<Do> hort man allenthalben	iamer also groz 
daz palas vnd tvrne	von dem wffe erdoz 
do hort ovch von Berne	ein Dieteriches man 
dvrch disiv starchen mære	wi balde er gahen began 
Do sprach er zv dem fversten	hoert min her Dieterich 
swaz ich noh her gelebt han	so rehte vnmvegelich 
gehort ich chlage ni mere	als ich nv han vernomen 
ich wæn der chvenech Ecel	ist sebe zv dem schaden chomen 
Wi moehtens anders alle	haben solhen mvt 
der chvenech oder Criemhilt	ir einez daz ist tot 
von den chvenen gesten	dvrh ir nit gelegen 
ez weinet vngefvge	vil manech zierlicher degen 
Do sprach der helt von Berne	mine vil lieben man 
nv gahet niht ce sere	swaz hi hant getan [406b] 
di ellenden recken	des gat in michel not 
vnde lat des geniezen	daz ich in minen fride enbot 
Do sprach <der> chvene Wolfhart	ich wil dar gan 
vnde wil vragen der mære	waz si hant getan 
vnd wilz iv sagen danne	vil lieber herre min 
als ich ez dort ervinde	waz div chlage mvge sin 
Do sprach der herre Dieterich	swa man zorns sich versiht 
ob vngefvgiv vrage	danne da gesrhiht 
daz betrvebet lihte	den gvten recken ir vil hohen mvt 
iane wil ich niht den Wolfhart	daz ir di vrage gein in tvt 
Do bat er Helpfrichen	vil balde dar gan 
vnd hiez in daz ervinden	an Eceln man 
oder an den gesten selben	waz wære da geshehen 
done het man von livten	so grozen iamer ni gesehen 
Der bote begonde vragen	waz ist hi getan 
do sprach einer drvnder	da ist vil gar cergan 
swaz wir vrevden heten	in der Hivnen lant 
hi lit erslagen Rvedeger	von der Bvrgonden hant 
Di mit im dar in chomen	der ist einer niht genesen 
done chonde Helpfriche	nimmer leider wesen 
iane gesaget er mære	so rehte vngerne nie 
der bote zv Dieteriche	vil sere weinende gie 
Waz habt ir vns erfvnden	sprach do Dieterich 
wi weinet ir so sere	degen Helpfrich 
do sprach der edele recke	ich mag wol balde chlagen 
den gvten Rvedgeren	hant di Bvrgonde erslagen 
Do sprach der helt von Berne	daz en sol niht wellen got 
daz wære ein starchiv rache	vnde ovch des tivels spot 
wa mit het Rvedger	an in daz versolt 
ia ist mir daz wol chvende	er ist den ellenden holt 
des antwrte Wolfhart	vnde [407a] heten siz getan 
so solt ez in allen	an ir lebn gan 
ob wirz in vertrvegen	des wære wir geschant 
ia hat vns vil gedienet	des gvten Rvedgeres hant 
Der vogt der Amelvnge	hiez ez ervinden baz 
vil harte snellechlice	er in <ein> venster saz 
do bat er Hildebranden	zv den gesten gan 
daz er an in erfvende	waz da wære getan 
Der stvrmchvene reche	meister Hildbrant 
weder schilt noch waffen	trvg er an der hant 
er wolde in sinen zvehten	zv den gesten gan 
von swester chinde	wart im ein straffen getan 
Do sprach der grimme Wolfhart	welt ir dar blozer gan 
so mag er an ein schelten	nimmer wol gesten 
so mvezet ir lasterlichen	tvn di widervart 
chvmt ir dar gewaffent	daz etelicher wol bewart 
Do garte sich der wise	dvrch des tvmben rat 
ê daz ers innen wrde	do warn in ir wat 
alle Dieteriches recken	vnt trvgen swert en hant 
dem helde was leide	vil gerne het erz erwant 
Er vragte war si wolden	wir wellen mit iv dar 
waz ob von Tronege Hagene	deste wirs gevar 
gein iv mit spotte sprechen	des er wol chan pflegen 
do er daz gehorte	da von gestattes in der degen 
Do sach der chvene Wolker	wol gewaffent gan 
di recken von Berne	di Dieteriches man 
begvertet mit den swerten	si trvgen schilt enhant 
