<Nv> bintet ab di helme	sprach Hagen der degen 
ich vnde mine gesellen	wir svln iwer pflegen 
vnde wellent iz noch versvchen	zv zvns di Eceln man 
so warne ich mine herren	so ich aller schiereste chan 
Do entwafent daz hovbet	vil manich [397] ritter gvt 
si sazen vf di wnden	di vor in in daz plvoist 
waren zv dem tode	von ir handen chomen 
da wart der edeln geste	vil vebele govm genomen 
Noch vor dem abende	do shvf der kvnech daz 
vnde ovch div chvneginne	daz ez versvchten baz 
di hivnisschen recken	der sah man vor in stan 
noch wol zweinzech tvsent	si mvsen da ce strite gan 
Sich hvb ein stvrm herte	zv den gesten san 
Danchwart Hagen <brvder>	vil snelle man 
Spranch von sinen herren	cen vienden fver di tver 
man wande er wære erstorben	er chom gesvnder wol darfver 
Der herte strit der werte	vnz iz div naht benam 
do werten sich di geste	als gvten helden zam 
den Eceln mannen	den svmerlangen tach 
hey waz noch chvener degene	vor in veige gelach 
Ceinen svnewenden	daz groze mort geschach 
daz div vrowe Criemhilt	ir herceleit errach 
an ir næhesten magen	vnde anderem manigem man 
da von der kvenech Ecel	vrevde nimmer mer gewan 
In was des tages cervnnen	do gie in sorgen not 
si gedahten daz in bezer	wære ein chvercer tot 
denne lange da ce qvelne	vf vngefvegiv leit 
eines vrides si do gerten	di stolcen ritter gemeit 
Si baten daz man brehte	den kvenech zv in dar 
di blvtvarwen helde	vnde ovch harnaschvar 
traten vz dem hvse	di drie kvenege her 
sine wessen wem ce chlagene	div ir vil grozlichen ser 
Ecel vnde	di chomen beide dar 
daz lant daz was ir eigen	des merte sich ir schar 
er sprach zv den gesten	nv saget waz welt ir min 
ir wænet vride gewinnen	daz chvnde [397b] mvelich gesin 
Vf schaden also grozen	als ir mir habt getan 
ir svlt is niht geniezen	vnde sol ich min leben han 
daz chint daz ir mir slvget	vnd vil der mage min 
vrid vnde svne	sol iv vil gar versaget sin 
Des antwrte Gventher	des twanch vns groziv not 
allez min gesinde	lach vor dinen helden tot 
an der herberge	wi het ich daz versolt 
ich chom zv dir vf triwe	ich wande daz mir wærest holt 
Do sprach von Bvrgonden	Giselher daz chint 
ir Eceln helde	di noch hi lebende sint 
waz wizet ir mir recken	waz han ich iv getan 
wand ich vrivntliche	in diz lant geritten han 
Si sprachen diner gvete	ist al div bvrch vol 
mit iamer zv dem lande	ia gonden wir dir wol 
daz dv ni chomen wærest	von Wormez veber Rin 
daz lant habt ir verweiset	dv vnt di brvder din 
Do sprach in zornes mvte	Gventher der degen 
welt ir diz starche hazen	ce einer svne legen 
mit vns ellenden recken	deist beidenthalben gvt 
ez ist gar ane schvlde	swaz vns Ecel getvt 
Do sprach der wirt cen gesten	min vnd iwer leit 
div sint vil vngeliche	div michel arbeit 
des schaden zv den schanden	di ich hie <han> genomen 
des sol iwer deheiner	nimmer lebende hinnen chomen 
Do sprach zv dem chvenege	der starche Gernot 
so sol iv got gebieten	daz ir frvemelichen tvt 
slaht vns ellenden	vnd lat vns zv ziv gan 
hin nider an di wite	daz ist iv ere getan 
Swaz vns geschehen chvenne	daz lat chverzliche ergan 
ir habt so vil gesvnder	vnt tvrrens vns bestan 
daz si [398a] stverm mvede	lazent niht genesen 
wi lange svln wir recken	in disen arbeiten wesen 
Di Eceln recken	di hetenz nach getan 
daz si si wolden lazen	fver den palas gan 
daz gehorte Criemhilt	ez was ir harte leit 
des wart den ellenden	der vride ce gahes verseit 
