ns ist in alten mæren	wnders vil geseit 
von helden lobebærn	von grozzer chvonheit 
von	frovden hochgeziten	von weinen vn– von klagen 
von chvoner rechen strite	mvget ir nv wunder hoeren sagen
Ez wuohs in Burgonden	ein schoene magedin 
daz in allen landen	 niht schoeners mohte sin 
Chriemhilt was si geheizzen	vnde was ein schoene wip 
darumbe mvosen degene	vil verliesen den lip
Der minnechlichen meide	trvoten wol gezam
in mvote kvoner recken	niemen was ir gram 
ane mazen schoene	 so was ir edel lip 
der ivnchfrovwen tugende	zierten anderiv wip
Ir phlagen dri kvnige	edel vnde rich 
Gvnthere vnde Gernot	die recken lobelich 
vnde Giselher der ivnge	ein voz erwelter degen 
div frovwe was ir swester	die fvrsten hetens in ir pflegen
Die herren warn milte	 von arte hoh geborn 
mit krefte vnmazzen kvene	die recken voz erkorn 
da zen Burgonden	 so was ir lant genant 
si frvmden starkiv wnder	sit in Ezelen lant
Ze Wornitz bi dem Rine	 si wonden mit ir kraft 
in diende von ir landen	vil stolziv riterschaft
mit stoltzlichen eren	vnz an ir endes zit 
sit stvrben si iamerliche	von zweier edelen frovwen nit
Ein richiv kvniginne	frov vote ir mvoter hiez 
ir vater hiez Danchrat	der in div erbe liez
sit nach sime lebne	ein ellens richer man 
der ovch in siner iugende	grozzer eren vil gewan
Die dri kvnige waren	als ich gesaget han 
von vi hohem ellen	in warn vndertan
ovch die besten rechen	von den man hat gesaget 
stark vnde vil chvone	 in allen striten vnuerzaget
Daz was von Tronyn Hagene	vnd ovch der bruoder sin 
Danchwart der vil snelle	vnde von Mecen Ortwin 
die zwene marchgrauen	Gere vnde Eckewart 
Volcker von Alzaye	 mit ganzen ellen wol bewart
Rvomol der kvchen meister	ein voz erwelter degen 
Sindolt und Hvonolt	 dise herren mvosen pflegen
des houes vnd der eren	der drier kvnige man 
si heten noch manigen reken	der ich genennen niht <en>
Danchwart der was marschalch	do was der neu
trvhsætze des kvniges	von Mezen Ortwin 
Sindolt der was schenche	ein voz erwelter degen 
Hvnolt was kamerære		si chvnden grozzer eren pflegen
Von des houes krefte	vnde von ir witen kraft 
von ir vil hohen werdecheit	vnde von ir riterschaft 
der die herren pflagen	mit frovden al ir leben 
des enchvnde iu ze ware	niemen gar ein ende geben
Ez trovmde Chriemhilde	 in tvgenden der si pflach 
wie si einen valchen wilden	zuge manigen tach	[1b]
den in zwene arn erchlimmen	daz si daz mvosde sehen 
ir enchvnde in dirre werlde	nimmer leider sin geschehen
Den trovm si do sagete	ir mvoter voten 
sin kvnde in baz descheiden	niht der gvoten 
der ualche den <du> ziuhest	daz ist ein edel man 
in welle got behvoten	du mvost in schiere verlorn han
Waz saget ir mir von manne	vil liebiv mvoter min 
ane reken minne	wil ich immer sin 
svs schoene wil ich beliben	vnz an minen tot 
daz ich sol von manne	nimmer gewinnen deheine not
Nv verspriche ez niht ze sere	 sprach aber ir mvoter do 
solt dv immer herzenliche		zer werlde werden fro 
daz geschiht von mannes minne	dv wirst ein schoene wip 
obe dir got noch gefueget	eins rehten guotes riter lip
Die rede lat beliben	 sprach si	vrovwe min 
ez ist ein manegem wibe	vil diche worden schin 
wie liebe mit leide	ze iungest lonen kan 
ich sol si miden beidiv	son chan mir nimmer missegan
In ir vil hohen tvgenden	der si schoene pflack 
lebte diu maget edele	vil manegen lieben tach 
daz si wesse niemen	den minnen wolde ir lip 
sit wart si mit eren	eins vil gvoten riters wip
Der was der selbe valche	den si in ir <trovme> sach 
den ir beschiet ir mvoter	wie ser si daz rach
an ir næhsten magen	 die in slvogen sint 
dvrch sin eins sterben	starp vil maneger muoter kint

o wohs in Niderlanden	eins richen kvniges kimt 
des vater hiez Sigemunt	sin muoter Sigelint 
in einer burge riche	witen wol bekant 
niden bi dem Rine	 diu was ze Santen genant
Ich sage iv von dem degne	 wie schoene der wart 
sin lip vor allen schanden	was vil wol bewart 
starch vnde mere	 wart sit der kuene man 
hey waz er grozer ern	 ze diser werlde gewan
Sifrit was geheizen	 der selbe degen gvot 
er versvohte vil der riche	durch ellenthaften mvot 
durch sines libes sterke	reit er in menigiv lant 
<	> er sneller degne	ze den Burgonden vant
In sinen besten ziten		bi sinen ivngen tagen 
man mohte michel <wnder>	von Sifride sagen 
waz eren an im <wuohs>	vn– wie schoene was sin lip 
sit heten in ze minne	diu vil wætlichen wip
Man zoch in mit dem flizze	als im daz wol gezam 
von sin selbes mvote	waz tvgent er an sich nam 
des wrden sit gecieret	sines vater lant 
daz man in ze allen dingen	so rechte erlichen vant
Er was nu so gewahsen	daz er ze hove rei	
die lute in gerne sahen	manich frovwe vn– <m	 > meit
im wunschten daz sin wille	in immer truege dar	[2a]	 
holt waren im genvoge	des wart der herre wol gewar
Vil selten ane hvote	man riten lie daz kint 
in hiez mit kleider cieren	Sigmunt vnde Sigelint 
sin pflagen ovch die wisen	den ere was bekant 
des mohte er wol gewinnen	 beidiu lute vn– lant
Nv was er in der sterke	 daz er wol wafen truoch 
swes er dar zvo bedorfte	des lag an im genvoch 
er begunde mit sinnen	werben schoeniu wip 
die truoten wol mit ern	 des <schoenen> Sifrides lip
Do hiez sin uater Sigemvnt	chvnden sinen man 
er wolde hochzite	 mit lieben frivnden han 
div mære man do fuorte	in anderre kunige lant 
den fremden vn– den kunden	gap er ros vn– gewant
Swa man <vant> deheinen	 ritter solde sin
von arte der sinen mage	diu edelen kindelin
ladete man zvo dem lande	durch die hochgecit 
mit dem iungen kunige	 swert genamen si sit
Von der hohcite	man wnder mohte <	n> 
Sigmunt vnde Sigelint	die mohten	eiagen
mit gvote michel ere	des teilte vil ir hant 
des sach man vil der vremden	zvo in riten in daz lant
Vier hvndert swertdegne	 die solden tragen kleit
mit samt Sifride	vil manich schvoniu meit
von werche was vnmvezzech	wan si im waren holt 
vil der edeln steine	die frovwen leiten in daz golt
die si mit porten wolden	wurchen vof ir wat
den iungen stolzen rechen	des en was niht rat 
der wirt der hiez do sideln	vil manigen kvenen man
ze einen sunewenden	 da Sifrit ritters namen gewan
Do gie ze eime munster	vil manich richer kneht
vnde manich edel ritter	die wisen heten reht
daz si den tvmben dienden	als in was e getan 
si hetten churzwile vil	vn– ovch vil maniger freuden wan
Gote man do zen eren	eine messe sanch 
do huop sic von den liuten	vil michel gedranch 
do si ze riter wrden	nach ritterlicher ê
mit also grozen eren	 daz wætlich nimmer mere erge
Sie liefen da si fvnden	gesatelt manich march 
in houe Sigemvndes	 der buhurt <wa	> so starch 
daz man erdiezen horte	palas vn– sal 
die hoh gemuoten degne	die heten grozlichen schal
Von wisen vnd von tvmben	man horte manigen stoz 
da der schefte brechen	gein der hoehe doz 
trvnzune sach man vliegen	fur den palas dan
von maniges rechen hende	daz wart mit flize getan
Der wirt der bat ez lazen	do zoch man div march 
man sach ovch da zebrochen	vil manigen buckel starch 
vil der edelen steine	geuellet vf daz gras
abe liechten schildes spangen	von hvrte daz gescehen <was>
Do giengens wirtes geste	da man in sitzen riet	[2b]
vil der edeln spise	si von ir mvnde schiet
vnde win der aller beste	des man in vil getruoch 
den vremden vn– den kunden	bot man eren da genuock
Swie vil si kurtzwile	pflagen al den tach 
vil der uarnden diete	ruowe sich bewach 
si dienden nach der	die man da riche vant 
des wart mit lobe gecieret	allez Sigmundes lant
Der herre hiez lihen	 Sifrit	den iungen man 
lant vnde burge	als er hete e getan 
sinen swertgenozen	den gap do vil sin hant 
do liebte in diu reise	daz si chomen in daz lant
Diu hohcit werte		vntz an den sibenden tach 
Siglint div riche	 nach alten siten pflach 
durch ir sunes liebe	si teilte rotes golt 
si chvnde ez wol gedienen	daz im die lute waren holt
Vil lucel man der <varnden>	armen da vant 
ros vnde cleider	daz stovp in von der hant 
same si ze lebne heten	niht mere wan einen tac 
ich wene nie ingesinde	groezer milte ie gepflac
Mit lobelichen eren	 schiet sich diu hohcit 
von den richen herren	horte man wol sit 
daz si den iungen wolden	zeime herren han 
des gerte niht Sifrit	der vil wæltliche man
Sit daz noch beide lebten	Sigmunt vnde Sigelint 
niht wolde tragen krone	 ir beider liebez kint 
doch wolder wesen herre	 fur allen den gewalt 
des in dem landen vorhte	der degen chuone vn– balt

en	herren mvoten selten	deheiniv herzeleit 
er horte sagen mere	wie ein schoeniu meit
were in Burgonden	 ze wunsche wolgetan 
von der er sit vil frovden	vnd arebeit gewan
Div ir vnmazen schoene	 was uil witen kunt 
vnd ir hohgemvote		zvo der selben stvnt
an der iunchfrovwen	so manich helt ervant 
ez ladete vil der geste	in Gunthers lant
Swaz man der werbenden	 nach ir mine ie gesach 
Chriemhilt in ir sinne	ir selber ie veriach 
daz si deheinen wolde	ze truotenne han 
<er> was ir vil vremde	dem si wart sider vndertan
o dacht vof hohe minne	daz Siglinde kint 
z was ir aller werben	wider in ein wint 
er mohte wol verdienen	schoener frovwen lip 
sit wart diu edel Chriemhilt	des <chuonen> Sifrides wip
Im rieten sine mage	 vnd ander sine man 
sit er vof stete minne	tragen wolde wan 
daz eine danne wurbe	div im moehte zemen 
do sprach der edel Sifrit	 so wil ich Chriemhilden nemen 
die schoenen iungfrovwen	von Burgvnden lant
dvrch ir vnmazlich schoene	daz ist mir wol bekant	[3a]
nie keiser wart so riche	der wolde haben wip 
<	me> wol ze minne	der richen kuniginne lip
Disiu selben mære	gehorte Sigmunt 
ez reiten sine lute	da von wart im kvnt
der wille sines kindes	ez was im harte leit 
daz er werben wolde	 die vil herliche meit
Ez gefriesch ovch Siglint	des edeln kuniges wip 
si hete groze sorge	vmb ir kindes lip 
wan si wol erkande	Gunthern vnd sine man 
den gewerbt man sere	dem degne leiden began
Do sprach der kuone Sifrit	 vil lieber vater min 
ane edelr frovwen minne	 wold ich immer sin 
ich enwurbe daz min herze	groze liebe hat	
swaz iemen rede kvnde	 des was deheinr slahte rat
Unde wildu niht erwinden	 sprach der kvnich do 
so bin ich dins willen	werlichen vro 
vnd wil dir ze helfen enden	so ich aller beste kan 
doch hat der kunich Gunther	vil manigen hochuertegen man
Obe ez ander nieman were	wan Hagene der degen 
der kan mit vbermvete	wol hochverte pflegen 
daz ich des sere furchte	ez mug vns werden leit 
ob wir werben wellen	 die herlichen meit
Waz mag uns gewerren	sprach do Sifrit 
swaz ich frivntliche	niht ab in erbit 
daz mach sus erwerben	mit ellen da min hant 
ich trovwe an im erdwingen	beidiv lute vnde lant
Do sprach der fvrste Sigmvnt	 din rede ist mir leit 
wan wurden disiv mære	ze Rine geseit 
dvn doerftest nimmer geriten	in Gunthers lant 
Gvnther vnde Gernot	die sint mir lange bechant
Mit gewalte nieman	erwerben mach die maget	
so sprach der kunich Sigmunt	daz ist mir wol gesaget 
wil aber dv mit rechen	riten in daz lant 
obe wir iht haben friunde	die werdent schiere besant
Des ist mir niht ze mvote	sprach aber Sifrit 
daz mir svlen ze Rine	reken volgen mit
dvrch deheine heruart		daz wære mir vil leit	
da mit ich solde ertwingen	die vil herlichen meit
Si mach wol sus ertwingen	da min eins hant 
ich wil selbe zwelfter	in Gvnthers lant 
dar svlt ir mir helfen	vater Sigmunt	
do gap man sinen degnen	ze chleidern gra vn– bunt
Do uernam ch disiu mere	sin mvoter Siglint 
si begvnde troevren	vmb ir liebez kint 
daz vorchte si uerliesen	von Gvnthers man 
div edel kvnniginne	vil sere weinen began
Sifrit der herre	gie da er si sach 
wider sine mvoter	er gvotlichen sprach 
frovwe	ir svlt niht weinen	durch den willen min 
ia wil ich ane sorge	vor allen vienden sin	[3b]
Vnde helfet mir der reise	 in Burgonden lant 
daz ich vnd mine rechen	 haben solch gewant 
daz also stolze rechen	mit eren mvgen tragen 
des wil ich iv genade	 mit triwen wærlichen sagen
Sit du niht wil erwinden	sprach frov Siglint 
so hilf ich dir der reise	min einigez kint 
mit der besten weten		die riter ie getruoch 
dir vn– dinen gesellen	ir sult ir fueren genuoch
Do neich der kvniginne	Sifrit der iunge man 
er sprach	ich wil ze der verte	niemen mere han
niwan zwelef reken		 den sol man brveuen wat 
ich wil daz gerne sehen	wie ez vmbe Chriemhilde stat
Do sazen schoene frovwen	 naht vnde tac 
daz luzel ir deheiniv	ruowe gepflac 
vnze man geworhte	 die Sifrides wat 
er wolde siner reise	haben deheiner slahte rat
Sin vater hiez im zieren	sin riterlich gewant 
da mit er wolde rvmen	daz Sigmundes lant 
vnd ir vil liehten bruneie	die wrden ovch bereit 
vnd ir veste helmen	ir schilde schoene vnde breit
Do nahte in ir reise	 zvo den Burgonden dan 
vmb si begvnde sorgen	wip vnde man 
ob si immer komen solden	heim wider in ir lant 
die helde in hiezen sovmen	beide wafen vnd gewant
Ir ros div waren schoene	ir gereite goldes rot 
lebte iemen vbermueter	 des enwas niht not 
danne wære Sifrit	 vnd die sine man 
vrlovbes er do gerte	zuo den Burgonden dan
In werten trurichliche	der kvnich vnd sin wip 
er troste minnechliche	do ir beider lip 
er sprach	ir svlt niht weinen	durch den willen min 
immer ane sorge	sult ir mins libes sin
Ez was leit den rechen	ez weinte ovch manech meit 
ich wene	in hete ir herze	rehte daz geseit 
da von daz in so vil der friunde	da uon gelege tot 
von svlden si do chlageten	des gie in wærlichen not
An dem sibenden morgen	ze Wormz vof den sant
riten die uil chvonen	allez ir gewant
was von roteme golde	ir gereite wol getan 
ir ros in giengen ebne	des chvonen Sifrides man
Ir schilde waren niwe	lieht vn– breit 
vnde vil schoene ir helmen	do ze houe reit
Sifrit der vil chuene	in Gvnthers lant 
man gesach an helden	nie so herlich gewant
Div ort der swerte giengen	nider vof die sporn 
ez fvorten scharpe gern	die riter vz erkorn 
Sifrit der fuorte ir einen	wol zweier spannen breit 
der ze sinen ecken	 vil harte vreislichen sneit
Die goltuarben zovme	fuorten si an der hant 
sidiniu wrbuege	 sus chomens in daz lant	[4a]
daz volch si allenthalben	kaphen an began 
do liefen in enkegene	vil der Gvnthers man
Die hochgemvoten rechen	riter vn– chneht 
die giengen zvo den herren	daz was michel reht	
vnde enphiengen die geste	<in> ir herren lant 
vnd namen in die moere	mit den schilden von der hant
Diu ros si wolden dannen	ziehen an gemach 
Sifrit der vil chuone	wie snelle er do sprach 
lat vns sten die moere	mir vnde minen man 
wir wellen schiere hinnen	des ich gvoten willen han
Swem sin kvnt div mere	 der sol mich niht verdagen 
wa ich den kvnich vinde	daz sol man mir sagen 
Gvnthern den vil richen	voz Burgunden lant	
do sagte ez ime einer	dem ez rehte was bechant
Welt ir den kvnich vinden	daz mach vil wol geschehen 
in ienen salen witen	han ich in gesehen
bi den sinen helden	 da sult ir hine gan 
da mvget ir bi im vinden	manigen herlichen man
Nv waren deme kvnige	div mere geseit 
daz da komen weren	ritter wol gemeit 
die fuorten riche brunne	vnd erlich gewant 
si derkanden nieman	in der Burgunden lant
Den kunich nam des wunder	von wannen choemen dar
die herlichen reken	in wæte lieht gevar
vnd mit so gvoten silden	niv unde breit 
daz im daz sagte nieman	 daz was Gunthere leit
Des antwurtete dem kvnige	von Mecen Ortwin	
rivch vnde kuene	mohte er vil wol sin 
sit wir ir niht erchennen	so sult ir heizzen gan
nach minem oeheim Hagnen	den sult ir si sehen lan
Dem sint kvnt div riche	vnd elliv vremdiu lant 
sin im die herren kunde	daz tuo er uns bechant	
der kunich bat in bringen	vnd die sine man 
man sach in herliche	mit reken hin ze houe gan
Waz sin der kunich wolde	des fragte Hagne 
ez sint in mime huose	vnchvnde degne 
die niemen hie bekennet	habet irs <ie> gesehen 
des solt du mir	Hagne	hie der warheit veriehen
Daz tuon ich	sprach Hagne	 zvo einem venster er do gie 
sin ovgen er da wenden	zuo den gesten lie 
wol behagte im ir geuerte	 vnd ovch ir gewant 
si waren im vil vremde	 in der Burgunden lant
Er sprach	von wannen komen	die reken an den Rin 
ez moehten fursten selbe	oder fursten boten sin 
ir ros div sint schoene	ir chleider harte guot 
von svannen si choment	si sint helde hoch gemvot
Also sprach do Hagne	ich wil des wol veriehen 
swie ich niemere	Siuriden habe gesehen 
so wil ich wol gelovben	swie ez darumbe stat 
daz ez si der reke	 der dort so herlichen gat	[4b]
Er bringet niwiu mere	 her in dizze lant 
die kuenen Niblunge	 sluoch des heldes hant 
Silbunch vnd Niblungen	des richen kuniges kint 
er frvmte starchiu wunder	mit siner krefte sint
<Da> der helt aleine	an alle helfe reit 
er vant vor einem perge	als mir ist geseit 
<pei> Niblvnges horde	vil manigen chvenen man 
die warn im ee vil vromde	vntz er ir chvende da gewan
Der hort Niblunges	 der was gar getragen
vz eime holn berge	 nu horet wunder sagen 
wie in wolden teilen	der Niblunge man 
daz sach der degen Sifrit	den helt es wndern began
Er chom zvo zim so nahen	daz er die helde sach
vnd ovch in die degne	ir einr darunder sprach 
hie chumet der starke Sifrit	der helt von Niderlant 
vil seltsaniv mære	er an den Niblungen vant
Den reken wol enphiengen	Schilbunch vnd Niblunch 
mit gemeinem rate	die edelen fursten iunch
den schaz in baten teiln	den wætlichen man 
vnde gerten des mit flize	der herre loben inz began
Er sach so uil gesteines	so wir horen sagen 
hundert ganze wagene	ez heten niht getragen 
noch me des roten goldes	von Niblvnge lant 
daz solt in allez teilen	des kvenen Sifrides hant
Do gaben si im ze miete	daz Niblunges swert 
si waren mit dem dienste	vil ubele gewert 
den in da leisten solde	Sifrit der helt guot 
er enkvndez niht verenden	si waren zornich gemvot
Si heten da ir friunde	zwelf kuener man 
daz starke risen warn	waz chvndez si ueruan 
die sluoch sit mit zorne	diu Sifrides hant 
vnd reken siben hundert	twang er von Niblvnge lant
mit dem guoten swerte	 daz hiez Balmunch 
durch die starken <vorhte>	vil manich reche iunch 
die si ze dem swerte heten	vnd an den kuenen man 
daz lant zuo den burgen	si im taten vndertan
Dar zuo die richen kvnige	 die sluog er beide tot 
er chom von Albriche	 sit in groze not 
der wande sine herren	rechen da zehant 
vnz er die grozen sterke	sid ab Sifride vant
Don chvnd im niht gestriten	daz starke getwerch 
alsam die lewen wilde	si liefen an den perch 
da er die tarnchappe	sit Albriche angewan 
do was des hordes herre	Sifrit der vreisliche man
Die da torsten vehten	die lagen alle erslagen 
den satz den hiez er balde	fuoren vnde tragen
da in da uor namen	die Niblunges man 
Albrich der vil starke	do die kameren gewan
Er muos in sweren eide	er diente im so sin chneht 
aller hande dinge	 was er im gereht	[5a]
so sprach von Tronie Hagne	daz hat er getan 
also grozer krefte	nie mer reke gewan
Noch weiz ich an ime mere	daz mir ist bechant 
einen lintrachen	sluoch des heldes hant 
er badete sich in dem bluote	sin huot wart hurnin 
des snidet in chain wafen	 daz ist diche worden schin
Wir sulen den iungen herren	enphahen dester baz 
daz wir iht verdienen	des snellen rechen haz 
sin lip der ist so schoene	man sol in holden han 
er hat mit siner chrefte	 so manigiu wunder getan
Do sprach der kunige des landes	 nu si vns willechomen 
er ist edel vnde kuone	daz han ich wol uernomen 
des sol er geniezen	in der Bvrgonden lant	
do gie der herre Gunther	da er Sifriden vant
Der wirt vnd sine geste	enpfiengen so den gast 
daz in an ir zvhten	vil luzel ie gebrast 
des begvnde in nigen	der wetliche man 
daz si im heten gruozen	so rehte schoene getan
Mich wndert diser mære	sprach der kunich zehant 
von wannen ir	edel Sifrit	sit chomen in ditze lant 
oder waz ir wellet werben	ze Wormz an den Rin	
do sprach der gast ze dem kvnige	 daz sol iv unverdaget sin
Mir wart gesaget mere	in <mines> vater lant 
daz hie bi iv weren	 daz hete ich gerne bechant	
die kuonsten reken	des han ich vil vernomen 
die ie kvnich gewunne	darumbe bin ich her bechomen
ovch hoere iuch selben	der <degenheite> iehen 
daz man kvnich deheinen	chuoner habe gesehen 
des redent vil die lute	vber elliv disiv lant 
nune wil üch niht erwinden	vntz ez mir werde bechant
Ich bin ovch ein reche	vnde solde krone tragen 
ich wil daz gerne fuege	daz si von mir sagen 
daz ich habe von rehte	beidiu lute vn– lant 
darumbe sol min ere	vnd ovch min hovbet wesen phant
Nv ir sit so kuone	als mir ist geseit 
nune ruoche <ich>	ist ez ieman	liep oder leit 
ich wil an iv ertwingen	swaz ir muget han 
lant vnde burge		 daz sol mir werden vndertan
Den kunich hete wnder	vnd sine man alsam
vmbe solhiu mære	 als er hie uernam 
daz er des hete willen	er name im siniu lant 
daz horten sine degne	 do wart in zvrnen bechant
Wie het ich daz uerdienet	sprach Gunther der <degen> 
des min vater lange	mit eren hat gepflegen 
daz wir daz solden verliesen	von iemans uberchraft 
wir liezen vbel schinen	daz wir ovch pflegen riterschaft
Ich ne wils niht erwinden	sprach der kuone man 
ez en mvgen von dinen ellen	din lant den fride han 
ich wils alles walten	vnd ovch div erbe min 
erwirbest dus mit sterche	div sulen dir vndertanech sin	[5b]
Din erbe vnd ovch daz mine	sulen geliche ligen 
sweder vnser einer	an dem anderen mach gesigen 
dem sol ez allez dienen	die lute vnd ovch diu lant	
daz widerredet Hagne	 da unde Gernor sa zehant
Wir han des niht gedingen	sprach do Gernot 
daz wir iht lande ertwingen	 daz iemen darumbe tot
gelige vor heldes handen	wir haben richiv lant 
div dienent vns ze rehte	 ze niemen sint si baz bewart
Mit grimmegen mvote stuonden	da die frivnde sin 
do was ovch darunder	von Mecen Ortwin 
der sprach	disiu suone	ist mir harte leit 
iv hat der starke Sifrit	vnuerdient widerseit
Ob ir vnd iwer brueder	hetet niht die wer 
vnd ob er danne hete	ein ganzez kvniges her 
ich trute wol erstriten	daz der kuene man
dise starche ubermvote	 von waren schulden muose lan
Daz zurnde harte sere	 der helt von Niderlant 
er sprach	sich sol uermezen	niht wider mich din hant 
ich bin ein chunich riche	so bistv kvniges man 
ian dorften mich din zwelue	mit strite nimer bestan
Nach swerten rief do sere	von Mezen Ortwin	
er mohte Hagnen swester svn	von Tronie vil wol sin 
daz der so lange dagte	daz was dem kunige leit 
do vnderstuont ez Gernot	ein riter chuone vnde gemeit
Er sprach zvo Ortwine	 lat iwer zurnen stan 
vns hat der herre Sifrit	solhes niht getan 
wir mvgenz noch wol scheiden	mit zvhten	dest min rat	
vnd haben in ze frivnde	daz vns noch lobelicher stat
Do sprach der starke Hagne	 vns mac wol wesen leit 
allen dinen degnen	daz er ie gereit
durch striten her ze Rine	er soldez haben lan 
im heten mine herren	solher leide niht getan
Des antwrte Sifrit	der kreftige man 
muot iuch daz	her Hagne	daz ich gesprochen han 
so sol ich lazen chiesen	daz die hende min
wellent vil gewaltich	hie ze den Bvrgonden sin
Daz sol ich eine wenden	sprach aber Gernot 
allen sinen degnen	reden uerbot
iht mit ubermvote	 des im were leit 
do gedahte ovch Sifrit	an die vil herlichen meit
Wie zeme <vns> mit iv striten	sprach aber Gernot 
swaz helde nu darunder		mvozen ligen tot 
wir hetens luzel eren		vnd ir vil chleinen frum	
des antwrt ime do Sifrit	des kuniges Sigemvndes svn
Warumbe bitet Hagne	 vnd ovch Ortwin 
daz er niht gahet striten	mit den frivnden sin 
der er hie so manegen	ze den Burgonden hat	
si mvozen rede uermiden	daz was Gernotes rat
Ir sult vns wesen willechomen	so sprach daz voten kint 
mit <iwern> hergesellen	die mit iv komen sint 
wir svlen iuch gerne dienen	ich vnde die mage min	[6a]
do hiez man den gesten	senchen den Gunthers win
Do sprach der wirt des landes	 allez daz wir han	
geruochet irs nach ern	daz si iv undertan
vnd si mit iv geteilet	lip unde guot	
do wart der herre Sifrit	ein luzel sanfter gemuot
Do hiez man in behalten	 allez ir gewant 
die besten herberge	 man suohte	die man vant 
Sifrides knehten	 man schuof in guot gemach 
den gast man sit vil gerne	ze den Burgunden sach
Man bot im michel eren	danach ze manigen tagen 
tusent stvnden mere	danne ich iu kan gesagen 
daz hete versolt sin ellen	ir svlt gelovben daz 
in sach vil lucel iemen	der im wære gehaz
Sich flizen churzewile	 die kunige vnd ovch ir man 
so was er ie der beste	 swes man da began 
des enchunde im gevolgen nieman	so michel was sin kraft 
so si den stein wrfen	oder schuzen den schaft
Swa si bi den frovwen	durch ir hofscheit
kurzwile phlagen	 die riter vil gemeit 
da sach man ie vil gerne	den helt von Niderlant 
er hete vof hohe minne	 sine sinne gewant
Swes man ie begunde	des was sin lip bereit 
er truoch in sime sinne	ein minnecliche meit 
vnd ovch in ein diu frovwe	die er noch nie gesach 
div im in heimliche	vil dike guotlichen sprach
Swenne vof deme houe wolden	spilen da diu kint 
riter vnde knehte	daz sach vil diche sint
Chriemhilt durch die venster	div kvniginne her 
deheiner churzwile	bedorfte si in den citen mer
Wester daz si in sehe	die er in herzen truoch 
da het er kurtzwile	immer von genuoch 
sehen si siniv ovgen	ich wil wol wizen daz 
daz im in dirre werlde	nimmer kvnde werden baz
Swenner bi den helden	vof dem houe stuont 
also noch die lute	durch kurzewile tuont 
so stuont so minnecliche	daz Siglinde kint 
daz in von herzeliebe	trute manich vrowe sint
Er gedaht ovch manige zite	wie sol daz geschehen 
daz ich die maget edele	mit ovgen mvge sehen 
die ich von herze minne	vnde lange han getan 
diu ist mir noch vil fremde	des mvoz ich truorich gestan
So ie die kunige riche	riten in ir lant 
so muosen ovch die rechen	mit in al zehant 
da mite muost ovch Sifrit	daz was den frovwen leit 
er leid ovch von ir minne	dike michel arbeit
Sus wond er bi den herren	 daz ist alwar	
in Gunthers lande	vollechlich ein iar 
daz er die minneclichen	die cit nie gesach 
davon im sit vil liebe	vnd leide gesach

v nahent fremdiu mere	in Gunthers lant
von boten	die in verre	wurden dar	esant
von vnkunden rechen	 die in truogen haz 
do si die rede vernamen	leit was in werlich daz
Die wil ich iv nennen	ez was Liudger
vzer Sahsen lande	ein richer furste her 
vnd ovch von Tenemarche	der kunich Liudgast 
die brahten in ir reise	vil manigen herlichen gast
Ir boten komen warn	 in Gvnthers lant 
die sine viende	dar hete gesant 
do vragte man der mære	die vnchunden man 
man hiez die boten balde	ze houe fur den kunich gan
Der kunich si gruozte schone	er sprach	sit willechomen 
wer iuch her habe gesentet	des han ich niht vernomen 
daz svlt ir lazen hoeren	 sprach der kunich guot 
do vorhten si vil sere	den grimmen Gunthers muot
Wel ir	kunich	erlovben	daz wir iu mære sagen 
diu wir iu da bringen	so sulen wir niht verdagen 
wir nennen iv die herren	 die vns here habent gesant 
Liudgast vnd Liudger	 die wellent iuch suochen inz lant
Ir habet ir zorn verdient	ia horten wir wol daz 
daz iu die herren beide	 tragent grozen haz 
si wellent heruerten	ze Wormz an den Rin 
in hilfet vil der degne	des sult ir gewarnet sin
Inre zwelf wochen	diu reise muoz geschehen 
habet ir iht guoter friunde	daz lazet balde schein 
die iu friden helfen	 die burge vnd iuriu lant 
hie wirt von in verhovwen	vil manich helme vnd rant
Oder welt ir mit in dingen	daz enbietet in dar 
son ritent iu so nahen	niht die manigen schar
der iwer starken viende	 vof herzenlichiu leit 
davon verderben muozen	 vil guote ritter gemeit
Nv beitet einiv wile	 ich chvndiu minen muot 
vnz ich mich baz versinne	sprach der kunich guot 
han ich guoter iemen	 die sol ich niht verdagen
disiu starchen mere	sol ich minen friunden clagen
Gunthere dem richen	leide wart genuoch	
die rede er tovgenliche	in sime herze truoch 
er hiez gewinnen Hagnen	vnd ander sine man
vnd bat ovch harte balde	ze houe nach Gernoten gan
Do chomen dar die besten	swaz man der da vant 
er sprach	man wil vns suochen	her in vnser lant
mit starchen heruerten	daz lat iu wesen leit	
des antwrte Gernot		ein riter chuone vnde gemeit
Daz wer ot wir mit swerten	so sprach Gernot 
da sterbent wan die veigen	 die lazen ligen tot 
darumbe ich niht vergezzen	 mach der eren min 
die vnser viende	svlen vns willechomen sin
Do sprach von Trony Hagne	 daz dunket mich nih guot 
Liudgast vnd Liudger	die tragent vbermvot	[7a]
wir mugen vns niht besenden	in so churzen tagen	
so sprach der kuone reche	 ir sultez Sifride sagen
<Die> poten herbergen	hiez man in die stat 
swie uient man in were	vil schoene ir pflegen bat
Gunther der riche	daz was wol getan	
vnz er eruant an friunden	wer in da wolde gestan
Dem kunige in sinen sorgen	was doch uil leit 
do sach in trurnde	ein riter vil gemeit 
der niht mohte wizzen	was ime was geschehen 
do bat er im der mære	der kunich Gunther veriehen
Mich nimet des michel wunder	sprach do Sifrit 
wie ir so habet vercheret	die froelichen sit 
der ir mit vns nu lange	 habet alher gepflegen	
des antwrt ime do Gunther	der vil cierliche degen
la mag ich allen luten	die swere niht gesagen 
die ich mvoz toegenliche	 in mime herzen tragen 
man sol stæten friunden	chlagen herze not	
div Sifrides varwe	wart do bleich vnde rot
Er sprach zuo dem kvnige	 ich han iv niht verseit 
ich sol iv helfen wenden	elliv ivriv leit 
welt ir frivnt suochen	der sol ich einer sin
vnd truowe ez wol volbringen	mit eren an daz ende min
Nv lon iv got	her Sifrit	div rede dunchet mich guot 
vnd ob mir nimmer helfe		iwer ellen getuot 
ich frov mich doch der mære	daz ir mir sit so holt 
lebe ich deheine wile	ez wirt wol vmb ivch versolt
Ich wil iv hoeren lazen	warumbe ich truorich stan 
von boten miner viende	ich daz vernomen han 
daz si mich wellent svochen	mit heruerte hie 
daz getaten vns noch degne	hie ze lande nie
Daz lat ivch ahten ringe	sprach do Sifrit 
senftet iwer gemvote		tuot des ich iv bit 
lat mich iv erwerben	 eren vnde fruomen 
vnd bitet ivre degne	 daz si iv ze helfe chumen
Swenne iwer starche uiende	ze helfe mohten han
drizech tvsent degne	so woldich si bestan 
vnd het ieh miht wan tusent	des lat ivch an mich	
do sprach der kunich Gunther	 daz dien ich immer vmbe dich
So heizet mir gewinnen	tusent ivr man 
sit daz ich der minen	 bi mir niht enhan
niwan zwelf rechen		so wer ich iwer lant 
iv sol mit triwen dienen	immer Sifrides hant
Des sol vns helfen Hagne	vnd ovch Ovrtwin 
Danchwart vn– Sindolt	die lieben rechen din 
ovch sol da mit riten	Volcher der chuene man 
der sol den vanen fuoren	daz ich des nieman gan
Vnd lat die boten riten	heim in ir herren lant 
daz si vns sehen sehiere	daz tuo man in bechant 
so daz vnser burge	muozen fride han	
do hiez der kunich besenden	beide mage vnde man	[7b]
Die boten Liudigiers	ze houe giengen do 
daz si ze lande solden	des waren si vil vro 
do bot in riche gabe	der kvnich Gunthier guot 
vnd schuof in sin geleite	des stuont in hohe der mvot
Nu saget	sprach do Gunther	den starken vienden min 
si mvgent mit ir reise	wol deheime sin 
wellen si mich aber suochen	her in miniv lant 
miern zerinne miner frivnde	in wirt arebeit bechant
Den boten riche gabe	man do fur truoch 
der het in ze gebene	Gunther genvoch 
die wolden niht versprechen	die Liudgers man 
do si vrlovp genamen	si schieden vrolich dan
Do die boten waren	 ze Tenemarken chomen
vn der kvnich Liudgast	hete daz vernomen 
wie si von Rine chomen	als im daz wart geseit 
ir starkez vbermvoten	was im werlike leit
Si sagten daz si heten	vil manigen kuonen man 
ovch sahen si darunder	einen reken stan 
der was geheizen Sifrit	ein helt uz Niderlant 
ez leidete Liudgaste	 do er daz mere bevant
Do die von Tenemarke	ditze horten sagen 
do ilten si der friunde	deste me beiagen 
vnz daz er Liudgast	siner chuenen man
zweinzech tvsent degne	ze siner reise gewan
Do besande sich ovch von Sahsen	der chuene Livdger 
vnz si vierzech tusent	heten vnd dannoch mer 
mit den si wolden riten	in Burgonden lant 
do hete ovch sich hie heime	der kvnich Gunther besant
mit den sinen magen	vnd siner bruoder man 
die si wolden fueren	 durch urlivge dan 
vnd ovch die Hagnen reken	des gie den helden not 
darumbe mvozen degne		sider chiesen den tot
Si flizzen sich der reise	do si wolden dan 
den vanen mvose leiten	Volker der chuone man 
also si wolten riten	 von Wormz an den Rin 
Hagne <von> Tronie		der muose scharmeister sin
Damite reit ovch Sindolt	vnd der kuone Huonolt 
die wol gedienen kvnden	daz Gunthers golt 
Danchwart Hagnen bruoder	vnd ovch Ortwin 
die mohten wol mnit eren	in der herverte sin
Her kvnich	seit hie heime	sprach do Sifrit 
sit daz mir iwer reken	 wellent volgen mit 
belibet bi den frovwen	 vnd traget hohen mvot 
ich trov iv wol behuoten	beide ere vnde guot
Div iuch da wolden svochen	ze Wormz an den Rin 
daz wil ich wol behuoten	si mugen da heime sin 
wir sulen in geriten	so nahen in ir lant 
daz in ir vbermvoten	 werde ze sorgen bewant
Von Rine si durch Hessen	mit ir helden riten
gegen Sahsen lande	 da wart sit gestriten	[8a]
mit rovbe vnd mit brande	wosten si daz lant 
daz ez den fvrsten beiden	wart mit arebeit bechant
Si chomen vof die marche	 die knehte zogten dan 
Sifrit der vil starche	vragen des began 
wer sol des gesindes	vns nu hueten hie	
ia wart den Sahsen	geriten schedilicher nie
Si sprachen	lat die tvmben	hueten vof den wegen
den kuonen Danchwarten		 der ist ein sneller <degen> 
wir fliesen deste minner	 von Liudgers man 
lat in vnd ovrtwinen	die naht huote han
So wil ich selbe riten	sprach Sifrit der degen 
vnd wil der warte		gen den vienden <pflegen> 
vnz ich rechte eruinde	 wa die rechen sint	
do wart gewafent schiere	der schoenen Siglinden kint
Daz volch bevalher Hagnen	do er wolde dan 
vnde Gernote	dem vil kuone man 
do reiter eine danne	in der Sahsen lant 
des wart von im verhowen	des tages manich helmbant
Do sach er her daz groze	daz vf dem velde lac 
daz wider siner helfe	mit vngefuoge wac 
des was wol vierzech tusent	oder dannoch baz 
Sifrit in hohen mvote	sach vil frovlichen daz
Do hete sich ovch ein reke	gen den vienden dar
erhaben vof die warte	der was ze flize gar 
den sach der herre Sifrit	vnd in der kuone man 
ieweder do des andern	mit nide huoten began
Ich sag iv wer der were	der der warte <pflach> 
ein liehter schilt von golde	im vor der hende lac 
ez was der kvnich Livdgast	der huote siner schar 
dirre gast vil edele	spranchte herlichen dar
Nv het ovch in her Livdgast	vientlichen erkorn 
div ros si namen beidiu	cen siten mit den sporn 
si neigten vf die schilde	die schefte mit ir chraft 
des wart der kunich riche	mit grozen sorgen behaft
Diu ros nach sachen truogen	diu richen kuniges kint
beide fur ein ander	sam si wete ein wint 
mit zovmen wart gewendet	vil riterlichen dan 
mit swerten ez versuohten	 die zwene grimme man
Do sluoch der herre Sifrit	daz al daz velt erdoz 
do stovp vz dem helme	 sam von brenden groz
die viwer rote vanchen	von des heldes hant 
ir ietweder den sinen	an dem anderen vant
Ovch sluog im her Liudgast	vil manigen grimmen slach 
ir ieweders ellen	vf schilden vaste lac 
do heten daz gehuotet	wol drizech siner man 
e daz im die chomen	den sich doch Sifrit gewan
mit drin starchen wnden	die er dem kunige sluoc
durch eine wize brunne	diu was guot genuoc 
daz swert an sinen eken	braht vz wunden bluot 
des muose der kunige Liudgast	haben truorigen muot	[8b]
Er bat sich leben lazen	vnd bot im siniv lant
vnde sagte im daz er were	Liudgast genant 
do komen sine rechen	die heten wol gesehen
was da von in beiden	vf der warte was geschehen
Er wolt in fueren dannen	do wart er an gerant
von drizech sinen mannen	do werte des heldes hant
sinen richen gisel	mit vngefuegen slegen 
sit tet schaden mere	der cierliche degen
Die drizech er ze tode	vil werlichen sluoc 
er liez in leben einen	balde er reit genuoc
vnd sagte hin diu mere	was hie was geschehen 
ovch mohte mans die warheit	an sime roten helmen sehen
Den von Tenemarke	was vil grimme leit 
ir herre was gevangen	do in daz was geseit 
man sagte ez sinen bruoder	toben er began
von vngefuegem zorne	 wan im leide was getan
Livdgast der reche	 was gefueret dan
von Sifrides gewalte	zvo Gunthers man 
er bevalch in Hagnen	do in daz wart geseit 
daz er der kunich were	do was in mazlichen leit
Man hiez den Burgonden	ir vanen binden an 
wol vof	sprach Sifrit	 hie wirt mere getan 
ê sich der tac verende	sol ich haben den lip 
daz gemvot in Sahsen		vil manich wætliche wip
Ir helde von dem Rine	ir svlt min nemen war 
ich chan iuch wol geleiten	in Liudgers schar 
so sehet ir helme howen	von guoter helde hant 
ê daz wir wider wenden	 iv wirdet sorge bechant
Ze rossen gahte do Gernot	vnde die sine man 
den vanen zvchte balde	der kvone spilman 
Volcher der herre	 do reit er vor der schar 
do was ovch daz gesinde	ze strite erlichen gar
Si fuorten doch niht mere	niwan tvsent man 
darvber zwelf reken	 stieben do began
diu molte von den strazen	si riten vber lant 
do sach man von in schinen	vil manigen herlichen rant
Do waren ovch die Sahsen	 mit ir schar chomen 
mit swerten wol gewahsen	daz han ich sit vernomen 
div swert die sniten sere	den helden an der hant 
do wolden si den gesten	 weren burge vnd lant
Der herren scharmeister	 daz volc do fuorten dan 
do was ovch Sifrit komen	 mit den sinen man 
die er mie in brahte	 vzer Niderlant 
des tages wart in sturme	vil manich bluotigiu hant
Sindolt vnd Huonolt	vnd ovch Gernot 
die sluogen in dem strite	vil manigen helt tot 
ê si rehte erfvnden	 wie chuene was ir lip 
daz mvose sid beweinen	vil manich wætlichez wip
Volker vnd Hagne	vnd ovch Ortwin
laschten in dem bluote	vil maniges helmes schin [9a]
mit fliezendem bluote	die sturm kuene man 
da wart von Danchwarte	vil michel wunder getan
Die von Tenemarche	versvohten wol ir hant 
do horte man von hurte	erdiezen manigen rant 
vnd ovch von scharphen swerten	der man da uil gesluoch 
die stritkuonen Sahsen	taten schaden da genuoch
Do die von Burgonden	 drvngen in den strit 
von in wart verhowen	 vil manich wnde wit 
do sach man vber satele	vliezen daz bluot 
svs wrben nach den eren	die helde chuone vnde guot
Man horte da liute erhellen	den helden an der hant
diu vil scharpfen wafen	 do die von Niderlant
drvngen nach ir herren	in die herten schar 
si chomen degenliche	mit samt Sifride dar
Volgen der von Rine	nieman man im sach 
man mohte kiesen fliezen	den bluotigen bach
durch die liehten helme	von Sifrides hant 
den herren Liudgern	 er nv vor sinen hergesellen vant
Dri widerchere	heter nu genomen
durch daz her anz ende	nu was Hagen chomen 
der half im wol ervollen	in sturme sinen mvot 
des muose da ersterben	vor im vil manich riter guot
Do der starke Liudger	Sifriden vant 
vnd daz er alse hohe	 truoch an siner hant
den guoten Balmungen	vnd ir so manigen sluoch 
des wart der herre zornich	vnde grimmich genuoch
Do wart michel dringen	vnd grozer swerte chlanch 
da ir ingesinde	zvo ein ander dranch 
do versuohten si die rechen	beide dester baz 
die schar begunden wichen	 sic huop da grozlicher haz
Dem vogte von den Sahsen	was daz wol geseit 
sin bruoder was gevangen	daz vas im harte leit 
wol wesser daz er tæte	 daz Siglinde kint 
man ceh es Gernoten		wol ervant er ez sint
Die slege Liudgers	 die waren also starch 
daz im vnderm satle	 struhte daz marc 
do sich daz ros erholte	der kuene Sifrit
der gewan in dem sturme	einen freislichen sit
Des half im Hagne	 vnd ovch Gernot 
Danchwart vnd Volker	des lag ir uil da tot 
Sindolt vnd Huonolt	vnd oertwin der degen 
die chvnden in dem strite	cem tode manigen nider legen
In sturme vngescheiden	waren die fvrsten her 
do sach man vber helme	fliegen manigen ger
durch die liehten schilde	von der helde hant 
man sach da uar nach bluote	vil manigen herlichen rant
In dem starken stvrme	 erbeizte manich man
nider von den rossen	 an ander liefens an
Sifrit der kuene	 vnd ovch Livdger 
man sach da sefte vliegen	vnd vil manigen scarfen ger	[9b]
Do flovch daz schiltgespenge	von Sifrides hant 
den sic gedaht erwerben	der helt von Niderlant
an den kuenen Sahsen	der man wundersach 
hey waz liehter ringe	der kuene Danchwart zebrach
Do het der herre Livdger	vf eime schilte erkant
gemalt eine krone	vor Sifrides hant 
wol wesser daz ez were	der kreftige man 
der helt zuo sinem frivnden	luote ruofen began
Gelovbet iuch des strites	alle mine man 
svn den Sigmundes		ich hie geselhen han 
Sifriden den starken	han ich hie bekant 
in hat der ubel tivfel	cen Sahsen gesant
Die vanc hiez er lazen	in deme sturme nider 
frides er do gerte	des werte man in sider 
doch muoser werden sigel	in Gunthers lant 
daz het an im betwngen	div Sifrides hant
Mit gemeinem rate	 so liezen si den strit 
durkel vil der helme	vnd der schilte wit
si leiten von den handen	swaz so man der vant 
die truogen bluotes varwe	von der Burgonden lant
Si viengen swem si wolten	des heten si gewalt 
Gernot vnd Hagne		die reken vil balt 
die wnden hiezen barn	si fuorten mit in dan
geuangen zuo dem Rine	funfhundert wetlicher man
Die siglosen reken	 ze Tenemarken riten 
do heten ovch die Sahsen	so hohe niht gestriten 
daz man in lobes iæhen	daz was den helden leit 
do wurden ovch die veigen	von friunden sere gecleit
Si hiezen ir gewefen	sovmen an den Rin 
ez here wol geworben	mit den henden sin
Sifrit der reke	der hetez guot getan 
des im iehen muosen	alle Gunthers man
Gegen Wurmes sande	der herre Gernot 
heim ze <sinem> lande	den frivnden er enbot 
wie gelungen were	im vnd sinem man 
ez heten die vil kuonen	wol nach eren getan
Die garzune liefen	 von den ez wart geseit 
da freuten sieh von liebe	die e heten leit 
dirre lieben mere	div in da waren komen 
da wart von edelen frovwen	michel fragen vernomen
wie gelungen were	des richen kvniges man 
man hiez der boten einen	fur Chriemhilde gan 
daz geschach vil tovgen	 ian torstez vber lut	
wan si hete darunder	ein liebez herzen truot
Do si den boten komende	zir kemenate sach 
Chriemhilt div schoene	vil guetlichen sprach 
nu sag an liebiv mere	ia gib ich dir min golt 
tuostuz an liegen	ich wil dir immer wesen holt
Wie schiet vz dem strite	min bruoder Gernot
vnd ander mine friunde	 ist vns ieman tot	[10a]
oder wer tet daz beste	 daz solt du mir sagen	
do sprach der bote schiere	 wir heten ninder einen zagen
Ze ernste vnd ze strite	reit nieman also wol 
vil ediliv kvniginne	sit ich ivz sagen sol 
so der gast vil edele	 vzer Niderlant 
da worhte michel wunder	des kuenen Sifrides hant
Swaz die reken alle	in strite han getan	
Danchwart vnd Hagne	vnd anders kvniges man	
swaz si na ern striten	das was gar ein wint 
wan aleine Sifrit	 des kvnich Sigmundes kint
Si fruomten in dem sturme	der helde vil derslagen 
doch moht iu dizze wunder	nieman wol gesagen
waz da worhte Sifrit	suuenner ze strite reit 
den frovwen an ir magen	tet er div grozlichen leit
Ovch mvoste da beliben	vil maniger frovwen truot 
sin slege man horte	vf helmen also lut 
daz si von wunden brahten	daz fliezende bluot 
er ist an allen dingen	ein riter kvone vn– gvot
Swaz da hat begangen	von Mece oertwin	
swaz er ir mohte erlangen	mit dem swerte sin 
die mvozen wnt beliben	 oder meistec tot	
da tet iwer bruoder	 die aller grozisten not
div immer in den sturmen	chvnde sin geschehen 
man mvoz der warheite	 dem vz derwelten iehen 
die stolzen Burgonden	habent so geuarn 
daz si vor allen schanden	sich kunnen wol bewarn
Man sach da von ir handen	vil manigen satel bloz 
da von liehten swerten	daz velt so lv^te erdoz 
die reken von dem Rine	die habent so geriten 
daz ez ir vienden	 wære bezer vermiten
Die kuenen Troniere	 die fruomten groziv leit 
do mit volkes kreften	daz her zesamne reit 
da frumte manigen toten	des chuenen Hagnen hant 
des vil ze <sagene> were	her in Bvrgonden lant
Sindolt vnd Huonolt	 die Gernotes man 
vnd Ruomolt der kuone	die hant so vil getan 
daz ez Liudgere	mag immer wesen leit 
daz er den iwren magen	ce Rine widerseit
Strit den aller hohsten	der inder da geschach
ze iungest vnd zem ersten	den ieman da gesach 
den tet vil degenlichen	div Sifrides hant 
er bringet rike gisle	in Gvnthers lant
Die twanch mit sinen ellen	der wætlike man 
des ovch der kvnich Liudgast	mvoz den schaden han 
vnd ovch von Sahsen landen	 sin bruoder Liudger 
nu hoert miniv mære		edel kvniginne her
Si hat gevangen beide	 div Sifrides hant 
nie so manigen gysel	man braht in dize lant 
so von sinen schvlden	 nv kvmt an den Rin	
ir chvnden disiv mere	nimmer lieber gesin	[10b]
Man bringet der gesvnden	fvnf hvndert oder baz 
vnd der verchvnden		wizet	frovwe	daz	
wol ahzech rote bare	her in vnser lant 
die meist hat verhowen	des <kuenen> Sifrides hant
Die durch vbermvote	 widerseiten an den Rin 
die muozen nu gevangen	die Gvnthers sin 
die bringet man mit vrovden	her in dize lant	
do erbluete ir liehtiv varwe	do si div mere rehte bevant
Ir schonez antluze	daz wart rosen rot 
do mit liebe was gescheiden	vz so grozer not
Sifrit der iunge	der wætliche man 
si vreute ovch sich ir frivnde	daz was von schulden getan 
Do sprach div minnechliche		dv hast mir wol geseit 
dv solt darvmbe haben		ze miete richiv chleit 
cehen march von golde		die heize ich dir nu tragen	
des mach man solhiv mære	richen frovwen gerne sagen
Man gap ime sine miete	dar golt vnd ovch daz cleit 
do gie an div venster	vil manich schoniv meit 
si warten vf die straze	riten man do vant
vil der hoh gemvoten	in der Burgunden lant
Da chomen die gesvnden	die wunden taten sam 
si mohten gruozen hoeren	von frivnden ane scham 
der wirt gen sinen gesten	vil frolichen reit 
mit vrovden was verendet	 sin grozlichez leit
Do enphie er wol die sine	 die fremden tet er sam	
wan dem riken kvnige	anders niht enzam 
wan danken guetliche	den	die im waren chomen 
daz si den sic nach eren	in stvrme heten genomen
Gvnther bat im mære	 von sinen frivnden sagen 
wer im an der reise	ze tode waren erslagen 
do het er verlorn niemen	niwan sechzech man 
verchlagen man die mvese	so sit vil helde sint getan
Die gesvnden brahten	 zerhowen manigen rant
von helme vil verscroten	in Gvnthers lant 
daz volk erbeizte nider	fur des kvniges sal
ze lieben antfange	 man horte grozlichen schal
Do hiez man herbergen	die rechten in die stat 
der kvnich siner geste	vil schone pflegen bat 
er hiez der wunden huoten	vnd schafen guot gemach 
wol man sine tvgende	an sinen vienden sach
Er sprach ze Liudegaste	 nu sit mir willechomen		
ich han von iwren schvlden	schaden vil genomen 
der wirt mir nv vergolten	ob ich geluche han 
got lone minen friunden	 si habent liebe mir getan
Ir mvget in gerne danchen	sprach do Livdger 
also hoher gysel	gewan nie chvnich mer 
vmbe schone huote	 wir geben michel guot 
daz ir genedichlichen	an iwren vienden tuot
Ich wil iv beide lazen	sprach er	ledech gen 
daz mine viende		hie bi mir besten	[11a]
des wil ich haben purgen	daz si miniv lant
iht rvmen ane hulde		des bot do Liudger die hant
Man brahte si ze ruwe	 vnd schuof in ir gemach 
den wunden man gebettet	vil guotlichen sach 
man schanchte den gesvnden	met vnd guoten win 
do chvnde daz gesinde	nimmer frolicher sin
Ir zerhowen schilde	behalten man do truoch 
vil bluotiger setle	der was da genvoch 
die hiez man verbergen	daz weinten niht diu wip 
da kom her vil muede	maniges guoten ritters lip
Der kvnich pflac siner geste	vil guotlichen wol 
der fremden vnd der kvnden	 diu lant waren vol 
er bat der ser wunden	 vil guotlichen phlegen 
do was ir vbermueten	 vil harte ringe gelegen
Die erzenie chvnden	 den bot man richen solt 
silber ane wage	 darzuo daz liehte golt 
daz sich die helde nerten	nach des strites not 
daz zuo der kvnich den gesten	gabe grozlichen bot
Die wider heim ze hûse	 heten reise mvot 
die bat man noch beliben	so man frivnden tuot 
der kvnich gie ze rate	wie er lonte sinen man 
si heten sinen willen	nach grozen eren getan
Do sprach der herre Gernot	 man sol si riten lan 
vber sehs wochen	si in daz chunt getan 
daz si chomen widere	zeiner hohgecit 
so ist maniger geheilet	der noch wunder lit
Do gerte ovch vrlovbes	Sifrit von Niderlant 
do der kvnich Gunther	den willen sin eruant 
er bat im minnechlichen	noch bi im bestan 
niwan durch sin swester	son werez niht getan
Darzuo was er ze riche	 daz er iht nemen solt 
er hetez wol verdienet	der kunich was im holt 
sam waren sine magen	 die heten daz gesehen 
waz von sinen handen	in dem strite was geschehen
Dvrch der schuonen willen	gedaht er noch bestan 
ob er si sehen mohte	sit wart ez getan 
wol nach sinen willen	wart im div maget bechant 
sit reiter froliche	in Sigemvndes lant
Der wirt hiez ce allen ziten	riterschefte pflegen 
daz tet vil willechlichen	do manich iunger degen 
die wile hiez er sideln	vor Wormz an den sant
den	die im komen solden	in der Burgonden lant
In den selben ziten	do si nu solden chomen 
do het div schone <Chriemhilt>	div mære wol vernomen 
er wolde hohgecite	durch liebe friunde han 
do wart vil michel flizen	von schonen frowen getan
mit wete vnd mit gebene	 daz si da solden tragen 
vote div vil riche	 div mere horte sagen
von den stolzen reken	die da solden chomen 
do wart vz der valde	vil richer chleider genomen	[11b]
Dvrch ir kinde liebe	hiez si bireiten chleit 
da mite wart gezieret	vil frovwen vn– meit 
vnd uil der iungen rechen	vz Bvrgonden lant 
si hiez ovch vil der fremden	bruoven herlich gewant

an sach si tegilichen	nu riten an den Rin 
die zer hohgecite	gerne wolden sin 
die durch des kvniges liebe	chomen in daz lant 
den bot man svmelichen		ros vnd gewant
In was ir gesidele	 allen wol bereit 
den hohsten vnd den besten	als vns daz ist geseit 
zwein vnd drizech fursten	da zer hohgezit 
da cierten sich engegene	alle vrowen wider strit
Ez was da vil vnmuezech	Gyselher daz kint 
die geste mit den kvnden	vil guetlichen sint
die enphieng er vnd Gernot	vnd ovch ir beider man 
ia gruozten si dich degne	als ez nach eren was getan
Vil golt roter setle	si fuorten in daz lant 
cierliche schilde	 vnd erlich gewant
brahten si ze Rine	zvo der hohgezit 
manigen vngesvnden	sach man frolichen sit
Die in den beten lagen	vnd heten wnden not 
die muosen des vergezen	wie herte was der tot 
die siechen vngesvnden	mvosen si verchlagen 
si vrovten sich der mere	gen den hohgezite tagen
wie si leben solden	da ze der wirtschaft 
wunne ane maze	 mit frovden vber chraft
heten al die lûte	swaz man ir da vant 
des hvop sich michel frovde	vber al daz Gvnthers lant
An einem pfinchsten morgen	sach man fur gan
gechleidet wunnechliche	vil manigen kuenen man 
fvnf tvsent oder mere	da cer hohgecit 
sich huop div chvrzewile	an manigen enden wider strit
Der wirt der het die sinne	im was daz wol erkant 
wie rehte herzenliche	der helt von Niderlant
sine swester trûte	 die er noch nie gesach 
der man so grozer schoene	vor allen iwnchvrovwen jach
So sprach zuo dem kvnige	der degen Ortwin 
welt ir mit vollen eren	ze der hochzite sin 
so svlt ir lazen schovwen	div wunnechlichen kint 
die mit so grozen eren	 zen Burgonden sint
Waz wære mannes wunne	des frovte sic sin wip 
ez entæten schoene meide	vnd herlichiv wip 
lazet iwer swester	fur iwer geste gan	
der rat was ze liebe	vil manigem helde getan
Des wil ich gerne volgen	sprach der kvnich do 
alle die ez erfvnden	warns harte fro 
ern bot ez frovn voden	 vnd ir tohter wolgetan 
daz si mit ir meiden	hin ze houe solde gan
Do wart vz den schrinen	geschvchet guot gewant	[12a]
swaz man in der valde	der guoten wæte vant 
die bovge mit den borten	daz was in vil bereit 
sich zierte riterliche	manich wætlichiu meit
Vil manich reche tvmber	des tages hete mvot 
daz er an ze sehene	den frovwen were gvot 
daz er da fvr niht næme	eins riken kvniges lant 
si sahen die vil gerne	die si heten bekant
Do hiez der kvnich riche	mit siner swester gan 
die ir dienen solden	hvndert siner man 
ir vnd siner mage	die truogen swert enhant 
daz was daz hofgesinde	in der Bvrgonden lant
voten die vil richen	sach man mit ir chomen 
div hete schoeniv frovwen	gesellichlich genomen
hvndert oder mere	die trvogen richiv cleit 
ovch gie da nach ir tohter	manich wetlichiu meit
Von einer kemenaten	 sach man si alle gan 
do wart vil michel dringen	von helden dar getan 
die des gedinge heten	ob chvnde daz geschehen 
daz si die mait edele	solden vrolichen sehen
Nv gie div minnecliche	also der morgenrot
tuot vz truoben wolchen	da schiet von maniger not
der si da truoch in herzen	vnd lange hete getan 
er sach die minneclichen	nv uil herlichen stan
Ja luhte ir von ir wæte	vil manich edel stein 
ir rosen rotiv varwe	vil minnechlichen schin 
ob iemen wunsen solde	der kvnde niht geiehen 
daz er ce dirre werlde	hete iht schoeners gesehen
Sam der liehte mane	vor deme sterne stat 
der schin so lûterliche	ob den wolchen gat 
dem stvont si nu geliche	vor andern frovwen guot 
des wart wol gehoehet	vil maniges heldes mvot
Die riken kamerere	sach man vor in gan 
die hoh gemvoten degne	wolden des niht lan 
sin drvngen da si sahen	die minnechlichen meit 
Sifride dem herren	wart beide liep vnd leit
Er dahte in sinem mvote	wie kvnde daz ergan 
daz ich dich minnen solde	daz ist ein tvmber wan 
sol aber ich dich fremden	so wære ich samfter tot 
er von gedanken	 dike bleich vnde rot
Do stvont so minnechliche	daz Siglinde kint 
sam er entworfen were	an ein permeint
von guotes meisters listen	so man in iach 
daz man helt neheinen	 so schoenen nie gesach
Die mit der frovwen giengen	die hiezen von den wegen
wichen allenthalben	 daz leiste manich degen 
div hoch traginden herzen	vrovten manigen lip 
man sach in hohen zvhten	manich wetliche wip
Do sprach von Bvrgonden	 der herre Gernot 
der iv sinen dinest	so guotlichen bot 
Gvnther	lieber bruoder	dem sult ir tuon alsam [12b]
vor allen disen reken	des rates ich mich nimmer gescham
Ir heizet Sifriden	zvo miner swester kvomen 
daz in div maget gruoze	des habe wir immer fruomen 
div nie gruozte reken	div sol in gruozen pflegen 
da mit wir han gewunnen	den cierlichen degen
Do giengen des wirtes magen	da man den helt vant 
si sprachen zuo dem reken	vzer Niderlant 
iv hat der kvnich erlovbet	ir svlt ze hove gan 
sin swester sol ivch gruozen	daz ist ze eren iv getan
Der herre in sinen mvote	 was des vil gemeit 
do truoch er in dem herzen	liep ane leit 
daz er sehen solde	der schoenen voten kint 
mit minneclichen tvgenden	si gruozte Sifriden sint
Do si den hoch gemvoten	vor ir stende sach 
do erzvnde sich sin varwe	div schoene meit sprach 
sit willechomen	er Sifrit	ein edel riter guot	
do wart im von dem gruoze		wol gehohet sin muot
Er neig ir minnechlichen	 genade er ir bot 
si twanch gen ein ander	 der seneden minne not 
mit lieben ovgen blichen	 an ander sahen an
der herre vnd ovch div frovwe	daz wart vil tavgen getan
Wart da wrüntliche getrutet	ir vil wiziv hant
von herzenlieber minne	 des ist mir niht bechant 
doch wil ich niht gelovben	 daz ez wrde lam 
zwei minne gerndiv herze	heten anders missetan
Bi der svmerzite	vnd gen des meyen tagen
dorft er nihe mere	in sime herze tragen
so vil hoher vrovde	so er da gewan 
do im div gie an hende	die er ze trûte gerte han
Do dahte manich reke	hey wer mir sam geschehen 
daz ich ir gienge nebene	als ich in han gesehen 
oder bi ce ligenne	daz liez ich ane <haz >
er gediente noch nie reke	nach einer kvniginne baz
Von swelher kvnige lande	die geste komen dar 
die namen algeliche	wan ir zweier war 
ir wart erlovbet kvssen	den wertlichen man 
im wart ze dirre werlde	nie so liebe getan
Der kvnich von Tenemarke	sprach do sa cestunt 
des vil hohen gruozes	lit vil maniger wunt	
des ich da wol enpfinde	 von Sifrides hant 
got laze in nimmer me	ze Tenemarch in daz lant
Man hiez do allenthalben	 wichen von den wegen
der schoenen Kriemhilde	 manigen kuenen degen
sach man zvchtechliche	 ze kirche mit ir gan 
sit wart von ir gescheiden	der vil wætliche man
Do gie si zvo dem mvnster	ir volgete manich wip 
do was ovch wol gezieret	 der kvneginne lip 
daz da hoher wnse		maniger wart verlorn 
si was ze ovgenweide	manigem reke geborn	[13a]
Vil kvme beite Sifrit	daz man da gesanch 
er mohte sinen selden	immer sagen danch 
daz im div was so wege	die er in herzen truoch 
ovch was er der schoenen	holt von schvlden genuoch
Do si vz dem mvnstre	 nach messe chom gestan 
man bat den degen kuenen	wider zvo ir gan 
erst begund im danchen	div minneclike meit 
daz er vor den reken	so wichlichen streit
Nv lon iv got	er Sifrit	sprach daz edel kint 
daz ir daz habet verdienet	daz iv die reken sint
so holt in guoten triwen	 so ich si hore iehen	
do begunde er minnechliche	an frovn Kriemhilde sehen
Ich sol ivch immer dienen	sprach Sifrit der degen 
vnd enwil min hovbet	 nimmer ê gelegen 
ich en werbe nach ir willen	sol ich min leben han 
daz mvoz iv ze dienste	 min frov Kriemhilt	sin getan 
Inre tagen zweluen	 der tage als islich 
sach man bi dem degne	die maget lobilich 
so si ze houe solde	vor ir frivnden gan 
der dienst wart dem reken	durch groze liebe getan
Frovde vnde wnne	vnd michelen schal
sach man tegeliche	vor Gvnthers sal 
darvze vnd ovch darinne	vil manigen kvenen man 
Ortwin vnd Hagne	grozer wunder vil began
Swes ieman pflegen solde	des warn si bereit
mit volleclicher maze	die helde vil gemeit 
des wurden von den gesten	die rechen wol bechant 
davon so was gezieret	allez Gvnthers lant
Die da wunde lagen	 die sah man da fur gan 
si wolden kvrcewile	mit dem gesinde han 
schirmen mit den schilden	vnd schiezen manigen schaft 
des hulfen in genvoge	si heten michel chraft
In der hochzite	der wirt hiez ir phlegen
mit der beste spise	er hete sich begwegen
aller schlahte schande	die ie kvnich gewan 
man sach in friuntliche	zvo sinen gesten gan
Er sprach	ir gvoten reken	e ir scheidet hin 
so nemet mine gabe		also stet min sin 
daz ichz immer diene	versmehet niht min gvot 
daz wil ich mit iv teilen	des han ich vesten mvot
Die von Tenemarken	sprachen sa zehant 
ê wir wider riten	heim in vnser lant 
wir gern steter schuone	des ist vns reken not 
wir han von iwren degnen	manigen lieben frivnt tot
Livdgast geheilet	siner wunden was 
der voit von den Sahsen	nach strite wol genas 
eteliche toten	si liezen da ze lant 
do gie der kvnich Gunther	da er Sifriden vant
Er sprach zuo deme reken	nv rate wie ich tuo 
vnser geste wellent	morgen riten fruo [13b]
vnd gerent steter svone	an mich vnd an mine man 
nv rata	degen Sifrit	waz des guot si getan
Waz mir die herren bieten	daz wil ich dir sagen 
swaz funf hundert moere	 goldes mvgen tragen 
daz gebent si mir gerne	wil ich si ledich lan	
do sprach Sifrit	 daz wer vbel getan
Ir svlt si ledechlichen	hinnen lazen varn 
vnd daz die reken edele	furbaz bewarn
vienthlichez riten	her in iwr lant 
des lat iv geben sicherheit	beider herren hant
Des rates wil ich volgen	da mit si riten dan 
sinen vienden	wart daz kvnt getan 
ir goldes gerte niemen	daz si da buten ê 
da heim ir lieben frivnden	was nach den hermueden we
Manigen schilt vollen	man <dar> schazzes truoch 
er teilte es ane wage	sinen frivnden genuoch 
bi funfhvndert marken	vnd eteslichen baz 
Gernot der vil kuene	riet <Gvnther> daz
Vrlop si do namen	also si wolden dan 
do sach man die geste	fur Kriemhilde gan
vnd ovch da frov Vote	div kvniginne saz 
ez wrden nie degne	 mere gevrlovbet baz
Herberge wurden lere	do si dannen riten 
doch bestuont deheime	mit herlichen siten
der kvnich mit den sinen	vnd manich edel man 
die sach man tegliche	zvo Chriemhilde gan
Vrlovp nemen wolde	ovch Sifrit ein helt guot 
er wande niht erwerben	 des er hete muot 
der kvnich sagen horte	 daz er wolde dan 
Giselher der iunge	von der reise in gewan
War woldet ir nv riten	edel Sifrit 
belibet bi den reken	tuot des ich iv bit	
<bi> Gvnther dem kvnige	vnd bi sinen man 
hie sint vil schoene frovwen	die man ivch sol sehen lan
Do sprach der starke Sifrit	 so lat div ros stan 
ich wolde sin geriten	 des wil ich abe gan 
vnd traget hin die schilde	ich wolde sin ce lant 
des hat mich Giselher	mit eren wol erwant
Sus beleip der kuene	 durch frivnde lobe da 
ia wær er in den landen	 ninder anderswa
gewesen alse sanfte	da von daz gesach 
<[daz er nu tegeliche	 die schoenen Kriemhilde sach]>
Ddurch ir vnmazen schoene	der herre da beleip 
mit maniger chvrzwile	man nu die zit vertreip 
wan daz in twanch ir minne	div gap im diche not 
darvmbe sit der kvene	lac uil iemerlichen tot

