<Si> was ce Zeizenmvre	vnz an den vierden tach 
div molte vff der straze	di wile ni gelach 
sine stvebe alsam ez brvenne	allenthalben dan 
da ritten dvrch Osteriche	des chvnich Eceln man 
Do was ovch dem chvenige	vil rehte nv geseit 
des im von den gedanchen	swnden siniv leit 
wi herlichen Criemhilt	da chome dvrch div lant 
der kvenich begonde gahen	da er di wolgetanen vant [356b] 
Von vil maniger sprache	sah man vffe den wegen 
vor Eceln riten	manigen chvenen degen 
von cristen vnd von heiden	vil manige wite schar 
da si di vrowen fvnden	si chomen herliche dar 
Von Rivzen vnd von Criechen	reit da vil manich man 
den Poelan vnt den Walachen	sach man swinde gan 
ir ross div vil gvten	da si mit creffte riten 
swaz si site heten	der wart vil wenich vermiten 
Uon dem lande ze Chiewen	reit da vil manich degen 
vnt di wilden Petsschenære	da wart vil gepflegen 
mit dem bogen schiezen	cen vogeln di da flvgen 
di pfile si vil sere	zv den wenden vaste zvgen 
Ein stat bi Tvonowe	lit in Osterlant 
div ist geheizen Tvln	da wart ir bechant 
vil manich site vremede	den si ê nie gesach 
si enpfiengen da genvge	den sit leit von ir gesach 
Vor Eceln dem chvenege	ein ingesinde reit 
vro vnd vil riche	hoefsh vnt gemeit 
wol vier vnd zweinzech fversten	tiwer vnd her 
daz si ir vrowen sæhen	da von engerten si niht mer 
Der herzoge Ramvnch	vzer Walachen lant 
mit siben hvndert mannen	chom er fver si gerant 
sam vliegende vogele	sah man si varn 
do chom der fverste Gybecke	mit vil herlichen scharn 
Hornboge der snelle	wol mit tvsent man 
cherte von dem chvenege	gegen siner vrowen dan 
vil lvte wart geschallet	nach des landes siten 
von der Hivnen magen	wart ovch da sere geritten 
Do chom von Tenemarchen	der chvene Hawart 
vnt Yrinch der vil snelle	vor valsche wol bewart 
vnt Irnfrit von Dveringen	ein wætlicher man 
si enpfiengen Criemhilde	daz sis ere mvsen han 
mit zwelf hvndert mannen	di fvrtens in ir schar 
do chom der herre Bloedelin	mit drin tvsent dar 
der Eceln brvder	vzer Hivnen lant 
der chom <vil> herliche	da er di chveneginne vant 
Do chom der chvenich Ecel	vnd ovch her Dietrich 
mit allen sinen gesellen	da was vil lobelich 
manich ritter edele	biderbe vnd gvt 
des wart do vrovn Criemhilde	vil wol gehoehet der mvt 
Do sprach cer kveneginne	der herre Rvedger 
vrowe ich wil enpfahen	hie den chvnich her 
swen ich ivch heize chvessen	daz sol sin getan [357a] 
iane mvgt ir niht geliche	gervzen <alle> Eceln man 
Do hvp man von dem moere	di chveneginne her 
Ecel der vil riche	enbeite do niht mer 
er stvnt von sinem rosse	mit manigem chvenem man 
man sah in vroliche	gegen Criemhilde gan 
Zwene fvrsten riche	als vns daz ist geseit 
bi der vrvn gende	trvgn iriv chleit 
da ir der chvonich Ecel	hin engegen gie 
da si den fvrsten edele	mit chvsse gvetliche enpfie 
Vf rvchte si ir gebende	ir varwe wolgetan 
div lvht ir zv dem golde	da was vil manich man 
di iahen daz vrov Helche	niht schoener chvnde sin 
da bi so stvnt vil nahen	des kveniges brvder Bloedelin 
Den hiez si chvessen Rvedeger	der margrave rich 
vnt den kvnech Gybechen	da stvnt ovch Dieterich 
der recken chvste zwelve	daz Eceln wip 
