UNS IST> In alten	mæren wnders vil geseit
von heleden lobebæren	von grozer arebeit
von frevde vn– hochgeciten	von weinen vn– klagen
von kvner recken striten	mvget ir nv wnder horen sagen
Ez whs <inBvregonden>	ein vil edel magedin
daz in allen landen	niht schoners mohte sin
Chriemhilt geheizen	div wart ein schone wip
dar vmbe mvsin degene	vil verliesen den lip
Ir pflagen dri kunige	edel un– rich
Gunther un– Gernot	die rechen lobelich
vn– Giselher der iunge	ein wetlicher degen
div frowe was ir swester	die helde hetens inir pflegen
Ein richiv chuniginne	frov Vte ir mvter hiez
ir vater der hiez Dancrât	der in div erbe liez
sit nach sime lebene	ein ellens richer man
der ovch insiner iugende	grozer eren vil gewan
Die herren waren milte	von arde hoh erborn
mit kraft vn– mazen chvne	die rechen vz erchorn
da zen Bvrgonden	so was ir lant genant
si frvmten starchiv wnder	sit in Etzelen lant
Ze Wormze bi dem Rine	si wonten mit ir chraft
in dienten von ir landen	vil stolziv ritterschaft
mit lobelichen eren	vnz an ir endes zit
si sturben iæmerliche	sit von zweier frowen nit
Die dri kunige waren	als ich gesaget <han>
von vil hohem ellen	in waren vndertan
ovch die besten rechen	von den man hat gesaget
starch vn– vil chvone	inscharpfen striten vnverzaget
Daz was von tronege hagene	vn– ovoch der bruder sin
Danchwart der snelle	von Metzzen Ortwin
die zwene marcgrauen	Gere vn– Ekkewart
Volker von Alzeye	mit ganzem ellen wol be wart
Rvomolt der chvchen meister	ein vz erwelter degen
Sindolt vn– Hvnolt	dise herren mvsin pflegen
des hoves vn– der eren	der drier kunige man
si heten noch manigen rechen	des ich genennen nienen kan
Danchwart der was marschalch	do was der nefe sin
trvhsetze des kuniges	von Mezzen Ortwin
Sindolt der was schenche	ein wetlicher degen
Hvnolt was chame[1v]rære	si chunden hoher eren pflegen
Von des hofes ere	vn– von ir witen chraft
von ir vil hohen werdekeit	vn– von ir ritterschaft
der die herren pflagen	mit frevden al ir leben
des enchunde iv ze ware	niemen gar ein ende geben
INDisen hohen eren	trvmte Chriemilde
wie si zvge einen valchen	starch schon vn– wilde
den ir zwene arn erchrvmmen	daz si daz mvste sehen
ir enkunde indirre werlde	leider nimmer <geschehen>
Den trvom si do sagete	ir <mvoter> voten
sine chundes niht beschaiden	baz der gvten
der valche den dv zivhest	daz ist ein edel man
in welle got behvten	dv mvst in schier vloren han
Waz saget ir mir von manne	vil liebiv mvter min
ane <rechen> minne	so wil ich immer sin
svs schon ich wil beliben	vnz an minen tot
daz ich von rechen minne	sol gewinnen nimmer not
Nvne versprich ez niht zesere	sprach ir mvter do
soltv immer hercenliche	zer werlde werden vro
daz chvmt von mannes minne	dv wirst ein schone wip
ob dir got gefuget	eins rehte gvten ritters lip
Die rede lat beliben	vil liebiv frowe min
ez ist an manigen wiben	vil diche worden schin
wie liebe mit leide	zeiungest lonen chan
ich sol si miden beide	sone chan mir nimmer missegan
Chriemhilt in ir mvte	sich minne gar bewach
sit lebete div uil gvte	vil manigen lieben tac
daz sine wesse niemen	den minnen wolde ir lip
sit wart si mit eren	eines vil werden rechen wip
Der was der selbe valche	den si in ir trvome sach
den ir beschiet ir mvoter	wie sere si daz rach
an ir nehsten magen	die in slvgen sint
durch sin eines sterben	starp vil manich mvoter kint

Do wohs in nider landen	eins edeln kuniges chint
des vater der hiez Sigemvnt	sin mvter Sigelint
ineiner richen burge	witen wol bechant
nidene bi dem Rine	div was ze Santen genant
Sifrit was geheizen	der snelle degen gvot
er versvchte vil der riche	dvrch ellenthaften mvot
durch sines libes sterche	svochter fremdiv lant
hey waz er sneller degene	sit ze Buregonden vant
Ê daz der degen chvne	vol whse zeman
do het er solhiv wnder	mit siner hant getan
da von man immer mere	mac singen vn– sagen
des wir indisen stunden	mvzen vil von im gedagen
In sinen besten ziten	bi sinen iungen tagen
man mohte michel wnder	von Sifriden sagen
waz eren an im whse	vn– wie schone was sin lip
des heten in zeminne	div vil wetlichen wip
<MAn> zoh in mit dem vlize	als im daz wol gezam
von sin selbes tvgenden	[2r]waz zvht er an sich nam
des wrden sit gezieret	sines vater lant
daz man in zallen dingen	so rehte herlichen vant
Uil selten ane hvote	man riten lie daz kint
in hiez mit wæte zieren	sin mvter Sygelint
sin pflagen ovch die wisen	den ere was bekant
des moht er wol gewinnen	beidiv lvot vn– lant
Nv was er inder sterche	daz er wol waffen trvoch
swes er da zv bedorfte	des lag an im genvoch
do begvnder sinnen	werben schoniv wip
die trvoten wol mit eren	den sinen wetlichen lip
Do hiez sin vater <Sigemvnt>	chunden sinen man
er wolde hochgecite	mit lieben friunden han
div mære man do furte	in vremder kunige lant
den gesten vn– den chunden	gap man rosse vn– ovch gewant
Swa man vant deheinen	der ritter solde sin
von art der sinen mage	div edeln kindelin
dv ladet man zv dem lande	durch die hochgecit
mit samt dem iungen kunige	swert genamen si sit
Von der hochgecite	man mohte wnder sagen
Sigemvnt vn– Sigelint	die chvnden wol beiagen
mit gvte michel ere	des teilte vil ir hant
des sah man vil der fremden	zvzin riten indaz lant
Vier hundert swert degene	die solden tragen chleit
mit dem iungen kunige	vil manic schoniv meit
mit werche was vnmvzich	wande si in waren holt
vil der edeln steine	die frowen leiten in daz golt
die si mit porten wolden	wrchen vf ir wat
den stolzen swertdegenen	des enwas niht rat
der wirt der hiez do sidelen	vil manigem chvnen man
zeinen svnewenden	da er die hochgecite wolde han
Do gie zeinem mvnster	vil manic richer kneht
vn– vil der edeln ritter	die wisen heten reht
daz si den tumben dienten	als in was ê getan
si heten kvrzwile	vn– ovch vil maniger vrovden wan
Got man zen eren	ein messe sanc
do wart von den lvten	vil michel der gedranch
da si zeritter wrden	nach ritterlicher ê
mit also grozzen eren	daz wetlich immer me erge
Si liefen da si funden	gesatelt manic march
in hofe Sigemundes	der bvhurt wart so starch
daz man erdiezen horte	palas vn– sal
die hochgemvten degene	heten vrolichen scal
Von wisen vn– von tumben	man horte manigen stoz
daz der schefte brechen	gein dem lufte doz
trunzvne sach man vliegen	fur den palas dan
da sahen churzewile	beidiv wip vn– ovch die man
Der chunich bat iz lazen	do zoch man dan div march
man sach ovch da zebrochen	uil manige bukkel starch
vil der edeln steine	geuellet vf daz gras
an liehten schildes spangen	von hvrten daz geschehen was
Do giengens wirtes geste	da man in sitzen riet
vil der edeln spise	si von der mvode schiet
vn– win der aller beste	den man mit vollen trvoch
den vremden vn– den [2v]kunden	bot man eren da genvoch
Solcher kurcewile	si pflagen al den tac
vil der varnder diete	rwoe sich bewac
si dieten nach der gabe	die man da riche vant
des wart mit lobe gezieret	allez Sigemundes lant
Der herre hiez do lihen	sinen svn den iungen man
lant un– purge	als er e het getan
den sinen swertgenôzen	gap do vil sine hant
do liebt in do div reise	daz si chomen in daz lant
Div hochgecite do werte	vnz an den sibenden tac
Sigelint div riche	nach alten siten pflac
durch ir kindes liebe	geben rotez golt
si kundez wol gedienen	daz si ir svne warn holt
Lutzel deheinen varnden	armen man da vant
rosse vn– kleider	daz stvop in von der hant
sam si ze lebene heten	mer deheinen tac
ich wene ie ingesinde	so grozzer milte gepflac
Mit lobelichen eren	schiet sich div hochgecit
von des landes herren	hort man wol sit
daz si den iungen wolden	zeime vogete han
des enwolde in do niht volgen	Sifrit der wêtlich man
Sit daz noch beide lebten	Sigemunt vn– Sigelint
niht wolde tragen krone	noch ir liebez kint
