Do> der chunic Gvnther	so vil der burge sach
vn– ovch die witen marche	wie balder do sprach
sagt mir	frivnt Sivrit	ist iv daz bechant
wes sint dise burge	vn– ovch daz herliche lant
Ine han bi minen ziten	ine wolde lvge iehn
so wol erbowen burge	mere nie gesehen
in deheinem ein lande	als ir hie vor uns stat
er mach wol wesen riche	der si hie gebowen hat
Des antwrt Sifrit	ez ist mir wol bekant	[15v]
ez ist frown Prvnhilt	livt vn– lant
vn– Isenstein div veste	als <ir> mich hortet iehen
da mvget ir noch hivte	schoner frowen vil gesehn
Vn– wil iv helden raten	ir habt einen mvot
daz wir iehn geliche	ia dvnchet ez mich gvot
swenne wir noh hivte	fvr Prvnhilde gan
so mvzen wir mit sorgen	for der kuniginnestan
So wir die minneklichen	bi ir gesinde sehn
so svlt ir	helede gvote	wan einer rede iehen
Gunther si min herre	ich si sin eigen man
so mag unser wille	harte wol an ir ergan
Des waren si bereite	swaz er si loben hiez
durch ir vbermvete	deheiner ez niht liez
si iahen swes er wolde	da von in wol geschach
do der kunic Gvnther	die schonen Prvnhilde sach
Ich enlob ez niht so verre	durch den willen din
so durch Chriemh'	daz schone magedin
div ist mir sam min sele	vn– so min eigen lip
ich wil daz gerne dienen	daz si werde min wip
In den selben citen	do was ir schiff gegan
der burge also nahenn	do sach der kunic stan
oben in den venstern	vil manige schone meit
do begunde vragen	der reche kvene vn– gemeit
Saget mir	frivnt Sifrit	durch den willen min
bekennet ir die frowen	vn– ovch div magedin
di dort her nider schowent	zvo zvns vf die flvot
si gebarent dem geliche	daz si hohe sint gemvot
Do sprach der chune Sifrit	ir svlt von hinnen spehn
tovgen in dem mvote	vn– svlt mir danne iehn
welhe ir nemen woldet	hetet irs gewalt
daz tvn ich	sprach do Gunther	der ritter chven vn– balt
So sihe ih vnder in eine	in ienem venster stan
in snewizer wæte	div ist so wolgetan
die wellent miniv ovgen	vil schoen ist <ir> der lip
ob ich gewalt des hæte	si mvse werden min wip
Dir hat erwelt vil rehte	diner ovgen schin
ez ist div starche Prvnhilt	daz schone magedin
die din herce minnet	der lip vn– ovch der mvot
elliv ir geberde	div dvhte Guntheren gvot
Do hiez div kuniginne	vz den venstern stan
ir minneklichen meide	sine solden niht da stan
den vremden an ze sehene	des waren si bereit
waz do die frowen tæten	daz ist vns sider ovch geseit
Gegen den vnchunden	strichen si ir lip
des ie site habeten	div wætlichen wip
an div engen venster	chomen si gegan
da si die rechen sahen	daz wart durch schowen getan
Ir waren niwan viere	di da chomen in daz lant
Sifrit der starche	ein ross zoch an der hant
daz sahen durch div venster	div minneklichen wip
des wart sit getivret	des kunic Guntheres lip
Er habt im da bi zovme	daz zierliche march
gvot vn– schone	vil michel vn– starch
vnze der kunic Gvnther	in den satel gesaz
also dient im Sifrit	des er doch sit vil gar vergaz
Do zoh er ovch daz sine	von dem schiffe dan
er hete solhen dienest	selten ê getan
daz er den stegereif	gehabt ie helede mer
daz sahen durch div venster	[16r]die frowen schoen vn– her
Reht in einer maze	den rittern vil gemeit
von sneblancher varwe	ir ross vn– ovch ir kleit
ez waren vil geliche	ir schilde wolgetan
die luhten von den handen	den vil wætlichen man
Ir sætele wol gesteinet	ir fvrbuoge smal
si riten herlichen	fvr <Prunhilde> sal
dar an so hiengen schellen	von liehtem golde rot
si chomen zv dem lande	als ez ir ellen in gebot
Mit spern niwo sliffen	mit swerten wol getan
div uf die sporn giengen	den wætlichen man
div fvrten die vil chvenen	scharpf vn– dar zv breit
daz sach allez Prvnh'	div vil minnekliche meit
Mit im chom ovch Danchwart	vn– Hagene
nv hoeret disiv mære	wie die degene
von rabenswarzer varwe	truogen richiv kleit
