<Do> di Bvergonden	chomen in Eceln lant 
do gevriesh ez von Berne	der alte Hildebrant 
er sagtez sinem herren	ez was im harte leit 
er bat in wol enpfahen	di ritter chvene vnt gemeit 
Wolfhart der snelle	hiez bringen div march 
do reit mit Dieteriche	vil manich degen starch 
da er si grvezen wolde	zv zin an daz velt 
da hetens vf gebvnden	vil manich herlich gezelt 
Do si von Tronege Hagen	verrest riten sach 
zv den sinen herren	gezogenlich er sprach 
nv svlt ir snelle rechen	von den sedeln stan 
vnd get <in> hin engegene	di ivch da wellent enpfah 
Dort chvmt her ein gesinde	daz ist mir wol bechant 
ez sint vil snelle degene	von Amelvnge lant 
di fvert der von Berne	di sint vil hohgemvt 
ir svlt iz niht versmahen	swaz man iv dieneste getvt 
Do stvnden von den rossen	daz was michel reht 
neben Dieteriche	manich ritter vnd kneht 
si giengen zv den gesten	da man di helde vant 
si grvoz [376b] ten minnechlichen	di von Bvrgonden lant 
Do si der herre Dieterich	gegen im chomen sach 
hie mveget ir gerne hoeren	waz do der degen sprach 
zv den Vten chinden	ir reise was im leit 
er wand ez wiste Rvedger	daz erz in hete geseit 
Sit willechomen ir herren	Gvnther vnd Giselher 
Gernot vnde Hagene	sam si her Voelker 
vnt Danchwart der vil snelle	ist iv daz niht bechant 
Criemhilt noh sere weinet	den helt von Nibelvnge lant 
Si mach wol lange weinen	sprach do Hagene 
er lit von manigem iare	gar ce tode erslagene 
den kvenech von den Hivnen	den sol si holden haben 
Sifrit chvmt niht widere	er ist vor maniger zit begraben 
Di Sifrides wnden	lazen wir nv sten 
sol leben div vrowe Crimhilt	noch mag schade ergen 
so redet von Berne	der herre Dieterich 
trost der Nibelvnge	da vor behvete dv dich 
Wi sol ich mich behevten	sprach der 
Ecel vns boten sande	wes sol ich vragen mer 
daz wir zv zim solden	riten her in daz lant 
ovch hat vns menigiv mære	min swester Criemhilt gesant 
Ich chan iv wol geraten	sprach aber Hagene 
ni bitet iv div mære	baz ce sagene 
den herren Dieterichen	vnt sine helde gvt 
daz si ivch laze wizen	der vrovn Criemhilde mvt 
Do giengen svndersprachen	di drie kvenge rich 
<Gventher> vnd Gernot	vnd ovch her Dieterich 
nv sage vns von Berne	vil edel ritter gvt 
wi dir si gewizen	vmb der chveneginne mvt 
Do sprach der voget von Berne	waz sol ich mere sagen 
ich hoer alle morgen	weinen vnd klagen 
mit iamerlichen sitten	daz Eceln wip 
dem richen got von himele	des starchen Sifrides lip 
Ez ist et vnerwendet	sprach der [377a] chvene man 
Volker der videlære	daz wir vernomen han 
wir svln ce hove riten	vnd svln lazen sehen 
waz vns vil snellen degenen	da cen Hivnen mvege geshehen 
Di chvnen Bvrgonden	hinze hove ritten 
si chomen herliche	nach des landes sitten 
do wnderte da cen Hivnen	vil manegen chvenen man 
vmb Hagen von Tronege	wi der wære getan 
Dvrch daz man sagete mære	des was im genvch 
daz er von Niderlande	Sifriden slvch 
sterchest aller recken	den Crimhilde man 
des wart michel vrage	ce hove nach Hagene getan 
Der helt was wol gewahsen	daz ist al war 
groz was er cen brvsten	gemischet was sin har 
mit einer grisen varwe	div bein warn im lanch 
vnd eislich sin gesihene	er hete herlichen ganch 
Do hiez man herbergen	di Bvergonden man 
Gvntheres ingesinde	daz wart gesvndert dan 
daz riet div	im vil hazes trvch 
da von man sit di knehte	in der herberge slvch 
Danchwart Hagen brvder	der was marshalch 
der kvnech im sin gesinde	vlizechlich bevalch 
daz er ir vil wol pflege	vnd in gæbe genvch 
der helt von Bvrgonden	in allen gvten willen trvch 
Criemhilt div schone	mit ir gesinde gie 
da si di Nibelvnge	mit valschem mvt enpfie 
si chvste Giselhern	vnd nam in bi der hant 
daz sah von Tronege Hagene	den helm er vaste gebant 
Nach svs getanem grvze	sprach do Hagene 