doch wolder wesen herre	fur allen den gewalt
des in den landen vorhte	der degen kvn vn– balt
In dorfte niemen schelten	sit do er wafen genam
ia gerwoete vil selten	der reche lobesam
svchte niwan striten	sin ellenthaftiv hant
tet in zallen ziten	in vremeden richen wol bekant

DEn herren mvten selten	deheiniv hercenleit
er horte sagen mære	wie ein schoniv meit
in Burgonden wære	ze wnsche wolgetan
davon er sit vil arebeit	vn– ovch frevden gewan
Div ir vnmazen schone	was vil witen chunt
vn– ir vil hochgemvte	zv der selben stunt
an der iunchfrowen	so manic helt ervant
ez ladete vil der geste	in daz Gvntheres lant
Swaz man nach ir minne	der <werbenden> sach
Chriemhilt in ir sinne	ir selber nie veriach
daz si deheinen wolde	zeime trvte han
er was ir noch vil vremde	dem si wart sider vndertan
Do gedaht vf hohe minne	daz Sigelinde chint
ez was ir aller werben	wider in ein wint
er mohte wol verdienen	schoner frowen lip
sit wart div edel Chriemh'	des starchen Sifrides wip
Im rieten sine mage	vn– genvge sine man
sit daz er vf minne	vlizzen sich began
daz er eine næme	div im mohte zemen
do sprach der herre Sifrit	so wil ich Chriemh' nemen
die edeln iuncfrowen	vz Burgonden lant
durch ir vil grozen schone	von sage ist mir bechant
nie keiser wart so riche	der wolde haben wip
im enzæme wol ze minnen	der iungen kuniginne lip
Disiv selben mære	vernam do Sigemvnt
ez [3r]reite sin gesinde	da uon wart im chunt
der wille sines kindes	was im grimme leit
daz er werben wolde	die vil herlichen meit
Ez gefriesch ovch Sigelint	des edeln kuniges wip
si hete grozze sorge	vmbe ir kindes lip
den vorhte si verliesen	von Gunthers man
den gewerp man do dem degene	sere leiden began
Do sprach der starche Sivrit	vil lieber vater min
ane edeler frowen minne	wolde ich immer sin
ich enwrbe dar min herce	vil groze liebe hat
swaz ieman reden chunde	des ist deheiner slahte rat
Sit dv niht wil erwinden	sprach der kunic do
so bin ich dines willen	inneklichen vro
vn– wil dirz helfen fugen	so ich beste chan
doch hat der chunic Gvnther	vil manigen vbermvten man
Ob ez ander niemen wære	wan Hagene der degen
der chan mit vbermvte	der hochverte pflegen
daz ich vil sere fvrhte	deiz vns werde leit
ia ist mir solher mære	dicke vil von in geseit
Was mag vns daz gewerren	sprach do Sifrit
swaz ich friwentliche	niht ab in erbit
daz mac doch mit ellen	erwerben wol min hant
ich trow im an ertwingen	bediv lvt vn– lant
Do sprach der furste Sigemvnt	din rede div ist mir leit
wan wrden disiv mære	ze Rine geseit
dvne dorftes nimmer	geriten in daz lant
Gunther vn– Gernot	sint mir lange wol bekant
Mit gewalt niemen	erwerben mac die meit
so sprach der kunic Sigemvnt	daz ist mir wol geseit
wellen aber wir mit rechen	riten in daz lant
vnsern besten friwenden	sol div reise sin bechant
Des enist mir niht ze mvote	sprach do Sifrit
daz mir svln rechen	ze Rine volgen mit
durch deheine hervart	daz were mir leit
da mit ich solde ertwingen	die vil herlichen meit
Si mac svs wol erwerben	da min eines hant
ich wil mit zwelf gesellen	in Gunthers lant
dar sult ir mir helfen	vater Sigemunt
do gap man sinen degenen	ze kleiden gra vn– punt
Do vernam ovch disiv mære	sin mvter Sigelint
si begunde trvren	vmbe ir liebez kint
ia vorhte si vil sere	die Guntheres man
div edele kuniginne	darvmbe weinen began
Do chom der herre Sivrit	da er die frowen sach
wider sine mvter	gvetlicher sprach
irn svlt niht weinen	durch den willen min
ia wil ich ane sorge	vor allen wiganden sin
Nv helfet mir der reise	in Burgonden lant
daz ich un– mine rechen	haben solch gewant
daz so stolze degene	mit eren mvgen tragen
des wil ich genade	iv mit triwen immer sagen
Sit dv niht wil erwinden	sprach do Sigelint
so hilf ich dir der reise	min einigez kint
mit der besten wæte	die ritter ie getrvoch
dir vn– den dinen degenen	ir sult ir furen genvoch
Des neig ir mit zvhten	der vil chvne man
er sprach	ich wil <zer verte>	niemen mere han
niwan zwelf gesellen	[3v]den sol man prufen wat
ich wil versvchen gerne	wie ez vmbe Chriemhilde stat
Da sazen schone frowe	naht un– tac
luzzil deheiner mvoze	ir deheiniv pflach
vnze si geworhten	die Sifrides wat
er wolde siner verte	han deheiner slahte rat
Sin vater hiez im zieren	sin ritterlich gewant
da mit er varn wolde	in Burgonden lant
die ir uil liehten brunne	die wrden ovch bereit
vn– ir vil gvten helme	ir <schilde> schon vn– breit
Do nahet int ir reise	zen Burgonden dan
si heten vmbe ir sorge	wiez im solde ergan
ob si immer wider solden	chomen in daz lant
do svomte man den degenen	von dannen waffen vn– gewant
Ir rosse div warn schone	ir gereite goldes rot
lebt iemen vbermvter	des enwas niht not
denne wære Sivrit	vn– die sine man
wie schone er vrlovbes	gerte zen Burgonden dan
In werte trvorechliche	der kunic vn– ovch sin wip
er troste minneklichen	do ir beider lip
er sprach	ir sult niht weinen	durch den willen min
immer ane sorge	mvget ir wol mines libes sin
Ez was leit den rechen	ez weint ovch manic meit
ich wæn in hete rehte	ir herce daz geseit
daz in so vil ir friwende	da von gelege tot
von schulden si do klageten	des gie in endeliche not
An dem sehsten morgen	ze Wormze vf den sant
riten die vil chunen	allez ir gewant
was uon rotem golde	ir gereite wol getan
ir ross div giengen ebene	des herren Sifrides man
Ir schilde warn niwe	starc vn– breit
vn– lieht ir helme	da ze hove reit
Sifrit der vil chune	in Guntheres lant
man gesach an heleden	nie so herlich gewant
Div ort der swerte giengen	nider vf die sporn
ez furten scharpfe geren	die ritter vz erchorn
Sivrit der furt ir einen	wol zweier spannen breit
der ze sinen ekken	harte vreislichen sneit
Die goldes roten zevme	furtens an der hant
von siden furgebuge	sus <chomens> in daz lant
daz volch si allenthalben	kapfen an began
do liefen in engegene	des kunic Guntheres man
Die hochgemvten rechen	ritter vn– knehte
die sprungen in begegene	daz was michel reht
vn– enpfiengen dise geste	in ir herren lant
si namen in die moere	vn– ir schilde von der hant
Div ross si wolden dannen	ziehen an ir gemach
Sifrit der starche	zv den helden sprach
lat uns noch die moere	eine wile stan
wir wellen schiere hinnen	des ich gvten willen han
Man sol ovch unser schilde	ninder von uns tragen
wa ich den kunic uinde	kan mir daz iemen sagen
Gunthern den richen	vz Burgonden lant
do sagetez im ir einer	dem iz rehte was bekant
Welt ir den kunic uinden	daz mac vil wol geschehen
vf ienem sal witen	han ich <in> gesehen
bi den sinen degenen	welt ir zv zim gan
ir mvget da vor [4r]im vinden	manigen vz erwelten man
Do waren ovch dem kunige	div mære nv geseit
daz vf sinem hofe wæren	ritter vil gemeit
die furten liehte brunne	vn– herlich gewant
si enkande niemen	in der Burgonden lant
Den wirt des hete wnder	von wanne koemen dar
die herliche rechen	in wæte lieht gevar
un– mit so schonen schilden	niwe un– breit
daz im daz niemen sagete	daz was im groezliche leit
Des antwrte ein reche	der hiez Ortwin
starch un– chvone	mohter wol sin
Sit wir ir niht erchennen	so sult ir heizen gan
nach mime hoheim Hagene	den sul wir si sehen lan
Dem sint kunt div riche	vn– ovch div fremden lant
mager si bekennen	daz tvot er uns bechant
in hiez der chunic bringen	mit den sinen man
sach man in zvhtekliche	ze hofe fur den chunic gan
Waz sin der kunic wolde	des vragete Hagene
ez sint in mime huse	vremde degene
die niemen hie bekennet	ob ir si ê gesehen
habt in vremden landen	des svlt ir Hagene mir veriehen
Das tvn ich <sicherlichen>	zeinem venster er do gie
sin ovge er do wenchen	zv den gesten lie
wol behagete im ir geverte	vn– ovch ir gewant
si warn im vil vremde	in der Burgonden lant
Er sprach	von swannen furen	die rechen an den Rin
ez mohten selbe fursten	oder fursten boten sin
