Gvnther> vn– Hagene	die rechen vil balt
lobten mit vntriwen	ein pirsen in den walt
mit ir scharpfen geren	si wolden iagn swin
pern vn– wisende	waz mohte kuners gesin
Da mite reit ovch Sivrit	in vrolichem site
herrenliche spise	die fvrte man in mite
zeinem kalten brunnen	namens im den lip
daz het geraten Prunh'	des kunic Guntheres wip
Do gie der degene chvne	da er Chriemh' vant
ez was nv vf gesvomet	sin edel pirsgewant
vn– ander der gesellen	si wolden vber Rin
done dorfte Chriemh'	leider nimmer gesin
Die sinen trvtinne	die chuster an den mvnt
got laze mich dich	frowe	gesehn noch gesvnt
vn– mich div dinen ovgen	mit holden magen din
soltv kurcewilen	ine mac hie heime niht gesin
Do gedahtes an div mære	sine torst ir niht gesagen
da von si Hagen <e> vragte	do begunde klagen
div edele kuniginne	daz si ie gewan den lip
do weinte ane maze	des kunen Sivrides wip
Si sprach zv dem rechen	lat iwer iagen sin
mir trovmte hinte leide	wie ivch zwei wildiv swin
iagent vber heide	da wrden blvmen rot
daz ich so sere weine	daz tvot mir armem wibe not
Ja fvrhte ich	herre Sivrit	eteslichen rat
ob man der deheinen	missedie[35v]net hat
die vns gefvgen chunnen	<eteslichen> haz
belibet	herre Sivrit	mit triwen rate ich iv daz
Er sprach	liebiv frowe	ich chum in kurcen tagn
ine weiz hie niht der uinde	die vns iht hazzes tragen
alle dine mage	sint mir gemeine holt
ovch enhan ich an den degenen	hie niht anders verscholt
Neyna	herre Sivrit	ia vurht ich dinen val

mir trovmte hinte leide	wie ob dir zetal
vielen zwene berge	ich ensach dich nimmer me
wiltv nv mir scheiden	daz tvot mir <inneklichen> we
Er vmbevie mit armen	daz tugende riche wip
mie minneklichem chussen	trvot er ir schonen lip
mit vrlovbe er <dannen>	schiet in churcer stunt
sine gesach in leider	darnach nimmer mer gesvnt
Do riten si von dannen	in einen walt
durch kurcewile willen	vil manic degen balt
riten mit dem wirte	man fvrt ovch mit in dan
vil der edeln spise	die di helede solden han
Geladen vil der rosse	chom vor in vber Rin
die den iegeren trvgen	brot un– win
vleisc vn– uische	vn– anders manigen rat
den ein kvnic so <riche>	harte billechin hat
Si hiezen herbergen	fvr den grunen walt
da si da iagn solden
 vf einen wert vil breit
do chom der herre Sivrit	daz wart dem kunige geseit
Von dem iagtgesellen	wrden gar bestan
die warte an allen enden	do sprach der chune man
Sivrit der starche	wer sol vns durch den walt
wisen vor den bergen	ir rechen chven vn– balt
Ia mvzen wir vns scheiden	sprach do Hagene
e daz wir beginnen	hie ze iagene
da bi wir bechennen	ich un– der herre min
wer <die> besten iægere	an dirre waltreise sin
Lvot vn– ovch gehvende	wir suln teilen gar
so cher ieslicher	swar er gerne var
der danne iage daz beste	des sage man im danch
do wart ir biten	niht zen herbergen lanch
Do sprach der herre Sivrit	ich han der hvnde rat
niwan einen brachen	der so genozzen hat
daz er die verte erchenne	der tyere durch den tan
do schvf der kunic Gunther	zvo zim den er <wolde> han
Do nam er einen iæger meister	einen gvten spvrhunt
er brahte den <herren>	in einer kurcen stunt
da si vil tyere funden	swaz der von legere stvnt
die eriageten die gesellen	so noh gvte iægere tunt
Swaz ir ber brache ersprancte	die sluoc mit siner hant
Sivrit der vil chvene	der helt vz Niderlant
sin ross daz livf so sere	daz ir im niht entran