ir schilde waren schone	vil gvot	michel vn– breit
Von India dem lande	man sach si steine tragen
die chos man an ir wete	vil herliche wagen
sie liezen ane hvote	ir schiffel bi der flvot
svs riten zv der burge	die helde chuon vn– gvot
Sehs un– ahzech tuorne	si sahen drinne stan
dri palas wite	vn– einen sal wolgetan
von edelm marmelsteine	grven alsam ein gras
dar inne div kuniginne	mit ir ingesinde was
Div porte stvnt entslozzen	div bvrch vf getan
do liefen in engegene	die Prvnh' man
vn– enpfiengen wol die chvenen	in ir frowen lant
ir ross man hiez behalten	vn– ir schilde von der hant
Do sprach ein kamerære	ir svlt uns geben div swert
vn– ovch die liehten brvenne	des sit ir vngewert
sprach Hagene der chuone	wir selbe wellens tragen
do begunde in Sifrit	da von div rehten mære sagn
Man pfligt in dirre burge	daz wil ich iv sagen
daz decheine geste	hie waffen svln tragen
ir svlt si lan behalten	daz ist wolgetan
daz tet do vil ungerne	Hagen	der Gvntheres man
Den gesten hiez man schenchen	vn– schaffen ir gemach
vil manigen snellen rechen	man da ze hove sach
in fvrstenlicher wæte	allenthalben gan
da wart michel schowen	an die vil chvenen getan
Do tet man Prvnhilde	chvnt mit mæren
daz da vremde rechen	chomen wæren
in vil richer wæte	gevlozzen vof der flvot
da von begunde vragen	div magt schoen vn– gvot
Ir svlt mich lazen hoeren	sprach div kunigin
wer die vil vnchvnden	rechen mvgin sin
die in miner bverge	so herliche stan
vn– durch welhe schulde	die helde her gevarn han
Do sprach ein ir gesinde	frowe	ich mach wol iehn
daz ich ir deheinen	nimere habe gesehn
wan geliche Sifride	einer drvnder stat
den svlt ir wol enpfahen	daz ist mit triwen min rat
Der ander der gesellen	der ist so lobelich
ob er gewalt des hete	wol wær er kunic rich
ob witen fursten landen	ob er div mohte han
man siht in bi den andern	so rehte herliche stan
Der dritte der gesellen	[16v]der ist vil <gremlich>
vn– doch mit schome libe	kuniginne rich
von <swinden> sinen blichen	der er so vil getvot
er ist in sinen sinnen	ich wæn	vil grimme gemvot
Der der iungest ist darvnder	der ist so lobelich
in magtlichen zvhten	sihe ich den degen rich
mit gvtem gelæze	so minnekliche stan
wir mohtenz fvrhten alle	het im hie iemen iht getan
Swie blide er pflege der zvhte	vn– swie schoen im si der lip
er moehte wol erweinen	vil wætlichiv wip
swenner begunde zvernen	sin lip ist so gestalt
er ist in allen tvgenden	ein degn chvene vn– balt
Do sprach div kuniginne	nv brinch mir min gewant
vn– ist der starche Sivrit	chomen in daz lant
durch willen miner minne	ez gat im an den lip
ine fvrht in niht so sere	daz ich werde sin wip
Do wart chuniginne	schiere wol gekleit
do gie mit ir dannen	vil manic schoniv meit
wol hundert vn– mere	gezieret was ir lip
ez wolden sehen die geste	div vilminneklichen wip
Da mit giengen rechen	vzer Islant
die Prvnhilde degene	die trvgen swert enhant
fvnf hundert oder mere	daz was den gesten leit
do stunden von dem sedele	die helde chven vn– gemeit
Do div kuniginne	Sifriden sach
div magt zvhtekliche	zv dem rechen sprach
sit willechomen	Sivrit	her in dizze lant
waz iwer reise meine	gern het ich daz erkant
Vil michel iwer genade	min vrov Prunhilt
daz ir mich rvchet grvzen	fversten tohter milt
vor diesem chvnem rechen	der hie vor mir stat
wander ist min herre	der eren het ich gerne rat
Er ist geborn von Rine	daz tvot er dir bechant
er hat durch dinen willen	gesvchet dizze lant
der wil dich gerne minnen	swaz im da von geschiht
nv bedenche dihs bezite	min herre erlêt dihs niht
Er ist geheizen Gunther	vn– ist ein kunic her
erwrber dine minne	sone engert er nihtes mer
ia gebot mir her ze varne	der reche wolgetan
wan daz ich entorste	ich hietez gerne verlan
Si sprach	ist er din herre	vi bistv sin man