ir ross div sint so schone	ir chleider harte gvot
swannen si ioch riten	si sint vil hohe gemvot
Also sprach do Hagene	als ich mich kan verstan
swie ich Sifriden	noh nie gesehen han
so wil ich wol getrowen	swie ez sich gefuget hat
so ist ez der reche	der dort so herlichen stat
Er bringet niwe mære	her in dizze lant
die chvnen Nibelunge	slvch des heldes hant
Schilbunc vn– Nibelunch	div richen kuniges chint
er frumte starchiv wnder	mit siner grozen chrefte sint
Da der helt aleine	an alle helfe reit
er vant vor einem berge	daz ist mir wol geseit
bi Nibelunges horde	vil manigen kunen man
die warn im ê fremde	vnz er ir chunde da gewan
Hort der Nibelunges	der was gar getragen
vz einem holn berge	nv horet wnder sagen
wie in teilen wolden	der Nibelunge man
daz sach der degen Sifrit	den helt es wndern began
Er chom zv zin so nahen	daz er die rechen sach
vn ovch in die <degene>	ir einer drunder sprach
hie chumt der starch Sivrit	der helt von Niderlant
vil seltseniv mære	er an den Nibelungen vant
Den rechen wol enpfiengen	Schilbunc vn– <Nibelunch>
mie gemeinem site	die edeln fursten iunch
den schaz in baten teilen	den vil chunen man
vn– batens in so lange	vnz er inz loben began
Er sach so vil gesteines	als wir horen sagen
hundert chantzwægene	ez mohten niht getragen
noch [4v]me des roten goldes	von Nibelunge lant
daz solde in allez teilen	des chunen Sifrides hant
Do gaben si im ze miete	daz Nibelunges swert
si wrden mit dem dienste	vil vbele gewert
den in da leisten solde	der vil chune man
ern kundes niht verenden	do wart der helt von in bestan
Den schatz er vngeteilet	beliben mvse lan
do begunden mit im striten	der zweier kunige man
mit ir vater swerte	daz Palmvnch was genant
ez streit ab in der chune	den hort vn– Nibelung lant
Si heten da ir friunde	zwelf chune man
die starch als risen warn	waz chundez si vervan
die slvoch sit mit zorne	div Sifrides hant
vn– rechen sibenhundert	dwanger von Nibelunge lant
Dar zv die richen kunige	die sluger beide tot
er chom von Albriche	sit in groze not
der wande sine herren	rechen da zehant
vnz er die grozen sterche	sit an Sifride vant
Done chunde im gestriten	daz starche getwerch
alsam die lewen wilde	si liefen an den berch
da er die tarnkappen	Albrichæ ane gewan
do wart des hordes herre	Sifrit der vil chune man
Die da getorsten striten	die lagen alle erslagen
den schatz hiez er do balde	furen vn– tragen
da in ê da namen	die Nibelunges man
Albrich der vil starche	do die kameren gewan
Er mvos im swern eide	er dient im so sin kneht
aller hande dienste	was er im gereht
so sprach von Tronege Hagene	daz hat er getan
also grozer chrefte	nimere reche gewan
Noch weiz ich an im mere	daz mir ist bekant
einen lintrachen	sluoch des heledes hant
do badet er in dem blvote	des ist der helt gemeit
von also vester hvte	daz in nie wafen sit versneit
Nv svln wir den rechen	enpfahen deste baz
daz wir iht verdienen	den sinen starchen haz
sin lip der ist so chune	man sol in holden han
er hat mit sinen ellen	so mænigiv wnder getan
Do sprach der chunich riche	dv maht wol haben war
nv sich	wie degenliche	er stet gein strites var
er unt die sine degene	der wnderchune man
wir suln im begegene	hin nider zv dem rechen gan
Daz mvgt ir	sprach do Hagene	wol mit eren tvn
er ist von hohem chunne	eines richen kuniges svn
er stet in der gebære	mich dunchet	wizze christ
ez ensin niht kleiniv mære	darvmbe er her geriten ist
Do sprach der wirt des landes	nv si vns willechomen
er ist edel un– chvone	daz han ich wol vernomen
des sol ovch er geniezen	in Burgonden lant
do gie der chunic Gunther	da er Sifriden vant
Der wirt vn– sine rechen	enpfiengen so den gast
daz in an ir zvhten	wenich iht gebrast
des begunde in nigen	der vil chune man
man sah in zvhtekliche	mit den sinen rechen stan
Mich wndert [5r]dirre mære	sprach der wirt zehant
von wanne ir	edel Sifrit	sit chomen in daz lant
oder waz ir werbet	ze Wormez an den Rin
do sprach der gast zem kunige	daz sol ivch vnverdaget sin
Mir wart gesaget mære	in mins vater lant
daz hie bi iv wæren	daz het ich gern <erkant>
die chunsten rechen	des han ich vil vernomen
die ie kunic gewnne	dar vmbe bin ich her bechomen
Ovch hort ich iv selben	der degenheite iehen
daz man kunic deheinen	chuner habe gesehen
des giht iv vil der lute	vber elliv disiv lant
nvne wil ich niht erwinden	vnz ez mir werde bechant
Ich bin ovch reche	vn– solde chrone tragen
ich wil daz gern fugen	daz si von mir sagen
daz ich habe von rehte	lute vn– lant
darvmbe sol min ere	vn– min hovbt wesen pfant
Nv ir sit so chune	als mir ist geseit
iane rvche ich	ist iemen	liep oder leit
ich wil an iv ertwingen	swaz ir mugt han
lant vn– burge	daz sol mir wesen allez undertan
Den chunic hete wnder	vn– sine man allesam
vmbe disiv mære	die er hie vernam
daz er des hete willen	er næme im siniv lant
daz horten sine degene	do wart in zvernen bechant
Wie hete ich daz verdienet	sprach Gunther der degen
des min vater lange	mit eren hat gepflegen
daz wir daz solden vliesen	von iemannes kraft
wir liezen vbel schinen	daz ovch wir pflegen ritterschaft
Ich enwil es niht erwinden	sprach aber der chune man
ez enmvge von dinem ellen	din lant den vride han
ich wils alles walten	vn– ovch div erbe min
erwirbestvz mit ellen	die svln von rehte wesen din
Din lant vn– ovch daz mine	suln geliche ligen
sweder unser einer	am andern mac gesigen
dem sol ez allez dienen	die lute vn– ovch div lant
da widerredet aleine	der herre Gernot zehant
Wir han des niht gedingen	sprach do Gernot
daz wir iht lande irtwingen	daz iemen drumbe tot
gelige vor rechen handen	wir haben richiv lant
div dienent vns von rehte	ze nieman sint si baz bewant
<In> vil grimmem mvote	da stunden die friunde sin
do was ovch dar vnder	der herre Ortwin
der sprach	disiv svone	ist mir von hercen leit
iv hat der starche Sifrit	vnverdienet widerseit
Ob ir vn– iwer bruder	hetet niht die wer
vn– ob er danne furte	ein michil kuniges her
ich trwote wol erstriten	daz der chune man
die grozen vbermvete	von warn schulden mvse lan
Daz zvrnde harte sere	der helt von Niderlant
sich ensol niht vermezzen	wider mich din hant
ich bin ein kunic riche	so bistv kuniges man
ia enzimt dir niht mit strite	deheinen minen genoz bestan
Nach swerten rief do sere	von Metzen Ortwin
er mohte Hagenen swester suon	von Tronege vil [5v]wol sin
daz der so lange dagete	daz was dem kunige leit
do vnderstundez Gernot	der ritter <kvone> vn– gemeit
Er sprach ze Ortwine	lat iwer zvrnen stan
vns en hat herre Sifrit	solhes niht getan
wir mugen ez noch wol scheiden	mit zvhten	dest min rat
vn– haben in ze frivnde	daz uns lobelicher stat
Des antwrte Hagene	vns mac wol wesen leit
allen iwern degenen	daz er ie gereit
durch striten her ze Rine	er soldez haben lan
im heten min herren	solher leide niht getan
Do sprach aber Sifrit	der chreftige man
mvte ivch daz	her Hagene	daz ich gesprochen han
so sol ich lazen chiesen	daz die hende min
wellent vil gewaldech	hie zen Burgonden sin
Daz sol ich eine wenden	sprach do Gernot
allen sinen degenen reden er verbot
iht mit vbermvete	des im wære leit
do gedaht ovch Sifrit	an die vil herlichen meit
Wie zæme vns mit iv striten	sprach aber Gernot
swaz helde nv dar under	mvsen ligen tot
wir hetens luzzil ere	ob wir ez wolden tvon
des antwrt Sifrit	des kunic Sigemundes sun
Warumbe bitet Hagene	vn– ovch Ortwin
daz er niht gahet striten	mie den frivnden sin
der er also manigen	hie ze lande hat
si mvsin rede vermiden	daz was Gernotes rat
Ir sult vns wesen willechomen	sprach Giselher daz kint
vn– iwer hergesellen	die hie mit iv sint
wir suln iv gerne dienen	ich un– die mage min
do hiez man den gesten	schenchen Guntheres win
Do sprach der wirt des landes	allez daz wir han
