<Do> rief von Tenemarche	der marcgrave Irinch
ich han vferelazen	nv lange miniv dinch
vn– han in volches stvermen	des besten vil getan
nv brinch mir min gewæfen	ia wil ich Hagenen bestan
Daz wil ich widerraten	sprach do Hagene
so gewinnent iwer mage	mer ze klagene
gespringent iwer zwene	oder dri zvo mir her in
ist daz si min erbitent	si scheident schedeliche hin
<Darvmbe> ihz niht enlaze	sprach aber Irinch
ich han ovch ê versvchet	sam sorchlichiv dinc
ia wil ich mit dem swerte	aleine dich bestan
ob dv mit strite hetest	mer danne iemen getan
Do wart gewafent Irinch	nach <ritterlichem> sit
alsam wart von Dvrigen	der lantgrave Irnfrit
vn– Hawart der starche	wol mit tvsent man
swes Irinch begvnde	si woldens alle im gestan
Do sach der videlære	eine groze schar
die mit Iringe	gewafent chomen dar
si trvgen vf gebvnden	vil manigen helm gvot
des wart der chvne Volker	[75r]ein teil vil zornic gemvot
Er sprach	seht ir	Hagene	dort Iringen gan
der ivch hie mit dem swerte	lobt eine bestan
wie zimt helede lvgene	ich wil vnprisen daz
ez gent mit im gewafent	wol tvsent rechen oder baz
Nv heizet mich niht liegen	sprach Hawartes man
ich wil ez leisten gerne	swaz ich gelobet han
dvrch deheine vorhte	wil ihs abe gan
wie vreislich nv si Hagene	vzer Bvrgonden lant
Doch bat er si so lange	daz ez sit geschach
do daz ingesinde	den willen sin ersach
daz er warp nach eren	do liezen si in gan
do wart ein grimmez striten	von in beiden da getan
Irinch der vil starche	hohe erbvrt den ger
den schilt er fvr sich zvchte	der tivr degen her
do lief vz zv Hagene	vaste fvr den sal
do hvop sich von den degenen	ein vil grozlicher schal
Do schvzzen si die gere	mit chreften von der hant
dvrch die vil vesten schilde	vf liehtez ir gewant
daz die gerstangen	vil hohe dræten dan
do griefen zv den swerten	die vil grimme chvnen man
Des starchen Hagenen ellen	was in vnmazen groz
ovch slvg vf <in> Irinch	daz al div bvrch erdoz
Palas vn– Tverne	erhullen nach ir slegen
done chunde niht verenden	des sinen willen der degen
Irinch lie do Hagenen	vnverwndet stan
zvo dem videlære	gahen er began
er wande in solde twingen	mit den grimmen slegen
sich chunde wol beschirmen	der vil zierliche degen
Do slvoc der videlære	daz vber schildes rant
dræte daz gespenge	von Volkers hant

den liez er do beliben	ein was ein vbel man
er lief den kunic Gvnther	da von Buregonden an
Do was ir ietwedere	ze strite starch genvoc
swaz Gunther on Irinch	vf ein ander slvoch
daz enbrahte niht von wnden	dar vliezende blvot
daz behvote ir gewæfen	daz was veste vn– gvot
Gvnthern er lie beliben	Gernoten lief er an
daz fivr vzen ringen	er howen im began
do hete von Bvregonden	der starche Gernot
den chvnen Iringin	vil nach gesendet in den tot
Do spranger von dem fvrsten	snel er was genvoc
der Bvrgonden viere	der helt vil schiere slvoc
des edeln ingesindes	von Wormez vber Rin
done chunde Giselhere	zornær nimmer gesin
Gote weiz	her Irinch	sprach Giselher daz kint
ir mvzet mir die gelten	die veige vor iv sint
gelegen hie ze stvnden	do lief er in an
er slvoc den Tenemarche	daz er strvchen began
Er schoz vor sinen fvezen	nider in daz blvot
daz si alle wolden wænen	daz der helt gvot
