Do> chomen vremdiv mære	in Guntheres lant
von boten	die im verre	warn dar gesant
von vnchvnden rechken	die in trugen haz
do si die rede vernamen	leit was in innekliche daz
Die wil ich iv nennen	ez was Lvdeger
vzer Sahsen lande	ein richer furste her
vn– ovch von Tenemarche	der kunic Lvdegast
an dem sinen vriunden	ganzer helfe nie gebrast
Ir boten chomen warn	in Buregonden lant
die ir widerwinnen	heten dar gesant
do vragte man der mære	die unchvnden man
do braht man si balde	ze hofe fvr den kvnic stan
Do sprach der kunic Gunther	nv sit willekomen
wer ivch her habe gesendet	des enhan ich niht vernomen
daz svlt ir lazen horen	sprach der ritter gvot
do vorhten si vil sere	den grimmen Guntheres mvot
Welt ir uns	kvnic	erlovben	daz wir iv mære sagen
div wir iv da bringen	sone svln wir niht verdagen
wir nennen iv die herren	die vns here habent gesant
Livdegast vn– Livdeger	die wellent svchen iwer lant
Ir habt ir haz verdienet	ir svlt gelovben daz
daz iv die rechen beide	tragent grozen haz
si wellent herverten	ze Wormze an den Rin
in hilfet vil der degene	des sult ir ane zwifel sin
Inre zwelf wochen	ir reise sol geschehen
habt ir iemen vrivnde	daz lat vil balde sehen
die iv vriden hel[6v]fen	die <burge> vn– iwer lant
hie wirt von in verhowen	vil manic herlicher rant
Oder welt ir mit in dingen	so enbietet ez in dar
sone ritent iv so nahen	niht die starchen schar
ze Wormez zv dem Rine	vf hercenlichiv leit
da von verderben mvzen	die gvten ritter gemeit
Nv bitet eine wile	sprach kunic gvot
vnz ich mih baz versinne	ich kund iv minen mvot
han ich getriwer iemen	die sol ich niht verdagn
disiv starchen mære	sol ich minen friwenden sagen
Dem kunige disiv mære	warn leide genvoc
die rede er tovgenliche	in sime hercen trvoc
er hiez gewinnen Hagenen	vn– ander sine man
vn– bat ovch harte balde	ze hofe nach Gernote gan
Do chomen im die besten	swaz man der da vant
er sprach man wil uns svochen	her in unser lant
mit starchen herverten	daz lat iv wesen leit
ez ist gar ane schvlde	daz si uns habent widerseit
Daz wern wir mit swerten	sprach do Gernot
da sterbent wan die veigen	die mvzen ligen tot
dar vmbe ich niht vergezzen	mac der eren min
die unser widerwinnen	suln vns willechomen sin
Do sprach der starche Hagene	daz endunchet mich niht gvot
Livdegast un– Livdeger	die tragent vbermvot
wir mvgen uns niht besendet	in so churzen tagen
so sprach der chune reche	wan mvget irz Sifride sagen
Die boten herbergen	hiez man in die stat
swie uient man in wære	doch schone ir pflegen bat
Gunther der riche	daz was wolgetan
vnz er eruant an <vriunden>	wer im wolde gestan
Dem kunige in sinen sorgen	was iedoch vil leit
do sach in truorende	ein degen vil gemeit
der niht wizzen kunde	waz im was geschehen
do bat er im der mære	den kunic Gunther veriehen
Mich wndert harte sere	sprach do Siurit
wie habt ir so verkeret	die vroliche sit
der ir nv mit uns lange	habt alher gepflegen
des antwrt im do Gunther	der vil zierlich degen
Iane mag ich allen luten	die swere niht gesagen
die ich mvz tovgenliche	in mime hercen tragen
man sol stæten friunden	chlagen hercen not
div Sifrides varwe	wart beidiv bleich vn– rot
Er sprach zv dem kunige	habt vf minen eit
ich sol iv helfen wenden	elliv iweriv leit
welt ir vriunde svochen	der sol ich einer sin
