<In> solhen unmvzen	svln wir die frowen lan
hie wart vil michel gahen	vber velt getan
von Rvdegeres frivnden	da man die geste vant
si wrden [59v]wol enpfangen	in des marcgraven lant
Do si der marcgrave	zvo zim chomen sach
Rvdeger der snelle	wie vrolich er sprach
sit willechomen	ir herren	vn– ovch iwer man
hie in disem lande	wie gern ih ivch gesehn han
Do danchtem im die rechen	mit triwen ane haz
daz er in willechomen wære	vil wol erzeichter daz
svnder grvozter Hagenen	den het er <ê> bechant
sam tet er Volkeren	den helt von Burgonden lant
Do sprach zem marcgraven	Danchwart der degen
sit ir vns welt bervochen	wer sol vns danne pflegen
des vnsern ingesindes	von Wormez vber Rin
do sprach der marcgrave	die angest svlt ir lazen sin
Ez wirdet wol behalden	swaz ir in daz lant
habt mit iv gefvret	ros	silber vn– gewant
dem schaffe ich <solhe> hvte	daz sin wirt niht verlorn
daz iv ze schaden bringe	gegen einem halben sporn
Spannet vf	ir knehte	die hvtten an daz velt
swaz ir hie verlieset	des wil ich wesen gelt
vn– ziehet abe die zovme	div ros div lazet gan
daz het in wirt deheiner	da vor vil selten getan
Des frevten sich die geste	do daz geschaffen was
die herren riten dannen	sich leiten in daz gras
vber al die knehte	si heten gvot gemach
ich wæn in an der verte	nie so sanfte geschach
Nv was div marcgrauinne	fvr daz tor gegan
mit ir vil schonen tohter	do sah man bi ir stan
die <minneklichen> frowen	vn– manige schone meit
die trvgen vil der boege	vn– oech die herlichen chleit
Daz edele gesteine	verre lvhte von in dan
vz ir vil richen wæte	die warn wol getan
do chomen ovch die rechen	vn– erbeizten sa zehant
hey waz man grozer zvehte	an den Burgonden vant
Sehs vn– drizzech meide	vn– ander manic wip
den was ze wnsche schone	vn– minneklich der lip
die giengen in engegene	vn– wolden si enpfan
da wart ein schone grvzen	von den frowen getan
Div ivnge marcgrauinne	chvste die kunige dri
alsam tet ir mvter	da stvnt ovch Hagen bi
den bat ir vater chvssen	do blicte si in an
er dvhte si so gremlich	daz siz gerne hete lan
Doch mvste si da leisten	daz ir der wirt gebot
gemisschet wart ir varwe	bleich vn– rot
si chvste oech Danchwarten	dar nach den spileman
durch sines libes ellen	wart im daz grvzen getan
Div iunge marcgravinne	nam do bi der hant
Giselhern den rechen	von Burgonden lant
alsam tet ir mvoter	Gunthern den chvnen man
Gernoten fvrte Rvdeger	mit in minnechlichen dan
In der schonen buorge	stvnt ein witer sal
ritter vn– frowen	gesazen da zetal
do hiez man balde schenchen	den gesten gvten [60r]win
ez endorften nimmer helede	gehandelt gvetlicher sin
Mit lieben ovgen blichen	wart vil gesehn an
div Rvdegeres tohter	do was so wolgetan
ia trvotes in dem hercen	vil manic ritter gvot
daz chunde ovch si verdienen	si was vil hohe gemvot
Si gedahten swes si wolden	es enmoht aber niht geschehn
an mægede vn– oech an frowen	wart da vil gesehn
fvr vn– widere	wande ir saz da genvoc
der edel videlære	dem wirte holden willen trvoc
Nach gewonheite	do schieden si sich da
ritter vn– frowen	die giengen anderswa
do rihte man die tische	in demn sale wit
den vil lieben gesten	man diente willekliche sit
Dvrch der geste liebe	hin ze tische gie
niwan div marcgravinne	ir tohter si do lie
beliben bi den kinden	da si von rehte saz
daz si ir niht ensahen	die geste mvete sere daz
Do si mit frevden heten	gegezzen vber al
do wiste man die schonen	wider in den sal
gæmelicher spruoche	der wart da niht verdeit
der reit vil da Volker	ein degen chven vn– gemeit
Do sprach offenliche	der tivre spileman
vil richer marcgrave	got hat an iv getan
vil genædekliche	daz er iv hat gegeben
ein wip so rehte schoene	dar zvo ein wnneklichez lebn
Ob ich ein fvrste wære	sprach aber der spileman
vn– solde ich tragen chrone	ze wibe wolde ich han
die iwern schonen tohter	des wonnet mir der mvot
div ist minneklich ze sehene	dar zvo edel vn– gvot
Do sprach der marcgrave	wie moehte daz gesin
