Anderthalp> des Rines	sach man mit grozen scharn
den chunic mit sinen gesten	zv dem stade varn
ovch sach man da bi zovmen	leiten manige meit
di si enpfahen solden	die waren alle bereit
Do die von Islande	zen schiffen chomen dan
vn– ovch von Nibelungen	Sivrides man
si gahten zv dem lande	vnmvzich wart ir hant
da man des chvniges frivnde	des stades anderthalben vant
Nv hoert ovch disiv mære	von der chvnegin
Uten der vil richen	wie si div mægedin
gefrvmte von der bvrge	dar si do selbe reit
da gewan ein ander chvnde	vil manic ritter vn– meit
Der margrave Gere	Chriemhilde zovmte dan
niwan vz der burge	Sivrit der chvne man
dient ir do minnekliche	si was ein schoene kint
des wart im wol gelonet	von der ivncfrowen sint
Ortwin der chvne	bi fron Voten reit
vil gesellechlichen	manic ritter vn– meit
ze solhem antphange	des mach man wol veriehen
wart nie so vil der frowen	bi ein ander gesehn
Vil manic bvhvrt richen	sach man dan getribn
von helden loblichen	niht wol wær ez beliben
vor <Chriemhilde> der schoenen	al zv den schiffen dan
do hvop man von den moeren	manige frowen wolgetan
Der chvnich was chomen selbe	vn– manic werder gast
hey was starcher schefte	vor den frowen brast
man hort da hvrteklichen	von schilden manigen stoz
hey waz da richer bvckelen	von gedrange lvot erdoz
Die vil minneklichen	die stvnden an der habe
Gunther mit sinen gesten	gie von den schiffen abe
er fvorte Prvnhilde	selbe an siner hant
da lvhten wider ein ander	die edeln <stein> vn– ovch daz gewant
In vil grozen zvhren	frow Chriemh' do gie
da si Prvnhilde	mit ir gesinde enpfie
da wart gervchet hoher	mit wnneklicher hant
vil manic schapel riche	do si sie enpfiengen in daz lant
Do sprach gezogenliche	Chriemh' div chvniginne
ir svlt zv disen landen	groz willechomen sin
mir vn– miner mvoter	vnde allen die wir <han>
dar nach wart von den vrowen	mit trvten chvssen niht verlan
Do Prvnh' frowen	vol chomen vf den sant
da wart vil minneklichen	genomen bi der hant
von herlichen rechen	manich wip wol getan
man sah die schonen megede	vor den chvniginnen stan
E daz ir grvoz ergienge	[23r]das was ein langiv stvnt
ia wart da gechvsset	manic rosen varwer mvont
noh stvnden bi ein ander	die kuniges tohter rich
daz liebet an ze sehene	vil manigen rechen lobelich
Do speheten mit den ovgen	die ê horten iehn
daz	si so minnechliches	heten niht gesehn
so die frowen beide	des iach da manic man
daz si den pris an schoene	in manigen landen mvsen han
Die frowen spehen chvnden	vn– herlichen lip
die lobten durch ir schoene	daz Guntheres wip
doch sprachen da di wisen	die hetenz baz ersehn
man mohte Chriemh'	wol fvr <Prvnhilde> iehn
Wider ein ander giengen	beide magt vn– wip
man sach da wol gezieret	vil manigen schonen lip
da warn sidin hutten	vn– manich rich gezelt
der was da vil gespannen	vor Wormez vber al daz velt
Von des chuniges mâgen	wart dringen niht verlan
man hiez die chuniginne	beide dannen gan
vn– mit in al die frowen	da man den scaten vant
dar brahten si die degene	vzer Burgonden lant
Dv waren ovch die geste	zen rossen alle chomen
vil manic richiv tioste	durch schilde wart genomen
daz velt begunde stovben	sam ob al daz lant
mit lovge enbrunnen wære	da wrden degene bechant
Wes da die helde pflægen	daz sach vil manic meit
man sagt <daz> her Sivrit	mit sinen helden reit
manige widerchere	fvr die hutten dan
er fvrt der Nibelunge	tvsint wætlicher man
Do chom von Tronege Hagene	als im der wirt geriet
den bvhvrt frivntliche	do der helt geschiet
daz si ungestovbet liezen	div <minneklichen> kint
des wart do von den gesten	gevolget zvhtekliche sint