do enpfie si svs mit grvze	vil maniges riteres lip 
Al di wile vnd Ecel	bi Chriemhilde stvnt 
do taten do di tvmben	als noch di livte <tvnt> 
vil manigen pvneiz richen	sah man da geriten 
daz taten Cristen helde	vnd ovch di heiden nach ir siten 
Wi rehte ritterliche	di Dieteriches man 
di schefte liezen vliegen	mit trvnzvnen dan 
hohe vber di schilde	gvter ritter hant 
von den tivschen gesten	wart dverchel manich schildes rant 
Da wart von schefte brechen	vil michel doz vernomen 
do waren von dem lande	di <rechen> alle chomen 
vnt ovch des chveneges geste	vil manich edel man 
do gie der kvnech riche	mit vrovn Criemhilde dan 
Si sahen bi in stende	ein vil herlich gezelt 
von hvetten was erfvllet	alvmbe daz velt 
da si <solden> rwen	nach ir arbeit 
von helden wart gewiset	dar vnder manich schoniv meit 
mit der chveneginne	da si sit gesaz 
vf rich stvlgewæte	der margrave daz 
hetez wol geschaffen	daz man ez vant vil gvt 
daz gesidele Criemhilde	des vroevt sich Eceln mvt 
Waz do redete Ecel	daz ist mir vm [357b] bechant 
in der sinen zeswen	lag ir wiziv hant 
si gesazen minnechliche	da Rvedger der degen 
den kvenech niht wolde lazen	Criemhilde heinliche pflegen 
Do hiez man lan beliben	den bvhvrt veber al 
mit eren wart verendet	da der groze schal 
do giengen zv den hveten	di Eceln man 
man gap in herberge	vil wite allenthalben dan 
Der tach der het nv ende	si schvf ir gemach 
vnz man den liehten morgen	aber schinen sach 
do was zv den rossen	chomen manich man 
hey waz man chvrzewile	dem chvenege ce eren began 
Der kvnech ez nach den eren	di Hivnen schaffen bat 
do ritten si von Tvlne	ce Wiene zv der stat 
da fvnden si gezieret	vil maniger vrowen lip 
si enpfiengen wol mit eren	des kvenech Eceln wip 
Mit harte grozen vollen	so was in bereit 
swaz <si> haben solden	vil manich helt gemeit 
sich vrevte gegen dem schalle	herbergen man began 
des kvneges hohgezite	div hvp sich vrolichen an 
Sine mohten niht geherbergen	alle in der stat 
di niht geste waren	Rvedger di bat 
daz si herberge	næmen in daz lant 
ich wene man alle zite	bi dem Criemhilde vant 
<· en> herren Dieterichen	vnd andern manigen degen 
si heten sich der <rvwe>	mit arbeit bewegen 
dvrch daz si den gesten	trosten wol den mvt 
her Rvedger vnd sine vrivnde	heten chvercewile gvt 
Div hohzit was gevallen	an einen pfinxtach 
da der kvnech Ecel	bi Criemhilde lach 
in der stat ce Wiene	si wæn so manigen man 
bi ir ersten manne	nie ze dienste gewan 
Si chvnte sich mit gabe	dem der si nie gesach 
vil maniger dar vnder	zv den gesten sprach 
wir wanden daz vrov Criemhilt	gvtes niht mohte han 
nv ist hie mir ir gabe	vil manich wnder getan 
Div hohzit div werte	sibenzehen tage 
ich wæne man von deheinem	kvnige mere sage 
des hohzit grozer wære	daz ist vns gar verdeit 
alle di da waren	di trvgen iteniwoe chleit 
Si wæn in Niderlande	da vor nine gesaz [358a] 
mit so manigem recken	da bi so gelovbe ich daz 
was Sifrit rich des gvtes	daz er nie gewan 
so manigen recken edele	so si sach vor Eceln stan 
Ovch gap nie deheiner	zv sin selbes hohgezit 
so manigen richen mantel	tief vnd wit 
noch so gvter cleider	der si mohte vil han 
so si dvrch Criemhilde	heten alle getan 