daz lop an dem geiægede	er vor in allen da gewan
Er was an allen dingen	biderbe genvoch
sin tyere <was> daz erste	daz er ze tode sluoch
ein vil starchez halpfwol	mit der sinen hant
dar nach er harte schiere	einen grimmen lewen vant
Do der wart ersprenget	den [36r]schoz er mit dem bogen
eine scharpfe stralen	het er dar in gezogen
der lewe lief nach dem schuzze	wan drier sprunge lanch
die sinen iagtgesellen	die sagten Sivride danch
Darnach slvger schiere	einen wisent vn– elch
starcher vore viere	un– einen grimmen schelch
sin ross trvg in so <balde>	daz ir im niht entran
hirz oder hinden	chund im wenic iht engan
Einen ebyr grozen	den sach der spurehvnt
als er begunde vliehen	do chom an der stvnt
des selben geiægedes meister	der bestunt in vf der sla
daz swin vil zornikliche	lief an den chunen rechen sa
Do slvg in mit dem swerte	der Chriemh' man
ez hete ein ander iægere	so sanfte niht getan
do er in het ervellet	man vie den spurehunt
do wart sin iagt daz riche	wol den Buregonden kunt
Do sprachen sine iægere	magez mit hulden wesn
so lat uns	herre Sivrit	der tyer ein teil genesn
ir tvot uns <hivte> lære	den berch un– ovch den walt
des begunde smielen	der degn chune vn– balt
Do hortens allenthalben	lvdem un– doz
von lvten vn– ovch von hunden	der schal was so groz
daz in da von antwrte	berge vn– ovch der tan
vier vn– drizzech rvore	die iægere heten verlan
Do mvse vil der tyere	verliesen da daz lebn
do wanden si <daz> fvegen	daz man in mvste geben
den pris an dem geiægede	des enchunde niht geschehn
do der starche Sivrit	wart zer	viwerstete gesehn
Daz pirsen was ergangen	vn– idoch niht gar
die zem viwer wolden	di brahten mit in dar
vil maniger hande tyere	vn– wildes genvoch
hey waz man des zer chuchen	des kuniges ingesinde trvoch
Do hiez der kunic kuonden	den iægern voz erchorn
daz er enbizen wolde	do wart vil lvot ein horn
zeiner stunt geblasen	da mit in wart erchant
daz man den fursten edele	da zen herbergen vant
Ein Sivrides iægere	sprach	ich han vernomen
von eines hornes duzze	daz wir nv suln chomen
zv den herbergen	antwrten ich des wil
do wart nach den iægeren	gevraget blasende vil
Do sprach der herre Sivrit	nv rvomen ovch wir den tan
sin ros daz truogin ebene	si ilten mit im dan
si ersprancten mit ir scalle	ein tyer vil gremilich
daz was ein ber wilde	do sprach der degn hinder sich
Welt ir uns hergesellen	kurcewile wern
den brachen sult ir lazen	ia sih ich einen bern
der sol zen herbergen	mit uns hinnen varn
swie vbel er gebare	ern chan sihs nimmer bewarn
Der brache wart verlazen	der ber spranch von dan
do <wolde> in erriten	der Chriemh' man
er chom in ein gevelle	done chundes niht wesn
daz starche tyer do wande	vor dem iægere genesn
Do spranch von sinem [36v]rosse	der stolze ritter gvot
er begunde laufen sere	daz tyere was vnbehvot
ez enchunde im niht entrinnen	do vienger ez zehant
ane aller slahte wnden	der helt ez schiere gebant
Chrazzen noch gebizen	chundez niht den man
er bandez zvo dem satele	gewalteklichen dan
braht erz an die fivrstat	durch sinen hohen mvot
zeiner kurcewile	der reche kvene vn– gvot
Wie rehte weigerliche	er zen herbergen reit
sin gere was vil michel	starch vn– breit
im hienge en–n starchez waffen	nider an den sporn
von vil rotem golde	fvrter ein herlichez horn
Von bezzerm birsgewæte	gehort ir nie gesagen