Do sprach der herre Gernot	div ross nv lazet stan
vnz ez beginne chvolen	so svlen wir ane van
dienen schoenen wiben	fvr den palas wit
so der chunic welle riten	daz ir bereite denne sit
Vor der <vesperzite>	do div sunne nider gie
vn– ez begunde chvolen	niht langer man daz lie
in die stat sich hvben	man	<magt> vn– wip
mit ovgen wart getrvtet	vil maniger ivncfrowen lip
Da wart von gvten rechen	vil chleider ab gerieten
von den hochgemvten	nach ir lande siten
vnz fvr den palas witen	der chunich da nider stvnt
da wart gedienet frowen	so helde hoch gemvote tvont
Do wrden ovch gescheiden	die richen kunigin
froe Vote vn– ovch ir tohter	die giengen beide hin
vn– mit ir ingesinde	in ein vil witez gadem
do hort man allenthalben	vil harte grozlichen chradem
Gerihtet wart gesidele	der chunic wolde gan
ze tische mit den gesten	do sach man bi im stan
die schonen Prvnhilden	chrone si do trvoch
in des <chvniges> lande	div was spæhe vn– rich genvoch
Vil manic hergesidele	mit gvo[23v]ten taveln breit
vol spise wart gesezzet	als vns daz ist geseit
des si haben solden	wie wenich des gebrast
do sach man bi dem kunige	vil manigen herlichen gast
Des wirtes kamerære	in pechen goldes rot
daz wazzer fvor trvogen	des wære lvzzil not
ob iv daz iemen seite	daz man diente baz
ze kuniges hochgeciten	ich gelovbe mvliche daz
E daz der vogt von Rine	wazzer do genam
do tet der herre Sivrit	als im do gezam
er mant in siner triwe	wes er im veriach
e daz er Prvnhilde	da heim in Islande sach
Er sprach zvo dem chvnege	ia swor mir iwer hant
swenne daz frov Prvnh'	chome in dizze lant
ir gæbt mir iwer swester	war sint die eide chomen
ich han an iwer reise	vil micheI arebeit genomen
Do sprach der chunic riche	ir habt mich reht ermant
iane sol niht meineide	werden des min hant
ich wilz iv helfen fvgen	so ich beste chan
do hiez man Chriemh'	ze hove zv dem chvnige gan
Mit ir schonen meiden	si chom fvr den sal
do spranch von einer stiegen	Giselher zetal
do hiez er wider wenden	ir schonen mægedin
niwan min swester eine	div sol mit vns ze hove sin
Do brahter <sine> swester	da man den chunic vant
da stvnden ritter edele	von maniger fvrsten lant
in dem sal enmitten	hiez man si stille stan
do was div frowe Prvnhilt	an ir sedel nv gegan
Sine wesse niht der mære	waz man da wolde tvon
do sprach zv sinen magen	der Danchrates svn
helfet mir daz min swester	Sivriden neme ze man
do sprachens al geliche	si mag in wol mit eren han
Do sprach der chunic Gvnther	la dirz niht wesn leit
min vil liebiv swester	vn– loese minen eit
ich swor dich eime rechen	vn– wirdet er din man
so hastv minen willen	mit grozen triwen getan
Do sprach div magt edele	vil lieber brvder min
irn svlt mich niht vlehen	ia wil ich immer sin
swie ir mir gebietet	daz sol sin getan
ich sol in loben gerne	den ir mir	herre	gebt ze man
Von lieber ovgenweide	wart Sivrides varwe rot
ze dienest sich der meide	do der reche boe
man hiez si zvo ein ander	in dem ringe stan
vn– vragtes	ob si wolde	den vil wætlichen man
In magtlichen zvehten	si schamte sich ein teil
iedoch so was gelucke	vn– Sivrides heil
daz si in niht versprechen	wolde da zehant
ovch lobte si ze wibe	der edel chunic von Niderlant
Do si in gelobte	vn– ovch er die meit
gvtlich vmbevahen	daz was da vil bereit
von Sivrides armen	daz minnekliche chint
nach siten wart gechvsset	div schone chvniginne sint
Sich teilte daz gesinde	als schiere daz geschach
an daz gegensidele	man Sivride sach
mit Chriemh' sizzen	dar dient im manic man
man sach die Nibelunge	nach im an den sedel gan	[24r]
Ovch was der wirt gesezzen	vn– Prunh' div meit
