Do> svocht der herre Dieterich	selbe sin gewant 
im half daz er sich waffente	meister Hildebrant 
do chlagete also sere	der chrepftige man 
daz daz hus erdiezen	von sinen chrepften began 
Do gewan er wider	rehten heldes mvt 
in grimme wart gewafent	do der helt gvt 
einen schilt vil vesten	nam er an di hant 
si giengen dannen balde	er vnde meister Hildebrant 
Do sprach von Tronege Hagene	ich sihe dort her gan 
hern Dieterichen	der wil vns bestan 
nach sinem starchem leide	daz im ist hi geschehen 
man sol daz hivte chiesen	wem man des besten mvge iehen 
Ian endunchet sich von Berne	der herre Dieterich 
nie so starch des libes	vnd ovch so griwelich 
vnd wil erz an vns rêchen	daz im ist getan 
also redete Hagene	ich tar in rehte wol bestan 
Dise rede horte Dieterich	vnd ovh Hildebrant 
er chom da er di recken	beide stende vant 
vzen vor dem huse	geleinet an den sal [412a] 
sinen schilt den guten	den satzet Dieterich ce tal 
In leidechlichen sorgen	sprach do Dieterich 
wi habt ir so geworben	Guenther chuenech rich 
wider mich ellenden	waz het ich iv getan 
alles mines trostes	des pin ich hie eine bestan 
Ivch enduhte niht der volle	an der grozen not 
do ir vns Ruedegeren	den helt sluget tot 
nv habet ir mir erbunnen	aller miner man 
iane het ich iv helden	soelher leide niht getan 
Gedenchet an ivch selben	vnde an iwer leit 
tot der iwern vrivnde	vnd ovch div arbeit 
ob ez iv guten recken	beswæret iht den mut 
owe wi rehte vnsanpfte	mir tot der Rvedgeres tvt 
Ez geschach ce dirre werlde	nie leider manne mer 
ir gedahtet vebele	an min vnd an iwer ser 
swaz ich frivnde hete	di sint von iv erslagen 
iane chan ich nimmer mere	di minen mage verchlagen 
Iane sin wir niht so schvldich	sprach do Hagene 
ez giengen zv disem hvse	iwer degene 
gewafent wol ce vlize	mit einer schar so breit 
mich dunchet daz div mære	iv niht rehte sin geseit 
Waz sol ich gelovben mære	mir seitz Hildebrant 
do mine recken gerten	von Amelvnge lant 
daz ir in Rvedgeren	gæbet vz dem sal 
do but ir niwan spotten	den chvenen helden her ce tal 
Do sprach der kvenech von Rine	si iahen wolden tragen 
Rvedgeren hinnen	den hiez ich in versagen 
Eceln ce leide	vnd niht den dinen man 
vnz daz do Wolfhart	dar vmbe shelten began 
Do sprach der helt von Berne	ez mvst et also sin 
Gventher chvenech edele	dvrch di zvht din 
ergetzze mich der leide	di mir von dir sint geschehen 
vnd svene iz ritter chvene	daz ich des chvenne dir geiehen 
Ergip dich mir ce gisel	dv vnd ovch din man 
so wil ich behveten	so ih aller beste chan 
daz dir cen Hivnen [412b]	 niemen niht en tvt 
Daz enwelle got von himele	sprah do Hagene 
daz sich dir ergæben	zwene degene 
di noch werliche	gewaffent gegen dir stant 
vnd noch so ledechliche	vor ir vianden gant 
Iren svlt iz niht versprechen	so redete Dieterich 
Gventher vnde Hagene	ir habt beide mich 
so ser beswæret	daz herce vnd ovch den mvt 
welt ir mich ergezzen	daz irz vil pilliche tvt 
Ich gibe iv mine triwe	vnd sicherliche hant 
daz ich mir iv rite	heim in iwer lant 
ich leit ivch nach den eren	oder ich gelige tot 
vnd wil durch ivch vergezzen	der minen groezlichen not 
Nvne muotet sin niht mere	sprach aber Hagene 
von vns zimt daz mære	niht wol ce sagene 
daz sich iv ergæben	zwene also chvene man 
nv siht man bi iv niemen	wan eine Hildebranden stan 
Do sprach meister Hildebrant	got weiz her Hagene 
der iv den vride bivtet	mit iv ce tragene 
ez chumt noch an di stunde	daz ir moehtet nemen 
di svne mines herren	moht ir iv lazen gezemen 
