giselhern	si wolde da bestan 
div ross gezogen waren	den Sigemvndes man 
als si wolden riten	cer Nibelvnge lant 
do was ovch vf gesovmet	al der recken gewant 
Do gie der herre Sigemvnt	zv Criemhilde stan 
er sprach zv der vrowen	di Sifrides man 
nv warten bi den rossen	nv svl wir riten hin 
wand ich vil vngerne	bi den Bvergonden bin 
Do sprach div vrowe Criemhilt	mir ratent di vrivnde min 
swaz ich han getriwen	ich svl hie bi in sin 
ich habe niemen mage	in Nibelvnge lant 
vil leit was iz Sigemvnde	do erz an Criemhilde ervant 
Do sprach der kvenich Sigemvnt	lat iv niemen sagen 
vor allen minen magen	svlt ir di chrone tragen 
also gewaltechliche	als ir e habt getan 
ir en svlt des niht engelten	daz wir den helt verloren han 
Vnd vart ovch mit vns wider	dvrch iwer chindelin 
daz en svlt ir niht vrowe	weise lazen sin 
swenne iwer svn gewahset	der trostet iv den mvt 
di wile sol iv dienen	manich helt chvne vnd gvt 
Si sprach herre Sigemvnt	iane mach ich riten niht 
ich mvz hie beliben	swaz halt mir geschit 
bi den minen magen	di mir helfen chlagen 
do begonden disiv mære	den gvten recken missehagen 
Si sprachen al geliche	so moehte wir wol iehen 
daz vns allererste	wære leit geschehen 
woldet ir beliben	bi vnsern vinden hie 
so geritten hovereise	noch helde sorchlicher nie 
Ir svlt ane sorge	got bevolhen varn 
man git iv gvt geleite	ich heiz ivch wol bewarn 
zv Sigemvndes lande	min liebez chindelin 
daz sol vf genade	iv rechen wol bevolhen sin 
Do si wol vernamen	daz si niht wolde dan 
do weinten al geliche	di Sigemvndes [342a] 
wi rehte iamerlichen	schiet do Sigemvnt 
von vrovn Criemhilde	do was im vngemvete chvnt 
So we der hohgecite	sprach do der kvnech her 
ez geschit von chvrcewile	hinfvr nimmer mer 
kvnige noch sinen magen	daz vns ist geschehen 
man sol nimmer mere	hi cen Bvergonden sehen 
Do sprachen offenliche	di Sigemvndes man 
ez mohte noch div reise	in diz lant ergan 
so wir den reht erfinden	der vns den herren slvch 
si habent von sinen magen	starcher viende genvch 
Er chvste Criemhilden	wi iamerlichn er sprach 
do si beliben wolde	vnd er daz reht ersach 
nv riten vrevden ane	heim in vnser lant 
alle mine sorge	sint mir erste nv bechant 
Si riten an geleite	von Wormez <nden> Rin 
s mohten wol des mvtes	vil sicherlichen sin 
ob si in vientschepfte	werden an gerant 
daz sich weren wolde	der chvnen Nibelvnge hant 
Sine gerten vrlovbes	da ze cheinem man 
do sah man Gernot	vnd Giselheren gan 
zv zim minnechlichen	im was sin schade leit 
des <brahten> in wol inne	di helde chvne vnt gemeit 
Do sprach gezogenlichen	der fvrste Gernot 
got weiz daz wol von himele	an Sifrides tot 
gewan ich ni di <schvlde>	daz ich daz horte sagen 
wer im hie vient wære	ich sol in pilliche chlagen 
Do gab in gvt geleite	Giselher daz chint 
er brahte sorgende	vz dem lande sint 
den kvenich mit sinen recken	heim ce Niderlant 
wi lvecel man der mage	dar inne vroelichen vant 
Wi si nv gefveren	des chan ich niht gesagen 
man horte hie zallen ziten	Criemhilde chlagen 
daz ir niemen troste	daz herce vnt ovch den mvt 
ezen tæte Giselher	der was getriwe vnde gvt [342b] 
<Prvnhilt> div schoene	mit vebermvete saz 
swaz geweinte Criemhilt	vnmær was ir daz 
sine wart <ir> gvter triwe	<nimmer mer> bereit 
sit getet ir ovch vrov Criemhilt	div vil hercenlichen leit 