do sach si Chriemh'	do wart ir nie so leit
bi Sivride sizzen	weinen si began
ir vielen heize træhene	vber liehtiv wange dan
Do sprach der wirt des landes	waz ist iv	frowe min
daz ir so lazet trvben	liehter ovgen schin
ir mohtet sanfter lachen	wan iv ist vndertan
min lant vnde riche bvrege	vn– manic wætlicher man
Ich mac wol balde weinen	sprach div schone meit
vmbe dine swester	ist mir so grimme leit
di sich ich sizzen nahn	dem eigen holden din
daz mvoz mich immer riwen	vn– sol si also verstozen sin
Do sprach der chunich Gvnther	ir mvgt wol stille dagn
ich wil iv zandern citen	disiv mære sagn
warvmbe ich mine swester	dem rechen han gegebn
ia mac si mit dem degene	immer vroliche lebn
Si sprach	mich iamert immer	ir schoene vn– ovch ir zvht
vn– wesse ich war ich solde	ich hete gerne vluht
daz ich iv nimmer wolde	geligen nahen bi
irn saget mir	wa von Chriemh'	div wine Sivrides si
Do sprach der chvnic riche	ich tvonz iv wol bechant
er hat als wol burge	als ich vn– witiv lant
daz wizzet sicherlichen	er ist ein chunic rich
des gan ich im ze minnen	die schonen magt lobelich
Swaz ir der chunic sagete	si hete trvbin mvot
do gahete von den tisschen	vil manic ritter gvot
ir bvhurt wart so herte	daz al div bvrch erdoz
den wirt do bi den gesten	da ze wesene verdroz
Er daht er læge sanfter	der schonen frowen bi
do was er des gedingen	niht in hercen vri
im mvese von ir minne	ein hohez liep geschehen
er begunde vrivntliche	an die magt dicke sehen
Ir ritterschaft die geste	hiez man do ab lan
der chvnic mit sime wibe	ze bette wolde gan
vor des sales stiegen	die frowen schieden sich
in zhten minnekliche	als ich wol verwæne mich
Do chom ir ingesinde	die sovmten sich des niht
ir richen chamerære	die brahten in div lieht
sich teilten do die rechen	der zweier kunige man
do sach man vil der degene	dan mit Sivride gan
Die herren chomen beide	al da si solden ligen
do gedaht ir ieslicher	mit minnen an gesigen
den minneklichen frowen	daz trost in wol den mvot
Sivrides kvrzewile	div wart vil grozliche gvot
Do der herre Sivrit	bi Chriemh' lach
vn– er so minnekliche	der iuncfrowen pflach
mit sinen edeln minnen	si wart im so der lip
daz chvnde ovch <si> verdienen	als ein tvgende riche wip
Ine sage iv niht mere	wie er der frowen pflac
nv horet ovch disiv mære	wie Gunther gelach
bi der sinen brvte	der vil mære degen
was vil diche sanfter	bi andern frowen gelegn
Daz volch was im entwichen	frowen vn– man
do wart div kemenate	balde zv getan
er wande er solde trvten	ir minneklichen lip
ez was noch vil [24v]vnnahen	e daz si wrde sin wip
In sabenwizem hemede	si an ein bette gie
do daht der ritter edele	nv han ihz allez hie
des ich ie da gerte	in allen minen tagn
si mvos im dvrch ir schone	von grozen schulden wol behagn
Div lieht begunder bergen	div Guntheres hant
do gie der chunic riche	da er die frowen vant
er leite sich ir nahen	sin frevde div wart groz
die vil minneklichen	der helt mit armen vnbesloz
Minnekliche trvten	des chvnder vil began
ob im des div frowe	gegunnet wolde han
do zvrnde si so sere	daz in gemvete daz
er wande vinden frivnde	do vander vintlichen haz
Si sprach	ritter edele	ir svltez lazen stan
des ir da habt gedingen	iane mages niht ergan
ich wil noch magt beliben	ir svlt wol wizzen daz
vnz ich div rehten mære	ervinde an allen dingen baz
Do rang er nach ir minne	daz was der frowen leit
do greif nach eime gvrtel	div herliche meit
daz was ein starcher porte	den si alle cite trvoch
wie luzzil si dem kunige	sines willen do vertrvoch
Die fveze vn– ovch die hende	zesamne si im bant