teniwiv mære	sich huoben vber Rin 
man seite daz da were	manich magedin 
der dahte im eine werben	des kunich Gvnthers mvot 
daz dvhte sine rechen	vn– die herren alle guot	[14a]
Ez was ein kvniginne	 gesezzen vber se 
ir geliche	 was deheiniv me 
si was vnmazen schone	vil michel was ir kraft 
si schoz mit snellen degnen	vmbe minne den schaft
Den stein warf si verre	 darnach si witen spranch 
swer ir minne gerte	 der muose ane wanch
driv spil an gewinnen	der vrowen wol geborn 
gebrast im an eime	 er het daz hovbet verlorn
Des hete div iunchfrowe	vnmazen vil getan 
daz vernam bi dem Rine	ein riter wol verstan 
der wande sine sinne	an daz schoene wip 
darumbe helde vil mvosen	sit verliesen den lip
Do sprach der voit von Rine	 ich wil an den se
hin zuo Prvnhilde	swie ez mir erge 
ich wil vmb ir minne	wagen den lip 
den wil ich verliesen	sin werde min wip
Daz wil ich widerraten	sprach do Sifrit 
ia hat div kvniginne	 so vreislichen sit 
swer ir minne wirbet	 daz ez in hohe stat 
des mvget ir der reise	 haben guoten rat
So wil ich iv daz raten	sprach do Hagene 
ir bitet Sifrit	mit iv ce tragene
die vil starken reise	 daz ist nu min rat	
sit ime daz ist kundech	wie ez vmb die frovwen stat
Er sprach	wil du mir helfen	edel Syfrit 
die minnechlichen werben		tuo des ich dich bit 
vnd wirt mir ze trûte	 daz minnechliche wip 
ich wil durch dinen willen	wagen ere vnde lip
Des antwrte Sifrit	Sigmundes sun 
gist dv mir din swester	so wil ich ez tuon 
die schonen Chriemhilde	 ein kvniginne her 
so gere ich niht lones	nach minen arbeiten mer
Daz lobe ich	sprach Gvnther	Sifrit	an din hant 
vnd kumet die schoene	Prvnhilt in daz lant 
so wil ich dir ze wibe	mine swester geben 
so maht du mit ir immer	vroliken leben
Des <swouren> si do eide	die reken vil her 
des wart ir arbeite	verre dester mer 
ê daz si die frovwen	 brahten an den Rin 
des muesen die kuonen	sit in grozen noten sin
Sifrit muose fuoren	die kappen mit im dan 
die der helt kuene	mit sorge gewan
ab eime getwerge	daz hiez Albrich 
sich garten zvo der verte	reken kuene vn– rich
Also der starke Sifrit	die tarnkappe truoch 
so het er darinne	 krefte genuoch 
zwelf manne sterke	zvo sin selbes lip 
er warp mit grozen listen	daz herliche wip
ovch was div tranhût	also getan	[14b]
daz darinne worhte	 ein islich man 
swaz er selbe wolde	daz in nieman sach 
da mit gewanner Prvnhilde	da von im leide gesach
Nv sage mir	degen Sifrit	ê min vart erge 
daz wir mit vollen eren	 komen an den se 
svln wir reke fuoren	in Prunhilde lant 
drizech tusent degen	die weren schier besant
Der gesellen bin ich einer	der ander soldv wesen 
der drite daz si Hagne	wir sulen wol genesen	
der vierde daz si Danchwart	der vil kuene man 
tvsent man mit strite	geturren nimmer vns bestan
Div mære wesse ich gerne	sprach der kunich do 
ê wir hinnen fuern	des wer ich harte fro 
waz wir chleider solden	vor Prunhilde tragen 
div uns da wol zamnen	 Sifrit	daz solt du mir sagen
Kleit daz aller beste	 daz ieman bevant 
treit man zallen citen	in Prvnhilde lant 
des sulen wir richiu kleider	vor der frovwen tragen 
daz wirs iht haben schande	 so man div mære hore sagen
Do enbot er siner swester	daz er se wolde sehen 
vnd der degen Sifrit	 e daz was geschehen 
do hete sich div schoene	ze lobe wol gekleit 
daz die herren chomen	 daz was in mezlichen leit
Nv was ovch ir ingesinde	geciert als im gezam 
die fvrsten komen beide	do si daz vernam 
do stuont si von dem sedele	mit zvhten si do gie 
da si den gast vil edelen	vnd ovch ir bruoder enphie
Si willekomen bruoder	vnd der geselle sin 
div mere ich weste gerne	sprach daz meidin 
waz ir herren woldet	 sit ir ze houe gat 
lat ir mich hoeren	 wie ez iv edelen reken stat
Do sprach der kvnich Gvnther	 frovwe	ich wilz iv sagen 
wir muozen michel sorge	bi hohme muote tragen 
wir wellen hubschen riten	verre in fremdiv lant 
wir solden zuo der reisen	haben cierlich gewant
Nv sicet	lieber brvoder	sprach daz kvniges kint 
lat mich rehte hoeren	 wer die frovwen sint 
der ir gert ze minne	 in ander kvnige lant	
die vz derwelten		 nam si beide bi der hant
Si gie mit in beiden	da si ê da saz 
vf matraze riche	 ich wil wizzen daz	
geworht mit guoten b¡lden	mit golde wol erhaben 
si mohten bi den frovwen	gvot kurtzwile haben
Friuntliche bliche	vnd guotlichen sehen 
des mohte von in beiden	harte vil geschehent 
er truoch si in dem herzen	si was im so der lip 
sit wart div schoene Chriemhilt	des kvonen Sifrides wip
Do sprach div iunchfrovwe	 nu merket was ich sage 
ich han selbe siden	 nv schafet daz man trage [15a]
gesteine vns vof den schilden	so wurken wir div chleit	
des willen was do Gvnther	vnd ovch Sifrit bereit
Wer sint die gesellen	sprach div kvnigin 
die mit iv gecleidet	 ce hove sulen sin	
er sprach	ich selbe vierde		zwene mine man 
Danchwart vnd Hagne			 ze hove svlen mit mir gan
Frovwe	merket rehte			 waz ich iv sage 
daz ich selbe vierde			ze vier tagen trage
ie drier hande chleider	vnd also guot gewant 
daz wir ane schande	rumen Prvnhilde lant
Mit guotem vrlovbe	 die herren schieden dan 
do hiez ir ivnchfrovwen	drizech meide gan
vz ir kemenaten	 div schoene <kvnigin> 
die zuo solhem werke	hetet grozlichen sin
Die arabischen siden	wiz also der sne 
vnd von Zazamanch	der gruenen so der chle 
darin si leiten steine	des wurden guotiv kleit 
selbe sneit si Chriemhilt	div herliche meit
Von fremder <vische> hûten	bezoch wol getan 
die ze sehenne waren	den lvten fremde dan 
die dachten si mit siden	so si si solden tragen 
nv hoeret wunder		von der liehten wete sagen
Von Marroch dem lande	vnd ovch von Cybian
die aller besten siden	die ie mer gewan
deheines kvniges kvnne	der heten si genuoch 
wol lie daz schinen Chriemhilt	daz si in holden willen truoch
Sit si der hohen verte	heten nv gegert 
hermine vedern		duhten si vil wert 
darobe pfelle lagen	swarz alsam ein kol 
daz noch snellen helden	zeme in hochciten wol
Vz arabischem golde	vil gesteines schein 
der frovwen vnmuoze	 was niht ze chlein 
inre siben wochen	bereiten si div kleit 
do was ovch gewæfen	den guoten reken bereit
Do si bireit waren	do was in uf den Rin
gemachet flizeklichen	ein starkez schiflin 
daz si tragen solde	nider an den se 
den edelen iunchfrovwen	was von arebeiten we
Nach den hergesellen	wart bote sa gesant 
ob si wolden schovwen	niwez ir gewant 
ob ez den helden were	ze kvrtz oder ze lanch 
ez was ze rehter maze	des seiten si den frovwen danch
Vil michel danken	wart da niht verdeit 
do gerten vrlobes	die reken vngemeit 
in riterlichen zvhten	die herren taten daz 
des wrden liehtiv ovgen	von weinen truobe vn– naz
Si sprach	vil lieber pruoder	ir mohtet <noch> bestan
vnd wurbet ander frovwen		 daz hiez ich wol getan	
vnde da iv niht enstvnde		en wage so der lip	[15b]
ir muget hie nahen vinden	 ein als hoch geborn wip
Ich wene in sagte daz herze	daz in da von geschach 
si weinten al geliche	swaz ieman gesprach 
ir golt in vor den brusten	wart von træhen sal 
die vielen in genote	 von den ovgen ze tal
Si sprach	er Sifrit	lat iv bevolhen sin
vof triwe vnd vof genade	den lieben bruoder min 
daz im iht werre	in Prvnhilde lant	
daz lobte der vil kuene	in Chriemhilde hant
Do sprach der degen riche	 ob mir min lip bestat 
so sult ier aller sorge	frovwe	haben rat 
ich bringe iv in gesvnden	wider an den Rin 
daz wizet sicherlichen	do neig im daz schone megdin
Ir golt varwen schilde	 man truoch in vof den sant
vnde brahte in zuo zin	allez ir gewant 
ros hiez man in ziehen	 si wolden riten dan 
da wart von schoenen frowen	michel weinen getan
Do stuenden in div venster	diu minneclichen kint 
ir schif mit dem segele	ruorte ein hoher wint 
die stolcen hergesellen	sazen an den Rin 
do sprach der kvnich Gunther	 wer <sol> schifmeister sin
Daz wil ich	sprach Sifrit	ich kan ivch <vof> der fluot
hinnen wol gefuorn		 daz wizet	helde guot 
die rehten wazzerstraze	sint mir wol bechant	
si schieden froliche	vz Burgonden lant
Sifrit do balde	 eine schalten gewan 
von stade er schieben	vaste began 
Gvnther der kuene	ein ruoder selbe nam 
do huoben sich von lande	die snellen riter lobesam
Si fuorten riche spise	dar zuo guoten win 
den besten den man kvnde	vinden vmben Rin 
ir ros stuonden ebene	si heten guot gemach 
irschif giench ovch ebene	lucel leides in gesach
<Ir> starken segelseil	wurden in gestraht 
si fuoren zweinzech mile	end ez wurde naht 
mit eime guoten winde	nider gein dem se 
ir starkez arbeiten	tet sit schuonen frovwen we
An dem zwelften morgen	 so wir horen sagen	
heten si die winde	verre dan getragen
gen Isensteine	in Prvnhilde lant 
daz was niemen mere	wan Sifride bechant
Do der kvnich Gvnther	so vil der bvrge sach
vnd ovch die witen marke	wie balde er do sprach 
saget mir	frivnt her Sifrit	ist iv daz bekant 
wes sint die bvrge		vnd daz herliche lant
Des antwrte Sifrit		ez ist mir wol bekant 
ez ist Prunhilde		 burge vnde lant
vnd Isenstein div veste	als ir mich hoere iehen 
da mvget ir hivte	 schoener frovwen vil gesehen	[16a]
Ich wil iv helden raten	ir habet einen mvot 
ir iehet geliche	 ia dunket ez mich guot 
swenne wir noch hivte	fuer Prunhilde gan 
so muozen wir mit sorgen	vor der kuniginne stant
So wir die minneclichen	bi ir gesinde sehen 
so svlt ir	helde mære	wan einer rede iehen 
Gvnther si min herre	vnd ich sin man 
des er da hat gedingen	 daz wirt allez getan
Des waren si bereite	des er si loben hiez 
durch ir ubermvote	 deheiner ez niht liez 
si iahen swes er wolde	da von in wol gesach 
do der kvnich Gvnther	 Prvnhile <sach>

n der selben zite	do was ir schif gegan
der bvrch also nahen	do sach der kvnich stan
oben in den venstren	manich schoene meit 
daz er si niht erkande	daz was im werlich leit
Er fragte Sifriden	den gesellen sin 
ist iv iht daz kvnde	ob disiv <magedin> 
die dort nider schowent	gen vns vf die fluot 
swie ir herre heize	si sint vil hohe gemvot
Do sprach der herre Sifrit	 nu sult ir tovgen spehen
vnder den iunchfrowen	 vnde sult mir danne iehen 
welhe ir nemen woldet	 hetet irs gewalt	
daz tuon ich	sprach Gunther	 ein riter kuene vnde balt
Ich sihe ir eine	in einem venster stan
in snewizer wete	div ist so wol getan 
die wellent miniv ovgen	durch ir schoenen lip 
ob ich gewalt des hete	si muese werden min wip
Dir hat erwelt vil rehte	diner ovgen schin 
ist ist div edel Prunhilt	daz schone magedin 
nach der din herze ringet	din sin vnd ovch din mvot	
alle ir geberde	dunket Gvnther guot
Do hiez div kvniginne	vz den venstren stan
ir herliche meide	si solden da niht stan 
den fremden an ze <sehenne>	des waren si bereit 
waz do die fruewen taten	 daz ist vns sider geseit
Gen den vnkvnden		strichen si ir lip 
des ie site heten	watlichiv wip 
an div engen venster	komen si gegan 
da si die helde sahen	daz was dvrh schowen getan
Rehte in einer maze	den helden vil gemeit
von sneblanker varwe	ir ros vnd ovch ir cleit
waren vil geliche	ir schilde wol getan 
die lvhte von den handen	den wetlichen man
Ir satel wol gesteinet	ir furbuoge smal	
si riten herliche	 fur Prunhilde sal	
daran hiengen schellen	von lihtem golde rot 
si chomen zvo dem lande	als ez ir ellen in gebot
Mit im kom <do> Danchwart	vnd ovch Hagne	[16b]
wier horen sagen	wie die degne
von rabenswarzer varwe	truogen richiv kleit 
ir schilde waren niwe	michel guot vnde breit
Von India dem lande	sach man si steine tragen 
do kos man an ir wæte	vil herlichen wagen 
si liezen an huote	daz schifel di der fluot 
sus riten zuo der burge	die helde kuene vnde guot
Sehs vnd ahzech turne	si sahen drinne stan 
dri palas wite	 vnd einen sal wol getan
von edelem marmelsteine	gruone alsam ein gras 
darinne selbe Prvnhilt	mit ir ingesinde was
Div burch was entslozen	vil wite vf getan 
do liefen in enkegen	die Prvnhilde man
vnd enphiengen die geste	in ir frovwen lant 
ir ros hiez man behalden	vnd ir schilde vor der hant
Do sprach ein kamerere	gebet vns div swert
vnd die liehten brvnne	 des sit ir vngewert	
sprach von Troien Hagne	 wir wellens selbe tragen 
do begvnde Sifrit	den hovesite sagen
In dirre burch phliget man	 daz wil ich iv sagen	
daz neheine geste	svlen wafen tragen 
lat si tragen hinnen	daz ist wol getan 
der volgte vngerne	 Hagne	Gvnthers man
Man hiez den gesten senken	vnd schafen gvot gemach 
manigen snellen rechen	man ze hove sach
in furstlicher wete	allenthalben gan 
doch wart michel schovwen	an die kuenen getan
Ir svlt mich lazen hoeren	sprach diu kvnigin 
wer die vnkvnden	reken mvgen sin 
die dortsihe	so herliken stan 
vnd durch wes liebe	die helde her gevarn han
Do sprach ein ir gesinde	 frovwe	ich mach wol iehen 
daz ich ir deheinen	 mer habe gesehen 
wan Sifride geliche	einer darunder <stat> 
den svlt ir wol enpfahen	daz ist	frovwe	min rat
Do sprach div kvniginne	 nv brinch mir min gewant 
vnd ist der starke Sifrit	komen in min lant
durch willen miner minne	ez gat im an den lip 
ich furhte in niht so sere	daz ich werde sin wip
Prunhilt div schone	 wart schiere wol gekleit 
do gie mit ir dannen	manigiv schoniv meit 
wol hvndert oder mere	gezieret was ir lip 
die gesten wolden schovwen	div wetlichen wip
Da mite giengen degne	vz Islant 
Prvnhilde reken	 die truogen swert enhant 
funfhvndert oder mere	 daz was den gesten leit 
do stuonden von dem sedele	die kuenen helde gemeit
Do div kvneginne	Sifriden sach 
zuo dem gaste	<si> zvhtechlichen sprach 
sit willekomen	her Sifrit	her in dizze lant	[17a]
waz meint iwer reise	 daz het ich gerne bechant
Vil michel <genade>	 frov Prvnhilt 
daz ir mich ruochet gruozen	fursten tohter milt 
vor disem edeln reken	 der hie vor mir stat 
wan der ist min herre	 der ern het ich gerne rat
Er ist kvnich ze Rine	 was sol ich sagen mer 
durch dine liebe	sin wir gevarn her 
er wil dich gerne minnen	 swaz im da von geschiht 
bedenke dichs becite	er lat dich sin niht
Er ist geheizen Gunther	ein kvnich rich vnd her 
erwurb er dine minne	schone gert er nih mer 
durch dich mit im	ich her gevarn han 
werer niht min herre	ich hetez nimmer getan
Si sprach	er ist din herre	vnd du sin man 
wil er min geteiltiv	 spil also bestan 
behabe er die meisterschaft	so wird ich sin wip 
gewinne aber ich	 ez get iv allen an den lip
Do sprach von Trony Hagne	 frove	lat vns sehen
iwer spil geteiltiv	end iv mvoste iehen
Gvnther min herre	 da mvoz ez herte sin 
er trowet wol erwerben	ein alse schvone kvnigin
Den stein sol er werfen	vnd springen darnach 
den ger mit mir schiezen	lat iv sin niht ze gach 
ir mvget hie wol verliesen	die ere vnd ovch den lip 
des svlt ir ivch bedenken	sprach daz minnechliche wip
Sifrit der snelle	zvo deme kvnige trat 
allen sinen willen	er in reden bat
gen der kvniginne	 er sold an angest sin 
ich sol dich wol behueten	vor ir mit den listen min
Do sprach der kvnich Gvnther	 kvneginne her 
nv teilt swaz ir gebietet	vnd werez dannoch mer 
ich bestvend ez allez	dvrch iwren schoenen lip 
min hovbet ich verlivse	ir enwerdet min wip
Do div kvniginne	sin rede vernam 
der spile bat si gahen	als ir daz gezamn 
si hiez ir ze strite	bringen ir gewant 
ein brunne von golde	vnd einen gvoten schildes rant
Ein wafenhemde sidin	leite an div meit 
daz in deheime strite	wafen nie versneit 
von pfelle vz der Libya	ez was wol getan 
von porten lieht gewurhte	schein liehte daran
Die zit wart den reken	in gelfpe vil gedruot 
Danchwart vnd Hagne	 waren vngefruot 
wi ez dem kvnige ergienge	des sorgte in der mvot 
si dahten	vnser reise	ist vns gesten niht ze gvot
Die wile was ovch Sifrit	der wetliche man 
end ez ienman wesse	 zuo dem schife gegan 
da er sin tarnkappe	 verborgen vant 
darin slovf er schiere	do was er niemen bechant
Er ilte hin widere	do sach er reken vil [17b]
da div kvniginne	 teilte ir hohiv spil 
da gie er tovgenlichen	daz in da niemen sach
aller di da waren	 von listen daz geschach
Der rinch was beceiget	da soldez spil geschehen
vor manigen kvenen reken	die daz solden sehen	
wol siben hvndert	 sach man wafen tragen	
swem da gelvnge	 daz si die warheit solden sagen
Do was ovch chomen Prunhilt	gewafent man die vant 
sam ob si wolde striten	vm elliv kvniges lant 
ia truoch si ob den siden	manigen goldes zein 
darunder minnechlichen	ir liehtiv varwe schein
Do kom ir gesinde	 vnd truogen dar zehant
von alrotem golde	einen schildesrant
mit stalherten spangen	michel vn– breit 
darvnder spilen wolde	div uil minnechliche meit
Der meide schildevezel	 ein edel borte was 
darvof lagen steine	 gruene alsam ein gras
der luhte manigerleye	mitschine widerz golt 
er mvoste wesen kuene	dem div frovwe wurde holt
Der schilt was vnder bukeln	 als vns daz ist geseit	
drier spannen diche	 den tragen solde div meit 
von stale vnd ovch von golde	rich er was genuoch 
den ir kamerere	vierde selbe kvme getruoch
Also der degen Hagne	den schilt dar tragen sach 
mit grimmen mvote	der helt von Trony sprach 
wa nv	kvnich Gunther	wi verliesen wir den lip 
der ir da gert	div ist des tivvels wip
Do truoch man der frovwen	swære vnde groz
einen vil scharfen ger	den si ze allen ziten schoz 
starch vnd vngefuege	michel vnde breit 
der ze sinen eken	 vil freislichen sneit
Von des gers swere	hoeret wunder sagen 
vierdehap messe	 was dazvo geslagen 
den truogen kuone dri	Prunhilde man 
Gvnther der edele	darvmbe sorge gewan
Do sprach Hagnen bruoder	der kuene Danchwart 
mich riwet innerchlichen	disiv hovevart 
nv hiezen wir ie reken	 wie fliesen wir den lip 
svln vns in disem lande	nv verderben div wip
Mich muet harte sere	daz ich kom in daz lant 
hete min bruoder Hagene	sin wafen an der hant 
vnd ovch ich daz mine	so mohten samfte gan
mit ir ubermuete	alle Prunhilde man
Vvir solden vngevangen	wol rumen dice lant	
sprach sin bruoder Hagene	het wir daz gewant 
des wir ze not bedurfen	vnd div swert vil guot 
so wurde wol gesenftet	 der schoenen frovwen vbermuot
Wol horte div maget edele	waz der degen sprach 
mit smielindem mvnde		si vber ahsel sach 
nv er dvnket sich so chuone	so traget in ir gewant	[18a]
ir vil scharfen wafen	gebet den helden an die hant
Do si div swert gewunnen	so div meit gebot 
der vil kuone Danchwart	von freuden wart rot 
nv spilen swez si wellen	sprach der kuene man 
Gvnther ist vnbetvngen	 sit wir vnser wafen han
Brvnhilde sterke		 grozlichen schein 
man truoch ir zuo dem ringe	einen swern stein 
groz vnd vngefuoge	michel vnde wel 
in truogen kuene zwelfe	der kuenen helde vn– snel
Den warf si ze allen ziten	so si den ger verschoz 
der Burgonden sorge	 was vil harte groz 
wafen	sprach Hagne	 waz hat der kunich ze trvvt 
ia sol si in der helle	sin des vbelen tivvels bruot
An ir vil wize arme	si die ermel want 
si begvnde vazzen		den schilt an der hant 
den ger si hohe zvchte	do gie ez an den strit 
die ellenden geste	vorhten Prunhilde nit
Vnd were im Sifrit	niht da ze helfe komen 
so hete si Gvnthere	sinen lip benomen 
er gie dar tovgenliche	vnd ruort im sine hant 
Gvnther sine liste	harte sorchlich ervant
Er sprach	gip mir von handen	den schilt la mich tragen 
vnd merke rehte	waz dv mich hoerest sagen 
nv habe dv die gebærde	div werch wil ich began	
do er in bekande	 ez was im liebe getan
Do schoz vil kreftichlichen	div herliche meit
vf einen schilt niwen	 michel unde breit 
den truoch an siner hende	daz Siglinde kint 
daz fivr spranch von stale	sam ez wate der wint
Des starken gers snide	al durch den schilt gebrach 
daz man daz fiuuer lovgen	vz den ringen sach 
des svzzes beide struochten	die kreftige man 
wan div trankappe		si weren tot da bestan
Sifride dem kuene	 von mvnde brast daz bluot 
vil balde spranch er widere	do nam der helt guot
den ger	den si geschozen	im hete durch den rant 
den schoz do hin wider	des starken Sifrides hant
Daz fiwer stovp vz ringen	als ob ez tribe der wint 
den ger schoz mit ellen	daz Sigmvndes kint 
si mohte mit ir krefte	des schuzes niht gestan 
ez en hete nimmer	der kunich Gunther getan
Brunhilt div schoene	balde vf spranch 
edel riter Gvnther	des schuzzes habe danch 
si wande daz erz hete	mit siner kraft getan 
nein	si hete gevellet	ein verre kreftiger man
Do gie si hin balde	zornich was ir muot 
den stein huop vil hohe	div edel maget guot 
si swanch in kreftechliche	verre von der hant 
do spranch si nach dem wurfe	daz luote erklang ir gewant
Der stein was gevallen	zwelf klafter dan	[18b]
den wrf brach mit sprvngen	diu maget wolgetan 
dar gie der snelle Sifrit	da der stein gelach 
Gvnther in wegete		 der helt des wurfes pflach
Sifrit was kuene		 kreftich vnde lanch 
den stein warf er verrer	 dar zuo er witer spranch 
von sinen schoenen listen	 het er kraft genvoch 
daz er mit den sprvnge		den kvnich Gvnther truoch
Zvo ir ingesinde	ein teil si lûte sprach 
do si ze ende des ringes	den helt gesunden sach 
balde komet her naher	 mage vnde mine man 
ir svlt kvnich Gvnther	 alle werden vndertan
Do leiten die vil kuonen	div wafen von der hant 
si buten sich ze fuozen	von Burgonden lant
Gvnther dem richen		vil manich kuoner man 
si wanden	er hete	mit siner kraft div spil getan
Er gruoztes minechliche	ia was er tvgenden rich 
do man im bi der hende	div maget lobelich 
si erlobte im daz er solde	haben da gewalt 
des fruoten sich die degne	vil kuene vnde balt
Si bat den riter edele	mit ir dannen gan
in den palas witen	also daz wart getan 
do erbot manz den reken	mit dienste dester baz 
Danchwart vnd Hagne	muosen lazen ane haz
Sifrit der snelle	wise er was genuoch 
sin tarnkappe	er ze behalten truoch 
do gie er hin wider	da manich frovwe saz 
da er vnd ander degne	alles leides vergaz
So wol mich dirre mere	sprach Sifrit der degen 
daz iwer hohverten	also ist gelegen 
daz iemen lebet der iwer	 meister mvge sin 
nv svlt ir	maget edel	 uns hinnen volgen an den Rin
Do sprach div wolgetane	des mak niht ergan 
ez muozen ê bevinden	maget vnde mine man 
ia mag ich also lihte	gerumen niht min lant 
die minen beste frivnde	mvezen werden ê bestan
Do hiez si boten riten	allenthalben dan 
si besande ir frivnde	mage vnde man 
die bat si ze Isensteine	komen vnerwant 
vnd hiez in geben allen	rich unde herlich gewant
Si riten tegeliche	 spate vnde frvo
Prunhilde burge	scharhafte zuo 
iaria	sprach Hagene	waz haben wir getan 
wir erbeiten hie vbele	der schoene Brunhilde man
So si nu mit ir krefte	koment in daz lant 
der kvniginne wille	 ist vns vnbekant 
waz ob si also zvrnet	 daz wir sin verlorn 
so ist div maget edel vns	ze grozen sorgen geborn
Do sprach der starke Sifrit	 daz sol ich vndersten 
des ir da habet sorge	 des laze ich niht ergen 
ich sol in helfe bringen	her in dizze lant [19a]
von vzerwelten reken	 die iu noch nie wurden bechant
Ir svlt nach mir niht vragen	ich wil hinnen varn 
got muese iwer ere	die zit wol bewarn 
ich kuome schiere widere	vnd bringiv tusent man
der aller besten degne	der ich kvnde ie gewan
So sit et niht ze lange	sprach der kvnich do 
wir sin iwer helfe		billichen vro	
sprach	ich kvme widere	in vil kvrzen tagen 
ir mich habet gesendet	sult ir der kuniginne sagen

annen gie do Sifrit	zer porten vf den sant
in siner tarnkappe	 da er ein schifel vant 
daran so stuont vil tovgen	 daz Sigmvndes kint 
er fuort ez balde dannen	als ob ez were der wint
Den schifmeiseer niemen sach	daz schifel sere vloz
von Sifrides kreften	 die waren also groz 
si wanden daz ez fuorte	ein svnderstarker wint 
nein	ez fuorte Sifrit	der schoenen Siglinde kint
Bi des tages cite	 vnd bi der einen naht
kom er zeime lande	mit michelr kraft 
hvndert langer raste	vnd dannoch lihte baz 
daz hiez Niblvnge	da er den grozen hort besaz
Der helt fuor alleine	vf einen wert bereit 
daz schif geband vil balde	der riter vil gemeit 
er gie zuo eime berge	darufe ein burch stuont 
vnd suchte herberge	 so die wegemude tuont
Do kom er fur die porten	verslozen im div stuont 
ia huoten si ir êrn	so noch die lute tuont 
anz tor begvnde bozen	 der vnkvnde man 
daz was wol behuotet	do vant er innerthalben stan
einen vngefuegen	der der burch phlach 
bi dem zallen ziten	sin gewefen lach 
der sprach	der ist der bozet	so vaste an daz tor	
do wandelte sine stimme		der kuene Sifrit dauor
vnd sprach	ich bin ein reke	entsliuz vf daz tor 
ich erzvrne eteslichen	noch hivte da uor 
der gerne sampfte lege	vnd hete sin gemach	
daz muote den portenere	do daz Sifrit gesprach
Nv hete der rise kuene	sin gewafen an getan 
sinen helmen vf sin hovbet	der vil searke man
den schilt vil balde zvchte	daz tor er vf swief 
wie rehte gremliken	er do an Sifriden lief
Wi er getorste wechen	so manigen kuenen man 
da wrden slege swinde	von siner hant getan 
do begund im schirmen	der herlike gast 
doch schuof der portenere	daz im sin spenge zebrast
von einer isensteine	des gie dem helde not 
ein teil begvnde fvrhten	der helt den grimmen tot 
do der portenere	so kriftechlichen sluoch 
darvmbe was im weg	der herre Sifrit genuoch	[19b]
Si striten also sere	daz al div burch erchal 
do horte man daz diezen	Niblungen sal 
er twanch den portenere	daz er in sit gebant 
div mere wrden kvnde	 in al der Niblunge lant
So horte daz striten	verre durch den perch
Albrich der kuone	 ein wildez getwerch 
er wafende sich balde	vnde lief da er da vant
disen gast vil edel	da er den risen vaste gebant
Albrich was kuone	 dar zuo starch genuoch 
helm vnde ringe	 er an <dem> libe truoch 
vnd eine geisel swere	von golde an siner hant 
do lief er harte swinde	da er Sifriden vant
Siben chnoepfe swere	hiengen vor daran 
da mit er vmb die hende	den schilt dem kuenen man
sluoch so biterlichen	daz im des vil zebrast 
des libes kom in sorge	do der wetliche gast
Den scherm er von der hende	gar zebrochen swanc 
do stiez er in die scheide	ein wafen	daz was lanc 
sinen kamerere		 wold er niht slahen tot 
er schonde siner lûte	 als im tvgent daz gebot
Mit starken sinen handen	lief er Albrichen an
vnd vie bi dem barte	den altgrisen man 
er zogte in vngefuege	daz er vil lûte erschre 
zvht des iungen heldes	tet Albriche we
Lute rief der kuene	nv lazet mich genesen 
vnd moht ich iemens eigevn	an einen reken wesen	
dem swer ich des eide	ich wær im vndertan	
ich diende iv ê ich stvrbe	sprach der listige man
Er bant ovch Albrichen	 sam den risen ê 
die Sifrides krefte	 taten im vil we 
daz twerch begvnde vragen	 wie sit ir genant	
er sprach	ich heize Sifrit	ich wande ich were iv wolbechant
So wol mich dirre mere	sprach Albrich daz getuuerch 
nu han ich wol erfvnden	div herlichen werch 
daz ir von waren schvlden	mvget landes herre wesen 
ich tuon swar ir gebietet	daz ir lat mich genesen
Do sprach der herre Sifrit	 ir svlt vil balde gan 
vnd bringet mir der besten	reken die wir han
tvsent Niblunge	daz mich die hie gesehen 
so wilich iv leides	lazen hie niht geschehen
Dem risen vnd Albriche	lost er do div bant 
do lief Albrich balde	da er die rechen vant 
sorgende wachete er	 der Niblvnge man 
er sprach	wol vof	ir helde	ir svlt ze Sifride gan
Si sprvngen von den beten	 vnd waren vil bereit 
tvsent riter snelle	die wrden wol gekleit 
si giengen da si funden	<Sifriden> stan 
da wart ein schoene gruozen	ein teil mit werchern getan
Vil rechen was enzvndet	 man schancte im lutertranch 
daz si komen schiere	 er seit ins allen danch	[20a]
er sprach	ir svlt hinnen	mit samt mir uber fluot 
des vant er vil bereit	 di helde kuone vnde guot
Wol drisech tusent reken	waren schiere komen 
vz den wurden tvsent	 der besten do genomen 
den brahte man ir helme	vnd ander ir gewant 
wan er si fueren wolde	in daz Bruonhilde lant
Er sprach	ir guoten ritere	daz wil ich iv sagen 
ir svlt vil kleider richiv	da ze hove tragen 
wan vns da sehen muesen		vil minnechlichiv wip 
darvmbe svlt ir zieren	 mit guoter wete den lip
An einem morgen frvo	huoben si sich dan 
waz sneller geverten	Sifrit do gewan 
si fuorten ros div guoten	vnde herlich gewant 
si komen weigerlichen	 in daz Pruonhilde lant
Do stuonden in den cinnen	div minnechlichen <kint> 
do sprach div kvnniginne	 weiz ieman wer di sint 
die ich dort sihe fliezen	so verre vf dem se 
si fuerent segel wize	die sint noch wizer danne sne
Do sprach der kvnich von Rine	 ez sint mine man 
die het ich an der verte	hie nahen bi verlan 
die han ich besendet	 die sint nv	frowe	chomen	
der herlichen geste	wart mit zvohten war genomen
Do sach man Sifriden	vor in eime schife stan
in herlicher wæte	vnd ander manigen man 
do sprach div <kuniginne>	 her kvnich	ir sult mir sagen 
sol ich die geste gruozen	oder sol ichz verdagen
Er sprach	ir svlt enkegne in	fur daz palas gen 
ob ir si sehet gerne	daz si daz wol versten	
do tet div kvneginne	als ir der kvnich riet 
Sifriden mit dem gruoze	von den anderen schiet
Man schuof in herberge	vnd behielt in ir gewant 
do was so vil geste	komen in daz lant 
daz si sich allenthalben	drungen mit den scharn 
do wolden die vil kuenen	heim zen Burgonden varn
Do sprach div kvniginne	ich wold im wesen holt 
der geteilen kvnde	 min silber vnd min golt
min vnd des kvniges gesten	des ich so vil han	
do antwurte Danchwart	 des kuenenen Giselhers man
Vil edel kvnneginne	lat mich der sluzel pflegen 
ich truowez so geteilen	sprach der kuene degen 
swaz ich erwerbe schande	die lat min eins sin	
daz er milte wære	daz tet er grozlichen schin
Do sich Hagnen bruoder	der slûzle vnderwant 
so manige riche gabe	bot des heldes hant 
der ein march gerte	dem wart so vil gegeben 
daz die armen alle	mvosen frolichen leben
Wol bi hvndert phvnden	gab er ane zal 
genuoge in richer wæte	giengen vor dem sal 
die nie dauor getruogen	so herliclhiv kleit 
daz gevriesch div kvnniginne	ez was ir swere vnde leit	[20b]
Do sprach div kuneginne	 her kvnich	ich het des rat 
daz iwer kamerere	mir wil miner wat
lazen niht beliben	 er swendet gar min golt 
derz noch vnderstuende	dem wold ich immer wesen holt
Do sprach von Trony Hagne	 frovwe	iv si geseit 
ez hat der kvnnech von Rine	golt vnde <kleit>
also vil ce gebenne	daz <wir> des haben rat 
daz wir von hinnen fueren	iht der Prunhilde <wat>
Nein	durch min liebe	sprach div kvnnegin 
nv <lat> mir erfullen	zweinzech leitschrin
von golde vnd ovch siden	daz geben sol min hant 
so wir uber komen	 heim in der Bvrgonden lant
Mit edelem gesteine	ladete man ir div schrin 
ir selber kamerere	da mite muoste sin 
si wold ez niht getrovwen	den Giselhers man 
Gvnther vnd Hagne	 darvmbe lachen began
Do sprach div iunchfrowe	 wem laz ich miniv lant 
div sol ê hie bestifeen	min vnd iwer hant	
do sprach der kvnich edele	 nv heizet her gan
der iv dar zvo gevalle	 den sul wir voget wesen lan
Ein ir hohsten mage	diu frowe bi ir sach	
er was ir mvoter brvoder	 zvo dem div maget sprach 
nv lat iv sin beuolhen	min burge vnd ouch ir lant	
si rihten sich ze verte	man sach si riten ovf <den> sant
Si fuorte mit ir dannen	sehs vn ahcech wip 
darzuo hvndert meide		vil schoene was der lip 
svmten sie niht langer	 si wolden gahen dan 
die si deheime liezen	hei waz der weinen began
In tugentlichen zvhten	div frowe rovmte ir lant 
si kvste ir næstiu friunt	die si bi ir vant 
mit guotem urlovbe		si chomen vf den se 
zvo ir vater lande	 kom diu frovwe nimmer me
Man horte uf ir verte	maniger hande spil 
aller kurzewile	 der heten si vil 
ovch kom in zvo ir reise	ein rehter wazzerwint 
si fuoren von dem lande	daz beweinde maniger muoter kint
Doch wolt si den herren	niht minnen vf der vart 
ez wart ir kvrzwile	vnze <in> ir hûs gespart 
ze Wormez zuo der bvrge	an eine hohzit 
dar si vil frovden rich	komen mit ir helden sit

o si gevaren waren	volle niun tage 
do sprach von Trony Hagne	 nv hoeret waz ich sage 
wir sumen vns mit den mere	ze Wormez an den Rin 
iwer boten solden	nv ze Bvrgonden sin
Do sprach kvnich Gvnther	 ir habet war geseit 
vns were ze der verte	niemen so bereit
als ir	friunt Hagne	nv ritet in min lant 
vnser hovereise	tuot in nieman baz bechant
Nv bitet Sifriden	fueren die boeschaft	[21a]
der kan si wol gewerben	mit ellenhafter kraft 
verseit er iv die reise	ir svlt mit guoten siten
durch iwer swester liebe	der ferte in friuntlichen biten
Er sande nach dem rechen	der kom	do man in vant 
er sprach	sit wir nahen	heim in miniv lant 
so sold ich boten senden	 der lieben swester min
vnd ovch miner mvter		 daz wir nahen an den Rin
Er sprac	ir sult riten	durch den willen min
vnd ovch durch Kriemhilde	daz schoene magedin 
daz ez mit mir verdiene	div herliche meit 
do daz ehorte Sifrit	do was der reke vil <bereit>
Enbietet swaz ir wellet	des niht verdaget 
ich wil ez werben gerne	durch die schoene maget 
zwiv sol ich die verzihen	die ich in hercen han 
durch si	swaz ir gebietet	daz ist allez getan
So saget voten	 der richen kvnigen 
daz wir an dirre verte	hohes muotes sin 
lat wizzen mine bruoder	wie wir geworben han 
ir sult ovch vnser frivnde	disiv mere horen lan
Mine schoene swester	svlt ir niht verdagen 
ir svlt ir Brunhilde	vnd minen dienest sagen 
vnd ovch dem gesinde	vnd allen minen man 
darnach ie ranch min herze	wol ich daz <verendet> han
Vnd saget Ortwine	dem lieben neuen min 
daz er heize rihten	sidel an den Rin 
vn– ander mine mage	die sol man wizzen lan 
ich wil mit Prunhilde	groz hochgecite han
Vnd saget miner swester	so si habe vernomen
daz ich mit minen gesten	si ce lande komen 
daz si wol enphahe	 die truotine min 
daz wil ich immer diende	umbe Kriemhilde sin
Sifrit der herre	balde urlop nam
vrovwen Prunhilde	als im daz wol gezam 
vnd zallem ir gesinde	do reit er an den Rin 
ez enkvnde in dirre werlde	ein bote beser niht gesin
Mit vier vnd zweinzech reken	ze Wormz er do reit 
des chvniges kom er ane	do daz wart geseit 
allez daz gesinde	muote iamers not 
si vorhten daz ir herre	dort beliben were tot
Si erbeizten vont den rossen	hohe stuont ir muot 
schiere chom in Giselher	der iunge kvnich guot 
vnd Gernot sin bruoder		wie balde er do sprach 
do er den kunich Gunther	niht bi Sifride sach
Sit willechomen	her Sifrit	ir sult mich wizzen lan 
war ir minen bruoder		 den kvnich	habet getan 
Prûnhilde sterke		 in wæn vns habe benomen 
so <wert> ir hohiu minne	vns ze grozen schaden chomen
Die angest lat beliben	iv und den magen sin
enbivtet sinen dienst	der hergeselle min 
den lie ich wol gesunden	er hat mich iv gesant	[21b]
daz ich sin bote were	mit mæren her in iwer lant
Ir svlt daz <ahten> schiere	swie so daz gesehe 
daz ich die kuneginne	vnd iwer swester sehe 
die sol ich lazen horen	<waz> in enboten hat
Gvnther vnd Prunhilt	 ir dinch in beiden hohe stat
Do sprach der iunge Giselher	 da svlt ir zuo in gan 
da habet ir miner swester	liebe an getan 
si treit vil michel sorge	vmbe den bruooder min 
diu meit sihet iu gerne	 des wil ich iwr burge sin
Do sprach der herre Sifrit	 swa ich ir dienen kan 
daz sol willeclichen	 mit triwen sin getan 
wer seit nu den frowen	daz ich wil dar gan	
des wart do bote Giselher	der vil wetliche man
Giselher der ivnge	 zuo siner mvoter sprach
vnd ovch zuo siner swester	da er si beide sach 
vns ist komen Sifrit	der helt vz Niderlant 
in hat min bruoder Gvrnther	her ze Rine gesant
Er bringet vns die mere	wiez vmbe den kvnich ste 
nu sult ir im erlovben	daz er ze hove ge 
er seit div rehten mere	her von Islant	
noch was den edelen frowen	michel truren bechant
Si sprungen nach ir wete	vnd leit sich <an> 
si baten Syfriden	hin ze hove gan 
daz tet er willeclichen	wan er si gerne sach 
Criemhilt div edele	zuo im vil guetlichen sprach
Sit willekomen <her> Sifrit	riter lobelich 
wa ist min bruoder Gunther	 der edel chvnich rich 
von Prunhilde sterke	 den wæne wir han verlorn 
owe mir armer meide		daz ich zer welde ie wart geborn
Do sprach der riter kuene	 gebet mir botenbrot 
ir vil schoene vrovwen	weint ane not 
ich lie in wol gesvnden	daz tuon ich iv bechant 
er hat mich iv beiden	 miten meren her gesant
Mit frivntlicher liebe	vil edel kvnegin 
enbivtet iv ir dienst	er vnd div wine sin 
vnd lat iwer weinen	 si wellent schiere komen	
si hete in manigen ziten	so lieber mere nilht vernomen
Si bat <den> boten sicen	des was er vil bereit 
do sprach div minnecliche	 mir were niht ze leit 
ob ich ce boten miete	iv geben solde min golt 
darzuo sit ir ze riche	ich wil iv sust wesen holt
Ob ich nu eine hete	sprach er	drizech lant 
so enphieng ich doch gerne	gabe vz iwer hant	
do sprach div tvgentriche	 so sol ez sin getan	
si hiez ir kamerere	nach der boten miete gan
Vier vnd zweinzech bovge	mit gesteine guot
gap si im ze miete	so stvont des heldes muot 
er woldez niht behalten	er gab ez sa cehant
ir vil schoenen meiden	 die er ze kemnenaten vant
Ir mvoter bot ir dienst	in vil guetlichen an 
ich sol ivch sagen mere	 sprach der kuene man	[22a]
wes iuch der kvnich bittet	so er kvmet an den Rin 
ob ir daz	fruewe	leistet	er welle iv immer wæge sin
Sine riche geste	horte ich in gerne 
daz ir die wol enphahet	vnd sult in des gewern 
daz ir gen ime ritet	fur <Wormez> uf den sant 
des sit ir von dem kvnige	mit guoten triwen gemant
Do sprach div minnecliche	 des bin ich bereit 
swaz ich im kan dienen	daz ist vnuerseit 
mit frivntlichen triwen	so sol ez sin getan	
do merte sich ir varwe	die si vor liebe gewan
Ez wart nie bote enphangen	deheins fursten baz 
getorste si in han <kvsset>	daz hete si ane haz 
anders minneclichen		er von der vrowen schiet 
do taten die Burgonden	als in der bote geriet
Der palas vnd die wende	was allez vber al
gecieret gen den gesten	der Gvnthers sal
wart vil wol becimbert	 durch manigen <fremeden> man 
disiu starke hochgecit	huop sich vil frolichen han
Do riten allenthalben	 die wege durch daz lant
der drier kvnige nmage	hete man besant 
daz si den solden warten	di in da solden komen 
da wart uz der valde	richer wate vil genomen
Do seite man div mere	daz man riten sach
Prunhilde vrivnde	 do huop sich vngemach
von des volches krefte	in Burgonden lant 
hei waz man kuener degne	da ce beiden siten vant
Dar komen do die reken	vnd hiezen tragen dar
herliche setele	von roten golde gar 
die die vrowen <solden> riten	ze Wormz an den Rin 
bezer phertgereite	 chvnde nimmer gesin
Hei	waz da liehtes goldes	von den moren schein 
in luhte von den zomen	vil manich edel stein 
die guldinen schamel	ob liehtem phelle guot 
die brahte man den frowen	si waren frolich gemvot
Sehs vnd ahcech vrovwen	 sach man fur gan 
die gebende truogen	 zuo Kriemhilde gan
chomen die vil schoene	vnd truogen richiv kleit 
dar kom ovch wol geciert	vil wetlichiv meit
Si trvgen riche phelle	die <besten> die man vant 
vor den vremden reken	so manic guot gewant 
daz ir schoenen varwe	ce rehte wol gezam 
er were in swachen muote	der ir deheiner werde gram
Von dobel vnd uon harme	vil chleider man da vant 
da wart vil wol gecieret	manic arm vnd hant
mit pogen ob den siden	 di si solden tragen 
iv enkvnde dice fliezen	ze ende niemnen gesagen
Vil manigen gurtel spæhe	rich vnde lanc 
vber liehtiv kleider	manich hant do swanc 
vf edel roeke ferrans	von pfelle vz Arabi 
den edeln iunchfrowen	was vil hoher vrovden bi	[22b]
Ez wart in furgespenge	manich schoe meit
genet vil minnecliche	ez mohte ir wesen leit 
der ir liehtiv varwe	niht luhte gen der <wat> 
so schoenes ingesindes	nv niht kvniges kvnne hat
Do die minnechlichen	 nv truogevn ir gewant 
di si da fueren solden	die komen dar zehant 
der hoch gemuoten rechen	ein vil michel kraft 
man truoch ovch dar mit schilden	manigen eschinen schaft

nderthalp des Rins	sach man mit manigen scharn
den kvnich mit sinen gesten	zuo dem stade varn 
man sach ovch da bi <zovme>	leiten manich meit 
die si ephahen solden	die waren alle bereit
Do die von Islande	zen schifen komen dan 
vnd ovch von Niblvnge	Sifrides man 
si gahten zuo dem lande	vnmuozech wart ir hant	
da man des kvniges frivnde	anderthalp des stades vant
Nv hort ovch disiv mere	von der kunigin 
voten der vil richen	wie si diu meidin
gefrvmte von der burge	dar si da selbe reit 
da gewan an ander kvnde	vil manich riter vn– meit
Vil manigen buhurt richen	sach man dan getriben
von helden lobelichen	 niht wol <wær> ez beliben	
vor Chriemhilde der schoenen	zuo dem schifen dan 
do huop man von den moern	manige vrowen wolgetan
Der kvnich was komen vber	vnd manich werder gast 
hei waz starker schefte	vor den frowen <brast> 
man horte da hurtlichen	von schilden manigen stoz 
hei waz riker bukeln	vor gedrange lûte erdoz
Die vil minneclichen	stvonden an der habe 
Gvnther mit sinen gesten	gie von schifen <habe> 
er fuorte Pruonhilde	selbe an siner hant 
da luhte wider an ander	vil <liehte> steine vn– gewant
Mit vil grozen zvhten		 vro Kriemhilt do gie 
da si vron Pruonhilde		 vnd ir gesinde enphie 
man sach da schappel ruken		 mit wizen henden dan 
da si sich kvsten beide		daz wart durch liebe getan
Do sprach gezogenlichen		Kriemhilt daz meidin 
ir svlt zue disen landen	vns willechomen sin
mir vnd miner muoter			vnd allen die wir han
der getriwen vrivnden	do wart da nigen getan
Die frowen sich beviengen	mit armen diche hie 
so minneclich enphahen	gehorte man noch nie 
so die vrowen beide	der bruote taten kvnt 
frov vote vnd ir tohter	si chusten diche ir suezen mvnt
Do Pruonhilde frowen	 vol komen vf den sant 
da wart minneclichen	genomen bi der hant
von wetlichen rechen	manic wip wolgetan 
man sach die edelen meide	vor vron Prvnhilde stan
E daz ir grvoz ergienge	daz was ein lengiv stvnt	[23a]
ia wart da gechusset	manich roter mvnt 
noch stuonden bi an ander	die kvnige tohtre rich 
daz liebe an ze sehene	manigen reken lobelich
Do spehten mit den ovgen	die ê horten iehen 
daz si also schoenes	heten niht gesehen
so die frowen beide	des iach man an luge 
man kos an ir libe	deheiner slahte trvge
Die <vrowen> spehen chvnden	vnd minneclichen lip 
die lobten durch ir schoene	daz Gvnthers wip 
do sprachen da die wisen	 die hetenz baz besehen 
man mohte Kriemhilde	 fur Prvnhilde iehen
Vider an ander giengen	maget vnde wip 
man sach da wol geciert	vil manigen schonen lip 
da stuonden sidin hutten	vnd manich guot gezelt 
der was da gar erfullet	vor Wormez allez daz velt
Nv waren ovch die geste	ce rossen alle komen 
vil mnanich rich tiost	dvrch schilde wart genomen 
daz velt begvnde stovben	sam ob al daz lant
mit <lavge> were enbrunnen	da wurden helde wol bechant
Des da di reken phlagen	daz sach vil manich meit 
mich dvnket daz er Sifrit	mit sinen degen reit
vil manige widerkere	 fur die hvtten dan 
er fuorte der Niblvnge	tvsent wætlicher man
Do kom von Trony Hagne	als im der wirt geriet 
den buhurt minnechlichen	do der helt geschiet 
daz vngestovbet liezen	div vil schoenen kint 
des wart do von den gesten	gevolget guotlichen sint
Der buhurt was zergangen	 vber allez daz velt 
do giengen kvrzwilen	vnder manich hoch gecelt
die riter zvo den vrowen	vf hoher vroden wan 
da vertriben si die stvnde	biz man riten wolde dan
Vor abende nahen	do div svnne nider gie
vnd ez begvnde kvoln	niht lenger man daz lie 
sich huoben gen der burge	manich man vn– wip 
mit ovgen wart getruotet	 vil maniger schoenen vrowen lip
Da wart von <gvten> knehten	vil guoter kleider ab geriten
von den hoch gemuoten	 nach des landes siten
biz fur den palas	da der kvnich nider stuont 
da wart gedient vrowen	so helde hoch gemvote tuont
Do wurden ovch gescheiden	die richen kvnigin 
frov vote vnd ir tohter	die giengen beide hin
mit ir ingesinde	in ein vil witez gadem 
da horte man allenthalben	ze frovden grozlichen schal
Gerichtet was gesidele	der kvnich wolde gan
ze tische mit den gesten	do sach man bi im stan
die schoenen Prvnhilde	 chrone si do trvoch
in des kvniges lande	 ia was si rike genvoch
Des wirtes kæmerere	von golde in peken rot
daz wazzer fur truogen	des wart luzel not 
ob iv daz ieman seite	daz man diende baz [23b]
ce fvrsten hochgezite	ich wolde niht gelovben daz
E daz der voit von Rine	wazzer da genam 
do tet der herre Sifrit	als im daz gezam 
er mande in siner triwe	wes er im verzach 
ê daz er Prunhilde	 da heime in Islande sach
Er sprach	ir svlt gedenken	wes mir swor iwer hant 
swenne daz vro Prvnhilt	 koeme in dize lant 
ir gebet mir iwer swester	 war sint die eide komen 
ich han an iwer reise	vil michel arbeit genomen
Do sprach der kvnich ze dem gaste	 er habet mich rehte ermant 
ia sol niht meineide	 werden des min hant 
ich wilz iv helfen fuegen	so ich beste kan	
do bat er Kriemhilde	 ce hove friuntlichen gan
Mit vil schoenen meiden	si komen fvr den sal 
do spranch von einer stiegen	Giselher zetal 
heizet wider keren	disiv magedin 
min swester wan aleine	sol hie bi dem kvnige sin
Do brahte man Kriemhilde	da man den kvnich vant 
da stuonden riter edele	von maniger fvrsten lant
in dem sale witen	 man hiez si stille stan 
ovch was Prunhilt	eben ze tische gegan
Do sprach der kvnich Gunther	 swester vil gemeit 
durch din selber tvgent	losen minen eit 
ich swor dich eime reken	wirdet er din man 
so hastv minen willen	mit grozen triwen getan
Do sprach div meit edele	 lieber bruoder min 
ir svlt mich niht flegen	ia wil ich immer sin
swie ir mir gebietet	daz sol sin getan 
ich wil in loben gerne	swen ir mir	herre	gebet ze man
Von liebe vnd ovch von vrovden	Sifrit wart rot 
ze dienste sich der reke	vrovn Kriemhilde bot 
man bat si zvo an ander	 an dem ringe stan 
man vragte si	ob si wolde	den vil wetlichen man
In meitlichen zvhten	si schamte sich ein teil 
doch so was geluke	 vnd Sifrides heil 
daz si in versprach	alda niht zehant 
si lobte ovch ze wibe	 der edel kvnich von Niderlant
Do er si gelobete	vnd ovch ir meit 
guotlichen vmbevahen	was da vil bereit
von Sifrides armen	daz minneclichez chint 
vor helden wart gechusset	div edel kvniginne sint
Sich teilte daz gesinde	also daz geschach 
an daz gagensidel	man Sifriden sach
sicen mit Kriemhilde	in diende manich man 
man sach die Niblunge	mit Sifride gan
Der kvnich was gesezen	vnd Prunhilt div meit 
do si sach Kriemhilde	 do wart ir nie so leit	
bi Sifride sicen	weinen si began 
vber <liehtiv> wange	sach man vallen trahen dan
Do sprach der wirt des landes	 waz ist iv	frowe min	[24a]
daz ir so lazet <trveben>	liehter ovgen schin 
ir svlt ivch vrovn balde	iv ist vndertan
min lant vnd min burge	 vnd manich wetlich man
Ich mach wol weinen balde	sprach div schoene meit 
vmbe dine swester	ist mir von herzen leit 
di sich ich sicen nahen	dem eigen holden din 
daz muoz ich immer weinen	sol si so verderbet sin
Do sprach der kvnich Gvnther	 ir svlt des stille dagen 
ich wil iv zanderen ziten	disiv mere sagen 
warumbe ich miniv swester	Sifride han gegeben 
ia mach si mit dem reken	immer vroliche leben
Si sprach	mich riwet immer	ir schoene vnd ovch ir zuht 
wessich war ich mehte	ich hete gerne fluht 
daz ich iv nimmer wolde	geligen nahen bi 
irn saget mir wa von Chriemhilt	wine Sifrides si
Do sprach der kvnich Gvnther	 ich tuon ez iv wol bechant 
er hat als ich wol burge	vnde vnde lant 
daz wizzet sicherlichen	er ist ein kvnich rich 
darumbe gab ich im ze wibe	die schoenen meit lobelich
Swaz ir der kvnich seite	doch hete si trovregen mvot 
do gahte von den tische	 manich riter guot 
ir buhurt wart so herte	 daz al div burch erdoz 
den wirt bi sinen gesten	 harte sere verdroz
Er dahte er lege sanfter	der schoenen vrowen bi 
do was er des gedingen	niht gar in herzen vri 
im mvose von ir schvlden	 liebe vil gesehen 
er begvnde frivntlichen	 an von Prunhilde sehen
Riterschaft der geste	bat man abe lan 
der kvnich mit sime wibe	ze bette wolde gan 
vor des sales stiegen	gesamden sich do sit
Kriemhilt vnd Prunhilt	noch was ez beidenthalben ane nit
Do kom ir ingesinde	 die svmpten sich des niht 
ir riche kamerere	die brahten in div lieht 
sich teilten do die reken	der zweier kvnige man 
do sach man vil degene	mit Sifriden gan
Die herren komen beide	da si solden ligen 
do dahte ir ieweder	mit min an gesigen
den wetlichen vrovwen	 daz senftet in den mvot 
Sifrides kvrzwile	div wart grozlichen guot
Ich sage iv niht mere	wie er der vrowen pflach 
nv hoeret disiv mere	wie Gvnther gelach
bi frovwen Prvnhilde	cierlicher degen 
er hete dike samfter	bi anderen wiben gelegen
In saben wizen hemde	si an daz bette gie 
do dahte der riter edele	nu han ichz allez hie 
des ich ie da gerte	in allen minen tagen 
si muos im durch ir schoene	von grozen schvlden behagen
Div lieht begvnde bergen	des edelen <kvniges> hant 
do gie der degen kuene	 da er die vrowen vant 
er leite sich ir nahen	sin frovde div was groz	[24b]
die nu minneclichen	 der helt mit armen vmbesloz
Si sprach	riter edel	ir sultez lazen stan 
des ir da habet gedingen	ia magez niht ergan 
ich wil noch meit beliben	ir svlt wol merchen daz 
vnz ich div mere ervinde	des wart ir Gvnther gehaz
Do rang er nach ir minne	 vnd zerfuorte ir div kleit 
do greif nach eime gvrtel	div herliche meit 
eime starken borten	dens vmb ir siten truoch 
do tet si dem kvnige	 grozer leide genvoch
Die fueze vnd ovch <die> hende	si im zesamne bant 
si truog in zeime nagel	vnd hiench in an ein want 
do er si slafes irte	minne si ime verbot 
ia het er von ir krefte	nach gewunnen den tot
Do begvnde flegen	 der meister solde sin 
loeset min gebende	 vil edel kvnigen 
ich trovwiv	schoene vrovwe	nimmer an gesigen
vnd sol ovch harte selten	iv so nahen bi geligen
Nv saget mir	er Gvnther	ist iv daz iht leit 
ob ivch gebvnden vindent	sprach schoene meit 
iwere kamerere	von einer vrowen hant	
do sprach der riter edele	 daz wurde iv vbel bewant
ovch het ichs wenich ere	 sprach der edel man 
dvrch iwer tvgende	lat zvo ziv mich nv gan 
sit iv mine minne	 sint so starke leit 
ich sol mit minen handen	selten rueren <iwer> kleit
Do loste <si> in balde	vf si in verlie 
wider an daz bette	er zvo der vrowen gie 
er leite sich so verre	daz er ir schoene wat
darnach selten ruorte	ovch wolde si des haben rat
Do kom ovch ir gesinde	die brahten niwe kleit 
der was in an den morgen	harte vil bereit 
swie wol man da gebarte	truorich was sin mvot 
der herre des landes	ir frovde duht in niht ze gvot
Nach siten der si pflagen	vnd man dvrch reht begie 
Gvnther vnde Prunhilt	niht langer daz verlie 
si giengen zvo dem mvnster	da man die messe sanch 
dar kom ovch er Sifrit	do hvop sich michel gedranc
Nach kvniklichen eren	was in dar bereit
swaz si haben solden	 ir krone vnd ovch ir kleit 
do wurden si gewihet	 do daz was getan 
do sach man vnder krone	elliv fieriv schoene stan
Vil degen swert da namen	sehs hundert oder baz 
den kvnigen ze eren	ir svlt wizzen daz 
sich huop michel freude	in Bvrgonden lant 
man horte schefte hellen	an der swertdegen hant
Do sazzen in den venstren	div schoenen meidin 
si sahen vor ir luhten	maniges schildes schin 
do hete sich gesvndert	der chvnich von sinen man 
swes ieman da begvnde	man sach in trovrinde gan
Im vnd Sifride	vngelich stuont der muot	[25a]
wol wiste waz im wurre	der riter edel guot 
er gie zuo dem kvnige	vragen er began 
wie ist iv heint gelvngen	daz sult ir mich wizen lan
Do sprach der wirt zem gaste	 laster vnde schaden
han ich an miner vrovwen	 ze hvse heim geladen 
do ich se wande minnen	vil sere si mich bant 
si truoch mich zeime nagele	vnd hiench mich hoh an eine want
Da hieng ich angestlichen	die naht vnz an den tac 
ê si mich enbvnde	wie samphte si do lac 
daz sol dir frivntlichen	tovgen sin gechleit	
do sprach der starke Sifrit	 daz ist mir werlichen leit
Des bring ich iv wol innen	 lat irz ane nit 
ich schaffe daz si hinaht	so nahen bi iv lit 
daz si ivch ir minne	gesuomet nimmer mer	
der rede was do Gvnther	nach sinen arbeiten her
Er sprach	ich kvme noch heint	ze der kemenaten sin
also tovgenliche	in der tarnkappe min 
daz sich der liste	mach nieman wol versten 
so lat die kamerere	zuo den herbergen <gen>
So lesche ich den kinden	div lieht an der hant 
daz ich si darinne	si iv dabi bechant 
daz ich iv gerne diene	ich twing iv daz wip 
daz ir si heint minnet	oder ich verlivse den lip
An daz dv iht trovtest	sprach der kvnich do 
mine lieben vrowen	 anders bin vro 
so tuo ir swaz dv wellest	vnde nemest ir den lip 
daz sold ich wol derkiesen	si ist ein angestlichez wip
Daz tuon ich	sprach Syfrit	 vf die triwe min 
daz ich ir niht minne		div liebe swester din
ist mir vor in allen		die ich noch ie gesach	
vil wol gelovbetez Gvnther	swaz do Sifrit gesprach
Da was von kurzewile	vrovde vnde not 
buhurt vnde schallen	 man allez verbot 
da die vrowen solden	 gegen dem sale gan 
do hiezen kamerere	die lûte von den wegen stan
Von rossen vnd von lûten	gerumet wart der hof 
der vrowen isliche	fuorte ein bischof 
do si vor dem kvnigen	ze tische solden gan 
in volgete an daz gesidele	vil maniger wetlicher man
Der kvnich beite kvme	 daz man von tische gie 
die schoenen Prvnhilde	man do komen lie	
vnd ovch Chriemhilde	beide an ir gemach 
hei waz man sneller degne	vor den kvniginnen sach
Sifrit der herre	vil minneclichen saz
bi sime schoenen wibe	mit vrovden an haz 
si trvote sine hende	mit ir vil wizen hant 
vnz er vor ir ovgen	si ne wesse wenne	verswant
Do si mit im spilte	vnd si si niht ensach 
zvo sime ingesinde	 div kvniginne sprach 
mich hat des michel wunder	war ist der kvnich komen [25b]
wer hat di sinen hende	vz den minen genomen
Die rede si lie beliben	er was hin gegan
da er die kamerere	vant mit liehtem stan 
div begvnde er leschen	den kinden an der hant 
daz ez were Syfrit	 daz wart do Gvnther bechant
Wol wesse er waz er wolde	do hiez er dannen gan
meide vnde vrovwen	 do daz was getan 
der edel kvnich do selbe	vil wol besloz div tûre 
starker rigele zwene	warf er balde derfvre
Div lieht verbar er schiere	vnder die bete wat 
eins spils begvnde	des enwas niht rat	
Sifrit der starke	vnd ovch div schoene meit 
das was dem kvnige Gvnther	beide lieb vnde leit
Sifrit sich leite	do der kvniginne bi 
si sprach	nv latez	er Gvnther	alse liep iv daz si 
daz ir iht arebeite	lidet alsam ê 
oder iv geschihet	 von minen handen we
Do hal er sine stimme	daz er niht sprach 
Gvnther wol horte	swie er niht ensach 
daz heimliche	von in da niht geschach 
si heten an dem bette	harte cleinen gemach
Er gebarte sam ez were	der chvnich Gvnther rich 
er vmbesloz mit armen	die maget lobelich 
si warf in vz den bette	da bi vf eine banc 
daz si im sin hovbet lûte	an eime schamel erclanch
Wider vf mit kreften	spranch der kuene man 
er woldez baz versuochen	do er des began 
daz er si wolde twingen	darvmbe wart im we 
solich wer an frovwen	 ich wene nimmer erge
Do er niht wolde erwinden	div maget vf spranch 
iv cimet mich niht zefuoren	min hemde so blanch 
ir sit vngefuege	daz sol ivch werden leit 
des bringe ich iv wol innen	sprach div wetliche meit
Si besloz mit armen	 den tiwerlichen degen 
vnd wold in gebvnden	alsam den kvnich legen 
daz si an dem bette	hete gvt gemach 
daz er ir wat zerfuorte	div vrovwe ez grozlichen rach
Waz half do sin sterke	vnd ovch sin kraft 
wan si im erzeigete	 ir libes meisterschaft 
si truoch in mit gewalte	 daz muoz et also sin	
vnd druchte in vngefvege	bi dem bette an einen schrin
Owe	gedaht der reke	sol ich minen lip
von einer meit verliesen	so mvgen elliv wip
darnach immer mere	 tragen gelphen mvot
gen ir manne	 div sus ez nimmer getuot
Der kvnich er wol horte	er angeste vmbe den man 
Syfrit sich schamte	zvrnen er began 
mit vngefuegen krefte	satzter er sic wider
versuohende angestlichen	an fron Prvnhilde sider
Den kvnich dûhte lange	ê er si betwanch	[26a] 
si druhte sine hende	daz uz den naglen spranch
daz bluot von ir krefte	daz was den helde leit 
des braht er an lovgen	sit die herlichen meit
ir vngefueges willen	 des si ê da iach 
der kvnich ez allez horte	swie er niht ensprach 
er druhtes an daz bette	daz ez vil lûte erschre 
ir taten sine krefte	harte grozlichen we
Do greif si zuo der siten	da si den porten vant 
vnd wold in han gebvnden	do wertez so sin hant 
daz ir div lit erkrachten	dar zvo al der lip 
des wart der kriech gescheiden	do wart si Gvnthers wip
Si sprach	kvnich edel	 du solt mich leben lan 
ez wirt wol versvenet	 swaz ich dir han getan 
ich were <mich> nimmer me	der edelen minne din 
ich han wol erfvnden	daz dv kanst vrovwen meister sin
Sifrit der stuont dannen	ligen lie er die meit 
sam ob er von im ziehen	wolde siniv kleit 
er zoch ir ab der hende	ein gvlden vingerlin 
daz da nie wart innen	div edel kvnigin
Dar zuo nam er ir gurtel	 daz was ein borte guot 
ich en weiz ob er daz tete	durch sinen hohen mvot 
er gap in sinen wibe	daz wart im sider leit 
do lagen bi an ander	der kvnich vnd div schoene meit
Do was ovch si niht sterker	danne an ander wip 
er trvte minneclichen	 ir vil schoenen lip 
ob siz versuohte me	 waz kvnd ez si veruan 
daz het ir allez Gvnther	mit sinen minnen getan
Wie rehte minnecliche	er bi der vrowen lach
mit vrivntlicher liebe	biz an den liehten tach 
nv was der herre Sifrit	wider vz gegan 
da er wol enphangen	von einer vrowen wolgetan
Er vnderstuont ir vrage	der si hete getan 
er hal si sit vil lange	daz er ir hete braht 
vnz si vnder krone	 in sime lande gie 
swaz er ir geben solde	wie luzel er ez beliben lie
Der wirt wart an dem morgen	verre baz gemuot
danner vore were	des wart div frovde guot
in allen den landen	von manigen edel man 
die er ze hvse ladete	den wart vil dienst getan
Div hochcit div werte	den vierzehenden tac 
daz in al der wile	nie der schal gelach
von aller hande vrovden	der ieman solde pflegen 
da wart des kvniges koste	vil harte hohe gewegen
Des edelen wirtes mage	 als ez der kvnich gebot 
gaben durch sin ere	 kleider vnde golt rot 
ros vnde darzvo silber	manigen kuenen man 
die herren	die dar komen	schieden frolichen dan
Vnd der kvnich Sifrit	vzer Niderlant
mit tusent sinen mannen	allez ir gewant
daz si dar brahten	daz wart gar hin gegeben	[26b]
schoeniv ros mit setelen	si kvnden herlichen leben
E daz man die rike	gabe da verswanch 
die da wolden ce lande	duhte des ce lanch 
ez wart nie gesindes	mere baz geflegen 
so endete sich div hochcit	ez sciet von dannen manic degen