vn– trowe ez wol mit eren	volbringen an daz ende min
Nv lone iv got	her Sivrit	div rede mich dunchet gvot
vn– ob mir nimmer helfe	iwer ellen getvot
ich frewe mich doch der mære	daz ir mir sit so holt
lebe ich deheine wile	ez sol werden wol verscholt
Ich wil ivch lazen horen	warvmbe ich trurich stan
von boten miner viende	ich daz vernomen han
daz si mich svchen wellen	mit heruerten [7r]hie
daz getaten uns noch degene	her zv disen landen nie
Daz lat ivch ahten ringe	sprach do Sivrit
vn– senftet iwerm mvote	tvot des ich ivch bite
lat mich iv erwerben	ere vn– ovch den frumen
e daz iwer uiende	her ze disen landen chvmen
Swenne iwer starche uiende	zir helfe mohten han
drizzech tusint degene	so wol ich si bestan
het ich niwan tusint	des lat ivch an mich
do sprach der kunic Gunther	daz dien ich immer vmbe dich
So heizet mir gewinnen	tusint iwerr man
sit daz ich der minen	bi mir niht enhan
niwan zwelf degene	so wer ich iwer lant
iv sol immer dienen	mit triwen Sifrides hant
Des sol uns helfen Hagene	vn– ovch Ortwin
<Danchwart>	vn– Sindolt	die lieben rechen din
ovch sol da mit riten	Volcher der kune man
der sol den vanen fvren	baz ihs nieman <engan>
Nv lat die boten riten	wider in ir lant
daz si uns da sehen schiere	<daz> tv man in bekant
so daz unser burge	vride mvzen han
do hiez der kunic besenden	beidiv mage vn– man
Die boten Livdegeres	ze hove giengen do
daz si ze lande solden	des warn si vil vro
do bot in riche gabe	Gunther der kunic gvot
vn– schuf inn sin geleite	des stunt in hohe der mvot
Nv saget	sprach do Gunther	den vianden min
si mugin mit ir reise	wol da heime sin
wellent aber si mich svochen	her in miniv lant
mirn zerinne miner frivnden	in wirdet arbeit erchant
Den boten riche gabe	man do fvr truoch
der het in ze gebene	der riche chunic genvoch
dine torsten niht versprechen	die Ludegeres man
vrlovp si do namen	vn– furen vrolichen dan
Do die boten waren	ze <Tenemarchen> komen
vn– der kunich Livdegast	hete daz vernomen
waz si ze Rine redeten	als im daz wart geseit
ir starchez vbermveten	was im ane maze leit
Man saget im daz si heten	manigen chunen man
dar vnder sach man einen	vor Gunthere stan
der was geheizen Sifrit	ein helt vz Niderlant
ez leidete Livdegaste	do er div mære reht ervarnt
Do die von Tenemarche	dizze horten sagen
do ilten si der helfe	deste me begagen
so daz der kunic Livdegast	siner mage un– man
wol zweinzich tusint degene	zv der reise gewan
Do besande ovch sich von Sahsen	der chvne Livdeger
vnz si vierzech tvsint	heten vn– mer
mit den si wolden riten	in Guntheres lant
do heten ovch sich hie heime	die drie kunige besant
<mit> den Buregonden	vn– ander <ir> <hohen> man
die si durch vrlivge	furen wolden dan
si ilten sich bereiten	des gie den helden not
dar vnder mvsin degene	side chiesen den tot
Si vlizzen sich zer reise	do si wolden dane
Volker dem chunen	bevolhen wart der vane
do si varen wolden	ze Wormze vber Rin
Hagene der star[7v]che	der mvos scharmeister sin
Da mit reit ovch Sindolt	vn– Hvnolt
die wol gedienen chunden	richer kunige golt
Dancwart der snelle	vn– ovch Ortewin
die mohten wol mit eren	in der heruerte sin
<Her> kunic	sit hie heime	sprach do Sivrit
sit daz iwer rechen	mir wellen volgen mit
belibet bi den frowen	vn– habet hohen mvot