einen roch von swarzem pfellel	den sah man in tragen
un– einen hvot von zobele	der riche was genvoch
hey waz er gvter porten	an sinem chochære trvoch
Ein hvot von einem pantel	dar vber was gezogn
durch richeite vn– durch sveze	ovch fvrter einen bogn
den man ziehen mvse	mit antwerche dan
der in spannen solde	ern hete iz selbe getan
Von einer lvdemes hvte	was allez sin gewant
von hovpte vnz an daz ende	gestrvete man drvfe vant
vz der liehten rvhe	vil manic goldes zein
ze beiden sinen siten	<dem> kuonin iægermeister schein
Ovch furter Palmvngen	ein ziere wafen breit
so starch un– ovch so scherpfe	wie vreislich ez sneit
swa man ez slvoch vf helme	sin ecke warn gvot
der hereliche iægere	der was vil hohgemvot
Sit daz ich ivch der mære	gar bescheiden sol
im was sin gvot chocher	vil gvoter stralen vol
mit guldinnen tullen	div sahs wol spannen breit
ez mvse bald ersterbn	swaz er mit schiezen versneit
Do reit der ritter edele	vil weidenlichen dan
in sahen zvo zin chumende	die Guntheres man
si liefen im engegene	vn– enpfiengen im daz march
do fvrter bi dem satele	einen bern groz vn– starch
Als er gestvnt von rosse	do loster im div bant
von fvezen vnt von munde	do erlutte da zehant
vil groze daz gehunde	swaz des den bern sach
daz tyer ze walde wolde	die lvte heten vngemach
Der ber von <dem> schalle	durch die chvchen geriet
hey waz er chuchenknehte	von dem fivre schiet
vil chezzil wart gervret	zerfvret manic brant
hey waz man gvter spise	in der aschen ligen vant
Do sprungen von dem sedele	die herren vn– ir man
der ber begunde zvrnen	der kunic hiez do lan
allez daz gehunde	daz an seilen lach
wær iz wol verendet	si heten vrolichen tach
Mit bogen vn– mit spiezen	niht langer man daz lie
do liefen dar die snellen	da der ber gie
so vil was der hvnde	daz da niemen schoz
von dem <gro> [37r]schalle	beidiv berch vn– walt erdoz
Der ber begunde vliehen	vor den hunden dan
im enchunde niht gevolgen	wan Chriemh' man
der erliefen mit <dem> swerte	ze tode er in do slvoch
hin wider zv der chuochen	man den bern sider trvoch
Do sprachen die daz sahen	er wær ein chreftic man
die stolzen iagtgesellen	hiez man zen tischen gan
vf einen schonen anger	saz ir da genvoc
waz man do richer spise	den iagtgesellen dar trvoc
Die schenchen chomen seine	die tragen solden win
ez enchunde baz gedienet	nimmer heleden sin
heten si dar vnder	niht so valschen mvot
so wæren wol die degene	vor allen schanden behvot
Done hete nilnt der sinne	der chuene veige man
daz er sich ir untriwe	chunde han verstan
er was in ganzen tugenden	alles <valsches> bloz
sins sterbes mvose engelten	sit der sin nie niht genoz
Do sprach der herre Sivrit	wnder mich des hat
sit man vns von der chuchen	git so manigen rat
durch waz uns die schenchen	bringen niht den win
man enpflege baz der iægere	ine wil niht iagtgeselle sin
Ich hete wol gedienet	daz man min næme war
der chunic ob dem tische	sprach in valsche dar
man solz iv gerne bvzen	swes wir gebresten han
wir sin von Hagene schulde	hivt ane trinchen bestan
Do sprach der von Tronege	vil lieber herre min
ich wande daz diz pirsen	hivte solde sin
da zem Spehtsharte	den win den sande ich dar
sin wir hie vngetrunchen	wie wol ihz immer mer bewar
Do sprach der herre Sivrit	ir lip der habe vndanc
man solde mir siben savme	win un– luttertranc
habn her gefveret	do des niht mohte sin