gervchet irs nach eren	daz si iv vndertan
vn– si mit iv geteilet	lip un– gvot
do wart der herre Siurit	ein luzzel senfter gemvot
Do hiez man in behalten	alliz ir gewant
man gab in herberge	die besten die man vant
Sivrides knappen	man schvof in gvot gemach
den gast man sit vil gerne	da zen Buregonden sach
Man bot im michel ere	darnach ze manigen tagen
tusint stunden mere	danne ich iv kunde gesagen
daz hete verscholt sin ellen	ir svlt wol wizzen daz
in sach vil luzzil iemen	der im were gehaz
Sich vlizzen kurzewile	die kunige vn– ovch ir man
so was er ie der beste	swes man da began
des chunde im volgen niemen	so michel was sin kraft
so si den stein wrfen	oder schuzzen den schaft
Swa so vor den frowen	durch ir hofscheit
churzewile pflagen	die ritter vil gemeit
da sah man ie vil gern	den helt vz Niderlant
er het vf hohe minne	sine sinne gewant
Ze hofe die schonen frowen	vrageten mêre
wer der stolze vremde	reche wêre
sin lip der ist so schone	vil riche sin gewant
do sprachen ir genvge	ez ist der chunic von Niderlant
Swes iemen da begunde	des was sin lip bereit
[6r]er trvoch in sinem mvte	ein minnekliche meit
vn– ovch in ein div frowe	die er noch niene gesach
div im in heinliche	vil dicke gvtliche sprach
Swenne vofem hofe wolde	spilen da div kint
ritter vn– knappen	daz sach vil diche sint
Criemh' durch div venster	div kuniginne her
deheiner kurzewile	bedorfte div kuniginne mer
Vn– wesser daz in sehe	die er in hercen trvoch
da het er kurcewile	immer ane genvoch
solt ovoch er si sehen	ir sult gelovben daz
daz im in dirre werlde	chunde nimmer werden baz
Swenner bi den rechen	vf dem hofe stvnt
also noch die lute	durch kurzewile tvont
so stvnt so minnekliche	daz Sigelinde chint
daz in dvrch hercenliebe	trvtte manic frowe sint
Er daht ovch manige zite	wie sol daz geschehen
daz ich die maget edele	mit ovgen mvge gesehen
die ich von hercen minne	vn– lange han getan
div ist mir vil vremde	des mvz ich dicke truric stan
Swenne die kunige riche	riten in ir lant
so mvsin ie die rechen	mit in al zehant
da mit reit ovch Sifrit	daz was den frowen leit
er het durch hohe minne	diche michel arebeit
Svs wonter bi den herren	daz ist al war
in Guntheres lande	volleklich ein iar
daz er die minneklichen	die zite niene gesach
von der im sit vil liebe	vn– ovch vil leide geschach

Do> chomen vremdiv mære	in Guntheres lant
von boten	die im verre	warn dar gesant
von vnchvnden rechken	die in trugen haz
do si die rede vernamen	leit was in innekliche daz
Die wil ich iv nennen	ez was Lvdeger
vzer Sahsen lande	ein richer furste her
vn– ovch von Tenemarche	der kunic Lvdegast
an dem sinen vriunden	ganzer helfe nie gebrast
Ir boten chomen warn	in Buregonden lant
die ir widerwinnen	heten dar gesant
do vragte man der mære	die unchvnden man
do braht man si balde	ze hofe fvr den kvnic stan
Do sprach der kunic Gunther	nv sit willekomen
wer ivch her habe gesendet	des enhan ich niht vernomen
daz svlt ir lazen horen	sprach der ritter gvot
do vorhten si vil sere	den grimmen Guntheres mvot
Welt ir uns	kvnic	erlovben	daz wir iv mære sagen
div wir iv da bringen	sone svln wir niht verdagen
wir nennen iv die herren	die vns here habent gesant
Livdegast vn– Livdeger	die wellent svchen iwer lant
Ir habt ir haz verdienet	ir svlt gelovben daz
daz iv die rechen beide	tragent grozen haz
si wellent herverten	ze Wormze an den Rin
in hilfet vil der degene	des sult ir ane zwifel sin
Inre zwelf wochen	ir reise sol geschehen
habt ir iemen vrivnde	daz lat vil balde sehen
die iv vriden hel[6v]fen	die <burge> vn– iwer lant
hie wirt von in verhowen	vil manic herlicher rant
Oder welt ir mit in dingen	so enbietet ez in dar
sone ritent iv so nahen	niht die starchen schar
ze Wormez zv dem Rine	vf hercenlichiv leit
da von verderben mvzen	die gvten ritter gemeit
Nv bitet eine wile	sprach kunic gvot
vnz ich mih baz versinne	ich kund iv minen mvot
han ich getriwer iemen	die sol ich niht verdagn
disiv starchen mære	sol ich minen friwenden sagen
Dem kunige disiv mære	warn leide genvoc
die rede er tovgenliche	in sime hercen trvoc
er hiez gewinnen Hagenen	vn– ander sine man
vn– bat ovch harte balde	ze hofe nach Gernote gan
Do chomen im die besten	swaz man der da vant
er sprach man wil uns svochen	her in unser lant
mit starchen herverten	daz lat iv wesen leit
ez ist gar ane schvlde	daz si uns habent widerseit
Daz wern wir mit swerten	sprach do Gernot
da sterbent wan die veigen	die mvzen ligen tot
dar vmbe ich niht vergezzen	mac der eren min
die unser widerwinnen	suln vns willechomen sin
Do sprach der starche Hagene	daz endunchet mich niht gvot
Livdegast un– Livdeger	die tragent vbermvot
wir mvgen uns niht besendet	in so churzen tagen
so sprach der chune reche	wan mvget irz Sifride sagen
Die boten herbergen	hiez man in die stat
swie uient man in wære	doch schone ir pflegen bat
Gunther der riche	daz was wolgetan
vnz er eruant an <vriunden>	wer im wolde gestan
Dem kunige in sinen sorgen	was iedoch vil leit
do sach in truorende	ein degen vil gemeit
der niht wizzen kunde	waz im was geschehen
do bat er im der mære	den kunic Gunther veriehen
Mich wndert harte sere	sprach do Siurit
wie habt ir so verkeret	die vroliche sit
der ir nv mit uns lange	habt alher gepflegen
des antwrt im do Gunther	der vil zierlich degen
Iane mag ich allen luten	die swere niht gesagen
die ich mvz tovgenliche	in mime hercen tragen
man sol stæten friunden	chlagen hercen not
div Sifrides varwe	wart beidiv bleich vn– rot
Er sprach zv dem kunige	habt vf minen eit
ich sol iv helfen wenden	elliv iweriv leit
welt ir vriunde svochen	der sol ich einer sin
vn– trowe ez wol mit eren	volbringen an daz ende min
Nv lone iv got	her Sivrit	div rede mich dunchet gvot
vn– ob mir nimmer helfe	iwer ellen getvot
ich frewe mich doch der mære	daz ir mir sit so holt
lebe ich deheine wile	ez sol werden wol verscholt
Ich wil ivch lazen horen	warvmbe ich trurich stan
von boten miner viende	ich daz vernomen han
daz si mich svchen wellen	mit heruerten [7r]hie
daz getaten uns noch degene	her zv disen landen nie
Daz lat ivch ahten ringe	sprach do Sivrit
vn– senftet iwerm mvote	tvot des ich ivch bite
lat mich iv erwerben	ere vn– ovch den frumen
e daz iwer uiende	her ze disen landen chvmen
Swenne iwer starche uiende	zir helfe mohten han
drizzech tusint degene	so wol ich si bestan
het ich niwan tusint	des lat ivch an mich
do sprach der kunic Gunther	daz dien ich immer vmbe dich
So heizet mir gewinnen	tusint iwerr man
sit daz ich der minen	bi mir niht enhan
niwan zwelf degene	so wer ich iwer lant
iv sol immer dienen	mit triwen Sifrides hant
Des sol uns helfen Hagene	vn– ovch Ortwin
<Danchwart>	vn– Sindolt	die lieben rechen din
ovch sol da mit riten	Volcher der kune man
der sol den vanen fvren	baz ihs nieman <engan>
Nv lat die boten riten	wider in ir lant
daz si uns da sehen schiere	<daz> tv man in bekant
so daz unser burge	vride mvzen han
do hiez der kunic besenden	beidiv mage vn– man
Die boten Livdegeres	ze hove giengen do
daz si ze lande solden	des warn si vil vro
do bot in riche gabe	Gunther der kunic gvot
vn– schuf inn sin geleite	des stunt in hohe der mvot
Nv saget	sprach do Gunther	den vianden min
si mugin mit ir reise	wol da heime sin
wellent aber si mich svochen	her in miniv lant
mirn zerinne miner frivnden	in wirdet arbeit erchant
Den boten riche gabe	man do fvr truoch
der het in ze gebene	der riche chunic genvoch
dine torsten niht versprechen	die Ludegeres man
vrlovp si do namen	vn– furen vrolichen dan
Do die boten waren	ze <Tenemarchen> komen
vn– der kunich Livdegast	hete daz vernomen
waz si ze Rine redeten	als im daz wart geseit
ir starchez vbermveten	was im ane maze leit
Man saget im daz si heten	manigen chunen man