ich trwoe iv wol beherten	beidiv ere un– gvot
Die ivch da wolden svchen	ze Wormze an den Rin
daz sol ich wol behuten	daz si iv iht schade sin
wir svlen in geriten	so nahen in ir lant
daz in ir vbermveten	werde in sorgen erwant
Von Rine si durch Hessen	mit ir helden riten
gegen der Sahsen lande	da wart sit gestriten
mit rvobe vn– ovch mit brande	wosten si daz lant
daz iz den fursten beiden	wart mit arbeit bechant
Si komen vf die marche	die knehte zogeten dan
Sifrit der vil starche	vragen do began
wer sol des gesindes	vns nv hvten hie

iane wart den Sahsen	geriten schedelicher nie
Si sprachen	lat der tumben	huten vf den wegn
den vil chunen marschalch	der ist ein sneller degen
wir verliesen deste minre	von Livdegeres man
lat in vn– Ortwinen	hie die nachhvte han
So wil ich selbe riten	sprach Siurit der degen
vn– wil der warte	gein den uienden pflegen
vnz ich vil rehte ervinde	wa die rechen sint
do wart gewaffent balde	der schonen Sigelinde kint
Daz volch bevalh er Hagene	da er wolde dan
vn– ovch Gernote	dem uil kunem man
do reit er eine dannen	in der Sahsen lant
da er div rehten mære	wol mit eren sit ervant
Do sah er here daz grozze	daz uf dem velde lac
daz wider siner helfe	mit vnfvge wach
des was wol vierzech tusint	oder dannoch baz
der helt in hohem mvte	sach vil frolichen daz
Do het ovch sich ein reche	von den vienden dar
erhaben vf die warte	der was ze vlize gar
den sach der herre Sifrit	vn– in der chune man
ietweder do des andern	mit nide govmen began
Ich sage iv wer der wære	der hie der warte pflach
ein liehter schilt von golde	im vor der hende lach
ez was der kunich Livdegast	der hute siner schar
dirre gast vil edele	ernante vil herlichen dar
Nv hete ovch in her Livdegast	vientlich erchorn
ir ross si namen beide	zen siten mit den sporn
si neigten vf die schilde	die schefte mit ir kraft
des wart der kunic here	mit grozen sorgen behaft
Div ross nach stiche trvgen	div richen kuniges kint
mit hurte fur ein ander	sam si wæte ein wint
mit zovmen wart gewendet	vil ritterlichen dan
mit swerten ez ersvhten	die <zwen> grimme starche man
Do sluch der herre Sifrit	daz al daz velt erdoz
do stovp im vz dem helme	sam von brenden groz
die heizen fivres vunchen	[8r]von des rechen hant
da streit vil mæhteklichen	der voget vz Niderlant
Do sluoc ovch im her Livdegast	vil manigen grimmen slach
ir ietwederes ellen	vf schilden vaste lach
do heten dar gehutet	wol drizzech siner man
ê im der helfe chome	den sich doch Sivrit gewan
mit drin starchen wnden	die er dem kunige sluoc
durch eine liehte brunne	div was gvot genvoch
daz swert an sinen ekken	braht vz wnden bluot
des gewan der kunic Livdegast	einen trurigen mvot
Er bat sich leben lazen	vn– bot im siniv lant
vn– sagt im daz er wære	Livdegast genant
do chomen sine rechen	die heten wol gesehen
waz da von in beiden	vf der warte was geschehen
Do er in danne furte	do ward er an gerant
von drizzech sinen mannen	do wert des heledes hant
sinen richen gisel	mit vngefugen slegen
sit tet schaden mere	Sifrit der vz erwelte degen
Die drizzech er ze tode	vil werliche slvoch
er liez ir leben einen	balde er reit genvoch
vn– sagt hin div mære	waz hie was geschehn
ovch moht mans die warheit	an sinem rotem helme sehn
Den von Tenemarche	was vil grimme leit
ir herre was gevangen	do in daz wart geseit