div spil div ich im teile	vn– tarrer div bestan
behabt er des die maisterschaft	so minne ich sinen lip
anders mvz er sterben	ê ich werde sin wip
Do sprach von Tronege Hagene	frow	nv lat vns sehen
iwer spil div starchen	e daz iv mvse iehn
Gunther min herre	da mvsez herte sin
er mach noch wol gewinnen	ein also schone magedin
Den stein den sol er werfen	vn– springen dar nach
den ger mit mir schiezen	lat iv niht sin ze gach
des bedenchet ivch vil ebene	sprach daz vil schone wip
gebristet im an dem einen	ez get iv allen an den lip
Sifrit der starche	zv dem kunige trat
allen sinen willen	er in reden bat
mit der kuniginne	[17r]ez kunde im geschaden niht
ez wirt al anders gendet	des sich ir vbermvot versiht
< o> sprach der kunich Gunther	kuniginnne her
nv teilt swaz ir gebietet	vn– wære is dannoch mer
daz bestvnde ich alliz gerne	durch iwern schonen lip
min hovbet wil ich wagen	irn werdet min wip
Do div kuniginne	sine rede vernam
der spile bat si gahen	als ir do daz gezam
si hiez ir dar gewinnen	balde ir stritgewant
eine veste brvnne	vn– einen gvten schildes rant
Einn wafenhemde sidin	daz leit an sich div meit
daz in deheime strite	wafen nIe versneit
von pfelle vzer Libia	ez was vil wolgetan
von porten lieht gewerhte	daz sach man schinen daran
Die zit wart disen rechen	harte vil gedrevot
Danchwart vn– Hagene	die waren vngefrevot
wiez dem kunige ergienge	des sorget in der mvot
si dahten	unser reise	ist vns rechen niht zegvot
Die wile was ovch Sivrit	der listige man
e iz iemen erfunde	in daz schiff gegan
da er die tarnkappen	verborgen ligen vant
dar in slavf er vil schiere	do was er niemen bechant
Er ilte hin widere	do vant er rechen vil
da div kuniginne	teilte ir hohen spil
dar gie er tovgenliche	von listen daz geschach
alle die da waren	daz in da niemen gesach
Der rinch der was bezeiget	da soldez spil geschehn
vor manigem chvenem rechen	die daz solden sehn
mer danne sibenhundert	die sah man waffen tragen
swer daz spil gewnne	daz ez die helde solden sagen
Do was nv komen Prvnhilt	gewaffent man die vant
sam ob si striten solde	vmbe elliv kuniges lant
ia trvoch si ob den siden	vil manigen stahel zein
ir minneklichiv varwe	dar vnder herlichen schein
Do chom ovch ir gesinde	die trugen dar zehant
von vil rotem golde	einen liehten schildes rant
mit stahel herten spangen	vil michel vn– breit
dar vnder spilen wolde	div vil herliche meit
Der frowen schiltvezzel	ein edel porte was
dar vffe lagen steine	gruoner denne ein gras
die luhten maniger hande	mit schine wider daz golt
der si solde minnen	der het iz hohe <verscolt>
Der schilt was under bvkelen	als uns daz ist geseit
wol drier hende dicke	den tragen solde div meit
von stale vn– ovch von golde	rich er was genvoch
den ir kamerære	selbe vierder kvnne trvoch
Also der karche Hagene	den schilt dar tragen sach
in vil grozem unmvote	der helt von Tronege sprach
wie nv	kunic Gunther	wie vliesen wir den lip
der ir da gert ze minnen	div ist des valandes wip
Vernemt noch von ir wæte	der hete si genuoch
von Azagovch der siden	einen waffenroch si trvoch
vil edel un– vil riche	ab des varwe schein
von der kuniginne	vil manic herlicher stein
Do trvoch man dar der frowen	swære un– dar zvo groz
einen ger vil [17v]starchen	den si alle <zite> schoz
scarpf un– ungefvge	michel vn– breit
der ze sinen ecken	harte vreislichen sneit
Von des geres swære	hoeret wnder sagen
wol vierdehalbiv mæsse	was der zv geslagen
in trvgen chvme drie	Prvnhilde man
Gvnther der vil chuone	harte sorgen began
Er daht in sinem mvote	waz sol dizze wesen
der tivfel von der helle	wie kunder da vor genesen
vn– wær ich da ze Rine	mit dem libe min
si mveste hie vil lange	vri fon miner minne sin
Im was in sinen sorgen	daz wizzet	leit genvoch
allez sin gewæfen	man im einen trvoch
