<Nv> bindet abe die helme	sprach do Hagene
ia lazen wir den Hvnen	so vil ze chlagene
daz si der hochgecite	vergezzent nimmer hie
waz hilfet nv Chriemh'	daz si vns ze Rine niht enlie
Do entwaffent da dez hovbet	manic ritter gvot
si sazen vf den veigen	die vor in in daz blvot
waren in dem strite	mit dem tode chomen
sit wart der Ezeln geste	vil vbel govme genomen
Vor abendes zite	geschvof der kunic daz
vn– ovch div kvniginne	daz iz versvochten baz
die hvnischen rechen	dvrch der geste leit
des man an si gerte	die helde warens bereit
Sich hvob ein stvrme herte	hier vz vn– ovch dar in
Danchwart	[77r]Hagenen brvoder	dvrch degenlichen sin
spranch vor sinen herren	zen vinden vz der <tvr>
sich versahen sines todes	er chom gesunder wol dar fvor
Der herte strit do werte	vnz iz div naht benam
do werten sich die geste	als iz in wol gezam
den Ezeln degenen	den svmerlangen tac
hey waz noch der helede	vor in veige gelac
Zeinen svnewenden	der groze mort geschach
daz div kuniginne	ir hercenleit errach
an ir næhsten magen	vn– svs an manigem man
da von der kvnec Ezele	vil manigen <siechchen> gewan
Sine het der grozen slahte	also niht gedaht
si het ez in ir ahte	vil gerne dar zvo brahte
daz niwan Hagene aleine	den lip da hete lan
do geschvof der vbel tivfel	deiz vber si alle mvose ergan
In was des tages zerrvnnen	do gie in sorgen not
si gedahten daz in bezzer	wær ein kurcer tot
denne lange da ze qvelne	vf vngefvegiv leit
eins vrides si do gerten	die stolzen ritter gemeit
Si baten daz man bræhte	Ezelen dar
die blvotvarwen degene	vn– schone harnasch var
traten vz dem hvse	die drie kvnige her
sine wessen wem ze klagene	div ir vil grozlichen ser
Ezel vn– Chriemh'	die chomen beide dar
daz lant daz was ir eigen	des merte sich ir schar
er sprach zv den kunigen	sagt	waz welt ir min
ir wênet vride gewinnen	daz chvnde mvelich gesin
vf schaden also grozen	als ir mir habt getan
irn svltes niht geniezen	sol ich min lebn han
min kint daz ir mir slvoget	vnde vil der mage min
des ensol mit sime lebene	iwer deheiner chomen hin
Des antwrte Gvnther	des twanch vns starchiv not
allez min gesinde	lac von den dinen tot
an den herbergen	wie het ich daz versolt
ich chom zv dir vf triwe	vn– wande daz dv mir wærest holt
Do sprach von Bvrgonden	Giselher daz kint
ir Ezeln rechen	die noch hie lebende sint
waz wizet ir mir	degene	waz han ich iv getan
wande ich vil minnekliche	in dizze lant geriten han
Si sprachen	diner gvete	ist al div bvrch vol
mit iamer zv dem lande	ia gvnden wir dir wol
daz dv nie chomen wærest	von Wormez vber Rin
diz lant ist gar verweiset	von dir vn– ovch den magen din
Do sprach in zornes mvote	Gvnther der degen
welt ir dizze starchez hazzen	zeiner svone legen
mit vns vil ellenden	deist beidenthalben gvot
ez ist gar ane schulde	swaz vns Ezele getvot
Do sprach der wirt zen gesten	min un– iwer leit
div sint [77v]vil vngeliche	div michel arebeit
des scaden zv den schanden	die ich han genomen
des sol iv deheiner	mit dem libe hinnen chomen
Do sprach zv dem kunige	Gernot der hochgemvot
so sol iv got gebieten	daz ir wol tvot
wichet von dem hvose	vn– lat vns zvo ziv gan
sit wir zv dem lebene	haben also chleinen wan
Swaz vns geschehn chvenne	daz lazet chvrz ergan
ir habt so vil gesvndr	vn– tvrrens vns bestan
daz si vns stvrmen mvede	lazent niht genesen
sit daz ist vnwendech	wir mvzen hie verderbet wesen
Die Ezeln rechen	die heten ez nach getan
<daz> si se vz dem hvse	wolden lazen gan
do daz gehorte Chriemh'	ez was ir grimme leit