man seit ez Livdegere	toben er began
von ungefugem zorne	wand im was leide getan
Livdegast der riche	was gefuret dan
von Sifrides gewalte	zv Guntheres man
er bevalh in Hagene	der chune reche guot
do er vernam div mære	do ward er frolich gemvot
Er hiez der Burgonden	ir vanen binden an
wol vf	so sprach Sivrit	hie wirt noch me getan
ê sich der tac verende	sol ich habn den lip
daz mvet in Sahsen lande	etliches guten rechen wip
Ir helde von dem Rine	ir sult min nemen war
ich kan ivch wol geleiten	in Livdegeres schar
da seht helme howen	von guter helede hant
ê daz wir wider <wenden>	in der Burgonden lant
Zen rossen gahte Gernot	vn– ovch sine man
Volker der chune	den vanen zvochte dan
der starche videlære	do reit er vor der schar
do was ovch daz gesinde	ze strite herlichen gar
Sine furten doch niht mere	niwan tusint man
darvber zwelf rechen	stieben do began
div molte von den strazen	si riten vber lant
do sach man von in schinen	vil manigen herlichen rant
Do waren ovch die Sahsen	mit ir <scharn> chomen
mit swerten wol gewahsen	als wir han sit vernomen
div swert div sniten sere	den rechen an der hant
do wolden si den gesten	wern burge vn– lant
Der herren scharmeister	daz volch do furten dan
da was ovch chomen Sifrit	mit den sinen man
die er da mit im brahte	vzer Niderlant
des tages wart in sturme	vil manic blutiger rant
Sindolt vn– Hvnolt	vn– ovch Ger[8v]not
die vrumten in dem strite	vil manigen helt tot
e si daz reht erfunden	wie chune was ir lip
daz mvse sit beweinen	vil manic wetlichez wip
Volker vn– Hagene	vn– ovch Ortwin
die lascten im strite	vil maniges helmes schin
mit vliezendem bluote	ez warn chune man
da wart von Danchwarte	vil michel wnder getan
Die von Tenemarche	versvohten wol ir hant
do horte man von hurte	erdiezen manigen rant
vn– ovch von scharfpen swerten	der man da vil gesluoc
die stritchunen Sahsen	taten scaden ovch genvoch
Do die von Burgonden	drungen in den strit
von in wart verhowen	vil manic wnde wit
do sahe man vber sætele	vliezen daz bluot
svs wrben nach den eren	die ritter chun vnde gvot
Man horte da luot erhellen	den helden an der hant
div vil scharpfen wafen	da die von Niderlant
drungen nach ir herren	in die herten schar
si chomen degenliche	mit samt Sifride dar
Volgen der von Rine	niemen man im sach
man mohte chiesen vliezen	den blvtigen bach
durch die vil liehten helme	von Sifrides hant
vnz er Livdegeren	von sinen hergesellen vant
Drie widerchere	het er nv genomen
des hers an ein ende	nv was ovch Hagene chomen
der half im wol ervollen	in strite sinnen mvot
des tages mvse ersterben	von in vil manic ritter gvot
Do der starche Livdeger	Sifriden vant
vn– daz er so hohe	trvge an siner hant
daz vil scharpfe wafen	vn– ir so manigen sluoc
dar vmbe wart der chvene	vor leide zornich genvoc
Do wart ein michel dringen	vn– groz der swerte klanch
do ir ingesinde	zv zein ander dranch
do versuhten sich die rechen	beidenthalben baz
die schar begunden wichen	sich huop da grozlicher haz
Dem vogete von den Sahsen	was daz wol geseit
sin bruder was gevangen	daz was im harte leit
wol wesser daz iz tete	daz Sigelinde kint
man zeh is Gernoten	vil wol ervant er iz sint
Die slege Livdegeres	die warn also starch
daz im vnder satele	struchte daz march
