Also der chvene Danchwart	vnder di tver getrat 
daz Eceln gesinde	er hoher wichen bat 
mit blvte was bervnnen	allez sin gewant 
ein vil starchez waffen	daz trvg er bloz an siner hant 
Vil lvt rief do Danchwart	zv dem degene 
ir sitzet al ce lange	brvder Hagene 
iv vnde got von himele	chlag ich vnser not 
ritter vnde knehte sint in den herbergen tot 
Er rief im hin engegene	wer hat daz getan 
daz het der herre Blodelin	vnde sine man 
ovch hat ers ser engolten	daz wil ich iv sagen 
ich han mit minen handen	im sin hovbet abe geslagen 
Daz ist ein schade chleine	sprach aber Hagene 
da man saget mære	von einem degene 
ob er <von> rechen henden	verlivset sinen lip 
in svln deste ringer	chlagen wætlichiv wip 
Nv saget mir brvder Danchwart	wi sit ir so rot 
ich wene ir von vinden	lidet groze not 
ist er inder ime lande	derz iv hat getan 
in en nert der vbel tivfel	ez mvz im an sin leben gan 
Dv sihest mich wol gesvnden	min wat ist blvtes naz 
von anderr manne wnden	ist mir geschehen daz 
der ich also manegen	hivte han erslagen 
ob iches swern solde	ine chvndiz nimmer gesagen 
Er sprach brvder Danchwart	<so> hvetet vns der tveer 
vnde lat der Hivnen einen	chomen niht der fver 
ich wil reden mit den recken	als vns des twinget not 
vnser ingesinde	lit vor in vnverdienet tot [389b] 
Sol ich sin chamerære	sprach der chvene man 
also richen chvenegen	ich gedienen chan 
so pflige ich der stiegen	nach den eren min 
den Criemhilde degenen	chvnde leider niht gesin 
Mich nimt des michel wnder	sprach aber Hagene 
waz nv hinne rvnen	di Hivnen degene 
si wæn liht des enbæren	der an der tvr da stat 
vnt div hovemære	gesaget den Bvergonden hat 
Ich han vernomen lange	von Criemhilde sagen 
daz si ir herceleide	wold niht vertragen 
nv trinchen wir di minne	vnde gelten skveneges win 
der ivnge vogt der Hivnen	der mvz der erste sin 
Do slvch daz chint Ortlieben	Hagen der helt gvt 
daz im gegen der hende	ame swerte vloz daz blvt 
vnt daz dem chvenege	daz hovbet spranch in di shoz 
do hvb sich vnder degenen	ein mort vil grimmech vnde groz 
Dar nach slvg er den magtzogen	einen swinden slach 
mit beiden sinen henden	der des chindes pflach 
daz im daz hovbet schiere	vor dem thisshe nider lach 
ez was ein iamerliches lon	daz er dem magtzogen wach 
Er sach vor Eceln thisse	einen spilman 
Hagen in sinem zorne	gahen dar began 
er slvch <im> vf der videlen	ab di zeswen hant 
daz habe dir ce botschepfte	in der Bvrgonden lant 
So we mir miner hende	sprach Werbel der spilman 
her Hagen von Tronege	waz het ich iv getan 
ich chom vf groze triwe	in iwerr herren lant 
wi chlinge ich nv di done	sit ich verlorn han di hant 
Hagen geahtet ringe	gevidelte er nimmer mer 
do frvmt er in dem hvse	div mortgrimmen ser 
an den Eceln rechen	der er so vil erslvch 
do braht er in dem hvse	livtes ce tode genvch 
Volker der vil snelle	von dem thisse spranch 
sin videlboge im lvt [390a]	 an siner hende erchlanch 
do videlte vngefvge	Gvntheres spilman 
hey waz er im ce viende	der chvenen Hivnen gewan 
Ovch sprvngen von den thissen	di drie chvenege her 
si woldenz gerne scheiden	ê daz shaden geshæhe mer 
sine <mohtenz> mit ir sinnen	do niht vnderstan 
do Volker vnde Hagene	so sere weten began 
Do sach der vogt von Rine	vngescheiden <den> strit 
do slvch der fvrste selbe	vil manige wnden wit 
dvrch di liehten ringe	den vianden sin 
er was ein helt cen handen	daz tet er groezliche schin 
Do chom ovch zv dem strite	der starche Gernot 
ia frvmte er der Hivnen	vil manegen helt tot 
mit einem sharpfen swerte	daz gab im Rvedeger 
den Eceln rechen	tet er div groezlichen ser 
Der ivnge svn vrovn Vten	zv dem strite spranch 