Ia næme ich di svne	sprach aber Hagene 
ê ich so lasterliche	vze einem gademe 
fluehe meister Hildebrant	als ir hie habt getan 
ich wæne daz ir chundet	baz gein vianden stan 
Des antwrte Hildebrant	zwiv verwizet ir mir daz 
nv wer was der vf einem schilde	vor dem Waskensteine saz 
do im von Spanye Walther	so uil der frivnde slvch 
ovch habt ir noch ce zeigen	an iv selben genuch 
Do sprach der herre Dieterich	ez enzimt niht helde lip 
daz si svln shelten	sam div alten wip 
ich verbivt iv Hildebrant	daz ir niht sprechet mer 
mich ellenden recken	twingent grozlichiv ser 
Lat horen sprach Dieterich	recke Hagene 
waz ir beide <spræchet> [413a]	 snellen degene 
do ir mich gewafent	zv ziv sahet gan 
ir iahet daz ir eine	mit strite woldet mich bestan 
Iane lovgent iv des niemen	sprach Hagen <der> degen 
ine wellez hie versvchen	mit den starchen slegen 
ezen si daz mir cebreste	daz Nibelunges swert 
mir ist zorn daz vnser beider	ist ce gisel hie gegert 
Do Dieterich gehorte	den grimmen Hagenen mvt 
den schilt vil balde zvchte	der snelle degn gvt 
wi balde gein im Hagene	von der stiege spranch 
Nivlvnges swert daz gvte	vil lvt vf Dieteriche erchlanch 
Do wesse wol her Dieterich	daz der chvene man 
vil grimmes mvtes wære	schermen im began 
der herre von Berne	vor <angeslichen> slegen 
wol erchand er Hagenen	den vil zierlichen degen 
Ovch vorht er Balmungen	ein wafen starch genvch 
vnder wilen Dietrich	mit listen wider slvch 
vnz daz er Hagenen	mit strite doch betwanch 
er slvch im eine wnden	div was tief vnde lanch 
Do daht der herre Dietrich	dv bist in noeten erwigen 
ich hans lvecel ere	soltv tot vor mir geligen 
ich wilz sus versvchen	ob ich ertwingen chan 
dich <mir> ce einem gisel	daz wart mit sorgen getan 
Den schilt den liez er vallen	sin sterche div was groz 
Hagenen von Tronege	mit armen er besloz 
des wart do betwngen	von im der chvene man 
Gventher der edele	dar vmbe trvoren began 
Hagenen bant Dieterich	vnd fvrt in da er vant 
di edeln kveneginne	vnd gab ir bi der hant 
den chvenesten recken	der ie swert getrvch 
nach ir vil starchem leide	do wart si vroelich genvch 
Vor liebe neich dem degene	daz Eceln wip 
immer si dir sælich	din herce vnd ovch der [413b] lip 
dv hast mich wol ergezzet	aller miner not 
daz sol ich immer dienen	mich ensv^me danne der tot 
Do sprach der herre Dietrich	ir svlt in lan genesen 
edliv chveneginne	vnd mach daz noch gewesen 
wi wol er ivch ergezzet	daz er iv hat getan 
ern sol des niht engelten	daz ir in seht gebvnden stan 
Do hiez si Hagenen fveren	an sin vngemach 
da er lach beslozen	vnt da <niemen> sach 
Gventher der kvenech edele	rveffen do began 
war chom der helt von Berne	der hat mir leide getan 
Do gie im hin engegene	der herre Dietrich 
daz Gventheres ellen	daz was vil loblich 
done beit ovch er niht mere	er lief her fver den sal 
von ir beider swerten	huop sich ein groezlicher shal 
Swi vil der herre Dietrich	lange was gelobt 
Gventher was so sere	erzvernet vnd ertobt 
wand er nach starchem leide	sin hercevient was 
man sagt ez noch ce wnder	daz do her Dieterich genas 
Ir ellen vnd ir sterche	beider waren groz 
palas vnd tvrne	von den slegen doz 
do si mit swerten hiwen	vf die helme gvt 
ez het der kvenech Gventher	einen herlichen mvt 
Sit twang in der von Berne	sam Hagenen ê geschach 
daz plvot man dvrch di ringe	dem helde vliezen sach 
von einem sharpfen swerte	daz trvch Dietrich 
do het gewert her Gventher	nach mvede lobeliche sich 
Der herre wart gebvnden	von Dietriches hant 
swi chvenege nine solden	liden solhiv bant 