ze strite nimmer mere	geslvge cheinen slac
Irinch noch ane wnden	hie vor Giselhere lac	[75v]
Von des helmes doze	vn– von des swertes chlanc
wæren sine wizze	worden also chranc
daz sich der degen Irinch	des lebenes niht versan
daz het mit siner sterche	der chvne Giselher getan
Do im begunde wichen	von hovbte der doz
von helm vn– ovch von swerte	der was gewesen groz
er dahte	ih bin noch lebnde	min lip ist ninder wnt
nv ist mir aller erste	daz ellen Giselhers kvnt
Do horter beidenhalben	die viande stan
heten siz gewisset	im wære mer getan
ovch het er Giselhere	da bi im vernomen
er dahte wie er solde	mit dem libe dannen chomen
Wie rehte tobeliche	er vzem blvote spranch
der siner snelheite	er mohte <danch>
do lief er vzem hvose	da er aber Hagenen vant
vn– slvg im slege swinde	mit siner ellenthafter hant
Do gedaht ovch Hagene	dv solt der mine wesen
dich enner der vbel tivfel	dv enchanst nv niht genesen
doch wndet Irinch Hagenen	dvrch sinen helmhvot
daz tet der helt mit Wasechen	daz was ein wafen also gvot
Do der grimme Hagene	der wnden enpfant
do erwaget im vngefvege	daz swert an siner hant
al da mvose im entwichen	der Hawartes man
zetal von dem hvse	Hagen volgen im began
Irinch vber hovbet	den schilt vil balde swanc
vn– wær div selbe stiege	drier stiegen lanch
done liez in Hagene	slahen deheinen slac
hey waz roter vanchen	ob sime helme gelac
Do sahen sine frivnde	Iringen noch gesvnt
do wrden disiv mære	Chriemh' chvnt
waz er dem von Tronege	mit strite hete getan
desim div chuniginne	hohe danchen began
Nv lone dir got	Irinch	vil mærrer helt gvot
dv hast mir wol getrostet	daz herce vn– ovch den mvot
nv sihe ich Hagene rotez	von blvte sin gewant
do nam si im selbe	den schilt vor liebe von der hant
Ir mvgt im maze danchen	sprach do Hagene
ia ist noch harte chleine	da von ze sagene
vn– wolt erz noch versvchen	so wær er chven ein man
div wnde frvmt ivch chleine	die ich von im gewnnen han
Daz ir von miner wnden	die ringe sehet rot
daz hat mich erreizet	vf maniges mannes tot
ich bin alrerste erzvrnet	vf in vn– manigen man
mir hat der degen Irinch	schaden chleinen noch getan
Do stvnt gegen dem winde	Irinch von Tenelant
er chvlte sich in ringen	den helm er abe gebant
do sprachen al die lvte	sin ellen wære gvot
des het der marcgrave	von schulden <hohen> mvot
Irinch der vil chvene	sinen frivnden sagte daz
nv wafent mich vil balde	ich wilz versvchen baz
ob ich noch mvge betwingen	den vbermveten [76r]man
sin schilt der was verhowen	einen bezzern er gewan
Vil schiere wart der reche	aber gewafent baz
vn– einen ger vil starchen	den nam er vf den haz
daz er da mite Hagenen	wolde noch bestan
ez wær im frvom vn– ere	ob erz hete nv verlan
Sin mohte niht erbiten	Hagene der degen
do lief er im engegene	mit stichen vn– mit slegen
der stiege vnze an ein ende	sin zvrnen daz was groz
Irinch siner sterche	harte wenic do genoz
Si slvogen dvrch die schilde	deiz lovgen began
von vivr roten winden	der Hawartes man
wart von Hagenen swerte	vil kreftiklichen wnt
dvrch schilt vn– dvrch die brvenne	des er wart nimmer mer gesvnt
Do der degen Irinch	der wnden enpfant
den schilt er baz bedachte	vber div helmbant