er sagetez sinem herren	vzer Bvrgonden lant 
Do sprach der videlære	ich sihe dort her gan 
so rehte vientliche	di Dieteriches man 
gewaffent vnder helme	si wellent vns bestan 
ich wæn ez an daz vebele	welle vns ellenden gan 
In den selben ziten	chom ovch [407b] Hildebrant 
do satzet er fver di fveze	sines schildes rant 
er begonde vragen	di Gvntheres man 
owe ir gvten helde	waz het iv Rvedger getan 
Mich hat min herre Dieterich	her zv ziv gesant 
ob erslagen hete	iwer deheines hant 
den edeln margraven	als vns daz ist geseit 
wirn chvnden veberwinden	niht div grozlichen leit 
Do sprach von Tronege Hagene	daz mære ist vngelogen 
wi wol ich iv des gvnde	het iv der bote betrogen 
dvrch Rvedegeres liebe	daz noch lebte sin lip 
den immer mvgen weinen	beide man vnd ovch div wip 
Do si daz rehte erhorten	daz er wære tot 
do chlageten in di recken	ir triwe in daz gebot 
den Dieteriches recken	sach man træhne gan 
veber berte vnde vber chinne	in was vil leide getan 
Der herzoge von Berne	ce Sigestap do sprach 
nv hat gar ein ende	genomen der gemach 
den vns ie gefvgete Rvdeger	nach vnser leide tagen 
vroevde ellender diete	lit an Rvedger erslagen 
Do sprach von Amelvngen	der degen Wolfin 
vnd ob ich hivte sæhe	tot den vater min 
mir enwrde nimmer leider	danne vmbe sinen lip 
owe wer sol nv troesten	des edeln margraven wip 
Do sprach in zornes mvote	der degen Wolfhart 
wer wiset nv di recken	so manege herewart 
also der margrave	vil diche hat getan 
owe vil edel Rvedeger	daz wir dich svs verlorn han 
Wolfprant vnd Hepfrich	vnd ovch Helmnot 
mit allen ir vrivnden	chlagten sinen tot 
vor svften mohte vragen	niht mere Hildebrant 
er sprach nv tvt ir degene	dar nach min herre hat gesant [408a] 
Gebt vns Rvedgern	also toten vz dem sal 
an dem gar mit iamer	lit vnser vrevden val 
lat vns an im dienen	daz er ie hat began 
an vns vil groze triwe	vns an manegem andern man 
Wir sind ovch ellende	als Rvedger der degen 
wes lazet ir uns pitet	lat in vns after wægen 
tragen daz wir nach tode	lonen noch dem man 
wir hetenz pilliche	bi sime lebene getan 
Do sprach der kvenech Gventher	ni dienest wart so gvt 
so den ein vrivnt vrivnde	nach dem tode tvt 
daz heiz ich stæte triwe	der di chan began 
ir lonet im nach schvlden	er hat iv liebes vil getan 
Wi lange svln wir vlegen	sprach Wolfhart <der> degen 
sit vnser trost der beste	von iv ist tot gelegen 
vnd wir sin leider mere	mvegen niht gehaben 
laten vns hinnen tragen	daz wir den recken begraben 
Des antwrte Volker	niemen in iv git 
nemten in dem hvse	da der degen lit 
mit starch verchwnden	gevallen in daz plvt 
so ist ez ein voller dienest	den ir Rvedgeren tvt 
Do sprach der chvene Wolfhart	got weiz her spilman 
iren dverffet vns niht reizen	ir habt vns leit getan 
getorst ich vor minem herren	so choemet irs in not 
des mvezen wirz lazen	wand er vns striten hi verbot 
Do sprach der videlære	der vorhte ist gar ce vil 
swaz man im verbivtet	derz allez wil 
daz chan ich niht geheizen	rehten heldes mvt 
div rede duhte Hagenen	uon sinem hergesellen gvt 
<· Desen> lat iuch niht <belangen>	sprach aber Wolfhart 
ich entrihte iv so di seiten	swenne ir di wideruart 
ritet gein dem Rine	daz irz uuol muget sagen 
iuuer vebermueten	mag ich mit eren niht vertragen 
Do sprach der uidelære	swenne ir [408b] di seiten min 
verirret guter doene	der iuuer helme schin 