si trvge in zeinem nagele	vn– hienge in an die want
daz enchunder niht erwenden	vil chreftich wart sin not
ia het er von ir sterche	vil nach gewnnen den tot
Do begvnde vlegen	der meister wande sin
nv loset min gebende	vil edeliv kunigin
ine trow iv	frowe	nimmer	mit minnen an gesigen
vn– sol ovh harte selten	iv so nahen mer geligen
Sine rvchte <wie> im wære	wande si vil sanfte lach
dort mvoser allez hangen	die naht vnz an den tach
vnze daz der morgen	dvrch div venster schein
des kuniges kurcewile	was die wile harte chlein
Nv sagt mir	her Gunther	wer iv daz iht leit
ob ivch gebvnden fvnden	so sprach div schone meit
die iwern kamerære	von einer frowen hant
do sprach der ritter <edele>	daz wrde iv vbel bewant
Ovch hete ichs luzzel ere	sprach der chvene man
dvrch iwer selber zvhte	so lat mich zvo ziv gan
sit daz iv min minne	sint so grimme leit
iane sol ich nimmer rveren	mit miner hant an iwer chleit
Do si daz gehorte	zehant si in verlie
wider an daz bette	er zv der frowen gie
er leite sich so verre	daz er ir schone wat
niht mohte gereichen	des wolde ovch si do haben rat
Do chom ir ingesinde	vn– brahten in div kleit
der was in an dem morgen	harte vil bereit
swie man da gebarte	trvrich was genvoch
der edel wirt des landes	swier des tages chrone trvoch
Nach siten der si pflagen	vnde man durch reht #begîe
der chunic mit siner frowen	niht langer daz enlie
si chomen zv dem mvenster	da man die messe sanch
ovch chom der herre Sivrit	sich hvop da grozlich gedranch
Nach chunichlichen eren	<was> in dar bereit [25r]
swaz si habn solden	ir chrone vn– ovch ir gekleit
do wrden si gewihet	do daz was getan
do sah mans alle viere	vnder chrone lobeliche stan
Vil knappen swert da namen	vier hundert oder baz
den kunigen zen eren	ir svlt gelovben daz
sich hvop vil michel frevde	in des kuniges lant
man horte schefte bresten	an der swertdegene hant
Do sazen in den venstern	div schonen magedin
si sahen vor in glesten	vil maniges schildes schin
do het sich gesundert	der chunic von sinen man
swes <ander> iemen pflæge	man sah in trvrende stan
Im vn– Sivride	vngeliche stvnt der mvot
wol wesse sine swære	der chune degn gvot
do gienger zv dem kvnige	vragen er began
wie ist iv hint gelungen	des wolt ich gerne chunde han
Do sprach der wirt zem gaste	ich chlag iv minen schaden
ich han den vbeln tivfel	heim ze hvs geladen
do ich si wande minnen	vil sere si mich bant
si trvge mich zeime nagele	vn– hie mich hohe an ein want
Da hienge ich angestlichen	die naht vnz an den tac
e daz si mich enbvnde	vnsanfte si min pflac
daz sol iv friwentliche	vf genade sin gechleit
do sprach der herre Sivrit	daz ist mir grozliche leit
Des bringe ich ivch wol innen	vn– lat irz ane nit
ich schaffe daz si noch hint	so nahen bi iv geleit
so daz si ivch ir minne	gesvmet nimmer mer
der rede was do Gunther	nach sinen arebeiten her
Nv schowe mine hende	wie di geswollen sint
die twanc si mir so sere	als ob ich wære ein kint
daz mir blvot zen nagelen	allenthalben dranch
ich het ze mime lebene	harte chleinen gedanch
Do sprach der starche Sivrit	dv maht noch wol genesn
vns zwein ist vngeliche	hinte gewesn
mir ist din swester Chriemh'	als min selbes lip
ez mvz div frowe Prvnh'	noch hinte werden din wip
Ich chvom ze naht vil tovgen	zer kemenate din
in miner tarnkappen	des soltv sicher sin
so daz sich miner liste	mach niemen wol verstan
so heiz die kamerære	zvo zir herbergen gan
So lesche ovch ich den kinden	div lieht an der hant
bi disem wortzeichen	sol dir sin bechant
daz ich bi dir si nahen	ia twing ich dir din wip
daz dv si hint minnest	oder ich verlivse den lip