des schaden in dvht der volle	den er da gewan
sit tet im noch mere	der vil vbermvete man
Hagen vor sinen fvzen	einen ger er ligen vant
do schoz er Iringen	den helt von Tenelant
daz im von dem hovbte	der gere ragete dan
im het der vbermvete	den grimmen ende getan
Irinch mvse wichen	zv den von Tenelant
e daz man do dem degene	dem helm ab gebant
den ger man brach von hbet	do nahet im der tot
daz weinten sine mage	des gie in wærliche not
Chriemh' div frowe	chlagen ovch began
den chvnen Iringen	den schadehaften man
si weinte sine wnden	wande ez was ir leit
do sprach vor sinen magen	der snelle reche gemeit
Lat iwer klage beliben	vil herlichez wip
waz hilfet iwer weinen	ia mvoz <ich> minen lip
verliesen von den wnden	die ich enpfangen han
der tot wil mich niht dienen	iv vn– Ezeln lan
Er sprach zv den von Dvrigen	vnt den von Tenelant
die gabe sol enpfahen	iwer deheines hant
von der kvniginne	ir liehtez golt so rot
vn– bestet ir Hagenen	ir mvzet liden den tot
Sin varwe was erblichen	des todes zeichen trvoc
Irinch der chvene	daz was in leit genvoc
genesen niht enchunde	der Hawartes man
do mvos ez an ein striten	von den sinen frivnden gan
Irnfrit vn– Hawart	die sprvngen fvr daz gadem
wol mit tvsent heleden	vil vngefvgen chradem
hort man allenthalben	vil chreftechlichen groz
hey waz man starcher gere	vf die Bvrgonde schoz
Irnvrit der herre	lief an den spileman
des er schaden grozen	von siner hant gewan
der chvene videlære	den lantgraven slvoc
dvrch einen helm vesten	ia was er grimme genvoc
Do slvoc der lantgrave	den chvnen spileman
daz im mvsen bresten	ringes gespan	[76v]
vn– daz sich beschvtte	div prvenne fivr rot
do vil lantgrave	vor dem vidælære tot
Hawart vn– Hagene	zesamne warn chomen
er mohte wnder chiesen	ders hete war genomen
div swert genote vielen	den rechen an der hant
Hawart mvose ersterben	von dem vz Bvrgonde lant
Die Durigen vn– die Tenen	ir herren sahen tot
do hvop sich vor dem hvose	ein vil grimmiv not
ê si die tvr gewnnen	mit ellenthafter hant
des wart da verhowen	vil manic helm vn– rant
Wichet	sprach do Volker	lat si her in gan
ez ist svs vnverendet	des si da habent wan
si mvzen drinne ersterben	in vil chvrcer zit
si arnent mit dem tode	daz in div kvniginne git
Do die vbermveten	chomen in den sal
manigem wart daz hovbet	geneiget so zetal
daz er mvse ersterben	von ir grimmen slegen
wol streit der chvne Gernot	sam tet ovch Giselher der degen
Tvsent vn– viere	die chomen dar in
die erzeigten drinne schiere	ir degenlichen sin
si wrden von den gesten	alle zehant erslagen
man mohte michel wnder	von den Burgonden sagen
Dar nach wart ein stille	daz der schal verdoz
daz blvot do allenthalben	dvrch div locher vloz
vn– da zen rigelsteinen	von den chvnen man
daz heten die von Rine	mit grozem ellen getan
Do sazen aber rvowen	die chomen in daz lant
ir schilde vnt wafen	si leiten von der hant
do stvnt noch vor dem hvose	der chvne spileman
ob iemen zvo zin wolde	mit strite zvo dem sale gan
Der chvnic klagte sere	sam tet ovch sin wip
mægde vn– frowen	die qvelten ovch den lip
ich wæne des	daz hete	der tot vf si gesworn
des wart noch vil der degene	von den gesten verlorn