Neina Hivnen recken	des ir da habt mvt 
ich rat an rehten triwen	daz ir des niht entvt 
daz ir di mortræzen	lazet fver den sal 
so mvsen iwer mage	liden den totlichen val 
Ob ir nv niemen lebte	wan div Vten chint 
min edele brvder	vnde choment si an den wint 
erchvlent in di ringe	so sit ir alle vlorn 
ezen wrden chvener degene	ni cer werld geborn 
Do sprach der ivnge Giselher	vil schoniv swester min 
des trvte ich vil vebele	daz dv mich veber Rin 
ladetes her ce lande	in dise groze not 
wi han ich an den Hivnen	hi verdienet den tot 
Ich was dir ie getriwe	ni getet ich dir leit 
vf solhen gedingen	ich her ce lande reit 
daz dv mir holt wærest	vil liebiv swester min 
bedenche an vns genade	ez mach niht anders nv gesin 
Ine mach iv niht genaden	vngenade ich han 
mir hat von Tronege Hagene	so groziv leit getan 
ez ist vil vnvesvenet	di wil ich han den lip 
ir mvezetes alle engelten	sprach daz Eceln wip 
Welt <ir> mir Hagenen einen	her ce gisel geben 
sone wil ich nith versprechen	ich <welli> ivch lazen leben 
wande ir sit mine brvder	vnde einer mvter chint 
so red ichez nach der svone	mit disen helden di hie sint 
Nvne welle got von himele	sprach do Gernot 
ob vnser tvsent wæren	wir lægen alle tot 
der sippen diner mage	ê wir dir einen man 
gæben [398b] hi ce gisel	ez wirdet nimmer getan 
Wir mvesen doch ersterben	sprach do Giselher 
vns scheidet niemen	von ritterlicher wer 
swer gerne mit vns vehte	wir sin et aber hie 
wande ich deheinen minen frivnt	an den triwen ni verlie 
Do sprach der chvne Danchwart	im zæme niht ce dagene 
iane stet niht eine	min brvoder Hagene 
di hi den vride versprechent	ez mach in werden leit 
des bringe ich ivch wol innen	daz si iv wærliche geseit 
Do sprach div chvneginne	ir helde vil gemeit 
nv get der stiege naher	vnde rechet miniv leit 
daz wil ich immer dienen	als ich von rehte sol 
der Hagenen vebermvete	der gelon ich im wol 
Lat einen vz dem hvse	niht chomen veber al 
si hiez viern enden	zvenden an den sal 
so werdent wol errochen	elliv miniv leit 
di Eceln degene	wrden schiere bereit 
Di nahe hi vze stvnden	di tribens in den sal 
mit slegen vnde mit shvezen	des wart vil groz der schal 
doh wolden nie gescheiden	di fversten vnd ir man 
sine chonden vor ir triwen	ein ander niht verlan 
Den sal den hiez do zvenden	daz Eceln wip 
do quelte man den recken	mit fiwer da den lip 
daz hvs von einem winde	vil balde allez bran 
ich wæne daz <volch> einheinez	grozzer angest nie gewan 
Genvge rvfften drinne	owe dirre not 
wir mohten michel gerner	sin in stvrme tot 
ez mohte got erbarmen	wi sin wir alle vlorn 
nv richet vngevvege	an vns div kveneginne ir zorn 
Ir einer sprach dar inne	wir mvezen ligen tot 
waz hilffet vns daz grvezzen	daz vns der kvenech enbot 
mir tvt von starcher hice	der dvrst so rehte we 
des wæn min leben shier	in disen sorgen cerge [399a] 
Do sprach von Tronege Hagene	ir edel ritter gvt 
swen twinge dvrstes not	der trinche hie daz plvt 
daz ist in solher hice	bezer danne win 
ezen mach an disen ziten	et nv niht bezer gesin 
Do gie der recken einer	da er einen toten vant 
er kniete im zv den wnden	den helm er ab gebant 
do begond er trinchen	daz vliezende plvt 
swi vngevon ers wære	ez dvhte in grozliche gvt 
Nv lon iv got her Hagene	sprach der mvede man 
daz ich von iwer lere	so wol getrvnchen han 
mir ist noch vil selten	geshenchet bezer win 
lebe ich deheine wile	ich sol iv immer wæge sin 