daz immer kunic gegerte	der lieben tohter min
wir sin beide ellende	ich vn– ovch min wip
vn– haben niht ze gebene	waz hilfet danne ir schoner lip
Do sprach der herre Gernot	ir svlt die rede lan
vn– solde ich trvttinne	nach mime willen han
ane gvot ze wibe	wær ich ir immer vro
des antwrte Hagene	vil harte minneklichen do
Nv sol doch her Giselher	min herre nemen wip
ez ist so hoher mage	der marcgravinne lip
daz wir ir dienten gerne	ich vn– ander iwer man
vn– soldes under chrone	da zen Burgonden gan
Div rede Rvdegeren	von in dvhte gvot
vn– ovch die marcgrauinne	ia frevtez in den mvot
sit trvgen an die helde	daz si ze wibe nam
Giselher der edele	wandez in beiden wol gezam
Swaz sich sol gefvgen	wer mac daz vndersten
man bat die ivncfrowen	hin ze hove gen
do swor man im ze gebene	daz wnnekliche kint
oech lobt er ze nemene	die vil <minneklichen> sint
Man beschiet der ivncfrowen	bvrge vn– lant
des sichert da mit eiden	des richen chuniges hant
vn– Gernot der herre	daz wrde daz getan
do sprach der marcgrave	sit ich der lande niht enhan
sone lat iv niht versmahen	min ellendes solt
ich gibe [60v]zv miner tohter	silber un– golt
swaz zwei hvndert moere	meiste mvgen getragen
div rede mvste den degenen	beidenthalben wol behagen
Nach gewonheite	man hiez an einen rinch
sten die minneklichen	manec sneller ivngelinch
in gezweietem mvote	ir ze gegene stvnt
si gedahten in ir sinne	so noch die tvmben dicke tvont
Do man begunde vragen	die minneklichen meit
ob si den rechen wolde	ein teil was ez ir leit
vn– dahte doch ze nemene	den wætlichen man
si schamte sich der vrage	so manic maget hat getan
Ir rvonte ir vater Rvdeger	daz si spræche ia
vn– in vil gerne næme	vil schiere was do da
mit sinen wizen handen	der si do vnbesloz
Giselher der ivnge	swie lvzzil si des sit genoz
Do sprach der marcgrave	ir edeln kunige rich
als ir nv wider wendet	daz ist gewonlich
heim zvo zivren landen	so gib ich iv min kint
daz ir si mit iv fvret	daz gelobten si sint
Swaz man da schalles horte	den mvsen si doch lan
man hiez die iuncfrowen	zir kemenaten gan
vn– oech die geste slafen	si erbiten an den tac
do bereite man die spise	der wirt ir minneklichen pflac
Do si nv gezzen heten	vn– wolden dannen varn
gein der Hvnen landen	daz heiz ich wol bewarn
sprach der wirt vil edele	ir svlt noch hie bestan
wande ich so lieber geste	selten her gewnnen han
Des antwrte Danchwart	iane mages niht gesin
wa næmet ir die spise	daz brot vn– ovch den win
daz so manigem manne	wære hie bereit
do daz der wirt gehorte	ez was im ane maze leit
Do sprach der marcgrave	div rede ist ane not
ze vierzehen nêhten	win vn– brot
gêbe ich iv voelleklichen	mit den	die ir noch hie hat
ir mvzet hie beliben	des ist deheiner slahte rat
Swie vil si dannen gerten	si mvsen da bestan
vnz an den vierden morgen	do wart ovch da getan
von des wirtes milte	daz verre wart geseit
er gap den sinen gesten	beidiv wafen vn– kleit
Ez mohte wern niht langer	si mvsen dannen varn
Rvdeger der chunde	vil wenic iht gesparn
von der sinen milte	swes iemen gerte nemen
daz versagt er niemen	ez mvse in allen gezemen
Daz edel ingesinde	brahte fvr daz tor
gesatelt vil der rosse	do warte ovch in da vor
vil der gvten rechen	die trvgen schilde enhant
wande si riten wolden	nider in der Hunen lant
Der wirt do sine gabe	bot vber al
e daz die edeln geste	choemen fvr den sal
er chvnde miltekliclhe	mit grozen eren lebn
die sine schonen tohter	die het er Giselher gegebn
Do gab er Gvnthere	dem helde lobelich
daz wol trvoc mit eren	der edel kunic rich
swier [61r]nie gabe enpfienge	ein waffenlich gewant
do neich der fvrste here	des milten Rvdegers hant
Do gab er Gernote	ein wafen gvot genvoc
daz er sit in stvrmen	vil herlichen trvoch
der gabe im vil wol gvnde	des marcgraven wip
da von der gvte Rvdeger	mvse vliesen sit den lip
Do bot div marcgrauinne	Hagen ir gabe alsam
mit bete minnekliche	sit si der kunec nam