do solde man vns naher	han gesidelt an den Rin
Do sprach aber Hagene	ir edeln ritter balt
ich weiz hie vil nahen	einen brunnen	der ist chalt
daz ir niht enzvrnet	da svln wir hine gan
der rat wart manigem degene	ze grozen sorgen getan
Den helt von Niderlanden	dwanch des durstes not
den tische er deste ziter	rvchen dan gebot
er wolde fvr die berge	zv dem brunnen gan
do was der rat mit meine	von den degenen getan
Div tyer man hiez vf wægenen	fveren in daz lant
div da verhowen hete	div Sivrides hant
man iah im grozer eren	swer ez ie gesach
Gunther sine triwe	vaste an Sivride brach
Do si dannen wolden	zvo der linden breit
do sprach aber Hagene	mir ist dicke daz geseit
daz niht gevolgen chunne	dem Chriemh' man
swenner wolde gahen	hey wolde vns daz sehn lan
Do sprach von Niderlanden	der herre Sivrit
ir mvgt ez wol <versvchen>	welt ir mir lovfen mite
ze wette zv dem brunnen	so daz si getan
der sol han [37v]gewnnen	den man siht ze vorderst stan
Nv welle ovch wirz versvochen	sprach Hagene der degn
do sprach der starche Sivrit	so wil ich mich legn
fvr die iwern fveze	nider an daz gras

do Gunther daz gehorte	hey wie lieb im daz was
Do sprach der degn chvne	ich wil iv mære sagn
allez min gewæte	wil ich an mir tragn
den ger zv dem schilte	vn– al min pirsgewant
den chocher zvo dem swerte	vil schier er vmbe gebant
Do zvgen si div chleider	von dem libe dan
in zwein wizen hemeden	sach man si beide stan
sam zwei wildiv pantel	si liefen durch dcn kle

doch sah man bi dem brunnen	den snellen Sivriden ê
Den pris an allen dingen	trvger vor manigem man
daz swert er loste balde	den chocher leit er dan
sinen ger den starchen	leinter an der linden ast
bi des prunnen vlvozze	stunt der herliche gast
Di Sivrides tugende	warn harte groz
den schilt leit er nidere	al da der brunne vloz
swie harte so in durste	der helt doch niene tranch
e daz der kunic choeme	daz dvhte Sivriden lanch
Der brunne was vil chvele	lutter un– gvot
Gunther sich do legete	nider zv der flvot
daz wazzer mit dem munde	er von der flvote nam
si gedahten daz ovch Sivrit	nach im mvese tvon alsam
Do engalt er siner zvehte	den bogen vn– daz swert
daz trvog allez Hagene	von im dane wert
do spranger hin widere	da er den ger da vant
er sach nach eime cruce	an des kuniges gewant
Da der herre Sivrit	ob dem brunnen tranch
er schoz <in> durch daz chruce	daz vz der wnden spranc
daz blvt im von dem hercen	an die Hagenen wat
so groze missewende	ein helt nv nimmer mer begat
Den ger gegen dem hercen	stechen er im lie
also angestlichen	ze flvhten Hagene nie
gelief noch in der werlde	vor decheinem man
do sich der herre Sivrit	der starchen wnden versan
der reche tobliche	von dem brunnen spranch
im ragete von dem hercen	ein gerstange lanch
der fvrste wande vinden	bogen oder swert
so mvse wesn Hagene	nach sime dienste gewert
Do der sere wnde	des swertes niht envant
done het et er niht mere	wan des schildes rant
den zvhter von dem brunnen	do lief er Hagenen an
done chunde im niht entrinnen	der vil vngetriwe man
Swie wnt er was zem tode	so chrefteklich er slvoc
daz vzer dem schilde	dræte genvoc
des edeln gesteines	der schilt vil gar zebrast
sich hete gerne errochen	der vil herlich gast
Hagene mvse vallen	von siner hant zetal
von des slages chrefte	der wert vil lvte erhal
het er daz swert enhende	so wær ez Hagenen tot