dar vnder sach man einen	vor Gunthere stan
der was geheizen Sifrit	ein helt vz Niderlant
ez leidete Livdegaste	do er div mære reht ervarnt
Do die von Tenemarche	dizze horten sagen
do ilten si der helfe	deste me begagen
so daz der kunic Livdegast	siner mage un– man
wol zweinzich tusint degene	zv der reise gewan
Do besande ovch sich von Sahsen	der chvne Livdeger
vnz si vierzech tvsint	heten vn– mer
mit den si wolden riten	in Guntheres lant
do heten ovch sich hie heime	die drie kunige besant
<mit> den Buregonden	vn– ander <ir> <hohen> man
die si durch vrlivge	furen wolden dan
si ilten sich bereiten	des gie den helden not
dar vnder mvsin degene	side chiesen den tot
Si vlizzen sich zer reise	do si wolden dane
Volker dem chunen	bevolhen wart der vane
do si varen wolden	ze Wormze vber Rin
Hagene der star[7v]che	der mvos scharmeister sin
Da mit reit ovch Sindolt	vn– Hvnolt
die wol gedienen chunden	richer kunige golt
Dancwart der snelle	vn– ovch Ortewin
die mohten wol mit eren	in der heruerte sin
<Her> kunic	sit hie heime	sprach do Sivrit
sit daz iwer rechen	mir wellen volgen mit
belibet bi den frowen	vn– habet hohen mvot
ich trwoe iv wol beherten	beidiv ere un– gvot
Die ivch da wolden svchen	ze Wormze an den Rin
daz sol ich wol behuten	daz si iv iht schade sin
wir svlen in geriten	so nahen in ir lant
daz in ir vbermveten	werde in sorgen erwant
Von Rine si durch Hessen	mit ir helden riten
gegen der Sahsen lande	da wart sit gestriten
mit rvobe vn– ovch mit brande	wosten si daz lant
daz iz den fursten beiden	wart mit arbeit bechant
Si komen vf die marche	die knehte zogeten dan
Sifrit der vil starche	vragen do began
wer sol des gesindes	vns nv hvten hie
iane wart den Sahsen	geriten schedelicher nie
Si sprachen	lat der tumben	huten vf den wegn
den vil chunen marschalch	der ist ein sneller degen
wir verliesen deste minre	von Livdegeres man
lat in vn– Ortwinen	hie die nachhvte han
So wil ich selbe riten	sprach Siurit der degen
vn– wil der warte	gein den uienden pflegen
vnz ich vil rehte ervinde	wa die rechen sint
do wart gewaffent balde	der schonen Sigelinde kint
Daz volch bevalh er Hagene	da er wolde dan
vn– ovch Gernote	dem uil kunem man
do reit er eine dannen	in der Sahsen lant
da er div rehten mære	wol mit eren sit ervant
Do sah er here daz grozze	daz uf dem velde lac
daz wider siner helfe	mit vnfvge wach
des was wol vierzech tusint	oder dannoch baz
der helt in hohem mvte	sach vil frolichen daz
Do het ovch sich ein reche	von den vienden dar
erhaben vf die warte	der was ze vlize gar
den sach der herre Sifrit	vn– in der chune man
ietweder do des andern	mit nide govmen began
Ich sage iv wer der wære	der hie der warte pflach
ein liehter schilt von golde	im vor der hende lach
ez was der kunich Livdegast	der hute siner schar
dirre gast vil edele	ernante vil herlichen dar
Nv hete ovch in her Livdegast	vientlich erchorn
ir ross si namen beide	zen siten mit den sporn
si neigten vf die schilde	die schefte mit ir kraft
des wart der kunic here	mit grozen sorgen behaft
Div ross nach stiche trvgen	div richen kuniges kint
mit hurte fur ein ander	sam si wæte ein wint
mit zovmen wart gewendet	vil ritterlichen dan
mit swerten ez ersvhten	die <zwen> grimme starche man
Do sluch der herre Sifrit	daz al daz velt erdoz
do stovp im vz dem helme	sam von brenden groz
die heizen fivres vunchen	[8r]von des rechen hant
da streit vil mæhteklichen	der voget vz Niderlant
Do sluoc ovch im her Livdegast	vil manigen grimmen slach
ir ietwederes ellen	vf schilden vaste lach
do heten dar gehutet	wol drizzech siner man
ê im der helfe chome	den sich doch Sivrit gewan
mit drin starchen wnden	die er dem kunige sluoc
durch eine liehte brunne	div was gvot genvoch
daz swert an sinen ekken	braht vz wnden bluot
des gewan der kunic Livdegast	einen trurigen mvot
Er bat sich leben lazen	vn– bot im siniv lant
vn– sagt im daz er wære	Livdegast genant
do chomen sine rechen	die heten wol gesehen
waz da von in beiden	vf der warte was geschehen
Do er in danne furte	do ward er an gerant
von drizzech sinen mannen	do wert des heledes hant
sinen richen gisel	mit vngefugen slegen
sit tet schaden mere	Sifrit der vz erwelte degen
Die drizzech er ze tode	vil werliche slvoch
er liez ir leben einen	balde er reit genvoch
vn– sagt hin div mære	waz hie was geschehn
ovch moht mans die warheit	an sinem rotem helme sehn
Den von Tenemarche	was vil grimme leit
ir herre was gevangen	do in daz wart geseit
man seit ez Livdegere	toben er began
von ungefugem zorne	wand im was leide getan
Livdegast der riche	was gefuret dan
von Sifrides gewalte	zv Guntheres man
er bevalh in Hagene	der chune reche guot
do er vernam div mære	do ward er frolich gemvot
Er hiez der Burgonden	ir vanen binden an
wol vf	so sprach Sivrit	hie wirt noch me getan
ê sich der tac verende	sol ich habn den lip
daz mvet in Sahsen lande	etliches guten rechen wip
Ir helde von dem Rine	ir sult min nemen war
ich kan ivch wol geleiten	in Livdegeres schar
da seht helme howen	von guter helede hant
ê daz wir wider <wenden>	in der Burgonden lant
Zen rossen gahte Gernot	vn– ovch sine man
Volker der chune	den vanen zvochte dan
der starche videlære	do reit er vor der schar
do was ovch daz gesinde	ze strite herlichen gar
Sine furten doch niht mere	niwan tusint man
darvber zwelf rechen	stieben do began
div molte von den strazen	si riten vber lant
do sach man von in schinen	vil manigen herlichen rant
Do waren ovch die Sahsen	mit ir <scharn> chomen
mit swerten wol gewahsen	als wir han sit vernomen
div swert div sniten sere	den rechen an der hant
do wolden si den gesten	wern burge vn– lant
Der herren scharmeister	daz volch do furten dan
da was ovch chomen Sifrit	mit den sinen man
die er da mit im brahte	vzer Niderlant
des tages wart in sturme	vil manic blutiger rant
Sindolt vn– Hvnolt	vn– ovch Ger[8v]not
die vrumten in dem strite	vil manigen helt tot
e si daz reht erfunden	wie chune was ir lip
daz mvse sit beweinen	vil manic wetlichez wip
Volker vn– Hagene	vn– ovch Ortwin
die lascten im strite	vil maniges helmes schin
mit vliezendem bluote	ez warn chune man
da wart von Danchwarte	vil michel wnder getan
Die von Tenemarche	versvohten wol ir hant
do horte man von hurte	erdiezen manigen rant
vn– ovch von scharfpen swerten	der man da vil gesluoc
die stritchunen Sahsen	taten scaden ovch genvoch
Do die von Burgonden	drungen in den strit
von in wart verhowen	vil manic wnde wit
do sahe man vber sætele	vliezen daz bluot
svs wrben nach den eren	die ritter chun vnde gvot
Man horte da luot erhellen	den helden an der hant
div vil scharpfen wafen	da die von Niderlant
drungen nach ir herren	in die herten schar
si chomen degenliche	mit samt Sifride dar
Volgen der von Rine	niemen man im sach
man mohte chiesen vliezen	den blvtigen bach
durch die vil liehten helme	von Sifrides hant
vnz er Livdegeren	von sinen hergesellen vant
Drie widerchere	het er nv genomen
des hers an ein ende	nv was ovch Hagene chomen
der half im wol ervollen	in strite sinnen mvot
des tages mvse ersterben	von in vil manic ritter gvot
Do der starche Livdeger	Sifriden vant
vn– daz er so hohe	trvge an siner hant
daz vil scharpfe wafen	vn– ir so manigen sluoc
dar vmbe wart der chvene	vor leide zornich genvoc
Do wart ein michel dringen	vn– groz der swerte klanch
do ir ingesinde	zv zein ander dranch
do versuhten sich die rechen	beidenthalben baz
die schar begunden wichen	sich huop da grozlicher haz
Dem vogete von den Sahsen	was daz wol geseit
sin bruder was gevangen	daz was im harte leit
wol wesser daz iz tete	daz Sigelinde kint
man zeh is Gernoten	vil wol ervant er iz sint
Die slege Livdegeres	die warn also starch
daz im vnder satele	struchte daz march
