<Nv> laze wir beliben	wi si gefvren hie 
hochgemvte recken	di gefvrn nie 
so rehte herliche	in deheines chveneges lant 
si heten swaz si wolden	beidiv waffen vnt gewant 
Der vogt von dem Rine	chleidete sine man 
sehzech vnd tvsent	als ich vernomen han 
vnd niwen tvsent chnehte	gegen der hohgezit 
di si da heime liezen	di beweinetenz sit 
Do trvch man div gereite	ce Wormez veber den hoff 
do sprach da von Spyre	ein alter bisschoff 
zv der schoenen Vten	vnser frivnde wellent varn 
gegen der hohgezite	got mvez ir ere da bewarn 
Do sprach zv zir chinden	div edel Vte 
ir soldet hie beliben	helde gvte 
mir ist getrovmet hinte	von angestlicher not 
wi allez diz gefvegele	in disem lande wære tot 
Swer sich an trovme wendet	sprach do Hagene 
der enweiz der rehten mære	niht ce sagene 
wenn ez im ze eren	vollechlichen ste 
ich wil daz min herre	ze hove nach vrlovbe ge 
Wir svln gerne riten	in Ecelen lant 
da mach wol dienen chvenegen	gvter <held> hant 
da wir da schowen mvezen	Chriemhilde <hohgezit> 
Hagen riet di reise	iedoch gerov ez in sit 
Er hetez widerraten	want daz Gernot 
mit vngefvegen worten	<im> also missebot 
er mant in Sifrides	vrovn Criemhilden man 
er sprach da von wil Hagene	di grozen hovereise lan 
Do sprach von Tronege Hagene	dvrh vorhte ich nine tvo 
swenne ir gebietet helde	so svlt ir griffen zvo 
ia rit ich mit iv gerne	in Ecelen lant 
sit wart von im verhowen	vil manich helm vnde rant 
Div siff bereitet waren	da was vil manech man 
swaz si chleider heten	div trvch man dar an 
si warn vmmvezech	vor abendens zit 
si hvoben sich von hvse	vil harte vroeliche sit 
Gezelt vnde hvetten	spien man an daz gras 
anderthalp des Rines	do daz geschehen was 
der kvenech bat noch beliben	daz sin vil schoene wip 
si trvote noch des nahtes	den sinen wætlichen lip [365b] 
Pvsvnen floytiern	hvp sich des morgens frv 
dar si varn solden	da bereiten si sich zv 
swer liep heten arme	der trvote frivndes lip 
des schet sit vil mit leide	des kvnech Ecelen wip 
Div chint der schoenen Vten	di heten einen man 
chvene vnd getriwe	do si wolden dan 
do sagt er dem kvenege	tovgen sinen mvt 
er sprach des mvoz ich trvren	daz ir di hovereise tvt 
Er was geheizen Rvmolt	vnd was ein helt cer hant 
er sprach wem welt ir lazen	livte vnd ovch div lant 
daz niemen chan erwenden	iv recken iwern mvt 
div Criemhilden mære	nie gedvhten mich gvt 
Daz lant si dir bevolhen	vnt min kindelin 
vnt diene wol den vrowen	daz ist der wille min 
swen dv sehest weinen	dem troeste sinen lip 
iane getvt vns nimmer	des kvenech Eceln wip 
Div ross bereitet waren	den kvenegen vnd ir man 
mit minnechlichem chvessen	schiet vil maniger dan 
dem in hohem mvte	lebte da der lip 
daz mvose sit beweinen	vil manich wætlichez wip 
Do man di snellen recken	cen rossen sah gan 
do chos man vil der vrowen	trvrechlichen stan 
daz ir vil langenz scheiden	sagt in vil wol ir mvt 
vf grozen schaden ce chomene	daz herce niemen sanfte tvt 
Di snellen Bvergonden	sich vz hvoben 
do wart in dem lande	ein michel voben 
beidenthalp der berge	weinte wip vnd man 
swi dort ir volch getæte	si fvren vroeliche dan 
Di Nibelvnges helde	chomen mit in dan 
in tvsent halspergen	ce hvs si heten lan 
vil manige schoene vrowen	di gesahen si nimmer me 
di Sifrides wnden	taten Criemhilde we 
Do sicheten si ir reise	gegen dem <Mevne> dan 
vf dvrch Oster vranchen	di Gventheres man 
dar leite si do Hagene	dem was ez wol bechant 
ir marschalk was Danchwart	der helt von Bvergonden lant 
Do si von <Ostervranchen>	gegen Salvelde ritten 
do mohte man si chiesen	an herlichen siten 
di fversten vnt ir mage	di helde lobesam 
an dem [366a] zwelften morgen	der kvenich an di Tvnowe quam 
Do reit von Tronege <Hagen>	zaller vorderost 