der muz uil truebe uuerden	von der minen hant 
suui halt ich gerite	in der Buergonden lant 
Do uuold er zv zim springen	wande daz in niht enlie 
Hildebrant sin oeheim	in uaste zim gevie 
ich wæne du woldest toben	durch den tumben zorn 
mines herren hulde	hetes du immer mer verlorn 
Lat abe den lewen meister	er ist so grimmer gemut 
chumt aber er mir cen handen	sprach Volker der degen gut 
het er di uuerlt alle	mit siner hant erslagen 
ich slahe in daz erz uuiderspel	nimmer mer darf gesagen 
Des wart uil harte erzvernet	der Bernære mut 
den schilt gezvchte Wolfhart	ein sneller degen gut 
alsam ein lev wilder	lief er uor in dan 
im wart ein gahez volgen	uon sinen vriunden getan 
Swi witer sprunge er pflæge	fver des sales want 
doch ergahte in vor der stiege	der alte Hildebrant 
eren wolde in uor im lazen	niht chomen in den strit 
si funden daz si suchten	an den ellenden sit 
Do gespranch zv Hagenen	meister Hildebrant 
diu swert man horte erchlingen	an ir beider hant 
si waren ser erzvernet	daz mohte man chiesen sint 
von ir zweier swerten	gie fiwer roter wint 
Di wrden do gescheiden	in des sturmes not 
daz taten di uon Berne	als in ir chrapft gebot 
zehant do wande Hildebrant	uon Hagenen wider dan 
do lief der starche Wolfhart	den chvenen Volkeren an 
Er sluch den uidelære	vf den helm gut 
daz des swertes ecke	vnz an di spangen wt 
daz vergalt mit ellen	der chuene spilman 
so slug er Wolfharten	daz er stieben <began> 
Des fiwers vz den ringen	hiwen si genuch 
haz ir iegelicher	dem andern da truch 
di shiet do von [409a] Berne	der degen Wolfin 
ob ez ein helt niht wære	desen chunde niht gesin 
Guenther der recke	mit uil willeger hant 
enpfie di helde mære	von Amelunge lant 
Giselher der herre	diu liehten helmvaz 
der frumt er da uil manigez	uon plvote unde naz 
Danchwart Hagen bruder	was ein grimmech man 
swaz er da uor hete	in strite ie getan 
den Eceln recken	daz was gar ein wint 
nu uaht uil tobeliche	des chuenen Aldrianes chint 
Ritschart unde Gerbart	Helpfrich unde Wichart 
di heten in manegn sturmen	uil selten sich gespart 
des brahten si wol innen	di Guentheres man 
do sach man Wolfranden	in strite herliche gan 
Do uaht alsma er wote	der alte Hildebrant 
uil der guten recken	uor Wolfhartes hant 
mit tode musen uallen	uon swerten in daz pluot 
sus rachen Ruedgeren	di recken chuene unde gut 
Do uaht der herre Sigestap	als im sin ellen riet 
hey waz er in dem strite	guter helme uerschriet 
den sinen uianden	Dieteriches swester sun 
eren chunde in dem sturme	nimmer bezzers niht getun 
Uolker der starche	do er daz ersach 
daz Sigestap der chuene	den bluotegen bach 
hiu uzzer herten ringen	daz was dem helde zorn 
er spranch im hin engegene	do het Sigestap uerlorn 
von dem uidelære	uil schiere da daz sin leben 
er begonde im siner chvenste	alsolhen teil da geben 
daz er uon sinem swerte	muose liegen tot 
daz rach der alte Hildebrant	als im sin ellen daz gebot 
Owe liebes herren	sprach meister Hildebrant 
der hi lit erstorben	uon Volkeres hant 
nu sol der uidelære	langer niht genesen 
Hildebrant der chuene	wi chund er grimmer gewesen 
Do sluch er Volkeren	daz im div [409b] helmbant 
stuben allenthalben	zu des sals want 
uon helm vnd ouch uon schilde	dem chuenen spileman 
da uon der starche Volker	do den ende da gewan 
Do drungen zu dem strite	di Dieteriches man 
si slugen daz di ringe	uil uerre dræten dan 