der helt en[38r]tran vil chvme	vz der <angestlichen> not
Sin chraft was im geswichen	ern kunde niht gestan
sines libes sterche	div mvse gar zergan
wander des todes zeichen	bi liehter varwe truoc
sit wart er beweinet	von schoenen vrowen genvoc
Do uiel in die blvomen	der Chriemh' man
daz blvot von sinen wnden	sach man vaste gan
do begvnder schelten	des twanch in michel not
die vfin geraten	heten den ungetriwen tot
Do sprach der sere wnde	ia	ir vil bose zagn
waz hilfet mich min dienest	daz ir mich habt erslagen
ich was <iv> ie getriwe	des ich engolten han
ir habt an iwern magen	leider vbel getan
Die sint da von bescholten	swaz ir wirt geborn
her nach disen ziten	ia habt ir iwern zorn
vil vbele gerochen	an dem libe min
mit laster ir gescheiden	svlt von gvten <rechen> sin
Die lvte liefen alle	da er reslagen lac
ez was ir genvgen	ein frevdeloser tac
die iht triwe heten	von den wart er bekleit
daz het wol gedienet	der ritter chn vn– gemeit
Der kunic von Burgonden	klagete sinen tot
do sprach der verchwnde	daz ist ane not
daz der nach schaden weinet	der in da hat getan
der dienit michel schelten	ez wære bezzer verlan
Do sprach der grimme Hagene	iane weiz ich waz er kleit
ez hat nv allez ende	vnser sorge vn– vnser leit
wir vinden ir vil kleine	die turren vns bestan
wol mich deich siner herschaft	han ze rate getan
Ir mvgt ivch lihte rvemen	sprach do Sivrit
het ich an iv erchennet	den mortlichen sit
ich hete wol behalten	vor iv minen lip
mich enriwet niht so sere	so froe Chriemh' min wip
Nv mvze got erbarnnen	deich ie gewan den <svn>
dem solch itewizen	sol nach den ziten tvon
daz siner mage iemen	mit morde habn erslagn
moht ich	so sprach Sivrit	daz solt ich billiche klagn
Zer werlde wart nie mere	grozer mort began
sprach er zvo dem kunige	denne an mir ist getan
ich behielt iv lib vn– ere	in angestlicher not
ich hans engolten sere	daz ihz iv ie so wol erbot
Do sprach vil seneliche	der verchwnde man
welt ir	kunic riche	triwen iht began
in der werlt an iemen	lat iv bevolhen sin
vf triwe un– vf genade	di lieben truttinne min
Vn– lat si des geniezen	daz si iv swester si
durch aller fursten tvgende	wont ir mit triwen bi
mir mvzen warten lange	min vater vn– mine man
ez enwart nie frowen mere	an frivnde leider getan
Er rampf sich bitterliche	als im div not gebot
vn– sprach do iæmirliche	der mortlich tot
mag ivch wol geriwen	her nach disen tagen
gelovbt [38v]an rehten triwen	daz ir ivch selben habt erslagn
Die blumen allenthalben	von blvote warn naz
do ranger mit dem tode	vnlange tet er daz
wande in des todes wafen	al ze sere sneit
do mohte reden niht mere	der reche chven un– gemeit
Do die herren sahen	daz der helt was tot
si leiten in vf einen schilt	der was von golde rot
vn– wrden des ze rate	wie daz solde ergan
daz man iz verhêle	daz iz het Hagene getan
Do sprachen ir genvoge	vns ist vbele geschehn
ir sult ez heln alle	vn– svlt geliche iehn
da er rite iagn eine	der Chriemh' man
in slvgen schachære	da er fvre durch den tan
Do sprach der ungetriwe	ich fvren n–n daz lant
mir ist vil vnmære	vn– wirt ez ir bechant
div so hat getrubet	miner frowen mvot
ez ahtet mih vil ringe	swaz si weinens getvot
Von dem selben brunnen	da Sivrit wart erslagen
sult ir div rehten mære	von mir hoern sagn
vor dem Otenwalde	ein dorf lit	Otenhaim
da vliuzet noch der brunne	des ist zwifel dehein