Ir frivnde vnt ovch di geste	di heten einen mvt 
daz si da niht ensparten	deheiner slahte gvt 
swes iemen an si gerte	daz gaben si bereit 
des gestvnt da vil der degene	von milte bloz ane chleit 
Wi si ce Rine sæze	si gedaht ane daz 
bi ir edelen manne	ir ovgen wrden naz 
si hetes vaste hæle	deiz iemen chvnde sehen 
ir was nach manigem leide	so vil der eren geschehen 
Swaz iemen tet mit milte	daz was gar ein wint 
vnz an Dieterichen	swaz Botelvnges chint 
im gegeben hete	daz was nv gar verswant 
ovch begie da michel wnder	des milten Rvedegeres hant 
Vzer Vngerlande	der fverste Bloedelin 
der hiez da lære machen	vil manich leitschrin 
von silber vnd von golde	daz wart da hin gegeben 
man gesach des chveneges helde	so rehte vroliche leben 
Wærbel vnd Swemmelin	des kveniges spilman 
ich wæne ir ieselicher	zer hohgezit gewan 
wol ce tvsent marchen	oder dannoch baz 
da div schoene Criemhilt	bi Ecel vnder chrone saz 
An dem ahzentem morgen	von Wiene si do ritten 
da wart in ritterschepfte	schilde vil versniten 
von spern di da fvrten	di recken an der hant 
svs chom der chvenich Ecel	vnz in daz hivnissche lant 
Ze Heimbvrch der alten	si waren vber naht 
done chvnde niemen wizzen	wol des volches aht 
mit wi getaner crefte	si ritten veber lant 
hey waz man schoener vrowen	in siner heinmvete vant 
Ze Misenbvrch der richen	da shifften si sich an 
daz wazer wart verdechet	von ross vnd ovch von man 
alsam ez [358b] erde wære	swaz man sin vliezen sach 
di wegemveden vrowen	di heten senfte vnd ovch gemach 
Zesamene was geslozen	manich shif vil gvt 
dar veber was gespannen	manich gvt gecelt 
sam ob si noch heten	beidiv lant vnde velt 
Do chomen disiv mære	ce Ecelnpvrch von dan 
do vrevten sich dar inne	wip vnde man 
des Eceln ingesinde	des ê div vrowe pflach 
gelebten sit bi Crimhilde	vil manigen vroelichen tach 
Do stvnden da wartende	vil manich edel meit 
di von Helchen tode	heten manigiv leit 
siben chvenige toehter	Crimhilt noch da vant 
von den was gezieret	wol allez Eceln lant 
Div ivnchvrowe Herrat	noch des gesindes pflach 
div Helchen swester tohter	an der vil tvgende lach 
div gemahele Dieteriches	eins edeln chvneges chint 
div tohter Næntwines	div het vil der eren sint 
Gegen der geste chvemfte	vrevte sich ir mvt 
ovch was dar zv bereitet	vil creftigez gvt 
wer chvnde iv daz bescheiden	wi sit der chvenech saz 
si gelebten da ce Hivnen	nie mit der chvneginne baz 
Do der chvenech mit sinem wibe	von dem stade reit 
wer ieslichiv wære	daz wart do wol geseit 
di edelen Criemhilde	si grvztens deste baz 
hey wi gewaltechliche	si sit an Helchen stat gesaz 
Getriwelicher dienste	wart ir vil bechant 
do teilte div chvneginne	golt vnt gewant 
silber vnt gesteine	swaz di des veber Rin 
mit ir cen Hivnen brahte	daz mvse gar cergeben sin 
Ovch wrden ir mit dieneste	sider vndertan 
alle des chveniges mage	vnt alle sine man 
daz div vrowe Helche	so gewalteclich gebot 
so si nv mvsen dienen	vnz an den Criemhilde tot 
Do stvnt mit soelhen eren	der hof vnt ovch daz lant 
daz man da zallen ziten	di chvrzewile vant 
swar nach ieslichem	daz herce trvch den mvt 
dvrh des chveneges liebe	vnt di kveneginne gvt [359a] 