Do di ander daz gehorten	daz ez in dvhte gvt 
do wart ir michel mere	di trvnchen ovch daz plvt 
da von gewan vil crhepfte	ir etesliches lip 
des engalt an lieben frivnden	sit vil manech wætlich wip 
Daz fiwer viel genote	vf si in den sal 
do leiten siz mit schilden	von in hince tal 
der rovch vnd ovch div hice	in taten beidiv we 
ich wæne den iamer immer	mer an helden erge 
Do sprach von Tronege Hagene	stet zv des sals want 
lat niht di brende vallen	vf iwer halmbant 
tret si mit den fvzen	nider in daz plvt 
ez ist ein vebel hohzit	di vns div chvneginne git 
In svs getanen leiden	der naht in doch ceran 
noch stvnt vor dem hvse	der chvene spileman 
vnde Hagen sin geselle	geleinet veber rant 
si warten shaden mere	von den vz Eceln lant 
Do sprach der videlære	nv ge wir in den sal 
so wænent des di Hivnen	daz wir sin veber al 
tot von dirre quale	div an vns ist getan 
si sehent vns <noh> begene	in strite ir etelichen stan 
Do sprach von Bvrgonden	Giselher [399b] daz chint 
ich wæn ez tagen welle	sich hebt ein chvler wint 
nv laz vns got von himele	ein lieber zit geleben 
vns hat min swester Criemhilt	ein arge hohzit gegeben 
Do sprach aber einer	ich chivse nv den tach 
sit daz ez vns nv bezer	wesen niht en mach 
so wafent ir ivch helde	gedenchet an den lip 
ia chvemt vns aber schiere	des chvenech Eceln wip 
Der wirt der wolde wænen	di geste waren tot 
von ir arbeite	vnd von des fiwers not 
do lebt ir noch dar inne	sehs hvndert chvener man 
daz nie chvenech deheiner	bezer degene gewan 
Der ellenden hvte	het man wol ersehen 
daz noch di geste lebten	swi vil in was geschehen 
ce shaden vnt ce leide	den herren vnde ir man 
man sach si in dem gademe	noch vil wol gesvnde stan 
Man sagete Criemhilde	ir wære vil genesen 
do sprach div chveneginne	daz chvnde nimmer wesen 
daz ir deheiner lebte	von des fiwers not 
ich wil des baz getrwen	daz si alle ligen tot 
Noch genæsen gerne	di fversten vnd ir man 
ob noch iemen wolde	genade an in began 
dine chvnden si niht vinden	an den von Hivnen lant 
da râchen si ir sterben	mit vil werlicher hant 
Des tages wider morgen	grvezen man in bot 
mit hertem vrlivge	des chomen helde in not 
do wart zv zin geshozen	vil manech herter ger 
sich werten ritterlichen	di recken chvene vnde her 
Dem Eceln gesinde	erwegt was der mvt 
daz si wolden	daz Criemhilde gvt 
dar zv si wolden leisten	daz in der chvenech gebot 
des mvse maneger schiere	von in chiesen den tot 
Von geheize vnde von gabe	man mohte wnder sagen 
si hiez golt [400a] daz rote	dar in mit schilden tragen 
si gab ez swer sin rvchte	vnd ez wolde enpfan 
iane wart nie grozer solden	mer vf viende getan 
Ein michel chrapft der recken	dar zv gewaffent gie 
do sprach der chvene Volker	wir sint et aber hie 
ine gesach <nie> vf vehten	helde gerner chomen 
di daz golt des chveneges	vns ce vare hant genomen 
<Do> riefen da genvge	naher helde baz 
daz wir da svln verdienen	vnde <tvn> bezite daz 
hie belibet niemen	want der doh sterben sol 
do sach man schier ir schilde	stechen gere schveze vol 
Waz mach ich sagen mere	wol zwelf hvndert man 
di versv^chtenz vil sere	wider vnde dan 
do chvlten mit den wnden	di geste wol ir mvt 
ez mohte niemen gescheiden	des sach man vlizen daz plvt 
von verchtiefen wnden	der wart da vil geslagen 
ieslichen nach sinen vrivnden	horte man sere chlagen 
di biderben stvrben alle	dem richen chvnege her 
des heten holde mage	nach in grozlichiv ser 