do sich daz ross erholte	der chune Siurit
gewan in dem sturme	einen vreiselichen sit
Des half im wol Hagene	vn– ovch Gernot
Ortwin vn– Volker	des lage ir vil da tot
Sindolt vn– Hunolt	die zwene chune man
von den vil manic frowe	schaden grozzen da gewan
In sturme <vngescheiden>	warn die kunige her
do sah man vber helme	vliegen manigen ger
durch die liehten schilde	von der degene hant
man sach da var nach bluote	manigen herlichen rant
In dem starchen sturme	erbeizte manic man
nider von den rossen	ein ander liefen an
Sifrit der chune	vn– ovch Livdeger
da striten wol nach eren	die helede chun vn– her
Do flovch [9r]daz schilt gespenge	von Sifrides hant
den sige gedaht erwerben	der helt von Niderlant
an den kunen Sahsen	die dolten vngemach
hei waz da liehter ringe	der snelle Dancwart zebrach
Do het der herre Livdeger	vf eime schilde erkant
gemalet eine chrone	vor Sifrides hant
wol wesser daz iz wære	der vbermvete man
der helt zv sinen friunden	starche rufen began
Gelovbet ivch des sturmes	mage vn– man
svn den Sigemundes	ich hie gesehn han
von Niderlant den starchen	han ich hie bechant
in hat der ubil tivfel	her zen Sahsen gesant
Die vanen wrden lazen	inn dem sturme nider
frides er do gerte	des wert man sider
doch mvser werden gisel	in Guntheres lant
daz het an im ertwngen	des chunen Sifrides hant
Mit gemeinen rate	so liezen si den strit
durchel vil der helme	vn– ovch der schilde wit
si leiten von den handen	swaz so man der vant
die trugen blutes varwe	von der Buregonden lant
Si viengen swen si wolden	des heten si gewalt
Gernot der herre	vn– Hagene	ein degen balt
die wnden hiezen baren	si furten mit in dan
zv den Buregonden	funf hundert wetlicher man
Die sigelosen rechen	ze Tenemarchen riten
do enheten ovch die Sahsen	so hohe niht gestriten
daz man in lobes iæhe	daz was den heleden leit
do wrden ovch die veigen	von friunden sere gekleit
Si hiezen daz gewæfen	wider sovmen an den Rin
ez hete wol geworben	mit den rechen sin
Sifrit der starche	het ez gvot getan
dez im do iehen mvsen	alle Guntheres man
Gegen Wormez sande	der herre Gernot
heime zv sime lande	den friunden er enbot
wie im gelunge wære	vnt den sinen man
ez heten die vil chunen	wol nach eren getan
Die garzvne liefen	von den wart ez geseit
do frevten sich die schoenen	die ê heten leit
der vil lieben mære	die in waren chomen
da wart von edeln frowen	uil michel fragen vernomen
<wie> gelunge wære	des richen chuniges man
man hiez der boten einen	zv Chriemh' gan
daz geschach vil tovgen	iane torstes vberlvot
wan si hete dar vnder	ir vil liebez hercen trvot
Do si den boten kvomenden	zir kemenaten sach
Chriemh' div uil schone	gvtlichen sprach
sag an liebiv mære	ia gib ich dir min golt
tvstvz ane triegen	ih wil dir immer wesn holt
Wie schiet vz dem strite	min bruder Gernot
vn– ander mine friwende	ist mir iht maniger tot
wer tet da daz beste	daz soltv mir sagen
do sprach der bote biderbe	wir heten ninder deheinen zagen
Ze vorderst am striten	reit niemen alse wol
vil edeliv kuniginne	sit manz iv sagen sol
so der gast vil chune	vzer Niderlant
da worhte [9v]michel wnder	des herren Sivrides hant
Swaz die rechen alle	in strite hant getan
Danchwart vn– Hagene	vn– ander des kuniges man
swaz iemen streit nach eren	daz ist gar ein wint
wider Sifriden	des kunic Sigemundes kint