er was den Nibelvngen	ein helflicher trost 
do derbeizte der degen chvene	nider vf den sant 
sin ross er harte balde	zv zeinem bovme gebant 
Daz wazzer was engozen	div sciff verborgen 
ez ergie den Nibelvngen	ze grozen sorgen 
wi si chomen vebere	der wach was in ze breit 
do erbeizte zv der erden	vil manich ritter gemeit 
Leide sprach do Hagene	mach dir wol hie geschehen 
voget von dem Rine	nv maht dv selbe sehen 
daz wazer ist engozen	vil starch ist im sin flvot 
ia wæne wir verliesen	noch hivte hie manigen helt gvt 
Waz wizet ir mir Hagene	sprach der kvenech her 
dvrh iwer selbes tvgende	vntroestet vns niht mer 
den fvrt svlt ir vns svchen	hinveber an daz lant 
daz wir von hinnen bringen	beidiv ross vnt ovch gewant 
Ian ist mir sprach Hagene	min leben niht so leit 
daz ich mich welle ertrenchen	in disen venden breit 
ê sol von minen handen	ersterben manich man 
in Ecelen landen	des ich vil gvten willen han 
Belibet bi dem wazer	ir stolzen ritter gvt 
ich wil di vergen svchen	selbe bi der flvot 
di vns bringen vebere	in Gelfrates lant 
do nam der starche Hagene	sinen gvten schildes rant 
Er was vil wol gewaffent	den schilt er dannen trvch 
sinen helm vf gebvnden	lieht was er genvch 
do trvg er ob der brvenne	ein waffen also breit 
daz ce beden eken	harte vreislichen sneit 
Do svcht er nah den vergen	wider vnd dan 
er horte wazer giezen	losen er began 
in einem schoenem brvnnen	daz taten wisiv wip 
di wolden sih da chvelen	vnd badeten ir lip 
Hagen wart innen	er sleich in tovgen nach 
do si daz versvnnen	do wart in dannen gach 
daz si im entrvnnen	des waren si vil her 
er nam in ir [366b] gewæte	der helt enschadete in niht mer 
Do sprach daz eine merewib	Hadebvrch was si genant 
edel ritter Hagene	wir tvon <iv> hie bechant 
swenne ir vns degen chvene	gebet widr vnser wat 
wi iv ze den Hivnen	disiv hovereise ergat 
Si swebten sam di vogele	vor im vf der flvt 
des dvhten in ir sinne	starch vnd gvt 
swaz si im sagen wolden	er gelovtez deste baz 
des er do hinz in gerte	vil wol bescheideten si im daz 
Si sprach ir mvegt wol riten	in Eceln lant 
des setze ich iv ce bvergen	mine triwe hi ce hant 
daz helde nie gefvoren	in deheiniv riche baz 
nach also grozen eren	nv gelovbet wærliche daz 
Der rede was do Hagene	in sinem hercen her 
do gap er in ir chleider	vnd svmte sich niht mer 
do si do an geliten	ir wnderlich gewant 
do sageten si im rehte	di reise in Ecelen lant 
Do sprach daz ander merewip	div hiez Sigelint 
ich wil dich warnen Hagen	daz Aldrianes chint 
dvrh der wæte liebe	hat min mvome dir gelogen 
chvemestv hin cen Hivnen	so bistv sere betrogen 
Ia soltv cheren widere	daz ist dir an der zit 
wand ir helde chvene	also geladet sit 
daz ir sterben mvezet	in Eceln lant 
swelhe dar geritent	di habent den tot an der hant 
Do sprach aber Hagene	ir trieget ane not 
wi moehtez sich gefvegen	daz wir alle tot 
solden da beliben	dvrh iemens haz 
si begonden im div mære	sagen chventlicher baz 
Do sprach aber div eine	ez mvz also wesen 
daz iwer deheiner	chan da niht genesen 
niwan des chveneges kappelan	daz ist vns wol bechant 
der chvemet gesvnt widere	in daz Gventheres lant 
Do sprach in grimmem mvote	der chvene Hagene 
daz wære minen [367a] herren	mvelich ce sagene 
daz wir alle cen Hivnen	solden vliesen den lip 
noch zeige vns verz wazer	daz aller wiseste wip 
Si sprach sit dv der verte	niht welles haben rat 
<swa> obene bi dem wazer	ein herberge stat 
da inne ist ein verge	vnd niender anderswa 
der mære der er vragte	der gelovbet er sich da 
Dem vngemvotem rechen	sprach div eine nach 
nv bitet noch her Hagene	ia ist iv gar ze gach 
ver nemet noch div mære	wir chvmet veber sant 
dirre marcherre	der ist Else genant 
Sin brvoder ist geheizen	der degen Gelfprat 