des wart den ellenden	do der vride widerseit
Neina	Hvnen rechen	des ir da habet mvot
ich rat an rehten triwen	daz ir des niene tvot
daz ir die mortrechen	iht lazet fvr den sal
so mvsen iwer frivnde	liden totlichen val
Ob ir nv niemen lebte	niwan div voten kint
die minen edeln brveder	vn– chomens an den wint
erchvlten in die ringe	so sit ir <alle> verlorn
ez enwrden chvner degene	nie zer werlde geborn
Do sprach der herre Giselher	vil liebiv swester min
wie mohte ich des getrowen	do dv mich vber Rin
so minneklichen ladetes	her in dizze lant
daz mir so grozer chumber	solde werden hie bechant
Ich was dir ie getriwe	nie getet ich dir leit
vf solhen gedingen	ich her ze hove reit
daz dv min frivnt wærest	vil edeliv swester min
begench an vns genade	sit ez niht anders kan gesin
Ine mag iv niht genaden	vngenade ich han
mir hat von Tronege Hagene	so leide getan
da heime	vn– hie ze lande	slvoger mir min kint
des mvzen sere engelten	die mit iv da her chomen sint
Welt aber ir mir ze gisel	den min vint geben
sone wil ichz niht versprechen	ichn welle ivch lazen leben
wan ir sit min brvoder	vn– einer mvoter chint
so rede ihz zeiner svone	mit disen rechen die hie sint
Nvne welle got von himele	sprach do Gernot
ob vnser tvsent wæren	wir legen alle tot
der sippen diner mage	ê wir dir einen man
gæben hie ze gisel	ez wirdet nimmer getan
Wir mvesen doch ersterben	sprach do Giselher
vns enscheidet niemen	von ritterlicher wer
swer gerne mit vns strite	wir sin et aber hie
wande ich der minen frivnde	an triwen nie deheinen lie
Do sprach der chvene Danchwart	fvr die degene	[78r]
iane stet noh niht eine	min brvoder Hagene
die hie den vride versprechent	ez mag in werden leit
des bringen wir ivch innen	daz si iv wêrlich geseit
Do sprach div kvniginne	ir helde vil gemeit
nv get der stiegen naher	vn– rechet vnser leit
daz wil ich immer dienen	als ich von rehte sol
der Hagenen vber mvete	der gelon ich im wol
Springet zv dem hvse	ir rechen	vber al
so heiz ich vieren enden	zvnden an den sal
so werdent wol errochen	elliv vnser leit
die Ezelen degene	die wrden schiere bereit
Die noch hier vzen stvnden	die triben si dar in
mit slegen vn– mit schvzzen	wider in den palas hin
sich wolden nie gescheiden	die fursten vn– ir man
sine mohten von ir triwen	niht ein ander verlan
Den sal hiez do zvnden	daz Ezeln wip
do qvelte man den rechen	mit fivre da den lip
daz hvos von einem winde	mit chraft vil hohe enbran
ich wæn ie volch deheinez	grozer angest mer gewan
Genvge rvften drinne	owe dirre not
wir mohten michel gerner	sin in stvrme tot
daz mvze got erbarmen	wie vlisen wir den lip
nv richet vngefvoge	ir zorn an vns des kvniges wip
Ir einer sprach dar inne	wir mvzen ligen tot
vor rovche vn– ovch vor hizze	deist ein grimmiv not
mir tvot vor starcher hizze	der dvrst so rehte we
des <wen> min leben schiere	in disen sorgen zerge
Do sprach von Tronege Hagene	ir edeln ritter gvot
swen der dvrste nv twinge	der trinche hie daz blvot
daz ist in solhen noten	noch bezzer danne win
fvr trinchen vn– fvr spise	kan niht anders nv gesin
Do gie der rechen einer	do er einen toten vant
er kniet im zv der wnden	den helm er abe gebant
do begvnder trinchen	daz vliezende blvot
swie vngewon er des wære	ez dvhte in groezlichen gvot
Nv lon iv got von himele	sprach der mvde man
daz ich von ivrem rate	so wol getrvnchen han
mir ist geschenchet selten	dehein bezzer win
leb ich deheine wile	ich sol ez dienende sin
Do dandern daz gehorten	daz ez in dvhte gvot