Ane daz dv iht trvttest	sprach der chunic do
die mine lieben frowen	anders bin ich vro
so tvo ir swaz dv wellest	vn– næmstv ir den lip
daz solde ich wol verchiesen	si ist ein vngehivrez wip
Daz nim ich	so sprach Sivrit	vf die triwe min
daz ich ir niht en minne	div schoene swester din
div ist mir vor in allen	die ich noch ie gesach
des frowete sich do Gvnther	do daz Sivrit gesprach
Da was von churzewile	in gedrange not
den bvhurt vn– schallen	allez man verbot
da die frowen sol[25v]den	in den palas gan
do hiezen die kamerære	die lvte von dem wege stan
Von <rossen> vn– von lvten	gerovmet was der hofe
der frowen iesliche	fvrt ein bisscofe
do si vor den kunigen	ze tische solden gan
in volgte zv dem sidele	vil manic reche wolgetan
Der chunic in gvtem wane	bi sime wibe saz
daz im gelobte Sivrit	wol gedahter an daz
der eine tac in dvhte	wol drizzech tage lanc
an Prvnh' minne	stvnde im aller sin gedanc
Wander erbeite chvome	daz man ze naht von tische gie
die schonen Prvnhilde	man do chomen lie
vn– ovch Chriemh'	si bede an ir gemach
hey waz <man> chuner degene	bi den schonen frowen sach
Sivrit vn– Chriemh'	ie baz vn– baz
durch liebe ein ander trvoten	ir svlt gelovben daz
swaz si im gedienen chvnde	wie luzzil si des liez
do mvs ovch <leisten> Sivrit	alser Gunther gehiez
Er stal sich von den frowen	vil tovgen chom er dan
da er vil kamerære	vant mit liehten stan
div begunde leschen	den chinden an der hant
daz ez Sivrit wære	daz wart do Gunther bechant
Wol wesser waz er wolde	do hiez er dannen gan
mægede vn– frowen	do daz wart getan
er besloz mit vlize	selbe do die tvr
starcher rigele zwene	die warfer snelle der fvr
Div lieht verbarger schiere	vnder die bettewat
eines spils begunde	des was do niht rat
Sivrit der vil starche	vn– ovch div schone meit
daz was do dem chunige	beide lieb vn– leit
Der helt sich leite nahen	der iuncfrowen bi
si sprach	nv lat ez	Gvnther	als liep als iv daz si
daz ir niht arebeite	lidet alsam ê
sit getet div frowe	dem chunige Sifride we
Do hal er sine stimme	daz er niht ensprach
der kunic ez allez horte	swie er sin niht ensach
daz heimlicher dinge	von <in> da niht geschach
si heten an dem bette	harte kleinen gemach

Er gebarte sam ez wære	Gunther der chunic rich
er vmbesloz mit armen	die magt lobelich
si warfen vz dem bette	dabi vf einen banch
daz im sin hovbet lvote	an eime scamel erchlanch

Wider vf mit chreftin	spranch der vil snelle man
er woldez baz versvochen	do er des began
daz ers im wolde twingin	dem erz gelobet ê
solch wer deheiner frowen	wêin ich immer mer erge
Do er niht wolde erwinden	div magt balde vf spranch
irn svlt mir niht zefveren	min <hemede> also blanch
mit iwer groz vnfvge	wandez ist mir leit
des bringe ich ivch wol innen	sprach do div minneklichiv meit
Mit ir vil starchen armen	besloz si den degn
do wolde si in gebvnden	alsam den kunic legen
daz si an ir bette	mohte habn gemach
daz er ir wat zerfverte	div frowe ez grozliche rach
Waz half sine groziv sterche	vn– ovch sin michel chraft
si erzeigete wol dem [26r]degene	ir libes meisterschaft
si trvge in mit gewalte	da wart ir ellen schin
vn– trvchtin vngefvege	zwischen der <wende> vn– einen schrin
Owe	gedaht der reche	sol ich nv minen lip
von einer magt verliesen	so mvgen elliv wip
her nach immer mere	hohe tragen den mvot
so <versvochtet> ez vil mænegiv	div ez svs nimmer getvot
Do schamte sich vil sere	der vil chuone man
ob ir gelinge solde	zvrnen er began
mit vngefveger chrefte	sazter sich <ir> wider
er versvochtez angestlichen	an der chvniginne sider
Swie vaste si vf im læge	sin zorn in do twanch