daz er ane ir stivre	zvo der hochgecit
varn niene solde	der helt gelobt ez ane strit
Alles des ich ie gesach	sprach do Hagene
sone gerte ich niht mere	nv ze habene
niwan ienes schildes	der dort hanget an der want
den wolde ich gerne fvren	mit mir in der Hvnen lant
Do div marcgrauinne	Hagen bete vernam
ez mante si ir leide	weinen si gezam
do gedahte si vil tivre	an Nuodvnges tot
den het erslagen Witege	des twanc si iæmerlichiv not
Si sprach zvo dem degene	den schilt wil ich iv gebem
daz wolde got von himele	daz er noh solde leben
der in da trvg enhende	der lag in stvrme tot
den mvz ich immer weinen	des gat mir <armen> wibe not
Div edel marcgravinne	von ir sedele gie
bi dem schilt vezzil	si den schilt gevie
do brahte si in Hagene	si selbe mit ir hant
div gabe was mit eren	an den rechen gewant
Ein hvlft von liehtem pfelle	ob siner varwe lac
bezzer schilt deheinen	belvhte nie der tac
von edelm gesteine	swers ze chovfen hete gegert
oder in veil hete	er was wol tvsint marche wert
Den schilt hiez do Hagene	von im tragen dan
do chom sin brvder Danchwart	hin ze hove gegan
dem gap vil richiv chleider	des marcgraven kint
die er da zen Hvnen	trvoc vil herlichen sint
Allez daz der gabe	von in da wart genomen
in ir deheines hende	wær ir niht bechomen
wan dvrch des wirtes liebe	derz in so schone erbot
sit wrdens im so vint	daz si in mvsen slahen tot
Volker mit siner	videlen dan
chom gezogenliche	fvr Gotelinde stan
er videlt sveze done	vn– sang ir siniv liet
da mite nam er vrlovp	do er von Bechelaren sciet
Ir hiez div marcgravinne	eine lade tragen
von frivntlicher gabe	mveget ir nv horen sagen
dar vz si nam sehs povge	vn– spiens im an die hant
die svlt ir fvren	Volker	von mir in der Hunen lant
vn– svlt dvrch minen willen	si da ze hove tragen
swenne ir wider wendet	daz man mir mvge sagen
wie ir mir habt gedienet	da zer hochgecit
des si zem rechen gerte	vil wol gewert er sis sit
Do sprach der wirt zen gesten	ir svlt dest sanfter varn
ich wil ivch selbe leiten	vn– heizen wol bewarn
daz man [61v]iv vf der strazen	nêm deheiniv pfant
ich sol ivch selbe leiten	in daz Ezelen lant
Der wirt wart wol bereit	mit fvnf hundert man
ze rossen vn– ze chleidern	die fvrt er mit im dan
in vrolichem mvote	zv der hochgecit
der deheiner nimmer mere	chom ze Bechelaren sit
Mit chvsse minnekliche	der wirt do dannen schiet
also tet ovch Giselher	als im div liebe riet
mit vnbeslozzen armen	si trvten schoeniv wip
daz mvose sit bewæinen	vil maniger ivncfrowen lip
Vil venster wart entslozzen	vn– wit vf getan
der wirt mit sinen mannen	zen rossen wolde gan
in wæn ir hercen sageten	div chrefteklichen ser
daz si der lieben <frivnde>	dar nach gesahen nimmer mer
Nach ir lieben frivnden	heten genvge leit
do weinten ane maze	vil frowen vn– manic meit
doch riten si mit frevden	nider vber sant
zetal bi Tvonowe	vnz in daz hunische lant
Do sprach zen Bvrgonden	der ritter vnverzaget
Rvdeger der edele	ia svln niht sin verdaget
Ezeln disiv mære	daz wir zen Hvnen chomen
vn– oech mine frowen	sine hant so liebes niht vernomen
Ze tal dvrch Oestiriche	vil manec bote reit
den lvten allenthalben	wart daz wol geseit
daz die herren choemen	von Wormez vber Rin
dem Ezeln ingesinde	chunde niht lieber gesin
Die boten fvr strichen	mit disen mæren
daz die Nibelunge	zen Hvnen wæren
dv solt si wol enpfahen	Chriemh'	frowe min
dir choment nach grozen eren	her die stolzen brveder din
Do div kuniginne	vernam div mære
ir begunde entwichen	ein teil ir swære
von ir vater lande	chom ir vil manic man
da von der kunic Ezele	vil manigen iamer <sit> gewan
Si gedahte tovgenliche	noch mohte is werden rat
der mich an minen frevden	also gepfendet hat
mag ich daz gefvgen	ez sol im leide ergan
ze dirre hochgecite	des ich vil gvten willen han
Ich solz also schaffen	daz min rache erge
in dirre hochgecite	swiez dar nach geste
an sinem argen libe	der mir hat benomen
vil der minen wnne	des sol ich nv ze gelte chomen