do sich daz ross erholte	der chune Siurit
gewan in dem sturme	einen vreiselichen sit
Des half im wol Hagene	vn– ovch Gernot
Ortwin vn– Volker	des lage ir vil da tot
Sindolt vn– Hunolt	die zwene chune man
von den vil manic frowe	schaden grozzen da gewan
In sturme <vngescheiden>	warn die kunige her
do sah man vber helme	vliegen manigen ger
durch die liehten schilde	von der degene hant
man sach da var nach bluote	manigen herlichen rant
In dem starchen sturme	erbeizte manic man
nider von den rossen	ein ander liefen an
Sifrit der chune	vn– ovch Livdeger
da striten wol nach eren	die helede chun vn– her
Do flovch [9r]daz schilt gespenge	von Sifrides hant
den sige gedaht erwerben	der helt von Niderlant
an den kunen Sahsen	die dolten vngemach
hei waz da liehter ringe	der snelle Dancwart zebrach
Do het der herre Livdeger	vf eime schilde erkant
gemalet eine chrone	vor Sifrides hant
wol wesser daz iz wære	der vbermvete man
der helt zv sinen friunden	starche rufen began
Gelovbet ivch des sturmes	mage vn– man
svn den Sigemundes	ich hie gesehn han
von Niderlant den starchen	han ich hie bechant
in hat der ubil tivfel	her zen Sahsen gesant
Die vanen wrden lazen	inn dem sturme nider
frides er do gerte	des wert man sider
doch mvser werden gisel	in Guntheres lant
daz het an im ertwngen	des chunen Sifrides hant
Mit gemeinen rate	so liezen si den strit
durchel vil der helme	vn– ovch der schilde wit
si leiten von den handen	swaz so man der vant
die trugen blutes varwe	von der Buregonden lant
Si viengen swen si wolden	des heten si gewalt
Gernot der herre	vn– Hagene	ein degen balt
die wnden hiezen baren	si furten mit in dan
zv den Buregonden	funf hundert wetlicher man
Die sigelosen rechen	ze Tenemarchen riten
do enheten ovch die Sahsen	so hohe niht gestriten
daz man in lobes iæhe	daz was den heleden leit
do wrden ovch die veigen	von friunden sere gekleit
Si hiezen daz gewæfen	wider sovmen an den Rin
ez hete wol geworben	mit den rechen sin
Sifrit der starche	het ez gvot getan
dez im do iehen mvsen	alle Guntheres man
Gegen Wormez sande	der herre Gernot
heime zv sime lande	den friunden er enbot
wie im gelunge wære	vnt den sinen man
ez heten die vil chunen	wol nach eren getan
Die garzvne liefen	von den wart ez geseit
do frevten sich die schoenen	die ê heten leit
der vil lieben mære	die in waren chomen
da wart von edeln frowen	uil michel fragen vernomen
<wie> gelunge wære	des richen chuniges man
man hiez der boten einen	zv Chriemh' gan
daz geschach vil tovgen	iane torstes vberlvot
wan si hete dar vnder	ir vil liebez hercen trvot
Do si den boten kvomenden	zir kemenaten sach
Chriemh' div uil schone	gvtlichen sprach
sag an liebiv mære	ia gib ich dir min golt
tvstvz ane triegen	ih wil dir immer wesn holt
Wie schiet vz dem strite	min bruder Gernot
vn– ander mine friwende	ist mir iht maniger tot
wer tet da daz beste	daz soltv mir sagen
do sprach der bote biderbe	wir heten ninder deheinen zagen
Ze vorderst am striten	reit niemen alse wol
vil edeliv kuniginne	sit manz iv sagen sol
so der gast vil chune	vzer Niderlant
da worhte [9v]michel wnder	des herren Sivrides hant
Swaz die rechen alle	in strite hant getan
Danchwart vn– Hagene	vn– ander des kuniges man
swaz iemen streit nach eren	daz ist gar ein wint
wider Sifriden	des kunic Sigemundes kint
Si frumten in dem stvrme	der helde vil erslagen
doch enkund iv daz wnder	niemen wol gesagen
waz da worhte Sifrit	swenner ze sturme reit
den vrowen an ir magen	frvmet er div groezlichen leit
Ovch mvste da beliben	vil maniges wibes trvot
sine slege man horte	vf helmen alse luot
daz si von wnden brahten	daz vliezende blvot
er ist in allen tugenden	ein ritter kvn vn– gvot
Da hat ovch vil begangen	von Mezzen Ortewin
swaz er ir mohte erlangen	mit den handen sin
die mvsen wnt beliben	oder meistich tot
da tet iwer bruder	die aller grozisten not
div immer in den stuormen	chvnde sin geschehn
man mvz der warheite	den vzerwelten iehn
die stolzen Burgonden	die habent so gevarn
daz si vor allen schanden	ir ere chunnen wol bewarn
Man sach da vor ir handen	vil manigen satel bloz
da von den liehten swerten	daz velt vil lvt erdoz
die rechen von dem Rine	die habent so gestriten
daz ez ir vianden	wære bezzer vermiten
Die chunen Tronegære	die taten groziv leit
da man mit volches chreften	zv zein ander reit
da vrumte manigen toten	des chunen Hagenen hant
des vil ze sagene wære	her zer Burgonden lant
Sindolt vn– Hunolt	die Gernotes man
vn– Rvmolt der vil chune	die hantz so gvot getan
daz er Livdegere	mac immer wesn leit
daz er den minen herren	het ze Rine widerseit
Strit den aller hohsten	der inder da geschach
ze iungest vn– zem ersten	den ieman gesach
den tet vil willekliche	div Sifrides hant
er bringet riche gisel	in daz Guntheres lant
Die twanc mit sinen ellen	der wætlich man
des ovch der kunic Livdegast	schaden vil gewan
vn– ovch von den Sahsen	der chune Livdeger
nv horet miniv mære	vil edeliv kuniginne her
Si hat gevangen beide	div Sifrides hant
ez enwart nie meniger gisel	braht in dizze lant
so nv von sinen schulden	chumet an den Rin
ir enchunden disiv mære	nimmer lieber gesin
Man bringet der gesunden	fvnf hvndert oder baz
vn– der verchwnden	frowe	wizzet daz
wol ahzech roze bære	in Burgonden lant
die meistech hat verhowen	des chunen Sifrides hant
Die durch ir vbermveten	widersageten an den Rin
die mvzen nv gevangen	die Guntheres sin
die bringet man mit frevden	her in dizze lant
do erblvet ir liehtiv varwe	do si div mære reht ervant
Ez wart ir lieth antlvzze	vor liebe rosen rot
do mit [10r]liebe was gescheiden	vz der grozen not
der minneklich reche	Sivrit der iunge man
si vrevt ovch sich ir friunde	daz was von schulden getan
Do sprach div minnekliche	dv hast mir wol geseit
dv solt haben dar vmbe	ze miete richiv kleit
vn– zehn march von golde	heiz ich dir tragen
des mag man solchiv mære	richen frowen gern sagen
Man gab im sine miete	daz golt vn– ovch div chleit
do gie an div venster	vil manic schoniv meit
si warten vf die straze	riten man do vant
vil der hochgemvten	in der Burgonden lant
Da chomen die gesunden	die wnden taten sam
si mohten grvzen horen	von vriunden ane scham
der wirt gein sinen gesten	vil vrolichen reit
mit vreuden was verendet	daz sin vil grozliche leit
Do enpfie er wol die sine	die vremden tet er sam
wan dem richen kunige	anders niht enzam
wan danchen gvetliche	die im warn chomen
daz si den sige nach eren	in stvrme heten genomen
Gvnther bat <im> mere	von sinen frivnden sagen
wer im an der reise	ze tode wær irslagen
do het er vlorn niem	niwan sehzech man
verklagen man die mvse	so sit nach heleden ist getan
Di gesunden brahten	verhowen manigen rant
vn– helme vil verschroten	in Guntheres lant
si stunden von den rossen	nider fur den sal
ze liebem antpfange	man horte vrolichen schal
Do hiez man herbergen	die wegemvden man
der kunic sinen gesten	danchen vil began
er hiez der wnden hveten	vn– schaffen in gemach
wol man sine tvgende	an sinen vianden sach
Er sprach ze Livdegere	nv sit mir willechomen
ich han von iwern schulden	schaden vil genomen
der wirt mir nv gebvzet	ob ich gelucke han
got lone minen frivnden	si hant mir liebe getan
Ir mvgt in gerne danchen	sprach do Livdegere
also hoher gisel	gewan nie kunic mere
vmbe schone hvte	wir bieten michel gvot
daz ir genædechliche	an mir vn– minen frivnden tvot
Ich wil ivch ledech lazen	sprach der kunic gen
daz mine viande	hie bi mir besten
des wil ich haben burgen	daz si miniv lant
iht rvemen ane hulde	des sichert do ir beder hant
Man brahte si ze rowe	vn– schvf in gvt gemach
den wnden man gebettet	vil gvtlichen sach
man schancte den gesunden	met vn– gvten win
do chunde daz gesinde	nimmer vrolicher sin