o die geste warn	alle dan gevarn 
do sprach zuo sim	gesinde	Sigmvndes barn 
wir svln ovch vns bereiten	heim in vnser lant	
liep was ez sinem wibe	do ez div vrowe rehte ervant
Die fvrsten zuo im giengen	vnd sprachen alle dri 
wizzet	kvnich Sifrit	daz iv immer si
mit triwen vnser dienst	bereit vnz in den tot	
do neig er den herren	do man imz so guetlich erbot
Wir svln ovch mit iv teilen	sprach Giselher daz kint 
lant vnde burge	die vnser eigen sint 
swaz vns der witene	mac wesen vndertan 
der svlt ir teil vil guoten	mit samt Kriemhilde han
Der svn Sigmvndes		 zvo den fvrsten sprach 
do er der herren willen	gehorte vnde gesach 
got laziv iwer erbe	immer selich sin 
ia tuon ich ir ze rate	mit der lieben vrowen min
Do sprach div vrowe Kriemhilt	 habet ir der erben rat 
vmbe Bvrgonden degene	ez niht so lihte stat 
si mug ein kvnich gerne	fuoren in sin lant 
ia sol si mit mir teilen	miner lieben bruoder hant
Do sprach der herre Gernot	 nim dir swen dv wil 
die gerne mit dir riten	der vindestu hie vil 
vz drizech hvndert reken	nim dir tusent man 
die sin din heimgesinde	Kriemhilt senden began
nach Hagenen von Trony	 vnde nach Ortwin 
ob die vnd ir mage	Kriemhilde wolden sin 
darvmbe gewan Hagene	zorneclichez leben 
er sprach	ia mag vns Gvnther	nimmer hin gegeben
Ander ingesinde	lat iv volgen mite 
wan ir wol bekennet	der Tronyere site 
wir muozen bi den kvnigen	hie ze houe <bestan> 
wir svln ir langen dienen	den wir her gevolget han
Daz liezen si beliben	vnde bereiten sich dan 
ir edel ingesinde	 vro Kriemhilt zvo ir gewan 
zwo vnd drizech meide	vnd funf hvndert man 
Ekehart der graue	volgete Kriemhilde dan
Vrlop si do namen	beidiv riter vnde kneht 
meide vnde vrowen	 daz was vil michel reht 
gescheiden kvssende	wurden si zehant 
si rumten vrolichen	des kvnich Gvnthers lant
Do beleiten si ir mage	verre vf den wegen 
man hiez in allenthalben	ir nahtselde legen 
swa siz gerne namen	 durch der kvnige lant 
boten wurden balde	Sigmvnde dan gesant	[27a]
daz er wizzen solde	 vnd frov Sigelint 
daz sin svn koeme	vnde vrov voten kint 
Kiemhilt div vil schoene	von Wormez vber Rin 
do kvnden in div mere	 nimmer lieber gesin
Wol mich	sprach do Sigmvnt	daz ich gelebet han 
daz div schoene Chriemhilt	 sol hie gekronet gan 
des muosen wol getiwert	sin div erbe min 
min svn Sifrit	 sol hie selbe kvnich sin
Do gap div vrowe Siglint	manigen samit rot 
silber vnde golt swere	was ir botenbrot 
si vrovte sich der mere	div si do vernam 
sich chleidete ir gesinde	mit flize wol als in gezam
Man seite wer da koeme	mit im in daz lant 
do hiez si gesidele	rihten sa zehant 
daz zuo er gekronet	vor vrivnden solde gan 
do riten in engegene	des kvnich Sigmundes man
Ist ieman baz enphangen	dest mir vnbekant 
danne die helde	in Sigmvndes lant 
Siglint div schoene	Kriemhilde gegen reit
mit maniger schoenen frovwen	vn– ritteren gemeit
in einer tageweide	da man die geste sach 
die kvnden vnd die vremdem	liten vngemach 
vnze si kornen	zeiner burge wit 
div was geheizen Santen	da si krone truogen sit
Mit lachendem mvnde	Siglint vnd Sigmvnt
kvsten Kriemhilde	 durch liebe manige stvnt 
vnd ovch Sifriden	 in was ir leit benomen 
allez ir gesinde	was in grozlichen willekomen
Man bat die geste bringen	fur Sigmvndes sal 
die schoenen ivnchvrowen	huop man da zetal
nider von den moeren	da was manich man 
der den schoenen wiben	mit flize dienen began
Dos in ir grozen eren	sazen vnd heten genuoch 
waz goltvarwer gern	ir ingesinde truoch 
borten vnd edel gesteine	verwiert wol darin 
sus pflach vlizeclichen	ir div edel kvnigin
Do sprach vor sinen frivnden	der herre Sigmnvnt 
den Sifrides magen	tuon ich allen kvnt 
er sol vor disen reken	mine krone tragen	
div mere horten gerne	die von Niderlanden sagen
Er bevalch im sin krone	gerihte vnde lant 
sit was er ir herre	die er ze rehte vant
vnd dar er rihten solde	daz wart also getan 
daz man sere vorhte	der schoenen Kriemhilde man
In disen grozen eren	 lebter	daz ist war 
vnd rihte ovch vnder krone	an daz zehende iar 
daz div schoene vrowe	 einen svn gewan 
daz was des kvniges magen	nach willen wol ergan
Den ilte man do tovfen	vnd gap im einen namen 
Gvnther	nach sinem ovheim	des dorft er sich niht schamen 
geriet er nach den magen	daz wer im wol ergan	[27b]
do zoch man in mit flize	des was von schvlden getan
In den selben ziten	starp vro Siglint 
do nam den gewalt mit alle	der edelen voten kint 
der so riken vrowen	ob landen wol gezam 
daz klageten genuoge	do si der tot von in genam
Nv hete ovch dort die Rine	 so wir hoeren sagen	
bi Gvnther dem riken	 einen svn getragen
Pruonhilt div schoene	 in Burgonden lant 
durch des heldes liebe	wart er Sifrit genant
Mere zallen ziten	wart so vil geseit 
wie rehte lobelichen	die reken wol gemeit
lebeten zallen stvnden	in Sigmundes lant 
alsam tet ovch Gvnther	mit sinen magen vzerkant
Daz lant der Niblvnge	Sifride diente hie	
richer siner mage	wart neheiner nie	
vnd Schilbundes reken	vnd ir beider guot 
des truoch der kuene Syfrit	deste hoeher sinen muot
Hort den aller meisten	den ie helt gewan	
ane die es pflagen	hete der kvene man 
den er vor eime berge	mit siner hende erstreit 
darvmb er sluoch ce tode	manigen riter gemeit
Er hete den wunsch der eren	vnde were des niht geschehen 
so muese man von schvlden	dem edelen reken iehen 
daz er were der beste	der ie vf ors gesaz 
man vorhte sine sterke	 vnd tet vil billichen daz

o dahte ovch alle zite	daz Gunthers wip
wie treit also hohe	vro Kriemhilt den lip 
nv ist doch vnser eigen	 Sifrit der man 
er hat vns nv lange	 lucel dienste getan
Daz truoch si in ir herzen	vnd wart ovch wol verdeit 
daz si ir vremde waren	daz was ir harte leit 
daz man ir so selten	 diende siniv lant 
wa von daz were		 daz hete si gerne bechant
Si versuohte an den kvnich	ob daz mohte geschehen 
daz si Kriemhilde	solde noch gesehen 
si reite ez heimeliche	des si da hete mvot 
do duhte den herren	 div rede mazlichen guot
Wie mohten wir si bringen	sprach der kvnich rich 
her zvo disem lande	 daz wer vnmvgelich 
si sicent vns ce verre	ich getarses niht gebiten	
do sprach div vrovwe	 in vil hochuerten siten
swie hohe riche were	deheins kvniges man 
swaz im gebute sin herre	daz sold er doch niht lan 
des ersmielte Gvnther	 do si daz gesprach 
er iachs im niht ce dienste	swie diche er Syfriden sach
Si sprach	lieber herre	dvrch den willen min	
hilf mir daz Sifrit	vnde div swester din
komen zuo dem lande	daz wir si hie gesehen	[28a]
so kvnde mir ze ware	nimer lieber geschehen
Diner swester zvht	vnd ir wol gezogen mvot 
so ich daran gedenke	wie samphte	mir daz tuot 
wie wir ensament sazen	do ich wart din wip 
si mac mit eren minnen	des kuenen Sifrides lip
Si gertes also lange	vnze der kvnich sprach 
nv wizzet daz ich geste	so gerne nie gesach 
ir mvget mich samfte vlegen	ich wil die boten min
nach in beiden senden	 da si here komen an den Rin
Do sprach div kvniginne	 so sult ir mir sagen
wenne ir si welt besenden	oder in welhen tagen
vnser liebe vrivnde	 svlen komen in daz lant 
die ier dar welt senden	lat werden mir bekant
Daz tuon ich	sprach der furste	drizech miner man
wil ich dar lan riten	 die hiez er fvr sich gan 
bi den enboter mere	in Sifrides lant 
ze liebe gap in Prvnhilt	vil harte herlich gewant
Do sprach der kvnich Gvnther	 ir reken svlt von mir gesagen 
daz ich dar enbiete	 des svlt ir niht verdagen	
den starken Sifride	vnd der swester min 
daz in darf zer werlde	niemer holder sin
Vnde bitet daz si beidiv	vns komen an den Rin 
daz wil ich vnd min vrowe	immer diende sin 
vor disen svnwenden	 sol er vnde sine man
sehen hie vil manigen	der in grozer eren gan
Dem kvnich Sigmvnde	saget den dienst min 
daz ich vnd mine frivnde	im immer wege sin 
vnd saget ovch miner swester	daz si niht laze daz 
sin rite zuo ir frivnden	ir zeme nie hochzite baz
Prunhilt vnde vote	 vnd swaz man vrowen da vant 
die enbvten ir dienst	in Sifrides lant
den minneclichen vrowen	vnd manigem kuenen man 
mit des kvniges rate	die boten huoben sich dan
Si fuoren reisliche	ir pferit vnd ir gewant
daz was in do komen	do rvmten si daz lant 
in zogte wol ir verte	dar si da wolden varn 
der kvnich mit gewalte	hiez die bote wol bewarn
< i> chomen in drin wochen	geriten in daz lant
ze Niblvnges burge	dar waren si gesant 
ze Norwege in der marke	funden si den degen 
ros vnd lute waren	muode von den langen wegen
Sifride vnd Kriemhilde	wart beiden do geseit 
daz riter komen weren	die truogen solhiv kleit
sam man ze Burgonden	 do der site pflac 
si spranch von einem bette	da si rowende lac
Do bat si zeime venster	eine maget gan 
div sach den kuenen Geren	an dem hove stan 
in vnd die gesellen	die waren dar gesant 
gegen ir herzeleide	wie liebiv mere si bevant
Si sprach zvo dem kvnige	 sehet ir wa si stent	[28b]
die mit dem starken Geren	vf dem hove gent 
die vns min bruoder Gvnther	sendet nider Rin	
do sprach der starke Sifrit	 die svln vns willekomen sin 
Allez daz gesinde	lief da man si sach 
ir islich besvnder	 vil guetlich sprach
daz beste	daz si kvnden	zvo den boten do 
Sigmvnt der herre	was ir kunfte harte <vro>
Do wart geherberget	Gere vnd sine man 
div ros man hiez behalten	die boten giengen dan
da her Sifrit	bi Krimhilde saz 
in was ze hove erlovbet	da von so taten si daz
Der wirt mit sime wibe	stuont vf sa zehant 
wol wart enpfangen Gere	vz Burgonden lant
mit sinen hergesellen	Gvnthers man 
Geren den vil riken	 baten an den sedel gan
Erlovbet vns die botschaft	ê wir sicen gen 
vns wegemuode geste		lat vns die wile sten 
wir svln iv sagen mere	waz iv enboten hat
Gvnther vnd Prunhilt	der dinch vil zierlich stat
vnd waz vrov vote	iwer muoter	her enbot 
Giselher der ivnge	vnd ovch er Gernot
vnd iwer besten mage	habent vns her gesant 
die enbietent iv ir dienst	vzer Bvrgonden lant
Nv lon im got	sprach Sifrit	ich getruowe in wol
triwen vnde guotes	also man frivnden sol 
sam tuot ovch ir swester	man sol vns mere sagen 
ob da heime vnser frivnde	iht hohes muotes tragen
Sit wir von ir schieden	hat man in iht getan 
minen konen magen	sult ir mich wizzen lan 
daz wil ich in mit triwen	immer helfen tragen 
vnz daz ir viende	 minen dienst muozen klagen
Do sprach der marchgraue	Gere	ein riter guot 
si sint in allen tvgenden	so rehte hoh gemuot 
si ladent ivch ze Rine	 an eine hohgecit 
si sæhen iuch vil gerne	 daz ir des ane zwivel sit
Bittet mine frowen		si svl mit iv dar komen 
swenne der winder		 ein ende habe genomen 
vor disen svnnewenden	wolden si ivch sehen	
do sprach der starke Sifrit	 daz kvnde muolich gesehen
Do sprach aber Gere	 von Burgonden lant 
iwer muoter vote	 div hat ivch gemant 
Gernot vnd Giselher	ir svlt in niht versagen 
daz ir in sit so verre	daz hoere ich tegeliche klagen
Prunhilt min vrowe	 vnd ir magedin
vrovnt sich der mere	 obe daz mehte sin 
daz si iuch noch sehen	daz gebe in hohern muot	
do dvhten disiv mere	 die schoenen Kriemhilde guot
Gere was ir sippe	der wirt in sicen hiez 
den gensten hiez er senken	niht langer man daz hiez 
do kom ovch dar Sigmvnt		da er die boten sach	[29a]
der herre friuntleich	 zuo den Burgonden sprach
Sit willekomen	ir reken	Gvnthers man 
sit daz Kriemhilde	ze wibe gewan
Sifrit min svn	 man soldiv diker sehen
hie in disem lande	woldet ir uns vriuntschefte iehen
Si sprachen	swenne er wolden	gerne komen 
in wart michel muede	mit freuden benomen 
die boten bar man sicen	spise man in truoch 
der hiez do geben Sifrit	sinen gesten genuoch
Si muosen da beliben	 beuolle nivn tage 
des heten endelichen	die snellen riter klage 
daz si niht wider rüten	solden in ir lant 
do hete der kvnich Sifrit	nach sinen frivnden gesant
Er vragte waz si rieten	 er sold an den Rin 
ez hat nach mir gesendet	Gvnther	der frivnt min 
er vnd sine mage	durch ein hochcit 
nv kom ich im vil gerne	an daz sin lant ce verre lit
Si bittent Kriemhilde	daz si mit mir var 
nv ratet	lieben frivnde	wie sol si komen dar 
sold ich heruerten	durch si in drizech lant 
da muose in dienen gerne	hin div Sifrides hant
Do sprachen sine reken	 habet ir der reise muot
hin cer hochcite	wir raten waz wir <tuot> 
ir svlt min tvsent reken	riten an den Rin 
so muget ir wol mit eren	da cen Burgonden sin
Do sprach von Niderlanden	der herre Sigmvnt 
welt ir zer hochzite	wan tuot ir mir daz kvnt 
ob ez iv niht versmahet	so rite ich mit iv dare 
ich fuere tusent degne	da mite mer ich iwer schare
Welt ir mit vns riten	lieber vater min	
sprach der kuene Sifrit	 vil vro sol ich des sin 
inre tagen zweluen	 so ruome ich miniu lant	
alle die es gerten	den gap man ros vnd ovch gewant
Do der kvnich edel	der reise hete muot 
do hiez man wider riten	die snellen degne guot 
sinen konemagen	enbot er an den Rin 
er wolde harte gerne	bi ir hochgecite sin
Sifrit vnd Kriemhilt	 so wir hoeren sagen	
so vil den boten gaben	daz ez niht mohten tragen
ir moere haim ze lande	 er was ein riker man 
ir starken sovmære	 treip man vroelichen dan
Ir volk chleidete Sifrit	vnd ovch Sigemunt 
Ekewart der graue	 der hiez an der stunt
vrovwen kleider suochen	die besten div man vant
oder inner kvnde erwerben	vber Sifrides lant
Die setel zuo den schilden	bereiten man began 
rittern vnd vrowen	 die mit im solden dan 
den gap man swaz si wolden	daz in niht gebrast 
er brahte sinen frivnden	manigen herlichen gast
Die boten zogten sere	ze lande vf den wegen	[29b]
do kom von Burgonden lant	vere der <gegen> 
er wart vil wol enphangen	do erbeizten si zetal
von rossen vnd von moren	 fvr den Gvnthers sal
Die tvmben vnd die wisen	giengen	so man tuot 
vragen vmbe mere	do sprach der riter guot 
swenne ich si sage den kvnige	da hort irs cehant	
er gie mit den gesellen	 da er Gvntheren vant
Der kvnich von liebe		von dem sedel spranch 
daz si so snelle komen	des seite in do danch
Provnhilt div schoene		 Gvnther zen boten spranch 
wie gehabet sich Sifrit	von den mir liebe vil gesach
Do sprach der kuene Gere	 da wart er vrovden rot 
er vn iwer suester	nie vriunden baz enbot
so getriwe mere	 deheiner slahte man 
als iv der herre Sifrit	vnd ovch sin vater hat getan
Do sprach zuo dem marchgrauen	des richen kvniges wip 
saget mir	kvmt vns Kriemhilt	hat noch ir schoener lip
behalten iht der zvhte	der si kvnde phlegen	
si kvmet sicerlichen	sprach do Gere der degen
vote bat do drate	die boten fur sich gen 
man moht an ir vrage	harte wol versten 
daz si horte gerne	was Kriemhilt noch gesvnt 
er seite wie er si funde	vnd daz si koeme in kurzer stvnt
Ez wart von in div gabe	ze hove niht verdeit 
die in gap er Sifrit	golt vnd ovch div kleit
brahte man ce sehenne	der drier kvnige man 
ir vil grozer milte	wart da danken getan
Er mac	sprach do Hagne	von im sampfte geben 
er kvndez niht verswenden	sold er immer leben 
hort der Niblvnge	 besloz hat sin hant 
hey solder immer komen	in Burgonden lant
Allez daz gesinde	frevte sich darzvo
daz si komen solden	spate vnde vruo
waren vil vnmuozech	der drier kvnige man 
manic hergesidele	man do rihten began
Hvnolt der kuene	vnd Sindolt der degen
heten vil vnmuoze	 die cit si muosen pflegen
truchsezen vnd schenchen	ce rihten manige banc 
des half in ovch Ortwin	des seit in Gvnther danc
Rvmolt der kvchenmeister	wie wol er rihte sich
sine vndertane	<manegen> kezzel wit 
haven vnde pfannen	hey waz man der da vant 
do bereite man den spise	die da komen in daz lant

lle> ir vnmuoze	lazen wir nv sin 
vnd sagen wie vro Kiemhilt	vnd ir magedin
hin gen Rine fvoren	von Niblvnge lant 
nie getrvogen moere	so manic herlich gewant
Vil der sovmschrine	man schihte zvo den wegen	[30a]
do reit mit sinen frivnden	Sifrit der degen
vnd div kvniginne	 dar si heten vrovden <wan> 
sit wart ez in allen	ze grozem leide getan
Da heime si do liezen	Syfrides kindelin
vnd den svn Kriemhilde	daz muoz et also sin 
von ir houereise	wuos vil michel ser 
sin vater vn– sin muoter	gesach daz kindel nimmer mer
Do reit ovch mit in dannen	der herre Sigmunt 
sold er rehte <wizzen>	wie ez nach der stunt
zer hochzit ergienge	er het ir niht gesehen 
im kvnde an lieben frivnden	leider nimmer gescehen
Boten man fvr sande	die mære siten dar 
do reit ovch in enkegne	mit wunderlicher schar
vil der Vten vrivnde	 vnd der Gvnthers man 
der wirt gen sinen gesten	sich sere vlizen began
Er gie zuo Prunhilde	 da er si sicen vant 
wie enpfieng ivch min swester	do ir komt in daz lant 
sam svlt ir enphahen	Sifrides wip	
daz tuon ich	sprach si	gerne	von schvlden holt ist ir min lip
Do sprach der kvnich riche		si koment vns morgen vrvo 
welt ir si enpfahen	da grifet balde zvo 
daz wir ir niht biten	in der burch hie 
mir sint in allen ziten	lieber geste komen nie
Ir meide vnd ir vrowen	hiez si sa cehant
suochen guotiv kleider	div hesten div man vant 
div ir ingesinde	vor gesten solde tragen 
daz taten si doch gerne	daz mach man lihte gesagen 
Ovch ilten do dienen	 die Gvnthers man 
alle sinen reken	 der wirt zuo im gewan 
do reit div kvniginne	herlichen dan 
da wart vil michel gruozen	die lieben geste getan
Mit wie getanen vrovden	man die geste enphie 
si dvhte daz vrov Kriemhilt	vrovn Prvnhilde nie
so rehte wol enphienge	in Burgonden lant 
die ez ie gesahen	 den wart vil hoher muot bekant
Nv was ovch komen Sifrit	mit den sinen man 
sach die helde wenden	wider vn– dan
des veldes allenthalben	mit vngefuegen scharn 
dringen vn– stovben	kvnde niemen da bewarn
Do der wirt des landes	Sifriden sach
vnd ovch Sigmvnden	 wie minneclichen er sprach 
nv sit <mir> groze willekomen	vnd al den frivnden min 
iwer hovereise	suln wir hohes muotes sin
Nv lon iv got	sprach Sigmvnt	 der ere gernde man 
sit daz ivch Sifrit	ce frivnde gewan 
do rieten mine sinne	daz ich iv wolde sehen	
do sprach der kvnich Gvnther	 nv ist mir liebe dran geschehen
Sifrit wart enphangen	als im daz wol gezaz 
mit vil grozen eren	nimen was im gram 
des half mit grozen zvhten	Giselher vnd Gernot	[30b]
nie lieben gesten	man so guotlich erbot
Nv naheten zuo an ander	der zweier kvnige wip 
da wart vil setel lere	maniger vrowen lip
wart von helden handen	erhaben vf daz gras 
die vrovwen gerne dienden	waz der da vnmvozech was
Do giengen zvo an ander	div minnechlichen wip 
des was in grozen vrovden	maniges riters lip 
daz ir beider gruozen	so minneclich ergie 
do sach man vil der reken	der dienen vrovwen da niht lie
Daz herlich gesinde	vie si bi der hant
in zvhten groz nigen	des man vil da vant 
vnd kvssen minneclichen	von vrowen wolgetan 
daz was liep ze sehenne	Gvnther vnd Sifride man
Si biten da niht langer	si riten zuo der stat 
der wirt sinen gesten	wol erzeigen bat 
daz man si gerne sehe	 in Burgonden lant 
manigen puneiz richen	 man vor den ivnchfrovwen vant
Vzer Troni Hagne		vnd ovch Ortwin 
daz si gewaltech weren	daz taten si wol schün 
swaz si gebieten wolden	des torste man niht lan 
von in wart michel dienst	den lieben gesten getan
Vil schilde horte man hellen	da ce dem burge tor
von stiche vnd von stozen	 lange habte da vor
der wirt mit sinen gesten	ê si chomen drin 
ia gie in div stunde	mit grozer zvrzwile hin
Fvr den palas witen	 mit frovden si do riten 
manigen phelle spehe	gvot vn– wol gesniten 
sach man vber setele	den vrowen wolgetan
allenthalben hangen	do komen Gvnthers man
Die geste hiez man fueren	balde an ir gemach 
vnder wilen bliken	 man Prvnhilde sach
an vrovwen Kriemhilde	div schoene was genuoch 
ir varwe gen dem golde	den glanz vil herlichen truoch
Allenthalben schallen	ze Wormz in der stat
horte man daz gesinde	 Gvnther do bat
Danchwarten sinen marschalch	daz er ir solde pflegen 
do begvnde er daz gesinde	harte guotlichen legen
Dar zuo vnd ovch dar inne	spisen man si lie 
ia wart vremder geste	baz gepflegen nie 
alles des si gerten	des was man in bereit 
der kvnich was so riche	daz nieman da niht wart verseit
Man diende in frivntliche	vnd an allen haz 
der wirt da ze tische	mit sinen gesten saz 
man bat Sifriden sicen	als er ê hete getan 
do gie mit im ze sedele	vil manich <wertlicher> man
Zwelf hvndert reken	 an dem ringe sin
da ze tische sazen	Prvnhilt div kvnigin
gedaht daz eigen holde	 nit richer kvnde wesen 
si was im noch so wege	 daz si in gerne lie genesen
An eime abende	 da der kvnich saz	[31a]
vil der richen kleider	wart von wine naz 
da die schenchen solden	zuo den tischen gan 
da wart vil voller dienst	mit grozem flize getan
So man ce hochciten	lange hat gepflegen 
vrowen vnde meide	hiez man schoene legen 
swannen si dar komen	der wirt in willen trvoc 
in guotlichen eren	man gap in allen genuoc
Do div naht het ende	vnd der tac erschein 
vz den sovmschrinen	manich edel stein
erlvhte in guoter wete	 die fuorte vrovwen hant 
do wart er fur gesvochet	manich herlich gewant
ê ez wol ertagete	do komen fvr den sal
vil riter vnd knehte	do hvop sich aber <schal>
vor einer vruomesse	 die man dem kvnige sanch 
da riten ivnge helde	 daz ins der kvnich seite danch
Manic pusune lûte	vil krefteclich erdoz 
von trvnben vnd von vloiten	der schal wart so groz 
daz Wurmez div vil wite	darnach lute erschal 
die hoch gemuoten helde	ce rossen komen vber al
Do huop sich in dem lande	harte hohe ein spil
von manigem guoten reken	der sach man da vil 
den ir tvmbiv herze	gaben hohen muot 
der sach man vnder schilde	manigen zieren riter guot
In div venstersazen	div herlichen wip
vnd vil der schoenen meide	geciert was ir lip 
si sahen zvrzewile	von manigen kuenen man 
der wirt mit sinen vrivnden	selbe riten da began
Svs vertriben si di wile	div dvhte niht lanch 
man horte da zem tuome	manigem gloken klanch 
do komen in die moere		die vrowen riten dan 
den edelen kvniginnen	 volgete manich kuene man
Si stuonden vor dem mvnster	nider vf daz gras 
Prvnhilt ir gesten	dannoch wege was 
si giengen vnder krone	in daz mvnster wit 
div liebe wart sit gescheiden	daz schuof grozlicher nit
Do si gehorten messe	 si fuoren wider dan
mit vil manigen ern	 man sach si sider gan
ce tische vroliche	ir vrovde nie gelach
da zer hohgezite	 vnz an den einliften tach

or einer vesperzit	huop sich groz vngemach 
daz von manigen reken	vf dem hove	esach 
si pflagen riterschefte	durch kurzwile wan 
do liefen dar durch schowen	manich wip vnde man
Zesamne do gesazen	die kvniginne rich 
si gedahten zweir reken	die warn lobelich 
do sprach div schoene Kriemhilt	 ich han einen nman 
daz elliv disiv riche	zuo sinen handen solden stan
Do sprach div vroewe Prunhilt	 wie kvnde daz gesin	[31b]
ob ander nieman lebete	wan din vn– sin 
so mohten im div riche	wol wesen vndertan 
die wile daz lebet Gvnther	so kvndez nimmer ergan
Do sprach aber Kriemhilt	 sihestv wie er stat 
wie rehte herliche	 er vor den reken gat 
sam der liehte mane	vor den sternen tvot 
des mvos ich von schvlden	tragen vrolichen mvot
Do sprach div vrowe Prvnhilt	 swie watlich si din man 
biderbe vnd swi schoene	so soltv vor im lan
Gvnther den reken	den edeln bruoder din 
der mvoz vor allen kvnigen	daz wizze werliche	sin
Do sprach aber Kriemhilt	 so tiwer ist min man 
daz ich in an schvlde	niht gelobet han 
an vil manigen dingen	ist sin ere groez 
gelovbest dv daz	Prvnhilt	er ist wol Gvnthers genoz
Ia soltu mirz	Kriemhilt	ze arge niht verstan 
wan ich an schvlde	 niht die rede han getan 
ich horte si iehen beide	do ich si erste sach 
vn– da des kvniges wille	an mime libe gesach
vnd da er mine minne	so riterlich gewan 
do iach Sifrit	er were	des kvniges man 
des han ich in fur eigen	sit ich ins horte iehen	
do sprach div schoene Kriemhilt	so wer mir vbel geschehen 
Wie heten so geworben	die edelen bruoder min 
daz ich eigenmannes	wine solde sin 
des wil ich dich	Prvnhilt	vil frivntlichen biten 
daz dv last die rede	 durch mich mit guetlichen siten
Iich mag ir niht gelazen	sprach des kvniges wip 
zwiv sold ich verchiesen	 so maniges riters lip 
der vns mit dem degne		dienstlich ist vndertan	
Kriemhilt div vil schoene	daz sere zvrnen began
Dv mvst in verchiesen	daz er dir immer bi
wone deheiner dienste	 er ist tiwer danne si
Gvnther min bruoder	 der vil edel man 
dv sold mich des erlazen	daz ich von dir venomen han
Vnde nimet mich imer wunder	sit er din eigen ist 
vnd dv uber vns <beidiv>	so gewaltich bist 
daz er dir so lange	den cins versezzen hat 
diner vbermvote	sold ich von rehte haben rat
Dv civhest dich ze hohe	sprach do des kvnige wip 
nv wil ich sehen gerne	 ob man dinen lip
habe ce solhen eren	 so man den minnen tuot	
die frowen wurden beide	vil sere zornich genuoch
Do sprach div vrowe Kriemhilt	 daz muoz et nv geschehen 
sit dv mines mannes	fur eigen hast geiehen 
so muozen hivte kiesen	der beider kvnige man 
ob ich vor kvniges wibe	ce kirche turre gegan
Dv muost daz hivte schowen	daz ich bin <adelfri> 
vnd daz min man ist tiwere	danne der din si 
da mite wil ich selbe	bescholden sin	[32a]
du solt noch heint kiesen	wie div eigene din
ze houe ge uor reken	 in Burgonden lant 
ich wil wesen tiwer		danne ieman habe bechant
deheine kvniginne		div krone her ie getruoch	
do huop sich vnder den vrowen	grozes nides genvch
Do sprach aber Prvnhilt	wil dv niht eigen sin 
so muost du dich scheiden	mit den vrowen din
von minem ingesinde	 da wir ce munster gan	
des antwrte Kriemhilt	 triwen	daz sol sin getan
Nu cheidet iuch	min meide	sprach Sifrides wip 
ez muoz ane schande	beliben hie min lip 
ir svlt wol lazen schovwen	 habet ir iht riche wat 
si mac sin gerne lovgen	des si hie veriehen hat
Man mohte in lihte raten	si svochten richiv kleit 
da wart vil wol gecieret	manich vrowe vnd meit 
do gie mit ir gesinde	des edelen kvniges wip	
da wart ovch wol gecieret	der schoenen Kriemhilde lip
mit drin vnd vierzech meiden	brahte si an den Rin 
die truogen liehte pfelle	geworht in Arabin 
svs komen zuo dem mvnster	die meide wolgetan 
ir warten vor dem huose	alle Sifrides man
Die lute man des wunder	wa von daz gesach 
daz man die kvnniginne	also gescheiden sach 
daz si bi an ander	niht giengen alsam ê 
da von wart manigem degne	sid vil sorchlichen we
Hie stuont vor dem mvnster	Gvnthers wip 
do hete chvrzwile	vil maniges riters lip
mit den schoenen frowen	der si da namen ware 
do kom div schoene Kiemhilt	mit maniger herlichen schare
Swaz kleider ie getrvgen	edelr riter kint 
wider ir gesinde	daz was gar ein wint 
si was so rich des guotes	daz drizech kvniges wip
ez mohten niht erzivgen	 daz eine erzivgte ir lip
Oob ieman wunschen solde	der kvnde niht gesagen 
<daz> man so richer cleider	gesehe ie me getragen 
so da ze stvnde truogen	 ir meide wolgetan 
wan Prvnhilde ze leide	ez hete Kriemhilt verlan
Zesamne si do komen		vor dem mvnster wit 
ez tet div hvsvrowe	 durch einen grozen nit 
si hiez vil <vbeliche>	 Kriemhilde stan 
ia sol vor kvniges wibe	nimmer eigen wip gegan
Do sprach div schoene Kriemhilt	 zornec was ir mvt 
kvndestv noch swigen	daz wær dir lihte guot 
dv hast geschendet	 dinen schoenen lip 
wie moehte mannes kebse	immer werden <kvniges> wip
Wem hastv hie verkebset	sprach des kvniges wip 
daz han ich dich	sprach Kriemhilt	dinen schonen lip
minnete erst Sifrit	min vil lieber man 
ia was ez niht din bruoder	der dinen meidem gewan
War komen dine sinne	 ez was ein arger list	[32b]
daz dv in lieze minnen	 sit er din eigen ist 
ich hoere dich	sprach Kriemhilt	an schvlde clagen	
triwen	sprach do Prvnhilt	daz wil ich <Gunthe	>
Waz mac mir daz gewerren	 din vbermuot dich hat betrogen 
dv hast mich ce dienste	mit rede dich an gezogen 
daz wizze an rehten triwen	ez ist mir immer leit 
getriwer heinliche	sol ich dir wesen vmbereit
Prvnhilt do weinde	Kriemhilt niht lenger lie 
vor des kvniges wibe	inz mvnster si do gie
mit ir ingesinde	da huop sich grozer haz 
da wurden liehtiv ovgen	starke truobe vnde naz
Swie vil man gote diende	oder ieman da sanch 
des duhte Prvnhilde	div wile gar ze lanch 
wand ir was vil truebe	der lip vnd ovch der muot 
des muoste sit enkelten	manich helt kuene vn– guot
Prunhilt vnd ir vrowen	gie fur daz mvnster stan 
si dahte	mich muez Kriemhilt	mere hoeren lan 
des mich so lûte cihet	daz wortraze wip 
hat er sichs geruemet	 ez get im werlich an den lip
Nv kom div edel Kriemhilt	mit manigem kuenen man 
do sprach div edel Prunhilt	 ir svlt noch stille stan 
er iahet mich ce chebsen	daz svlt ir lazen sehen 
mir ist von iwren spruchen	daz wizzet	leide geschehen
Do sprach vro Criemhilt	 ir moehtet mich lan gan 
ich erzivgez mit dem golde	daz ich enhende han 
daz brahte mir Sifrit	 do er bi iv lach	
nie gelebte Brunhilt	 deheinen leidern tac
Si sprach	daz golt vil edel	daz wart mir verstolen
vnd ist mich harte lange	 vbel verholn 
ich kvm ez an ein ende	 wer mirz hat genomen 
die vrowen waren beide	 in groz vngemuote komen
Do sprach aber Kriemhilt	 ich wils niht wesen diep 
dv mohtest gedaget han	were dir ere liep 
ich erzivgez mit dem gvrtel	den ich vmbe han 
daz ich niht livge	 ia wart Sifrit din man
Von Ninneue den siden	si den borten truoc
mit edelen gesteine	ia was er guot genuoch 
do den gesach vro Brvnhilt	weinen si began 
daz muoste freischen Gvnther	dar zuo alle sine man
Do sprach div kvniginne	heizet here gan
den fursten von Rine	ich wil in hoeren lan 
wie mich hat gehoenet	 siner swester lip 
si seit hie offenliche	ich si Sifrides wip
Der kvnich kom mit reken	weinen er do sach
<sine> trivttinne	 guotlich er do sprach 
saget mir	liebiv vrowe	wer hat iv iht getan	
si sprach zuo dem kvnige	ich muoz vnfrolichen stan
Von allen minen eren	 mich div swester din
gerne wolde scheiden	 dir sol gechlaget sin 
si gihet	mich habe gechebeset	Sifrit ir man	[33a]
do sprach der kvnich Gvnther	 so hetes vbele getan
Si treit hie minen gvrtel	den ich han verlorn 
vnde min golt daz rote		daz ich ie wart geborn 
daz riwet mich sere		 dvn beredest	kvnich	mich
der vil grozen schanden	ich minne niemer dich
Do sprach kvnich Gvnther	 er sol her fur gan 
hat er sichs geruomet	daz sol er hoeren lan 
oder sin muoz laugen	 der helt vz Niderlant	
do wart der kuene Sifrit	harte balde dar besant
Do der herre Sifrit	die vngemuoten sach 
er weste niht der mere	balde er do sprach 
waz weinet dise vrovwen	daz het ich gerne erkant 
oder von welhen schvlden	ich da here si besant
Do sprach kvnich Gvnther	 mir ist harte leit 
mir hat min vrowe Prunhilt	ein mære hie geseit 
du hast dich geruomet	dv werst ir erster man 
so seit din wip Kriemhilt	hastv degen daz getan
Nein ich	sprach do Sifrit	vn– hat si daz geseit 
end ich erwinde	daz muoz ir werden leit 
vnd wil dirz <gerihten>	vor allen dinen man
mit minen hohen eiden		daz ich irz nih gesaget han
Do sprach der kvnich von Rine	 daz soltu lazen sehen 
den zit den dv bivtest	mach der hie gesehen 
aller valschen dingen	wil ich dich ledech lan	
man sach zuo dem ringe	do die von Burgonden stan
Sifrit der vil kuene	zem eide bot die hant 
do sprach der kvnich rike	 mir ist so wol bechant
iwer groz vnschvlde	ich wil iv ledech lan 
des iuch min swester cihet	daz ir des niht habet getan
Do sprach aber Sifrit	 vnd genivzzet des ir lip 
daz si hat ertuebet	din vil schoene wip 
daz ist mir sicherlichen	ane maze leit	
do sahen zuo an ander	die kuenen rittere gemeit
Man sol so vrowen ziehen	sprach Sifrit der degen 
daz si vppech spruche	 lazen vnder wegen 
verbivt ez dinem wibe	 der minen tuon ich sam 
solher vbermvote		ich mich werlichen scham
Mit rede wart gescheiden	manich schoene wip 
do trurte also sere	Brunhilde ir lip 
daz ez erbarmen muose	die Gvnthers man 
do kom von Trony Hagne	zuo siner vrowen gegan
<Er> vragte waz ir wære	weinende er si vant 
do seite si im div mere	er lobete ir sa zehant 
daz ez erarnen muose	Kriemhilde man 
oder er wolde nimmer	darvmbe vrolich gestan
Zuo der rede komen	Ortwin vnd Gernot 
da die helde rieten	den Sifrides tot	[33b]
dar zuo kom ovch Giselher	der schoenen voten kint 
do er ir rede gehorte	er sprach getriwlichen sint
Ir vil guoten reken	warvmbe tuot ir daz 
ia gediende Sifrit	 nie alsolhen haz 
daz er darvmbe solde	verliesen sinen lip 
ia ist des harte lihte	darvmbe zvrnent div wip
Svln wir hohe ziehen	sprach aber Hagne 
des habent luzel ere	so guote degene 
daz er sich hat geruemet	der lieben vrowen min 
darvmbe wil ich sterben	ez enge im an daz leben sin
Do sprach der kvnich selbe	 er hat vns niht getan 
niwan guot vnd ere	man sol in leben lan 
waz tuoch ob ich dem reken	were nv gehaz 
er was vns ie getriwen	vnd tet vil willeclichen daz
Do sprach von Mezen	 der degen Ortwin 
ia kan in niht gehelfen	div groze sterke sin 
erlovbet mirz min herre	ich tvon im alse leit	
do heten im die helde	ane schvlde widerseit
Sin gevolgte nieman		niwan daz Hagne
riet in allen ziten	 Gvnther dem degne 
ob Sifrit niht enlebte	so wurde im vndertan
vil der kvnige lande	der helt des truren began
Do liezen siz do beliben	spiln man do sach 
hey waz man starker schefte	vor dem mvnster brach
vor Sifrides wibe	al zuo dem sale dan 
do waren in vnmvote	 genvoge Gvnthers man
Der kvnich sprach	lat beliben	den mortlichen zorn 
er ist vns ze selden	vn– ze eren geborn 
ovch ist so starc grimme	der wundern kuene man 
wurde er sin innen	 so torst in nieman bestan
Nein er	sprach do Hagne	lat iv ez wol behagen 
ich trovwe ez heinliche	 also an getragen 
daz Brvnhilde weinen	 sol im werden leit 
im sol von Hagnen		immer wesen widerseit 
Do sprach der kvnich Gvnther	 wie mohte daz ergan	
des antwurte Hagne	ich wil ivchz hoeren lan 
heizen boten riten	zvo vns in daz lant
widersagen offenliche	die hie niemen sin bechant
So iehet ir vor den gesten	daz ir vnd iwer man
wellent herverten	 also daz ist getan 
so lobet er iv dar dienen	des flivset er den lip 
so ervare ich vns div mere	an des reken kuenen wip
Der kvnich vbel volgte	Hagnen sinen man 
die starken vntriwe	 begvnden tragen an 
ê ieman daz erfvnde		die riter vz erkorn 
von zweier vrovwen bagen	wart vil manich helt verlorn

n dem vierden morgen	zwen vnd drizech man
sach man ze hove riten	daz wart do kvnt getan
Gvnther dem richen	 im were widerseit	[34a]
von luge wuohs den frovwen	grozer iamer vn– leit
Vrlovp si gewunnen	 daz si fur solden gan 
vnd iahen daz siz weren	Liudgers man 
den ê da hete betwungen	Sifrides hant
vnd in ce gisle brehte	in Gvnthers lant
Die boten er do gruozte	vn– hiez si sicen gan 
einer sprach darunder	herre	lat vns stan 
vnz wir gesagen mere	div iv enboten sint 
ia habet ir ce viende	daz wizzet	maniger muoter kint
Iv widerseit Livdegast	vnd Livdger 
den ir da willen <tatet>	gremlichiv ser 
die wellent zuo iv riten	mit her in dice lant	
der kvnich begvnde zvrnen	do er div mere bevant
Man hiez die meinræten	zern herbergen varn 
wie mohte sich Syfrit	da vor do bewarn	
er oder ander ieman	 daz si do truogen an 
daz wart sid in selben	ce grozem leide getan
Der kvnich mit sinen frivnden	ruonende gie 
Hagne von Trony	in nie geriwen lie 
nach heten ez gesceiden	des kvniges man 
do wolde et Hagne	nie des rates abe gan
Eins tages si Sifrit	ruonende vant 
do begvnde vragen	der helt von Niderlant 
wie gat so truoreclichen	der kvnich vnd sine man 
daz hilfe ich immer reken	hat in ieman iht getan
Do sprach kvnich Gvnther	 mir ist von schvlden leit 
Liudgast vnd Livdger	habent mir widerseit 
si wellen offenliche	riten in min lant	
do sprach der degen kvene	daz sol Sifrides hant
nach allen ivren eren	mit flize vnderstan 
ich tuon noch degenen	 als ich in ê han getan 
ich lege in wueste	 ir burge vnd ovch ir lant 
ê daz ich erwinde	des si min hovbet iwer phant
Ir vnd iwer reken	svlt hie heim bestan
vnde lat mich zuo in riten	mit den die ich han 
daz ich iv gerne diene	daz laze ich iv sehen 
von mir sol iwern vienden	wizzet	leide geschehen
So wol mich dirre mere	sprach der kvnich do 
als ob er ernsliche	 der helfe were vro 
in valsche neig im tiefe	der vngetriwe man 
do sprach der herre Sifrit	 ir svlt kleine sorge han
Do schikten si die reise	mit den knehten dan 
Sifride vnd den sinen	 ce sehenne ez was getan 
do hiez er sich bereiten	die von Niderlant 
Sifrides reken	suohten stritlich gewant
Do sprach der starke Sifrit	 vater min	her Sigmvnt 
ir svlt hie beliben	 wir komen in kurzer stvnt	
git vns got geluke	her wider an den Rin 
ir svlt bi dem kvnige	hie vil vrolichen sin
Diu zeiken si ane bvnden	alse si wolden dan	[34b]
do waren da genuoge	 Gvnthers man 
die wessen niht der mere	wa von ez was geschehen 
man mohte groz gesinde	do bi Sifride sehen
Ir helme vnd ovch ir brvnne	si bvnden vf div march 
sich bereite von dem lande	manich riter starch 
do gie von Trony Hagne	da er Kriemhilde vant 
er bat im geben vrlovp	 si wolden rvmen daz lant
Wol mich	sprach Chriemhilt	 daz ich ie den man gewan 
der minen lieben vrivnden	 so wol tar vor stan 
alse min her Sifrit	 tuot den frivnden min 
des wil ich hohes muotes	 sprach div kvnniginne	sin
Lieber friunt	er Hagene	degenket an daz 
daz ich in gerne diene	vnd noch nie wart gehaz 
des lat mich geniezen	 an minen lieben man 
er sol des niht enkelten	hab ich Prunhilt iht getan
Daz hat mich sit gerowen	sprach daz edel wip 
ovch hat er so zerblovwen	darvmbe minen lip 
daz ichz iê gereite	daz beswarte im den mvot 
daz hat vil wol erroken	der degen kuene vnde guot
Er sprach	ir werdet wol versuenet	her nach disen tagen 
Kriemhilt	liebiv vrowe	 ia sult ir mir sagen 
wie ich iv mvge dienen	 an Sifride iwern man 
daz tuon ich gerne	frovwe	baz ichs nieman engan
Ich were an alle sorge	sprach do daz edel wip 
daz im ieman neme		in stvrme sinen lip 
ob er niht wolde volgen	siner vbermvot 
so were immer sicher	der degen kuene vnde guot
Vrowe	sprach do Hagne	vn– habet ir des wan 
daz man in mvge versniden	 ir svlt mich wizzen lan 
mit wie getanen listen	sol ichz vndersten 
ich wil im ze huote	immer riten vnde gen
Si sprach	dv bist min mach	so bin ich der din 
ich bevilhe dir vf triwe	man den lieben min 
daz dv wol behuetest	 mir den lieben man	
si seit im kvndiv mere	div vil bezzer wæren verlan
Si sprach	min man ist kuene	dar zuo starch genuoch 
do er den lintdrachen	an deme berge sluoch 
ia badete sich der reke	in dem bluote vil gemeit 
da von in seit in stvrmen	kein wafen nie versneit
Idoch bin ich in sorgen	swenne er in strite stat
vnd vil der gersuzze	 von helde hande gat 
daz ich da verliese	 den minen lieben man 
hei waz ich grozer sorge	dike vmb Sifriden han
Ich melde ez vf genade	vil lieber frivnt	dir 
daz dv dine triwe	 behaltest ane mir 
da man da mach verhowen	den minen lieben man 
daz laze ich dich hoeren	dest vf genade getan
Do von des draken bluote
								 sich der riter guot 
do viel im zwischen der herte	ein linden blat vil breit 
da mac in versniden	 des han ich sorge vnde leit	[35a]
Do sprach von Trony Hagene		vf daz sin gewant
nat ein cleinez zeichen	da bi ist mir bekant 
wa ich in mvge behueten	so wir in sturmen stan	
si wande den helt vristen	ez was vf sinen tot getan
Si sprach	mit kleinen siden	ne ich vf sin gewant
ein tovgenlichez crivze	da sol	helt	din hant
minen man behuoten		so ez an die herte gat 
swenne er in den stvrmen	vor sinen vienden stat
Daz tuon ich	sprach do Hagene	vil liebiv vrovwe min	
do wand ovch div vrovwe		 ez sold im frume sin 
do was da mite verraten	 der Kriemhilde man 
vrlovp nam do Hagene		do gie er vroelichen dan
Des kvniges ingesinde	 was allez wol gemvot 
ich wene nimmer reke		deheiner mer getuot
so groze meinræte		 so da von im ergie 
do sich an sine triwe	div schoene kvnnigin verlie
Des anderen morgens		mit tvsent siner man
reit der herre Sifrit	 vil frovlichen dan 
er wand er solde reken	der sinen frivnde leit 
Hagene im reit so <nahen>	daz er geschovwe div cleit
Als er gesach daz bilde	do scicte er tovgen dan 
die seiten andriv mere	 zwene siner man 
mit vride solde beliben	daz Gvnthers lant 
vnd si hete Livdger	zuo dem kvnige gesant
O wie ungerne Sifrit	do hin wider reit 
er enhete ê geroken	siner frivnde leit 
wan in der reise erwanden	vil kvme Gvnthers man 
er reit zuo dem kvnige	der wirt im danken began
Nv lon iv got des willen	vriunt	her Sifrit 
daz ir so willechlichen	tuot des ich iv bit 
daz sol ich immer dienen	als ich von rehte sol 
fur alle mine vriunde	getrowe ich iv wol
Nv wir der herverte	ledech worden sin 
so wil ich iagen riten	bern vnd swin
hin ce dem was kein walde	als ich vil dike han	
daz hete geraten Hagne	 der vil vngetriwe man
Allen minen gesten	sol man daz nv sagen 
ich welle fruo riten	die wellen mit mir iagen 
daz sich die bereiten	die wellen hie bestan
hubschen mit den vrovwen	daz si liep mir getan
Do sprach der starke Sifrit	mit herliken site 
swenne ir iagen wellet	da wil ich gerne mite 
so svlt ir mir lihen	einen suochman
vnd eteliken braken	so wil ich riten in den tan
Welt ir niht nemen einen	sprach der kvnich zehant 
ich lihe iv	welt ir	uiere	den wol ist bechant
der walt vnd ovch die stige	 swa div tier gant 
die iv niht vorewise		 wider heim riten lant
Do reit zvo sin em wibe	der riter vil gemeit 
schiere hete Hagene	 dem kvnige geseit [35b]
wie er gewinnen wolde	den tiwerlichen degen 
sus grozer vntriwe	solde nimmer man gepflegen

vnther vnd Hagne	die reken vil balt 
lobeten mit vntriwen	ein pirsen in den walt 
mit ir scharpfen geren	si wolden iagen swin 
beren vnd wisende	was kvnde kveners gesin
Da mite reit ovch Sifrit	in erlichem site 
maniger hande spise	die fuorte man in mite 
zuo eime kalten brunnen	verlos er sid den lip 
daz hete geraten Prvnhilt	kvnich Gvnthers wip
Do gie der degen kuone	da er Kriemhilde vant 
do was nu ovf gesovmet	sin <edel> piresgewant 
vnd ovch der gesellen	si wolden vber Rin 
do endorfte Kriemhilde	nimmer leider gesin
Sine trûtinne	kvst er an den mvnt 
got laze mich dich	vrovwe	gesehen noch gesvnt 
vnd mich ovch diniv ovgen	mit holden magen din
solt dv kurzwilen	 ich mach heime niht gesin
Do dahte si an div mære	 si entorste ir niht sagen	
div si Hagnen seite	do begvnde si clagen 
div edel kvniginne	 daz si üe gewan den lip 
do weinde ane maze	 daz vil wunderschoene wip
Si sprach zuo dem reken	 lat iwer iagen sin 
mir trovmte heint leide	wie iuch zwei wildiv swin
iageten vber heide	 da wurden bluomen rot 
daz ich so sere weine	daz get mir werliche not
Ich fvrhte harte sere	etelichen rat 
obe man der deheinen	 missedient hat 
die vns fuegen kvnnen	 vientlichen haz 
belibet	lieber herre	mit triwen rate ich iv daz
Min liebiv truttinne	 ich kvme in kurzen tagen 
ich weiz hie niht der livte	die mir iht hazzes tragen 
alle dine mage	sint mir gemeine holt 
ovch han ich an den degnen	hie niht anders versolt
Neina	herre Sifrit	ia furht ich dinen val 
mir trovmte heint leide	wie obe dir zetal
vielen zwene berge	ich gesach dich nimmer me 
wil dv von mir scheiden	daz tuot mir innerclichen we
Er vmbevie mit armen	 daz tugentriche wip 
mit minneclichem kvsse	er trute ir schoenen lip 
mit urlovbe er dannen	schiet in kurzer stvnt 
si gesach in leider	darnach nimmer mer gesvnt
Do riten si von dannen	in einem tiefen walt
durch chvrzewile willen	vil manich riter balt
volgeten Gvnthere	 vnd Sifride dan 
Gernot vnde Giselher	die wolden deheime bestan
Geladen vil der rosse	kom vor in vber Rin 
div den ieictgesellen	truogen brot vnde win 
vleisch mit den vischen	vnde ander manigen rat	[36a]
den ein kvnich <so> rike	harte billichen hat
Si hiezen herbergen	 fur den gruonen walt
gen des wildes abelaufe	die stolzen iægeren balt 
da si da iagen solden	vf einen wert vil breit 
do was ovch komen Sifrit	daz wart dem kvnige geseit
Von den ieitgesellen	wrden do bestan
die warte an allen ende	do sprach der kuene man 
Sifrit der vil starke	 wer sol vns in den walt
wisen nach den wilde	ir degne kvene vnde balt
Wellen wir vns scheiden	 sprach do Hagne 
ê daz wir hie beginnen	hie ze iagene 
da bi mvgen bekennen	ich vnd die herren min 
wer die besten iægere	an diser waltræise sin
Lvte vnde hvnde	 solen wir teilen gar 
so chere islicher	da er gerne var 
der danne iage beste	der sol des haben danch	
der iæger biten	 wart niht lange bi an ander
Do sprach der herre Sifrit	 ich han der hvnde rat 
wan einen braken		der so genozzen hat 
daz er die verte erkenne	der tiere durch den tan 
wir komen wol ce zeide	sprach der Kriemhilde man
Do nam ein alter iægere	einen spurhvnt 
er brahte den herren	 in einer kvrzer stvnt
da si vil tiere fvnden	swaz der von leger stuont 
div <erieiten> die gesellen	so noch guote ieger tuont
Swaz ir der brake erspranchte	div slvoc mit siner hant
Sifrit der kuone	der helt von Niderlant 
sin ros lief so sere	daz ir im niht entran 
den lop er vor in allen	an dem geieide gewan
Er was an allen dingen	biderbe genvoc 
sin tier daz erste	daz er ze tode sluoc 
was ein starkes halpswuol	mit der siner hant 
da nach er vil schiere	ein vngefuegen lewen vant
Der brake den erspranchte	er schoz in mit den bogen 
ein scharfestrale	hete erin gezogen 
der lewe lief nach dem schuzze	wan drier sprunge lanc 
sine ieitgesellen	seiten Sifride danch
Darnach sluoc er schiere	einen wisent vn– einen elch 
starker ovre viere	vnd einen grimmen schelch 
sin ros truoch in so balde	daz im niht entran 
hirze oder hinde	 kvnd im wenich enkan
Einen eber grozen	vant der spurhunt 
als er begvnde vliehen	do kom an der stunt
des geieides meister	er bestuont in vf der sla 
daz swin zornechlichen	lief an den kuenen degen sa
Do sluoc in mit dem swerte	Kriemhilde man 
ez hete ein ander iegere	so sanfte niht getan 
do ern hete eruellet	 man vie den spurhvnt 
do wart sin rich geieide	allen Bvrgonden kvnt
Si horten allenthalben	ludem vnde doz	[36b]
von lûten vnd von hunden	der schal was so groz 
daz in da von antwurtete	der berch vnd ovch der tan 
vier vnde zweinzech ruore	die ieger heten verlan
Do mvosen vil der tiere	verliesen da daz leben 
do wanden si fuegen	daz man solde geben
in den pris des ieides	des kvnde niht geschehen 
do der starke Sifrit	wart zer viwerstat gesehen
Daz ieit was ergangen	vnde doch nih gar 
die <zer> wiwerstat wolden	die brahten mit in dar
vil maniger tiere hovte	vnd wildes genvoch 
hei waz man ce kuchen	daz ingesinde truoch
Do hiez der kvnich kvnden	den iægern wol geborn 
daz er inbizen wolde	do wart lûte ein horn
zeiner stvnt geblasen	da mite wart bekant 
daz man den fvrsten edel	cen herbergen vant
Do sprach der herre Sifrit	 nv rovmen wir den tan	
sin ros truoch in ebene	si ilten mit im dan 
si erspranchten mit ir schalle	ein tier gemehelich 
einen beren wilden		do spranch der degen hinder sich
Ich wil vns hergesellen	kvrzwile weren 
ir svlt den braken lazen	ich sihe einen bern 
der sol mit vns hinnen	 zen herbergen varn 
er fliehe danne sere	er kan sichs nimmer bewarn
Der brake wart verlazen	der bere spranch von dan 
do wolden in erriten	Kriemhilde man 
er kom in ein geuelle	do kund ez niht wesen 
daz starke tier do wande	vor den iægeren genesen
Do spranch von sime rosse	der stolze riter guot 
er begvnde nach lovfen	daz tier was vnbehuot 
ez kvnd im niht entrinnen	do vie erz sa cehant 
an alle wunden	der helt ez schiere gebant
Kracen noch gebizen	 kvnd ez niht den man 
er band ez zvo dem satele	vf saz der snelle san 
er braht ez an die viwerstat	durch sinen hohen muot
zeiner kurzwile	der degen kuene vn– guot
Wie rehte herlichen	er ze herbergen reit 
sin ger was vil michel	strach vnde breit 
im hie ein cier wafen	nider vf den sporn 
von rotem golde	 der herre fuorte ein <schone> horn
Von bezzerm prisgewæte	hort ich nie gesagen 
einen roch <swartz> pfhellin	sach man in tragen 
vnd einen huot von zodele		der rike was genvoch 
hei was er borten		an sime kochere truoch
Von eime pantel		was daruber <gezogen>
ein hovt durch die sueze	 ovch fuerte er einen bogen 
den man mit antwerke		 mvose ciehen dan 
der in spannen wolde	ern hetez selbe getan
Von einer ludmes hûte		was allez sin gewant 
von hovbet unz anz ende		gestrovt man durfe vant 
vz der liehten ruhe	 vil manich goldes zein [37a]
ze beiden siten		dem kuenen iegermeister schein
Ovch fuort er Balmvngen	ein ciere wafen breit 
daz was also scherphe	daz ez nie vermeit 
swa manz sluoch vf helme	sin eke waren guot 
der herliche iegere	was vil hohe gemvot
Sid ich iv div mere	gar bescheiden sol 
im was sin edel kocher	guoter strale vol 
von gvldinen tullen	 div sahs wol hende breit 
ez muoste balde ersterben	swaz er da mit versneit
Do reit der riter edel	vil weidenliche dan 
in sahen zuo in komende	 Gvnthers man 
si liefen im enkegne	vnd enphiengen im daz march 
do fuorte er bi dem satele	den bern groz vnde starch
Als er gestuont von rosse	do loste er im div bant
von fueze vnd ovch von mvnde	do erlute sa zehant
vil luote daz gehvnde	swaz ez den bern sach 
daz tier ze walde wolde	des heten die lûte vngemach
Der bere von dem schalle	durch die kuche geriet 
hey waz er kvken knehte	von dem viwer schiet 
vil kezzele wart geruot	cerfuort manich brant 
hei waz man guoter spise	in dem asche ligen vant
Do sprvngen von dem sedele	die herren vnd ir man 
der bere begvnde zvrnen	der kvnich hiez do lan
allez daz gehvnde	 daz an seilen lac 
vnd wer ez wol verendet	si heten vroelichen tac
Mit bogen vnd mit spiezen	 niht langer man daz lie	
dar liefen do die snellen	da der bere gie 
do was so vil der hvnde	 daz da nieman schoz 
von des livtes schalle	daz gebirge allez erdoz
Der ber begvnde vliehen	vor den hvnden dan 
im kvnde niht geuolgen	wan Kriemhilde man 
er erlief in mit dem swerte	ce tode er in do sluoch 
hin wider zuo dem viwre	 man den beren truoch
Do sprachen die daz sahen	er wer ein kreftich man 
die stolcen ieitgesellen	hiez man ze tische gan 
vf einen <schonen> anger	saz ir da genuoc 
hei waz man riterspise	den stolcen iegern do truoc
Die senchen komen seine	die tragen solden win 
ez kvnde baz gedienet	nimmer helden sin 
heten si darunder	 niht so valsem muot 
so waren wol die reken	vor allen schanden behuot
Do sprach der herre Sifrit	 wunder mich des hat 
sid man vns von kuchen	 git so manigen rat 
warumbe vns die schenken	darzvo niht bringen win 
man pflege baz der iegern	ich wil niht ieitgeselle sin
Ich hete wol verdienet	 daz man min mæme ware	
der kvnich von denm tische	spranch in valsche dare 
man sol iv gerne buezen	swes wir gebresten han 
ez ist von Hagnen schvlden	der wil vns erdursten lan
Do sprach von Trony Hagne	 lieber herre min	[37b]
ich wande	daz pirsen	hivte solde sin
da ze dem Spetharte	den win den sand ich dar 
sin wir hivte vngetrvnken	wie wol ich mere daz bewar
Do sprach der Niderlende	 ir lip der habe undanch 
man solde mir siben sovme	mit met vn– lutertranch
haben her gefueret	do des niht mohte sin 
do solde man vns gesidelet	haben nahen an den Rin
Do sprach von Troni Hagne	 ir edelen riter balt 
ich weiz hie vil nahen	einen brvnnen kalt	
daz ir niht erzurnet	 da sul wir hine gan	
der rat wart manigem degne	ce grozen sorgen getan
Sifriden den reken	twanch des durstes not 
den tisch er dester ziter	ruken da gebot 
er wolde fur die berge	 zvo dem brvnnen gan 
do was der rat mit meine	von den reken getan
Div tier hiez man vf wægnen	vn– fuorn in daz lant 
div da hete verhovwen	Sifrides hant 
man iach im grozer ern	swer ez ie gesach 
Hagne sine triwe	 sere an Sifride brach
Do si wolden dannen	zuo der linden breit 
do sprach von Trony Hagne	 mir ist des vil geseit 
daz niht gevolgen kvnde	dem Kriemhilde man 
swenner welle gahen	 wold er vns daz sehen lan
Do sprach von Niderlande	der kuene Sifrit 
daz mvget ir wol versuochen	welt ir mir volgen mit
ze wette zvo dem brvnnen	 so daz ist getan 
man <iehe> den gewinnes	 den man siht gewivnen han
Nv welle ovch wirz versuochen	sprach Hagne der degen 
do sprach der starke Sifrit	 so wil ich mich legen
fur iwer fueze	nider an daz gras	
do er daz gehorte	 wie liep daz Gvnthers was
Do sprach der degen kuene	 ich wil iv mere sagen 
allez min gewete	wil ich müt mir tragen 
den ger zuo dem schilde	vnd min pirsgewant	
den kocher zvo dem swerte	schier er vmbe gebant
Do zvgen si div kleider	von dem libe dan 
in zwein wizen hemden	 sach man si beide stan 
sam zvai wildiv panthel	si liefen durch den chle 
doch sah man bi den brvnnen	den kuenen Sifriden ê
Den bris von allen dingen	truoch er vor manigem man 
daz swert lost er schiere	den kocher leit er dan 
den starken ger er leinde	an der linden ast 
bi des brvnnen fluzze	stuont der herliche gast
Die Sifrides tvgende	waren harte groz 
den schilt er leite nider	da der brunne floz 
swie harte so in durste	 der helt doch niht tranc
ê der kvnich getrunke	 des seit er im vil bosen danc
Der brunne was kuele		luoter vn– guot 
Gvnther si do neigte	nider zuo der vluot 
als er hete getrvnken	do rihtete er sic von dan	[38a]
alsam het ovch gerne		der kuene Sifrit getan
Do engalt er siner zvhte	den bogen vnd daz swert 
daz truoch allez Hagne	 von im danwert 
vn– spranch da hin widere	da er den gere vant 
er sach nach einem bilde	an des kuenen gewant
Do der herre Sifrit	ob dem brunnen tranch 
er schoz im durch daz crivze	daz von der wnden spranc
daz bluot von dem herzen	vaste an Hagnen wat 
solher missewende	 ein helt nv nimmer begat
Den ger im gen dem herzen	steken er do lie 
also grimmecliche	ce fluhte Hagne <nie>
gelief in der werlde	vor deheinem man 
do sich der starke Sifrit	der grozen wunden versan
der herre tobelichen	 von dem brunnen spranch 
im ragete von den herten	ein gerstange lanch 
der furste wande vinden	bogen oder swert 
so mvoste wesen Hagne	 nach sime dienste gewert
Do der sere wnde	 des swertes niht vant 
do het et er niht mere	wan des schildes rant 
er zuct in von dem brunnen	do lief er Hagnen an 
do kvnd im niht entrinnen	des kvnich Gvnthers man
Swie wunt er was zem tode	 so kreftechlich er sluoc 
daz vzer dem schilde	 drate genuoch
des edelen gesteines	 der schilt vil gar zerbrast 
sich hete gerne errochen	der vil herliche gast
Do was gestruchet Hagne	vor siner hant zetal 
von des slages krefte	der wert vil lvte erhal 
er het sin swert enhende	so wer ez Hagnen tot 
sere zurnde der wunde	des <tvanch> in ehaftiv not
Erblichen was sin varwe	er mohte niht gesten 
sines libes sterke	mvoste gar cergen 
wand er des todes ceichen	in liehter vrawe truoch 
sit wart er beweinet	von schoenen vrowen genuoch
Do viel in die blvomen	der Kiemhilde man 
daz bluot von sinen wunden	sach man vaste gan 
do <begvnd> er schelden	 des twanch in groziv not	
die vf in geraten	heten vngetriwe den tot
Do sprach der verkvnde	 ia ir bosen zagen 
waz helfent miniv dienst	sid ir mich habet erslagen 
ich was iv ie getriwe	des ich enkolten han 
ir habet an iwren frivnden	leider vbele getan
Die sint da von bescholden	swaz ir wirt geborn
her nach disen citen	ir habet iwern zorn
gerochen al ze sere	an dem libe min 
mit laster svlt gescheiden	ir von guoten reken sin
Die riter alle liefen	da er erslagen lac 
ez was ir genuogen	 ein vrovdeloser tac 
die iht triwe heten	von den wart er gekleit 
daz hete ovch wol verdienet	vmbe alle lûte der helt gemeit
Der kvnich von Burgonden	 klagte ovch sinen tot 
do sprach der verkvnde	 daz ist ane not	[38b]
daz der nach scaden weinet	der in da hat getan 
der dient michel schelden	ez were bezzer verlan
Do sprach der grimme Hagne	 ian weiz ich waz ir kleit 
ez hat nv allez ende	an vns sorge vnde leit 
wir vinden ir nv wenich	die geturren vns bestan 
wol mich daz ich des heldes	han ze rate getan
Ir mvget ivch lihte ruemen	sprach her Sifrit 
het ich an iv erkvnnet	den mortlichen sit 
ich hete wol behalten	 vor iv minen lip 
mich riwet niht so sere	so vrov Kriemhilt min wip
Nv muoze got erbarmen	daz ich ie gewan den svn 
dem man itewizen	sol daz hernach tuon 
daz sine mage ieman	mortlich hant erslagen 
mohte ichz verenden	daz sold ich billichen klagen
Do sprach iæmerliche	der verchvnde man 
welt ir	kvnich edel	triwen iht began
in der werlde an iemen	so lat iv bevolhen sin
vf iwer genade	die lieben trutinne min
Lat si des geniesen	daz si iwer swester si 
durch aller fursten tvgende	wont ir mit triwen bi 
wan mir wartent lange	min vater vnd min man 
ez wart nie leider	an liebem vrivnde getan
Die bluomen allenthalben	von bluote waren naz 
do rang er mit dem tode	vnlange tet er daz 
wan des todes zeichen	ie ze sere sneit 
sam muost ersterben ovch	der reke kuone vnde gemeit
Do die heren sahen	 daz der helt was tot 
si leiten in vf einen schilt	der was von golde rot 
vnde wurden des ze rate		 wie daz solde ergan 
daz man ez verhele		daz ez Hagne hete getan
Do sprachen ir genuoge		 vns ist vbel geschehen 
ir svlt ez heln alle	 vnd svlt geliche iehen 
da er iagen rite aleine	 Kriemhilde man 
in sluogen sachere		da er fuere durch den tan
Do sprach von Trony Hagne	ich bring in in daz lant 
mir ist vil vnmere	wirt ez ir bekant 
div so hat betruobet	den Brunhilde mvot 
ez ahtet mich vil ringe	swaz si nv weinens getuot