sin waffen herlichen	dvrch di helm erchlanch 
den Eceln recken	vzer Hivnen lant 
da tet vil michel wnder	des chvenen Giselheres hant 
Swi frvm si alle wæren	di chvnege vnd alle ir man 
doch sach man vor in allen	Giselheren stan 
gegen den vianden	er was ein helt gvt 
er frvmt da mit wnden	vil manegen vallen in daz plvt 
Ovch werten sich vil sere	di Eceln man 
do sach man di geste	hohwende stan 
mit den vil liehten swerten	dvrh des chveneges sal 
do horte man allenthalben	von wffe grozen schal 
Do wolden di dar vz	zir frivnde sin dar in 
di namen an den tvernen	vil chleinen gewin 
do wæren di dar inne	vil gerne fver den sal 
Danchwart liez ir deheinen	di stiegen vf vnde ovch ce tal 
Des hvb sich vor dem tvrne	vil starcher gedranch 
vnde ovch von den swerten	grozer helme chlanch 
des chom der chvene Danchwart	in eine groze not 
daz besorgte sin brvder	als im sin triwe daz gebot [390b] 
Vil lvte rief do Hagene	Voelkeren an 
seht ir dort geselle	minen brvder stan 
vor hivnisschen recken	vnder starchen slegen 
vrivnt nert mir den brvder	ê wir vliesen den degen 
Daz tvn ich sicherlichen	sprach der spilman 
er begonde videlende	dvrch den palas gan 
ein hertez swert im ofte	an siner hende erchlanch 
di recken von dem Rine	im sageten grozlichen danch 
Volker der chvene	zv Danchwarten sprach 
ir habt erlitten hivte	vil grozen vngemach 
mich bat iwer brvder	dvrch helfe zu ziv gan 
welt ir nv sin dar vze	so wil ich innerthalben stan 
Danchwart der snelle	stvnt vzerthalp der tver 
er werte in ir stiege	swaz ir chom darfver 
des horte man waffen hellen	den helden an der hant 
sam tet ovch innerthalben	Volker von Bvrgonden lant 
Der chvene videlære	rief veber di menege 
der sal ist wol beslozen	min vrivnt her Hagene 
ia ist also verschranchet	div Eceln tver 
von zweir helde handen	den gent wol tvsent rigel fver 
Do von Tronege Hagene	di tver sah so behvt 
den schilt warf do ce rvke	der mære helt gvt 
do begond er erste rêchen	daz im was getan 
do heten sine viande	cem lebene deheiner slahte wan 
Do der vogt von Rine	reht daz ersach 
daz Hagen der starche	so manegen helm brach 
der chvenech der Amelvnge	spranch vf eine banch 
er sprach hie shenchet Hagene	daz aller wirsiste tranch 
Der wirt het groze sorge	als im do daz gezam 
waz man im lieber vrivnde	vor sinen ovgen nam 
wande er vor sinen vinden	vil chvme da genas 
er saz vil angestlichen	was half in daz er kvenech was 
Criemhilt div riche	rief Dieterichen an 
nv hilf mir ritter edele	mit dem leben dan 
dvrch aller fversten [391a] tvgende	vzer Amelvnge lant 
wand erreichet mich Hagene	ich han den tot an der hant 
Wi sol ich iv nv gehelffen	sprach her Dieterich 
edeliv chvneginne	nv sorge ich vmbe mich 
ez sint so sere erzvernet	di Gvntheres man 
daz ich an disen ziten	gefriden niemen chan 
Neina herre Dieterich	vil edel ritter gvt 
laza hivte schinen	den tvgentlichen mvt 
daz dv mir helfest hinnen	oder ich belibe tot 
der sorge gie Criemhilde	vil harte groezliche not 
Daz wil versvchen	ob ich iv gehelfen chan 
wande ich in manegen ziten	nie gesehen han 
so bitterlich erzvernet	so manegen ritter gvt 
ia sah er dvrch di helme	von swerten springen daz plvt 
Mit krapf begonde rvfen	der degen vz erchorn 
daz sin stimme erlvte	alsam ein wisentes horn 
vnt daz div bvrch vil wite	von siner crapft erdoz 
div sterche Dieteriches	was vnmæzliche groz 
Do gehorte Gventher	rvffen disen man 
in dem herten stvrme	losen er began 
er sprach Dieteriches stimme	ist in mine ore chomen 
ich wæne im vnser degene	im haben etwæn hi benomen 
Ich sih in vf dem thisse	er winchet mit der hant 
ir frivnt vnde mage	von Bvergonden lant 