Ir zerhowen schilde	man behalten trvoch
blvtiger sætele	der was da genvoch
die hiez man ovch verbergen	daz weinten niht div wip
do chom hermvede	vil maniges chunen ritters lip
Der wirt pflac siner geste	vil grozliche wol
der vremden vn– der chunden	was daz lant so vol
man hiez der sere wnden	vil gvtliche pflegn
do was ir vbermveten	vil harte ringe [10v]gelegn
Die ercznie chunden	den bot man grozen scholt
silber ane wage	daz zvo daz liehte golt
daz si die helde nerten	nach des strites not
dar zvo der kunic den gesten	gabe grozlich bot
Die wider heim ze hvse	der reise heten mvot
die bat noch beliben	also man friunde tvot
der kunic gie ze rate	wier lonte sinen man
si heten sinen willen	nach grozen eren getan
Do sprach der herre Gernot	man sol si riten lan
vber sehs wochen	si in daz chunt getan
daz si chomen widere	zeiner hochgecite
so ist maniger geheilet	der nv vil sere wnd lit
Do gert ovch vrlovbes	der helt von Niderlant
do der kunic Gvnther	den willen sin ervant
er bat in minnekliche	noch bi im bestan
wan durch Chriemhilde	so wær ez nimmer getan
Dar zvo was er ze riche	daz er iht næme solt
er het daz wol verdienet	der kunic was im holt
sam waren sine mage	die heten daz gesehn
waz von sinem ellen	in dem stvrme was geschehn
Durch der schonen willen	gedaht noch bestan
die er vil gern sehe	sit wart ez getan
al nach sinem mvote	si warde im wol bechant
sit reit er vroliche	heim in sines vater lant
Der wirt hiez zallen citen	ritterschefte pflegn
daz tet do willechliche	vil manic iunger degn
die wil hiez er sidelen	vor Wormze an den sant
den	die im chomen solden	zv den Burgonden lant
In den selben citen	do si nv solden chomen
do het div vrowe Chriemh'	div mære wol vernomen
er wolde hochgeciten	mit magen vn– man
do wart vil michil vlizen	von schonen vrowen getan
mit wæte vn– mit gebende	daz si solden tragen
Vte div vil riche	div mære horte sagn
von den stolzen degenen	die da solden chomen
do wart vz der valde	gvter wæte vil genomen
Durch ir kinde liebe	hiez si do sniden kleit
da mit wart gezieret	vil frowen vn– manic meit
vn– vil der iungen rechen	vz Burgonden lant
da wart ovch vil der vremden	bereitet herlich gewant 

Man sach si tægeliche	nv riten an den Rin
di zer hochgecite gerne wolden sin
die durch der chunige liebe	chomen in daz lant
man gap da genvogen	bediv ross vn– ovch gewant
In was ir gesidele	allen wol bereit
den hohsten vn– den besten	als uns daz ist geseit
zwein vn– drizzech fursten	da zer hohgecite
da zierte sich engegene	uil manic iuncfrowe sit
Ez was vil vnmvzzich	Giselher daz chint
die vremden vn– ir mage	vil gvetliche sint
enpfienger vn– Gernot	vn– ovch ir beider man
ia grvzten si die degene	als ez nach eren was getan
Die golt varwen sætele	si brahten in daz lant
die zierlichen schilde	vn– herlich gewant
durch des wirtes liebe	[11r]zv der hohgecit
vil manigen vngesunden	sach man vrolichen sit
Die in den peyen lagen	vn– heten wnden not
die mvsin des vergezzen	wie herte was der tot
die siechen vngesunden	die mvsin si verklagen
si frveten sich der mære	gein der hohgecite tagen
wie si lebn wolden	da zer wirtschaft
wnne ane maze	mit frevden vberchraft
heten al die lute	swaz man ir da vant
des hvop sich michil wnne	vber al daz Gvnthers lant
An einem Pfienst morgen	sach man fvr gan
gekleidet wnnekliche	vil manigen chunen man
fvnf tusint oder mere	da zer hohgecit
der lop vil vollekliche	an den Burgonden lit
Der wirt der het die sinne	im was wol bekant
wie rehte hercenliche	der helt von Niderlant
sine swester trvote	swier si <niene> gesach
der man so grozer schone	vor allen iuncfrowen iach
Er sprach	nv ratet alle	mage vn– mine man
wie wir die hochgecite	so lobeliche han
daz man vns drumbe iht schelte	her nach dirre cit
ein ieslich lop vil stæte	ze iungest an den werchen lit
Do sprach vzer Mezzen	der degen Ortewin
welt ir mit vollen eren	zer hochgecite sin
so svlt ir lazen schowen	div wnnekliehen kint
die mit so vollen eren	hie zen Burgonden sint
Waz were mannes wnne	des frevte sich ir lip
ez entæten schone meide	vn– herlichiv wip
ir lazet iwer swester	fvr iwer geste gan
der rat was ze liebe	vil manigem degene getan
Des wil ich gern volgen	sprach der kunic do
alle die ez erfunden	die warns harte vro
man saget ovch daz frovn Vten	vn– ir tohter wolgetan
daz si mit ir megeden	hin ze hove solde gan
Do wart vz den chisten	gesuchet gvot gewant
swaz man in der valde	der liehten wæte vant
porten vn– povge	des was in vil bereit
sich ziert minnekliche	vil manich wætlichiv meit
Vil manic reche tvmber	des tages hete mvot
daz er an ze sehene	den frowen wære gvot
daz er da fvr næme	niht eines kuniges lant
si sahen die vil gerne	die si heten nie bekant
Do hiez der kunic riche	mit siner swester gan
die ir dienen solden	wol hundert siner man
ir vn– siner mage	die trugen swert enhant
daz was daz hofgesinde	vzer Burgonden lant
<Voten> die vil richen	die sah man mit ir chomen
div hete frowen schone	gesellechlich genomen
wol hundert oder mere	die trvgen richiv kleit
nv gie mit Chriemh'	vil manic wætlichiv meit
Von einer kemenaten	sach man si alle gan
da wart vil michel schowen	von rechen gar getan
die des gedingen heten	ob kunde daz geschehn
daz si Chriemhilde	solden vrolichen sehen
Nv gie div minnekliche	also der morgenrot
tvot vz den trvben wolchen	da schiet [11v]von maniger not
der si da trvg in hercen	vn– lange het getan
er sach die minneklichen	nv vil herlichen stan
Ia luht ir von ir wæte	vil manic edel stæin
ir rosen rotiv varwe	vil minnekliche schein
swer so wnschen solde	der <enkuende> niht geiehn
daz er in dirre werlde	hæte schoners iht gesehn
Sam der liehte mane	vor den stern stat
des schin so lutterliche	ab den wolchen gat
dem stvnt si vil geliche	vor maniger frowen gvot
des wart vil wol gehoehet	den zieren heleden der mvot
Die richen kamærere	die sach vor in gan
die hochgemvten degene	dine wolden daz niht lan
sine drungen da si sahen	die minneklichen meit
Sivride dem edelen	was beidiv lieb vn– leit
Er daht in sinem mvote	wie kunde daz ergan
daz ich dich minnen solde	als ich gedingen han
sol aber ih dich vremden	so wær ich sanfter tot
er het von ir schulden	tovgen lieb vn– not
Do stunt so minnekliche	daz Sigemundes kint
sam er entworfen wære	an ein <permint>
von gvter meister listen	als man im do iach
daz man helt deheinen	so wætlichen nie gesach
Die mit Chriemhilde giengen	die hiezen von den wegen
wichen allenthalben	daz leiste manic degn
div hohe tragenden hercen	frevten manigen lip
man sach in grozen zvhten	vil manic herlichez wip
Do sprach von Burgonden	der herre Gernot
der iv sinen dienest	so minnekliche bot
Gunther	lieber bruder	dem svlt ir tvn alsam
vor allen disen degenen	des rats ich nimmer mich gescham
Ir heizet Sifriden	den Sigemundes svon
gen zv Chriemhilde	ob ir wol wellet tvon
div nie gegruozte rechen	div sol in grvzen pflegn
da mit wir zeinem vriunde	habn <den> zierlichen degn
Do giengens wirtes mage	da man den rechen vant
si sprachen zv dem kunige	vzer Niderlant
der wirt hat iv erlovbet	ir sult ze hove gan
sin swester sol ivch grvezen	daz ist zen eren iv getan
Do wart der degen gvote	der mære vil gemeit
ia truger in dem mvote	lieb ane leit
daz er sehn solde	daz wnnekliche kint
mit <minneklichen> tvgenden	si grvzte Sifriden sint
Do si den hochgemvten	vor ir stende sach
do enzvnde sich ir varwe	div schone magt sprach
sit willekomen	herre Sifrit	ein edel ritter gvot
do wart im von dem grvze	vil wol gehoehet der mvot
Er neigir vlizzekliche	bi henden si in vie
wie rehte minnekliche	der reche bi ir gie
mit lieben ovgen blichen	ein ander sahen an
der herre vn– ovch div frowe	daz wart tovgenlich getan
Wart iht da frivntliche	getwngen wiziv hant
von hercenlieber minne	daz ist mir vnbekant