o biten si der naht	vnd fuoren vber Rin 
von helden kvnde nimmer	wirs geiaget sin 
ein tier daz si da sluogen	daz weinende edeliu wip 
ia mvosten sin enkelten	vil guoter wigande lip
Von grozer vbermvoten		mvget ir horen sagen 
vnde von islicher rache	 ez hiez Hagne tragen
Sifriden also toten	von Niblunge lant
fvr eine kemenaten	 da er Kriemhilde vant
Er hiez in tovgenliche	legen an div ture 
daz si in da vinden solde	so si gienge herfure
hin ce mettine	 ê daz ez wurde tac	[39a]
der div frovwe <Chriemhilt>	vil selten eine verlach
Man lute da ze dem mvnster	nach gewoneheit 
Kriemhilt div vil schoene	wacte mænige meit 
ein lieht bat si ir bringen	vn– ovch ir gewant 
do kom ein kamerere		 da er Sifriden vant
Er sach in bluotes roten	sin wat was elliv naz 
daz er sin herre were	 nie enwesser daz 
hin der kemenaten	 daz lieht truoch an der hant 
bi dem vil leidiv mære	vrovwe Kriemhilt ervant
Do si mit ir vrovwen	ce kirche wolde gan 
do sprach der kamerere	 vrowe	ir svlt stille stan 
ez lit vor dem gademe	ein riter tot erslagen	
ovwe	sprach vro Kriemhilt	waz wil du solcher mere sagen
E si rehte erfunde	daz ez were ir man 
an die Hagnen vrage	denken si began 
wie er solde in fristen	erst do wart ir leit 
von ir was allen vrovden	mit sime tode widerseit
Si seic zvo der erden	daz si niht ensprach 
die schoenen vrovdelosen	ligen man do sach 
Kriemhilde iamer	 wart vnmazen groz 
do schrei si nach unkreften	daz al div kemenate erdoz
Do sprach daz gesinde		waz ob ez ist ein gast	
daz bluot ir uz dem mvnde	vor herzen iamer brast 
do sprach si	nein	ez ist Sifrit	min vil lieber man 
ez hat geraten Brunhilt		daz ez Hagne hat getan
Div vrowe bat sich wisen		da si den helt vant 
si huop sin schoene hovbet		 mit ir vil wizen hant 
swie rot ez was von bluote	si het in schier erkant 
do lac vil iemerliche	der helt von Niderlant
Do rief truorechlichen	di kvneginne milt 
we mir dises leides	nu ist dir doch din schilt
mit swerten niht verhovwen	dv bist ermorderot 
wes ich wer ez het getan	ich riete im immer sinen tot
Allez ir gesinde	klagete vnde scre
mit ir lieben vrovwen	wand in was vil we
vmb ir edelen herren	der da was verlorn 
gerochen hete Hagene	vil vbele Brunhilde zorn
Do sprach div iamerhafte	 ir sult hine gan
vn– weket harte balde	die Sifrides man 
ir svlt ovch Sigmunde	minen iamer sagen 
ob er mir helfen welle	den kuenen Sifriden klagen
Do lief ein bote balde	da er si ligen vant 
Sifrides helde	 von Niblvnge lant 
mit den vil leiden mæren	ir vrovde er in benam 
si woldenz niht gelovben	 ê man daz weinen vernam
Der bote kom ovch schiere	da der kvnich lac 
Sigmvnt der herre	des slafes niene phlac 
ich wene sin herze im seite	daz im was geschehen 
daz er Sifriden	nimmer solde <mer> gesehen
Wachet	herre Sigmvnt	mich bat nach iv gan [39b]
Kriemhilt min frowe	der ist ein leit getan 
daz ir vor allen leiden	an ir herze gat 
daz sult ir klagen helfen	wan ez sere ivch bestat
Vf rihte sich do Sigmunt	er sprach	waz sint div leit
der schoenen Kriemhilde	so dv hast geseit	
er sprach mit weinen	ich kan ivz niht verdagen 
ia ist von Niderlanden	der kuene Sifrit erslagen
Do sprach der kvnich Sigmvnt	 lat daz schinphen sin
vn– also boesiv mere	durch den willen min 
daz ir saget ieman	daz er si erslagen 
wan daz kvnd ich nimmer	vor mime tode verklagen
Welt irz niht gelovben	daz ir mich horet sagen 
so vernemet selbe	 Kriemhilde klagen
vn– allez ir gesinde	den Sifrides tot	
vil sere srach do <Sigmvnt>	des gie im werlichen not
Mit hvndert siner manne	er von den betten spranch 
si zvchten zuo den handen	 div scharphen wafen lanch 
si liefen zuo den wuoffen	iemerlichen dan 
do komen tvsent reken	des kvenen <Sifrides> man
Do si so iamerliche	 die frovwen horten klagen 
do wanden svmeliche		si solden kleider tragen 
ia mohten si der sinne	 vor iamer niht gehaben 
in wart mikel swere	 in ir herze begraben
Do kom der kvnich Sigmvnt	da er Kriemhilde vant 
er sprach	owe der reise	here in dice lant 
wer hat mich mines kindes	vnd ivch des iwren man
bi also guoten vrivnden	alsvs mortlich getan
Sold ich den bekennen	sprach daz vil edel wip 
holt wurde im nimmer	min herze noch min lip 
ich riete im alse leides	daz al die frivnde sin
von minen schvlden		mvozen immer klagende sin
Sigmvnt der herre		den fursten vmbesloz 
do wart von sinen vrivnden	der iamer also groz 
daz von den starken wuofe	palas vnde sal
vnd din stat ze Wormeze	 ce beiden siten lute <ersal >
Do enkvnde nieman trosten	Sifrides wip 
man zoch vz den kleideren	sinen schoenen lip
vnde wuosch im sine wunde	man leite in vf den re 
do was sinen lûten	von starkern iamer vil we
Ez spraken sine reken	vz Niblvnge lant 
in sol immer reken	mit willen vnser hant 
er ist in disem huse	der ez hat getan	
do ilten sich wafenen	alle Sifrides man
Die vz erwelten degne	mit schilden komen dar 
einlif hvndert reken	die hete an siner schar
Sigmvnt der rike	 sines svnes tot
wold in gerne reken	als im sin friwe daz gebot
Si wessen wen si solden	mit strite do bestan 
si enteten Gvnthern	 vn– ovch sine man 
mit den her Sifrit	 an daz geieide reit	[40a]
Kiemhilt sach si gewafent	daz was ir ander herzeleit
Swie michel wer ir iamer	vn– swie starch ir not 
doch vorhte si harte	der Niblvnge tot
von ir bruoder mannen	daz si ez vnderstuont 
si warende si guotliche	so vrivnde liebe frivnde tuont
Ez sprach div iamers riche	 min her Sigmvnt 
wes welt ir beginnen	iv ist niht rehte kvnt 
ia hat kvnich Gvnther	so manigen kuenen man 
ir welt iv alle vliesen	welt ir die reken bestan
Mit vf erbvnden schilden	was in ce strite not 
div edel kvnginne	 si bat vnd ovch gebot
daz ez miden solden	die reken vil gemeit 
daz wolden si niht lazen	daz do ir herze vol durchsneit
Si sprach	min her Sigmvnt	ir sultez lazen stan 
vnz ez sich baz fuege	so wil ich minen man
immer mit iv reken		der mir in hat benomen 
wird ich des bewiset	ez muoz im schedlichen komen
Ez ist der vbermuoten	hie bi Rine vil 
da von ich iv des strites	raten niht enwil 
si habent wider einen	ie wol drizech man 
gote laze in gelingen	alse si vmb vns gedienet han
Ir svlt hie beliben	vnd dolt mit mir div leit 
vnz ez tagen begvnde	ir helde vil gemeit 
so helfet mir beserken	minen lieben man	
do spraken die degne	vrowe liep	daz si getan
Iv enkvnde nieman	 daz wunder vol sagen
von rittern vn von vrovwen	wie man die horte clagen	
so daz man des wuofes	 wart in der stat geware 
die edelen burgere	 komen gahende dare
Si klagten mit den gesten	wan in was harte leit 
Sifrides schvlde	in waren niht geseit 
durk was der edel reke	 verlos da sinen lip 
do weinden mit den vrovwen	der guoten burgere wip
Smide hiez man gahen	wurken einen sarch
von silber vnd von golde	michel vn– starch 
vn– hiez in vaste spengen	mit stale der was guot 
do was al den luten	 harte truorich der mvot
Div naht was ergangen	man seite ez wolde tagen 
do hiez div edel vrovwe	zuo dem mvnster tragen
Sifrit den herren	ir vil lieben man 
swaz er da frivnde hete	die sach man weininde gan 
Do sin zen mvnster brahten	wie vil da gloken klanc 
do horte man allenthalben	maniges phaphen sanch 
do kom der kvnich Gvnther	dar mit sinen man 
vn– ovch der grimme Hagene	daz wære bezzer verlan
Er sprach	liebiv swester	we der leide din 
daz wir niht mohten ane	 so grozes schades sin 
wir muozen in mer klagen	 Sifrides lip	
daz tuot ir ane schvlde	 sprach daz iamerafte wip
Wer iv darvmbe leide	 so wer ez niht geschehen 
ir hetet min vergezzen		des mag ich wol iehen	[40b]
da ich da wa	cheiden	vn– min lieber man 
ei wolde got der			wer ez selber mir getan
Si buten vaste ir logen		Kriemhilde begvnde iehen 
swelher si vnschuldet		der laze daz besehen 
der sol zuo der bare		vor den lvten gan 
da mach man die warheit	harte schiere bi versten
Daz ist ein michel wunder	dike ez noch geschihet	
swa man den mortmeilen	 bi den toten sihet 
so bluotent im die wunden	sam ovch da gesach 
da von man die schulde	da ze Hagenen gesach
Die wunden fluzen sere	alsam si taten ê 
die ê da sere klagten	des wart nv michel me 
do sprach kvnich Gvnther	 ich wilz ivch wizzen lan 
in sluogen schachere	Hagene hat ez niht getan
Mir sint die schachere	sprach si	vil wol bechant 
nv laze ez got <erreken>	von siner vrivnde hant 
Gunther vn– Hagne		 ia habet irz getan	
die Sifrides degne		heten do zuo strite wan
Kriemhilt twanc groz iamer	zuo der <selben> not
komen do die beide	da si in funden tot 
Gernot ir bruoder	vnd Giselher daz kint 
mit triwen si in klageten	ir ovgen wurden nazzer blint
Si weinden innerclike	Kriemhilde man 
man wolde messe singen	zuo dem mvnster <dan>
giengen allenthalben	man vn– wip 
die sint doch lihte enbarn	di weinende Sifrides lip
Gernot vn– Giselher	sprachen	swester min 
nu troeste dich nach tode	als ez idoch mvoz sin 
wir wellen dichs ergecen	die wile wir leben	
do kunde ir nieman	trost neheinen gegeben
Sin sarch was bereitet	wol vmb mitten tac 
man huop in von der bare	da er ufe lac 
in wolde noch diu frowe	lazen nihtbegraben 
des muosen al die lûte	michel arbeite haben
In einen riken pfelle	man den toten want 
ich wæne man da iemen	ane weinen vant 
do chlagte herzenliche	vote ein edel wip 
vnd al ir ingesinde	Sifrides wætlichen lip
Do man gehorte	 daz man zem mvnster sanch
vn– in besarket hete	do huop sich groz gedranch 
durch willen siner sele	waz man opfers truoc 
her hete bi den vienden	doch guoter vrivnde genuoc
Kriemhilt div arme	<zir> kamæreren sprach 
ir svlt durch min liebe	liden vngemach 
die im guotes gunnen	vnd mir wesen holt 
durch Sifrides sele	 sol man teilen sin golt
Dehein kint was so kleine	 daz wizze mohte haben 
ez muoze gen ce opher	 ê er wurde begraben 
wol hundert messe		man des tages sanch 
von Sifrides frivnden	wart do groz gedranch
Do man het gesvngen	daz volch sich huop dan	[41a]
do sprach vro Kriemhilt	 ir sult mich eine lan
heint mich wachen	 den vz erwelten degen 
er ist an sime libe	al min vrovde gelegen
Dri naht vnd dri tage	wil ich in lazen stan 
vnz ich mich geniete	mins vil lieben man 
waz ob got gebivtet	daz mich ovch nimet der tot 
so wer wol verendet	min armer Kriemhilde not
Ze herbergen giengen	die lûte von der stat 
pfaffen unde muniche	si beliben bat 
vnd allez sin gesinde	daz des heldes phlac 
si heten naht vil arge	vnd vil mvolichen tac
An ezzen vnd an trinken	beleib da manich man 
die ez nemen wolden	 den wart daz kvnt getan 
daz man ins den vollen gebe	daz schuof er Sigmvnt 
do was den Niblungen	vil michel arebeite kvnt
Swaz man vant der armen	die es niht mohten han 
die hiez man doch zem opher	mit golde gan
vz sin selbes kamer	 do er niht solde leben 
vmb sine sele	wart manich tusen marc gegeben
Urbor vf der erden	teiles in div lant 
swa man kloster	vnd guote livte vant 
silber gap man vnde wat	den armen da genvoc 
si tet dem wol geliche	daz sim holden willen truoc
An dem dritten morgen	ce rehter messezit
so was bi dem mvnster	der krihhof also wit
von den lantluten	weinens also vol 
si dienden im nach tode	als man lieben vrivnden sol
In den tagen vieren	 man hat geseit daz	
ce drizech tvsent marken	oder dannoch baz
wart durch sin sele	den armen da gegeben 
do was gelegen ringe	sin groziv schoene vn– ovch sin leben
Do gote wart gedient	vnd man vol gesanc 
mit vngefuegem leide	vil des volkes ranc 
man hiez in uz den mvnster	zuo dem grabe tragen 
man vant da niht anders	wan ein weinen vn– klagen
Lute scriende	daz gie mit im dan 
vro was da niemen	weder wip noch man 
ê man in begruebe	 man sanch vn– las 
hey was guoter phaffen	ze siner pevilde was
ê ce deme grabe koeme	Sifrides wip 
do ranc mit solhem iamer	ir getriwer lip 
daz man si mit dem brvnnen	dike da begoz 
ez was ir vngemuode	vil harte vnmazlichen groz
Ez was michel wunder	daz si ie genas 
mit klage ir helfende	da manich vrovwe was 
do sprach div kvnigin	 ir Sifrides man 
ir svlt durch iwer triwe	an mir genade began
Lat mir nach mime leide	ein kleine liep geschehen 
daz ich sin schoene hovbet	noch einst mvze sehen 
do bat sis also lange	mit iamers sinnen starch 
daz man cebrechen muose	 den vil herlichen sarch	[41b]
Do brahte man die vrovwen	da si in ligen vant 
si huop sin schuonez hovbet	mit ir vil wizzen hant
vnd kvste in also toten	den edelen riter guot 
ir vil liehten ovgen	von weinenden do bluot
Ein iærnerlichez scheiden	wart do da getan 
do truoch man si von dannen	si kvnde niht gegan 
do vant man sinnelose	 daz herliche wip 
vor leide moht ersterben	ir vil wunnechlicher lip
Do man den edelen herren	heten nv begraben 
leit ane maze	sach man die alle haben 
die mit im komen waren	von Niblvnge lant 
vil selten frolichen	man do Sigmvnden vant
Do was etelicher	der drier tage lanc
vor dem grozem leide	niht az noch entranch 
doch mochten si dem libe	so geswichen niht 
si nerten sich nach sorgen	so noch genuogen geschit

er sweher Kriemhilde	gie da er si vant 
er sprach ce der kvniginne	 wir svln in vnser lanc 
wir wæne vnmære geste	bi deme Rine sin 
Kriemhilt	vil liebiv vrovwe	nv vart ir zvo dem lande min
Sid daz vns vntriwe	ane hat getan
hie in disen landen	 des iwueren edelen man 
des svlt ir niht enkelten	ich tvon iv triwen schin
<durch> iwers mannes liebe	vn– des edelen kindes sin
Ir svlt ovch	vrovwe	haben	allen den gewalt 
den iv tet ê Sifrit	kvnt	der degen balt 
daz lant vnd ovch div krone	si iv vndertan 
iv svlen gerne dienen	alle Sifrides man
Do seite man den knehten	si solden riten dan 
do wart michel gahen	nach rossen getan 
bi ir starken vienden	was in daz leben leit 
vrowen vn– meiden	hiez man suochen div kleit
Do der kvnich Sigmunt	wolde sin geriten 
do begvnde Kriemhilt	ir mvoter biten 
da si bi ir magen	solde da bestan 
do sprach div vrovden arme	 daz kvnde muolich ergan
Wie moeht ich den immer	 mit ovgen an gesehen 
von den mir armem wibe	 so leide ist geschehen	
do sprach der ivnge Giselher	 liebiv swester min 
dv solt durch din triwe	hie bi diner mvoter sin
Die dir hant beswert	vn– betrvobet dinen mvot	
der bedarftv niht ze dienste	dv cere min eins gvt	
si sprach zuo dem reken		ia mag ez niht geschehen 
vor leide mvoz ich sterben	swenne ich Hagene solde sehen
Des tvon ich dir ze rate	vl liebiv swester min 
dv solt bi dinem bruoder	Giselhere sin 
ia wil ich dich ergecen	 dines mannes tot	
do sprach div gotes arme	 des wære mnir Kriemhilde not
Do ez ir der ivnge	so gvotlich erbot	[42a]
do begvnde doch flegen	vote vnde Gernot
vnd ir getriwe mage	si baten si da bestan 
si hete luzel chvnnes	vnder Sifrides man
Si sint iv alle vromde	so sprach Gernot 
niemen lebet so starker	 er mvoze ligen tot 
daz bedenket	liebiv swester	vn– trovstet iweren mvt 
belibet bi den vrivnden	ez wirt iv werlichen guot
Si lobete Giselhere	si wolde da bestan 
div ros gezogen waren	Sigmvndes man 
als si wolden riten	ze Niblvnge lant 
ez was vf gesovmet	 al der reken gewant
Do gie her Sigmvnt	fur Kiemhilde stan 
er sprach zuo der vrovwen	 Sifrides man
wartent bi den rossen	nv svlen wir riten hin 
wan ich vil vngerne	 hie bi den Burgonden bin
Do sprach vrov Kriemhilt	 mir ratent vrivnde min 
swaz der ist getriwe	ich sul hie bi in sin 
ich habe nimen mage	 in Niblunge lant	
vil leit was ez Sigmvnde	do ers an Kriemhilde vant
Do sprach kvnich Sigmvnt	 lat ivz nieman sagen 
vor allen minen magen	svlt ir krone tragen
vil gewalteclichen	als ir habet ê getan 
ir svlt des niht enkelten	daz wir den helt verlorn han
Vnde vart mit vns wider	dvrch iwer kindelin 
daz sult ir lan	vrovwe	 niht verweiset sin 
swenne iwer svn gewachset	der troestet iv den mvot 
di wile sol iv dienen	manich kuene degen guot
Si sprach	min her Sigmunt	ia mag ich riten niht 
ich mvoz hie beliben	swaz halt mir geschit 
bi minen magen		 die mir helfen klagen	
do begvnden disiv mere	den guoten reken missehagen
Si spraken al gelike	so moehten wir wol iehen 
daz vns erste wære	leide geschehen 
woldet ir beliben	bi vnseren vienden hie 
so geriten hovereise	noch helde sorchlicher nie
Ir svlt ane sorge	got bevolhen varn 
man git iv guot geleite	 ich heiz iv wol bewarn	
zvo iwerm lande	 min liebez kindelin 
daz sol vf genade	 iv guoten reken wol bevolhen sin
Do si wol vernamen	 daz si niht wolde dan 
do weinde al gelike	Sigmvndes man 
wie rehte iæmerlike	schiet do Sigmvnt
von vrovn Kriemhilde	do was im vngemvote chvnt
So we der hochzite	sprach der kvnich her 
ez geschiht von kvrzwile	furbaz nimmer mer
kvnige noch sinen magen	daz vns ist geschehen 
man sol vns nimmer mere	hie ze den Burgonden sehen
Do sprachen offenliche	Sifrides man 
ez moehte noch div reise	in daz lant gan	[42b]
daz wir noch den fvnden	der vns den herren sluoch 
si hant von sinen magen	 stark viende genvoch
Er kvste Kriemhilde	 iemerlich er sprach 
do si beliben wolde	vn– er daz rehte ersach 
nv riten vrovden ane	heim in vnser lant 
alle mine sorge	sint mir erst nv bekant
Si riten an geleite	von Wormz vber Rin 
si mohten wol des mvotes	sicherlichen sin 
ob si in vientschefte	wrden an gerant 
daz sich weren wolde	der kvenen Niblvngen hant
Si gerten vrlovbes	da ze heinen man 
do sach Gernoten man	vnd Gyselheren gan
zvo im minneclichen	im was sin schade leit 
des brahten in wol innen	die helde kuene vn– gemeit
Do sprach gezogenlike	 der fvrste Gernot 
got weiz wol von himele	an Sifrides tot
gewan ich nie schvlde	 ich horte ovch nie gesagen 
wer im hie vient were	 ich sol in bileich klagen
Do gap im gvot geleite	 Giselher daz kint 
er brahte sorgen ane	die noch bi leide sint 
den kvnich bi sinen reken	heim ze Niderlant 
wie luzel man der mage	 darinne vroliche vant
Wie si nv gefueren	des kan ich niht gesagen 
man horte hie alle zite	Kriemhilde klagen 
daz ir niemen troste	daz herze noch den mvot 
ez entete Giselher	der was getriwe vnde guot
Prvnhilt div schoene	mit vbermvote saz 
swaz geweinde Kriemhilt	vmmere was ir daz 
si wart ir gvoter triwen	nimmer me bereit 
sid getet ovch ir vrov Kriemhilt	vil herzenlichiv leit

o div edel Kriemhilt	also verwitwet wart 
bi ir in mime lande	der	raue Ekewart
beleip mit sinen mannen	 der diende ir ze allen tagen
vnd half ovch siner vrovwen	sinen herren dike clagen
Ze Wormz bi dem mvnster	ein gecimber man ir sloz 
wit vnd vil mikel	 rich vn– groz 
da si mit ir gesinde	sid an frovde saz 
si was ze kirken gerne	vnd tet vil willichlichen daz
Da man begruop ir vriedel	wie selten si daz lie 
mit trurigem mvote	 si alle zit dar gie
vn– bat got den guoten	siner sele phlegen 
vil dike wart beweinet	mit grozen triwen der degen
vote vnd ir gesinde	trosten si alle stvnt 
do was ir daz herze	so grozlichen wunt 
daz kvnde niht vervahen	swaz man ir trostes bot 
si het nach liebem vrivnde	die aller grozisten not
die nach liebem manne	ie nie wip gewan 
man mohe ir michel tvgende	kiesen wol dar an 
si klagete vnz an ir ende	die wile werte ir lip	[43a]
sid rach sich wol ellen	des kuenen Sifrides wip
Sus saz si nach ir leide	daz ist alwar	
nach ir mannes tode	wol vierdhalp iar 
daz si ze Gvnther	nie chein wort gesprach
vnd ir vint Hagnen	in der cit nie gesach
Do sprach von Troni Hagne	 muget ir daz tragen an 
da ir iwer swester	ce frivnt mohtet han 
so koeme zuo disem lande	der Niblvnge <golt >
des moehtet ir vil gewinnen	wurde uns div kuniginne holt
Er sprach	wir svlnz versuochen	mine bruoder sint ir bi 
die svlen wir biten werben	 daz si vnser vriunt si
vnd	ovb wir in gewinnen	 daz si daz gerne sehe	
ich trovwes niht	sprach Hagne	 daz ez immer geschehe
Do hiez er Ortwinen	hin ze hove gan
vn– den marchgrauen Geren	do daz was geschehen 
man brahte ovch Gernote	vnd Giselher daz kint 
si versuohtenz vriuntlichen	an vro Kriemhilde sint
Do sprach von Bvrgonden	der kuene Gernot 
vrovwe	ir klaget ze lange	den Sifrides tot 
iu wil der kvnich rihten	 daz er sin niht hat erslagen 
man hoert iv zallen ziten	so rehte grozlichen clagen
Si sprach	des zihet in nieman	in sluoch Hagnen hant 
wa man ir verhovwen solde		 do er daz an mir ervant 
wie moht ich des trûwen		 daz er im truoge haz 
ich hete wol behvotet		sprach div kvniginne	daz
daz ich vermeldet hete	sin schoenen lip 
so lieze ich nv min weinen	ich vil armez wip 
holt wird ich nimmer in	die ez da hant getan	
do begvnde flegen Giselher	der vil wetliche man
Ich wil den kvnich gruozen	do si im des veriach 
mit sinen besten vrivnden	 man in vor ir sach 
do getorste Hagne	 fur si niht gegan 
wol weste er sine schvlde	er hete ir leide getan
Do si verkiesen <wolde>	vf Gvnther den haz 
ob er si chvssen solde	 ez zeme im dester baz 
wer ir von sime rate	leide niht getan 
so moeht er vreveliche	dike sin zuo ir gegan
Ez en wart nie <suone>	mit so vil træhen me
gefueget vnder frivnden	ir tet ir schade vil we 
si verkos vf si alle	wan vf den einen man 
in hete erslagen niemen	het ez Hagne niht getan
Darnach vil vnlange	do truogen si daz an 
daz div frovwe Kriemhilt	den grozen hort gewan
von Niblvnges lande	vn– fuorte in an den Rin 
ez was ir morgengabe	er sold ir billichen sin
Darnach fuor do Giselher	vn– ovch Gernot 
ahcek hvndert mannen	 Kriemhilt do gebot 
daz si in holen solden	daz er verborgen lac 
da sin der degen Albrich	mit sinen besten vrivnde pflac
Do man die von Rine	nach dem <schatze> komen sach	[43b]
Albrich der vil kvene	zuo sinen vrivnden sprach 
wir turren ir des hordes	vor gehaben niht 
sit sin ce morgengabe	 div edel kvniginne giht
Doch enwurdez nimmer	sprach Albrich	getan 
niwan daz wir vbele	da verlorn han
mit samet Sifride	die gvoten tarnhuot 
wan die truoch alle zite	der <schonen> Kriemhilde trût
Nv ist ez Sifride	leider ubel komen 
daz vns die tarnkappen	der helt hete benomen 
vnd daz im mvose dienen	allez dizze lant	
do gie der kamerere	da er die sluzzele schiere vant
Ez stuonden vor dem berge	Kriemhilde man
vnd ovch ein teil ir mage	den schaz si truogen dan
zuo dem se	an div guoten <schiffelin> 
den fuorte man vf vnden	vnce ze berge an den Rin
Ir mvget von dem horte	wunder horen sagen 
swaz zuelf kanzwegene	meist mohten tragen
in vier tagen vn– naht	von dem berge dan 
ovch muos ir islicher	des tages dristvnde gan
Ez was ovch niht anders	wan gesteine vn– golt 
vn– ob man al die welt	hete versolt 
sin were miner	niht einer marke wert 
ia het ez an schvlde	Hagne gar niht gegert
Der wunsch lac darunder	von golde ein ruotelin 
der daz het erkvnuet	der mohte meister sin
wol in al der werlde	vber islichen man 
der Albrikes mage	 kom vil mit Gernote dan
Do si den hort behielten	in Gvnthers lant
vn– sich div kvniginne	 des alles vnderwant 
kamere vn– turne	 sin wurder vol getragen 
man gehorte nie daz wunder	von guote mer gesagen
Vnd wær sin tvsent stvnt	noch alse vil gewesen 
vn– solde Sifrit	gesvnt sin genesen 
bi im wer Kriemhilt	hende bloz bestan 
getriwer wibes kvnne	ein helt nie mere gewan
Do si den hort nv hete	do brahtes in daz lant
vil vnkvnder reken	ia gap der vrovwen hant 
daz man so grozer milte	mere nie gesach 
si pflach vil grozer tvgende	des man der kvnniginne iach
Den armen vn– der riken	 begvnde si nv geben 
daz do reite Hagene		obe si solde leben
noch deheine wile		 daz si so manigen man
in ir dienst gewunne	daz ez in leide muoste ergan
Do sprach kvnich Gvnther	 ir ist lip vn– guot 
zwi sol ich daz wenden	daz si da mite tuot 
ia erwarb ich daz vil kome	daz si mir wart holt 
nv enruochen war si teile	ir steine vn– ir rotez golt
Hagene sprach zvo dem kvnige	 ez sold ein frumer man
deheinem wibe	<niht> des hordes lan 
si bringetez mit gabe	noch vnze vf den tac	[44a]
daz die wol geriwen	 die kuenen von Burgonden mac
Do sprach kvnich Gvnther	 ich swvr ir einen eit 
daz ich ir getete	nimer mere leit 
vn– wils furbaz huoten	si ist div swester min	
do sprach aber Hagene	 lat mich der schuldigen sin
Ir svmelicher eide	waren vnbehuot 
do nam si der witwen	daz keftige guot 
Hagne sich der scluzle	aller vnderwant 
daz zvrnde ir bruoder Gernot	do er daz rehte bevant
Do sprach der herre Giselher	 Hagene hat getan
vil leides miner swester	ich soldez vnderstan 
wer er niht min mach	 ez giench im an den lip	
iteniwez weinen	 tet do Sifrides wip
Do sprach her Gernot	 ê wir immer sin
gemvot mit dem golde	wir soldenz in den Rin
allez heizen senken	daz ez wurde nieman	
si gie vil klegeliche	fur Giselher ir bruoder stan
Si sprach	lieber bruoder	dv sold gedenken min 
libes vnde guotes	sold dv min voget sin	
do sprach er zuo der vrowen	 daz sol sin getan 
als wir komen widere	wir haben ritens wan
Der kvnich vnd sine magen	die rvmten daz lant 
die aller besten darunder	die man inder vant 
niwan Hagne eine		beleip durch haz
den er truoch Kriemhilde	vnd tet vil schedilichen daz
E der kvnich rike	wider wære komen 
die wile hete Hagene	den schaz vil gar genomen 
er sancte in da ze loche	allen in den Rin 
er wande er soldin niezen	des kvnde do niht gesin
Die fvrsten komen wider	mit in vil manich man 
Kriemhilt ir grozen schaden	klagen do began
mit vrowen vnd mit meiden	 in was harte leit 
gerne wer ir Gyselher	aller triwen bereit
Do spraken si gemeine	er hat vbel getan	
Hagene entweich der fursten zorne	also lange dan 
vntz er gewan ir hvlde	si liezen in genesen 
do kvnde ime Kriemhilt	nimmer viender gewesen
E daz von Trony Hagne	da <schatz> also verbarc 
do hetenz siz gevestent	mit eiden also starch 
daz er verholn wære	vntz ir einer mohte leben 
so enkvnden sis in selben	noch ander niemen gegeben
Mit iteniwen leiden	 beswert was ir mvot 
vmb ir mannes ende	vn– do si ir daz guot
also gar benamen	 do gestuont ir klage
des libes nimmer mere	vnz an ir iungistem tage
Nach Sifrides tode	daz ist al war	
si wonde in manigem sere	drivzehen iar 
daz si des reken todes	vergezzen kvnde niht 
si was im getriwe	 des im div meiste menige giht

az was in einen ziten	do vro Helche erstarp
vn– der kvnich Ezel	vmbe ander vrovwen warp 
do rieten sine vrivnde	in Burgonden lant
zvo einer stolzen witwen	div was vrov Kriemhilt genant
Sit daz erstorben were	der schonen Helchen lip 
si sprachen	welt ir immer	gewinnen edel wip 
di hosten vnd die besten	 die kvnich ie gewan 
so nemt die selben vrowen	der starke Sifrit <was> ir man
Do sprach der kvnich rike	 wie mohte daz ergan 
sid ich bin heiden	vn– des tovffes niht han 
sist div vrovwe kristen	des enlobet siz niht 
ez mvese sin ein wunder	ob ez immer geschiht
Do sprachen die snellen	 ob siz lihte tvot
durch iwern namen hohen	vnd iwer michel gvot 
so sol manz doch versuochen	an daz vil edel wip 
ir mvget vil gerne minnen	ir vil wetlichen lip
Do sprach der kvnich edel	 wem ist iv bekant
vnder iv bi Rine	die lute vnd ovch daz lant	
do sprach der von Bechlarn	der guote Ruodiger 
ich han erkant von kinde	die vil edele kvnige her
Gvnther vn– Gernot	die edelen riter guot 
der dritte heizet Gyselher	ir islicher tvot
swaz er bester eren	vnde tvgende mach began 
ovch habent ir alte mage	noch daz selbe her getan
Do sprach aber Ecel	 vrivnt	dv sol mir sagen 
ob si in mime lande	 krone solde tragen 
vn– ist ir lip so schoene	so mir ist geseit 
minen besten vrivnden	sol ez nimmer werden leit
Si gelichet sich mit schoene	wol der vrovwen min 
Helchen der vil richen	ia kvnde niht gesin
in diser werlde schoener	 deheins kvniges wip 
den si lobet ze vrivnde	 der mach wol troesten sinen lip
Er sprach	so wirb ez Rvedeger	also liep ich dir si 
vn– sol ich Kriemhilde	geligen immer bi 
des wil ich dir lonen	 so ich beste kan 
vn– hast ovch minen willen	so rehte verre getan
Vz miner kamere	so haiz ich dir geben 
daz dv vnd dine gesellen	vrolichen mvgen leben 
von rossen vnd von kleideren	allez daz dv wil 
des heize ich iv bereiten	zvo der botschefte vil
Des antwrte Ruedeger		der markgraue rich 
gerte ich dines gvotes	daz were vnlobelich 
ich wil din bote gerne	 wesen an den Rin
mit min selbes gvote	 daz ich han von den henden din
Do sprach der kvnich rich	 nv wenne welt ir varn
nach der minneclichen	 got sol ivch bewarn
der reise an allen eren	vnd ovch die vrovwen min 
des helfe mir geluke	 daz si vns genedich muose sin
Do sprach aber Ruedeger	 ê wir rvomen daz lant 
wir mvezen ê bereiten	wafen vn– gewant	[45a]
also daz wirs ere	vor fvrsten mugen han 
ich wil fuern zvo dem Rine	funfhvndert wætlicher man
Swa man mich ce Burgonde	vnd die mine sehe 
daz ir islicher	danne wolde <iehen> 
daz nie kvnich deheiner	also manigen man
so verre baz gesande	danne dv ce Rine habest getan
Vnd ob duz	kvnich edel	darvmbe niht wil lan 
si was dem besten manne	Sifride vndertan 
dem Sigmvndes kinde	den hastv hie gesehen 
man moht im grozer eren	mit warheite iehen
Do sprach kvnich Ezel	 was si des reken wip 
so was wol also tiwer	des edelen fvrsten lip 
daz ich niht versmehen	die kvnniginne sol 
durch ir vil groze schoene	so gevellet si mir wol
Do sprach der marchgraue	 so wil ich iv daz sagen 
daz wir vns heben hinnen	in vier vnd zweinzech tagen 
ich enbivtez Goetelinde	der lieben vrovwen min 
daz ich nach Kriemhilde	selbe bote welle sin
Hin ze Bechlarn	 do sande Ruedeger 
wart div markgrauinne	trvrich vn– her 
er enbot ir daz er wolde	dem kvnige werben wip 
si gedahte minnechliken	an der schoenen Helchen lip
Do div marchgrauinne	die botschaft vernam 
ein teil was ez ir leide	weinens si gezam 
obe si gewinnen solde	 vrovwen alsam ê 
so si dahte an Helken	 daz tet ir innerchlichen we
Rvedeger von Vngern	in siben tagen reit 
des was kvnich Ecel	vro vn– ovch gemeit 
da ce der stat ce Wiene	beræite man in die wat 
do mohte er siner reise	niht langer haben rat
Da ce Bechlarn	wartete im Goetelint 
vn– div iunge marchgrauin	Ruedegers kint 
sach ir vater gerne	 vnd die sine man 
do wart ein liebez bitten	von schoenen vrovwen getan
E der edel Ruedeger	ze Bechlarn reit
vz der stat ze Wiene	do waren in div kleit
rehte volleclichen	vf den sovmen komen 
die fuoren in der maze	daz in wart wenich iht genomen
Do si ce Bechlaren	komen in die stat 
die sinen reisegesellen	herbergen bat
der wirt vil minnechlichen	vn– schuof in guot gemach 
Goetlint div riche	 den wirt si gerne komen sach
Als tet sin liebiv <tohter>	div iunge marchgrauin 
der kvnde nimmer		 sin komen lieber sin 
die helde vz Hunen lande		 wie gerne si si sach 
mit lachenden mvte		div edel iunchvrovwe sprach
Si vns groze willekomen	min vater vn– sine man	
do wart ein schoene danken	mit vlize da getan
der iungen markgravin	 von edelen ritter gvot 
wol weste Goetlint	 des herren Ruodegers mvot	[45b]
Do si des nahtes	 bi Ruedegere lac 
wie guetliche vragen	div marchgrauinne pflac 
war in gesendet hete	der kvnich von Hûnen lant 
er sprach	min vrov Goetlint	ich tuonz iv gerne bekant
Da sol ich mime herren	werben ein ander wip 
sid div ist derstorben	der schoenen Helken lip 
ich wil nach Kriemhilde	riten an den Rin 
div sol hie zen Hvnen	vrowe vil gewaltich sin
Daz wolde got	sprach Goetlint	mohte daz geschehen 
sid wir ir so maniger	eren hoeren iehen 
si ergazte vns miner vrovwen	noch lihte in alten tagen 
wir mohten gerne si cen Hunen	lazen krone tragen
Do sprach der markgraue Ruediger	 truttinne min 
die mit mir svlen riten	hinnen an den Rin 
den sult ir minneclichen	bieten iwer guot 
so helde varent riche	so sint si hohe gemvot
Si sprach	ez ist neheiner	daz gerne von mir nimt 
ich engebe islichem	daz im wol gezimt 
ê ir hinnen scheidet	vn– ovch iwer man	
do sprach der marchgraue	 daz ist mir liebe getan
Hei waz man richer pfelle	von ir kammeren truoc 
der wart den edelen reken	ce teile do genvoc 
ir sulet vlizeclichen	von halse vnz vf die sporn 
die im darab gevielen	die het im Ruodeger derkorn
An dem sibenden morgen	von Bechlaren reit
der wirt min sinen reken	wafen vnde kleit
vorten si den vollen	durch der Beire lant 
si wurden vf der straze	durch rovben selten an gerant
Inre tagen zvelfen	si riten an den Rin 
do kvnden disiv mere	niht verholen sin 
man seite ez dem kvnige	vnd den sinen man 
da komen vremde geste	 der wirt do vragen began
ob ieman bekande	daz man im solde sagen 
man sach ir sovmere	harte swere tragen 
daz si vil riche waren	daz wart da wol bekant 
man schuof in herberge	 in der witen stat erhant
Do die vil vnkvnden	waren in bekomen 
do wart der selben herren	vaste war genomen 
si wunderte wannen fueren	die reken an den Rin 
der wirt Hagenen vragete	wer die herren mohten sin
Do sprach der helt von Trony	 ich han ir niht gesehen 
als wir si nv geschovwen	 ich han iv wol veriehen
von swannen si riten	 her in dize lant 
si svln sin vil vremde	 ich habe si schiere bekant
Den gesten herberge		waren nv genomen 
in vil richiv kleider	was der bote komen
vnd sine hergesellen	 ze hove si do riten 
si fuorten guotiv kleider	 vil harte spehe gesniten
Do sprach der snelle Hagene	 als ich mich kan verstan 
wand ich den herren lange	niht gesehen han	[46a]
si varen wol gelike	sam ez sei Ruedeger
von hvnnissen landen	der degen kuene vnde her
Wie sol ich daz gelovben	sprach der kvnich zehant 
daz der von Bekelar	kome in dize lant	
als der kvnich Gvnther	die rede vol sprach 
Hagne der kuene	 den gvoten Ruedegeren sach
Er vnd sine vrivnde	si liefen alle dan 
do sach man von den rossen	funf hvndert riter stan 
do wurden wol enphangen	 die von Hunen lant 
boten nie getrvogen	also herlich gewant
Do sprach harte lûte	von Trony Hagne 
nv sin gote willekomen	dise degene 
der vogt von Bechellaren	vn– alle sine man	
der antfanch wart mit eren	den snellen Hunen getan
Des kvniges nehesten mage	die giengen da man sach 
Ortwin von Mece	 zvo Ruedegere sprach 
wir haben in aller wile	mere nie gesehen
geste so gerne	des wil ich werliche iehen
Des gruozes si do dancten	den reken vber al 
mit den hergesinden	 si giengen in den sal 
da si den kvnich fvnden	bi mangem kuenen man 
der herre stuont von sedele	daz was durch groze zuht getan
Wie rehte zuhtechlichen	 er zuo den boten gie 
Gvnther vn– Gernot		vil flizechlich enpfie
den gast mit sinen mannen	als im wol gezam 
den guoten Ruodiger	 er bi der hende genam
Er braht in zuo dem sedele	da er selbe saz 
den gesten hiez er senchen	 vil gerne tet man daz	
mete den vil guoten	vn– den besten win 
den man kvnde vinden	in dem lande al vm den Rin
Giselher vn– Gere	die waren beide komen 
Dancwart vn– Volker	die heten schiere vernomen 
vmbe dise geste	si waren vro gemvot	
si enphiengen vor dem kvnnige	die riter edele vn– guot
Do sprach zuo sime herren	von Trony Hagne 
ez solten immer dienen	dise degne
daz vns der markgraue	zuo liebe hat <getan> 
des solte lon enphahen	 der schoenen Goeteline man
Do sprach der kvnich Gunther	 ine kan daz niht verdagen 
wie si sich gehaben beide	daz sult ir mir sagen 
Ezel vn– Helche	vz der Hunen lant	
do sprach der marchgraue	 ich tuonz ich gerne bekant
Do stuont er von dem sedele	mit allen sinen man 
er sprach zuo dem kvnige	vn– mac daz si getan 
daz ir mir	furste	erlovbet	so wil ich niht verdagen
die mere	die ich bringe	sol ich iv willechlichen sagen
Er sprach	swaz man iv mere	bi iv enboten hat 
die erlovbe ich iv ze sagene	ane frivnde rat 
ir svlt si lazen hoeren	mich vnd mine man 
wan ich iv alle heren	 hie ze werbene gan	[46b]
Do sprach der bote biderbe	iv enbivtet an den Rin
getriwelichen dienest	der groze voget min 
darzuo allen frivnden	die ir mvget han 
ovch ist dise botschaft	mit grozen triwen getan
Iv bat der kvnich edele	clagen sine not 
si volc ist ane vrevde	min vrowe die ist tot 
Helche die vil rike	mines herren wip 
an der ist nv verweiset	vil maniger iunchfrovwen lip
kint der edelen fursten	die si gezogen hat 
da von ez inme lande	vil iemerlichen stat 
dine hant nv leider niemannen	der ir mit triwen phlege 
des wen ovch sich vil seine	des kvniges sorge gelege
Nv lon ime got	sprach Gvnther	daz er den dienst sin
so willechlichen enbutet	mir vn– den frivnden min 
den sinen gruoz ich gerne	hie uernomen han 
daz sulen gerne dienen	beide mage vn– mine man
Do sprach von Burgvnde	der reke Gernot 
die welt mach immer riwen	der schoenen Helken tot
durch ir vil manich tvgende	der si kvnde pflegen	
der rede gestvont im Hagene	 der degen
Do sprach aber Ruedeger	 der edel bote her 
sit ir mir	kvnich	erlovbet	ich sol iv sagen mer 
waz iv min lieber herre	 her enboten hat 
sit im sin dinch nach Helchen	 so rehte kvmerlichen stat
Man sagete minen herren		 Criemhilt si ane man 
her Sifrit si erstorben	vn– ist daz so getan 
wolt ir ir des gunnen		so sol si krone tragen
vor Ecelen reken		daz hiez ir min herre sagen
Do sprach der kvnich riche	wol gezogen was sin mvot 
si hoeret minen willen	ob si ez gerne tuot 
den wil ich iv kvnden	 in disen drien tagen 
ê ich ez an ir fvnde	 zuowiv sol ich Ecelen versagen
Die wile man den gesten	hiez schaffen guot gemach 
in wart da so gedienet	daz Rudiger des iach 
daz er da hete vrivnde	vnter Gvnthers man 
Hagne im diente gerne	 er het im ê alsam getan
Alsus beleip do Rudiger	vnz an den driten tac 
der kvnich nach rate sande	 vil wislich er pflac	
vn– ob ez sine mage	duhte guot getan 
daz Kriemhilt nemen solte	den kvnich edelen zuo einem man
Sie rieten ez algemeine	niwan Hagne 
der sprach zuo Gvnther	 demn kuonen degne 
habt ir rehte sinne	so wirt ez wol behuot 
vn– ob sis volgen wolte	daz irz doch nimmer getuot
Warumbe	sprach do Gvnther	solt ichs volgen niht	
swaz der kvnneginne	liebes noch geschit 
daz sol ich ir wol gvnnen	wan si ist die swester min 
wir soltenz selbe werben	 ob ez ir ere mohte sin
Do sprach aber Hagne		 nv lat die rede stan 
het ir Ecelen kvnde	 als ich sin kvnde han	[47a]
sol si iv danne minnen	als ich iv hoere <iehen> 
so ist iv alreste	von schvlden ze sorgen geschehen
Warvmbe	sprach do Gvnther	ich chan vil wol bewaren daz 
daz ich im kom so nahe	daz ich deheinen haz
von ime dulten muose	 vn– wurde si sin wip	
do sprach aber Hagne	daz gerætet nimmer min lip
Man hiez nach Gernote	vn– Gyselhere gan 
ob die herren beide	duhte guot getan 
daz Kriemhilt solde nemen	den richen kvnich her 
noch widerreit ez Hagne	vn– nieman mer
Do sprach von Bvrgonden	Gyselher der degen 
nv mvget ir	frint Hagne	noch der triwen pflegen 
ergezet si der leide	vnd ir ir habet getan 
an swiv ir wol gelvnge	daz svldet ir beliben lan
Ia habet ir miner swester	getan so mænigiv leit	
so sprach aber Giselher	 der reke vil gemeit 
daz si des hete schvlde	daz si iv wære gram 
nie man noch einer vrovwen	vrovde mere benam
Daz ich daz wol bekenne	daz tvon ich iv kvnt 
vnd sol si nemen Ecele	vnd gelebet si an die stvnt 
si gett vns vil leide	swie siz getreit an 
ia wirt ir da dienende	vil manich wetlicher man
Des antwurte do		der kuene Gernot 
ez mach also beliben	vnz an ir beider tot 
daz wir niht komen	 in Ecelen lant 
wir svln ir sin getriwe	daz ist vns zen eren gewant
Do sprach aber Hagne		mir mac daz nieman gesagen 
sol div edel Kriemhilt	 Helken krone tragen 
si getvot vns leide	swie si gefuege daz 
ir svlt ez lan beliben	daz zimet iv reken mikel baz
Mit zorne sprach do Giselher	der schoene voten svn 
wir svln doch niht alle	meinechlichen tuon 
swaz eren ir geschehe	vro solten wir des sin 
swaz ir geredet Hagne	 ich diene ir durch die triwe min
Do daz gehorte Hagne		do wart er im gemvot 
Gernot vn– Giselher		die stolzen riterre guot 
vn– Gvnther der riche	 ze iungist rieten daz 
ob ez lobete Kriemhilt	si wolten ez lazen ane haz
Do sprach der furste Gere	 ich wilz der vrovwen sagen 
daz si ir den kvnich Ecele	laze wol behagen 
dem ist so manich reke	 mit vorhten vndertan 
er mach sich noch ergezen	si leides ie gewan
Do gie der snelle reke	da er Kriemhilte <sach> 
si enpfie in guotliche	wie balde er do sprach 
ir mvget mich gerne gruozen	vn– geben petenbrot 
ivch wil geluche scheiden	 vz aller iwer not
Ez hat durch iwer minne	vrowe	da her gesant
ein der aller beste	der ie kvnniges lant
gewan mit vollen eren	oder krone solde tragen 
ez werbent riter edele	daz hiez iv iwer bruoder sagen	[47b]
Do sprach die iamers rike	 iv sol verbieten got 
vn– allen minen frivnden	daz si deheinen spot
an mir armer voben	 waz solt ich einen man
der ie herzeliebe	 von guoten wibe gewan
Si widerreit ez sere	do komen aber sint
Gernot ir bruoder	vn– Giselher daz kint 
si baten minneclichen	vn– trosten ir den mvot 
ob si den kvnich geneme	daz wer ir werlichen guot
Vberwinden kvnde nieman	do daz edele wip 
daz si minnen wolte	deheines mannes lip 
do baten si die degne	 nv lazet doch geschehen 
ob ir anders niht getuot	daz ir den boten ruochet sehen
Daz wil ich niht versprehen	so sprach daz edele wip 
ich en sehe vil gerne	den Ruedegers lip
durch sine manige tvgende	vn– wer er her niht gesant 
swerz ander boten were	 dem wer ich immer vnbekant
Si sprach	ir svlten morgen	heizen her gan
zuo miner kemenaten	ich wil in hoeren lan
vil gar den minen willen	sol ich im selbe sagen	
ir war erniwet	 daz ir vil grozliche chlagen
Do gert ovch niht anders	der edele Ruediger 
wan daz er gesehe	die kvnneginne her 
er weste sich so <wise>	ob ez immer kunde ergan 
daz si sich den reken	 vberrede mvoze lan
Des anderen morgens fruo	do man die messe sanc 
die edelen boten komen	 do wart daz groz gedranc	
die mit Ruedigere	zuo houe wolten gan 
der sach man da gekleidet	vil manigen herlichen man
Criemhilt div schoene	vn– vil reine gemvot 
si warte Ruedigere	 dem edelen boten guot 
der vant si in der wete	die si alle tage truoch 
da bi truoch ir gesinde	richer cleider genvoch
Si gie im engegene	zuo der thuor stan
vn– enpfiench vil guotliche	den edelen man 
niwan selbe zwelfter	 er darin ze rat gie 
man bot im grozen dienst	in komen hoher boten nie
Man hiez den herren sizen	vn– die sine man 
die zvene marchgrauen	 die sach man vor ir stan 
Ekewart vn– Gern		die edelen riter guot 
durch die hvsfrowen	si sahen nieman wol gemvot
Si sahen vor ir sicen	vil manige schoene meit 
do pflac niwan iamers	die vrovwe vil gemeit 
ir wat was vor den brusten	von heizen trehen naz 
der edele marchgraue	 wol sach an Kriemhilde daz
Do sprach der bote here	 vil edel kvniges kint 
mir vn– minen gesellen	die mit mir komen sint 
svlt ir daz erlovben	 daz wir vor iv stan
vn– iv sagen div mere	 warnach her geriten han
Nv si iv erlovbet	sprach div kvnnegin 
swaz ir reden wellet	also stat min sin	[48a]
daz ich gerne hoere	ir sit ein bote guot	
die anderen do wol horten	den ir vngwilligen mvot
Do sprach von Bekelaren	der furste Ruediger 
mit triwen groze liebe	Ecel	ein kvnnich her 
hat iv enboten	vrovwe	her in dize lant 
er hat nach iwer minne	 vil guote reken her gesant
Er enbivtet iv minnecliche	liep ane leit 
steter frivntschefte	der si er iv bereit 
als ê tet vron Helchem	div im ze herzen lac 
ia hat er nach ir tvgenden	vil dike vnvrolichen tac
Do sprach div kvnniginne	 marchgrave Rudiger 
wer ieman der bekande	 minen scharphen ser 
des bete nmich niht truoten	noch deheinen man 
ia verlos ich einen	den vrovwe ie gewan
Waz mac ergecen leides	sprach der vil kuene man 
wan frivntliche liebe	swer die kan began 
vn– der dan ein kvset	 der im ze herce kvmt 
von hercenlichen leide	niht so grozlichen frumt
Vn– geruochet ir ze minnen	den edelen herren min 
zwelf vil richer krone	svlt ir gewaltich sin 
darzuo git iv min herre	wol drizech fursten lant 
div elliv hat betwungen	sin vil ellenthaftiv hant
Ir svlt ovch werden vrovwe	vber manigen werden man	
die miner vrovwen Helchen	waren vndertan 
vn– vber manige vrovwe	der si het gewalt 
von hoher fvrsten kvnne	sprach der kuene degen balt
Darzuo git iv min herre	daz heizet er iv sagen	
ob ir geruochet chrone	bi dem kvnige tragen 
gewalt den aller hohesten	den Helche ie gewan 
den svlt ir gewaltechlichen	haben vor Ecelen man
Do sprach div kvniginne	 wie mohte minen lip
immer des gelusten	 daz ich wurde heldes wip 
mir hat der tot an eime	so rehte leide getan 
des ich vnz an min ende	mvoz vnfrolichen stan
Do sprachen aber die Hunen	 kvnniginne rich 
ivwer leben wirt bi Ezele	so rehte lobelich 
daz ez ivch immer wune	ist daz ez ergat 
wan der kvnich rike	vil manigen cieren degen hat
Helchen iuncvrowen	 vn– ivwre megetin 
solten di bi ein ander	ein gesinde sin 
da bi moehten reken	 werden wol gemvot 
latez iv	vrovwe	raten	ez wirt iv werlichen guot
Si sprach in ir zvhten	 nu lat die rede stan
vnz morgen vruo		so sult ir her gan 
ich wil iv antwurten	des ir da habet muot	
des muosen do volgen	die recken kuene vn– guot
Do si zen herbergen	alle komen dan 
do hiez die edele vruewe	nach Giselhere gan
vn– ovch nach ir mvoter	den besten sagt si daz 
daz si gezeme weinens	vn– niht anders baz	[48b]
Do sprach ir bruoder Gyselher	swester	mir ist geseit	
vn– wilz ovch wol gelovben	daz alliu diniv leit
der kvnich Ecel wende	vn– nimes dvn zeinem man 
swaz ander ieman rate	so dvnchet ez mich guot getan
Er mac dich wol ergecen	sprach aber Gyselher 
von Roten zuo dem Rine	von der Elbe unz an daz mere 
so ist kvnich deheiner	so gewaltich niht 
dv mach dich vreuwen balde	so er din ze konen giht
Si sprach	lieber bruoder	zwiv ratestu mir daz 
clagen vn– weinen	mir immer zeme baz 
wie sold ich vor reken	da ze hove gan 
wart min lip ie schoene	des bin ich ane getan
Do sprach die vrovwe vote	ir lieben tohter <zuo> 
swaz dine bruoder raten	liebez kint	daz tuo 
volge dinen vrivnden	so mac dir wol geschehen 
ich han dich doch so lange	mit grozem iamer <gesehen>
Do bat si got vil dike	fuegen ir den rat 
daz si ce gebene hete	golt	silber vn– wat 
sam ê bi ir manne	 do er noch was gesvnt 
si gelebte doch nimmer	mere so vroliche stvnt
Si gedahte in ir sinne	vn– sol ich minen lip
geben eime heide		ich bin ein cristen wip	
des mvoz ich zer werlte	inmer schanden han 
git er mir alle riche	ez ist von mir vngetan
Da mit siz lie beliben	die naht vnz an den tac
div vrovwe an ir bette	 mit vil gedanken lac 
div ir vil lieben ovgen	getrvkenten nie 
vnz si aber den morgen	 hin ze mettin gie
Ze rehter messezite	 die kvnige waren komen 
si heten aber ir swester	vnder die hende genomen 
ia rietens ir ze minnen	den kvnich von Hivnen lant 
die vrovwen ir deheine	luzzel vrolicher vant
Do hiez man daz gewinnen	die Ecelen man 
die nv mit vrlovbe	gerne weren dan 
geworben oder gescheiden	swie ez do moehte sin 
ze hove komen do Rudiger	die helde <rieten> wider in
daz man rehte erfuore	des edelen fursten mvot 
vn– teten daz bi cite	daz divhtes alle guot 
ir wege weren verre	 wider in ir lant 
man brahte Rvedigeren	da man Kriemhilten vant
Vil minneclichen bitten	der reke do began
die edelen kvnniginne	si solte in hoeren lan
waz si enbieten wolte	in Ecelen lant 
er niwan an ir niht anders	niwan lovgenen vant
daz si nimmer minnen wolte	mer deheinen man 
do sprach der marchgraue	 daz were missetan 
zuo wiv woldet ir verderben	einen also schoenen lip 
ir mvget noch mit eren	werden guotes mannes wip
Niht half daz si gebaten	vnz daz Rudiger
gesprach heinliche	 die kvnniginne her	[49a]
er wolte si ergezzen	swaz ir ie gesach 
ein teil begvnd ir semften	do ir grozer vngemach
Er sprach zer kvniginne	 lat ivwer weinen sin 
ob ir zen Hvnen hetet	nieman danne min 
getriwer miner mage		vn– ovch der minen man 
er muos es sere engelten	vn– het iv ieman iht getan
Da von wart do geringet	wol der vrowen mvot 
si sprach	so swert mir eide	swaz mir ieman getuot 
daz ir sit der nehste	der buoze miniv leit	
do sprach der marchgraue	 des bin ich	vrovwe	vil bereit
Mit allen sinen mannen	swuor ir do Rvdiger
mit triwen immer dienen	vn– daz die reken her
ir nimmer niht versageten	vnz Ecelen lant 
des si eren haben solte	des sichert ir do Rvdigers hant
Do gedahte div getriwe	sit ich vrivnde han
also vil gewinnen	so sol ich reden lan
die lûte swaz si wellent	ich iamerhaftez wip 
waz ob noch wirt errochen	des minen mannes lip
Si gedaht	sit daz Ecele	der reken hat so vil 
sol ich den gebieten	 so tuon ich swaz ich wil 
er ist ovch wol so riche	daz ich ze gebene han 
mich hat der leidege Hagene	mines guotes ane getan
Si sprach ze Ruedigere	het ich daz vernomen
daz er niht were ein heiden	so wer ich gerne komen 
swar er het willen	vn– neme in zeinen man	
do sprach der markgraue	 die rede svlt ir	vrovwe	lan
Er hat so vil der reken	in kristenlicher ê 
daz iv bi dem kvnnige	 nimmer wirdet we 
waz ob ir daz verdienet	daz er tovfet sinen lip 
des mvget ir gerne werden	des kvniges Ecelen wip
Do sprach aber ir bruoder	 nv lobez	swester min 
ivwer vngemvote	 daz svlt ir lazen sin	
si batens also lange	vnz daz doch ir trurich lip
lobete vor den helden	si wurde Ecelen wip
Si sprach	ich wil iv volgen	ich vil arme kvnigin 
daz ich var ze den Hvnen		so daz nv mach gesin 
swen ich han die frivnde		die mich fueren in sin lant	
des bot do vor den helden	 div schoene Kriemhilt die hant
Do sprach der marchgraue	 habet ir zwene man 
dar zuo han ich ir mere	ez wirdet wol getan 
daz wir ivch wol nach eren	bringen vber Rin 
irn svlt niht langer	vrowe	hie zen Burgonden sin
Ich han funf hvndert manne	vn– ovch der mage min 
die svln iv hie dienen	vn– da heime sin 
vrowe	swie ir gebietet	ich tuon iv selbe alsam 
swan ir mich mant der <mere>	daz ich michs nimmer gescham
Nv heizet iv bereiten	 iwer pfertcleit	
die Ruedigers ræte	 iv nimmer werdent leit	
vn– saget ez iwer magden	die ir da fueren welt 
ia chvmt vns vf der straze	vil maniger vzerwelter helt	[49b]
Si heten noch gesmide	daz man da vor treit
bi <Sifrides> ziten	daz si vil manige meit
mit eren mohte fueren	 swenne si wolde von dan 
hei waz man schoener setele	den schoenen vrovwen gewan
Ob si ie getrovgen	deheiniv richiv chleit 
der wart zuo zir verre	vil maniges nv bereit 
wan in von den kvnige	so vil gesaget wart 
si sluzzen vf die kisten	die ê stvnden wol bespart
Si waren vil vnmuozech	 wol viumphtehalben tac 
si svohten vz der valten	 des vil darinne lac 
Kriemhilde ir kameren	 ensliezen began 
si wolte machen riche	alle die Ruedigers man
Si hete noch des goldes	von Niblunge lant 
si wande ez zen Hovunen	solte teilen ir hant 
ez en kvnden hundert meule	dannen niht getragen	 
div mere horte Hagne	do von Kriemhilde sagen
Er sprach	sit mir vro Kriemhit	nimmer wirdet holt 
so mvoz ovch hie beliben	daz Sifrides golt 
zewiv sold ich minen vienden	lan so michel guot 
ich waiz vil wol waz Kriemhilt	mit disme sazze getuot
Ob si in brehte hinnen	ich wil gelovben daz	
er wurde doch zerteilet	vf den minen hals 
si habent ovch niht der rosse	die in solten tragen 
in wil behalten Hagne	 daz sol man Kriemhilte sagen
Do si gehorte div mere	daz was ir grimme leit 
ez wart ovch den kvnnigen	 allen drien geseit 
si wolten ez gerne wenden	do des niht geschach	
Ruodiger der edele	 harte vroliken sprach
Richiv kvnniginne	ce wiv claget ir daz golt 
iv ist der kvnich Ecele	so grozlichen holt 
gesehent iv sin ovgen	 er git iv also vil 
daz vz verswendet nimmer	des ich iv	vrovwe	weren wil
Do sprach div vil edel kvniginne	 vil edeler Ruediger 
ez gewan nie kvniges tohter	 rihtume mer
danne der mich Hagne		hat ane getan	
do kom ir bruoder Gernot	hin zer kameren gegan
Mit gewalt des kvniges	den sluzel stiez er an die tur 
golt daz Kriemhilde	teilte man derfur
ze drizech tusent marken	oder dannoch baz 
er hiez ez nemen die geste	liep was Gvnthere daz
Do sprach von Bechelaren	der Gothelinde man 
ob ez min vrowe Kriemhilt	allez mohte han 
swaz sin ie gefueret	von Niblvnge lant 
sin solte luzel rovren	min oder der kvnniginne hant
Nv heizet ez behalten	wand ich niht enwil 
ia fuort ich von landen	des minen also vil 
daz wirs vf der strazen	haben guoten rat 
vn– vnser koste hinnen	harte herliche stat
Da vor in allen wilen	gefullet zwelef schrin
des aller besten goldes	daz inder mohte sin [50a]
hete die ir mage	daz fuorten si von dan 
vn– gecierde vil der vrowen	daz si cer uerten solten han
Gewalt des grimmen Hagne	 duhte si ce starch 
si het ir <ophergoldes>	noch wol tusent marc 
si teiltenz siner sele	ir vil lieben man 
daz duhte Rudigeren		min grozen triwen getan
Do sprach div clagende kvnigin	 wa sint die vriunde min 
die durch mine liebe	wellent ellende sin 
die svln mit mir riten	in der Hunen <lant> 
die nemen schatz minen	vn– kovvfen ros vn– ovch gewant
Do sprach zer kvnniginne	der marchgrave Ekewart 
sit daz ich aller erste	iwer gesinde wart 
so han iv mit triwen	 gedienet	sprach der degen 
vn– wil vns an min ende	des selben immer bi iv pflegen
Ich wil ovch mit mir fueren	funf hvndert miner man 
der ich iv ce dienste	mit rehten triwen gan 
wir sin vil vngescheiden	ezen tuo danne der tot	
der rede neich im Criemhilt	des gie ir werlichen not
Do zoch man dar die moere	si wolten varen dan 
da wart vil michel weinen	 von vrovden getan 
vote div vil rike	 vnd manic schoene meit 
die zeigten daz in were	nach frov Criemhilt leit
Hvndert richer mægde	fuort si mit ir dan 
die wurden so gecleidet	als in daz wol gezam 
do vielen in die trehne	von liehten ovgen nider 
si gelebete vil der vienden	ovch bi Ecelen sider
Do chom der herre Giselher	vn– ovch Gernot
mit ir gesinde	als in ir gesinde gebot 
do wolten si beleiten	ir lieben swester dan 
do fuorten <si> ir reken	wol tuset wetlicer man
Do kom der snelle Gere	vn– ovch Ortwin 
Kvmolt der kuchenmeister	da mite muose sin 
si schuofen die nahtselde	unz an Tuonawe stat 
do reit nihe furbaz Gvnther	wan ein lucel fur die stat
E si von Rine fuoren	si heten fur gesant
ir boten harte snelle	nider Hunen lant 
die dem kvnge sagten	daz im Ruediger
ze wibe <hete> erworben	die edelen kvniginne her