vn– ovch sin starchez ellen	daz er an ir danch
sich wider vf gerihte	sin angest div was groz
si taten in dem gademe	her vn– dar vil manigen stoz
Ovch was der chunic Gvnther	niht an angest gar
er mvse dicke wenchen	vor in her vn– dar
si rungen also starche	daz ez groz wnder was
daz ir ieslichez	vor dem andern <ie> genas
Den kunich mvete sere	beidenthalp div not
doch vorhter michels mere	den Sivrides tot
wande si het dem degene	den lip nach benomen
wan daz er niht getorste	er were ze helfe im gerne chomen
Ja werte harte lange	vnder in der strit
doch braht er die frowen	wider an daz bette sit
swie vaste si sich werte	ir wer wart ze ivngest	chranch
der chunic in sinen sorgen	hete manigen gedanch
Ez dvhte in harte lenge	e daz er si betwanch
si drucht im sine hende	daz vz den nageln spranch
daz blvot im von ir chreften	daz was dem helede leit
sit brahter an ein lovgen	die vil herlichen meit
ir vngefvges willen	des si e da iach
der chunich iz allez horte	swier doeh niht ensprach
er drvchtes an daz bette	daz si vil lvt erschre
ir taten sine chrefte	do vil grozlichen we
Do greif si nach dem porten	da si den ligen vant
vn– wold in da mit binden	do wert ez so sin hant
daz ir div lit erchrachten	do verzagt ir lip
des wart der strit gescheiden	do wart si Gvntheres wip
Si sprach	kunic edele	ir svlt mich lebn lan
ez wirt vil wol versvenet	swaz ich iv han getan
ich gewer mich nimmer mere	der edeln minne din
wand ich han wol erfvnden	daz dv chanst frowen meister sin
Sivrit der stvnt dannen	ligen liez er die meit
sam er von sinem libe	ziehen wolt div chleit
er nam ir e ein vingerlin	von golde wol getan
daz wolde got von himele	daz er daz hete verlan
Dar zvo nam er ir gvrtel	daz was ein porte gvot
ine weiz ob er daz tæte	dvrch sinen hohen mvot
er gab ez sime wibe	daz wart im sider leit
do lagen bi ein ander	Gunther vn– Prunh' div meit
Er pflag ir minnekliche	als in daz beiden zam
do mvste si verchiesen	ir zorn vn– ovch ir scham

von siner heinliche	si wart ein luzzil bleich
hey waz ir von der min[26v]ne	ir vil grozen chrefte entweich
Done was ovch si niht stercher	dann ein ander wip
er trvote vil minnekliche	den ir vil schonen lip
ob siz versvochte mere	waz chvnde daz vervan
daz het ir der kunic Gunther	mit sinen minnen getan
Wie rehte minnekliche	si im nahen lac
mit vrivntlicher liebe	vnze an den liehten tac
ovch was der <herre> Sivrit	nv hin wider gegan
da warde wol enpfangen	von einer frowen wolgetan
Er vnderstunt ir vrage	der si doch hete mvot
vn– hal siz harte lange	der chune degn gvot
diz chleinoet er ir da heime	doch ze iungest gap
daz frumte vil der degene	mit samt im selben in daz grap
Der wirt wart an dem morgen	verre baz gemvot
denner da vor wære	des wart div froewde gvot
in allen sinen landen	von manigem hohen man
die er zv huse ladete	den wart do dienste vil getan
Div hochgecite do werte	vnz an den zwelften tac
daz in al der wile	der scal da nie gelac
von aller hande vrevden	der iemen solde pflegen
do wart des chuniges choste	vil harte hohe gewegn
Des edeln wirtes mage	als ez der kunic gebot
si gaben richiv chleider	dar zvo daz golt vil rot
ross vn– dar zv silber	vil manigem varnden man
die gabe nemen wolden	die schieden vrolichen dan
Sivrit der herre	vzer Niderlant
mit tvsint sinen rechen	allez daz gewant
daz si ze Rine brahten	daz wart gar hin gegebn
vn– ovch div ross mit sætelen	si chunden miltekliche lebn
E man die richen gabe	alle da verswanch
die wider ze lande wolden	die dvhte des ze lanch
ezn wart nie geste	mere baz gepflegn
svs endet sich div hochgecit	daz wolde Gunther der degen