ein herre in Beyerlande	wi mvelich ez iv stat 
welt ir dvrh sine marche	ir svlt ivh wol bewarn 
vnd svlt ovch mit dem vergen	vil bescheidenliche varn 
Der ist so grimmes mvotes	er lat ivch niht genesen 
iren welt bi dem helde	mit gvoten sinnen wesen 
welt ir daz vber er <ivh> fvere	so gebet im den solt 
er hvetet disses landes	vnd ist Gelpfrade holt 
Vnde chvom er niht bezite	so rvffet veber flvt 
vnt ieht ir heizet Amelrich	der was ein helt gvt 
der dvrch fientschepfte	rvomte dizze lant 
so chvmt iv der verge	swenne im der nam wirt genant 
Der vebermvte Hagene	der vrowen do neich 
ern redete niht mere	wan daz er vaste sweich 
do gie er bi dem wazer	fver sich an den sant 
da er anderthalben	ein herberge vant 
Er begonde vaste rvoffen	hin veber den flvt 
nv hol mich hi verge	sprach der degen gvt 
so gip ich dir ce miete	einen bovch von golde rot 
ia ist mir dirre verte	daz wizest wærliche not 
Der verge was so riche	daz im niht dienen zam 
da von er lon selten	von iemen da genam 
ovch waren sine chnehte	vil harte hohgemvt 
noh stvnt allez Hagen	eine disehalp der flvt 
Do rvffte er mit der chreffte	daz al der wag erdoz 
wan des heldes sterche	was michel vnd groz 
nv hol mich Amelrichen	ich pin der Elsn [367b] man 
der dvrch starche fintschaft.	von <disem> lande entran 
Vil hohe an dem swerte	einen bovch er im bot 
lieht vnd schoene	was er von golde rot 
daz man in veber fvrte	in Gelpfrades lant 
der vebermvte verge	nam selb daz Rvder an di hant 
Ovch was der selbe verge	nivlich gehit 
div gvf nach grozem gvte	vil boese ende git 
do wold er verdienen	daz Hagenen golt so rot 
des leid er von dem degene	den swertgrimmigen tot 
Der verge ilte genote	hin vber an den sant 
den er dannen horte	do er des niht evant 
do zvrnde er ernslichen	als er Hagenen sach 
vil harte grimmechlich	er zv dem degen sprach 
Ir mvget wol sin gezeizen	benamen Amelrich 
des ich mich hie verwæne	dem sit ir vngelich 
<von> vater vnd von mvter	was er der brvder min 
nv ir mich betrogen habt	ir mvezet disehalp sin 
<nein> dvrch got den richen	sprach do Hagene 
ich bin ein recke vremde	vnt sorge vff degene 
<Nv> nemet hin vrivntliche	hivte minen solt 
daz ir mich vberfvret	ich pin iv wærlichen holt 
<do> sprach abe der verge	des mach niht gesin 
ez habent fiande	di lieben herren min 
<dar vmbe> ich niemen vremden	fvere in diz lant 
so liebe dir si ce lebene	so trit vil balde vz an den sant 
<nvne> tvtes <niht> sprach Hagene	wan trvrech ist min mvt 
nemet von mir ce minne	diz golt vil gvt 
vnt fvret vns veber tvsent ross	vnt also manigen man 
do sprach der grimme verge	ez wirdet nimmer getan 
Er hvp ein starchez rvder	michel vnd breit 
er slvch vf Hagenen	des wart er vngemeit 
daz er in dem schiffe	strvchte an siniv chnie 
so rehte grimmer verge	der chom dem Tronegær nie 
Do wolde er baz erzvrnen	den vbermvten gast 
er slvch im einen schalten	daz div gar cerbrast 
Hagen vber daz hovbet	er was ein starcher man 
da von der Elsen verge	grozen schaden da gewan [368a] 
Mit grimmegem mvte	greif Hagen zehant 
vil balde ze siner scheiden	da er ein waffen vant 
er slvch im ab daz hovbet	vnd varf ez an den grvnt 
div mære wrden schiere	den stolzen Bvrgonden <chvnt> 
In den selben stvnden	do er den schifman slvch 
daz shiff daz vloz en owe	daz was im leit genvch 
ê erz gerihte widere	mveden er began 
do zoh vil chrefftechliche	des chvenech Gventheres man 
Mit zvegen harte swinden	chert ez der gast 
vnz im daz starche rvder	in der <hende> brast 
er wolde zv den recken	vz an einen sant 
da was deheinez mere	hey wi schier erz da gebant 
Mit einem shilt vezel	daz was ein porte smal 
gegen einem walde	chert er hinze tal 
do vant er sinen herren	an dem stade stan 
do gie im hin engegen	vil manich wætlicher man 