ie boten lazen rite	wir svln iv tuon bekant
wie div kvniginne	gefuor durch div lant	
oder wa fon ir schieden	Gyselher vn– Gernot 
si heten ir gedienet	als in ir triwe daz gebot
Vnz an die Tvonowe	 ze Uergen si do riten 
si begunden vrlovbes	die kvnniginne biten 
wan si wider wolten	 riten an den Rin 
done mohtenz ane weinen	von guoten vriunten niht gesin
Giselher der snelle	sprach zer swester sin 
swenne daz dv	frovwe	beduerfen wolles min	[50b]
ob ir iht gewerre	daz tuo mir bekant 
so rite ich dir ce dienest	in daz Ecelen lant
Die ir mage waren		chvstens an den mvnt 
vil minneclichen scheiden	sach man an der stvnt
von Ruedigers frivnden	 des marchgrauen man 
do fuort div kvniginne	 vil manige meit wolgetan
Hvndert vn– viere	 die truogen richiv cleit
von gemalt richen pfellen	vil der schilte bereit
fuorte man bi der vrowen	nahen vf den wegen 
do kerte von ir dannen	vil manich herlicher degen
Si zogten balde dannen	nider durch Beier lant 
do sagte die mere	 da weren fur gerant
vil vnkvnder geste	 da noch ein closter stat
vn– da daz In mit fluzze	in die Tuonouwe gat
In der stat ze Pazzouwe	saz ein bischof 
die berge die wurden lere	vn– ovch des fursten <hof> 
si ilten balde	vf in Beier lant 
da der bischof Pilgerin	die schoenen Kriemhilt vant
Den reken von dem lande	was do niht ze leit 
do si ir volgen sahen	so manige schoene meit 
da trute man mit ovgen	der edelen riter kint 
guote herberge	gap man den gesten allen sint
Der bischof mit siner niftel	ze Pazzouwe reit 
do daz den Burgonden		von der stat wart geseit 
daz da cheme Kriemhilt	des fursten swester kint 
div wart wol enphangen	von den coufluten sint
Daz si beliben solten	der bischof het des wan 
do sprach der herre Ekewart	 daz ist vngetan 
wir mvozen varen widere	 in Ruedigers lant 
vns wartent vil der degene	wan ez ist in allen wol bekant
Div mere nv wol wesse	div schoene Gothelint 
si bereite sich mit flize	vn– ir vil edele kint 
in het enboten Ruediger	daz in daz duhte guot 
daz si der kvnniginne	 da mit troste den mvot
daz si ir rite engegene	 mit den sinen man
vf zuo der Ense		 do daz wart getan 
do sach man allenthalben	die wege vil vnmuozec sten 
si begvnden gegen gen gesten	beide riten vn– gen
Nv was div kvniginne	ze E^verdingen komen 
gnuge uz Beierlande	solten han genomen
den rovb vf der strazen	nach ir gewoneheit 
so hete si den gesten	da getan vil lihte leit
Daz was wol vnderstanden	von dem marcgrauen her 
er fuorte tvsent riter	vn– dannoch mer 
do was ovch komen Gothelint	Rudigers wip 
mit ir komen herliche	vil maniges guoten reken lip
Do si vber die Truone komen	in Ense vf daz velt 
do sach man vf gespannen	hutten vn– gezelt 
da die geste solten	die nahtsedle han 
div chost div was den reken	da von Ruedigere getan	[51a]
Gotelint div schoene	 die herberge lie
hinder ir beliben	 vf den wegen gie
mit klinginden zovmen	manic pferit wolgetan 
der antphanc wart vil schoene	liep waz ez Rudiger getan
Die in ze beiden siten	chomen vf den wegen 
die riten lobeliche	der was vil manich degen 
si pflagen riterschefte	daz sach vil manich meit 
ez was der kvnneginne	der riter dienst niht leit
Do zuo den gestesten komen	die Ruedigers man 
vil der trunzuone	sach man ze berge gan
von der reken hende	mit riterlichen siten 
da wart wol ze prise	vor den vrowen geriten
Daz liezen beliben	do gruozte manich man
vil guotlichen an ander	do fuorten si von dan
die schoene Gottelinde	 da si Kriemhilt sach 
die vrovwen diende konden	die heten cleinen gemach
Der vogt von Bechelaren	ze sime wibe reit 
der edelen marchgrauinne	was daz niht ze leit 
der er so wol gesvnder	von Rine was komen 
ir was ein teil ir swere	mit grozen vreuden benomen
Do sin hete enphangen	er hiez sich vf daz gras
erbeizen mit den vrovwen	swaz ir da mit ir was 
da wart vil vmmuozech	 manich edel man 
den vrovwen wart do dienest	mit grozen flize getan
Do sach div vrovwe Kriemnhilt	die marchgrauinne sten
mit dem ir gesinde	si lie niht nach ir gen 
daz phert mit dem zovme	 zvchen si began 
vn– bat sich snelleclichen	von dem satele eben dan
Den bischof sach man wisen	siner swester kint 
in vn– Echewarten	 zuo Gothelinde sint 
da wart vil michel wiken	an der selben stunt 
do kuste div ellende	an Gothelinde mvnt
Do sprach vil minnecliche	des Ruedigers wip 
nv wol mich	liebe vrovwe	daz ich iwren schoenen lip
han in disem lande	mit ovgen min gesehen 
mir erkonde an disen citen	nimmer lieber geschehen
Nv lon iv got	sprach Criemhilt	vil edele Gothelint 
sol ich gesunt beliben	vn– Botlvnges kint 
ez mag iv komen ze liebe		daz ir mich habet gesehen 
in beiden was vnkvnt		 daz sider mvose geschehen
Mit zuhten zuo an ander	gie vil manich meit 
do waren in die reken	mit dienste vil bereit 
si sazen nach dem gruoze	nider uf den cle 
si gewunnen maniger kvnde	die in vil vremde waren ê
Man hiez den vrovwen schenken	 ez was wol mitter tac 
daz edel ingesinde	da niht lenger lac 
si riten da si vunden	manige huotten breit 
da was den edelen gesten	vil michel dienst bereit
Die naht si hete ruowe	vnz an den morgen vruo 
die von Bechelaren	bereiten sich darzuo [51b]
wie si behalten solten	vil manigen werden gast 
wol hete gehandelt Ruediger	daz im da wenich iht gebrast
Die venster an den muoren	sach man offen stan 
div bvrch ze Bekelaren	div was vf getan 
do riten darin die geste	die man vil gerne sach 
den hiez der wirt vil edele	schaffen guoten gemach
Diu Rudigeres tohter	mit ir gesinde gie
da si die kunneginne	vil minnechlich enphie 
da was ovch ir mvoter	 des marchgrauen wip 
mit liebe wart gegruozet	vil maniger iunchvrowen lip
Si viengen sich behanden	vn– giengen dan
in einen palas witen	der was vil wol getan 
da div Tuonouwe	 vnder hine floz 
si sazen gen den luften	vn– heten chvrzewile groz
Wes si da mer pflagen	 dis en kan ich niht gesagen	
daz in so vbel zovgte	 daz horte man do klagen
die Kriemhilde reken	wand ez was in leit 
hei waz do guoter reken	mit in von Bechelaren reit
Vil minneclichen dienest	Ruediger in bot 
do gap div kunniginne	 zvelf arbovgen rot
der Gotlinde tohter	 vn– also gvot gewant	
daz si niht bezzers brahte	in daz lant
Swie ir genomen were	der Niblvnge <golt> 
alle die si gesahen	die mahte si ir holt
noch mit dem chleinen guote	daz si da mohte han 
des wirtes ingesinde	dem wart groze gabe getan
Da wider bot do ere	div vrovwe Gotlint
den gesten von dem Rine	so guotlichen sint 
daz man der vremden	 harte wenic vant 
sin truogen ir gesteine	oder ir herlich gewant
Do si enbizzen waren	 vn– daz si solten dan 
von der husvrowen	 wart geboten an
getriwelichen dienest	daz Ecelen wip 
da wart vil getrivtet	der schoenen iuncvrovwen <lip>
Si sprach zuo der kunneginne	 swenne iuch nu dunket guot 
ich waiz wol daz ez gerne	min lieber vater tuot 
daz er mich zuo ziv sendet	in der Hunen lant	
daz ir getriwe wære	wie wol daz Kriemhilt eruant
Div ros bereitet waren	 vn fur Bechelaren komen 
do het div edel kvnnegin	vrlovp nu genomen
von Rudigers wibe	 vn– der tohter sin 
do sciet ovch sich mit gruoze	vil manic schoene magetin
An nander si vil selten	sahen nach den tagen 
vz Medilke wart		uf handen vil getragen
manich goltvaz rich	darinne brahte man win
den gesten zuo der straze	si muosen willechomen sin
Ein wirt was da gesezzen	Astolt genant 
der wisete si die straze	in daz Osterlant
gegen Mûtaren		die Tvonowe nider 
da wart vil wol gedienet	der <schonen> kvniginne sider	[52a]
Der bischof vrivntliche	von siner nifteln schiet 
daz si sich wol gehabete	wie vast er ir daz riet 
vn– daz si ir ere kovfte	so Helke hete getan 
hei waz si grozer eren	 sid ce den Hunen gewan
Zuo der Trevsem brahte	 man die geste dan 
ir phlagen vlizeclichen	 die Ruedigers man 
vnz daz die Hunen		riten vber lant 
do wart der kvniginne	vil michel ere bekant
Bi der Treisem hete	der kvnich vz Hûnen lant
eine burch wite	 div was wol bekant 
geheizen Zeizenmvre	vrov Helche saz da ê
vn– pflac so grozer tvgende	daz wetlich nimmer mer erge
ez tæte danne Kriemhilt	div also kvnde geben 
si mohte nach ir leide	daz liep wol geleben 
daz ir ovch iahen ere	 die Ecelen man 
der si sid grozen vollen	bi den helden gewan
Ecelen herschaft	was witen erkant 
daz man ze allen ziten	in sime hove vant
die kuonsten reken	 von den ie wart vernomen
vnder kristen vn– heiden	die waren mit in allen komen
Bi im was alle zit	daz wætlich mer erge	
kristenlicher orden	vn– ovch der heiden ê 
in swie getanem lebne	sich islicher truoc 
das schuof des kuniges <milte>	daz man in allen gap genuoch

i was Zeizenmûre	vntz an den vierden tac 
div molde vf der straze	die wile nie gelac 
si enstvbe sam ez brvnne	allenthalben dan 
da riten durch oesteriche	des kvnic Ecelen man
Do was dem kvnige	 vil rehte nv geseit 
des im von gedanken	 swunden siniv leit 
wie herliken Kriemhilt	koeme durch div lant 
der kvnich <began> gahen	da er die minneclichen vant
Von vil maniger sprache	sach man vf den wegen
vor Ecelen riten	manigen kuenen degen 
von kristen vnd von <heiden>	manige wite schare 
da si die frovwen funden	 si chomen herlichen dare
Von Rvzen vnd von Kriechen	reit da manich man 
den Polan vnd den Vlachen	sach man swinde gan 
ros div vil guoten	si mit krefte riten 
swaz si siten heten	der wart vil wenic vermiten
Von dem lande ce Kieuen	reit da manic degen 
vn– die wilden Pesnære	da wart vil gepflegen
mit bogen schiezen	zuo voglen da si flugen 
die phile si sere	zuo den wende vaste zvgen
Ein stat bi Tuonowe	lit in Osterlant 
div ist geheizen Tulna	da wart ir bekant
vil manic site fremde	den si ê nie gesach 
si enphiengen da genuoge	den sid vil leit von ir geschach
Vor Ecelen dem kvnige	ein ingesinde reit	[52b]
vro vnde vil rike	hvbs vn– <gemeit> 
wol vier vnd zweinzek fvrsten	rich vn– her 
daz si ir vrowen sahen	da von gerten niht mer
Der herzoge Ramvnc	 vozer Vlachen lant 
mit siben hvndert mannen	chom er fur si gerant 
sam vliegende vogele	sach man si alle varn 
do kom der furste Gibeke	mit vil herlichen scharen
Horboge der snelle	wol mit tvsent man
kerten von dem kvnige	gein siner vrowen dan 
vil lute wart geschallet	nach des landes siten 
von der Hvnen mage		wart ovch da sere geriten
Do kom von Thenemarke	der kuone Hawart
vn– Irinc der vil snelle	vor valse wol bewart 
Irnvrit von Dvringen	 ein wetlicher man 
si enphiengen Kriemhilde	daz si eren mvose han
mit zwelfhundert mannen	 die fuortens in ir schar 
do kom der herre Bloedel	mit drin tvseneden dar 
der Ecel bruoder	 vzer Hvnen lant 
der kom vil herliche	da er die kvnniginne vant
Do kom der kvnic Ecele	vnd ovch der Dietrich
mit allen sinen gesellen	da was vil loblich
manic riter edele	biderbe vn– guot 
des wart vron Kriemhilde	vil wol gehohet ir mvot
Do sprach cer kvniginne	der herre Ruediger	
vrowe	ich wil enphahen	hie den kvnic her 
swen ich iv herre chussen	daz sol sin getan 
ian mvget ir niht geliche	gruozen alle die Ezelen man
Do huop man von den moeren	die kvnniginne her 
Ecel der vil rike	enbeite do niht mer 
er stuont von sime rosse	mit manigen man 
man sach in vroliche	 gegen Kriemhilde gan
Zzwene fursten rike		als vns da ist geseit	
bi der vrovwen gende	truogen rike cleit 
da ir der kvnic Ecele	hin engegen gie 
da si den fursten edele	mit kvssen gvotlich enphie
Vf ructes ir gebende	 ir varwe wolgetan
div lûhte ir vz dem golde	da was vil manic man 
si iahen daz vrov Heliche	niht schoener kvnde gesin 
dabi so stuont vil nahen	des kvniges bruoder Blodelin
Den hiez si kvssen Rvdiger	der markgraue rich 
vn– den kvnich Gybeken	 da stvont ovch her Dietrich 
der reken chvste zwelfe	 daz Ecelen wip 
do enpfiench si sus mit gruoze	maniges riters lip
Al die wile vn– Ecele	 bi Kriemhilte stuont 
do taten die tvmben	als noch die lûte tvont	
vil manigen buneiz richen	sach man da geriten 
daz taten cristen helde	vnd ovch die heiden nach ir siten 
Wie rehte biterlichen	die Dietrikes man
die schefte liezen vliegen	mit truonzunen dan
hohe vber schilte	guoter riter hant	[53a]
von den Tiûschen gesten	wart durchel maniges schildes rant
Da wart von schefte breken	vil michel doz vernomen 
do waren von dem lande	 die reken alle komen 
do gie der kvnich rike	mit vro Kriemhilde dan
Si sahen bi in sten	ein vil herlich gezelt	
vol hutten was erfullet	alumbe daz velt	
da si solten ruowen	 nach ir arebeit 
von helden wart gewiset	darvnder manic schoene meit
mit der kvnniginne	da si sit gesaz
vf riche stuelgewæte	der marcgraue daz
hete wol geschafet	daz man vant vil guot
daz gesidele Kriemhilt	des freut sich Ecelen mvot
Waz do redet Ecele	daz ist mir vmbekant 
in der siner zeswen	lac ir wiziu hant 
si gesazen minnecliche	da Ruediger der degen
den kvnich niht wolte lazen	Criemhilde heimliche phlegen
Do hiez man lan beliben	den buhurt vber al 
mit eren wart verendet	da der groze schal 
do giengen zuo den hutten	die Ecelen man 
man gap in herberge	 vil witen allenthalben dan
Der tac der hete nv ende	si schuofen ir gemach 
vnze man den liehten morgen	aber schinen sach 
do was zuo den rossen	komen manic man 
hei waz man kvrzewile	dem kvnige ze eren began
Der kvnic ez nach den eren	die Hvnen schafen bat 
do rite von Tulne	ze Wiene zuo der stat 
da fvnden si gecieret	vil maniger vrovwen lip 
si enphiengen wol mit eren	des kvnigen Ecelen wip
Mit hartem grozem vollen	so wart im bereit
swaz si haben solten	 vil manich helt gemeit
sich vreute gen dem schalle	herbergen man began 
des kvniges hohgecit	 huop sich vil frolichen an
Sin mohten niht geherbergen	allein der stat 
die niht geste waren	Ruediger die bat
daz si herberge	 nemen in daz lant 
ich wæne man alle zite	bi dem kvnige Kriemhilde vant
Der herre Ditrich	vn– ander manic degen
si heten sich der ruowe	mit arbeit bewegen 
durch daz si gesten	troesten wolden mvot 
Ruediger vn– sine vrivnde	heten churzewile guot
Div hohcit was gevallen	an einen phinxtage 
da der kvnich Ecel	 bi Kriemhilde lac
in der stat ze Wiene	si wene so manigen man
bi ir ersten manne	nie ze dienste gewan
Si chvnde sich mit gabe	dem der si nie gesach 
vil maniger darunder	zuo den gesten sprach 
wir wanden daz vro Kriemhilt	guotes niht mohte han 
nv ist hie mit ir gabe	vil manich wunder getan
Div hochcit div werte	 sibencehen tage	[53b]
ich wene man von deheinem	kvnige sage 
des hohcit grozer were	 daz ist vns gar verdeit 
alle die da waren	truogen ir niwe kleit
Si waren in Niderlande	da vor nie gesaz
mit so manigem reken	 da bi gelovb ich daz 
<was> Sifrit riche des <guotes>	daz er nie gewan
so manigem reken edele		so si sach vor Ecelen stan
Ovch gap kvnich nie deheiner	zuo sin selber ochgezit
so manigen richen mantel	tief vn– wit 
noch so guoter cleider	der si mohten vil han 
die durch <Kriemhilde> willen	wurden alle vertan
Ir vrivnde vn– ovch <die> geste	heten einen mvot 
daz si da niht ensparten	deheiner slahte guot 
swes ieman an si gerte	 des waren si bereit 
des gestuont do vil der degene	von milte bloz ane cleit
Wie si ze Rine seze	si gedahte ane daz 
bi ir edelem manne	 ir ovgen wurden naz 
si hetes vaste hele	 daz ez ieman kvnde sehen 
ir was nach manigem leide	so vil der eren geschehen
Swaz ieman tet mit milte	das was gar ein wint
vnz an Dietriche	 swaz Botlunges kint
vn– gegeben hete	daz was nv gar verswant 
ovch begie da michel wunder	des milten Ruedigeres hant
Vzer Vngerlande	 der furste Blodelin
der hiez da lere maken	vil manich leitschrin
von silber vnd von golde	da wart hin gegeben 
man sach des kvniges helde	so rehte vroliche leben
Werbel vn– Swemlin	 des kvniges spilman 
ich wen ir iegelicher	zer hohcit gewan
wol ce tvsent marken	oder dannoch baz 
da div schoene Criemhilt	bi Ecele vnder krone saz
An dem ahtzehenden morgen	von Wiene si do riten 
da wart in riterscheften	schilde vil versniten
von speren	di da fuorten	die reken an der hant 
sus chom der kvnich Ecele	vnz in daz Hunische lant
Ze Huniburch der alten	si waren vber naht 
do ne kunde niemen wizzen	wol des volkes aht 
mit wie getaner krefte	si riten vber lant 
hei waz man schoener vrowen	in sime heimvote vant
Ze Misenburch der riken	da schiften si sich an		
daz wazzer wart verdeket	von rossen vn– ovch von man	
alsam ez erbe wære	swaz man sin fliezen sach 
die wegmvoden vrovwen	 die heten semfte vnd ovch gemach
Zesamne was <geslozen>	manich schef vil guot 
daz in niht enschadete	die vnde noch die fluot 
daruber was gespannen		manic guot gezelt 
sam ob si noch	beide lant vn– velt
Do komen disiv mere	ze Ecelenburch von dan 
do vreuten sich darinne	wip vnde man 
des Ecelen ingesinde	des ê div vrowe pflac	[54a]
gelebten sit bi Kriemhilte	manigen vrolichen tac
Do stuont da wartende	 vil manic edel meit 
die nach Helken tode	 heten manige leit 
siben kvnige tohter	Criemhilt noch da vant 
von den was gecieret	wol allez Ecelen lant
Div iuncvrovwe Herrat	noch des gesindes pflac 
div Helchen swester tohter	an der vil tvgende lac 
div gemahele Dietriches	 eins edelens kvniges kint 
div tohter Nentwines	 div hete vil der eren sint
Gegen der geste chvmfte	vreute sich ir mvot 
ovch was dar zuo bereitet	vil creftigez guot 
wer kvnde iu daz bescheiden	wie sit der kvnich gesaz 
si gelebden da zen Hunen	nie mit der kvniginne baz
Do der kvnic mit sime wibe	von den staden reit 
wer iegeliche fuorte	daz wart do wol geseit 
die edelen Kriemhilte	si gruoztens dester baz 
hey wie gewaltechlichen	si sit an Helchen stat gesaz
Getrivliches dienstes	wart ir vil bekant 
do teilt div kvniginne	golt vnd ovch gewant 
silber vn– gesteine	swaz si des vber Rin
mit ir zen Hunen brahte	daz muose gar zergeben sin
ovch wurden ir mit dienste	sider vndertan
al des kvniges mage	vn– alle sine man 
daz div vrowe Helche	nie so gewaltecliche gebot 
so si nv muosen dienen	vnz an den Kriemhilte tot
Do stuont mit solhen eren	der hof vn– ovch daz lant 
daz man da ze allen ziten	die kurzewile vant 
swar nach iegelichem	 daz herze truoc den mvot 
durch des kvniges liebe	vn– der kvnigin guot

it vil grozen eren	 daz ist alwar	
wonte si mit ein ander	vnz an	daz sibende iar 
div cit div kuniginne	eins svns was genesen 
des kvnde der kvnic Ecele	nimmer vrolicher wesen
Sin wolde niht erwinden	 sin wrbe sint 
daz getovfet wurde	daz Ecelen kint
nach cristenlichem rehte	Ortliep wart ez genant 
des wart vil michel vreude	vber al des Ecelen lant
Swaz ie guoter tvgende	 an vron Helchen lac 
der vleiz sich nv vro Kriemhilt	darnach vil manigen tac 
die site si lerte Herrat	div ellende meit 
div hete tvgentlichen	nach Helchen grozlic leit
Den vremden vn– den kvnden	was si vil wol bekant 
die iahen daz nie vrovwe	beseze kvniges lant
bezzer vn– milter	 daz heten si fur war 
daz lob si truoc zen Hunen	vnz an daz drivzehende iar
Nv hete si wol erkvnet	daz ir nieman widerstuont	
also noch fursten wibe	 kuniges reken tuont 
vn– daz si alle zit	zwelf kvnige vor ir sach 
si gedaht ovch maniger leide	der ir deheime gesach	[54b]
Si daht ovch maniger ern	 von Niblunge lant 
der si was gewaltic	 vn– die ir Hagnen hant
mit Sifrides tode	hete gar benomen 
ob im daz ovch immer	ze leide mohte komen
Daz geschehe ob ich in bringe	mohte in dize lant	
ir trounte daz ir gienge	vil dike an der hant
Giselher ir bruoder	 si kust in ze aller stunt
vil ofte in semftem slafe	sit war in erbeit kvnt
Ich wene der ubel valant	 Kriemhit daz geriet 
daz si sich mit fruntschefte	von Giselhere schiet 
den si durch suone kuste	 in Burgonden lant 
do begond ir aber svlwen	von heizen trehen ir gewant
Ez lac ir an dem herzen	spat vn– vruo 
wie man si ane schulde	brehte dar zuo 
daz si muose minnen	einen heidenischen man 
die not die het ir Hagne	vn– Gunther getan
Des willen in ir herzen	chom si vil selten abe 
si gedaht	ich bin so riche	vn– han so groze habe 
daz ich minen vienden	 gefuoge noch ein leit 
des were et ich <Hagnen>	von Trony gerne bereit
Nach den getriwen iamere	dike daz herze min 
die mir da leide taten	mohte ich bi den sin 
so wurde wol errochen	 mines vriundes lip	
des ich kume erbeiten	 sprach daz Ecelen wip
Ze liebe si do heten	al des kuniges man 
die Kriemhilde reken	daz was vil wol getan 
der kameren pflac Echewart	da von er vrivnt gewan	
Kriemhilde willen	kvnde nieman vnderstan
Si dahte zallen ziten	ich wil den kvnich biten 
daz er ir des choende	 mit guetlichen siten 
daz man ir vrivnde brehte	in der Hunen lant 
des argen willen niemen	an der kvniginne vant
Do si eines nahtes	bi dem kvnige lac	
mit armen vmbevangen	het er si	als er phlac
die edelen vrovwen truotten	si was im so sin lip	
do gedaht ir viende	daz vil wetliche wip
Si sprach zuo dem kvnige	 vil lieber herre min 
ich wole ivch hiten gerne	moehte ez mit hulden sin 
daz ir mich sehen liezet	ob ich daz het versolt 
ob ir den minen vrivnden	weret inneclichen holt
Do sprach der kvnich riche	 getriwe was sin mvot 
ich bringe ivch des wol innen	swa liep vn– guot
den rechen widerfuore		des mvose ich viende han 
wand ich von vrivndes minne	 nie bezzer vrivnde gewan
Do sprach div kvniginne		 iv ist daz wol geseit 
ich han vil hohe mage		darvmbe ist mir so leit 
daz mich die so selten	 ruochent hie gesehen 
ich hoere min die lûte	 niwan fur elende iehen
Do sprach der kvnich Ecele	 vil liebiv vrowe min 
divht ez si niht ze verre	so luede ich vber Rin [55a]
swel ir da gerne sehet	 varn her in min lant	
des vrovvte sch div vrovwe	do si den willen sin ervant
Si sprach	wolt ir mit trvwe	leisten	herre min 
so svlt ir boten senten	 ze Wormz vber Rin 
so enbvte ich minen vrivnden	des ich da habe mvot 
so kvmt vns her ze lande	vil manich edel riter guot
Er sprach	swem ir gebietet	so lazet ez geschehen 
irn kvndet iwer vrivnde	so gerne niht gesehen
als ich si gesehe	der edelen voten kint 
mich mvot daz harte sere	daz si vns so lange vremde sint
Ob ez dir wol gevalle	vil liebe vrovwe min 
so wold ich gerne senden	nach den vrivnden din
die minen videlere	in Bvrgonden lant	
die guoten videlere	hiez er bringen san cehant
Si ilten harte balde	da der kvnich saz
bi der kvnnigin	er saget in beiden daz 
si solten boten werden	in Burgonden lant 
do hiez erin bereiten	harte herlich gewant
Vier vn– zweinzech reken	bereite man do kleit 
ovch wart im von dem kvnige	div botschaft geseit 
wie er da laden solde	Gvnther vn– sine man 
Kriemhilt div vrovwe	 si svnder sprechen began
Do sprach der kvnich rike	 ich sage wie ir tvot 
ich enbivte minen vrivnden	lieb vnd allez gvot 
daz si ruochen riten	her in miniv lant 
ich han so lieber geste	harte wenic noch bekant
Vnd ob si mines willen	wellen iht began 
die Kriemhilde mage	 daz si des niht lan 
si en komen an disem svmere	zvo miner hohgecit 
wand vil der minen wunne	 an minen kuone magen lit
Do sprach der videlere	 der stolze Swæmelin 
wenne sol iwer hochcit	in disen landen sin 
daz wir iwern vrivnden	 daz kvnnen dort gesagen 
do sprach der kvnich Ecel	 cen nahsten svnwenden tagen
Wir tuon swaz ir gebietet	sprach do Wærbelin 
in ir kemenaten	bat div kvnigin
bringen tovgenlichen	da die boten si gesprach 
da von vil manigem degne	sid wenich <liebes> gesach
Si sprach cen boten beiden	 nv dient michel guot 
daz ir minen willen	vil guetlichen tuot 
vnd saget swaz ich enbiete	heim in vnser lant 
ich mache ivch guotes rike	vnd gib iv herlich gewant
Vnd swaz ir miner vrivnde	immer mvget gesehen
ze Wormez bi dem Rine	 den svlt ir niht veriehen 
daz ir noch ie gesehet	betruobet minen mvot 
vnd saget minen dienst	den helden kuone vn– guot
Bittet daz si leisten	daz Ruediger in enbot 
vn– mich da mite scheiden	von aller miner not 
die Hv^nen wellent wenen	daz ich an vrivnde si 
ob ich ein riter were	ich choeme in ettewenne bi	[55b]
Vnd saget ovch Gernote	dem edeln bruoder min 
daz im iernen mvge	ce der werlde holder sin 
bitet daz er mir bringe	her in dize lant
vnser besten vrivnde	daz ez vns ze eren si gewant
So saget ovch geselle	 daz er wol gedenke daran 
daz ich von sinen schvlden	nie leides niht gewan 
des sehen in vil gerne	hie die ovgen min 
ich heten hie vil gerne	dvrch die grozen triwe min
Saget ovch miner mvoter	 die ere die ich han	
vn– ob von Troni Hagne	dort welle bestan 
wer si dan wisen	solde durch div lant 
den sin die wege von kinde	herzelichen wol bekant
Die boten nine wessen	wa von daz was getan 
daz si von Trony Hagnen	niht beliben solten lan
dort bi dem Rine	ez wart in sider leit 
mit in was manigem degne	zem grimmen tode widerseit
Brieve vn– boteschaft	was in nv gegeben 
si fuorten guotes riche	vn– moehten schoene leben 
vrlovb gab in Ecele	 vn– ovch sin schoene wip 
in was von guoten wæte	wol gecieret der lip

o Ecel sine boten	zvo dem Rine sande 
do flvgen disiv rnere	von lande ze lande 
mit boten harte snellen	er bat vn– ovch gebot
zvo siner hohgezite	des holte maniger da den tot
Die boten dannen fuoren	vozer Hvnen lant 
zvo den Burgonden	dar waren si gesant
nach drien edelen kvnigen	vn– ovch nach ir man 
si solten komen Ecelen	des man si do gahen began
Hin ce Bechlaren	 chomen si geriten 
da diente man in gerne	daz enwart da niht <vermiten> 
Ruediger sinen dienest	enbot vnd Gotlint
bi in hin ze Rine	 vn– ovch ir beider kint
Sine liezens ane gabe	von in niht scheiden dan 
daz dester baz gefueren	die Ecelen man 
voten vnd ir kinden	enbot do Ruediger 
sine hete in so wege	deheinen marchgrauen mer
Sin enbuten ovch Prvnhilde	dienst vn– gvot 
steteliche triwe	vn– willigen mvot 
do si die rede vernamen	die boten wolten varn 
si bat div marchgrauinne	got von himele bewarn
E daz die boeten	vol durch Beierlant 
Wærbel der vil snelle	den gvoten bischof vant 
waz der do sinen frivnden	 hin ze Rine enbot 
daz ist mir niht gewizen	 niwan sin golt als rot
gab er den boten ze minnen	riten er si lie 
do sprach der bischof Pilgerim	 vn– solt ich si sehen hie	
mit wære wol ze mvote		die swester suone min 
wand ich mac vil selten	 zvo zin komen an den Rin	[56a]
Welche wege si fuorten	 ze Rine durch div lant 
des chan ich niht bescheiden	ir siber vn– gewant
daz en nam in nieman		 man vorhte ir herren zorn 
so was vil gewaltich	 der edele kvnic wol geborn
Inre tagen zwelfen	 chomens an den Rin 
ze Wormez zvo dem lande	Werbel vn– Swermlin 
do sagt man div mere		 den kvnigen vn– ir man 
da chomen bote vremde	Gvnther do vragen began 
Do sprach der vogt von Rine	 wer tvot vns daz bechant 
von wannen dise vremden	 riten in daz lant	
daz en wesse nieman	 vnz daz si sach
Hagene von Tronie	ze Gvnther do sprach
Vns chemen niwe mære	des wil ich iv veriehen 
die Ecelen videlere	die han ich hie gesehen 
si hat iwer swester	gesendet an den Rin 
si svln vns durch ir <hereren>	groz willechomen sin
Si riten al bereite	fur den palas dan 
ez gefuoren nie herlicher	fursten spileman 
des kvniges ingesinde	 enphie si sa zehant 
man gab in herberge	 vnde hiez behalten ir gewant
Ir reischleider waren	 so rich vnd so wolgetan 
ia mohten si mit eren	 fur den kvnic gan 
sin wolten ir niht mer	da ze hove tragen 
ob ir ieman geruohte	 die boten hiezen daz sagen
In der selbe maze	man ovch lute vant 
die ez vil gerne namen	den wart ez gesant 
do leiten an die geste	verre bezzer wat 
als ez boten kvniges	 ze tragene herliche stat
Do gie mit vrlovbe	 da der kvnich saz
daz Ecelen gesinde	gerne sach man daz 
Hagene zvhtecliche	ze den boten sprach
vn– enpfie si minecliche	des sagten im die knappen danch
Durch div kvnden mere	vragen er began 
wie si Ecele gehabte	vn– die sine <man> 
do sprach der videlere	daz lant gestvont nie baz
noch so vro die lute	 nv wizzet endeliche daz
Si giengen zvo dem wirte	der palas der was vol 
do enphie man die geste	so man von rehte sol
guotlichen gruozen	 in ander kvnige lant 
Werbel vil der reken	da bi Gvnther vant
Der kvnich gezogenlike	si gruozen began 
sit willekoemen beide	ir Hvnen spileman 
vn– iwer hergesellen	wer hat ivch her gesant
Ecele der riche	 zvo der Burgonden lant
Si nigen do dem kvnige	 do sprach Werblin 
dir enbivtet holden dienest	der liebe herre min 
vn– Criemhilt din swester	her in dize lant 
si habent reken		vf guote triwe her gesant 
Do sprach der fvrste riche	 der mere der bin ich vro 
wie gehabet sich Ecele	so vragete der degen do	[56b]
vn– Chriemhilt min swester	vozer Hvnen lant	
do sprach der videlere	div mere tvon ich iv bechant
daz sich noch nie gehabten	deheine lûte baz 
danne si sich <gehabent> beide	ir svlt wol wizen daz
vnde allez daz gedigene	die magt vn– ovch alle ir man
si vreuten sich der verte	do wir schieden von dan
Genade siner dienste	die er mir enboten hat 
vn– miner swester	sit ez also stat 
daz si lebent mit vrevden	der kvnich vnd sine man 
wand ich doch der mere	gevraget sorgende han
Die zwene ivngem kvnige	die waren ovch nv komen 
si hete disiv mere	 alreste do vernomen 
durch siner swester liebe	die boten gerne sach
Giselher der ivnge	zvo zin do minneclichen sprach
Ir boten sult vns groz	willekomen sin 
ob ir diker woltet	 her riten an den Rin 
ir fvndet hie die vrivnde	die ir gerne moehtet sehen 
iv solte hie ze lande	vil wenich leides geschehen
Wir triwen iv aller eren	sprach do Swermlin 
ich chvnde iv niht betivten	mit den sinnen min 
wie rehte minnecliche	 iv Ecel enboten hat 
vn– iwer edele swester	 der dinc in hohen ern stat
Genade vn– triwen		 mant ivch des kvniges wip 
vn– daz ie wege		 iwer herze vn– iwer lip 
vnd ze vordrest dem kvnige	si wir her gesant 
daz ir geruochet riten	in daz Ecelen lant
Daz wir ivch des beten	vil vaste vns daz gebot
Ecel der	iv allen daz enbot 
ob ir voch iwer swester	niht sehen woltet lan 
so wolt er doch gerne wizen	waz er iv hete getan
daz irn also vremdet	vn– ovch sine lant 
ob iv div kvniginne	wer nie mer bekant 
so moht er doch verdienen	daz ir in geruochet sehen 
swenne daz ergienge	so wer im liebe geschehen
Do sprach der kvnich Gvnther	 vber dise siben naht
do kvnde iv div mere	wes ich mich danne bedaht
mit den minen vrivnden	die wile svlt ir gan
in iwer herberge	vn svlt vil guote riwe han
Do sprach aber Werblin	 vn– mohte daz geschehen 
daz mine vrovwen	 ê kvnden gesehen 
voten die vil riken	ê wir schuofen vns gemach	
Giselher der edele	vil harte zvchtechlichen sprach
Daz ensolt iv niemen wenden	vn– welt ir fvr si gan 
ir habet miner mvoter	 willen gar getan 
wan si sihet iv gerne	durch die swester min 
vron Kriemhilte	 ir svlt willekomen sin
Giselher si brahte	da er die vrovwen vant 
die boten sach si gerne	von der Hvnen lant 
si gruoztes minnecliche	durch ir tvgenthaften mvot 
do sagten ir div mere	 die boten hovbis vn– guot	[57a]
Ia enbivtet iv min vrovwe	so sprach Swermlin 
dienst vn– triwe	moehte daz gesin 
daz si iv diche sehe	ir svlt gelovben daz 
so wære ir in der werlte	mit deheinen vriunden baz
Do sprach div kvnigin	 des mach nv niht gesin 
wie gerne ich dike sehe	die lieben tohter min 
so ist leider mir ze verre	des edelen kvniges wip 
im sin immer selich	 ir und Ecelen lip
Ir svlt mich lazen wizzen	ê irz gervomet hie 
wenne ir wider wellet	 ine gesach so gerne nie
boten in langen ziten	 danne ich iv han gesehen	
die knappen ir do lobeten	daz si daz liezen geschehen
Zen herbergen fuoren	 die von Hunen lant 
do het der kvnich riche	nach vrivnden sin gesant 
Gvnther der edele	 der vragte sine man 
wie in die rede geviele	vil maniger sprechen do began 
daz er wol mohte riten	 in Ecelen lant 
daz rieten im die besten	di er darvnder vant 
ane Hagnen eine		dem was ez grimme leit 
er sprach ce dem kvnige tovgen	 ir habt iv selben widerseit
Nv ist iv doch gewizzen	 waz wir haben getan 
wir mvgen in ir sorge	 zuo Kriemhilte han 
wan ich sluoch ze tode	 ir man mit miner hant 
wie getorsten wir geriten	in daz Ecelen lant
Do sprach der kvnich rike	 min swester lie den zorn
mit chusse minnechliche	si hat vf vns verchorn
daz wir ie getaten	ê daz si hinnen reit	
enzsi et Hagne	 iv eim widerseit
Nv lat iv niht betriegen	sprach Hagne	swes si halt iehen 
die boten von den Hvnen		 welt ir Criemhilte sehen 
ir mvget wol da verliesen	 die ere vnd ovch den lip 
ez ist vil lanchreche	 des kvniges Ecelen lip
Do sprach zuo dem rate	der furste Gernot 
sit ir da von schvlden	furhtet da der tot
in Hvnischen riken	 solten wirz darvmbe lan 
wirn sehen vnser swester	daz were vil vbele getan
Do sprach der fvrste Giselher	zvo dem degne 
sit ir iv schvldech wizzet	vrivnt <Hagene> 
so svlt ir beliben	vnd ivch vil wol bewarn 
vn lazet die geturste gen	zvo miner swester mit vns varn
Do begvnde zvrnen		von Troni der degen 
in wil nicht daz ir fuoret	iemen vf den wegen 
der geturre riten	 mit iv ze hove baz 
sit ir niht welt erwinden	ich sol iv wol erzeigen daz
Do sprach der kvchenmeister	Rvmolt der degen 
der vremden vnd der kvnden	moht er wol heizen pflegen 
nach iwer selbes willen	wand ir habet vollen rat 
ich wene niht daz Hagene	 iuch noch vergiselet hat
Welt ir niht volgen Hagnen	iv retet Rvmolt 
wand ich iv bin mit triwen	dienstlichen holt	[57b]
daz ir hie svlt beliben	durch den willen min– 
vn– lat den kvnich Ezelen	dort bi Chriemhilt sin
Wie chond iv in der werlte	immer samfte wesen 
ir mvget vor iuren vienden	harte wol genesen 
ir svlt mit guoten cleideren	zieren wol den lip 
trinket win den besten	vn– minnet wetlichiv wip
Darzvo git man iv spise	die besten die ie gewan
in der werlte kvnic deheiner	ob des niht moehtet ergan 
ir soltet noch beliben	 durch iwer schoene wip 
ê ir so kintliche	soleet wagen den lip
Des rat ich iv beliben	rich sint iwer lant 
man mach iv baz erlosen	hie heime div phant
danne da zen Hvnen	wer waiz wie ez da stat 
ir svlt beliben	herre	daz üst der Rvmoldes rat
Wir wellen niht beliben	sprach do Gernot 
sit daz vns min swester	 so vrivntliche enbot
vn– Ecele der riche	zwi solte wir daz lan 
der dar niht gerne welle	der mac hie heime bestan
Des antwurte Hagne		 lat ivch vnbilden niht
mine rede darvmbe		swie halt iv geschihet 
ich rat iv an den triwen	welt ir iv bewarn 
so svlt ir zvo den Hvnen	 vil werlichen varn
Sit ir niht wellet erwinden	so besendet iwer man 
die besten die ir vindet	oder indert mvget han 
so wel ich vz in alolen	tvsent riter gvot 
so mag iv niht gewerren	der argen Kriemhilte mvot
Des wil ich gerne volgen	sprach der kvnich zehant 
do hiez er boten riten	 wite in siniv lant 
do braht man der helde	driv tvsent oder mer 
sin wanden niht zerwerben	also grozlichiv ser
Si riten vroliche	in Gvnthers lant 
man hiez in allen geben	ros vnd ovch gewant 
die da varen solten	von Burgonden lant 
der konic mit guoten willen	do vil manigen guoten riter vant
Do hiez von Troni Hagne	 Dancwart den bruoder sin
ir beiden reken ahzech	 fueren an den Rin 
die komen riterliche	harnas vn– gewant
fuorte die vil snelle	in daz Gvnthers lant
Do kom der kuene Volker	ein edel spilman 
zvo der hovereise	mit drizech siner man 
die heten solich gewete	ez mohte ein kvnic tragen 
daz er zen Hvnen wolte	 daz hiez er Gunthere sagen
Wer der Volker were	 daz wil ich iv wizzen lan 
er was ein edel herre	 im was ovch vndertan
vil der guoten reken	 in Burgonden lant 
durch daz er <vidlen> chonde	was er der spilman genant
Hagne welte tvsent	die het er wol bekant
was in starken sturmen	hete gefruomet ir hant 
oder swaz si ie begiengen	des het vil gesehen 
den kvnde anders nieman	niwan vrumechait iehen [58a]
Die bote Kiemhilte	vil sere da verdroz 
wan ir wort ze ir herren	div was harte groz 
si gerten tegeliche	vrlovbes von dan 
des engvnde in niht Hagene	daz was durch liste getan
Er sprach zuo sime herren	 wil svln daz wol bewarn 
daz wir si lazen riten	ê daz wir selbe varn
dar nach in siben nahten	in Ecelen lant 
treit vns iemen argen willen	daz wirt vns dester baz erchant
Son mach ovch sich vro Kriemhilt	bereiten niht darzvo	
daz vns durch ir rete	iemen schaden tuo 
hat aber si den willen	ez mag ir leide ergan 
wir fueren mit vns zvo den Hvnen	so manigen vzerwelten man
Silt vn– setele	vn– allez ir gewant 
daz si fueren wolten	in Ecelen lant 
daz was nv gar bereit	vil manigem kuenen man 
die boten Kriemhilte	hiez man fur Gvntheren gan
Do die boten komen	do sprach Gernot 
der kvnich wil des volgen	daz vns Ezel her enbot 
wir wellen komen gerne	zvo siner hohgezit
vn– sehen vnser swester	daz ir des ane zwivel sint
Do sprach der kvnich Gvnther	kvnnet ir vns alle gesagen 
wenne si die hohcit	oder in welhen tagen	
wir dar komen solden	do sprach Swermlin 
zen nehsten svnewenden	sol si vil werlichen sin
Der kvnich in erlovbte	des was noch niht geschehen 
ob si wolten gerne	 vron Prunhilte sehen 
da si fuor si solten	mit sinen willen gan 
daz vnderstuont do Volcher	 daz was ir liebe getan
Ian ist min vrovwe Prunhilt	nv niht so wol gemvot 
daz ir si muget schovwen	sprach der riter guot 
bitet vns morgen	so lat mans doch sehen	
do sis wanden schovwen	 do kvndes niht geschehen 
Do liez der furste riche	er was den boten holt	
durch sin selbes tvgende	tragen dar sin golt
vf den breiten schilten	 der mohter vil han 
ovch wart in richiv gabe	von vriunden getan
Giselher vnd Gernot		Gere vn– ovch Ortuwin 
daz si ovch milte waren	daz taten si wol schin 
also riche gabe	 si buten die boten an 
daz sis vor ir herren	nie getorsten enphahen
Do sprach zuo dem kvnige	der bote Swermlin 
her kvnich	lat iwer gabe	hie ce lande sin 
wir mvgen ir doch niht fuoren	min herre ez vns verbot 
daz wir iht gabe nemen	 ovch ist ez harte luzzel not
Do wart der vogt von Rine	da von vil vngemvot 
daz si versprechen wolten	so riches kvniges gvot 
do mvosten si enphahen	 sin golt vnd sin gewant 
daz si mit in fuorten	sit in Ecelen lant
Si wolten sehen voten	 ê daz si schieden dan 
Giselher der iunge	 braht die spileman
vor siner mvoter voten	die vrovwe enbot do dan
swaz si eren hete	daz wer ir liebe getan	[58b]
Do hiez div kvniginne	ir boten vnd ir golt
geben durch Kriemhilde	wan der was si holt 
vn– durch den kvnich Ecelen	den selben spilman 
si mohtenz gerne enphehen	ez was mit triwen getan
Vrlovp genomen heten	die boten nv von dan 
von mannen vnd von wiben	vrolich	als ich nv sagen kan 
si fuoren vnz in Swaben	daz hiez si Gernot
si beleiten sine helde	daz ez in niemen missebot
Do sich die von in schieden	die ir da solden phlegen 
div Ecelen herschaft	si vrideten vf allen wegen 
des nam in nieman	ros noch ir gewant 
si ilten harte balde	in daz Ecelen lant
Swa si friunde westen	daz taten si den kvnt 
daz die von Burgonden	in vil kvrcer stvnt
komen her von Rine	in der Hvnen lant 
dem bischof Piligrime	wart daz mer ovch bekant
Do si fur Bechlaren	die straze nider riten 
man seit ez Ruedigere	 daz wart niht vermiten	
vn– vron Gottelinde	des marchgrauen wip 
daz si sehen solde	des wart vil vrolich ir lip
Gahen mit den meren	sach man die spilman 
Ecelen si fvnden	in siner stat ze Bran 
dienst vber dienste	man in vil enbot 
seiten si dem kvnige	vor liebe wart er vrevden rot
Do div kvniginne	div mere rehte ervant 
daz ir bruodere solden	komen in daz lant 
do was ir wol ze mvote	si londe die spilman
mit vil grozer gabe	daz was ir ere getan
Si sprach	nv saget beide	Werbel vn– Swamlin 
welle mine mage	zer hochcit willen sin 
der besten die wir ladeten	her in dize lant 
nv saget	waz redet Hagne	do er div mere bevant
Er chom zvo der sprache	an einem morgen fruo 
lucel guoter spruche	redet er darzvo 
do si die reise lobten	her in Hvnen lant 
daz was dem grimmen Hagne	gar zem tode genant
Ez koment iwer bruedere	die kvnige alle dri 
in herlichem mvote	 swer mer darmite si 
der mere ich endeclichen	nine kan 
ez lobte mir mit miten	Volker der spileman
Des enber ich harte lihte	sprach des kvniges wip 
daz ich immer hie gesehe	 den Volkers lip 
Hagnen bin ich wege		der ist ein helt guot 
daz wir in hie sehen mvozen	des stat hohe mir der mvot
Do gie div kvniginne	 da si den kvnich sach 
wie rehte minnecliche	vrov Kriemhilt do sprach 
wie gevallet iv div mere	vil lieber herre min 
des ie min wille gerte	 nv sol daz gar verendet sin
Din wille der ist min vreude	sprach der kvnich do 
nie wart miner selbes mage	 nie so rehte vro 
ob si immer komen solten	 her in miniv lant 
durch lieber diner vreude	so ist min sorge verswant	[59a]
Des kvniges amplûte		 die hiezen vber al
mit gesidelen richen		palas vn– sal
gen den lieben gesten	 die in da solten chomen 
sit wart von in dem kvnige	vil michel weinen vernomen

v lazen daz beliben	wie si gebaren hie 
hochgemvoter reken	die gefuoren nie
so rehte herlichen	 in deheines kvniges lant 
si heten swaz si wolten	beide wafen vn– gewant
Der vogt von dem Rine	cleidete sine man 
sechzech vn– tvsent	als ich vernomen han	
vn– nivn tvsent chnehte	gen der hohcit 
die si da heime liezen	die beweint ez sit
Do truoch man daz gereite	ze Wormez vzer den hof 
do sprach da von Spire	ein alter bischof
zvo der schoenen voten	 vnser vruvnde wellent varn
gen der hohcite	got mvose si da bewarn
Do sprach zuo zir kinden	div edele vote 
ir soltet hie beliben	helde guote 
mir ist getrovmet hint	 von engestlicher not 
wie allez daz gefuegele	 in disme lande were tot
Swer sic an trovme wendet	 sprach do Hagne 
der enweiz der rehten mere	niht ze sagene 
wenne ez im zen eren	 volleclichen ste 
ich wil daz min herre	ze hove nach urlovbe gê
Wir svln vil gerne riten	in Ecelen lant 
da mag wol dienen kvnige	guoter helde hant 
da wir da schovwen mvozen	Criemhilt hohcit	
Hagne riet die reise	idoch <gerov> ez in sit
Er hetez widerraten	wan daz Gernot
mit vngefuoge	im also missebot 
er mant in Sifrides	<vrov> Kriemhilt man 
er sprach	da von wil Hagne	die groze hovereise lan
Do sprach von Trony Hagne	 durch vorhte ich niht entvo 
swenne ir gebietet	helde	so svlt ir grifen zvo 
ia rite ich mit iv gerne	in Ecelen lant	
sit wart von im <verhavwen>	manich helm vn– rant
Div schif bereitet waren	da was vil manic man 
swaz si cleider heten	die truoch man dar an 
si waren vil vnmuozech	 vor abendes zit 
si huoben sich von hvse	vil harte vroliche sit
Die gecelt vn– ovch die hutten	spien man an daz gras
anderthalp des Rines	da daz geseze was 
den kvnich bat noch beliben	sin vil schoenes wip 
sie truote noch des nahtes	den sinen wetlichen lip
Bvsunen fleutieren	huob sic des morgens fruo 
daz si varen solden	 do grifen si do zvo 
swer liep hete an arme	der trivte vrivndes lip 
des schit sit vil mit leide	des kvniges Ecelen wip
Div kint der schoenen voten	die heten einen man 
kuone vn– getriwen	do si do wolten dan 
do sagt ez dem kvnegen	sinen mvot	[59b]
er sprach	des mvoz ich truoren	daz ir die houereise tuot
Er was geheizen Rumolt		vn– was im helt zer hant 
er sprach	wem welt ir lazen	lûte vnd ovch div lant 
daz nieman kan erwenden		iv reken iwern mvot 
Kriemhilte mere		nie geduhten mich guot
Daz lant si dir bevolhen	vn– ovch min kindelin 
vn– diene wol den vrovwen	 daz ist der wille min 
swem dv sehest weinen	dem troste sinen lip 
ia tvot vns nimmer leide	 des kvnic Ecelen wip
Div ros bereitet waren	 den kvnigen vn– ir man 
mit minneclichem kvsse	schiet vil maniger dan 
dem in hohen mvote	 lebete do der lip 
daz muose sit beweinen	 vil manich wetlich wip
Do man die snellen reken	sach zen rossen gan 
do kos man vil der vrowen	trurichlichen stan 
daz ir vil langez scheiden	seite in wol der mvot 
vf grozen schaden ze komen	daz herze nieman sampfte tuot
Die snellen Bvrgonden	sich vz huoben 
do wart in dem lande	ein michel voben 
beidenthalp dr berge		weinde wip vn– man 
swe dort ir volch tete	 si fuoren vrolich dan
Die Niblvnges helde	komen mit in dan
in tvsent halspergen	die heime heten lan
manige schoene vrovwen	die si gesahen nimmer me 
Sifrides wunde	taten Kriemhilde we
Do schichten si die reisen	gen dem Movme dan 
vf durch Ostervranchen	 die Gvnthers man 
dar leitete sich Hagne	dem was ez wol bekant 
ir marschach was Dancwart	der helt von Burgonden lant
Do si von Ostervranken	gen Swanevelde riten 
da mohte man si kiesen	an herlichen siten 
die fursten vnd ir mage	die helde lobesam 
an dem zwelften morgen	 der kvnich zer Tuonovwe kom
Do reit von Troni Hagne	zaller vorderost 
er was den Niblvngen	ein helflicher trost 
do erbeizte der degen kûne	nider vf den sant 
sin ros er harte balde	zvo eime bovme gebant
Daz wazzer was engozzen	vn– div schif verborgen 
ez ergie den Niblvngen	zen grozen sorgen 
wie si komen vbere	 der wal was in ze bereit 
do erbeizte zvo der erden	vil manich riter gemeit
Leide	so sprach Hagne	mac dir hie wol geschehen	
vogt von dem Rine		nv maht dv selbe sehen 
daz wazzer ist enegozzen	vil starch ist im sin fluot 
ia wen wir hie verliesen	noch hivte manigen reken guot
Waz wizet ir mir	Hagne	sprach der kvnic her 
durch iwers selbe tvgende	<vntrostet> vns niht mer 
den fvrt svlt ir vns svochen	hinvber an daz lant 
daz wir von hinnen bringen	beide ros vnd <ovch> gewant 
Ja enist mir	sprach Hagne	min leben niht so leit 
daz ich mich welle ertrenken	in disen vnden breit 
ê sol von minen handen		ersterben manich man [60a]
in Ecelen landen		 des ich vil guoten willen han
Belibet bi dem wazzer	ir stolzen riter guot 
ich wil die vergen suochen	selbe bi der fluot 
die vns bringen vbere	in Gelpfrates lant	
do nam der starke Hagne	sinen guoten schildes rant
Er was wol gewafent	den schilt er dannen truoch 
sinen helm vf gebvnden	lieht was er genvoc 
do truoch er ob der brunne	ein wafen also breit 
daz ze beiden eken	vil harte vreislichen sneit
Do suohte er nah den vergen	wider vn– dan 
er horte wazzer giezen	losen er began 
in einem schoenen brvnnen	taten daz wisiv wip 
die wolten sich da kûlen	vn– badeten iren lip
Hagne wart ir innen	er sleich in tovgen nach 
do si daz versvnnen	do was in dannen gach 
daz si im entrunnen	des waren si vil her 
er nam in ir gewete	der helt schadete in niht mer
Do sprach daz eine merwip	 Hadburch was si genant 
edel riter Hagne	wir tvon dir hie bekant 
swenne ir vns gebet wider	vnser gewant 
wie iv ce den Hvnen	 iwer houereise ergant
Si swebten sam die vogele	vor im vf der fluot 
des hugten im ir sinne	starch vn– <gvot> 
swaz si im sagen <wolden>	er gelaubete in dester baz 
des er do hin ce in do gerte	wol beschieden si im daz
Si sprach	ir mvget wol riten	in Ecelen lant 
des sece ich iv ce burgen	 min triwe hie ze hant 
daz helde nie gefuoren	in deheiniv riche baz
nach also grozen eren	nv gelovbee werlichen daz
Der rede was do Hagne	in sime herzen her 
do gab er in ir kleider	vn– svmte sich niht mer 
do si an geleiten	ir wunderlich gewant 
do sageten sim rehte	die reise in Ecelen lant
Do sprach daz ander merwip	 div hiez Siglint 
ich wil dich warnen	Hagne	Aldrians kint 
durch der wete liebe	 hat min mvome dir gelogen 
kvmstv cen Hunen		 so bistv sere betrogen
Ia soltu wider keren	daz ist an der zit	
wan ir helde kuone	 also geladen sit 
daz ir sterben muozet	in Ecelen lant 
swelhe dar geritent	die habent den tot an der hant
Do sprach aber Hagne	 ir trieget ane not 
wie mohte ez sich gefuegen	daz wir alle tot
solden da beliben	 durch iemans haz	
si begvnden im div mere	sagen kvntlicher baz
Do sprach aber div eine	 ez mvoz also wesen 
daz iwer einer	 chan da niht genesen 
niwan des kvniges kapelan	daz ist vns wol bekant 
der kvmt gesunt widere	in Gunthers lant
Do sprach in grimmem muote	der kuene Hagne	[60b]
daz were minen herren	muolich ce sagene 
daz wir zen Hvnen solden	verliesen alle den lip 
nv ceig vns vberz wazzer	allerwisete wip
Si sprach	sit dv der verte	niht wellest haben rat 
swa oben bi dem wazzer		ein herberge stat 
darinne ist ein verge	vnd nindert anderswa	
der mere der er vragte	der gelovbet er sich da
Dem vngemvoten reken	 sprach div eine nach 
nv bitet noch	er Hagene	ia ist iv gar ze gach 
vernemet noch baz div mere	wie ir komet vber sant 
dirre march herre	der ist Else genant
Sin bruoder der ist geheizen	der degen Gelpfart 
ein <herre> in Beierlande	vil mvelich ez iu stat 
welt ir durch sine marke	 ir svlt ivch wol bewarn
vn– sult ovch mit den vergen	vil bescheindenlichen varn
Der ist so grimmes mvotes	der lat ivch niht genesen 
irn welt mit guoten sinnen	bi dem helde wesen 
welt ir daz er ivch fuere	so gebet ir im den solt 
her huetet disses landes	 vn– ist Gelfrate holt
Vn– chomet er niht	ecite	so ruefet vber fluot
vn– iehet ir haizet Amelrich	des was ein helt gvot
der durch veintschefte	 ruomte dize lant 
so chvmet iv der verge	 swenne im der name wirt erkant
Der ubermvote Hagne	 den vrovwen do neich 
er en reite niht mere	 wan daz er stille sweich 
do gie er bi dem wazzer	hoher an den sant 
da er anderthalben	 ein herberge vant
Er begvnde ruofen	vaste vber die fluot 
nv hol mich hie	verge	sprach der degen guot 
so gib ich dir ze miete	 von golde einen bovc vil rot 
ia ist mir dirre verte	 werlichen not
Der verge waz so riche	daz er niht dienen zam 
da von er lon vil selten	von ieman da genam 
ovch waren sine chnehte	vil hohe gemvot 
noch stvont allez Hagne	 hie dishalp der fluot
Do ruoft er mit der kefte	daz al der wac erdoz
von des heldes sterke	div was michel vn– groz 
nv hol mich Almerichen	ich bin der Eisen man 
der durch starke vintschaft	von disem lande entran 
Vi hohe an eime swerte	ein bovc er im do bot	
lieht vn– schoene	 was er vol goldes rot	
daz man in vber fuorte	in Gelphates lant 
der vbermvote verge	nam selbe daz ruoder an die hant
Ovch was der selbe schifman	mvolich gesit 
div gir nach grozem guote	vil boser ende git 
do wolt er verdienen	daz Hagnen golt vil rot 
des leit er von dem degne	den swertgrimegen tot
Der verge fuor genote	 hinvber an den sant 
den er dannen horte	do er des niht envant 
do zvrnt er erliche	 do er Hagnen sach	[61a]
vil harte grimmeclichen	er do zuo dem helde sprach
Ir mvget wol sin geheizen	bi namen Amerlich 
des ich mich hie verwene	 den sit ir vngelich 
von vater vnd von mvoter	was er der bruoder min 
nv ir mich betrogen habet	ir mvoset dishalben sin
Nein	durch got den richen	sprach do Hagne 
ich bin ein vremder reke	 vn– sorge vf degene 
nv nemt hin vrivntliche	 minen solt 
daz ir mich vber fuoret		ich bin iv werlichen holt
Do sprach aber der verge	 desen mach niht gesin 
ez habent viende	 die lieben herren min 
darum ich niemen vremden	 fuor in dize lant 
so lieb dir si ze lebene	so trit vil balde vz an daz lant
Nvn tuot des niht	sprach Hagne	trûrich ist min mvot 
nemt von mir ze minnen		dize golt vil gvot 
vn– fuerent vns vber tvosent ros	vn– also manic man	
do sprach der grimme verge		daz wirdet nimmer getan
Er huop ein starkez ruoder	 michel vn– breit 
er slvoch vf Hagenen		 des wart er vngemeit	
daz er in dem schife	struhte an siniv knie 
so rehte grimmer verge	kom zvo dem Troniære nie
Do wolt er baz erzvrnen	den vbermvoten gast 
er sluoch im ein schalten	daz div gar zerbrast 
Hagnen vber hovbet		er was ein starker man	
da von der Eisen verge	den grozen schaden gewan
Mit grimmegem mvote	greif Hagne zehant
vil balde ze einer schaide	da er ein wafen vant 
er sluoch im ab daz havbet	vn– warf ez an den grunt 
div mere wurden schiere	den Burgonden kvnt
In den selben stvnden	da er den schifman sluoch 
daz schif floz enovwe	 daz was im leit genvoch 
ê erz gerihte widere	mveden er began 
do zoch vil kreftecliche	des kvnich Gvnthers man
Mit zvgen harte swinden	kerte ez der gast 
vnz im daz starche ruoder	an siner hant cebrast 
er wolde zvo den reken	 vz an einen sant 
da was da heinz mere	hei wie schiere erz gebant
mit eime schiltvezzel	das was ein borte smal 
gegen eime walde	 kerte er hin zetal 
do wand er sinen herren	an dem stade stan 
do gie im hin enkegene	manic wetlicher man
Mit gruoze im wol enphiengen	die edelen riter guot 
do sahens in dem schiffe	riechen daz bluot
von einer starken wunden	die er den vergen sluoc 
do wart von degnen	 Hagne gevraget genvoc
Do der kvnich Gvnther	daz heize bluot ersach
sweben in dem schife	balde er do sprach 
saget mir	her Hagne	war ist der verge komen 
iwer starkez ellen	wen im den namen hat benomen
Do sprach er lovgenliche	 da ich daz schif vant [61b]
bi einer wilden widen	 da lostez min hant 
ich han deheinen vergen	hivte hie gesehen 
ez ist ovch niemen leide	von minen schulden geschehen
Do sprach von Burgonden	der herre Gernot 
hivte mvoz ich sorgen	vf lieber vriunde tot 
sit wir der schiflivte	niht bereit han 
wie wir komen vbere	des mvoz ich trûrich gestan
Lûte rief do Hagne	 leget nider vf das gras 
ir knehte	daz gereite	ich gedenke daz ich was
der aller beste verge	den man bi Rine vant 
ia trovwe ich ivch wol bringen	vber in Gelfrates lant
Daz si deste balder	 komen vber fluot 
div ros si an slvogen	der swimmen daz wart guot 
wan der starken vnden	deheinz in da benam 
etlichez ovwete	als im div muede gezam
Do truogen si ze	scife	 ir golt vnd ovch ir wat 
sit si der verte	niht mohten haben rat 
Hagne der was meister		des fuorer vf den sant
vil manigen zieren reken	in daz vnkvnde lant
Zem ersten braht er vber	 tvsent riter her 
darzuo sine reken	 dannoch was ir mer 
nivn tvsent knehte	fuort er an daz lant 
des tages was vnmuozich	des kuenen Troniares hant
Do er si wol gesvnde	brahte vber vluot 
do gedahte vremder mere	der snelle degen guot 
div im ê seiten	div wilde merwip 
des hete des kvniges kapelan	nach verlorn den lip
Bi dem kapelsovme	 er den pfaffen vant 
ob dem heilictvme	er leinte an siner hant 
des mohte er niht geniezen	do in Hagne sach 
der gotes arme priester	mvose liden vngemach
Er swanc in vz dem scheffe	darzvo wart im gah 
do riefen ir genuoge	 nv vaha	here	vah	
Giselher der iunge	zvrnen erz began 
ern woltez doch niht lazen	eren het im leide getan
Do sprach von Burgvnden	 der herre Gernot 
waz hilfet ivch nv	Hagne	des kapelans tot 
tetez ander ieman	 ez solt iv wesen leit 
vmb welhe schvlde	 habet ir dem priester widerseit
Der pfaffe swam genote	er wolte sein genesen 
ob im ieman hvlfe	 des mohte do niht wesen 
wan der starke Hagne	vil zornich was sin mvot 
er stiez in zvo dem grvnde	daz endvhte nieman gvot
Do der arme phaffe	der helfe niht ensach 
do kert er wider vbere	des leit er vngemach 
swie er niht swimmen kvnde	im half div gotes hant 
daz er kom gesvnder	 hin wider vz an daz lant
Do stuont der arme priester	vnde svochte sine wat 
da bi sach wol Hagne	daz sin niht wære rat 
daz im fur mere sagten	div wilden merwip	[62a]
er dahte	dise degene	die mvozen verliesen den lip
Do si daz schif entluoden	vn– gar getruogen dan
swaz dar vffe heten	 der drier kvnige man 
Hagne ez sluoch ze stvken	vn– warf ez an die fluot 
des hete michel wunder	 die reken kuene vn– guot
Zwiv tuot ir dar	bruoder	so sprach <Dancwart> 
wie svln wir komen vbere	so wir die widervart
riten von den Hvnen		ze lande an den Rin	
sit do sagt im Hagne	 daz des kvnde niht gesin
Do sprach von Troni Hagne	 ich tvonz vf den wan 
ob wir an diser reise	deheinen zagen han 
der vns entrinnen welle	durch zegliche not 
der muoz an disem wege	 liden schemlichen tot
Si fuort mit in einen	vz Burgonden lant 
zvo sinen handen einen helt	der was Volcher genant 
der reite spiheliche	allen sinen mvot 
swaz ie begie Hagne	daz duhte den videlere guot
Ir ros bereitet waren	ir sovmer wol geladen 
si hete an der verte	noch deheinen schaden
genomen des si mvote	wan des chvniges kapelan 
der muose vf sine fuoze	hin wider zuo dem Rine gan