mvegen sich verdenchen	snelle degene 
man grvzet svnderlingen	di chvene vnd ir man 
wir haben niht gvter reise	zv dirre hohgezit getan 
Si sprach sit willechomen	swer ivch gerne siht 
dvrch iwer selbes frivntschaft	so grveze ich iwer niht 
saget waz ir mir bringet	von Wormez vber Rin 
dar vmb ir mir so groze	soldet willechomen sin [377b] 
Het ich gewest div mære	sprach do Hagene 
daz iv gabe solden	bringen degene 
ich wære wol so riche	het ich mich baz verdaht 
daz ich iv mine gabe	her ce lande hete braht 
Nv svlt ir mich der mære	mere wizen lan 
hort der Nibelvnge	war <habt> ir den getan 
der was doh min eigen	daz ist wol bechant 
den soldet ir mir fveren	in daz Eceln lant 
Entriwen min vrov Criemhilt	des ist vil manech tach 
daz ich hort der Nibelvnge	nie nie gepflach 
den hiezn mine herren	senchen in den Rin 
da mvz er wærliche	vnz an daz ivngeste sin 
Do sprach div chvneginne	ich hans ovch gedaht 
ir habt mirs noch vil wenich	her ce lande braht 
swi er min eigen wære	vnde ich sin wilen pflach 
des han ich alle zite	vil manigen trvrigen tach 
Ia bringe ich iv den tivel	sprach aber Hagene 
ich han an minem schilde	so vil ce tragene 
vnd an der minen brvenne	min helm der ist so lieht 
daz swert an miner hende	des enbringe ich iv nieht 
Do sprach div chvneginne	cen recken veber al 
man sol decheiniv waffen	tragen in den sal 
ir helde ir svlt mirs vf geben	ich wil si behalten lan 
entrivwen sprach do Hagene	ez wirdet nimmer getan 
Iane ger ich niht der eren	fvrsten wine milt 
daz ir cen herbergen	trveget minen schilt 
vnde ander min geweffen	ir sit ein chvenegin 
daz en lerte mich niht min vater	ich wil selbe kamærære sin 
Owe miner leide	sprach do vrov Criemhilt 
war vmbe wil <min> brvder	vnd Hagen sinen schilt 
niht lazen behalten	si sint gewarnot 
vnd wesse ich wær daz tæte	der mvese chiesen den tot 
Des antwrte ir mit zorne	der fverste Dieterich 
ich pin iz der hat gewarnet	di edeln chvnege rich 
vnd Hagen den chvenen	den Bvrgonden man 
nv zv valandinne	dvne solt michs niht geniezzen lan 
Des schamte sich vil sere	daz Eceln wip [378a] 
si vorhte bitterlichen	den Dieteriches lip 
do gi si von im balde	daz si nine sprach 
wan daz si swinde bliche	an ir viande sah 
Behenden sich do viengen	zwene degene 
daz eine was her Dieterich	daz ander Hagene 
do sprahc gezogenliche	der recke vil gemeit 
daz iwer chomen cen Hivnen	daz ist mir wærliche leit 
Dvrch daz <div> chveneginne	daz gesprochen hat 
do sprach von Tronege Hagene	es wirt wol alles rat 
svs redeten mit ein ander	di zwene chvene man 
daz der kvenech Ecel	dar vmbe vragen began 
Div mære weste ich gerne	sprach der kvenech rich 
wer der reche wære	den dort her Dieterich 
so frivntlich enpfahet	er treit vil hohen mvt 
swer sin vater wære	er mach wol sin ein helt gvt 
Des antwrte dem chvenege	ein Crimhilde man 
er ist geborn von Tronege	sin vater hiez Aldrian 
swi blid er hie gebare	er ist ein grimmer man 
ich laze ivch daz wol schowen	daz ich gelogen nine han 
Wi sol ich daz erchennen	daz er so grimmech ist 
dannoch er nien vesse	vil manigen argen list 
den sit div chveneginne	an ir magen begie 
daz si mit dem lebene	deheinen von den Hivnen lie 
Wol erchande ich Aldrianen	der was min man 
lob vnd michel <ere>	er hi bi mir gewan 
ich machete in ce ritter	vnd gap im min golt 
Helche div getriwe	was im innechlichen holt 
Da von ich wol erchenne	allererst wer <si> sint 
ez wrden mine gisel	zwei wætlichiv chint 
er vnde von Spanye Walther	di whsen hi ce man 
Hagen sande ich wider heim	Walther mit Hiltegvnt entran 
Er gedahte langer mære	div warn ê geschehen 
sinen frivnt von Tronege	den het er reht ersehen 
der im in siner ivgende	vil starchiv dienest bot 
sit frvmt er im in alter	vil manigen lieben vrivnt <tot> [378b] 