da wart der chunic riche	wol gewaffent in
vor leide het Hagene	vil nach verwandelt den sin
Do sprach von Burgonden	der chvene Danchwart
mich mvz immer riwen	disiv hovevart
nv hiezen wir ie rechen	wie verliesen wir den lip
sulen vns in disen landen	nv verderben div wip
Mich mvet daz harte sere	daz ich chom in daz lant
vn– hete min brvoder Hagene	sin waffen an der hant
vn– ovch ich daz mine	so nnohten sanfte gan
durch ir vbermvote	alle Prvnhilde man
Ich sage iv bi den triwen	si soldenz wol bewarn
vn– het ich tusint eide	zeinem fride geswarn
e daz ich sterben sæhe	den lieben herren min
ia mvesen lip verliesen	daz vil schoene magedin
Wir solden vngevangen	wol rvmen dizze lant
ich un– min brvoder Danchwart	heten wir daz gewant
des wir ze not bedurfen	vn– unser swert vil gvot
so wrde wol gesenftet	der frowen starchiv vbermvot
Wol hort div kuniginne	waz der degen sprach
mit smielendem mvnde	si vber ahsel sach
nv er dunche sich so biderbe	so tragt in ir gewant
vn– ir vil scharpfen waffen	gebt den rechen an die hant
Mir ist als mære	daz si gewaffent sint
als ob si bloze stuonden	so sprach div kunigin
ihen furhte niemens sterche	den ich noh habe bechant
ieh getrowe wol gedingen	in strite vor sin eines hant
Do si div swert gewnnen	also div magt gebot
der vil chuone <Dancwart>	wart von frevden rot
nv spilen swes si wellen	sprach der snelle man
Gunther ist vnbetwngen	sit daz wir unser wafen han
Div Prunhilde sterche	vil groezlichen schein
man braht ir zvo dem ringe	einen swæren mermilstein
groz un– vngefvge	michel vn– wel
in trvgen chvme zwelfe	helde chven vn– snel
Den warf si zallen citen	so si den ger verschoz
der Burgonden sorge	wrden harte groz
wafen	sprach do Hagene	waz hat der kunic zetrvot
ia soldes in der helle	sin des vbeln tivfels brvot
An vil wizen armen	si die ermil want
si begvnde sere vazzen	den schilt an der hant
den ger si hohe zvochte	do giengez an den strit
Gunther vn– Sivrit	die vorhten Prvnhilde nit
Wær im der starche Sifrit	niht schiere ze helfe chomen
so hete si dem kunige	sinen lip be[18r]nomen
er gie dar tovgenliche	vn– rvort im sine hant
Gvnther sine liste	vil harte sorekliche ervant
Waz hat mich gerveret	gedaht der chvne man
do sah er allenthalben	er vant da niemen stan
er sprach	ich bin ez Sivrit	der liebe <frivnt> din
vor der kuniginne	soltv gar ane angest sin
Den schilt gib mir von hende	den la dv mich tragen
vn– merche mine lere	die dv mich hoerest sagn
nv habe dv die geberde	div werch wil ich began
do er vernam div mêre	der kunic trosten sich began
Nv hil dv mine liste	daz ist uns beiden gvot
sone mach div kuniginne	ir <starchen> vbermvot
an dir niht verenden	des si doch willen hat
nv sich wie angestliche	si gein dir amme ringe stat
Do <schoz> vil chreftichliche	div vil starche meit
den ger gein eime schilde	michel vn– breit
den trvg an siner hende	daz <Sigelinde> kint
daz fiwr spranch von stale	alsam ez wæte der wimt
Des starchen geres snide	so dvrch den schilt gebrach
daz man daz fivr lovgen	vz den ringen sach
des schvzzes beide strvochten	die vil starchen man
si ertwelten si so sere	daz si den lip nach heten lan
Sivride dem vil chvnen	vom mvnde brast daz blvot
vil balde spranch er widere	do nam der helet gvot
den ger	den si geschozzen	im hete durch den rant
den frvmt ir do hin widere	sin vil ellenthaftiv hant
Er daht	ich wil niht schiezen	daz schone magedin
er kert des geres snide	hindern rvcke sin
mit der gerstangen	schoz si der chvne man
also chreftikliche	daz si strvochen began
Daz fivr stavb vz stale	sam iz tribe der wint
den schvoz schoz mit ellen	daz Sigelinde kint
sine mohte mit ir chreften	des schvzzes niht gestan
ez enhet der chunic Gunther	entriwen nimmer getan
Prvnhilt div schoene	wie balde si vf spranch
Gvnther	ritter edele	des schuzzes habe danch