o si nv waren alle	komen vf den sant 
der kvnich begvnde vragen	 wer sol vns durch din lant
die reken wege wisen	 daz wir niht irre varn	
do sprach der starke Volker	 daz sol ich eine bewarn
Nv enthalt iv	sprach sagne	ritter vn– kneht 
man sol vriunden volgen		ia dunchet ez mich reht 
vil vngefuoge mere		 die tuon ich iv bekant 
wiren komen nimmer mere	wider in der Burgonden lant
Daz sagten mir zwai merwip	hivte morgen fruo 
daz wir niht komen widere	nv rat ich waz man tvo 
daz ir iuch wafent	helde	 ir svlt iuch wol bewarn 
wir haben hie starke viende	 daz wir gewerlichen varn
Ich wande an lvge vinden	 div wisen merwip 
si ialhen daz gesvnder	vnser deheines lip
nimmer ce lande keme	 niwan der kappelan 
darvmbe ich in so gerne	wolte hivte ertrenket han
Do flvgen dise mere	von schare baz ze schare 
des wurden snelle	helde missevare 
do si begvnden sorgen	uf den herten tot
an dirre hovereise	des gie in werlichen not
Da ce Moringen	si waren vber komen 
da dem Elsen vergen	der lip was genomen 
do sprach aber Hagne	 sit daz ich vinde han
verdienet vf der straze	wir werden scherliche bestan
Ich sluoc den selben vergen	hivte morgen fruo 
si wizen wol div mere	 nv grifet balde zuo 
do Gelfrat vn– Else	hivte hie beste
vnser ingesinde	daz ez in schedilich erge
Iich erkenne si so kuene	ez wirdet niht verlan	[62b]
div ros svlt ir lazen	dester samfter gan 
daz des iemen wene	wir fliehen vf den wegen	
des rates wil ich volgen	so sprach Giselher der degen 
Wer sol daz gesinde	wisen hin vber lant	
si sprachen	daz tuo Volker	dem ist ez hie wol bekant
stige vn– straze	der kuene spilman	
ê daz man vollen gerte	man sach wol gewafent stan
den snellen videlere	 den helm er vf gebant 
in herlicher varwe	was sin wicgewant 
er bant ovch zeime schafte	ein zeichen	daz <was>	rot 
sit chom er mit den kvnigen	in ein vreisliche not
Do was tot der vergen	Gelpfrate chomen
mit wisen meren	 do het ez ovch vernomen
Else der vil starke	ez was in beiden leit 
si sanden nach ir helden	die waren vil schiere bereit
In vil kvrzcen citen	ich wil iv horen lan	
sach man zuo cin riten	die schaden heten getan
in starken vrlevgen	 vil vngefuege schar 
der komen Gelpfraten	wol siben hvn–dert <ce> helfe dar
Do si grimmen vienden	begvnden riten nach 
ia leiten si ir herren	den was ein teil ze gah
nach den kuenen gesten	si wolten anden ir zorn 
des wart der herten vrivnden	sider mer verlorn
Do het von Trony Hagne	wol gefueget daz	
wie mohte siner mage	 ein helt gehueten baz	
er pflach der nachhûte	mit den sinen man
vn– Dancwart sin bruoder	daz was vil willichlic getan
In was des tages zerrvnnen	desen heten si niht mer 
er vorht an sinen vrivnden	leit vn– ser 
si riten vnder schilten	durch der Beier lant 
darnach in churzer wile	die helde wurden an gerant
Beindenthalp der straze	vn– hinden vaste nach
si horten huove claffen	dem livte was so gach 
do sprach der kuene Dancwart	 man wil hie bestan 
nv binden vf die helme	daz ist ræhlich getan
Si hilten ab ir verte	als mvose sin 
si sahen in der vinster	der liehten schilde schin 
done wolte Hagene	 niht langer si verdagen 
wer iach vns vf der straze	daz mvoz im Gelpfart do sagen
Do sprach der marchgraue		uzer Beierlant 
wir suochen vnser viende	 vn– haben her nach gerant 
ich enweiz niht wer mir hivte	minen vergen sluoch 
der was ein helt zen handen	 des ist mir leide genuoch
Do sprac von Troni Hagne		 was der verge din 
der wolte vns niht fuoren	des ist div schvlde min 
do sluoch ich den reken	 daz ist war des gie mir not 
ich hete von sinen handen	nach den grimmigen tot
Ich bot im ze miete	golt vnd ovch gewant 
daz er vns uber fuorte	helt	in din lant 
daz zvrner so sere	 daz er mich do sluoch [63a]
mit einer starken schalten	des wart ich grimme genvoc
Do chom ich zvo dern swerte	vn– wert in sinem zorn
mit einer starken wunden	des wart der helt verlorn 
daz bringe ich iv ze suone	swie iuch dvnket guot	
do gie ez an ein striten	si waren herte	emvot
Ich wesse wol	sprach Gelpfrat	do hie fur gereit
Gvnther vn– sin gesinde		daz vns tete leit
Hagne von Tronie		nu sol er niht genesen 
fur des vergen hende	der helt mvoz hie bvrge wesen
Si neigeten vber schilte	ze stichen nv div sper 
Gelpfrat vn– Hagne	 in was ze ein ander ger 
Else vn– Dancwart		vil herlichen riten 
si versuochten wer si waren	 da wart vil grimme gestriten
Wie mohten sich versuochen	immer helde baz 
von einer starken tyost	 hinder daz ros gesazen
Hagne der kuene		 von Gelpfrates hant 
im brast daz furbuege	des wart im striten bekant
Von ir ingesinde	des crafth der schefte schal 
do erholte ovch sich dort Hagne	da er was zetal
komen von dem stiche	 nider vf daz gras 
ich wene er vnsampftes mvotes	 wider Gelpfraten was
Wer in div ros behielte	daz ist mir vnbekant 
si waren zuo der erden	 komen vf den sant 
Hagne vn– Gelpfrat	 ein ander liefens an 
des hvlfen ir gesellen	daz in wart striten kvnt getan
Swie biterlichen Hagne	zvo Gelfrate spranc 
der edele marchgraue	des schiltes hin im swanc
ein vil michel stuche	daz fuor drate dan 
des was vil nah erstorben	des kvnich Gvntheres man
Do begvnde er ruofen	 Dancwarten vil vaste an 
hilfa	lieber bruoder	ia hat mich bestan
ein helt zuo sinen handen	deren lat mich niht genesen	
do sprach der kuene Dancwart	<des>	sol ich	scheider wesen
Der helt do spranch dar naher	vn– sluoc im einen slac
mit eime scharphen wafen	davon er tot gelac 
Else wolte do gerne	 reken do den man 
er vn– sin gesinde	 si schieden schedelichen dan
Im was erslagen der bruoder	 selbe wart er wunt 
wol ahzech siner degne	beliben da zestvnt
mit dem grimmen tode	 der herre mvose dan
fluhticlichen wenden	von den Gvnthers man
Do die von Beierlande	wichen vz dem wege 
do horte man nach hellen	die freislichen slege 
do iagten die von Tronie	ir vienden nach 
di si niht enkelten wanden	was allen ze gah
Do sprach an ir fluhte	Dancwart der degen 
wir svln wider wenden	balde vf disen wegen
vn– laze wir si riten	si sint von bluote naz 
gahen wir zen vriunden	ich rate werlichen daz
Do si hin wider komen	da der schade was geschehen	[63b]
do sprach von Troni Hagne	 helde ir svlt besehen
wes vns hie gebreste	oder wen wir han verlorn
hie in disem strite	durch den Gelfrates zorn
Si heten verlorn viere	die mvosen si verslagen 
die waren wol vergolten	da wider was erslagen
der von Beierlant	hvndert oder baz 
des waren den von Tronie	ir schilte truchen vn– <bluotes> naz
Ein teil schein vz den wolken	des liehten manen prehen 
do sprach aber Hagne		niemen sol veriehen
den minen lieben herren	 waz wir hie haben getan 
lat si vnz morgen	ane sorge bestan
Do si nv nach in komen	di dort striten ê 
do tet dem ingesinde	div muede harte we 
wie lange sul wir riten	des vragte manic man 
do sprach der kuene Dancwart	wir mvgen niht herbergen han
Ir muozet alle riten	vnz ez werde tac	
Volker der snelle	 der des gesindes pflac 
bat den marsalch vragen	 wa sul wir hinte sin 
da gerasten vnser moere	vnd ovch die lieben herren min
Do sprach der kuene Dancwart	 ich en kans iuch niht gesagen 
wir mvgen niht geruewen	enz beginde tagen 
swa wir danne vinden	da legen vns an ein gras	
do si div mere horten	wie leit in svmeleichen was
Si biliben vnuermeldet	des herzen bluotes rot 
vnz daz disiv svnne	 ir liehtez schinen bot
der morgen vber berge	daz ez der kvnich gesach
daz si gestriten heten	der helt vil zorneclichen sprach
Wie nv	frivnt Hagne	iv wene versmahet daz 
daz ich iv bi were	da iv die ringe naz
svs wurden von dem bluote	wer hat daz getan	
er sprach	daz tet Else	der het vns nehten bestan
Dvrch sinen vergen	wir wurden an gerant 
do sluoc Gelfraten	mines bruoder hant 
sid entran vns Else	des twanch in michel not 
in hvndert vn– vns viere	beliben da in strite tot
Wir kvnnen niht bescheiden	wa si sich leiten nider 
al die lantlûte	gefrieschen sider 
daz	ce hove fueren	der edelen voten kint 
si wurden wol enphangen	daz ze Pazzawe sit
Der edelen kvnige oheim	der bischof Pilgrim 
dem wart vil wol ze mvote	do die neven sin	 
mit alse vil reken	komen in daz lant 
daz er in willech were	daz wart in schier bekant
Si wurden wol enphangen	von vriunden vf den wegen 
daz ze Pazzowe	man kvnder niht gephlegen 
si mvozen vber wazzer	da si funden velt 
da wurden vf gespannen	hutten vn– rich gecelt
Si mvosen da beliben	allen einen tac
vn– ovch die naht mit vollen	wie schone man ir pflac 
darnach si mvosen riten	 in Ruedigeres lant	[64a]
den wurden ovch div mere	danach schiere bekant
Do die wegemuoden	 rûwe genamen
vn– si dem lande	nv naher quamen 
do fundens vf der marche	slafende einen man	
dem von Trony Hagne	ein starchez wafen an gewan 
Ia was geheizen Ekewart	der selbe riter gvot 
er gewan darvmbe	 vil trurigen mvot 
daz er verlos daz wafen	von der helde vart 
die Ruediders marke	 fvnden si vbele bewart
Owe mir dirre schande	sprach do Ekewart 
ia riwet mich vil sere	der Burgonden vart 
sit ich verlos Sifriden	sid was min vrevde ergan 
ovwe	herre Rovdiger	 wie han ich wider dich getan
Wol horte Hagne		des edelen reken not 
er gab im wider sin wafen	vn– sehs bovge rot 
die habe dir	helt	ce minnen	daz dv min frivnt sist 
dv bist ein degen kvener	 swie eine dv hie list 
Got lone iv iwer bovge	 sprach do Ekewart 
doch riwet mich vil sere	cen Hvnen iwer vart 
ir slvoget Sifriden	 man ist iv hie gehaz 
daz ir ivch wol huotet	in triwen rate ivch daz
Nv mueze vns got behveten	 sprach do Hagne 
ia hant niht mere sorge	 dise degene 
wan vm die herberge	die kvnige vnd ir man 
wa wir in disem lande	noch heint nah selde han
Div ros sint vns verdorben	vf den verren wegen
vn– spise zerrvnnen	sprach Hagene der degen 
wir vindenz nider veile	vns wer wirtes not 
der vns heint gebe	durch sin tvgent daz brot
Do sprach aber Ekewart	 ich zeig iv einen wirt 
daz ir ze husen selten	baz komen birt
in deheime lande	 als iv hie mac geschehen 
ob ir	snelle degne	welt Ruedigeren sehen
Der sizet bi der straze	vnd ist der beste wirt 
der ie kom ze straze	 sin herze tvgende birt 
alsam der sueze meie	daz gras mit bluomen tvot 
so er sol helden dienen	so ist er vro gemvot
Do sprach der kvnich Gvnther	 welt ir min bote sin 
ob vns welle behalten	durch den willen min
min lieber vriunt Ruediger	 min mage vn– vns man 
daz wil ich immer dienen	so ich aller beste kan
Der bote bin ich gerne	sprach do Echewart 
mit vil guotem willen			 huob er sich an die vart
vn– seite Ruedigere	 als er hete vernomen 
im was in langen ziten	niht so lieber mære komen 
Man sach ce Bechlaren	 ilen einen degen 
selbe erkand in Ruediger	er sprach	vf disen wegen
dort her gahet Ekewart	 ein Kriemhilde man	
er wande daz im die viende	im heten leide getan
Do gie er fur die porte	da er den poten vant	[64b]
daz swert er abe gurte	vn– leitez von der hant 
div mere die er brahte	wurden niht verdaget
den wirt vn– sine vrivnde	ez wart in schiere gesaget
Er sprach cem marchgraven	 mich hat zv iv gesant
Gvnther min herre	von Burgonden lant 
vn– Giselher sin bruoder	vn– ovch Gernot 
der reken ieslicher	iv sinen dienst her enbot
Daz selbe hat ovch Hagene	dar zuo Volker
mit triwen flizeclichen	noch sag ich iv mer 
daz iv des kvniges marsalch	bi mir daz enbot 
daz den guoten knehten	 were iwere herberge not
Mit lachendem mvote	 antwurte Ruediger 
nv wol mich dirre mere	daz die kvnige her
geruochent miner dienste	derin wirt niht verseit 
koment si mir ze huse	des bin ich vrolich gemeit
Dancwart der marsalch	hiez iv wizzen lan
wen ir ze hûse	mit in soldet han 
sehzech sneller reken	vnd tvsent riter guot
vnd nivn tvsent knehte	do wart er vrolich gemvot
Nv wol mich dirre geste	sprach do Ruediger 
daz mir koment ze hvse	dise reken her 
den ich noch vil selten	 iht gedienet han 
nv ritet in enkegene	beide mage vn– man
Do ilten zvo den rossen	ritter vn– kneht 
swaz in gebot ir herre	daz dvhtes alle reht 
do liezens in der dienste	zogen deste baz 
ez wesse niht vrov Goetelint	div in ir kemenaten saz

o gie der marchgraue	da er die vrovwen vant 
sin wip mit siner tohter	vn– seite in zehant
div lieben mere	div er hete vernomen 
daz in ir vrovwen bruedere	da ce hvse solten komen
Vil liebiv trivttinne	sprach do Ruediger 
ir svlt vil wol enpfahen	die edelen kvnige her 
so si mit ir gesinde	her ze hove gan 
ir svlt ovch schoene gruezen	Hagenen	Gvnthers man
Mit in kvmet ovch einer	der haizet Dancwart 
der ander heizet Volker	 an zvhten wol bewart 
die sehse svlt ir kvssen	vnd div tohter min 
vnd svlt ovch bi den reken	in zvhten guetlichen sin
Daz lobeten do die vrowen	vn– waren sin bereit 
si svohten vz den kisten	div herlichen kleit 
darinne si begegene	 den reken wolden gan 
da wart vil michel flizen	von schoenen wiben getan 
Gevelschet vrovwen varwe	 wie lucel man da vant 
si trvogen vf ir hovbten	von golde <liehtiv> bant	
daz waren schapel riche	 daz in ir schoene har
cerfuorten niht die winde	si warn hvbsch vn– clar
<In> solhen vnmvozen	svl wir die vrowen lan 
hie wart vil michel gahen	vber velt getan [65a]
von Ruedigeres vriunden	 da man die fursten vant 
si wurden wol enphangen	 in des marcgrauen lant
Do si der marcgraue	 zuo im komen sach 
ce sinen lieben gesten	vrolichen	er do sprach 
sit willekomen	ir herren	vn– al iwer man
hie in mime lande		vil gerne ich ivch gesach
Do nigem im die reken	mit triwen ane haz 
daz er irn willich were	wol erzeiget er daz 
besvnder gruozter Hagenen	den het er e bechant 
sam tet er Volkeren	vzer Burgonden lant
Er enphie ovch Dancwarten	do sprach der kuene degen 
sit ir uns welt beruochen	wer sol danne plegen
des vnseres ingesindes	daz wir haben braht	
do sprach der marchgraue	 ir svlt haben guote naht
Spannet uf	ir knehte	die hutten an daz velt 
swaz ir hie verlieset	des wil ich wesen gelt 
ziehet abe die zovme	div ros lazzet gan	
daz het in wirt deheiner	da vor uil selten getan 
Des freuten sich die geste	do daz geschafet was 
die herren riten dannen	sich leiten in daz gras
vber al die knehte	si heten guot gemach 
ich wen in an <der> verte	nie so samfte gesach
Div edel marchgrauinne	fur div burch was gegan
mit ir schonen tohter	 do sach man bi ir stan
minnecliche vrowen	vn– manich schoene meit 
die truogen vil der bovge	vn– herlichiv kleit
Daz edel gesteine	 luhte verre dan
vz ir vil richen wete	si waren wolgetan 
do komen ovch die geste	vn– erbeizten sa zehant 
hey waz man grozer zuhte	an den von Burgonden vant
Sex vn– drizech meide	vn– ander manich wip	
den was wol ze wunsche	geschafen der lip	
die giengen in enkegene	mit manigem kuenen man 
da wart schoene gruezen	von edelen wiben getan
Diu iunge marchgrauinne	kuste die kunige alle dri 
alsam tet ir muoter	da stuont Hagne bi 
ir vater hiez in kussen	do blicte si in an 
er duhte si so vorhtlich	daz si ez vil gerne hete lan
Doch mvoste si da leisten	daz ir der wirt gebot 
gemischet wart ir varwe	 si wart bleich vn– rot 
si kuste ovch Dancwarten	 danach den spilman 
durch sines libes ellen	wart in daz gruezen getan
Div iunge marchgrauinne	nam bi der hant
Gyselheren den iungen	von Burgonden lant 
alsam tet ir mvoter	Gvntheren den kuenen man 
si giengen mit den helden	vil harte vrolichen dan
Der wirt gie bi Gernote	in einen witen sal 
riter vn– frovwen	gesazen da zetal 
do hiez man balde schenken	den gesten gvoten win 
ia endorften nimmer helde	baz gehandelt sin	[65b]
Mit lieben ovgen blichen	wart gesehen <an>
Ruedegers tohter	div was so wolgetan 
ia trutes in den sinnen	vil manich riter gvot 
daz kvnd ovch si verdienen	si was uil hohe gemuot
Si gedahten swes si wolten	des moht ab niht geschehen 
hin vn– her wider	 wart da uil gesehen
an meide vn– an vrowen	der saz da genuoch 
der edel videlere	dem wirte holden willen truoch
Nach gewonheite	 so schieden si sich da 
rittere vn– vroewen	die giengen anderswa 
do rihte man die tische	in dem sale wit 
den vnkvnden gesten	man diende herlichen sit
Durch der geste liebe	hin ce tische gie
div edel marchgrauinne	ir tohter si do lie
beliben bi den kinden	da si von rehte saz 
die geste ir niht sahen	si mvote werlichen daz
Do si getrunken heten	vn– gezzen vber al 
do wisete man die kuenen	wider in den sal 
gemehelicher spruche	wart da niht verdeit 
der reite vil do Volker	ein degen kuene vn– gemeit
Do sprach offenlichen	der selbe spilman 
vil richer marchgraue	got hat an iv getan
vil genedichlichen	wan er iv hat	e	eben
ein wip so rehte schoene	darzvo ein wunnichehlichez leben
Ob ich ein furste were	sprach der degen san 
vn– solde tragen krone	 ce wibe wolde ich han
iwer schoene tohter	des wnschet mir der mvot 
div ist minnechliche ce sehene	darzvo edel vn– gvot
Des antwurte Gernot		der wol gezogene man 
vn– sold ich truttinne	nach minem willen han 
so wold ich solhes wibes	immer wesen vro	
des antwurte Hagne	harte zuchtichlichen do
Nv sol min herre Gyselher	nemen doch ein wip 
er ist so hoher mage	 der marchgrauinne lip 
daz wir gerne dienden	ich vn– sine man 
vn– solde si vnder krone	da ze den Burgonden gan
Div rede Ruedigeren	duhte harte gvot 
vn– ovch Gotelinde	ia vreute si in den mvot 
sid truogen an die helde	daz si ce wibe nam
Gyselher der edele	als ez kvnige wol gezam
Swaz sich sol fuegen	 wer mach daz vndersten	
man bat die iunchvrawen	hin ce hove gen 
do swuor man im ze wibe	daz wunnechliche wip 
dobte ovch er ze minnen	ir vil minneclichen lip
Man beschiet der iunchvrowen	burge vn– lant 
des sicherte da mit eiden	des edelen kvniges hant
vn– der herre Gernot	daz wurde daz getan 
do sprach der marchgraue	sid ich der burge niht enhan
so sol ich iv mit triwen	immer wesen holt 
ich gibe zvo miner tohter	silber vn– golt [66a]
so hundert sovmere	meist mvgen tragen 
daz ez den helden	nach eren mvge wol behagen
Do hiez man si beide	sten an einen rinch
nach gewoneheit	vil manich iungelinch
in vroelichem mvote	ir zegagene stvont 
si gedahten in ir sinnen	so noch die tumben gerne tvont
Do man begvnde vragen	die minnecliche meit 
ob si den reken wolde	ein teil was ez ir leit 
doch dahte si ce nemene	den wætlichen man 
si schamte sich der vrage	so manich meit hat getan
Ir riet ir uater Ruediger	daz si spreche ia 
vn– daz si in gerne næme	 vil schiere do was da
mit sinen wizen handen	 der si vmbesloz 
Gyselher der iunge		swie lucel si sin doch genoz
Do sprach der marchgraue	 ir edeln kvnige rich 
als ir nv vider ritet	daz ist gewonlich	
heim ce Burgonden	so gib ich iv min kint 
daz ir si mit iv fueret	daz gelobeten si sint
Swaz man da schalles horte	den mvosen si doch lan 
man hiez die iunchvrowen	 ce kemenaten gan 
vn– ovch die geste slafen	mit rvowe an den tac 
do bereite man die spise	der wirt ir guotlich plach
Do si enbizen waren	si wolden dannen varn
gen der Hvnen lande	 daz hiez ich wol bewaren 
sprach der wirt edele	 ir svlt noch hie bestan 
wan ich so lieber geste	selten iht gewnnen han
Des <antwurte> Dancwart	des mach niht gesin 
wa nemet ir die spise	daz brot vnd ovch den win 
daz ir so manigen reken	noch <heint> mvozet han 
do daz der wirt erhorte	er sprach	ir svlt die rede lan
Mine vil lieben heren	 ir svlt mir niht uersagen 
ia gib ich iv diespise	ce viercehen tagen
mit allem dem gesinde	daz mit iv her ist komen 
mir hat der kvnich Ezel	noch vil wenich iht genomen
Swie sere si sich werten	si mvosen da bestan
vnz an den vierden morgen	do wart da getan
von des wirtes rnilte	daz verre wart geseit 
er gap sinen gesten	beidiv ros vn– kleit
Ez kvnde ganger niht gewern	si mvosen dannen varn 
Rvedeger der kuone	kvnde wenich iht gesparn
vor siner milte	swes iemen gerte nemen 
daz verseiter niemen	ez mvos in allen wol gezemen
Ir edel ingesinde	<brahte> fur daz tor
gesatelt vil der moere	do kom zvo in da vor
vil vremder reken	si truogen schilde enhant 
wan si wolden riten	 in daz Ezelen lant
Der wirt do sine gabe	bot vber al 
ê die edelen geste	koemen fur den sal 
er kvnde miltlichen	mit grozen eren leben 
sine tohter schoene	het er Gyselher gegeben [66b]
Do gab er Gernote	ein wafen gvot genvoch 
daz er sit in sturmen	vil herlichen truoch 
der gabe im wolde	des marcgrauen wip 
doch verlos Ruediger	da von sider den lip
Do gab er Gunther	dem helde lobelich 
wol truoch mit eren	der edel kunich rich	
swie selten er gabe enphienge	 ein wafenlich gewant 
da nach neic Gunther	 des edelen Rvodigers hant
Gotlint bot Hagnen	als ir wol gezam 
ir minnecliche gabe	sit si der kunich nam 
daz er ane ir stivre	zvo der hochgezit
von ir niht uaren solde	doch widerreite er ez sit
Allez des ich ie gesach	sprach do Hagne 
so en gerte ich innen mere	niht ze tragene
niwan ienes schildes	 dort an iener want 
den wolde ich gerne fueren	in Ezelen lant
Do div marcgrauinne	 Hagnen rede vernam 
ez mande si ir leide	weinens si gezam 
do dahte si vil tivre	an Nuodunges tot 
den het erslagen Wittege	da von het si iamers not
Si sprach zuo dem degne	 den schilt wil ich iv geben 
daz wolde got von himele	daz er noch solde leben	 
der in da truoch en ende	der lac in sturme tot 
den mvoz ich immer weinen	des gat mir armer not
Div edel marchgrauinne	von dem sedele gie 
mit ir uil wizen handen	si den sshilt gevie 
iv vrowe truoch in Hagnen	er nam in an die hant 
iv gabe was mit eren	an den reken gewant
in hulft von liehtem pfelle	obe siner varwe lac	
ezzeren schilt deheinen	beluhte nie der tac	
von edelem gesteine	der sin hete gegert
ce	kovfen	an der koste	was er wol tusent marche wer
Den schilt hiez do Hagne	von im tragen dan 
do begvnde Dancwart	hin ze hove gan 
dem gap vil richiv cleider	des marcgrauen chint 
div truoch er da zen Hvnen	vil vrolichen sint
Allez daz der gabe	 von in wart genomen 
in ir deheines hende	wer ir niht bechomen
wan durch des wirtes liebe	derz in so schone bot 
sid wurden si im so vient	daz si in slahen mvosten tot
Volker der vil snelle	mit siner videlen dan
gie gezogenlichen	fur Gottelinde stan 
er videlte sveze doene	vnde sanch ir siniv liet 
da mit nam er urlop	da er von Beclaren schiet
Ir hiez div marchgravinne	ein ladetragen 
von vriuntelicher gabe	mvget ir horen sagen 
dar vz nam si zwelf povge	vn– spien irns an die <h>
die sult ir hinnen fueren	in daz Ezelen lant
vnd sult durch minen willen	si ze hove tragen 
swem ir wider wendet	daz man mir mvge sagen [67a]
wie ir mir habet gedienet	da ze der hochcit	
des div vrovwe gerte	vil wol leistete er daz sit
Do sprach der wirt zen gesten	 ir svlt dester samfter varn 
ich wil iuch selbe leiten	vn– heizen wol bewaren 
daz in vf der straze	 niemen mvge schaden	
do wurden sine sovme	harte schiere geladen
Der wirt wart wol bereitet	mit funf hundert man
mit rossen vnd mit kleideren	die fuort er mit im dan
vil harte frolichen	zvo der hochgezit 
der einer mit dem libe	kom nie ce Beclaren sit
Mit kusse minneclichen	der wirt do dannen schiet 
also tet ovch Gyselher	als im sin tvgen riet 
mit vmbeslozen armen	 si trivten schoeniv wip 
daz mvoste sit beweinen	vil maniger iunchvrovwen lip
Do wurden allenthalben	die venster vf getan 
der wirt mit sinen mannen	ze rossen wolde gan 
ich wan ir herze in seite	div lkrefteclichen leit 
da weinde manich vrovwe	 vn– manich wetlichiv meit
Nach ir lieben frivnden	 genvege heten ser 
die si ce Bechelaren	 gesahen nimmer mer 
doch riten si mit vrevden	nider vber sant
zetal bi Tvonovwe	in daz Hvnische lant
Do sprach ce den Bvrgonden	der riter vil gemeit 
Ruedeger der edele	 ia svlen wir niht verdeit
wesen vnser mere	 daz wir ce den Hvnen komen 
im hat der kvnich Ezel	nie so liebes niht vernomen	 
Zetal durch Osteriche	der bote balde reit 
den luten allenthalben	wart daz wol geseit 
daz hie helde koemen	von Wurmez vber Rin 
des kvniges ingesinde	kvnd ez niht leider gesin
Die boten fur strichen	mit den meren 
daz die Niblvnge	ze den Hvnen weren 
dv solt si wol enphahen	Kriemhilt	vrovwe min 
dir koment nach grozen eren	die vil lieben brueder din
Kriemhilt div vrovwe	 in einem venster stvont 
si warte nach den magen	so vriunt nach frivnden tvont 
von ir vater lande	sach si manich man 
der kvnich friesch ovch div mere	vor liebe er lachen hegan
Nv wol mich miner vrovden	so sprach Kriemhilt 
hie bringent mine mage	vil manigen niwen schilt
vnd halsperge wize	 swer nemen welle golt 
der denke miner leide	vnd wil im immer wesen holt

o die Burgonden	komen in daz lant 
do gefriesch ez von Berne	der halte Hyltebrant 
er seite ez sime herren	ez was im harte leit 
er bat im wol enphahen	 die riter kvene <vn> gemeit
Wolfart der snelle	hiez bringen div march 
do reit mit Dietriche	vil manich degen starch 
da er si gruozen wolde	 zvo in an daz velt	[67b]
da heten si ovf gebunden	vil manic herlich gecelt
Do si von Troni Hagne	 verrist riten sach 
zuo den sinen herren	gezogenlich er sprach 
nu svlt ir	snelle rechen	von den sedele stan 
vn– get in hin enkegene	 die iuch da wellent hie enphan
Dort kumet her ein gesinde	daz ist mir wol bekant 
ez sint vil snelle degne	von Amelunge lant 
<der> von Berne si fuort	 si sint vil hoch gemvot	
vn– lat iv niht versmahen	swa man iv hie dienst tvot
Do stvonden von den rossen	daz waz michel reht	
neben Dyethriche	manich ritter vnd kneht 
si giengen zvo den gesten	da man die helde vant 
si grvosten minnecliche	die von Bvrgonde lant
Do si der herre Dyethriche	gen im chomen sach 
hie mvget ir hoern gerne	waz der degen sprach
zvo den voten chinden	 ir reise waz im lait 
er wand ez weste Rvedeger	daz er inz hete geseit
Sit willechomen ir herren	Gunther vn– Gyselher 
Gernot vn– Hagne		 sam si her Volker
vn– Danchwart der snelle	ist iv daz niht bechant 
Kriemhilt noch sere weinet	den helt von Niblunge lant
Si mach vil lange weinen	sprach do Hagene 
er lit vor manigem iare	ce tode erslagne 
den chvnich von den Hvnen	 sol si nv holden haben 
Sivrit chvmet niht widere	er ist nv lange begraben
Die Sifrides wunden	 lazzen wir nv sten 
sol leben vro ChriemhiIt	so mach schade ergen	
so redete von Berne	 der herre Dyetriche 
troest der Niblung	davor behvete dv dich
Wie sol ich mich behveten	sprach der kvenich her 
Ecel vns boten sande	 waz sold ich fragen mer	
daz wir zvo im solden	 riten in daz lant 
ovch hat vns manich mære	mein swester Kriemhilt gesant
Ich kan ev wol geraten	sprach aber Hagne 
bittet iv div mære	 baz ze sagne
den herren Dietrichen	vnd seine helde gvot 
daz si iv lazen wizen	der vrowen <Kriemhilt> muot
Do giengen svndersprachen	die dri kvnige riche 
Gvnther vn– Gernot	 vnd och her Dyetrich 
nu sag vns	von Berne	vil edel ritter gvot 
wie dir si gewizzen	vmb der kvniginne mvot 
Do sprach der voit von Berne	 waz sol ich nv sagen 
ich hoere alle morgen	weinen vnd klagen
mit iæmerlichen sinnen	daz Eceln wip
dem richen gote von himel	des starchen Sifrides lip
Ez ist et vnerwendet	 sprach der chvene man 
Volker der videlare		daz wir vernomen han 
wir svln ce hove riten	 vn– svln lazzen sehen
waz vns snellen degen	mvge cen Hvnen geschehen
Die kvenen Bvrgonden		hin ce hove riten	[68a]
si chomen herlichen	nah ir landes siten 
do wunderte da cen Hvnen	vil manigen kvenen man
vmbe Hagnen von Trony	 wie der were getan
Dvrch daz man seite mere	 dez waz im genvock	
daz er von Niderlanden	Sifriden slvoch 
sterkest aller reken	vrovn Kriemhilde man 
des wart michel vragen	ce hove nah Hagen getan
Der helt waz wol gewahsen	daz ist al war 
groz waz er cen brusten	gemischet waz sin har
mit einer grisen varwe	div bein warn im lanc 
eislich sin gesune	er hete herlichen ganch
Do hiez man herbergen	die Burgonden man 
Gvnthers gesinde	wart gesvndert dan 
daz riet div chvnigin	div im vil hazes trvoch 
da von man sid die knehte	an der herberge slvoch
Dancwart	Hagen brvoder	der waz marschalch 
der chvnich im sin gesinde	vliziclich bevalch 
daz er ir wol pflege	vn– in gebe genvoch 
der helt von Bvrgonden	 in allen holden willen <trvoch>
Kriemhilt div schoene	 mit ir gesinde gie
da si die Niblunge	 mit valschem mvote enphie 
si kvste Gyselhern	 vn– nam in bi der hant 
daz sach von Trony Hagen	den helm er vaster gebant
Nach svs getanem grvoze	so sprach Hagene 
mvgen sich verdenchen	 snelle degene 
man grvezet svnderlichen	 die kvnige vn– ir man 
wir haben niht gvoter reise	zvo dirre hohzit getan
Si sprach	nv sit willekomen	swem ivch gerne sihet 
dvrch iwer selbes vrivntschaft	grveze ich ivch niht 
saget waz ir mir bringet	von Wormz vber Rin 
darvmbe ir mir so groze	 soldet willechomen sin
Waz sint disiv mere	 sprach do Hagene 
daz iv gabe solden	 bringen degne 
ich wesse ivch wol so riche	ob ich mich baz kan verstan 
daz ich iv miner gabe	 her ze lande niht gefvert <han>
Nv svlt ir mich <der> mære	mere wizzen lan 
hort der Niblvnge	 war habet ir den getan 
der waz doch min eigen	daz ist iv wol bechant 
den soldet ir mir bringen	in daz Ecelen lant
Entriwen	min vrov Kriemhilt	des ist manic tach 
daz ich der Niblunge	hortes nie gepflach 
den hiezen min herren	senken in den Rin 
da mvoz er werlichen	 vntz an daz ivngiste sin
Do sprach div kvnigin	 ich hans och wol gedaht 
ir habet mirs noh vil wenich	her ze lande braht 
swie er min eigen were	 vn– ich sin willent phlach 
des han ich zit vil swere	vn– manigen trvrigen tach
Ich bringe iv den tivel	sprach Hagne	[68b]
ich han an mime schilde	so vil ze tragne
vn– an miner brvnne	 min helme der ist lieht 
daz swert an miner hende	des enbringe ich ivh nicht
Do sprach div kvniginne	ze den reken vber al 
man sol deheiniv wafen	tragen in den sal 
ir helde	ir svlt mirs vfgeben	ich wil si behalten lan	
entriwen	sprach do Hagne		daz wirdet nimmer getan
Ja ger ich niht der eren	fvrsten tohter milt 
daz ir ze den herbergen	 traget minen schilt
vn– ander min gewæte		 ir sid ein kvnigin 
daz leret mich min vater niht	ich wil selbe kamerere sin
Owe miner leide		sprach vrov Kriemhilt 
warvmbe wil min brvoder	vn– Hagne sinen schilt
niht lazen behalten	si sint gewarnot 
vnde wesse ich wer daz tete	ich riete im immer sinen tot
Dez antwurte ir mit zorne	 der herre Dyethrich 
ich binz der hat gewarnt	die edeln fvrsten riche
vn– Hagnen den kvnen		 den Bvrgonden man 
nv zvo valadinne	 dv solt mihs niht geniezen lan
Dez schamte sich vil sere	daz Ecelen wip 
si vorhte bitterlichen	Dyetrichs lip 
si gie von im balde	 daz si niht ensprach 
wan daz si swinde blicke	an ir viende sach
Bi henden sich do viengen	zwene degne 
daz eine waz her Dyetrich	daz ander Hagne 
do sprach gezogenlichen	der reke vil gemeit 
iwer komen ze den Hvnen	ist mir werlichen leit
dvrch daz div kvnigine	also gesprochen hat	
do sprach von Trony Hagne	 dez wirt wol allez rat	
svs reiten mit an ander	die zwene kvene man 
daz sach der kvnich Ecel	dar vmbe er vragen began
Div mere ich weste gerne	sprach der kvnic rich 
wer iener reke were	den dort her Dyetrich
so vrivntlich enpfahet	er treit vil hohen mvot 
swer sin vater were	 er mach wol sin ein reche gvot
Dez antwurte dem kvnige	ein Kriemhilde man 
er ist geborn von Trony	sin vater hiez Aldrian 
swie blide er hie gebare	er ist ein grimmich man 
ich laze ivch daz beschowen	daz ich gelogen niene han
Wie sol ich daz erchennen	daz er so grimmich ist	
dannoh er niht weste	 so manigen argen list 
den sid div kvnigin	 an ir magen begie 
daz si ir nie deheinen	von den Hvnen komen lie
Wol erchand ich Aldrianen	wan er waz min man 
lop vn– michel ere	er hie bi ir gewan 
ich machte in ze rittere	vn– gap im min golt 
dvrh daz er getriv waz	 des mvoz im wesen ich holt
Da von ich wol erkenne	allez Hagnen sint 
ez warn wol zwei	weitlichiv kint	[69a]
er vn– von Spane Walther	die wuohsen hie ze man 
Hagen sand ich wider haim	 Walther mit Hiltegvnde entran
Er dahte lieber mere	div warn e geschehen 
sinen vrivnt von Trony	hete er rehte ersehen 
der im in siner ivgende	vil starkiv dienst bot 
sid frvmter im in alter	vil manigen lieben vrivnt tot

o schieden sich die zwene	reken lobelich 
Hagen von Trony	vn– ovch her Dyterich	
do blikte vber ahsel	ein Gvnthers man
nach eime hergesellen	den er vil schiere gewan
Do sach er Volkern	 bi Gyselhere sten 
den spehen videlere	er bat in mit im gen 
wan er vil wol erckande	sinen grimmen mvot 
er waz an allen dingen	ein ritter kvene vn– gvot
Noch liezen si die herren	vf dem hove stan 
niwan si zwene aleine	 sach man dannen gan
vber den hof vil verre	fvr einen palas wit 
die vz erwelten degne	 vorhten niemannes nit
Si gesazen vor dern hvse	gein eime sal	
der waz Kriemhilde		 vf eine banch zetal 
do lvht in vor	dem libe	ir herlich gewant 
genvoge die daz sahen	 heten gerne si bekant
Alsam tier div wilden	gekaphet wurden an
die vbermveten helde	von den Hvnen man 
si ersach dvrch ein venster	ein Ecelen wip 
dez war aber betrvebet	der schoenen Kriemhilde lip
Ez mande si ir leide	weinen si began 
des hete michel wunder	die Ecelen man 
waz ir so rehte swere	verrihtet hete ir mvot 
si sprach	daz hat Hagne	ir helde kvene <vnde> gvot
Si sprachen zvo der vrowen	wie ist daz geschehen 
wan wir ivch nivlich	 haben vro gesehen 
nie niemen wart so kvene	derz iv hat getan 
heizet irz vns rechen	ez sol im an sin leben gan
Daz wold ich immer dienen	swer reche miniv leit 
allez dez er gerte	dez wer ich im bereit 
ich bivte michiv ze fvezen	sprach des kvniges wip 
rechet mich an Hagnen	daz er verlieze den lip
Do garten sich vil balde	sehcek kvener man
dvrch Kriemhilde willen	 si wolden hin gan
vn– wolden slahen Hagnen	den vil kvenen man 
vn– ovch den videlere	daz wart mit rate getan
Do div kvniginne	ir schar so kleine sach 
in eime grimmem mvote	si ze den helden sprach 
dez ir da habet gedingen	des svlt ir abe gan 
ia endvrfet ir so ringe	Hagnen nimmer bestan
Swie starc vn– swie kvene	von Trony Hagne si 
noch ist verre stercher	der im da sitzet bi	[69b]
Volker der videlere	der ist ein vbel man 
ia ensvlt ir die helde	niht so lihte bestan
Do si daz gehorten	do garte sich ir mere 
vierhvndert rechen	div kvniginne her
waz dez vil genoete	daz si in tete læit 
da von wart sid den degnen	<michel> sorge bereit
Do si vil wol gewafent	ir gesinde sach 
zvo den snellen reken	div kvniginne sprach 
nv bitet ein wile	ia svlt ir stille stan 
ich wil vnder krone	zvo minen vinden gan
Un– hoeret itewize	waz mir hat getan
Hagne von Trony	Gvnthers man 
ich weiz in so vbermveten	daz er mir lovgent niht 
so ist ovch mir vnmere	swaz im darvmbe geschiht
Do sach der videlere	 ein wundern kvene man 
die edeln kvniginne	 ab einer stiegen gan
nider ab eime hvse	do er daz ersach 
Volker der kvene	 zvo sime hergesellen sprach
Nv schovwet	vrivnt Hagne	wa si dort here gat 
div vns an triwe	inz lant geladet hat 
in gesach mit kvniges wibe	nie so manigen man 
die swert enhende trvogen	also stritlichen gan
Wizzet ir	vrivnt Hagne	 ob si iv sin gehaz 
so wil ich iv daz raten	so hvetet deste baz
des libes vn– der eren	 ia dvncket ez mich gvot 
als ich mich versinne	 si sint vil zornich gemvot
Und sint ovch svmeliche	cen brvsten also wit 
swer sin selbes hveten	wil	des ist wol zit 
ich wene si die liehten	brvnne an in tragen 
wen si da mit mainen	daz en hoer ich niemen sagen
Do sprach in zornes mvote	Hagne der chvene man 
ich weiz wol daz ez allez	ist vf mich getan 
daz si div liehten wafen	tragent an der hant 
vor den moeht ich geriten	noh in der Bvrgonden lant
Nv saget mir	vrivnt Volker	ob ir mir welt gestan 
ob mit mir wellent striten	Kriemhilde man 
daz lazet ir mich hoern	 also liep als ich iv si 
ich won iv immer mere	mit triwen dienstlichen bi
Ich hilfe iv sicherlichen	so sprach der spilman 
ob ich vns hie engegne	 sehe den kvnich gan
mit allen sinen reken		 die wile ich leben mvoz 
so entwiche ich iv dvrh vorhte	nimmer vz helfe einen fvoz
Nv lon iv got von himele	 vil edel Volker 
ob si mit mir stritent	wez bedarf ich danne mer 
sid ir mir helfen wellet	als ich han vernomen 
so svln dise reken	vil gewerlichen chomen
Nv ste wir von dem sedele	sprach der spilman 
si ist ein kvnigin	vn– lat si fvr gan	[70a]
bieten ir die ere	si ist ein edel wip 
damite ist ovch getiwert	vnser ietweders lip
Nein	dvrch min liebe	sprach do Hagne 
so wolden sich versinnen	dise degne 
daz ichz dvrh vorhte tete	vn– sold ich hin gen 
ich wil dvrch ir deheinen	nimmer von dem sedel sten
Ia zimet ez vns beiden	 zware lazzen baz 
zwiv sold ich den eren	 der mir ist gehaz 
daz getvon ich nimmer	 die wile ich han den lip 
ovch enrvoch ich waz mich nidet	des kvnic Eceln wip
Der vbermvete Hagne	lette vber siniv bein
ein vil liehtez wafen	vz des knophe schein
ein vil liehter iaspis	grvener danne ein gras 
wol erkand ez Kriemhilt	daz ez Sifrides waz
Do si daz swert erchande	do gie ir trvrens not 
daz gehilce was gvldin	div scheide ein borte rot 
ez mande si ir læide	weinen si began 
ich wene ez hete darvmbe	der kvene Hagne getan
Volker der snelle	zoh naher vf der banch
einen videlbogen starchen	michel vnde lanch 
gelich eime swerte	 schærf vnde breit 
do sazen vneruohten	 die zwene reken gemeit
Nv dvhten sich so here	die zwene chvene man 
daz niht wolden	 von dem sedel stan
dvrch niemens vorhte	des gieng in an den fvoz
div edel kvniginne	vn– bot in ointlichen grvoz
Si sprach	nv saget	her Hagne	wer hat nah iv gesant 
daz ir getorstet riten	her in ditz lant 
vn– ir daz wol erchandet	 waz ir mir habet getan 
hetet ir gvote sinne	 ir soldet ez billichen haben lan
Nach mir ensande niemen		sprach do Hagne 
man ladete her ze lande	 dri degne 
do heizent meine herren	so bin ich ir man 
deheiner hovereise		bin ich selden hinder in gestan
Si sprach	nv saget mir mer	zwiv tatet ir daz 
daz ir habet verdient	daz ich iv bin gehaz 
ir slvoget Sifriden	minen lieben man 
dez ich vntz an min ende	immer mer ze weinne han
Er sprach	waz sol des mer	der rede ist nv genvoch 
ich binz et aber Hagne	der Sifriden slvoch 
den helt ze sinen handen	wie ser er des enkalt 
daz div vrowe Kriemhilt	 die schoenen Prvnhilde schalt
Ez ist et ane lovgen	kvniginne rich 
ich han des allez schvlde	des schaden schedelich 
nv rech ez swer so welle	 ez si wip oder man 
ich enwold iv danne liegen	ich han iv leides vil getvon
Si sprach	daz hoeret	reken	wa er mir lovgent niht
aller miner leide	 swaz im da von geschiht 
daz ist mir vil vnmere	ir Eceln man	[70b]
die vbermvoten degne	sachen alle an ander an
Swer den strit da hvebe	so were da geschehen 
daz man den zwain gesellen	der eren mvese iehen 
wan siz in stvrmen heten	dike wol getan 
des sich iene vermazen	dvrh vorhte mvosen si daz lan
Do sprach der reken	 wes sehet ir mich an 
daz ich e da lobete	 des wil ich abe gan 
dvrch niemens gabe	verliezen min lip 
ia wil vns verleiten	des kvnich Eceln wip
Do sprach da bi an ander	 des selben han ich mvot 
der mir gebe tvrne	von rotem golde gvot 
disen videlere	 wol ich niht bestan
dvrh sine swinde blike	di ich an im gesehen han
Och erchenne ich Hagnen	von sinen ivngen tagen 
des mach man von dem reken	lihte mir gesagen 
in zwein vn– zweincik stvrmen	han ich in gesehen 
da vil maniger vrowen	ist herzeleit von im geschehen
Er vnd der von Spane	traten manigen stic 
do si hie bi Ecele	vahten manigen wic
ze eren dem kvnige	des ist vil geschehen 
darvmbe sol man Hagnen	der eren billichen iehen
Dannoch waz der reke	siner iare ein chint 
daz do die tvmben warn	wie grise die nv sintl
nv ist er chomen ze witzen	vn– ist ein grimmich man 
och treit er Balmungen	daz er vbele gewan
Da mite was gescheiden	daz niemen da enstreit 
do wart der kvniginne	 vil hercenlichen læit 
die helde kerten danen	ia vorhten si den tot
von dem videlere	 des gie in sicherlichen not
Do sprach der videlere	 wir han daz wol ersehen 
daz wir hie vinden vinde	als wir e horten iehen 
wir svln zvo den kvnigin	hintze hove gan 
so entar vnsere herren	mit strite niemen wol bestan
Wie dike ein man dvrh vorhte	manigiv dinch verlat 
swa so vrivnt bi vrivnde	gvetlichen stat
vn– hat er gvete sinne	 daz er sin niht entvot 
schade vil maniges mannes	wirt von sinnen wol behvot
Nv wil ich iv nv volgen	sprach do Hagne 
si giengen da si fvnden	 die ziern degne
in grozem antvange		an dem hove stan 
Volker der kvene		 vil lvte sprechen began
zvo den sinen herren	 wie lange welt ir sten 
daz ir ivh lazet dringen	 ir svlt ze hove gen
vn– hoeret an dem kvnige	wie der si gemvot	
do sach man sich gesellen	die helde kvene vn– gvot
Der fvrste von Berne	der nam an die hant
Gvnthern den vil richen	von Bvrgonden lant 
Irnvrit nam Gernoten	 den vil chvenen man 
do sach man Rvedegern	 ze hove mit Gyselhere gan	[71a]
Swie iemen sich gesellete	vn– och ze hove gie 
Volker vn– Hagne		geschieden sich nie 
niwan in eime stvrme	vntz an ir endes zit 
daz mvozen edele vrowen	beweinen grozlichen sit
Do sach man mit den kvnigen	ze hove gan
ir edeln ingesindes	tvsent kvener man 
dar vber sehzik rechen	die worn mit in komen 
die hete in sime lande	der kvene Hagne genomen
Hawart vn– Irinc	 zwene vz erwelte man	
die sach man geselleclichen	bi den kvnigen gan 
Dancwart vn– Wolfhart		ein tiwerlicher degen 
die sach man wol ir tvgende	vor den andern phlegen
Do der voget von Rine	in den palas gie 
Ecel der riche	daz langer niht enlie 
er spranch von sime sedele	als er in komen sach 
ein grvoz so rehte schoene	von kvnige nie mer geschah
Sit willekomen	her Gvnther	vn– och her Gernot 
vn– iwer brvoder Gyselher	 min dienst ich iv enbot
mit triwen willeclichen	 ze Wormz vber Rin 
vn– allez daz gesinde	daz sol mir willekomen sin
Nv sit vns groze willechomen	ir zwene degne 
Volker der vil kvene	 vnd ovch Hagne 
mir vn– miner vrowen	her in ditze lant 
si hat iv boten manigen	hin ze Rine gesant
Do sprach von Trony Hagne	 des han ich vil vernomen 
wer ich dvrch min herren	zen Hvnen niht enkomen 
so wer ich io ze ern	geriten in daz lant	
do nam der wirt edel	die lieben geste bi der hant
Er brahte si ze dem sedele	da er e selbe saz 
do schancte man den gesten	 mit vlize tet man daz	
in witen goldes schallen	mete	moraz vn– win 
vn– bat die ellenden	 groze willechomen sin
Do sprach der chvnic Ecel	 des wil ich iv veriehen 
mir enchvnde in dirre werlde	lieber niht gcschehen 
des ist der kvniginne	vil michel trvrn benomen
Mich nimet des immer wunder	waz ich iv hab getan	
so manigen gast vil edele	den ich gewunnen han	
daz ir nie gervohet	 komen in miniv lant 
daz ich ivch nv gesehen han	daz ist ze vroeden mir gewant
Dez antwurte Rvedeger	ein riter hoch gemvot 
ir mvget si sehen gerne	ir triwe div ist gvot 
miner vrowen mage	 der eren kvnnen phlegen 
si bringent iv ze hvse	manigen wetlichen degen
An svnewenden abent	 die herren warn komen
in Eceln hof des richen	vil seltem ist vernomen
von also hohem grvoze	als er die helde enphie 
nv waz och ezzens zit	 der kvnich mit in ze tische gie
Ein wirt bi sinen gesten	schoner nie gesaz	[71b]
man gab in volleclichen	trinchen vnde maz 
allez des si gerten	des waz man in bereit 
nan hete von den helden	vil michel wunder geseit

er tach hete nv ende	vn– nahet in div naht 
die wegemveden reken	ir sorge an
wan si solden rvowen	vn– an ir bette gan 
daz bereitte Hagne	ez wart in schiere kvnt getan
Gvnther sprach ze dem wirte	 got laze ivch wol gelben 
wir wellen varn slafen	ir svlt vns vrlop geben 
swenn ir daz gebietet	so kome wir morgen frvo 
er schiet von sinen gesten	harte vroelichen do
Dringen allenthalben	die geste man do sach 
Volker der kvene		zvo den Hvnen sprach 
wie getvrret ir den reken	fvr die fveze gan 
vn– welt ir ivchs niht miden	so wirt iv leide getan
So slah ich eteslichem	so swern gigen slach 
hat er getriwen iemen	daz erz beweinen mac 
wan wihet ir vns rechen	ia dvnchet ez mich gvot 
ez heizent allez degne	vn– sint geliche niht gemvot
Do der videlere	 so zorneclichen sprach 
Hagne der kvene	hinder sich do sach 
er sprach	iv ratet rehte	der kvene spilman 
ir <Kriemhilde> helde	svlt ze herberge gan
Dez ir da habet gedingen	ich wene ez iemen tvo 
welt ir iht bebinnen	so komet vns morgen vrvo 
vn– lat vns ellenden	heint haben gemach 
ia wen ez von helden	mit solhem willen ie gesachach
Do brahte man die geste	in einen witen sal 
den fvnden si berihtet	den reken vber al
mit vil richen betten	lanch vnd breit 
in riet vrov Kriemhilt	div aller groezisten leit
Manigen kolter spehe	 von Arraz man da sach
der vil liehten pfelle	vn– manich bettedach
von arabischen siden	 die beste mohten sin 
dar vfe lagen listen	 die gaben herlichen schin
Dechlachen hermin		vil manigiv man da sach
vn– von swarzem zobele	darvnder si ir gemach
des nahtes schaffen solden	vntz an den liehten tac 
ein kvnich mit sime gesinde	nie so herlich gelach
Owe der nahtselde	 sprach Gyselhere daz kint 
vnd owe miner vrivnde	die mit vns komen sint 
swie et ez min swester	so gvetlich erbot 
ich fvrhte daz wir mvezen	alle von ir schvlde ligen tot
Nv lat iwer sorgen	sprach Hagne der degne 
ich wil noh heint selbe	der schiltwache phlegen 
ich trowe ich wol behveten	vntz vns kvmet der tach 
des sit gar an angest	so wend ez danne swer der mach
Do nigen si im alle	 vn– seiten im des danch	[72a]
si giengen zvo den betten	div wile <waz> niht lanch
daz sich geleit heten	die wetlichen man 
Hagne der chvene		 der helt sich wafen began
Do sprach der videler	Volker der degen 
versmahetez iv niht Hagne	so wold mit iv phegen
heint der schiltwach	vntz morgen vrvo 
der helt vil minneclichen	dancte Volker dvo
Nv lon iv got von himel	vil lieber Volker 
ze allen minen sorgen	so engerte ich niemen mer 
niwan ivch aleine	swa ich hete not 
ich sol ez wol verdienen	mich enwendes der tot
Do garten si sich bede	in liehtez ir gewant 
do nam ir ietweder	den schilt an sein hant
vn– giengen vz dem hvse	fvr die tvr stan 
do phlagen si der geste	daz waz mit triwen getan
Volker der snelle	 zvo dez sales want
sinen schilt den gvoten	laint er von der hant 
do gie er hin widere	sein gigen er genam 
do diend er sinen vrivnden	als ez dem helde gezam
Vnder die tvre dez hvzes	saz er vf den stæin 
kvener videlere	wart noch nie dehein 
do im der seiten do	so svezlich erclanch 
die stolzen ellenden	die seitens Volker danch
Do chlvngen sein sæiden	daz al daz hvz erdoz 
sin ellen zvo der fvoge	div warn beidiv groz 
svezzen vn– <senfter>	gigen er began	
do entswebete er an den beten	vil manigen sorgenden man
Do si entslafen warn	 vn– er daz ervant 
do nam der degen widere	den schilt an die hant 
vn– gie vz dem gadme	fvr den tvrn stan 
vn– hvote der ellende	vor den Kriemilde man
Dez nahtes wol enmitten	ine weiz ez e geschach 
daz Volker der kvene	schinen helmen sach
verre vz einer vinster	die <Kriemhilde> man
wolden an den gesten	schaden gerne han getan
Do sprach der videlere		vrivmt	her Hagne 
vns zimet disiv sorge	ensamt ze tragne 
ich sihe gewafent Ivte	vor dem hvse sten 
als ich mich versinne	si wellent vns besten
So swiget	sprach do Hagne	 lat si her naher baz 
e si vnser werden innen	 so wirt hie helmevaz
verruchet mit den swerten	von vnser zweier hant 
si werdent Chriemhilde	hin wider vil vbel gesant
Ein der Hvnen reken	 vil schiere daz geschach 
daz div tvr waz behvetet	wie balde er do sprach 
des wir da heten willen	ia enmag es niht ergan 
ich sihe den videlere	 an der schiltwache stan
Der treit vf sime hovbte	einen helmen glantz	[72b]
lvter vnd herte	starch vnd gantz 
ovch lohent im die ringe	sam daz viwer tvot 
bi im stet ovch Hagne	 des sint die geste wol behvot
Zehant si cherten wider	do Volker daz ersach 
wider sinen gesellen	er zorneclichen sprach 
nv lat mich zvo den reken	von dem hvse gan 
ich wil vragen mere	 der vrowen Kriemhilde man
Nein	dvrh min liebe	sprach do Hagne 
komet ir von dem hvse	 die snellen degne
bringent ivch mit swerten	lihte in solhe not 
daz ich iv mvese helfen	vn– wer ez aller miner mage tot
So wir danne beide	komen in den strit 
ir zwene oder fier	 in einer kvrzen zit
sprvngen zvo dem hvse	vn– teten vns div lait
an den slafenden	div nimmer wurden verchlæit
Do sprach aber Volker	 so lat daz geschehen 
daz wir si bringen innen	daz wir si han gesehen 
daz dez iht lovgnen	Kriemhilde man 
daz si vngetrivlich	vil gerne heten getan
Zehant do rief in Volker	hin engene 
wez get ir svs gewafent	snelle degne 
welt ir schachen riten	 Kriemhilde man 
dar svlt ir mich ze helfe	vn– minen hergesellen han
Dez antwurte im niemen	zornich waz sin mvot 
phi	ir zagen boez	sprach der helt gvot 
woldet ir slafende	 vns ermordert han 
daz ist so gvoten helden	noch vil selten her getan
Do wart der kvniginne	vil rehte daz geseit 
daz ir boten niht wurben	von schvlden waz ir lait 
do fvogte si ez anders	vil	grimmech waz ir mvot 
dez mvosen sit verderben	helde kvene vnd gvot