Si frumten in dem stvrme	der helde vil erslagen
doch enkund iv daz wnder	niemen wol gesagen
waz da worhte Sifrit	swenner ze sturme reit
den vrowen an ir magen	frvmet er div groezlichen leit
Ovch mvste da beliben	vil maniges wibes trvot
sine slege man horte	vf helmen alse luot
daz si von wnden brahten	daz vliezende blvot
er ist in allen tugenden	ein ritter kvn vn– gvot
Da hat ovch vil begangen	von Mezzen Ortewin
swaz er ir mohte erlangen	mit den handen sin
die mvsen wnt beliben	oder meistich tot
da tet iwer bruder	die aller grozisten not
div immer in den stuormen	chvnde sin geschehn
man mvz der warheite	den vzerwelten iehn
die stolzen Burgonden	die habent so gevarn
daz si vor allen schanden	ir ere chunnen wol bewarn
Man sach da vor ir handen	vil manigen satel bloz
da von den liehten swerten	daz velt vil lvt erdoz
die rechen von dem Rine	die habent so gestriten
daz ez ir vianden	wære bezzer vermiten
Die chunen Tronegære	die taten groziv leit
da man mit volches chreften	zv zein ander reit
da vrumte manigen toten	des chunen Hagenen hant
des vil ze sagene wære	her zer Burgonden lant
Sindolt vn– Hunolt	die Gernotes man
vn– Rvmolt der vil chune	die hantz so gvot getan
daz er Livdegere	mac immer wesn leit
daz er den minen herren	het ze Rine widerseit
Strit den aller hohsten	der inder da geschach
ze iungest vn– zem ersten	den ieman gesach
den tet vil willekliche	div Sifrides hant
er bringet riche gisel	in daz Guntheres lant
Die twanc mit sinen ellen	der wætlich man
des ovch der kunic Livdegast	schaden vil gewan
vn– ovch von den Sahsen	der chune Livdeger
nv horet miniv mære	vil edeliv kuniginne her
Si hat gevangen beide	div Sifrides hant
ez enwart nie meniger gisel	braht in dizze lant
so nv von sinen schulden	chumet an den Rin
ir enchunden disiv mære	nimmer lieber gesin
Man bringet der gesunden	fvnf hvndert oder baz
vn– der verchwnden	frowe	wizzet daz
wol ahzech roze bære	in Burgonden lant
die meistech hat verhowen	des chunen Sifrides hant
Die durch ir vbermveten	widersageten an den Rin
die mvzen nv gevangen	die Guntheres sin
die bringet man mit frevden	her in dizze lant
do erblvet ir liehtiv varwe	do si div mære reht ervant
Ez wart ir lieth antlvzze	vor liebe rosen rot
do mit [10r]liebe was gescheiden	vz der grozen not
der minneklich reche	Sivrit der iunge man
si vrevt ovch sich ir friunde	daz was von schulden getan
Do sprach div minnekliche	dv hast mir wol geseit
dv solt haben dar vmbe	ze miete richiv kleit
vn– zehn march von golde	heiz ich dir tragen
des mag man solchiv mære	richen frowen gern sagen
Man gab im sine miete	daz golt vn– ovch div chleit
do gie an div venster	vil manic schoniv meit
si warten vf die straze	riten man do vant
vil der hochgemvten	in der Burgonden lant
Da chomen die gesunden	die wnden taten sam
si mohten grvzen horen	von vriunden ane scham
der wirt gein sinen gesten	vil vrolichen reit
mit vreuden was verendet	daz sin vil grozliche leit
Do enpfie er wol die sine	die vremden tet er sam
wan dem richen kunige	anders niht enzam
wan danchen gvetliche	die im warn chomen
daz si den sige nach eren	in stvrme heten genomen
Gvnther bat <im> mere	von sinen frivnden sagen
wer im an der reise	ze tode wær irslagen
do het er vlorn niem	niwan sehzech man