do wart ir michel mere	die trvnchen ovch daz blvot
da von begunde chreften	der gvten rechen lip
des engalt an lieben frivnden	sit vil manic schone wip
Daz fivr <viel> genote	zvo zin in den sal
do leitten siz mit schilden	von in hin zetal
der rovch vn– ovch div hizze	in beidiv taten we
ia wæn ez an heleden	der iamer immer mer erge
Do sprach von Tronege Hagene	stet zv des sales want
lat niht die [78v]brende vallen	vf iwer helmbant
vn– tret si mit den fvzen	tieferin daz blvot
ez ist ein vbel hochgecit	die vns div kvneginne tvot
In svs getanen leiden	in iedoch der naht zerran
noch stvnden vor dem hvse	die zwene chvne man
Volker vn– Hagene	geleinet vber rant
si hvten ir gesindes	vzer Burgonden lant
Die geste half daz sere	daz der sal gewelbet was
da von ir deste mere	in der not genas
wan daz si zen venstern	von fivre liten not
do nerten sich die degene	als in ir ellen daz gebot
Do sprach der videlære	nv ge wir in den sal
so wellent die Hvnen	wenen vber al
wir sin in not erstorben	div an vns ist getan
si sehent vns begegene	noch ir eteslichen gan
Do sprach von Bvrgonden	Giselher daz kint
ich wæn ez tagen welle	sich hebt ein chveler wint
nv laze vns got von himele	noch lieber cit geleben
vns hat min swester Chriemh'	ein arge hochgecite gegebn
Do sprach aber einer	ich chivse nv den tac
sit daz ez vns bezzer	wesn nine mac
so bereitet ir ivch	rechen	ze strite	deist vns not
wir chomen doch nimmer hinnen	daz wir mit eren ligen tot
Der chvnich wolde wænen	die geste wæren tot
vn– ovch div kuniginne	von des fivres not
do lebt ir noch dar inne	sehs hundert chvner man
daz nie kunec deheiner	bezzer degene gewan
Der ellenden hvote	hete wol ersehen
daz noch die geste lebten	swie vil in was geschehen
ze schaden vn– ze leide	den kvnigen vn– ir man
man sah ir noch genvoge	vil wol <gesunt> dort inne stan
Man sagt der kuniginne	ir wære vil genesen
do sprach div frowe here	daz enchvnde nimmer wesen
<daz> ir deheiner lebte	in des fivres not
ich wil des baz getrowen	daz si alle ligen tot
Noch genæsen gerne	die fvrsten vn– ir man
ob in iemen hæte	genade da getan
den kunden si niht vinden	an den von Hvnen lant
do rachen si ir sterben	mit vil willechlicher hant
Vil frvo wider morgen	grvzen man in bot
mit starchem vrlivge	des chomen helde in not
do wart zvo zin geschozzin	vil manic scharpfer ger
noch fvnden si dar inne	ze wer die reehen also her
Dem Ezeln gesinde	erwegt was der mvot
si wolden vaste dienen	daz Chriemh' gvot
dar zv si wolden leisten	daz in der kvnec gebot
des chomen aber die degene	in vil angestliche not
Uon geheize vn– ovch von gabe	man mohte wnder sagen
dar hi[79r]ez si golt daz rote	in den schilden tragen
si gab ez swer sin rvochte	vnde ez wolde enpfan
iane wart nie grozer solden	mer vf vinde getan
Ein michel chraft der rechen	dar zv gewafent gie
do sprach der videlære	wir sin et aber hie
ine gesach zem tode	nie helde gerner chomen
die daz golt des kuniges	vns ze vare hant genomen
Do riefen ir genvge	naher	helede	baz
daz wir da svlen enden	vn– tvon bezite daz
hie belibet niemen	wan doch der sterben sol
do sahe man schiere ir schilde	stechen gerschvzze vol
Waz inag ich sagen mere	wol zwelf hvndert man
versvhten ez vil sere	wider vn– dan
do chvlten an den vinden	die geste wol ir mvot
ez enmohte niemen scheiden	des sah man vliezen daz blvot
von verchtiefen wnden	der wart da vil geslagen
do horte man genvoge	nach ir <frivnden> chlagen
die frvmen stvrben alle	dem richen kvnige her
des heten holde mage	nach in iamer vn– ser