unt daz man ort der swerte	uil hohe uliegen sach 
si holten uz den helmen	den hieze uliezenden bach 
Do sach uon Tronege Hagene	Volkeren tot 
daz was cer hohgezite	sin aller meistiv not 
di er da hete gewnnen	an magen und ouch an man 
owe wi harte Hagene	den helt do rechen began 
Nune sol es niht geniezen	der alte Hildebrant 
min helfe lit erslagen	uon des heldes hant 
der beste hergeselle	den ich ie gewan 
den schilt er ruchte hoher	do gi er howende dan 
Helpfrich der chuene	Danchwarten sluch 
Guenthere unde Giselhere	den was ez leit genuch 
do si in uallen sahen	in der starchen not 
er hete mit sinen handen	uil wol uergolten sinen tot 
Di wile gie do Wolfhart	beide wider unde dan 
allez howende	di Guentheres man 
er was di driten chere	chomen durch den sal 
da uiel uon sinen handen	uil manech recke ce tal 
Do rief der herre Giselher	Wolfharten an 
owe daz ich so grimmen	uient ie gewan 
edel ritter chuene	nu wendet gegen in 
ich wilz helfen enden	ezen mag niht lenger gesin 
Zv Giselhere cherte	<Wolfhart> in den strit 
do sluch ietwederr	uil manege wnden wit 
so rehte krepftechlichen	er zv dem kvenege dranch 
daz imez pluot under fuezen	al ueber daz houbet spranch 
Mit swinden slegen grimme	der schonen Vten chint 
enpfie er Wolfharten	den chvenen helt sint 
swi starch der degen wære [410a]	 ern chunde niht genesen 
ezen dorfte kvenech so iunger	nimmer chuener gewesen 
Do sluch er Wolfharten	durch eine brvenne gvt 
daz im uon der wnden	nider uloz daz pluot 
er wnte zu dem tode	den Dieteriches man 
ezen het an einen recken	zware niemen getan 
Also der chuene Wolfhart	der wnden do enpfant 
den schilt den liez er uallen	hoher an der hant 
hub er ein starchez waffen	daz was starch genuch 
durch helm unt durch ringe	der helt do Giselheren sluch 
Si heten beide ein ander	den grimmen tot getan 
done lebte ouch niht mere	der Dieteriches man 
Hildebrant der alte	Wolfharten uallen sach 
im wæne vor sinem tode	so rehte leide ni geschach 
Do waren gar erstorben	di Guentheres man 
vnd ouch di Dieteriches	Hildebrant was gegan 
da Wolfhart was gevallen	nider in daz plut 
er besloz mit armen	den recken chvene vnde gut 
Er wolden uzem huse	mit im tragen dan 
er was ein teil ce swære	er muse in ligen lan 
do blichte ouch <vz> dem bluote	der rewende man 
er sach wol daz im gerne	sin neve het geholffen dan 
Do sprach der totwnde	vil lieber oheim min 
ir muegt an disen ziten	mir niht frvm gesin 
nv hvetet iuch vor Hagenen	ia dunchet ez mich gut 
er treit in sinem hercen	einen grimmigen mvt 
Vnde ob mich mine mage	nach tode wellen chlagen 
den næhestn vnt den besten	den sult ir von mir sagen 
daz si nach mir niht weinen	daz ist ane not 
uor eines kveneges handen	lige ich hi herlichen tot 
Ich han ouch so vergolten	hirinne minen lip 
daz ez wol mvgen beweinen	der guten ritter wip 
ob iuch des iemen vrage	so muegt ir balde sagen 
vor min eines [410b] handen	ligent wol hundert erslagen 
Do gedaht ovch Hagen	an den spileman 
dem der chvne Hildebrant	sin leben an gewan 
do sprach er zv dem degene	ir geltet miniv leit 
ir habt vns hinne enbunden	vil maneges recken gemeit 
Er sluch vf Hildebranden	daz man wol vernam 
Balmvngen diezen	den Sifride nam 
Hagen der chvene	da er den helt ersluch 
do werte sich der alte	ia was er chvene genuch 
Der recke Dieteriches	sluch ein waffen breit 
vf den helt von Tronege	daz ovch vil sere sneit 