verklagen man die mvse	so sit nach heleden ist getan
Di gesunden brahten	verhowen manigen rant
vn– helme vil verschroten	in Guntheres lant
si stunden von den rossen	nider fur den sal
ze liebem antpfange	man horte vrolichen schal
Do hiez man herbergen	die wegemvden man
der kunic sinen gesten	danchen vil began
er hiez der wnden hveten	vn– schaffen in gemach
wol man sine tvgende	an sinen vianden sach
Er sprach ze Livdegere	nv sit mir willechomen
ich han von iwern schulden	schaden vil genomen
der wirt mir nv gebvzet	ob ich gelucke han
got lone minen frivnden	si hant mir liebe getan
Ir mvgt in gerne danchen	sprach do Livdegere
also hoher gisel	gewan nie kunic mere
vmbe schone hvte	wir bieten michel gvot
daz ir genædechliche	an mir vn– minen frivnden tvot
Ich wil ivch ledech lazen	sprach der kunic gen
daz mine viande	hie bi mir besten
des wil ich haben burgen	daz si miniv lant
iht rvemen ane hulde	des sichert do ir beder hant
Man brahte si ze rowe	vn– schvf in gvt gemach
den wnden man gebettet	vil gvtlichen sach
man schancte den gesunden	met vn– gvten win
do chunde daz gesinde	nimmer vrolicher sin
Ir zerhowen schilde	man behalten trvoch
blvtiger sætele	der was da genvoch
die hiez man ovch verbergen	daz weinten niht div wip
do chom hermvede	vil maniges chunen ritters lip
Der wirt pflac siner geste	vil grozliche wol
der vremden vn– der chunden	was daz lant so vol
man hiez der sere wnden	vil gvtliche pflegn
do was ir vbermveten	vil harte ringe [10v]gelegn
Die ercznie chunden	den bot man grozen scholt
silber ane wage	daz zvo daz liehte golt
daz si die helde nerten	nach des strites not
dar zvo der kunic den gesten	gabe grozlich bot
Die wider heim ze hvse	der reise heten mvot
die bat noch beliben	also man friunde tvot
der kunic gie ze rate	wier lonte sinen man
si heten sinen willen	nach grozen eren getan
Do sprach der herre Gernot	man sol si riten lan
vber sehs wochen	si in daz chunt getan
daz si chomen widere	zeiner hochgecite
so ist maniger geheilet	der nv vil sere wnd lit
Do gert ovch vrlovbes	der helt von Niderlant
do der kunic Gvnther	den willen sin ervant
er bat in minnekliche	noch bi im bestan
wan durch Chriemhilde	so wær ez nimmer getan
Dar zvo was er ze riche	daz er iht næme solt
er het daz wol verdienet	der kunic was im holt
sam waren sine mage	die heten daz gesehn
waz von sinem ellen	in dem stvrme was geschehn
Durch der schonen willen	gedaht noch bestan
die er vil gern sehe	sit wart ez getan
al nach sinem mvote	si warde im wol bechant
sit reit er vroliche	heim in sines vater lant
Der wirt hiez zallen citen	ritterschefte pflegn
daz tet do willechliche	vil manic iunger degn
die wil hiez er sidelen	vor Wormze an den sant
den	die im chomen solden	zv den Burgonden lant
In den selben citen	do si nv solden chomen
do het div vrowe Chriemh'	div mære wol vernomen
er wolde hochgeciten	mit magen vn– man
do wart vil michil vlizen	von schonen vrowen getan
mit wæte vn– mit gebende	daz si solden tragen
Vte div vil riche	div mære horte sagn
von den stolzen degenen	die da solden chomen
do wart vz der valde	gvter wæte vil genomen
Durch ir kinde liebe	hiez si do sniden kleit
da mit wart gezieret	vil frowen vn– manic meit
vn– vil der iungen rechen	vz Burgonden lant
da wart ovch vil der vremden	bereitet herlich gewant 