er daht ob er si lieze	den kvenech vnde sinen man 
alle di si fvenden	di mvesen tot von in bestan 
Dieterich von Berne	der nam in bi der hant 
do fvrt er in gebunden	da er Criemhilde vant 
do was mit sinem leide	ir sorgen [414a] vil erwant 
si sprach <willechom> Gventher	vzer Bvrgonden lant 
Er sprach ich sol iv nigen	vil liebiv swester min 
ob iwer grvezen moehte	genædechlicher sin 
ich weiz ivch kveneginne	so zornech gemvt 
daz ir mich vnde Hagenen	vil swache grvezen getvt 
Do sprach der helt von Berne	vil edeles chveneges wip 
ezen wart gisel mere	so guter ritter lip 
als ich vrowe here	iv an in gegebn han 
nv svlt ir di ellenden	min vil wol geniezen lan 
Si iach si tæt iz gerne	do gi her Dieterich 
mit weinenden ovgen	von den helden lobelich 
sit rach sich grimmechlichen	daz Eceln wip 
den vz erwelten degenen	nam si beiden den lip 
Si lie si ligen besvnder	dvrch ir vngemach 
daz ir sit deweder	den andern ni gesach 
vnz si ir brvder hovbet	hin fver Hagenen trvch 
der Criemhilde rache	wart an in beiden genvch 
Do gie div chvneginne	da si Hagenen sach 
wi rehte fientliche	si zv dem helde sprach 
welt ir mir geben wider	daz ir mir habt genomen 
so mvget ir wol lebende	heim cen Bvrgonden chomen 
Do sprach der grimme Hagene	div rede ist gar verlorn 
vil edliv chveneginne	ia han ich des gesworn 
daz ich den hort iht zeige	di wile daz si leben 
deheiner miner herren	so sol ich in niemene geben 
Ich bringez an ein ende	so sprah daz edel wip 
do hiez si ir bruder nemen	sinen vil shonen <lip> 
slvch im ab daz hovbet	bi dem hare si ez trvch 
fver den helt von Tronege	do wart im leide genvch 
Also der vngemvote	sines herren hovbet sah 
wider Criemhilde	do der recke sprach 
dv hast iz nach dinem willen	vil gar zeinem ende braht 
vnd ist ovch iv ergangen	als ich mir het gedaht [414b] 
Nv ist von Bvrgonden	der edel kvenech tot 
Giselher der ivnge	vnde ovch her Gernot 
den shaz den weiz nv niemen	wan got ane min 
der sol dich valendinne	immer verborgen sin 
Si sprach so habt ir vebele	geltes mich gewert 
so wil ich doch behalten	daz Sifrides swert 
daz truch min holder vriedel	do ich in ivngest sach 
an dem mir herceleide	von iwern shvlden geschach 
Si zoh iz von der scheiden	daz chvnd er niht erwern 
do daht si den recken	des libes wol behern 
si hvb im vf daz hovbt	mit dem swerte siz ab slvch 
daz sach der kvenech Ecel	do was im leide genvch 
Waffen sprach der fverste	wi ist nv tot gelegen 
von eines wibes handen	der aller beste degen 
der ie chom ce stvrme	oder ie schilt getrvch 
swi vient ich im wære	ez ist mir leide genvch 
Do sprach der alte Hildebrant	ia genivzet si des niht 
daz si in slahen torste	swaz mir da von <geschit> 
swi er mich selbe bræhte	in angestliche not 
idoh so wil ich recken	des chvenen Tronegæres tot 
Hildebrant mit zorne	zv Criemhilde spranch 
er slvch der chveneginne	einen swæren <swert> swanch 
ia tet ir div sorge	von Hildebrande we 
waz mohte si gehelffen	daz si groezlichen shre 
Do was gelenget aller	da der veigen lip 
ze stvcken was gehowen	do daz edele wip 
Dieterich vnd Ecel	weinen do began 
si chlagten innechliche	beide mage vnd man 
Div vil michel ere	was gelegen tot 
di livte heten alle	iamer vnde not 
mit leide was verendet	des kveneges hohgezit 
als ie div liebe leide	zaller ivngeste git 
Ine chan iv niht bescheiden	waz [415a] sider da geschach 
wan ritter vnd vrowen	weinen man da sach 
dar zv di edeln knehte	ir lieben frivnde tot 
da hat daz mære ein ende	diz ist der Nibelvnge <not> 