gehabt vf des strites	lat hoeren vnde sehen 
waz hi dem degene	von minen mannen si geschehen 
Do der kvenech Gventher	bat vnde ovch gebot 
si habten vf mit swerten	in des strites not 
daz was gewalt vil grozer	daz da niemen slvch 
ia vragete den von Berne	der mære schiere genvch 
Er sprach vil edel Dieterich	waz ist iv hi getan 
von den minen vrivnden	willen ich des han 
bvze vnde svne	der bin ich iv bereit 
swaz iv iemen tæte	daz wær mir innechlichen leit 
Do sprach der herre Dieterich	mir ist niht getan 
lat mich vz dem hvse	mit iwerem vride gan 
<von> diesem herten strite	mit dem gesinde min 
daz wil ich sicherlichen	immer dienende sin 
Wi vliehet ir so schiere	sprach do Wolfrat 
ia hat der videlære	di tver ni so verspart 
wir entsliezen so wite	daz wir dar fver gan 
nv swiget sprach her Dieterich	ir habet den tivel getan 
Do sprach der kvenech Gventher	erlovben ich iv wil 
fvret v^ze dem hvse	lvecel oder vil 
ane mine vinde	di svln hi bestan 
si hant mir hi cen Hivnen	so rehte leide getan 
Do er daz gehorte	vnder arme er besloz 
di edeln kveneginne	der sorge div was groz 
do fvrt er anderthalben	Eceln mit im dan 
ovch mit Dieteriche	sehs hvndert wætlicher man 
Do sprach der margrave	der edel Rvedger 
sol aber vzem hvse	iemen chomen mer 
di iv doch gerne dienen	daz lazet vns vernemen 
so sol ovch vride stæter	den gvten vienden gezemen 
Des antwrte Giselher	von Bvrgonden lant 
vride vnde svne	si iv von vns bechant 
sit ir sit triwen stæte	ir vnde iwer man 
ir svlt vnangestlichen	mit iwern vrivnden hinnen gan 
Do Rvedeger der herre	gervmete den sal 
fvnfhvndert oder mere	im volgeten veber al 
der von Bæchelaren	vrivnt vnde siner man 
von dem chvenege Rvedeger	schaden grozen sit gewan 
Do sach ein Hivnen recke	Eceln gan 
bi Dieteriche nahen	genôzen wold er sin han 
dem gap der videlære	einen solhen slach 
daz im vor Eceln fvzzen	daz hovbet schiere gelach 
Do der wirt des landes	chom fver daz hvs gegan 
do chert er sich hin widere	vnde sach Volkeren an 
owe mir dirre geste	dice ist ein grimmigiv [392a] not 
daz alle mine recken	svln vor in <wesen> tot 
Ach we der hohgezite	sprach der chvenech her 
da vihtet einer inne	der heizet Voelker 
als ein eber wilde	vnde ist ein spilman 
ich danches minem heile	daz ich dem tivel entran 
Sine leiche lvtent vbele	sine zvege di sint rot 
ia vellent sine doene	vil manigen helt tot 
ine weiz niht waz vns wize	der selbe spilman 
wand ich gast ni deheinen	so rehte leiden gewan 
Si heten di si wolden	lazen fver den sal 
do hvb sich innerthalben	ein grozlicher schal 
di geste sere rachen	daz in ê geschach 
Volker der vil chvene	hey waz er helme cerbrach 
Sich cherte gegen dem schalle	gventher der kvenech her 
hoert ir doene Hagene	di dort Volker 
videlt mit den Hivnen	swer zv dem tvrn gat 
ez ist ein rôter anstrich	den er ce dem videlbogen hat 
Mich riwet ane maze	so sprach Hagene 
daz ich ie gesaz in dem hvse	vor dem degene 
ich was sin geselle	vnde ovch er der min 
vnd chome wir immer wider heim	daz svln wir noch mit triwen sin 
Nv schowe kvenech here	Volker ist dir holt 
er dienet vlizechliche	din silber vnt din golt 
sin videlboge im snidet	dvrch den herten stal 
er brichet vf den helmen	div liehte schinenden mal 
Ine gesach nie videlære	so herlichen stan 
als der degen Volker	hivte hat getan 
di sinen leiche hellent	dvrch helme vnd rant 
ia sol er riten gutiv ross	vnde tragen herliche gewant 
Swaz der Hivnen mage	in dem sal was genesen 
der enwas nv deheiner	dar inne me genesen 
des was der schal geswiftet	daz niemen mit in streit 
div swert von handen legeten	di chvenen recken gemeit [392b] 