si wande daz erz hete	mit siner hant getan
ir was dar nach geslichen	ein verre kreftiger man
Do gie si hin vil balde	zornich was ir mvot
den stein den hvop si hohe	div schone maget gvot
si swanch in kreftekliche	so verre von ir dan
daz sin die chvne degene	sere wndern began
Der stein der was gevallen	wol zwelf klafter dan
den wrf prach do mit sprunge	div maget wol getan
dar gie der herre Sifrit	da der stein gelach
Gunther in do wegete	der helt in werfene pflach
Sifrit was vil chune	dar zvo starch vn– lanch
den stein den warf er verrer	dar zvo er witer spranch
daz was ein michel wnder	vn– kunsteklich gench
daz er mit dem sprunge	den kunic Gunther doch trvch
Der sprvnch der was ergangen	der stein der was gelegen
do sah man ander niemen	wan Gunther den degn
Prvnhilt div schone	wart in zorne rot	[18v]
Sifrit het geverret	des kunich Guntheres tot
Zvo zir ingesinde	div kuniginne sprach
do si zent des ringes	den helt gesunden sach
vil balde get her naher	ir mage vn– mine man
ir svlt dem kunech Gunther	alle wesen vndertan
Do leiten die vil chvenen	div wafen von der hant
si bvten sich ze fvozen	vz Burgonden lant
Gunthere dem richen	vil manic chvner man
si wanden daz er hete	div spil mit siner chraft getan
Er grvoztes minnekliche	wander was tvgentrich
do nam in bi der hende	div magt lobelich
si erlovbt im daz er solde	haben da gewalt
des frevte sich do Hagene	der reche chven vn– balt
Si bat den ritter edele	mit ir dannen gan
in einen palas witen	da was vil manic man
durch vorhte manz dem degene	deste baz erbot
von Sifrides ellen	si waren chomen vozer not
Sifrit der snelle	wiser was genvoch
die sinen tarnkappen	er aber behalten trvoch
do gie er hin widere	da vil der frowen saz
er sprach zv dem chvnige	vn– tet vil chundekliche daz
Wes bitet ir	min herre	wan beginnet ir der spil
der iv div kuniginne	teilet also vil
vn– lazet vns daz schowen	wie div sin getan
sam ob er ir niht ensæhe	gebart der listige man
Do sprach div kvniginne	wie ist daz geschehn
<daz> ir habt	her Sifrit	der spil niht gesehn
div hie hat errungen	div Guntheres hant
des antwort ir Hagene	vozer Burgonden lant
Da het ir also sere	getrvebet vns den mvot
do was bi dem schiffe	Sifrit der helet gvot
do der vogt von Rine	daz spil an iv gewan
des ist ez im vnkundich	sprach do der Guntheres man
So wol mich dirre mære	sprach Sivrit der degn
daz iwer hochverten	ist alsus gelegn
daz iemen lebt so chvene	der iwer meister mvge gesin
nv svlt ir	maget edele	vns volgen hinnen an den Rin
Do sprach div chuniginne	des enchan noch niht ergan
ez mvzen ê bevinden	mage vn– mine man
iane mag ich also lihte	gervmen miniv lant
di mine hohsten frivnde	mvzen werden ê besant
Do hiez si boten riten	allenthalben dan
si besande alle ir friwnde	mage vn– man
die bat si chomen balde	ze hove in Islant
vn– hiez in gebn allen	rich vn– herlich gewant
Si riten tægeliche	spate vn– frvo
der Prvnh'burge	scharhafte zvo
iara ia sprach Hagene	waz haben wir getan
wir erbeiten hie vil vbele	der schonen Prvnhilde man
So si nv mit ir kreften	choment in daz lant
der Prvnhilde wille	ist vns vnbechant
waz ob si also zvrnet	daz wir sin verlorn
so ist vns div maget edele	ze grozen sorgen geborn
Do sprach der herre Sifrit	daz sol ich understen
des ir da habet sorge	des enlaz ich niht ergen
ich sol iv helfe bringen	her in dizze lant [19r]
vz erwelten degenen	di iv noch wrden ie bechant
Irn svlt nach mir niht vragem	ich wil hinnen varn
got mvz iwer ere	di zite wol bewarn
ich chvm vil schiere widere	vn– bringe iv tvsint man
der aller besten degene	der iemen chvnde gewan
Sone sit et niht ze lange	sprach der chunich do
wir sin iwer helfe	vil pilliche vro
er sprach	ich chuom iv widere	in vil kurcen tagen
daz ir mich habt gesendet	daz svlt ir Prvnhilde sagen 