Mit grvoze in wol enpfiengen	di snellen ritter gvt 
do sahens in dem shiffe	riechen daz blvt 
von einer starchen wnden	di er dem vergen slvch 
do wart von den degenen	gevraget Hagen genvch 
Do der kvenich Gventher	daz heize blvt ersach 
sweben in dem shiffe	wi balde er do sprach 
wan sagt ir mir Hagene	war ist der verge chomen 
iwer starchez ellen	ich wæn im daz leben hat benomen 
Do sprach er lovgenliche	da ich daz shif da vant 
bi den wilden widen	da lost ez min hant 
ich han deheinen vergen	hivte hie gesehen 
ez ist ovch niemen leide	von minen shvlden hi geschehen 
Do sprach von Bvrgonden	der herre Gernot 
hivte mvz ich sorgen	vf lieber frivnde tot 
sit wir der shifflivte	bereite nine han 
wi wir chvmen veber	des mvz ich trvrende stan 
Vil lvte rieff do Hagene	leit nider vf daz gras 
ir chnehte div gereite	ich gedenche daz ich was 
der aller beste verge	den man bi dem Rine vant 
ia getrwe ich ivch wol bringen	hinveber in Gelpfrades lant 
Daz si dester balder	choemen veber flvt 
div ross si an slvgen	daz swimmen daz wart gvt 
wand in div starch ven [368b] de	deheinez da benam 
etelichez owete verre	als ez mveden began 
Do trvgen si cem sheffe	ir golt vnd ovh ir wat 
sit daz si der verte	niht mohten haben rat 
Hagen was da meister	des fvrt er vff den sant 
vil manegen richen recken	in daz vnchvnde lant 
Zem ersten braht er veber	wol tvsent ritter her 
dar nach sine recken	dannoch was ir mer 
nivn tvsent knehte	fvrt er an daz lant 
des tages was vnmvezech	des Tronegeres hant 
Do er si wol gesvnde	brahte veber den flvt 
do gedahte vremder mære	der snelle degen gvt 
div im ê da sageten	div wilden merwip 
des het des chvneges kapelan	nach verlorn sinen lip 
Bi dem kappelsavme	er den pfaffen vant 
ob dem heilchtvme	er leinte an siner hant 
des moht er niht genizen	do in Hagen sach 
der gotes arme prieister	mvose liden vngemach 
Er swang in vz dem shiffe	dar zv wart im gach 
do rieffen ir genvge	<nv> vaha herre vach 
Giselher der ivnge	zvernen erz began 
ern wold iz doh niht lazzen	ir deheinen vnderstan 
Do sprach von Bvrgonden	der herre Gernot 
waz hilffet ivh nv Hagene	des kappelanes tot 
tæt ez ander iemen	daz sold iv wesen leit 
vmbe welhe shvlde	habt ir dem priester widerseit 
Der pfaffe swam genote	er wolde sin genesen 
ob im iemen hvelfe	des mohte da niht wesen 
wan der starche Hagene	vil zornech was gemvt 
er stiez in zv dem grvnde	daz dvhte niemene gvt 
Do der arme pfaffe	der helfe nine sach 
do chert er wider vebere	des leid er vngemach 
swi er niht swimmen chvnde	im half div gotes hant 
daz er wol <chom> gesvnder	hin wider vz an daz lant 
Do stvnt der arme priester	vnde schvtte sine wat 
da bi sach wol Hagen	daz sin niht wære rat 
daz im fver war sageten	div wilden merewip 
er dahte dise degene	mvezen verliesen den lip 
Do si daz shif entlvden	vnd gar getrvgen dan 
swaz dar vf heten	der drier [369a] chvenege man 
Hagen slvch ez ce stvchen	vnd warfez an den flvt 
des het michel wnder	di recken chvene vnde gvt 
Zwiv tvt ir daz brvder	so sprach Danchwart 
wi svl wir veber	so wir di widervart 
riten von den Hivnen	ze lande an den Rin 
sit do sagete in Hagene	daz des chvnde niht gesin 
Do sprach der helt von Tronege	ich tvn iz vf den wan 
ob wir an dirre reise	deheinen zagen han 
der vns entrinnen welle	dvrch zægeliche not 
der mvz an diesem wæge	doch liden schameliche tot 
Si fvrten mit in einen	vz Bvrgonden lant 
einen helt ce sinen handen	der was Volker genant 
der redete spæheliche	allen sinen mvt 
swaz ie begie der Hagene	daz dvht den videlære gvt 
Ir ross bereitet waren	di sovmer wol geladen 
si heten an der verte	noch deheinen schaden 
genomen der si mvete	wan des kveneges chappelan 
der mvse vffe sinen fvezen	hin wider zv dem Rine gan 