ir kvolent so die ringe	so sprach Volker 
ia wene div naht welle		 vns niht wern mer 
ich chiusez von dem lvfte	 ez ist vil schiere tach	
do wacten si der manigen	der noch slafende lach
Do schein der liehte mane	 den gesten in den sal 
Hagne begvnde weken		 die rittere vber al 
ob si zvo dem mvnster	ze messe wolden gan 
nach siten christenlichen	man vil lveten began
Si svngen vngeliche	daz da vil wol schein 
kristen vn– heide	 warn niht enein 
do wolden zvo der chirchen	 Gvntheres man 
si warn von den betten	algeliche gestan
Do næten sich die reken	in also gvot gewant 
daz nie helde mere	in deheines kvniges lant
ie bezzer kleider brahten	 daz waz Hagnen læit 
er sprach	ia svlt ir helde	hie tragen ander klæit
Ia sint iv doch genvogen	div mere wol bekant	[73a]
nv traget fvr die rosen	div wafen an der hant 
fvr schappel wol gesteim	die liehten helme gvot 
sit wir wol erchennen	der argen Kriemhilde mvot
Wir mvezzen heint striten	daz wil ich iv sagen 
ir svlt fvr sidin hemde	<hasperge> tragen 
vn– fvr die richen mentel	gvote schilde wit 
ob iemen mit iv zvrne	 daz ir vil werlichen sit
Mine vil lieben	dar zvo mage vnd man 
ir svlt vil willeclichen	zvo der chirken gan 
vn– klaget gote dem richen	sorge vn– iwer not 
vn– wizzet sicherlichen	daz vns nahet der tot
Ir svlt ovch niht vergezzen	swaz ir habet getan 
vn– svlt vil vlizeclichen	da gein got stan 
dez wil ich ivch warnen	reken vil her 
ez enwelle got von himel	ir vernemet messe nimmer mer
Svs giengen zvo dem mvnster	die fvrsten vn– ir man 
vf dem vronen vrithove	da hiez si stille stan
Hagne der kvene	 daz si sich schieden niht 
er sprach	ia weiz noch niemen	waz vns von den Hvnen geschiht
Leget	mine vrivnde	die schilde fvr den fvoz 
vnd geltet	ob iv inemen	 biete swachen grvoz 
mit tiefen verchwunden		 daz ist der Hagnen rat	
daz ir so werdet fvnden	sam ez iv lobelichen stat
Uolker vn– Hagne		die zwene giengen dan
fvr daz wite mvnster	daz wart dvrch daz getan 
daz si daz wolden wizzen	daz dez kvniges wip
mvose mit in dringen	 ia waz vil grimmich ir lip
Do kom der wirt des landes	vn– ovch sin schoene wip 
mit richem gewande	 geziert waz ir lip
der vil snellen reken	die man <sach> mit im varn 
do kos man hohe stovben	von den Kriemhilde scharn
Do der kvnich riche	svs gewafent sach
die kvnige vn– ir gesinde	wie balde er do sprach 
wie sihe ich vrivnde mine	vnder helmen gan 
mir ist læit vf min triwe	vn– hat in iemen getan
Ich solz in gerne bvezen	 swie si dvnchet gvot 
hat iemen si beswert	daz herce vn– ovch den mvot 
des bringe ich si wol innen	daz ez mir ist vil læit 
swaz si mir gebietent	dez bin ich allez in bereit
Dez <antwvrte> Hagne		 vns hat niemen niht getan 
ez ist site miner herren	daz si gewafent gan
ze allen hohgeziten	ze vollen drin tagen 
swaz man vns hie tete	wir soldens Ecelen sagen
Vil wol gehorte Kriemhilt	waz Hagne gesprach 
wie rehte vientliche	si im vnder div ovgen sach 
si wolde doch niht melden	den site von ir lant 
swie lange si den hete	ze den Bvrgonden erchant
Swie grimme vn– swie starche	si in vient wære 
hete iemen geseit Eceln	div rehten mere	[73b]
er hete wol vnderstanden	daz doch sit da geschach 
dvrch ir vil starchen vbermvot	ir deheiner ims veriach
Do gie vil groziv menige	mit der kvniginne dan 
do enwolden dise zwene	idoch niht hoher stan
zwæier hande breite	 daz waz den Hvnen leit 
ia mvose si sich dringen	mit den helden vil gemeit
Eceln kamerere		die dvhte daz niht gvot 
ia heten si den reken	erzvrnet do den mvot 
wan daz si entorsten	vor dem kvnige her 
da waz vil michel dringen	vn– do niht anders mer
Do man do gote gediende	vn– daz si wolden dan 
vil balde kom ze rossen	manich Hvnen man 
do waz bi Kriemhilde	 vil manich schoene meit 
wol siben tvsent degne	bi der kvniginne reit
Kremhilt mit ir vrowen	in div venster gesaz
zvo Eceln dem richen	 liep waz im daz 
si wolden schovwen riten	helde vil gemeit 
hey waz vremder reken	 vor in vf dem hove reit
Do waz ovch der marschalch	mit den knehten chomen 
Dancwart der vil kvene	hete zvo im genomen
sins herren ingesinde	von Bvrgonden lant 
div ros man wol gesatelt	den kvenen Niblvngen vant
Do ze rossen komen	 die kvnige vn– ovch ir man 
Volker der starch	raten daz began 
si solden buhvrtyern	nah ir landes siten 
des wart von den helden	sit vil herlich geriten
Der helt het in geraten	des si doh niht verdroz 
der bvhvrt vn– daz schallen	wurden beidiv groz 
vf den hof vil witen	kom vil manich man 
Ecel vn– Kriemhilt	 daz selbe schowen began
Vf den bvhvrt komen	sehs hvndert degne
Dietriches reken	den gesten zegegne 
si wolden kvrzwile	mit den Bvrgonden han 
het er ins gegvnnen	si hetenz gerne getan
Zey waz gvoter reken	in da nach ræit 
dem herren Dietriche	wart daz geseit 
mit Gvnthers mannen	daz spil er in verbot 
er vorhte siner manne	dez gie im sicherlichen not
Do dise von Berne	gescheiden warn dan 
do komen von Bechlarn	Rvedegers man
fvnf hvndert vnder schilden	fvr den sal geriten 
liep were dem marcraven	 daz siz heten vermiten
Do riet er wislichen	zvo in an die schar
vn– seite sinen mannen	si wern dez gewar 
daz in vnmvote warn	 Gvnthers man 
do si den bvhvrt liezen	ez wer im liebe getan
Do von in geschieden	die helde vil gemeit 
do komen die von Dvringen	 als vns daz ist geseit	
vn– der von Tenemarchen	wol tvsent kvener man	[74a]
von stichen sach man vliegen	vil trvnzune dan
Irnvrit vn– Hawart	in den buhurt ritten 
ir heten die von Rine	vil stoltzlich erpiten 
si buhten manige tyost	den von Dvringen lant 
dez wart von stichen dvrchel	manic herlicher rant
Do kom der herre Bloedel	 mit drin tvsent dar 
Ecel vn– Kriemhilt	namen sin wol war 
wan vor in beiden	div ritterschaft geschach 
div kvnigin ez gerne	dvrh leit der Bvrgonde sach
Schrvtan vn– Gybeche	vf den bvhurt riten
Ramvnch vn– Hornboge	nach hvnischen siten 
si hielten gein den heiden	von Bvrgonden lant 
die schefte dræten hohe	vber des kvniges sales want
Do waz ir kvrtzwile	so michel vnde groz 
daz dvrch die covertvre	der blanke sweiz do vloz
von den gvoten rossen	div die helde riten 
si versvohtenz an die Hvnen	mit vil hochverten siten
Do sprach der kvene Volker	ein edel spilman 
ich wen vns dise reken	turren niht bestan 
ich horte ie sagen mere	si wern vns gehaz 
nv enkvnd ez sich gefvegen	zware ninder in baz
Ce herbergen fvern	sprach aber Volker 
sol man vns die moere	vn– riten danne mer
hin gein abende	so ez virdet zit 
waz ob div kvnigin	 den lop den Bvrgonden git
Do sahens einen ritter	so wæigerlichen gie 
daz ez al der Hvenen	 getet neheiner nie 
ia moht er in den ziten	wol haben herzen trvt 
er fvor so wol gekleidet	sam ez were ein edel brvt
Do sprach aber Volker	 wie moht ich daz verlon 
iener trvt der vrowen	 mvoz ein gepovze han 
ez chan niemen gescheiden	ez gat im an den lip 
ia enrvch ich ob ez zvrnet	dez kvnic Eceln wip
Nein	dvrch min liebe	sprach der kvnich san 
ez wizent vns die lvte	ob wir si bestan 
lat ez heben die <Hvnen>	 daz fveget sich noh baz	
dannoch der kvnich Ecel	 bi der kvniginne saz
Ich wil den bvhvrt mern	 sprach do Hagne 
lat die vrowen schowen	vn– die degne 
wie wir kvnnen ritten	 daz ist gvot getan 
man git doch lop deheinen	des kvnic Gvntheres man 
Volker der vil snelle	den bvhurt wider reit 
daz wart sit maniger vrowen	grozlichen leit 
er stach dem richen Hvnen	daz sper dvrh den lip 
daz sach man sit beweinen	beide meit vn– wip
Uil harte hvrteclichen	Hagne vn– sine man
mit sehzek siner degne	riten er began
nach dem videlere	 da daz spil geschach 
Ecel vn– Kriemhilt	 ez bescheidenlichen sach	[74b]
Do wolden die dri kvnige	den kvenen spilman
bi den vinden	niht an hvote lan 
da wart von tvsent helden	vil kvntlich geriten 
si taten daz si wolden	in vil hochverten siten
Do der riche Hvne	ze tode waz erslagen 
man horte sine mage	rvofen vnde klagen 
do vragte al daz gesinde	 wer hat ez getan	
daz hat der videlere	Volker der kvene spilman
Nach swerten vnd schilden	riefen da zehant
des marcraven mage	 von der Hvnen lant 
si wolden Volkern	 ze tode erslagen han 
der wirt vz eime venster	vil harte gahen began
Do hvop sich von den Hvnen	allenthalben schal 
die kvnige vn– ir gesinde	erbeizten fvr den sal 
div ros ze rvch ze stiezen	die Bvrgonden man 
do kom kvnich Ecel	 der herre ez scheiden began
Ein dez Hvnen mage	den er bi im vant 
ein vil scharfez wafen	brach erm vz der hant 
do slvog ers alle widere	wan im waz vil zorn 
wie hete ich minen dienst	 an disen helden verlorn
ob ir bi mir hie slveget	disen spilman	
sprach der kvnich Ecel	 daz were missetan 
ich sach vil wol sin riten	 do er den Hvenen stach 
daz ez an sin schvlde	 von eime struche geschach
Ir mvezet mine geste		vride lazzen han	
do wart er ir geleite	div ros zoch man dan
zvo den herbergen		si heten manigen kneht 
die in mit vlize warn	ze allen dienste gereht
Der wirt mit sinen vrvnden	in den palas gie 
zorn er mer deheinen	da niht werden lie 
do rihte man die tische	daz wazzer man in trvoch 
da heten die von Rene	 der starchen vinde genvoch
E die herren gesezen	des waz harte lanch 
div Kriemhilde sorge	si ze sere twanch 
si sprach	fvrste von Berne	ich svoche dinen rat 
helfe vnd genade	 min dinch mir angestliche stat
Des antwurte ir Hiltebrant	ein reke lobelich 
swer sleht die Niblunge	 der tvot ez ane mich 
dvrh deheins schatzes liebe	ez mag im werden læit 
si sint noh wnbetwungen	 die snellen ritter gemeit
Do sprach in sinen zvhten	dar zvo her Dietrich 
die rede lat beliben	 kvniginne rich 
mir habent iwer mage	 der læide niht getan 
daz ich die degne kvene	 mit strite welle bestan
Div bete ivch lvzel ert	vil edel fvrsten wip 
daz ir iwern magen	 ratet an den lip 
si komen vf genade	 her in dize lant 
Sifrit ist vnerrochen	von Dietriches hant
Do si der vntriwe	an dem Bernere niene vant	[75a]
do lobete si also balde	in Bloedelines hant
eine wite marche	 die Nvodvnch e besaz 
sit do slvog in Dancwart	daz er der gabe gar vergaz
Si sprach	dv solt mir helfen	herre Blvodelin 
ia sint in disem hvse	die viende min 
die Sifriden slvogen		den minen liebe man 
swer mir daz hilfet rechen	den bin ich immer vndertan
Dez antwurte ir Bloedel	 vrowe	nv wizzet daz 
ia entar ich in vor Ecele	geraten cheinen haz 
wan er iwer mage	 vro vil gerne siht 
tete <ich> in iht ze leide	der kvnich vertrvege mir sin niht
Neina	herre Bloedel		ich bin dir immer holt 
ia gib ich dir ze miete	silber vnd golt 
vn– ein maget schoene		 daz Nvodvnges wip 
so maht dv gerne trveten	ir vil minneclichen lip
Daz lant zvo den bvrgen	wil ich dir allez geben 
so mahtv	ritter edel	mit vrovden immer leben 
gewinnestv die marche	da Nvodvnch inne saz 
swaz ich dir lobe hivte	mit triwen leiste ich dir daz
Do der herre Bloedel	die miete vernam 
vn– daz im dvrch ir schoene	div vrowe wol gezam 
mit strite wand er dienen	daz minnecliche wip 
darvmbe mvose der reke	 do verliesen den lip
Er sprach zer kvniginne	 get wider in den sal 
e ez iemen werde innen	so hebe ich einen schal 
ez mz erarnen Hagne		daz er iv hat getan 
ich antwurt iv gebvnden	 dez kvnic Gvntheres man
Nv wafent ivch	sprach Bloedel	alle die ich han 
wir svln den vienden	in die herberge gan 
dez wil mich niht erlazen	daz Eceln wip 
darvmbe svln wir helde	 alle wagen den lip
Do div kvniginne	 Bloedelinen lie
in des strites willen	ze tische si do gie
mit Eceln dem kvnige	vn– ovch mit sinen man 
si heze swinde ræte	an die geste getan
Do der strit niht anders	kvnde sin erhaben	
Kriemhilt leit daz alte	in ir herzen waz begraben	
do hiez si tragen ze tische	den Eceln svn 
wie kvnd ein wip dvrch rache	immer vreislicher tvon
Dar giengen an der stvnde	vier Eceln man 
si trvogen Ortlieben	 den ivngen kvnich dan
zvo der fvrsten tische	da ovch Hagne saz 
dez mvose daz kint ersterben	dvrch sinen mortlichen haz
Do der kvnich riche	 sinen svn ersach 
zvo sinen konemagen	er gvetlichen sprach 
nv sehet	vrivnde mine	daz ist min einich svn
vn– ovch iwere swester	 daz mag iv allen wesen frvm
<Gevaht>	er nach dem kvnne	er wirt ein kvene man 
rich vn– vil edel	starch vn– wolgetan	[75b]
lebe ich dehein wile	ich gib im zwelf lant 
so mag iv wol gedienen	des ivngen Ortliebes hant
Darvmbe bite ich gerne	ivch	lieben vrivnt min 
swenn ir ze lande ritet	wider an den Rin 
so svlt ir mit iv fvern	iwer swester svn 
vn– svlt ovch an dem kinde	vil genediclichen tvon
Vnd ziehet in ze ern	vntz er werde man 
hat iv in den landen	iemen icht getan 
daz hilfet er iv rechen	gewahset im sin lip	
die rede horte ovch Kriemhilt	des kvnich Eceln wip
Im solden wol getrowen	 dise degne 
gewuechse er ze manne		so sprach Hagne 
doch ist der kvnich ivnge	so veiclich getan 
man sol mich sehen selten	 ze hove nah Ortliebe gan
Der kvnich an Hagnen blicte	div rede was im leit 
swie niht darvmbe reite	der fvrste gemeit 
ez trvobte im daz herze	vn– swarte den mvot 
do waz Hagnen wille	niht ze kvrtzwile gvot
Ez tet den fvrsten allen	mit dem kvnige we 
daz Hagne von dem kinde	hete gesprochen e 
daz siz vertragen solden	daz waz in vngemach 
si wessen niht der mere	waz von dem reken sit geschach

loedelins reken	 die warn alle gar 
mit tvsent halspergen	 hvoben si sich dar
da Dancwart mit den knehten	 ob den tischen saz 
da hvop sich vnder helden	der aller groziste haz
Also der herre Bloedel	fvr die tische gie 
Dancwart der marschalch	 in vlizeclich enphie 
willekomen her ze hvse	min her Bloedelin 
ia wundert mich der mere	waz sol disiv rede sin
Ia darftv mich niht grvezen	so sprach Bloedelin 
wan komen min	 mvoz din ende sin
dvrch Hagnen dinen brvoder	der Sifriden slvoch 
des enkiltest dv zen Hvnen	vn– ander degne genvoc
Neina	herre Bloedel	sprach do Dancwart 
so moeht vns balde riwen	disiv hovevart 
ich waz ein wenich kindel	do Sifrit vloz den lip 
ich weiz niht waz mir wizet	des kvnic Eceln wip
la enweiz ich dir der mere	niht me ze sagen 
ez taten dine mage	Gvnther vn– Hagne 
nv wert ich vil ellenden	ir kvnnet niht genesen 
ir mvezet mit dem tode	phant Kriemhilde wesen
So enwelt ir niht erwinden	sprach Dancwart 
so riwet mich min vlegen	daz were baz gespart	
der snelle degne kvene	 von dem tische spranch 
er zoch ein scharfez wafen	daz waz michel vn– lanch
Do slvog er Bloedeline	einen swindent swertes slach 
daz im daz hovbet schiere	vor den fvezen lach	[76a]
daz si din morgengabe	sprach Dancwart der degne 
zvo Nvodunges brvte	der dv mit minne woldest phlegen
Man mach si morgen meheln	einen andern man 
wil er die brvtmiete	dem wirt alsam getan	
ein vil getriwer Hvne	hete im daz geseit 
daz in div kvnigin	 riet so grozlichiv lait
Do sahen Bloedelins man	ir herre la erslagen 
do wolden si den gesten	niht langer daz vertragen 
mit vf erbvrten swerten	si sprvngen fvr div kint
in grimmen mvote	daz gerov vil manigen sint
Lvte rief do Dancwart	daz gesinde allez an 
ir sehet wol	edel knehte	wie ez vmb vns wil gan 
nv wert ivch	ellenden	 deswar des gat vns not 
swie vns die edle Kriemhilt	so rehte gvetlich enpot
Die niht swert heten	die reihten fvr die banch 
vn– hvoben von den fvezen	manigen schamel lanch 
der Bvrgonden knehte	 wolden niht vertragen 
da wart von swern stveln	bvln harte vil geslagen
Wie grimme sich do werten	div ellenden kint 
si triwen vz dem hvse	die gewafenden sint 
doch beleip ir tot darinne	fvnf hvndert <oder> baz 
do waz daz ingesinde	von blvote rot vn– naz
Disiv starchen mere	wurden dan geseit
Eceln reken		ez waz in grimme leit	
daz erslagen were	Bloedel vn– sine man 
daz hete Hagnen brvoder	mit den knehten getan
E ez der kvnic erfvnde	die Hvnen dvrh ir haz
der garten sich zwai tvsent	oder dannoch baz 
si giengen z den knehten	daz mvoz et also wesen	
vn– liezen des gesindes	inndert einen genesen
Die vngetriwen brahten	fvrz hvs ein michel her 
die ellenden knehte	stvonden wol ze wer 
waz half ir baldez eilen	si mvosen ligen tot 
darnach in kvrzen stvnden	sich hvop ein vreislicher not
Hie mvget ir hoem wunder	 bi vngefvoge sagen 
nivn tvsent knehte	die lagen tot erslagen 
darvber ritter zwelfe	der Dancwartes man 
man sach in alterseine	noch bi den vienden stan
Der schal was geswiftet	der doz waz gelegen 
do blicte vber ahsel	Dancwart der degn 
er sprach	owe der vrivnde	die ich verlorn han 
nv mvoz ich leider eine	 bi minen vienden stan
Div swert genote vieln	 vf sin eins lip 
daz mvose sit beweinen	vil maniges heldes wip 
den schilt den rvcte er hoher	den vezzel nider baz 
do vrumte er vil der ringe	 von blvote vliezende naz
So we mir dirre leide	 sprach Aldrians kint 
nv wichet	Hvnen reken	ir lat mich an den wint 
daz der lvft erkvele	mich stvrmmveden man	[76b]
do sach man den reken	vil harte vroelichen gan
Also der stritemvede	vz dem hvse spat 
waz iteniwer swerte	vf seim helme erklanch 
die niht gesehen heten	waz wunders tet sin hant 
die sprvngen enkegne hin	von dem Bvrgonden lant
Nv wolde got	sprach Dancwart	moeht ich den boten han 
der minen brvoder Hagnen	 kvnde wizzen lan 
daz ich vor disen reken	 sten in soelher not 
er hvlfe mir von hinnen	 oder er gelege bi mir tot
Do sprachen Hvnen reken		der bote mvostv sin 
so wir dich tragen toten	fvr den brvoder din 
so silhet im erste leide	der Gvnthers man 
dv hast dem kvnige Ecele	so grozen schaden hie getan
Er sprach	nv lat daz dron	vn– wihet hoher baz 
ia getvon ich eteslichem	noh die ringe naz 
ich wil div mere selbe	hin ze hove sagen 
vn– wil ovch minen herren	minen grozen kvmber klagen
Er leidete sich so sere	den Eceln man 
daz si in mit den swerten	torsten niht hestan 
do schvzzen si der gere	so vil in sinen rant 
daz er in dvrch die swere	mvose lazen von der hant
Do wandens in betwingen	do er niht schildes trvoch 
hei waz er tiefer wunden	dvrch die helme slvoch 
des mvose vor im striche	manich kvener man 
darvmbe lop vil grozen	 der kvene Dancwart gewan
Ze beiden sinen siten	sprvngen si im zvo 
ia kom ir eteslicher	in den strit ze vrvo 
do gie er vor den vienden	alsam ein eberswin
ze walde tvot vor hvnden	 wie moht er kvener gesein
Sin vart <div> wart erniwet	von heizem blvote naz 
wie kvnd ein einich reke	gestriten immer baz
mit sinen vinden	dann er hete getan 
man sach Hagnen brvoder	ze hove herlichen gan
Trvhsatze vn– schenchen	die horten swerte klanch 
vil maniger do daz trinchen	von der hende swanch
vn– eteliche spise	die man ze hove trvoch 
do kom im vor der stiegen	der starken viende genvoch
Wie nv ir trvhsetzen	sprach der mvede degne 
ia soldet ir der geste	vil gvetlichen phlegen 
vn– soldet den herren	gvote spise tragen 
vn– liezet mich div mere	minen lieben herren sagen
Swelher dvrch sein eilen	im fvr die stiegen spranch 
der slvog er etelichen	so sweren swertes swanch 
daz si dvrch die vorhte	vf hoher mvosen stan 
ez het sin starchez ellen	vil michel wunders getan

lso der kvene Dancwart	vnder div tvr getrat 
daz Eceln gesinde	er hoher wichen bat 
mit blvote waz bervnnen	allez sin gewant	[77a]
ein vil scharfez wafen	trvog er bloz an siner hant
Uil lvte rief do Dancwart	zvo dem degne 
ir sitzet alze lange	brvoder Hagne 
iv vnd gote von himele	klage ich vnser not 
rittere vn– knehte	sint an den herbergen tot
Er rief im hin enkegne	 wer hat daz getan	
daz hat der herre Bloedel	vn– sein man 
ovch hat ers sere enkolten	daz wil ich iv sagen 
ich han mit minen handen	 im sin hovpt ab geslagen
Daz ist ein schade kleine	sprach do Hagne 
da man sæit mere	 von eime degne 
ob er von reken handen	verlivzet sinen lip 
in svln deste ringer	klagen wætlichiv wip
Nv saget mir	brvoder Dancwart	wie sit ir so tot 
ich wene ir von wunden	lidet groze not 
ist er inder inme lande	der ez iv hat getan 
in erner der vbel tivel	ez mvoz im an sin leben gan
Ir sehet mich wol gesvnden	min wat ist blvotez naz
von ander manne wunden		ist mir geschehen daz 
der ich also manigen	 hivte han erslagen 
ob ich des swern solde	ich kvndez nimmer gesagen
Er sprach	brvoder Dancwart	so hvetet vns der tvr 
lat der Hvnen einen	 komen niht derfvr 
ich wil reden mit den reken	als vns des twinget not 
vnser ingesinde	lit vor in vnverdienet tot
Sol ich sin kamerere	sprach der kvene man 
also richen kvnigen	ich wol gedienen chan 
so phlige ich der stiegen	nah den eren min	
den Kriemhilde degnen	 kvnde leider niht gesein
Mich nimet des michel wunder	sprach aber Hagne 
waz nv hie inne rvnen	 die Hvnen degne 
si wene dez lihte enbern	der an tvr da stat
vn– div hovemere		geseit den Bvrgonden hat
Ich han vernomen lange	von Kriemhilde sagen 
daz si ir herzeleide	wolde niht vertragen 
nv trinken wir die minne	vn– gelten des kvniges wein 
Der ivnge voit der Hvnen	der mvoz der aller erste sin
Do slvoch daz kint Ortlieben	Hagne der helt gvot 
daz im gein der hende	anme swerte vloz daz blvot
vn– der kvniginne	daz hovpt spranch in die schoz 
do hvop sich vnder den degnen	ein mort vil grimme vn– groz
Er slvoch dem meitzogen	einen swinden swertes slach
mit beiden sinen henden	der des kindes phlach 
daz im daz hovbet schiere	vor tische nider lach 
ez was ein iemerlich lon	den er dem maitzogen wach
Er sach vor Eceln tische	einen spilman 
Hagne in sime zorne	 gahen dar began 
er slvog im vf der gigen	abe die zeswen hant 
daz habe dir ze botschefte	in der Bvrgonden lant	[77b]
So we mir miner		sprach Wærbel san 
her Hagne von Trony	 waz han ich <iv> getan 
ich kom vf groze triwe	in iwer herren lant 
wie klenk ich nv die doene	sid ich verlorn han die hant
Hagne ahte ringe	gevidelte er nimmer mer 
do vrvmte er inme hvse	div werchgrimme ser
an den Eceln reken	der er so vil erslvoch 
do brahte er in dem hvse	der reken ze tode genvoch
Uolker der vil snelle	von dem tische spranch 
sin videlboge im lvte	an siner hant erklanch 
do videlte vngefvoge	 Gvnthers spilman 
hey waz er im ze viende	der kvenen Hvnen gewan
<ovch> sprungen von dem tischen	die dri kunige here 
si woldenz gerne scheiden	e schade geschæhe mer 
si mochtenz mit ir sinnen	do niht vnderstan 
do Volker vn– Hagne	so sere wueten began
Do sach der voit von Rine	vngescheiden den strit 
do slvoch der fvrste selbe	manige wunden wit
dvrh die liehten ringe	den vienden sin 
er waz ein helt zen handen	daz tet er groezlichen schin
Do kom ovch zvo dem strite	 der starche Gernot 
ia vrvmte er der Hvnen	vil manigen helt tot
mit eime scharfen swerte	 daz im gap Rvedeger 
den Eceln reken	 tet er div gremlichen ser
Der ivnge svn vrovn voten	zvo dem strite spranch 
sin wafen herlichen	dvrch die helme ranch
den Eceln reken	vz der Hvnen lant 
da tet vil michel wunder	des kvenen Gyselhers hant
Swie vrvm si alle warn	 die kvnige vn– ovch ir man 
do sach man vor in allen	Gyselhern stan
gein den vienden	ez ist ein helt gvot 
er vrumte mit willen	manigen vallen in daz blvot
oech werten sich vil sere	die Eceln man 
do sach man och die geste	howende gan
mit den vil liehten swerten	dvrh des kvniges sal 
man horte allenthalben	von woffe grozzlichen schal
Do wolden die dar vze	 zvo ir vrivnden sin dar in 
die namen an den tvrn	 vil kleinen gewin 
do wern die dar inne	 vil gerne fvr den sal 
Dancwart liez ir deheinen	die stiegen vf noch zetal
Des hvop sich vor den tvrn	vil starcher gedranch
vn– ovch von den swerten	grozer helm klanch 
des kom der kvene Dancwart	in eine groze not
da besorgte sin brvoder	als im sin triwe gebot
Uil lvte rief do Hagne	Volkern an 
sehet ir dort	geselle	minen brvoder stan
vor hunelichsen reken	vnder starken slegen	
vrivnt	nert mir den brvoder	wir verliesen	den degen
Daz tvon ich sicherlichen		 sprach der spilman	[78a]
er begvnde videlnde	dvrch den palas gan 
ein hertez swert im ofte	an siner hant erkanch 
die reken von Rine	im seiten grozlichen danch
Volker der kvene	 zvo Dancwarte sprach 
ir habet erliten hivte	vil grozen vngemach 
mich bat iwer brvoder	 dvrch helfe zvo iv gan 
welt ir nv sin dar vze	 so wil ich innerthalben stan
Dancwart der snelle	 stvont vzerhalp der tvre 
er werte in ir stiege	 swaz ir kom da fvre 
des horte man waffen hellen	den helden an der hant 
sam tet ovch innerthalp		Volker von Bvrgonden lant
Der kvene videlere	rief vber die menige 
der sal ist wol beslozen	vriunt her Hagne 
ia ist also verschrenchet	div Ecelen tvre
von zweier helde handen	da gent wol tvsent rigele fvr
Do von Trony Hagne	div tur sach so behvot 
den schilt warf do ze rvcke	der mære helt gvot 
alrest begvnd er reken	daz im da waz getan 
do heten sine viende	 ze lebne deheiner slahte wan
Do der voit von Rine	 rehte daz ersach 
daz Hagne der starche	so manigen helm brach 
ein kvnich von Amelvnge	spranch vf eine banch 
er sprach	hie schenket Hagne	daz aller wirste tranch
Der wirt hete groze sorge	 als im daz gezam	
waz man im lieber vriunde	 vor sinen ovgen nam	
wan er vor sinen vienden	vil kvme da genas 
er saz vil angestlich	waz half in daz er kvnic waz
Kriemhilt div riche		rief Dietrichen an 
hilf mir	ritter edel	mit dem libe dan 
dvrh aller fvrsten tvgent	vz Amelvnge lant 
wan erreichet mich Hagne	ich han den tot an der hant
Wie sol ich iv gehelfen	sprach her Dietrich 
edel kvniginne		 nv sorge ich vmbe mich 
ez sint so ser erzvrnet	Gvntheres man 
daz ich an disen ziten	niemen gevriden kan
Neina	her Dietrich	 edel ritter gvot 
laza hivte schowen	dinen tvgentlichen mvot 
daz dv mir helfest hinnen	oder ich belibe tot 
mich twinget iamers sorge	ez gat mir an des libes not
Daz wil ich versvochen	ob ich iv gehelfen kan 
wan ich in langen ziten	nie gesehen han
so bitterlich erzvrnet	manigen ritter gvot 
ia sihe ich dvrh die helme	von swerten springen daz blvot
Mit kraft begvnde rvefen	 der ritter vz erkorn 
daz sin stimme erlute	 alsam ein wisntes horn 
vn– daz div bvrch vil wite	von siner kraft erdoz 
div sterke Dietriches	was <vnmazichen> groz
Do gehorte rvefen	 Gvnther disen man
in dem vil herten sturme	losen er began	[78b]
er sprach	Dietriches stimme	ist in min ore komen 
ich wen im vnser degne	 haben etwen benomen
Ich sich in vf dem tische	winken mit der hant 
vrivnt vn– mage		von Bvrgonden lant 
habet vf des strites	lat hoern vnd sehen
waz hie dem degne	von minen mannen si geschehen
Do der kvnich Gvnther	bat vnd ovch gebot 
si habten vf mit swerten	in des strites not 
daz was gewalt vil grozer	daz da niemen slvoch 
er vragte den von Berne	der mere schiere genvoch
Er sprach	vil edel Dietrich	waz ist iv hie getan
von minen vriunden		 willen ich des han 
bvoze vn– svone		 der bin ich iv bereit 
swaz iv iemen tete		daz wer mir innerclichen leit
Do sprach der herre Dietrich	 mir ist niht getan 
lat mich vz dem hvse	 mit ivrme vride gan
von disem hertem strite	mit dem gesinde min 
daz wil ich sicherlichen	immer dienende sin
Wie vilehet ir so schiere	sprach der Wolfhart 
ia hat der videlere	die tur nie so verspart 
wir entsliezen si so wite	daz wir dar fvr gan	
nv swie	sprach her Dietrich	dv hast den tievel getan
Do sprach der kvnich Gvnther		 erlovben ich iv wil 
fvert vz dem hvse	wenich oder vil 
an mine viende	 die svln hie bestan 
si hant mir zen Hvnen	so rehte leide getan
Do er daz erhorte	vnder arm er besloz
die edeln kvniginne	ir sorge waz vil groz 
do fvort er anderthalben	Eceln mit im dan 
ovch gie mit Dietriche	vil manich wetlicher man
Do sprach der edel	 marcrave Rvedeger 
sol aber vz dem hvse	iemen komen mer 
die iv doch gerne dienent	daz lat vns vernemen 
so sol vride stete	gvoten vriunden zemen
Dez antwurte Gyselher	von Bvrgonden lant 
vride vn– svone	si iv von vns bekant 
sit ir sit triwen stete	ir vn– iwer man 
ir svlt vnangestlichen	 mit vren vrivnden hinnen gen
Do der herre Rvedeger	 gervmte den sal 
fvnf hvndert oder mere	im volgten vber al 
daz was von herren	dvrch triwe getan 
da von der kvnich Gvnther	sit grozen schaden getan
Do sach ein Hvnen reke	Eceln gan
bi Dietriche nahen	genozzen wold ers han 
dem gap der videlere	einen soelhen slach 
daz im daz hovbet schiere	vor Eceln fvezen gelach
Do der wirt des landes	kom fvr daz hvs gegan 
do kerte er sich hin wider	vn– sach Volkern an 
owe mir dirre geste	 ditz ist ein grimme not	[79a]
daz alle mine reken	vor in svln ligen tot
Ach we der hohzite	sprach der kvnich her 
da vihtet einer inne	der heizet Volker 
alsam ein eber wilde	vn– ist ein spilman 
ich dankes mime heile	daz ich dem tievel entran
Sin leiche lvtent vbel	sin zvge sint rot 
ia wellent sine doene	 manigen helt tot 
ich weiz niht waz vns wiset	der selbe spilman 
wan ich gast nie einen	so rehte leiden gewan
Si heten die si wolden	lazen fvr den sal 
do hvop sich innerhalben	grozlicher schal 
die geste sere rachen	daz in e geschach 
Volker der vil kvene	 hey waz er helme zebrach
Sich kerte gein dem schalle	Gvnther der kvnich her 
hoert ir die doene	Hagne	die dort Volker
videlt mit den Hvnen	 swer zvo den tvrn gat 
ez ist ein roter anstrich	den er zem videlbogen hat
Mich riwet ane maze	 so sprach Hagne 
daz ich ie gesaz in dem hvse	vor dem degne 
ich waz sin geselle	vn– ovch er der min 
kom wir immer wider heim		 daz svl wir noh mit triwen sin
Nv schowe	kvnich her		 Volker ist dir holt 
er dient willeclichen	 din silber vn– din golt 
sin videlboge snidet		dvrch den herten stal 
er brichet vf den helmen	div lieht schinenden mal
In gesach nie videlere	so herlich stan 
also der degen Volker	hivte hat getan 
sin leiche hellent	dvrch helm vn– dvrch rant 
ia sol er riten gvotiv ros	vn– tragen herlich gewant
Swaz der Hvnen mage		 in dem sale was gewesen 
der waz nv deheiner	 dar inne me genesen 
des waz der schal geswiftet	daz niemen mit in streit 
div swert von handen leiten	die kvenen reken gemit

ie herren nach ir mvede	gesazen do zetal 
Volker vn– Hagne	 die	ien	en fvr den sal 
sich leinden vber schilde	die vbermveten man 
do wart da rede spehe	 von in beiden vil getan
Do sprach von Bvrgonden	Gyselher der degen 
ia mvget ir lieben vrivnde	noch ruewe niht geplegen 
ir svlt die toten lvte	vz dem hvse tragen 
wir werden noch bestanden	ich wilz iv werlichen sagen
Si svln vns vnder fvezen	hie niht langer ligen 
e daz vns die Hvnen	 mit stvrme an gesigen 
wir howen noch die wunden	div mir vil sanfte tvot 
des han ich	sprach do Geyselher	einen stetigen mvot
So wol mich solhez herren	 sprach do Hagne 
der rat enzeme niemen	 wan eime degne 
den vns min ivnger herre	hivte hat getan	[79b]
des mvget ir Burgonden		alle vroelichen stan
Do volgten si dem rate	 vn– trvogen fvr die tvr
siben tvsent toten	 wurfen si der fvr 
vor des sales stiegen	vieln si cetal 
do hvop sich von ir magen	ein vil klagelicher schal
Ez waz ir etlicher	so mazlichen wunt 
der sin sanfter pflege	er wurde noch gesvnt 
der von dem hohen valle	mvoze ligen tot 
daz klagten al ir vriunde	des gie in werlichen not
Do sprach der videlere	Volker	ein helt gemeit 
nv kiuse ich des die warheit	als mir ist geseit 
die Hvnen sint boese	 si klagent sam div wip 
si solden wan bervochen	der vil sere wunden lip
Do wand ein marcraue	 er reitez dvrch gvot 
er sach einen sinen mak	gevallen in daz blvot 
er beslorin mit den armen	vn– wold in tragen dan 
den schoz ob im ze tode	der vil kvene spilman
Do die andern daz <sahen>	div flvht hvop sich von dan 
si begvnden alle vluochen	dem selbem spilman 
einen ger er vf zvcte	vil scharf vn– hart 
der von eime Hvenen	zvo im dar vf geschozzen wart
Den schoz er krefticlichen	dvrch die burch dan
vber daz volch verre	den Eceln man
gab er herberge	 hoher von dem sal 
sin vil starkez ellen	die lvte vorhten vber al
Do stvonden vor dem hvse	manich tvsent man 
Volker vn– Hagne		reden do began
mit Eceln dem kvnige	allen ir mvot 
des komen sit in sorge	die helde kvene vn– gvot
Ez zæme	so sprach Hagne	vil wol volker trost 
daz die herren vehten	 ze aller vorderost 
also der minen herren	 hie islicher tvot 
die howent dvrch die helme	daz nach den swerten vlivzet blvot
Ecel waz der kvene	 er vazte sinen schilt 
nv vart gewerlich	 sprach vrov Kriemhilt 
vn– bietet ir den reken	daz golt vber rant 
wan erreichet ivch Hagne	ir habet den tot an der hant
Der kvnic waz so kvene	 er sold erwinden niht	
daz von so richen fursten	selden nv geschiht 
man mvos in bi dem vezzel	 ziehen wider dan 
Hagne der grimme		in aber hoenen began
Ez was ein verre sippe	sprach Hagne der degne 
wie Ecel vn– Sifrit	 zesamne hat gephlegen 
er minnete Kriemhilden	e si ie gesæhe dich 
kvnich vil boese	warvmbe ratest ane mich
Dise rede horte	des edeln kvniges wip 
des wart in vngemvete	Kriemhilde lip 
daz er si torste schelden	vor Ecelen man 
darvmbe si aber raten	an die geste began	[80a]
Si sprach	der von Trony	Hagen slvege
vn– mir sin hovbet	her fvr mich trvoge 
dem svlt ich rotes goldes	den Eceln rant 
dar zvo gebe ich im ze miete	vil gvote bvrge vn– lant
Nv enweiz ich wes si bitent	sprach der spilman 
ine gesach nie helde me	 so zagelichen stan 
da man horte bieten		also hohen solt 
ia ensold in Ecel	 darvmbe nimmer werden holt
Die hie so lasterlichen	ezzent des kvniges brot
vn– im nv geswichent			in der groezisten not 
der sihe ich hie manigen	vil zaglichen stan 
vn– wellent doch sin kvene	si mvezens immer schande han

o rief von Tenemarke	der marcraue Irinch 
ich han vf ere lazen	nv lange miniv dinch 
vn– han in volkers stvrmen	des besten vil getan 
bringet mir min gewefne	ia wil ich Hagne bestan
Daz wil ich widerraten	sprach do Hagne 
so hiez vf hoher wichen	die Hvnen degne 
gespringent iwer zwene	 oder dri in den sal 
die send ich vngesvnde	 die stiegen widere zetal
Darvmbe ichz niht enlaze	sprach aber Irinch 
ich han ovch e versvochet	 sam sorclichiv dinch 
ia wil ich mit dem swerte	eine dich bestan 
waz hilfet din vbermvot	daz dv mit rede hast getan
Do wart gewafent balde	 der degen Irinch
vn– Irnvrit von Dvringen	 ein kvener <ivngelinch> 
vn– Hawart der starche	 wol mit tvsent man 
swes Irinch begvnde	 si woldens alle ime gestan
Do sach der videlere	ein vil groze schar 
die mit Iringe	 gewafent komen dar 
si trvogen vf gebvnden	manigen helm gvot	
do wart der kvene Volker	ein teil vil zornich gemvot
Sehet ir	vrivnt Hagne	dort Iringen gan 
der ivch mit dem swerte	lobete eine bestan 
wie zimet helde liegen	 ich vmbrisen daz 
ez gent mit im gewafent	tvsent reken oder baz
Nv heizet mich niht liegen	sprach Hawartes man 
ich wil gerne leisten	daz ich gelobet han 
dvrch deheine vorhte	 wil ichs abe lan 
swie grvlich nv si Hagne	ich wil in eine bestan
Ze fvezen bot sich Irinch	magen vn– man 
daz sin eine liezen	 den reken bestan 
daz taten si vngerne	wan in was wol bekant
der vbermvot Hagnen	 vz Bvrgonden lant
Doch bat er si so lange	daz ez sit geschach 
do daz ingesinde	sinen willen sach 
daz er warp nah eren	do liezens in gan 
des wart von den beiden	ein grimmez stritten getan
Irinch von Tenemarchen	hohe trvoch den ger	[80b]
sich tacte mit dem schilde	der tiwer degne her 
do lief er vf zvo stagnen	vaste fvr den sal 
do hvop sich von den degnen	ein vil grozlicher schal
Do schvzzen si die gere	mit krefte von der hant
dvrh die vesten schilte	vf liehtez ir gewant 
daz die gerstangen	 hohe dræten dan 
do griffen zvo den swerten	die zwene grimme kvene man
Des kvenen Hagnen ellen	 daz waz starch groz 
doch slvog vf in Irinch	daz al daz hvs erdoz 
palas vn– tvrne	 hullen nach ir slegen 
do kvnde niht verenden	sins willen der degen
Irinch lie Hagnen	vnuerwundet stan 
zvo dem videlere	gahen er began 
er wand in mvgen twingen	mit sinen starken slegen 
daz kvnde wol beschermen	der vil zierlich degen
Do slvoch der videlere	daz vber des schildes rant
dræte daz gespenge	 von Volkers hant 
den liez er do beliben	er was ein vbel man 
do lief er Gvnthern	der Bvrgonden kvnich	an
Do waz ir ietweder	 ze strite starch genvoch 
swaz Gvnther vn– Irinch	vf ein ander slvoch 
daz brahte niht von wunden	vliezendes blvot 
daz behvote ir gewefne	daz waz schoene vnd gvot
Gvnthern er lie beliben	vn– lief Gernoten an 
daz viwer vz den ringen	hvowen er in began 
do hete von Bvrgonden	 der kvnich Gernot
den kvenen Iringen	erslagen næhlichen tot
Do sprang er von dem fvrsten	snel er was genvoch 
der Burgonden viere	 der helt vil balde slvoch
des edeln ingesindes	von Wormz vber Rin 
do enkvnde Geysehere	nimmer zorner gesin
Got weiz	der Irinch	sprach Geyselher daz kint 
ir mvezet mir die gelten	div von iv tot sint
gelegen an den stvnden	 do lief er in an 
er slvoc den Tenelender	 daz er mvese da bestan
Er schoz vor sinen handen	nider in daz blvot 
daz si alle wanden	 daz der helt gvot
ze strite nimmer me	geslvege keinen slach 
Irinch doch ane wunden	hie vor Geyselhere lach
Von des helmes <doze>	vn– von des swertes klanch
warn sin witce	worden harte kranch 
daz sich der degen kvene	des lebens niht versan 
daz hete mit sinen kreften	der starche Geyselher getan
Do im begvnd entwichen	von hovpte der doz 
den er e da dolte	von dem slage groz 
er dahte	ich bin noch lebendech	vn– ovch ninder wunt 
nv ist mir alerst	daz ellen Geyselheres kvnt
Er horte beidenthalben	die viende stan 
wessen si div mere	im were noch me getan 
ovch het er Geyselhern	da bi im vernomen	[81a]
er dahte wi er solde	von den vienden komen
Wie rehte tobelichen	er vz dem blvote spranch 
siner snelheit	er mahte sagen danch 
do lief er vz dem hvse	da er Hagnen vant
vn– slvog im slege swinde	mit siner ellenthafter hant
Do dahte Hagne		dv mvost des todes wesen 
dich envride der tievel	dv kanst niht genesen 
doch wundet Irinch Hagnen	dvrch den helme gvot 
daz tet der helt mit Wasken	daz waz ein wafen vil gvot
Do der herre Hagne	der wunden enphant 
do erwagte im vngefvoge	daz swert an siner hant 
al da mvost im entwichen	der Hawartes man 
abe von der stiegen	Hagne volgen im began
Irinch der vil kvene	den schilt vber hvobet swanch 
vn– were div selbe stiege	drier stiegen lanch 
die wile lie in Hagne	nie slahen einen slach 
hey waz roter vanken	 ob sime helme gelach
Wider zvo den sinen	kom Irinch wol gesvnt 
do wurden disiv mære	Kriemhilde kvnt 
waz er von Trony Hagnen	in strite hete getan 
des im div kvnigin	vil hohe danken began
Nv lone dir got	Irinch	vil mere helt gvot 
dv hast mir wol getoerstet	daz herze vn– ovch den mvot	
nv sihe ich rot von blvot	Hagnen sein gewant	
Kriemhilt nam im selbe	 den schilt vor liebe von der hant
Ir mvget im mazen danken	so sprach Hagne 
wold erz noch versvochen	 daz zeme degne 
koem er danne widere	 so wer ein kvene man 
div wunde frvmet iv kleine	die ich von im enphangen han
Daz ir von miner wunden	die ringe sehet rot 
daz hat mich erreizzet	vf maniges mannes tot 
ich bin erst erzvrnet	wan ich lvzel schaden han 
mir hat der degen Irinch	noch vil kleine getan
Do stvont gein dem winde	Irinch von Tenelant 
er kvolte sich in ringen	den helm er abe gebant 
do sprachen al die lvte	sin ellen were gvot 
des hete der marcraue	einen rich hohen mvot
Aber sprach do Irinch	 mine vriunt wiz der daz 
daz ir mich wafent schiere	ich wilz versvochen baz 
ob ich mvge betwingen	den vbermvoten man	
sin schilt waz verhowen	einen bezzer er gewan
Vil schiere wart der reke	do gewafent baz 
einen ger vil starken	nam er dvrch den haz 
da mite er aber wolde	Hagnen dort bestan 
do wartet im vientliche	Hagne der vil kvene man
Sin mohte niht erbiten	Hagne der degne 
er lief im hin enkegne	mit schvzzen vn– slegen
die stiegen an ein ende	sin zvrnen daz waz groz 
Irinch siner sterke	do vil wenich genoz
Si slvogen dvrch die schilde	daz ez lovgnen began [81b]
von viwer roten winden		der Hawartes man
wart von Hagnen swerte		krefteclich wunt
dvrch schilt vnd helm		des er wart nimmer me gesvnt
Do der degen Irinch		 der wunden enpfant 
den schilt er baz do ruete	vber div helmbant 
der schade in dvhte der volle	den er da gewan 
sit tet im aber me	des kvnich Gvnthers man
Hagne vor sinen fvezen	einen ger ligen vant 
er schoz vf Iringen	den helt von Tenelant 
daz im von hovbte	div stange ragte dan 
im hete der reke Hagne	den grimmen ende getan
Irinch mvost entwichen	zvo den von Tenelant 
e man do dem degne	den helm ab gebant 
man brach den ger von hovbte	do nahte in der tot 
daz weinden sine mage	 des gie si werlich not
Do kom div kvnigin	vber in gegan 
den starken Iringen	 klagen si began 
si weinde sine wunden	ez waz ir grimme leit 
do sprach vor sinen magen	der kvene reke vngemeit
Lat die klage beliben	vil hetlichez wip 
waz hilfet iwer weinen	ia mvoz ich minen lip
verliesen von den wunden	die ich enphangen han 
der tot wil mich niht langer	iv vnd Eceln lan
Er sprach zvo den von Dvringen	vn– den von Tenelant 
die gabe sol enphahen	iwer deheins hant
von der kvniginne	ir liehtez golt vil rot 
vn– bestet ir Hagnen	ir mveset kiesen den tot
Sin varwe was erblichen	des todes zeichen trvoch
Irinch der vil kvene	daz waz in leit genvoch 
genesen niht enmohte	der Hawartes man 
do mvos ez an ein striten	von den von Tenemarke gan
Irnvrit vn– Hawart	 sprvngen fvr daz gadem
mit tvsent helden	vil vngefvegen starcken
horte man allenthalben	kreftek vnd groz 
hey waz man scharfer gere	zvo den Bvrgonden schoz
Irnvrit der kvene	lief an den spilman 
des er schaden grozen	von siner hant gewan 
der edel videlere	den lantcrauen slvoch
dvrch einen helm veste	ia waz er grimme genvoch
Do slvoch der herre Irnvrit	den kvenen spilman 
daz im mvosen bresten	div ringes gespan 
vn– daz sich beschvtte	 div brvnne viwer rot 
doch viel der lantcraue	vor dem videlere tot
Hawart vn– Hagne		 zesamne warn komen 
er mohte wunder kiesen	derz hete war genomen 
div swert genote vieln	den heiden an der hant 
Hawart mvoste sterben	 von dem von Bvrgonden lant
Do die Tenen vn– die Dvring	ir herren sahen tot 
do hvop sich vor dem hvse	ein vreislicher not 
e si die tvr gewunnen	mit ellenthafter hant	[82a]
des wart da verhowen	manich helm vn– rant
Wichet	sprach do Volker	vnd lat si her in gan 
ez ist stvst vnverendet	des si da habent wan 
si mvezen dar inne sterben	in vil kvrzer zit 
si arnent mit dem tode	 daz in div kvniginne git
Do die vbermveten		komen in den sal 
vil manigem wart daz hovbet	geneiget so zetal 
daz er mvost ersterben	von ir swinden slegen 
wol streit der kvene Gernot	sam tet ovch Geyselher der degen
Tvsent vnd viere	komen in daz hvs 
von swerten sach man bliken	vil manigen swinden svs 
sit wurden doch die reken	alle drinne erslagen 
man mohte michel wunder	 von den Bvrgonden sagen
Darnach wart ein stille	do der schal verdoz 
daz blvot allenthalben	 dvrch div locher vloz
vn– da ze den rigelsteinen	von den toten man 
daz heten die von Rine	 mit starchen ellen getan
Do sazen aber rawen	 die von Bvrgonden lant 
div wafen mit den schilden	si leiten von der hant 
do stvont noch vor dem hvse	der kvene spilman 
er warte ob iemen wolde	noch zvo in mit strite gan
Der kvnich klagte sere	sam tet ovch sin wip 
meide vn– vrowen	 quelten da den lip 
ich wene des	daz hete	der tot vf si gesworn 
des wart noch vil der reken	von den gesten da verlorn

v bindet ab die helme	 sprach Hagne der degen 
ich vn– min	geselle		 svln iwer phlegen 
vn– wellent ez versvochen	noch die Eceln man 
so warn ich mine herren	so ich aller schierst kan
Do entwafende daz hovbet	manich ritter gvot 
si sazen vf die wunden	die vor in in daz blvot
warn zvo dem tode	von ir handen komen 
da wart der edeln geste	vil boese govme genomen
Noch vor dem abende	schvof der kvnich daz
vn– ovch div kvniginne	daz ez versvochten baz
die hvnischen reken	der sach man vor im stan
noch wol zweinzich tvsent	die mvosen da ze strite gan
Sich hvop ein stvrm herte	zvo den gesten san 
Dancwart	Hagnen brvoder	der vil snelle man
spranch von sinen herren	zen vienden fvr die tvr 
man wand er wer estorben	er kom gesvnt wol derfvr
Der herte strit werte	vntz in div naht benam 
do werten sich die geste	so gvoten helden zam 
der Eceln manne	 den svmerlangen tach 
hey waz gvoter degne	vor in weige gelach
Ze einen svnewenden	der groze mort geschach 
daz div vrowe Kriemhilt	ir herzeleit errach
an ir nehsten magen	vn– an vil manigem man 
da von der kvnich Ecel	vrovde nimmer me gewan	[82b]
In waz des tages zervnnen	do gie in sorge not 
si dahten daz in bezzer	wer ein kvrzer tot 
danne lange da ze quæle ein	vf vngefvegiv leit 
eines vrides do gerten	die stolzen rittere gemeit
Si baten daz man brehte	den kvnich zvo in dar 
die blvotvarwen helde	vnd ovch harnaschvar
traten zvo dem hvse	 vnd die dri kvnige her 
si enwessen wem ze klagenne	ir vil grozlichiv ser
Ecel vnd Kriemhilt	 komen beidiv dar 
daz lant waz ir eigen	des merte sich ir schar 
er sprach zvo den gesten	 nv saget	waz welt ir min 
ir went vride gewinnen	 daz kvnde mvelich gesin
vf schaden also grozen	als ir mir habet getan 
ir svltez niht geniezen	sol ich min leben han 
min kint daz ir mir slvoget	vn– vil der mage min 
vride vnd svone	sol iv vil gar versaget sin
Svs antwurte Gvnther	 des twang vns groziv not 
allez min gesinde	lach vor dienen helden tot
an der herberge	wie hete ich daz versolt 
ich kom zvo dir vf driwe	ich wande daz dv mir werst holt
Do sprach von Bvrgonden	 Geyselher daz kint 
ir Ezeln helde	die noch lebende sint 
waz wizet ir mir reken	waz het ich iv getan 
wan ich frivntliche	in ditze lant geriten han
Si sprachen	diner gvote	st al div bvrk vol
mit iamer zvo dem lande	 ia gvnde wir dir wol 
daz dv nie komen werest	 von Wurmz vber Rin 
daz lant hat ir verweiset	dv vnd die brveder din
Do sprach in zornes mvote	 Gvnther der degen 
welt ir ditze starcke	ze einer svone legen
mit vns ellenden reken	daz ist vns beidenthalben gvot 
ez ist gar an schvlde	swaz vns Ezel getvot
Do sprach der wirt zen gesten	 min vnd iwer læit 
div sint vngeliche	div starke arebeit
des schaden zvo den shanden	die ich hie han genomen 
des sol iwer deheiner	nimmer hinne komen
Do sprach zvo dem kvnige	der starcke Gernot 
so sol iv got gebieten	daz ir frivntlichen tvot 
slaht vns ellende	 vn– lat vns zvo iv gan
hin nider an die weite	daz ist iv ere getan
Swaz vns da geschehen chvnne	 daz lat da kvrtz ergan 
ir hapt so vil gesvnder	vnt tvrrens vns bestan 
daz si vns stvrm mvede	lazent niht genesen 
wie lange svl wir reken	in disen arebeiten wesen
Die Ezeln reken	die heten ez nach getan 
daz si si wolden lazzen	fvr den palas gan 
daz gehorte Kriemhilt		ez waz ir grimme leit 
dez wart den ellenden	 der fride gahes widersait
Næina	ziere reken	 des ir da habet mvot 
ich rate an rehten triwen	daz ir	dez niht entvot	[83a]
daz ir die mortrezen	iht lazet fvr den sal 
so mvozen iwer mage	liden den toetlichen val
Ob ir nv niemen lebte	wan div voten kinde 
die minen edelen brvoder	vn– chomens an den wint 
erchvolent in die ringe	 so sit ir alle verlorn 
ezn wir den chvoner degene	ze werlde nie geborn
Do sprach der ivnge Giselher	 vil schoeniv swester min 
des getrovt ich vil vbel	do dv mich vber Rin
ladeste her ze lande		in dise groze not 
wie han ich an den Hvenen	hie verdienet den tot
Ich waz dir ie getriwe	nie tet ich dir læit 
vf solhen gedingen	her ze hove ich reit 
daz dv mir holt werest	vil liebiv swester min 
bedenche an vns genade	ez mach niht anders gesin
Ich en mag iv niht genaden	 vngenade ich han 
mir hat von Tronge Hagene	so groziv lait ge
ez ist vil vnversvenet	die wile ich han den lip
ir mvestes alle engelten		sprach daz Ezeln wip
Welt ir mir Hagen æinen	ze einem gisel geben 
so wil ich niht versprechen	ich en welle iv lazen leben 
wan ir sit mine brveder	vn– einer mvoter chint 
so red ichs nach der svone	mit disen helden die hie sint
Nvne welle got von himel		sprach do Gernot 
ob vnser tvsent weren	 wir legen alle tot 
der sippe diner mage	 e wir den einen man
geben hie ze gisel	ez wirt nimmer getan
Wir mvosen doch ersterben	so sprach do Gyselher 
vns enscheidet niemen	 von riterlicher wer 
swer gern mit vns vehte	 wir sin et aber hie 
wan ich deheinen minen frivnt	an triwen nie verlie
Do sprach <der> chvone Dancwart	 im zeme niht ze dagen 
ia enstet niht eime	min brvoder Hagen
die hie den vride versprechent	ez moht in werden leit 
des bringe wir ivch inne	 daz si iv werlich geseit 
Do sprach div kvniginne	 ir helde vil gemeit 
nv get der stiege naher	vn– rechet miniv leit 
daz wil ich immer dienen	als ich von rehte sol 
der Hagen vbermvote	 der geloen ich im wol
Lat einem voz dem gademe	niht komen vber al 
so heiz ich viern enden	 zvnden an den sal 
so werdent wol errochen	elliv miniv læit	
die Ezeln reken	die wrden alle schiere bereit
Die noh hie vze stvonden	die tribens in den sal
mit slegen vn– mit schvzen	des wart groz der schal 
doch wolden nie gescheiden	die fvrsten vn– ir man 
si kvnden von ir triwe	 an ein ander niht verlan
Den sal den hiez do zvnden	daz Ezeln wip 
do qualte man mit fivr	den helden da den lip 
daz hvs kom von einem winde	 vil balde allez verbran 
ich wene volk enhæinez	grozer angest ie gewan	[83b]
Genvoge riefen drinne	 owe dirre not 
wir mehten michel gerner	sin in stvrme tot 
ez mehte got derbarmen	 wie si wir alle vlorn 
nv richet vngefvoge	 div kvniginne ir zorn
Ir einer sprach dar inne	 wir mvezzen ligen tot 
waz hilfet vns daz grvezen	daz vns der kvnich enpot 
mir tvot von starcher hitze	der dvrst so rehte we 
daz wene min leben	 in disen sorgen schier zerge
Do sprach von Trongen	Hagen	der riter gvot 
swen twinge dvrstens not	<der> trincke hie daz blvot	
daz man solher hitze	 noh bezzer denne win 
ez enmach et an disen ziten	niht bezzer gesein
Do gie der recken einer	da er æinen toten vant 
er chniet im zvo der wunden	den helm er abe gebant 
do begvnde er trinchen	daz fliezende blvot 
swie vngewon er sin were	 ez dvhte in grozlichen gvot
Nv lone iv got	her Hagen	sprach der mvede man 
daz ich von iwer lere	so wol getrvnken han 
mir ist noch geschenket	vil selten bezzer win 
lebe ich deheine wile	ich sol iv immer wege sin
Do die andern daz gehorten	daz ez in dvhte gvot 
do wart ir michels mere	die trvnken ovch daz blvot 
da von gewan vil krefte	ir etlichez lip 
des engalt an lieben frivnden	sit vil wetlichez wip
Daz fivr viel genote	vf si in den sal 
do læiten sis mit schilten	von in hintze tal 
der ravch vn– ovch die hitze	in taten beidiv we 
ich wen so grozer iamer	an helden immer mer erge
Do sprach von Tronge Hagene	 stet zvo des sales want 
lat niht die brende vallen	vf iwer helm bant 
tret si mit den fvezen	tiefer in daz blvot 
ez ist ein vbel hochzit	die vns div kvniginne tvot
In so getanem læide	in doch der naht zeran 
noch stvont vor dem hvse	der chvene spilman
vnd Hagen sin geselle	gelæint vber rant 
si warten schaden mere	von den vz Ezeln lant
Do sprach der videlere	 nv ge wir in den sal 
so wenent des die Hvenen	daz wir sin vber al
tot von dirre quale	div an vns ist getan 
si sehent vns noch begegene	in strite ir eteslichen gan
Do sprach von Bvrgonden	 Gyselhers <daz> kint 
ich wen ez iagen welle	 sich hebet ein chveler wint 
nv laz vns got von himel	 noch lieber zit geleben 
vns hat min swester Kriemhilt	ein arge hohgezit geben
Do sprach aber æiner	 ich chivse nv den tack 
sit daz bezzer	 wesen niene mach 
so wafent ir ivch	helde	gedenket an den lip 
ia chvmt vns aber schiere	des kvnich Ezeln wip
Der wirt wolde wenen	die geste weren tot [84a]
von ir arbeite	vnd von des fivrs not 
do lebt ir noch dar inne	sehs hvndert kvener man 
daz nie kvnich deheiner	bezzer degene gewan
Der ellenden hvete	 het wol ersehen 
daz noch die geste lebten	swie vil in was geschehen
ze schaden vn– ze leide	 den herren vnd ir man 
man sach si wol gesvnde	noh in dem gademe gan
Man sagte Kriemhilt	 ir were vil genesen 
do sprach div kvniginne	 daz mohte nimmer wesen 
daz ir deheiner lebte	von des fivrs not 
ich wil des baz getrowen	daz si alle ligen tot
Noch genesen gerne	die fvrsten vnde ir man 
ob noch ieman wolte	 genade an in began 
des enchvnden si niht vinden	an den von Hvone lant 
do rachen si ir sterben	mit vil williger hant
Des tages wider morgen	grvezen man	in bot
mit hertem vrlivge	des chomen helde in not 
do wart zvo in geschozzen	vil manich starcker ger 
sich werten riterliche	die rechen chven vnd her
Dem Ezeln gesinde	erweget was der mvot 
daz si wolten dienen	daz Kriemhilt gvot 
dar zvo si wolden leisten	daz in der kvnich gebot 
da mvose maniger schiere	von in kiesen den tot
Von geheize vnd ovch von gabe	man mohte wunder sagen 
si hiez golt daz rote	dar zvo mit schilden tragen 
si gab ez swer sin rvochte	vn– ez wolte enphan 
iane wart nie grozer solden	vf viende mer getan
Ein michel teil der rechen	dar zvo gewafent gie 
do sprach der chvene Volker	 wir sin et aber hie 
ich gesach vf vehten	nie helde gerner chomen 
di daz golt des kvniges	vns ze vare hant genomen
Do riefen ir genvege	naher	helde	baz 
daz wir da svln verenden	nv tvon bi zite daz 
hie belibet niemen	wan der doch sterben sol	
do sach man schier in schilde	stechen geschvzze vol
Waz mag ich sagen mere		wol zwelf hvndert man
di versvochten ez vil sere	wider vnd dan 
do chvlten mit den wunden	die geste wol ir mvot 
ezen mohte nieman scheiden	des sach man fliezen da daz blvot
von verchtief wunden	des wart da vil geslagen 
islichen nach den frivnden	horte man do klagen 
die biderben stvrben alle	dem richem chvnige her 
des heten holde mage	nach in grozlichiv ser