done chunder niht verwnden	den Guentheres man 
do sluoch aber in Hagene	durch eine brvenne wol getan 
Do der alte Hildebrant	der wnden enpfant 
do uorhte er schaden mere	von der Hagenen hant 
den schilt warf veber ruke	der Dieteriches man 
mit der starchen wnden	der helt do Hagenen entran 
Da was niemen lebende	aller der degene 
niwan di einen zwene	Guenther vnd Hagene 
mit bluote gie bervnnen	der alte Hildebrant 
er brahte leidiv mære	da er Dieterichen vant 
Do sah er trvrechliche	sitzen hi den man 
der leide michel mere	der fverste do gewan 
er sah ouch Hildebranden	in siner brvenne rot 
do vragete er der mære	als im div sorge gebot 
Nv sagt mir meister Hildebrant	wi sit ir so naz 
von dem verchpluote	oder wer tet iv daz 
ich wæne ir mit den gesten	zem huse habt gestriten 
ich verbot ez iv so sere	ir hetez pilliche vermiten 
Do sagt er sinem herren	ez tet Hagene 
der slug mir dise wnden	in dem gademe 
do ich von dem recken	wolde wenden dan 
mit dem minem lebene	ich dem tivfel vil chvme entran [411a] 
Do sprach der Bernære	vil rehte ist iv geschehen 
do ir mich frivntschepfte	den recken hortet gehen 
daz ir den vride brachet	den ich in hete gegeben 
het iches niht immer shande	ir soldet vliesen daz leben 
Nv zvernet niht so sere	min her Dieterich 
an mir vnd minen frivnden	der schade ist al ce rich 
wir wolden Rvedgeren	getragen haben dan 
desen wolden vns niht gunnen	des chvnech Gventheres man 
So we mir dirre leide	ist Ruedeger doch tot 
daz mvz mir sin ein iamer	vor aller miner not 
Goetelint div edele	ist miner pasen chint 
âch we der armen weisen	di da ce Bechlaren sint 
Triwen vnde leides	mant mich sin tot 
er begonde starche weinen	des gie dem helde not 
owe getriwer helfe	di ich verlon han 
iane veberwinde ich nimmer	des chvenech Eceln man 
Mveget ir mir meister Hildebrant	div mære rehte sagen 
wer der recke wære	der in da habe erslagen 
er sprach daz tet mit chrepften	 der starche Gernot 
vor Ruedgeres henden	 ist ouch der helt gelegen tot 
Er sprach ce Hildebrande	nv sagt minen man 
daz si sich palde waffen	wand ich wil dar gan 
vnde heizet mir gewinnen	min liehtez wichgewant 
ich wil selbe vragen	di helde vzer Burgonden lant 
Do sprach meister Hildebrant	wer sol zv ziv gen 
swaz ir habt der lebenden	di seht ir hi bi iv sten 
daz pin ich alterseine	di andern di sint tot 
do erschract er dirre mære	des gie im wærliche not 
Wand er leit so grozez	cer werld nie gewan 
er sprach vnde sint erstorben	alle mine man 
so hat min got vergezzen	ich armer Dieterich 
ich was ein chvnech here	vil gewaltech vnd rich 
Wi chvnde ez sich gefvegen	sprah her Dieterich 
daz si alle sint [411b] erstorben	di helde lobelich 
von den stritmueden	di doch heten not 
wande durch min vngeluecke	in wære vremde noch der tot 
Sit daz ez min vnschulde	niht langer wolde entwesen 
so sagt mir ist den geste	noch iemen genesen 
do sprach meister Hildebrant	daz weiz got niemen mer 
niwan Hagen aleine	vnde Guenther der kvenech her 
Owe lieber Wolfhart	sol ich dich han verlorn 
so mag mich balde riwen	daz ich ie wart geborn 
Sygestap vnd Wolfwin	vnd ouch Wolfprant 
wer sol mir danne helffen	in der Amelunge lant 
Helpfrich der vil chvene	vnd ist mir der erslagen 
Gerbart vnd Wichart	wi solde ich di uerchlagen 
daz ist an minen vrevden	mir der leste tach 
owe daz vor leide	niemen sterbene mach 