z heten die ellende	wider morgen gvot getan 
wine der Gotlinde	chom ze hove gegan 
do sach er beidenthalben	div grozlichen ser 
daz weinte innechliche	der vil getriwe Rvedeger
So we mich	sprach der reke	daz ich den lip gewan 
daz disen grozen iamer	 chan niemen vnderstan	[84b]
swie gern ichz friden wolde	der kvnich tvt ez niht 
wand er der sinen læide	 ie mer vn– mer gesiht
Do sant an Dietriche	der gvote Rvedeger 
ob siz noch chvnden wenden	an dem kvnige her 
do enbot im der von Berne	 wer moht ez vnderstan 
ez enwil der kvnich Ezel	nieman schaiden lan
Do sach ein kvene recke	Rvedergern stan
mit wæinvnden ovgen	 vnt hetez vil getan 
der sprach zer chvniginne	 nv seht ir wie er stat 
der doch gewalt den mæisten	hie bi Ezeln hat
vnt dem ez allez dienet	livt vnd lant 
wie ist so vil der bvrge	an Rvedeger gewant 
der er von dem kvnige	vil manige haben mach 
er slvoch in disem stvrme	noch nie loblichen slach
Mich dvncket	er rvoche	 wie ez hier vmbe gat 
sit daz er den vollen	nach sinen willen hat 
man giht im er si chvener	danne ieman mvge sin 
daz ist in disen sorgen	worden loslichen schin
Mit trvrigem mvote	 der vil getriwe man 
den er daz reden horte	der helt der blichte in an 
er gedaht	dv solt ez arnen	dv gihst ich si verzagt 
dv hast div dinen mere	ze hove ze lvte gesagt
Die fveest begvnder twingen	do lief er in an
vnd slvoch so chreftichliche	den Hivonischen man 
daz er im vor den fvezen	 lack vil schiere tot 
do waz aver gemeret	 des kvnich Ezeln not
Hin	dv zage mere	 sprach do Rvedeger 
ich han doch genvoge	 leit vn– herzen ser 
daz ich hie niht envihte	zwev wizzet dv mir daz 
ia wer ich den gesten	 von grozen schvlden gehaz
vnd allez daz ich mohte	daz het ich getan 
niwan daz ich die reken	her gefveret han 
ia was ich ir gelæite	in mines herren lant 
des ensol mit in niht striten	min vil ellendes hant
Do sprach zem marcraven		 Ezel der kvnich her 
wie habt ir vns geholfen	vil edel Rvedeger 
wan wir so vil der væigen	 hie ze lande han 
wir bedvrfen ir niht mere	 ir hapt vil vbel getan
Do sprach der ritter edele	 ia beswart er mir den mvot 
vn– hat mir geitewizet	ere vnd vovt 
des ich von dinen handen	so vil han genomen 
daz ist dem lvgenere	ein tæil ze vnstaten komen
Do kom div kvniginne	vn– het ez ovch gesehen 
daz von des heldes zorne	dem Hevne waz geschehen 
si klagt ez vngefvoge	ir ovgen wurden naz 
si sprach zvo Rvedegere	 wie habe wir verdienet daz
daz ir mir vnt dem kvnige	meret vnser leit 
nv habt ir	edel Rvedeger	vns allez her geseit 
ir woldet dvrch vns wagen	die ere vn– daz leben 
ich hort iv vil der reken	den bris vil grozlichen geben	[85a]
Ich mane iv der genaden	 vn– ir mir hant gesworn 
do ir mir zvo Ezeln rietet	riter vz erkorn 
daz ir mir woldet dienen	 vntz an vnser æines tot 
der wart mir arm wibe	 nie so grozlichen not
Daz ist ane lavgen	ich swor iv	edel wip 
daz ich dvrch ivch wagte	die ere vn– ovch den lip 
daz ich die sele flieze	des han ich niht gesworn 
zvo dirre hochgezite	batich die fvrsten wol geborn
Si sprach	gedenke	Rvedeger	der <grozen> triwe din 
der stete vnd ovch der eide	daz dv den schaden min	
immer woldest rechen	 vn– elliv minev læit	
do sprach der margrave		ich han iv e selten iht verseit
Ezel der riche	flegen ovch began 
si bvten sich ze fvoze	bæide fvr den man 
den edeln margraven	 vmmvotes man do sach 
der vil getriwe reke	harte iemerkliche do sprach
Owe mich gotes armen	daz ich ditz gelebt han 
aller miner eren	der mvoz ich ab stan 
triwen vnd zvhte	der got an mir gebot 
owe got von himel	daz mihs niht wendet der tot
Swelhs ich nv laze	vn– daz ander began 
so han ich boeslich	vn– vil vbel	getan 
laz aber ich si bæide	mich schendet elliv diet 
nv rvoche mich bewisen	der mir ze lebene geriet
Do baten si genote	der kvnich vn– ovch sin wip 
des mvosen sider reken	fliezen den lip
von Rvedegers hende	da ovch der helt erstarp 
ir mvgt daz hie wol hoern	daz er vil iæmerchlichen warb
Er weste schaden gewinnen	vn– vngefvogiv læit 
er hete dem kvnige	vil gerne verseit
vnd ovch der kvniginne	vil sere vorht er daz 
ob er ir æinen slvege	div werlt trvege im darvmbe haz
Do sprach zvo dem kvnige	der vil kvene man 
her kvnich	nv nemt hin widere	swaz ich von iv han 
daz lant mit den bvrgen	der sol mich <niht> bestan 
ich wil vf minen fvezen	in daz ellende gan
Do sprach der chvnik Ezel	 wer hvlfe danne mir 
daz lant zvo den lveten	daz gibich allez dir 
daz dv mich rechest	Rvedeger	an den vinden min 
dv solt ein kvnich gewaltich	bineben Ezeln sin
Do sprach aber Rvedeger		wie sol ichs ane van 
hæim ze minem hvse		ich si geladen han 
trincken vn– spise	ich in gvetlichen bot 
vnt gab im mine gabe	wie sol ich raten in den tot
Div livte wenent lihte	daz ich si verzagt 
deheinen minen dienst	han ich in versagt 
den vil edeln fvrsten	vnt ovch ir man 
ovch riwet mich div frivntschaft	<die> ich mit in geworben han
Giselher dem degene	gab ich die tohter min	[85b]
si kvnde in dirre werlde	niht baz verwendet sin
vf zvht vn– ovch vf ere	vf triwe vn– vf gvot 
ich gesach nie kvnich ivngen	so rehte tvgenlichen gemvot
Do sprach aber Kriemh'		vil edel Rvedeger 
nv la dich erbarmen	vnser beider ser 
min vn– ovch des kvniges	gedenche wol daran 
daz nie wirt dehæiner	 so læide geste mer gewan
Do sprach der margrave	wider daz edel wip 
ez mvoz hivte gelten	der Rveders lip
swaz ir vn– ovch min herre	mir liebes hapt getan 
darvmbe mvoz ich sterben	 daz chan niht langer bestan
Ich weiz wol daz moch hivte	min bvrge vn– och min lane
iv mvezen leidich werden	von ir etesliches hant 
ich bevilheiv vf genade	min wip vn– miniv kint
vn– ovch die vil ellenden	die ze Bechelaren sint
Nv lon dir got	Rvedeger	sprach der kvnich do 
er vn– div kvniginne	 si wurden bæidiv vro 
vns svln dine lvte	 vil wol enpholhen wesen 
ovch trowe ich minem heile	daz dv maht selbe wol genesen
Do liez er an die wage	<sele> vnd lip 
do begvnde wæinen	daz Ezeln wip 
er sprach	ich mvoz iv læisten	als ich gelopt han 
owe der minen frivnde	 die ich vngerne hie bestan
Man sach in von <dem> kvnige	vil trovrichlichen gan 
do vant er sine reken	vil nahen bi im stan 
er sprach	ir svlt ivch waffen	alle mine man 
die kvenen Bvrgonden		 die mvoz ich leider bestan
Si hiezen balde springen	da man ir gewaffen vant 
ez der helm were		 od des schildes rant 
von ir ingesinde		 wart ez in dar getragen 
seid horten leidiv mere	 die stolzen ellende sagen
Gewaffent wart der Rvedeger	 mit fvmf hvndert man 
dar vber zwelf reken	sach man mit im gan 
die wolten pris erwerben	in des stvrmes not 
si enwessen niht der mere	daz in so nahent der tot
Do sach man Rvedegere	 vnder helme gan 
ez trvogen swert div scharpfen	des margraven man 
dar zvo vor ir handen	 die liehte schilde bræit 
daz sach der videlere	ez waz im grozlichen læit
Do sach der ivnge Giselher	sinen sweher gen
mit vf gebvnden helm	wie moht man do versten
waz er da mit mæinte	niwan allez gvot 
des wart der kvnich edel	so rehte froelich gemvot
Nv wol mich solher frivnde	sprach Giselher der degen 
die wir han gewunnen	nv vf disen wegen 
wir svln vil wol geniezen	mines wibes hie 
mir ist liep vf min triwe	daz ie der heirat ergie
Ich wæiz wes ir ivch troestet	sprach der spileman 
wa saht ir ie dvrch svone	so manigen helt gan
mit vf gebvnden helmen		die trvogen swert in der hant	[86a]
an vns wil dienen Rvedeger	sein bvrge vn– siniv lant
E daz der videlere	die rede do vol sprach 
Rvedegern den edeln	man vor dem hvse sach 
sinen schilt den gvoten	den satz er fvr den fvoz 
do mvos er sinen frivnden	versagen dienst vn– grvoz
Der edel margrave	 rief do in den sal 
ir chvone Nybelvnge	nv wert ivch vber al 
ir soldet min geniezen	nv engeltet ir min 
e do war wir frivnde	der triwe wil ich ledich sein
Do erschrahten dirre mere	die nothaften man 
wan ir deheiner frovde	nie da von gewan 
daz mit im wolde striten	dem si da waren holt 
si heten von veinden	vil michel arbeit gedolt
Nv ne welle got von himel	sprach Gvnther der degen 
daz ir ivch genaden	svlt an vns bewegen
vn– der vil grozen triwe	der wir doch heten mvot 
ich wil iv des getrovwen	 daz ir ez nimmer getvot
Iane mag ichz niht gelazen	sprach der kvene man 
ich mvoz mit iv striten	 wan ichs gelobt han 
nv wert ivch	chvene helde	so lieb iv si der lip 
mich woltez niht erlazen	des chvnich Ezeln wip
Ir widersagt vns nv ze spate	sprach der kvnich her 
nv mvoz iv got vergelten		vil edel Rvedeger 
triwe vn– minne		die ir vns hapt getan 
ob ir ez an dem ende	woldet gvotlicher lan
Wir soltenz immer dienen	daz ir vns hapt gegeben 
ich vnt mine mage	 ob ir vns liezet leben 
der herlichen gabe	do ir vns brahtet her
in Ezeln lant zen Hevnen	des gedenchet vil edel Rvedeger
Wie wol ich iv des gvnde	sprach Rvedeger der degen 
daz ich iv mine gabe	mit vollen solde geben 
also willechliche	 als ich des hete wan 
sone wurde mir darvmbe	nimmer schelten getan
Erwindet	edel Rvedeger	 sprach do Gernot 
wan ez wirt deheiner	gesten nie erbot
so rehte minnechlichen	als ir vns hapt getan 
des svlt ir wol geniezen	ob wir bi leben bestan
Daz wolde got	sprach Rvedeger	vil edel Gernot 
daz ir ze Rine wert	vnd ich were tot
mit etlichen eren	 seid ich iv sol bestan 
ez wart an ellenden	von frivnden noh nie wirs getan
Nv lone iv got	her Rvedeger	sprach do Gernot 
der vil richen gabe	mich riwet iwer tot 
sol an iv verderben	 so tvgentlicher mvot 
hie trag ich iwer waffen	daz ir mir gabt	helt gvot
Daz ist mir nie geswichen	in aller dirre not 
vnder sinen eken	 lit manich riter tot 
ez ist lvter vnd stete	herlich vnd gvot 
ich wene so riche gabe	 ein reke nimmer mer getvot
Vnde welt ir niht erwinden	ir welt zvo vns gan	[86b] 
slaht ir mir iht der frivnde	die ich hinne han 
mit iwer selbes swerte	nim ich iv den lip 
so riwet ir mich Rvedeger	vn– iwer herlichez wip
Daz wolde got	her Gernot	vnd meht ez ergan 
daz aller iwer wille	were hie getan 
vnd daz genesen were	iwer frivnde lip 
ia sol iv wol getruowen	beidiv mit tohter vnde min wip
Do sprach von Bvrgonden	der schoenen voten kint 
wie tvot ir so	her Rvedeger	di mit mir komen sint 
die sint iv alle wege	ir griffet vbel zvo 
die iwer schoene tohter	welt ir verwitwen ze frvo
Swenne ir vn– iwer reken	mit strite mich bestat 
wie reht vnfrivntliche	ir daz schinen lat 
daz ich iv wol <getrvwe>	fvr alle ander man 
da von ich ze wibe	iwer tohter mir gewan
Gedenchet iwer triwen	vil edel kvnich her 
gesende iv got von hinne	so sprach Rvedeger 
lat die ivnchvrowen	 niht engelten min 
dvrch iwer selber tvgende	 so rvochet ir genedich sin
Daz tet ich billich	sprach Giselher daz kint 
die hoehen mine mage	di noch hier inne sint 
svln die von iv sterben	so mvoz gescheiden sin
div vil stete frivntschaft	zvo dir vn– der tohter din
Nv mvoz vns got genaden	 sprach der kvene man 
do hvoben si die schilde	also si wolden dan
striten zvo den gesten	in Kriemhilt sal 
do rief vil lvte Hagene	von der stiege hin zetal
Belibet ein wile	 vil edel Rvedeger	
also sprach do Hagen	 wir wolden reden mer 
ich vn– mine herren	als vns des twinget not 
waz mack gehelfen Ezeln	vnser ellender tot
Ich sten in grozen sorgen	sprach aber Hagne 
den schilt den mir vrovwe Gotlint	gab ze tragene 
den habent mir die Hevnen	zerhovwen von der hant 
ich fvert in frivntliche	in daz Ezeln lant
Daz des got von himel	 rvochen wolde 
daz ich schilt so gvoten	noch tragen solde 
so den dv hast vor hende	vil edel Rvedeger 
so bedorfte ich in dem stvrme	deheiner <halsperge> mer
Vil gerne wer ich dir gvot	mit minem schilde 
getoerst ich drin gebieten	 vor Kriemhilde 
doch nim dv in hin	Hagen	vn– trag in an der hende 
hey soldestv in fvern	in der Bvrgonden lant
Do er im so willechlichen	den schilt ze geben bot 
do wart genvoger ovgen	 von <heizen> trehen rot 
ez waz div leste gabe	die sider immer mer
bot deheinem degene	von Bechlarn Rvedeger
Swie grimme Hagen were	vnt swie zornich gemvot 
ia erbarmet im div gabe	die der helt gvot
bi sinem lesten ziten	so nahen het getan	[87a]
vil manich riter edel	mit im trvren began
Nv lone in got von himel	vil edel Rvedeger 
ez wirt iwer geliche	deheiner nimmer mer 
der ellenden reken	so herlichen gebe 
so sol daz got gebieten	daz iwer tvgende immer lebe
So we mich dirre mere	so sprach aber Hagene 
wir heten ander swere	 so vil ze tragene 
svl wir mit frivnden striten	daz si got geklæit	
do sprach der marchgrave		 daz ist mir innechliche læit
Nv lon ich iv der gabe	vil edel Rvedeger 
swie halt gæin iv gebaren	 dise reken her 
daz nimmer ivch gerveret	 mit strite hie min hant 
ob ir si alle slveget	 die von Bvrgonden lant
Des neig im mit zvhten	der gvote Rvedeger 
si wæinten allenthalben	daz disiv herzen ser
niemen scheiden chvnde	 daz waz ein michel not 
vater aller tvgende	lag an Rvedegere tot
Do sprach von dem hvse	Volker der spileman 
sit min geselle Hagen	den vride hat getan 
den svlt ir also stete	haben von miner hant 
daz hapt ir wol verdienet	do wir komen in daz lant
Vil edel marchgrave	ir svlt min bote sin 
dise rote bovge	gab mir div margravin 
daz <ich> si tragen solde	hiehgezit 
die mvgt ir selbe schowen	daz ir dez min gezivge sit
Daz wolde got der riche	sprach do Rvedeger 
daz iv div margravinne	noch solte geben mer 
div mer sag ich gerne	der trivtinne min 
gesihe ich si gesvnder	des svlt ir ane zwifel sin
Als er im daz gelobte	den schilt hvop Rvedeger 
des mvotes er ertobte	do en bæit er da niht mer 
do lief er zvo den gesten	einem degen gelich 
manigen slach vil swinden	slvoch der margrave rich
Die zwene stvonden hoher	 Volker vn– Hagene 
wan ez itn e gelobten	die zwene degene 
noch vant er als chvenen	bi den tvren stan 
daz Rvedeger des strites	mit grozen sorgen began
Dvrch mortrechen willen	so liezen si dar in 
Gvnther vn– Gernot	 si heten helde sin 
do stvond hoher Giselher	zwar ez waz im læit 
er versach sich noch des lebens	da von er Rvedegern mæit
Do sprvngen zvo den veinden		des margraven man 
man sach si nach ir herren	vil tvgentlichen gan 
div snidvnde wafen		si trvogen an der hant 
des brast da vil der helm	vn– manich herlicher rant
Do slvogen die vil mveden	vil manigen swinden slach
den von Bechelaren	 der eben vnt tiefe wack 
dvrch die vesten ringe	vast vntz vf daz werch 
si taten in dem stvrme	div vil herlichen werch
Daz edel ingesinde	 waz nv chomen gar dar in	[87b]
Volker vn– Hagen		die sprvngen balde da hin 
si gaben fride nieman	wan dem æinem man 
von ir bæider hende	daz blvot nider dvrch helme ran
Wie rehte gremliche	vil swerte drinne erklanch 
vil der schiltspange	zvo den slegen spranch 
der ræis vz ir schilt stæine	nider in daz blvot 
si vahten also grimme		daz manz nimmer mer getvot
Der vogt von Bechelern	gie wider vnde dan 
also der mit ellen	in stvrme werben kan 
dem tet des tages Rvedeger	harte wol gelich 
daz er ein rekhe were	vil chvene vn– lobelich
Hie stvonden dise reken	Gvnther vnd Gernot 
si slvogen in dem strite	vil manigen helt tot 
Giselher vn– Dancwart	 die zwene ez ringe wach 
des frvmten si vil manigen	hintz vf den ivngisten tack
Vil wol zaigte Rvedeger	 daz er waz starke genvoch 
chvonen vnde wol gewafent	hey was er helde slvoch 
daz sach ein Bvrgonde	zorns was im not 
da von begvnde nahen	 des edeln Rvedegers tot
Gernot der starcke	den helt den rief er an 
er sprach zem margraven	 ir welt mir miner man
niht genezen lazen	 vil edel Rvedeger 
daz mvet mich ane maze	ich chans niht an gesehen mer
Nv mag iv iwer gabe	wol ze schaden chomen 
sit ir mir miner frivnde	hapt so vil benomen 
nv wendet ivch her vmbe	vil edel chvene man 
iwer gabe wirt verdienet	so ich iz aller hoehste chan
E daz der margrave	zvo im vol chome dar 
des mvosen liehte ringe	werden missevar 
do sprvngen zvo ein ander	die eren gernde man 
ir ietweder schermin	fvr starche wunden began
Ir swert so scharpsch waren	sine chvnde niht gewegen 
do slvoch Gernoten	Rveger der degen
dvrch flinsherten helm	daz nider floz daz blvot 
daz vergalt im sere	der riter chven vnd gvot
Die Rvedegers gabe	an hende er hoeher wack 
swie wunt er wer zem tode	er slvog im einen slach
dvrch den schilt vil gvoten	vntz vf div helmgespan 
da von mvos ersterben	do der Gotlinden man
Ia wart nie wirs gelonet	so richer gabe mer 
do vielen beide erslagne	Gernot vnd Rvedeger 
gelich in dem stvrme	von ir beider hant 
alrest erzvrnde Hagne	do der den grozen schaden bevant
Do sprach der von Tronge	 ez ist vns vbel chomen 
wir haben an in bæiden	so grozen schaden genomen 
den wir nimmer vberwinden	ir livet vn– ovch ir lant 
die Rvedegeres helde	sint vnser ellenden phant
Owe mich mines brvoder	der tot ist hie gefrvmt 
waz mir der leiden mere	ze allen ziten chvnt 
ovch mvoz mich immer riwen	der edel Rvedeger	[88a]
der schade ist beidenthalben	vn– div grozlichen ser
Do der ivnge Giselher	sach sinen brvoder tot 
die do dar inne waren	die mvosen liden not 
der tot der svochte sere	da sin gesinde was 
der von Bechelarn	do langer einer niht genas
Gvnther vn– Giselher	 vnd ovch Hagene 
Dancwart vn– Volker	die gvoten degene 
die giengen da si fvnden	ligen die zwene man 
do wart da von den helden	mit iamer wainen began
Der tot vns sere rovbet	sprach Giselher daz chint 
nv lazet iwer wainen	 vnt ge wir an den wint 
daz vns die ringe erchvolen	vns stritmveden man 
ia wen vns got hie langer	niht ze lebene gan
Den sitzen	disen læinen	sach man manigen degen 
si waren aber mvezich	da warn tot gelegen
die Rvedegers helde	zergangen waz der doz 
so lange wert div stille	daz sin Ezeln verdroz
Owe dirre <dienste>	 sprach des chvniges wip 
dine sint niht so stete	daz vnser veinde lip 
mvege des engelten		 von Rvedegeres hant	
er wil si wider bringen	 in der Bvrgonde lant
Waz hilfet	chvnich Ezel	daz wir getæilet han
mit im swaz er wolde	der helt hat missetan 
der vns da solde rechen	der wil der svone pflegen	
des antwurt ir do Volker	der vil zierliche degen
Der rede enist so niht leider	vil edels kvniges wip 
getoerst ich heizen liegen	alsvs edeln lip 
so het ir tievelichen	 an Rvedeger gelogen 
er vnt die sine degene	sint an der svone gar betrogen
Er tet so willechliche	daz im der kvnich gebot 
daz er vnt sin gesinde	ist hie gelegen tot 
nv seht al vmbe	Kriemhilt	wem ir nv gebieten welt 
iv hat vntz an den ende	gedienet Rvedeger der helt
Welt ir daz niht gelovben	man sol ivchs sehen lan	
dvrch ir herzen sere	so ware dvo daz getan 
man trvoch den helt verhovwen	da in der kvnich sach 
den Ezeln degenen	so rehte leide nie geschach
Do si den margraven	toten sahen tragen 
enchvnde ein schriber	gebriefen noh gesagen
e manigen vngeberde	von wiben vn– ovch von man 
div sich von herzen iamer	alda zeigen began
Der Ezeln iamer	der wart also groz 
als eines lewen stimme	der riche kvnich erdoz
mit herzemleide woffe	 alsam tet ovch sin wip 
si chlagten vngefvoge	des gvoten Rvedegers lip

o hort man allenthalben	iamer also groz 
daz palas vn– tvrne	von dem wuof erdoz 
do hort ez och von Berne	ein Dietriches man 
dvrch disev starchen mere	wie balde er gahen began	[88b]
Do sprach er zvo dem fvrsten	 hoert min her Dietrich 
swaz ich noch her <gelebt> han	so rehte vnmvgelich
gehort ich klagen nie mere	 als ich nv han vernomen 
ich wene der kvnich selbe	ist zvo der hohgezite chomen
Wie mehtens anders alle	 haben solhe not 
der kvnich do Kriemh'	 ir einez daz ist tot
von den chvenen gesten		dvrch ir nit gelegen 
ez wæinet vngefvoge		 vil manich zierlicher degen
Do sprach der vogt von Berne	 mine vil liebe man 
nv gahet niht ze sere	swaz hie hant getan
die ellenden reken	 des gat in michel not 
vn– lat si des geniezen	daz ich in minen fride enbot
Do sprach der chvene Wolfhart	 ich wil dar gan
vn– wil der mere vragen	was si hant getan 
vnd wilz iv sagen denne	vil lieber herre min 
als ichs dort ervinde	waz div klage mvge sin
Do sprach der herre Dietrich	 swa man zorns sih versiht 
ob vngefvegiv vrage	danne da geschiht 
daz betrvebet reken	lihte ir mvot 
ichen wil niht	Wolfhart	daz ir die vrage tvot
Do bat Helpfriche	balde dar gan 
vnd hiez daz ervinden	 an Ezeln man
oder an den gesten	waz mere da geschehen 
do het man von livten	so grozen iamer nie gesehen
Der bote begvnde vragen	 waz ist hie getan	
do sprach æiner drvnder	 da ist vil gar zergan
swaz wir frveden heten	in der Hevnen lant 
hie ligt erslagen Rvedeger	von der Bvrgonde hant
Die mit im dar in chomen	der ist einer niht genesen	
do enchvnde Helpfriche	nimmer leider wesen 
ia gehoert <er> mere	 so rehte vngerne nie 
der bote ze Dietriche	vil sere wainende gie
Waz hapt ir vns erfvnden	 sprach do Dietrich 
wie wæinet ir so sere	degen Helpfrich	
do sprach der edel reke	ich mag wol balde klagen 
den gvoten Rvedegere	 hant die Bvrgonde erslagen
Do sprach der helt von Berne	 des sol niht wellen got 
daz wer ein starchiv rach	vn– och des tievels spot 
wa mit het Rvedeger	 an in daz versolt 
ia ist mir daz wol chvnt	er ist den ellenden holt
Dez antwurte Wolfhart	 vnd heten siz getan 
so solt ez in allen	an daz leben gan 
ob wir inz vertrvegen	des wer wir geschant 
ia hat vns vil gedienet	des gvoten Rvedegeres hant
Der vogt der Amelvnge	hiez ervarn baz 
vil harte seneliche	er in ein venster saz 
do bat er Hilprande	zvo den gesten gan 
daz er an in erfvere	waz da wer getan
Der stvrmchvene reke	maister Hilprant
weder shilt noch waffen	trvog er an der hant	[89a]
er wolde in sinen zvhten	zvo den gesten gan 
von siner swester chinde	wart im ein strafen getan
Do sprach der grimme Wolfhart	 vn– welt ir dar blozer gan 
so mag ez an ein schelten	nimmer wol gestan 
so mvezet ir lesterliche	tvon die widervart 
choemt ir dar gewafent	 daz ir eteslicher wol bewart
Do garte sich der wise	dvrch des tvmben rat 
e daz ers inne wurde	do warn in ir wat
alle Dietriches reken	 vn– trvogen swert ein der hant 
dem helde waz ez leide	vil gerne het erz erwant
Er vragte war si wolden	 wir wellen mit iv dar 
waz ob von Tronge Hagene	deste wirs getar
gein iv mit spotte sprechen	des er wol chan gephlegen	
do er daz gehorte	do gestvont inz der degen
Nv sach der chvene Volker	wol gewaffent gan
die reken von Berne	die Dietriches man 
begvrtet mit den swerten	si trvogen shilt enhant 
er sagt ez sinen herren	vzer Bvrgonde lant
Do sprach der videlere	 ich sihe dort her gan
so rehte veintliche	die Dietriches man
gewafent vnder helme	si wellent vns bestan 
ich wen ez an daz vbel	vns ellenden welle gan
In den selben ziten	chom och Hildeprant 
do satzter fvr die fveze	sines schildes rant 
er begvnde fragen	die Gvnthers man 
owe ir gvote helde	waz het iv Rvedeger getan
Mich hat min her Dietrich	her zvo iv gesant 
ob erslagen hete	iwer deheines hant
den edeln marchgraven	als vns daz ist geseit 
wir chvnnen niht vberwinden	div vil grozlichen leit
Do sprach von Tronge Hagne	 daz mer ist vngelogen 
wie wol ich iv des gvnde	het iv der bote betrogen 
dvrch Rvedegeres liebe	 daz lebte noch sin lip 
den immer mvegen wæinen	bæidev man vn– wip
Do si daz reht erhorten	daz er wære tot 
do klagten in die reken	ir triwe in daz gebot 
den <Dietriches> reken	 den sach man trehne gan
vber bart vn– vber chinne	in was vil læit getan
Der herzoge vzer Berne	Sigestap do sprach 
nv hat gar æin ende	genomen der gemach 
den vns hie fvogtte Rvedeger	nah vnsern læiden tagen 
frovde ellender diete	lit von iv helden hie erslagen
Do sprach von Amelvnge	der degen Wolfwin 
vnd ob ich hivte sehe	tot den vater min 
mir enwurde nimmer leider	denn vmbe sinen lip 
owe wer sol nv troesten	des gvoten marchgraven wip
Do sprach in zorns mvote	der degen Wolfhart 
wer wiset nv die reken	so manige hervart 
also der marchgrave	 vil dike hat getan 
owe	vil edel Rvedeger	daz wir dich svs vlorn han	[89b]
Wolfbrant vn– Helfrich	vn– ovch Helmnot 
mit allen irn frivnden	si wæinten sinen tot 
vor sivften mohte vragen	niht der mere Hilprant 
er sprach	nv tvot	ir degene	dar nach min herre her hat gesant
Gebt vns Rvedegern	 also toten vz dem sal 
an dem gar mit iamer	lit vnser frovden val 
vn– lat vns an im dienen	daz er ie hat getan
an vns vil groze triwe	vn– an ander manigen man
Wir sin ovch ellende	also Rvedeger der degen 
wes <lazet>	ir vns biten	lat in vns after wegen
<tragen>	daz wir nach tode	loenen noh dem man 
wir heten ez vil billich	bi sinem lebene getan
Do sprach der kvnich Gvnther		 nie dienst wart so gvot
so den ein frivnt frivnde	nach dem tode tvot 
daz hiez ich stete triwe		swer die kan began 
ir loenet im von schvlden	er hat iv liebe getan
Wie lange svl wir flegen		sprach Wolfhart der degen 
sit vnser trost der beste	von iv ist tot gelegen 
vn– wir sin læider mere	megen niht gehaben 
lat vn sin tragen hinne	da wir den reken begraben
Des antwurte im Volker	 niemen iv in git 
nv nemt in in dem sale	da der degen lit
mit starch wunden	gevallen in daz blvot 
so ist ez ein voller dienst		den ir hie Rvedegere tvot 
Do sprach der chvene Wolfhart	got weiz wol	her spilman 
ir dvrft vns niht raitzen	ir hapt vns vbel getan 
trost ich vor minem herren	so chomet irs in not 
des mveze wirz lazen	wan er vns striten hie verbot
Do sprach der videlere	 der vorht ist alle ze vil 
swaz man im verbivtet	 ders allez lazzen wil 
daz chan ich niht geheizen	rehtes heldes mvot	
die rede dvhte Hagen	 von sinem hergesellen gvot
Dez lat iv niht gelangen	sprach aber Wolfhart 
ich entrihte iv so die saiten	swenn ir die widervart
ritet gein Rine	daz irs wol mvget sagen 
iwer vbermvote	mag ich mit eren niht vertragen
Do sprach der videlere	 swenne ir die sæiten min
verirret gvoter doene	der iwers helm schin
mvoz vil trvebe werden	von der minen hant 
swie aber ich gerite	in der Bvrgonde lant
Do wolt er zvo im springen	wan daz in niht enlie
Hildebrant sin oechæim	 in vaste ze im gevie 
ich wene dv woldest wueten	dvrch dinen tvmben zorn 
mines herzen hvlde	 dv hætest immer mer verlorn
Lat ab den lewen	maister	er ist so grimme gemvot 
chvmt er mir zen handen		sprach Volker der degen gvot 
het ir die werlt alle	mit siner hant erslagen 
ich slahe in daz erz wider	nimmer mere darf gesagen
Des wart vil sere erzvrnet	der Bernære mvot 
den shilt gervchte Wolfhart	ein sneller helt gvot	[90a]
alsam ein lewe wide	lief er vor in dan 
im wart ein gehez volgen	von sinen frivnden getan
Swie weiter sprvnge er pflege	fvr des sales want 
doch ergaht in vor der stiege	der alte Hildebrant 
er wolt in vor im niht lazen	chomen in den strit 
si fvnden daz si svochten	 an den ellenden sit
Do sprach zvo Hagen		 maister Hilbrant 
div swert man hoert erklingen	an ir bæider hant 
si waren sere erzvrnet	daz moeht man chiesen sint 
von ir zwaier swerte	 gie der fivr rote wint
Die wurden do gescheiden	in des strites not 
daz taten die von Berne	als in ir chraft gebot 
zehant do maister Hildebrant	want von Hagen dan 
do lief der starche Wolfhart	den chvenen Volkern an
Er slvoch den videlere	 vf den helme gvot 
daz des swertes ecke	vntz vf die spange wuot 
daz vergalt mit ellen	 der chvene spileman 
do slvoch Wolfharten	 daz er stieben began
Dez fivrs vz den ringen	hiwuen si genvoch 
haz ir islicher	dem andern trvoch 
die shiet do von Berne	der degen Wolfwin 
ob ez ein helt niht were	daz chvnde nimmer gesin
Gvnther der degen	 mit vil williger hant
enphie die helde mere	von Amelvnge lant 
Giselher der herre	die liehten helm vaz 
der frvmt er da vil manigez	von blvote rot vn– naz
Danchwart	Hagen brvoder	 waz ein grimmich man 
swaz er da vor in strite	hete getan
den Ezeln reken	 daz waz gar ein wint 
nv vaht vil tobliche	des chvenen Aldrianes chint
Ritschart vn– Gerbart	Helpfrich vn– Wicharat 
die heten in manigen stvrm	selten sich gespart 
des brahten si wol inne	die Gvntheres man 
do sach man Wolfprande	in strite herlichen gan
Do vaht alsam er wuote	 der alte Hildebrant 
vil der gvoten recken	vor Wolfhartes hant
mit tode mvose vallen	von swerten in daz blvot 
svs rachen Rvedegern	 die reken chvene vnde gvot
Do vaht der herre Sigstap	als im sin ellen riet 
hei waz er im dem strite	der gvoten helm vershriet
den sinen veinden	Dietriches swester svn 
er chvnde in dem stvrme	nimmer bezzers niht getvon
Volker der starche	 do er daz ersach 
daz Sigestap der chvene	den blvotigen wach
hei vz herten ringen	daz waz dem helde zorn 
er sprach im hin engegne	do hete Sigestap verlorn
von dem videlere	vil schiere daz leben 
er begvnde im siner chvnste	al solhen teil da geben 
daz er von sinem swerte	mvose ligen tot 
daz rach der alte Hildebrant	als im sin ellen daz gebot	[90b]
Owe liebes herren		sprach maister Hildebrant 
der hie leit erstorben	vor Volkers hant 
nvne sol der videlere	 lenger niht genesen	
Hildebrant der chvene	 wie chvnde er grimmiger sin gewesen
Do slvog er Volkern		daz im div helmbant
stvben allenthalben	zvo des salez want
von helm vn– och von schilte	 den chvenen spileman 
da von der starche Volker	do den ende da gewan
Do drvngen zvo dem strite	die Dietriches man 
si slvogen daz die ringe	vil verre dreten dan 
vnt daz man ort der swerte	vil hohe fliegen sach 
si holten vz den helmen	den heiz fliezenden bach
Do sach von Tronge Hagen	Volkern tot 
daz waz zer hochgezite	sin aller groestiv not 
die er da het gewunnen	an mag vn– och an man 
owe wie harte Hagen	 den helt do reken began
Nv en sol sin niht geniezen	der alte Hildebrant 
min helfe lit erslagen	 von des heldes hant 
der beste hergeselle	den ich ie gewan	
den schilt den rvchter hoher	do gie er howende dan
Helpfrich der starcke	 Danchwarten slvoch 
Gvnther vn– Giselher	den waz ez leid genvoch 
do si in vallen sahen	 in der starchen not 
er het mit sinen handen	wol vergolten sinen tot
Die wile gie och Wolfhart	beidiv wider vn– dan
allez howende	die Gvntheres man 
er waz die driten chere	nv chomen dvrch daz wal 
da viel vor sinen handen	vil manich reke zetal
Do rief der herre Giselher	Wolfharten an 
owe daz ich so grimmen	veint ie gewan 
edel riter chvene	nv wendet gein in 
ich wil ez helfen enden	ez mak niht anders gesin
Ze Giselher cherte	Wolfhart in den strit 
do slvoch ir ietweder	vil manige wunden wit 
so rehte chreftichliche	er zvo dem chunige dranch 
daz imz blvot vndern fvezen	al vbers hovbet spranch
Mit swinden slegen grimme	der shoenen voten kint
enphie Wolfharten	 den chvenen helt	sint 
swie starcke der degen were	er chvnde niht genesen 
ezn dorft chvnich so ivnger	nimmer chvener sin gewesen
Do slvog er Wolfharten	 dvrch eine brvnne gvot 
daz im von der wunde		nider schoz daz blvot 
er wunte zvo dem tode		den Dietriches man 
ez het an einen reken	 zware niemen getan
Also der chvene Wolfhart	der wunden do enphant 
den schilt den liez er vallen	hoher an der hant
hvop er ein starckez wafen	daz waz sharpf genvoch 
durch helm vn– dvrch ringe	der helt do Giselhern slvoch
Si heten bede an ein ander	den grimmen tot getan 
do enlebt och nv niht mere	der Dietriches man	[91a]
Hildebrant der alte		Wolfharten vallen sach 
ich wene im vor sinem tode	so rehte leide nie geschach
Do waren gar erstorben	die Gvnthers man
vn– ovch die Dietriches	Hildebrant waz gegan
da Wolfhart waz gevallen	nider in daz blvot 
er vmbesloz mit armen	den reken chven vn– gvot
Er wolt in vz dem hvse	mit im tragen dan 
er waz ein teil ze swere	er mvose in ligen lan 
do blichte vz dem blvote	der rewude man 
er sach wol daz im gerne	sin neve het geholfen dan
Do sprach der totwunde	 vil lieber oehæim min 
ir mvgt an disen ziten	mir niht frvm gesin 
nv hvetet ivch vor Hagene	ia dvnchet ez mich gvot 
er treit in sinem herzen	einen grimmigen mvot
Vnde ob mich mine mage	nach tode wellen klagen 
den nehsten vn– den besten	den svlt ir von mir sagen 
daz si nach mir iht wainen	daz si ane not 
vor æines chvniges hande	lig ich hie herlichen tot
Ich han ovch hier inne	so vergolten minen lip 
daz ez wol mvgen bewainen	der gvoten riter wip 
ob ivch dez iemen vrage	so mvgt ir balde sagen 
vor min eines handen	 lit wol hvndert erslagen
Do gedaht ovch Hagen	an den spileman 
dem der chvene Hildebrane	sin leben an gewan 
do sprach er zvo dem degene	 ir gelt mir miniv leit 
ir hapt vns hier inne erbvnnet	vil <maniges> reken gemæit
Er slvog vf Hildebrande	 daz manz wol vernam
Palmvnge diezen	 den Sifride nam
Hagen der vil chvene	da er den helt slvoch 
do werte sich der alte	er waz och chvene genvoch
Der Dietriches reke	slvog æin wafen bræit
vf den helt von Tronge	daz och vil sere sneit 
do en chvnde er niht verwunden	den Gvnthers man 
do slvog aber in Hagen	dvrh æine brvnne wolgetan
Do der alte Hildebrant	der wunden reht enphant 
do vorht er schaden mere	von der Hagen hant 
den schilt warf vber rvkke	der Dietriches man 
mit der starchen wunden	der helt do Hagen entran
Ia was nv nieman lebender	 al der degene 
niwan die zwene aleine	Gvnther vn– Hagene 
mit blvote gie bervnnen	der alte Hildebrant 
er brahte læidev mere	da er Dietrichen vant
Do sach er trovrichlichen	sitzen hie den man 
der laide michels mere	der fvrste do gewan 
er sach och Hilbrande	in siner brvnne rot 
do fragter in der mere		als im div sorge gebot
Nv sagt mir	maister Hildebrant	wie sit ir so naz
von dem verehblvote	oder wer tet iv daz	[91b]
ich wene ir mit den	zem hvse hapt gestriten 
ich verbot ez iv so sere	do het irz billich vermiten
Do sagt er sinem herren	ez tet Hagene 
der slvog mir dise wunden	in dem gadme 
do ich von dem reken	 wolde wenden dan 
mit minem lebne		ich chovme dem tievel etran
Do sprach der Berner	 vil reht ist iv geschehen 
do ir mich frivntschefte	den reken horet iehen 
daz ir den fride do brache	den ich in het gegeben	
het ichz niht immer schaden	ir soldet fliesen daz leben
Nv enzvrnet niht so sere	min her Dietrich 
an mir vnt minen frivnden	 der schade ist alze rich 
wir wolden Rvedegern	han getragen dan 
des wolden vns niht gvnnen	des kvnich Gvntheres man
So we mir dirre læide	 ist Rvedeger doch tot 
den mvoz ich immer chlagen	dez get mir groziv not 
Gotelint dev edel	ist miner basen chint 
ach we der arm waisen	die da ze Bechelarn sint
Iriwen vn– læides	mant in do sin tot 
er begvnde wainen	des dem helde not 
owe der getriwer helfe	die ich verlorn han 
ia vberwinde ich nimmer mere	des kvnich Ezeln man
Megt ir mir	maister Hildebrant	div rehten mere sagen 
wer der reke were	der in da hat erslagen	
er sprach	daz tet mit chrefte	der starche Gernot 
vor Rvedegeres handen		 ist ovch der het gelegen tot
Er sprach ze Hildebrande		 nv sagt minen man
daz sich balde waffen		wan ich wil dar gan 
vn– heizet mir gewinnen	min liehtez wickgewant 
ich selbe fragen		die helde vz Bvrgonde lant
Do sprach maister Hildebrant	wer sol zvo iv gen 
swaz ir hapt der lebenden	die seht ir bi iv sten 
daz bin ich alterseine	die andern die sint tot	
do ershrichte er dirre mere	des gie im werlichen not
wan	er læit so grozez	zer werlde hie gewan 
er sprach	vnd sint erstorben	 alle mine man 
so hat min got vergezzen	ich armer Dietrich 
ich waz ein kvnich gewaltich	her vnde rich
Wie chvnde ez sich gefvegen	sprach aber her Dietrich 
daz si alle sint erstorben	die helde lobelich 
von den stritmveden	die doch heten not 
wan dvrch min vngelvckhe	in iwer noch frevomde der tot
Sit daz ez min vnselde	niht langer wolt entwesen 
so sagt mir	ist der geste	noch ieman da genesen	
do sprach maister Hildebrant	 daz weiz got	nieman mer
niwan Hagen alæine	vn– Gvnther der chvnich her
Owe	lieber Wolfhart	sol ich dich han verlorn 
so mag mich balde riwen	daz ich ie wart geborn 
Svgstap vn– Wolfwin	 vn– och Wolbrant 
wer sol mir denne helfen	in der Amelvnge lant	[92a]
Helpfrich der vil chvne	vn– ist mir der erslagen 
Gerhart vn– Wichart	wie solde ich die verchlagen 
daz ist an minen fveden	min der leste tach 
owe daz vor leide	nieman wol sterben mach

o nam der herre Dietrich	selbe sein gewant 
im half	daz er sich wafent	der alte Hildebrant 
do chlagt also sere	der kreftige mnan 
daz daz hvs erdiezen	von siner stimme began
Do gewan er aber wider	vehten heldes mvot 
in grimme wart gewafent	do der degen gvot 
æinen schilt vil vesten	den nam er an die hant 
si giengen balde danne	er vn– maister Hildebrant
Do sprach von Tronge Hagene	 ich sihe dort her gan
den herren Dietrich	der wil vns bestan
nach sinem starchen læide	daz im hie ist geschehen 
man sol daz hivte kiesen	wem man des besten mvge iehen
Iane dvnchet sich von Berne	der herre Dietrich 
nie so starck des libes	von so gremlich 
vnd wil erz an vns rechen	daz im ist getan	
also redet Hagen		ich getar in harte wol bestan
Dise rede horte	Dietrich vnd Hildebrant 
er chom da er die reken	bæde stende vant
vzen an dem hvse	gelæinet an den sal 
sinen schilt den gvoten	satzte her Dietriche zetal
In læitlichen sorgen	sprach her Dietrich 
wie habt ir so geworben	Gvnther kvnich rich 
wider mich ellenden		waz het ich iv getan 
allez mines trostes	 des bin ich æine bestan
luch endvhte niht der volle	an der grozen not 
do ir vns Rvedegere	den helt erslvoget tot 
nv hapt ir mir erbvnnen	aller miner man 
iane het ich iv helden	solher læide niht getan
Gedenchet an ich selben	vn– an iwer læit 
tot der iwer frivnde	vn– och div arbeit 
ob ez iv zieren reken	beswart iht den mvot 
owe wie rehe vnsanfte	mir der tot Rvedegeres tvot
Ez geschach ze dirre werlde	nie manne laider mer 
ir gedare vbel	an min vn– iwer sere 
swaz ich frveden hete	div ligit von iv erslagen 
ia enkan ich nimmer mer	die mine mage verchlagen
lane si wir niht so schvldich		 sprach do Hagen 
ez giengen ze disem hvse	die iwer degene
gewafent wol ze flize	 mit æiner schar so bræit 
mich dvnchet daz div mere	iv niht rehte sint geseit
Waz sol ich mer gelovben	mir sagt Hildebrant 
do mine reken gerten	 von Amelvnge lant 
daz ir in Rvedegere	 gebt vz dem sal 
do bvtet ir niwen spoten	den minen reken her zetal	[92b]
Do sprach der vogt von Rine	 si iahen wolten tragen
Rvedeger von hinne	den hiez ich <in> versagen
Ezeln ze læide	 vn– niht den dinen man 
vntz daz do Wolfhart	darvmbe schelten began
Do sprach der helt von Berne	 ez mvose et also sin 
Gvnther	chvnich edele	 dvrch die zvhte din
ergetze mich der laide	di mir von dir sint geschehen 
vn– svene ez	riter chvene	daz ich dir des mege geiehen
Ergibe dich mir ze gisel	dv vnd din man 
so wil ich behveten	 so ich aller beste chan 
daz dir hie zen Hevnen	ieman iht en tvot 
dv solt an mir niht vinden	niwan triwe vn– allez gvot
Daz enwelle got von himel	sprach do Hagne 
daz sich dir ergeben	zwene degene 
die noch so werlichen	 gewafent gein dir stent 
vnd noch so ledichliche	vor ir vienden gent
Ir svltez niht versprechen	so redet her Dietrich 
Gvnther vnde Hagne	ir beide hapt mich
so sere beswart	daz herze vn– och den mvot 
vn– welt ir michs ergetzen	daz irz vil billichen tvot
Ich gibe iv mine triwe	vn– sicherliche hant 
daz ich mit iv wider	 heim rite in iwer lant 
ich geleite ich nach den eren	oder ich gelige tot 
vn– wil dvrch iv vergezzen	der minen grozlichen not
Nv enmvotet sin niht mere	 sprach aber Hagne 
von vns enzimt daz mere	niht <wol> ze sagene 
daz sich iv ergeben	 zwen also chvene man 
nv siht man bi iv nieman	wan eine Hildebranden stan
Do sprach maister Hildebrant	 got weiz	her Hagne 
der iv den vride bevtet	mit iv ze tragne 
ez chvmt noch an die stvnde	daz ir in moehtet nemen 
die svone mines herren	meht ir iv lazen zemen
Ia neme ich e die svone	 sprach aber Hagne 
e ich so lesterliche	vz æinem <gadme>
flvhe	maister Hildebrant	als ir hie hapt getan 
ich want vf min triwe	 ir chvndet baz gein veinden stan
Des antwurte Hildebrant	 zweu verwizet ir mir daz 
nv wer was der vf einem shilte	vor dem Wasgensteine saz 
do im von Yspanie Walther	so vil der mage slvoch	
och hapt ir noch ze zeigen	an iv selben genvoch
Do sprach der herre Dietrich	 daz enzimt niht helde lip 
daz si svln schelten	sam div alten wip 
ich verbivte iv	maister Hildebrant	daz ir iht sprechet mer 
mich ellenden rechen	twinget grozlichiv ser
Lat horen	sprach her Dietrich	reke Hagne 
waz ir bæide sprachet		vil snelle degene 
do ir mich gewafent		 zvo iv sahet gan 
ir iahet daz ir eine	 mit strite woldet mich bestan	[93a]
Ia en livgent iv dez niemen	 sprach Hagen der degen 
ich enwellez hie versvochen	mit den starchen slegen 
ez si daz mir zebreste	 daz Nybelvnge swert 
mir ist zorn daz vnser beider	hie ze gisel ist gegert
Do Dietrich gehorte	 den grimmen Hagen mvot 
den shilt vil balde zvchte	der snelle degen gvot 
wie balde gein im Hagne	von der stiegen spranch 
Nybelvnges swer daz gvote	vil lvte vf Dietrich erchlanch
Do wesse wol her Dietrich	daz der chvene man
vil grimmes mvotes were	 shirmen im began
der herre von Berne	 vor angestlichen slegen 
vil wol erchant er Hagen	den vil zierlichen degen
ovch vorht er Balmvnge	ein wafen starch genvoch 
vnder wilen Dietrich	 mit listen wider slvoch 
vntz daz er Hagen	 mit strite doch betwanch 
er slvog im eine wunden	div waz tief vn– lanch
Do gedaht der herre Dietrich	dv bist in not erwigen 
ich hans lvtzel ere	solt dv tot vor mir geligen 
ich wil ez sus <versvchen>	ob ich ertwingen chan
dich mir ze einem gisel	 daz wart mit sorgen getan
Den schilt liez er vallen	sin sterche div waz groz 
Hagen von Tronge		mit arm er besloz 
des wart do betwungen	 von im der chvene man 
Gvnther der edel	 darvmbe trovren began
Hagne bant do Dietrich	vn– fvort in da er vant
die edel chvniginne	vn– gab ir bi der hant
den chvenisten reken	der ie swert getrvoch 
nach ir vil starchem læide	do wart si vroelich genvoch
Vor liebe naig dem degne	 daz vil edel wip 
immer si dir selich	 din herze vn– och din lip 
dv hast mich wol ergetzet	aller miner not 
daz sol ich immer dienen	mich ensvome der tot
Do sprach der herre Dietrich	 ir svlt in lan genesen 
edeliv chvniginne	vnd mach daz noch gewesen 
wie wol er ivch ergetzet	daz er iv hat getan 
er sol des niht engelten	daz ir in gebvnden sehet stan
Do hiez si Hagen fveren	an sinen vngemach 
da er lach beslozen	vn– da in niemen sach 
Gvnther der chvnich edel	rvefen do began 
war chom der helt von Berne	der hat mir leide getan 
Do gie im hin engegene	 der herre Dietrich 
Gvntheres ellen	daz vil lobelich 
do en bæit och er niht mere	er lief her fvr den sal 
von ir beider swerten	 hvob sich ein grozlicher schal
Swie vil der herre Dietrich	lange was gelobt
Gvnther waz so sere	erzvrnet vn– ertobt 
wan er nach starchem leide	do sint veint was 
man sagt ez noch ze wunder	daz do her Dietrich genaz
Ir ellen vn– ir sterche	beide warn groz 
palas vn– tvrne		von ir slegen doz	[93b]
do si mit den swerten hiwoen	vf die helm gvot 
ez het der chvnich Gvnther	einen herlichen mvot
Sit twanch in der von Berne	als Hagene gcschach 
daz blvot man dvrch die ringe	dem helde fliezen sach
von æinem starchem swerte	daz trvog her Dietrich 
do het gewert her Gvnther	nach mvede loblichen sich
Der herre wart gebvnden	von Dietriches hant 
swie chvnige niene solten	læiden solhiv bant 
er daht ob er si lieze	den chvnich vn– sinen man 
alle die si fvnden	die mvosen tot vor im bestan
Dietrich von Berne	 der nam in bi der hant 
do fvort er in gebvnden	da er Chriemhilde vant 
si sprach	willechomen Gvnther	ein helt vz Bvrgonde lant	
nv lone iv got	Chriemhilt	ob mich iwer triwe des ermant
Er sprach	ich solde iv nigen	vil liebiv swester min 
ob iwer grvezen	genedichlicher mehte sin 
ich weiz ivch	chvniginne	so zornich gemvot 
daz ir mich vnde Hagen	 vil swachez grvezen getvot
Do sprach der helt von Berne	 vil edels chvniges wip 
ez enwart nie gisel mere	so gvoter riter lip 
als ich iv	vrowe here	an in gegeben han 
nv svlt ir die ellenden	min vil wol geniezzen lan
Si iach si tet ez gerne	do gie her Dietrich
mit wainenden ovgen		von den helden loblich 
sit rach sich grimmichliche	daz Ezeln wip 
den vz erwelten degnen	nam si beiden den lip
Si lie si svnder ligen	dvrch ir vngemach 
daz ir seit deweder	den andern nie gesach 
vntz si ir brvoder hovbet	hin fvor Hagen trvok 
der Chriemhilten rache	 wart an in beiden genvoch
Do gie <div> chvniginne	 daz si Hagen sach 
wie rehte veintliche	 si zvo dem reken sprach 
welt ir mir geben widere	daz ir mir hapt genomen 
so moegt ir noch wol lebende	heim zvo den Bvrgonden chomen
Do sprach der grimme Hagne		 div bete ist gar verlorn 
vil edeliv chvniginne	ia han ich des gesworn 
daz ich den hort iht zeige	die wile daz si leben 
dehainer miner herren	so enwirt er nieman gegeben
Ich bringez an ein ende	 so sprach daz edel wip 
do hiez si ir brvoder	nemen da den lip 
man slvog im ab daz hovbet	bi hare si ez trvock
fvr den helt von Tronge	do wart im leide genvok
Also der vngemvote		sines herren hovbet sach 
wider Chriemhilde		do der reke sprach 
dv hast ez nach dinem willen	ze einem ende braht 
vn– ist och reht ergangen	als ich mir het gedaht
Nv ist von Bvrgonde	 der edel chvnich tot 
Giselher der ivnge	vn– och Gernot 
den shatz waz nv nieman	wan got vn– min 
der sol dich	valentinne	immer gar verholn sin	[94a]
Si sprach	so habt ir vbel	geltes mich gewert 
so wil ich doch behalten	daz Sifrides swert 
daz trvog min holder friedel	do ich in ivngist sach 
an dem mir herzen leide	 vor allem leide geschach
Si zoch ez von der scheide	daz chvnde et niht erwern 
do dahte si den rechen	 des lebens behern 
si hvob ez mit ir handen	 daz hovpt si im abe slvoch 
daz sach der kvnich Ezel	do waz im leide genvock
Waffen	sprach der fvrste	 wie ist nv tot gelegen
von eines wibes handen	der aller beste degen 
der ie chom ze stvrme	oder ie schilt getrvoch 
swie veint aber ich im were	ez ist mir leide genvok
Do sprach der alte Hildebrant	 ia genivzet siz niht 
daz si in slahen toerste	swaz halt mir geschiht 
swie er mich selhen braht	in angestliche not 
iedoch so wil ich rehen	des chvenen Trongers tot
Hildebrant der alte	ze Chriemhilde spranch 
er slvog der chvniginne	eines swertes swanch 
ia tet ir div sorge	von Hildebrande we 
waz maht si gehelfen	daz si vil grozlichen schrei
Do waz gelegen vber al	da der vaigen lip 
ze stvckhen waz gehowen	do daz edel wip 
Dietrich vn– Ezel	wainen do began 
si chlagten innechliche	beidev mage vn– man
Div vil michel ere	 waz da gelegen tot 
die livte heten alle	iamer vnd not 
mit leide waz verendet	des kvniges hohzit 
als ie div liebe leide	ze aller ivngiste git
Ich enchan iv niht bescheiden	was sider da geschach 
wan riter vn– vrovwen	 wainen man da sach 
darzvo die edeln chnehte	 ir lieben frivnde tot 
hie har daz mer ein ende	ditze ist der Nybelvnge not

o nam der herre Dietrich	selbe sein gewant 
im half	daz er sich wafent	der alte Hildebrant 
do chlagt also sere	der kreftige mnan 
daz daz hvs erdiezen	von siner stimme began
Do gewan er aber wider	vehten heldes mvot 
in grimme wart gewafent	do der degen gvot 
æinen schilt vil vesten	den nam er an die hant 
si giengen balde danne	er vn– maister Hildebrant
Do sprach von Tronge Hagene	 ich sihe dort her gan
den herren Dietrich	der wil vns bestan
nach sinem starchen læide	daz im hie ist geschehen 
man sol daz hivte kiesen	wem man des besten mvge iehen
Iane dvnchet sich von Berne	der herre Dietrich 
nie so starck des libes	von so gremlich 
vnd wil erz an vns rechen	daz im ist getan	
also redet Hagen		ich getar in harte wol bestan
Dise rede horte	Dietrich vnd Hildebrant 
er chom da er die reken	bæde stende vant
vzen an dem hvse	gelæinet an den sal 
sinen schilt den gvoten	satzte her Dietriche zetal
In læitlichen sorgen	sprach her Dietrich 
wie habt ir so geworben	Gvnther kvnich rich 
wider mich ellenden		waz het ich iv getan 
allez mines trostes	 des bin ich æine bestan
luch endvhte niht der volle	an der grozen not 
do ir vns Rvedegere	den helt erslvoget tot 
nv hapt ir mir erbvnnen	aller miner man 
iane het ich iv helden	solher læide niht getan
Gedenchet an ich selben	vn– an iwer læit 
tot der iwer frivnde	vn– och div arbeit 
ob ez iv zieren reken	beswart iht den mvot 
owe wie rehe vnsanfte	mir der tot Rvedegeres tvot
Ez geschach ze dirre werlde	nie manne laider mer 
ir gedare vbel	an min vn– iwer sere 
swaz ich frveden hete	div ligit von iv erslagen 
ia enkan ich nimmer mer	die mine mage verchlagen
lane si wir niht so schvldich		 sprach do Hagen 
ez giengen ze disem hvse	die iwer degene
gewafent wol ze flize	 mit æiner schar so bræit 
mich dvnchet daz div mere	iv niht rehte sint geseit
Waz sol ich mer gelovben	mir sagt Hildebrant 
do mine reken gerten	 von Amelvnge lant 
daz ir in Rvedegere	 gebt vz dem sal 
do bvtet ir niwen spoten	den minen reken her zetal	[92b]
Do sprach der vogt von Rine	 si iahen wolten tragen
Rvedeger von hinne	den hiez ich <in> versagen
Ezeln ze læide	 vn– niht den dinen man 
vntz daz do Wolfhart	darvmbe schelten began
Do sprach der helt von Berne	 ez mvose et also sin 
Gvnther	chvnich edele	 dvrch die zvhte din
ergetze mich der laide	di mir von dir sint geschehen 
vn– svene ez	riter chvene	daz ich dir des mege geiehen
Ergibe dich mir ze gisel	dv vnd din man 
so wil ich behveten	 so ich aller beste chan 
daz dir hie zen Hevnen	ieman iht en tvot 
dv solt an mir niht vinden	niwan triwe vn– allez gvot
Daz enwelle got von himel	sprach do Hagne 
daz sich dir ergeben	zwene degene 
die noch so werlichen	 gewafent gein dir stent 
vnd noch so ledichliche	vor ir vienden gent
Ir svltez niht versprechen	so redet her Dietrich 
Gvnther vnde Hagne	ir beide hapt mich
so sere beswart	daz herze vn– och den mvot 
vn– welt ir michs ergetzen	daz irz vil billichen tvot
Ich gibe iv mine triwe	vn– sicherliche hant 
daz ich mit iv wider	 heim rite in iwer lant 
ich geleite ich nach den eren	oder ich gelige tot 
vn– wil dvrch iv vergezzen	der minen grozlichen not
Nv enmvotet sin niht mere	 sprach aber Hagne 
von vns enzimt daz mere	niht <wol> ze sagene 
daz sich iv ergeben	 zwen also chvene man 
nv siht man bi iv nieman	wan eine Hildebranden stan
Do sprach maister Hildebrant	 got weiz	her Hagne 
der iv den vride bevtet	mit iv ze tragne 
ez chvmt noch an die stvnde	daz ir in moehtet nemen 
die svone mines herren	meht ir iv lazen zemen
Ia neme ich e die svone	 sprach aber Hagne 
e ich so lesterliche	vz æinem <gadme>
flvhe	maister Hildebrant	als ir hie hapt getan 
ich want vf min triwe	 ir chvndet baz gein veinden stan
Des antwurte Hildebrant	 zweu verwizet ir mir daz 
nv wer was der vf einem shilte	vor dem Wasgensteine saz 
do im von Yspanie Walther	so vil der mage slvoch	
och hapt ir noch ze zeigen	an iv selben genvoch
Do sprach der herre Dietrich	 daz enzimt niht helde lip 
daz si svln schelten	sam div alten wip 
ich verbivte iv	maister Hildebrant	daz ir iht sprechet mer 
mich ellenden rechen	twinget grozlichiv ser
Lat horen	sprach her Dietrich	reke Hagne 
waz ir bæide sprachet		vil snelle degene 
do ir mich gewafent		 zvo iv sahet gan 
ir iahet daz ir eine	 mit strite woldet mich bestan	[93a]
Ia en livgent iv dez niemen	 sprach Hagen der degen 
ich enwellez hie versvochen	mit den starchen slegen 
ez si daz mir zebreste	 daz Nybelvnge swert 
mir ist zorn daz vnser beider	hie ze gisel ist gegert
Do Dietrich gehorte	 den grimmen Hagen mvot 
den shilt vil balde zvchte	der snelle degen gvot 
wie balde gein im Hagne	von der stiegen spranch 
Nybelvnges swer daz gvote	vil lvte vf Dietrich erchlanch
Do wesse wol her Dietrich	daz der chvene man
vil grimmes mvotes were	 shirmen im began
der herre von Berne	 vor angestlichen slegen 
vil wol erchant er Hagen	den vil zierlichen degen
ovch vorht er Balmvnge	ein wafen starch genvoch 
vnder wilen Dietrich	 mit listen wider slvoch 
vntz daz er Hagen	 mit strite doch betwanch 
er slvog im eine wunden	div waz tief vn– lanch
Do gedaht der herre Dietrich	dv bist in not erwigen 
ich hans lvtzel ere	solt dv tot vor mir geligen 
ich wil ez sus <versvchen>	ob ich ertwingen chan
dich mir ze einem gisel	 daz wart mit sorgen getan
Den schilt liez er vallen	sin sterche div waz groz 
Hagen von Tronge		mit arm er besloz 
des wart do betwungen	 von im der chvene man 
Gvnther der edel	 darvmbe trovren began
Hagne bant do Dietrich	vn– fvort in da er vant
die edel chvniginne	vn– gab ir bi der hant
den chvenisten reken	der ie swert getrvoch 
nach ir vil starchem læide	do wart si vroelich genvoch
Vor liebe naig dem degne	 daz vil edel wip 
immer si dir selich	 din herze vn– och din lip 
dv hast mich wol ergetzet	aller miner not 
daz sol ich immer dienen	mich ensvome der tot
Do sprach der herre Dietrich	 ir svlt in lan genesen 
edeliv chvniginne	vnd mach daz noch gewesen 
wie wol er ivch ergetzet	daz er iv hat getan 
er sol des niht engelten	daz ir in gebvnden sehet stan
Do hiez si Hagen fveren	an sinen vngemach 
da er lach beslozen	vn– da in niemen sach 
Gvnther der chvnich edel	rvefen do began 
war chom der helt von Berne	der hat mir leide getan 
Do gie im hin engegene	 der herre Dietrich 
Gvntheres ellen	daz vil lobelich 
do en bæit och er niht mere	er lief her fvr den sal 
von ir beider swerten	 hvob sich ein grozlicher schal
Swie vil der herre Dietrich	lange was gelobt
Gvnther waz so sere	erzvrnet vn– ertobt 
wan er nach starchem leide	do sint veint was 
man sagt ez noch ze wunder	daz do her Dietrich genaz
Ir ellen vn– ir sterche	beide warn groz 
palas vn– tvrne		von ir slegen doz	[93b]
do si mit den swerten hiwoen	vf die helm gvot 
ez het der chvnich Gvnther	einen herlichen mvot
Sit twanch in der von Berne	als Hagene gcschach 
daz blvot man dvrch die ringe	dem helde fliezen sach
von æinem starchem swerte	daz trvog her Dietrich 
do het gewert her Gvnther	nach mvede loblichen sich
Der herre wart gebvnden	von Dietriches hant 
swie chvnige niene solten	læiden solhiv bant 
er daht ob er si lieze	den chvnich vn– sinen man 
alle die si fvnden	die mvosen tot vor im bestan
Dietrich von Berne	 der nam in bi der hant 
do fvort er in gebvnden	da er Chriemhilde vant 
si sprach	willechomen Gvnther	ein helt vz Bvrgonde lant	
nv lone iv got	Chriemhilt	ob mich iwer triwe des ermant
Er sprach	ich solde iv nigen	vil liebiv swester min 
ob iwer grvezen	genedichlicher mehte sin 
ich weiz ivch	chvniginne	so zornich gemvot 
daz ir mich vnde Hagen	 vil swachez grvezen getvot
Do sprach der helt von Berne	 vil edels chvniges wip 
ez enwart nie gisel mere	so gvoter riter lip 
als ich iv	vrowe here	an in gegeben han 
nv svlt ir die ellenden	min vil wol geniezzen lan
Si iach si tet ez gerne	do gie her Dietrich
mit wainenden ovgen		von den helden loblich 
sit rach sich grimmichliche	daz Ezeln wip 
den vz erwelten degnen	nam si beiden den lip
Si lie si svnder ligen	dvrch ir vngemach 
daz ir seit deweder	den andern nie gesach 
vntz si ir brvoder hovbet	hin fvor Hagen trvok 
der Chriemhilten rache	 wart an in beiden genvoch
Do gie <div> chvniginne	 daz si Hagen sach 
wie rehte veintliche	 si zvo dem reken sprach 
welt ir mir geben widere	daz ir mir hapt genomen 
so moegt ir noch wol lebende	heim zvo den Bvrgonden chomen
Do sprach der grimme Hagne		 div bete ist gar verlorn 
vil edeliv chvniginne	ia han ich des gesworn 
daz ich den hort iht zeige	die wile daz si leben 
dehainer miner herren	so enwirt er nieman gegeben
Ich bringez an ein ende	 so sprach daz edel wip 
do hiez si ir brvoder	nemen da den lip 
man slvog im ab daz hovbet	bi hare si ez trvock
fvr den helt von Tronge	do wart im leide genvok
Also der vngemvote		sines herren hovbet sach 
wider Chriemhilde		do der reke sprach 
dv hast ez nach dinem willen	ze einem ende braht 
vn– ist och reht ergangen	als ich mir het gedaht
Nv ist von Bvrgonde	 der edel chvnich tot 
Giselher der ivnge	vn– och Gernot 
den shatz waz nv nieman	wan got vn– min 
der sol dich	valentinne	immer gar verholn sin	[94a]
Si sprach	so habt ir vbel	geltes mich gewert 
so wil ich doch behalten	daz Sifrides swert 
daz trvog min holder friedel	do ich in ivngist sach 
an dem mir herzen leide	 vor allem leide geschach
Si zoch ez von der scheide	daz chvnde et niht erwern 
do dahte si den rechen	 des lebens behern 
si hvob ez mit ir handen	 daz hovpt si im abe slvoch 
daz sach der kvnich Ezel	do waz im leide genvock
Waffen	sprach der fvrste	 wie ist nv tot gelegen
von eines wibes handen	der aller beste degen 
der ie chom ze stvrme	oder ie schilt getrvoch 
swie veint aber ich im were	ez ist mir leide genvok
Do sprach der alte Hildebrant	 ia genivzet siz niht 
daz si in slahen toerste	swaz halt mir geschiht 
swie er mich selhen braht	in angestliche not 
iedoch so wil ich rehen	des chvenen Trongers tot
Hildebrant der alte	ze Chriemhilde spranch 
er slvog der chvniginne	eines swertes swanch 
ia tet ir div sorge	von Hildebrande we 
waz maht si gehelfen	daz si vil grozlichen schrei
Do waz gelegen vber al	da der vaigen lip 
ze stvckhen waz gehowen	do daz edel wip 
Dietrich vn– Ezel	wainen do began 
si chlagten innechliche	beidev mage vn– man
Div vil michel ere	 waz da gelegen tot 
die livte heten alle	iamer vnd not 
mit leide waz verendet	des kvniges hohzit 
als ie div liebe leide	ze aller ivngiste git
Ich enchan iv niht bescheiden	was sider da geschach 
wan riter vn– vrovwen	 wainen man da sach 
darzvo die edeln chnehte	 ir lieben frivnde tot 
hie har daz mer ein ende	ditze ist der Nybelvnge not