doch enmac ich niht gelovben	daz ez wrde lan
si het im holden willen	harte schiere kunt getan
Bi der [12r]sumercite	vn– gein des meyen tagen
chvnder in sinem hercen	nimmer me getragen
minneklicher frevden	denner ir do gewan
do im div gie so nahen	die er ze trvte wolde han
Do gedahte manic reche	vn– wær mir sam geschehen
daz ich ir gienge in hende	sam ich in han gesehn
oder bi ze ligene	daz liez ich ane haz
ez gediente noch nie reche	nach einer kuniginne baz
Von swelher kunige landen	die geste chomen dar
die namen al gemeine	niwan ir zweier war
ir wart erlovbet kussen	den wætlichen man
im wart bi sinem lebene	nie so liebe getan
Der kunic uon Tenemarche	der sprach sa zestvnt
diss vil hohen grvzes	lit maniger ungesvnt
des ich vil wol enpfinde	von Sifrides hant
got enlaze in nimmer mere	komen in miniv fursten lant
Do hiez man allenthalben	wichen von den wegen
den minneklichen frowen	vil manigen chvenen degen
sach man gezogenlichen	ze hofe mit ir gan
sit wart von ir gescheiden	der vil wætlich man
Do gie si zv dem munster	ir volgete manic wip
do was ovch so gezieret	der Chriemhilde lip
daz da hoher wnsche	maniger wart verlorn
si was da zovgenweide	vil manigem rechen geborn
Vil chvme erbeit Sifrit	daz man da gesanc
er mohte sinen sælden	immer sagen danc
daz im div was so wæge	die er in hercen trvoch
ovch was er der schonen	holt von schulden genvoch
Do si chom fvr daz munster	sam er ê hete getan
man sahe in frivntliche	zvo Chriemhilde gan
do begvnde im danchen	div vil schoniv meit
daz er vor ir magen	so rehte herlichen streit
Nv lon iv got	her Sifrit	sprach daz schone kint
daz ir daz habt verdienet	daz iv die rechen sint
so holt von warn schulden	als ich si hore iehn
do begunder minnekliche	an vrovn Kriemehilden sehn
Ich sol in immer dienen	also sprach der degn
vn– enwil min hovbet	nimmer ê gelegen
ich engedien ir hulde	als ich des willen han
des ist ein teil	frow Chriemhilt	nach iwern hulden ergan
Inre tage zwelfen	der tage al ieselich
sach man bi dem rechen	die maget lobelich
so si ze hofe solde	vor den fursten gan
div ere wart dem degene	durch groze liebe getan
Vrevde vn– wnne	vil grozlichen schal
sach man da tægeliche	vor Guntheres sal
dar voz vn– ovch dar inne	von manigem chvnigen man
Ortwin vn– Hagene	grozer wnder da began
Swes iemen pflegen solde	des warn si bereit
mit volleklicher maze	die helde vil gemeit
des wrden von den gesten	die rechen wol bekant
da von was gezieret	allez Guntheres lant
Die ê da wnde lagen	die sach man fur gan
si wolden chuerzwilen	mit des chuniges man
schirmen [12v]mit den schilden	vn– schiezen manigen schaft
des hulfen in genvoge	si heten grozliche kraft
In der hochgecite	der wirt der hiez ir pflegn
mit der besten spise	er hete sich bewegn
aller hande schande	die ie kunic gewan
man sach in minnekliche	zvo den sinen gesten gan
Er sprach	ir gvten degene	e daz ir scheidet hin
so nemt die mine gabe	also stet min sin
daz ich es immer diene	versmæht niht min gvot
daz wil ich mit iv teilen	des han ich willigen mvot
Die von Tenemarche	sprachen sa zehant
e daz wir wider riten	heim in unser lant
wir gern stæter svone	vn– gebn michel gvot
vn– sezzen iv des sicherheit	swie ivch des selben dunchet gvot
Livdegast geheilet	siner wnden was
der vogt von den Sahsen	nach strite wol genas
ettesliche toten	<si> liezen dar enlant
do gie der kunich Gvnther	da er Sivriden vant
Er sprach zv dem degene	nv rate wie ich tvo
die unser widerwinnen	wellent riten frvo
vn– gernt stæter svone	an mich un– mine man
nv rata	degen chvene	waz dich des gvt dvnche getan
Waz mir die helde bieten	daz wil ich dir sagen
swaz funfhundert moere	goldes mugen tragen
daz <gæben> si mir gerne	wold ich si ledich lan
do sprach der herre Sivrit	daz wære vil vbele getan
Ir svlt si ledeklichen	hinnen lazen varn
vn– daz die rechen beide	mere wol bewarn
daz si immer mer geriten	mit here in iwer lant
des lat iv sicherheite	tvn der beider herren hant
Des rates wil ich volgen	da mite si giengen dan
den sinen widerwinnen	wart daz kunt getan
ir goldes gerte niemen	daz si da bvten ê
da heime ir lieben frivnden	was nach den hermvden we
Vil manige schilde volle	man dar schazzes trvoch
er teiltes ane wage	den frivnden sin genvoch
bi fvnfhundert marchen	vn– eteslichen baz
Gernot der vil chune	der riet Gvnthere daz
Urlovp si alle namen	also si wolden dan
do sach man die rechen	fvr Chriemhilde gan
vn– ovch da frov <Vote>	div kuniginne saz
ez enwart noch nie degenen	mere gevrlovbet baz
Herberge wrden lære	do si von dannen riten
noch bestvnt da heime	mit ritterlichen siten
der kunich mit sinen magen	vil manic edel man
die sach man nv tægeliche	fvr frown Chriemh' gan
Vrlovp ovch nemen wolde	Sivrit der helet gvot
ern trvote niht verenden	des er da hete mvot
der kunic daz sagen horte	daz er wolde dan
Giselher der iunge	den degn vlegen do began
War woldet ir nv riten	vil edel Sivrit
belibet bi den degenen	tvot des ich ivch bite
bi Gvnthere dem kunige	vn– ovch bi sinen man
hie ist vil schoener frowen	die sol man gerne ivch sehen lan
Do sprach der starche Sivrit	div ross div lazet <stan>
ich wolde hinnen riten	des wil [13r]ich abe gan
vn– traget ovch hin die schilde	ia <wolde> ich in min lant
des hat mich her Giselher	mit grozen triwen erwant
Svs beleip der kune reche	dvrch friwende liebe da
ia wær er in den landen	ninder anderswa
gewesen also sanfte	da von nv daz geschach
daz er nv	swenner wolde	die schonen Chriemhilde sach
Durch ir vnmazen schoene	der herre do beleip
mit maniger kurcewile	man im die zit vertreip
wan daz in twanch ir minne	div gab im dicke not
dar vmbe sit der chvene	lach vil iæmerliche tot
Iteniwc mære	sich hvben vmben Rin
ez sprachen zv dem kunige	die hosten mage sin
warvmbe er niht ennæme	ein wip zv siner ê
do sprach der chunic riche	ine wil niht langer biten me
Des wil ich beraten	wa ich die mvge nemen
div mir vn– mime riche	ze frowen mvge zemen
an edel vn– ovch an schone	der gib ich miniv lant
als ich die reht ervinde	si sol iv werden wol bekant

Ez> was ein kuniginne	gesezzen vber se
ir geliche enheine	man wesse ninder me
div was vnmazen schoene	vil michel was ir chraft
si schoz mit snellen degenen	vmbe minne den schaft
Den stein den warf si verre	darnach si wite spranch
swer an si wenden wolde	sinen gedanch
driv spil mvserr an behaben	der frowen wol geborn
gebrast im an dem einen	er het daz hovbet sin verlorn
Des het div kuniginne	vnmazen vil getan
do gevriesch ez bi dem Rine	ein ritter wolgetan
der wande sine sinne	an daz herliche wip
darvmbe mvsin helede	sit verliesen den lip
Do si eines tages sazen	der kunic un– sine man
manigen ende si ez mazen	beidiv wider vn– dan
welhe ir herre mohte	zeinem wibe nemen
div in ze frowen tohte	vn– ovch dem lande mohte zemen
Do sprach der vogt von Rine	ich wil nider an den se
hin ze Prvenhilde	swie ez mir erge
dvrch ir vnmazen schoene	so wage ich minen lip
den wil ich verliesen	sine werde min wip
Daz wil ich widerraten	sprach do Sivrit
ia hat div kuniginne	so vreisliche site
swer vmb ir minne wirbet	daz ez im hohe stat
des mvget ir der reise	haben wærlichen rat
Do sprach der kunich Gvnther	nie geborn wart ein wip
so starch un– ovch so chvne	ine wolde wol ir lip
in strite betwingen	mit min selbes hant
swiget	sprach do <Sifrit>	iv ist ir ellen vnbekant
Vn– wærn iwer viere	dine kunden niht genesn
von ir vil <grimmen> zorne	ir lat den willen wesn
daz rat ieh iv mit triwen	welt ir niht ligen tot
sone lat ivch nach ir minne	niht ze sere wesn not
So wil ich iv [13v]wol raten	sprach do Hagene
ir bitet Sifride	mit iv ze tragene
die vil starchen sorge	daz ist nv min rat
side im daz ist so kundich	wiez vmbe Privnhilde stat
Er sprach	wiltv mir helfen	degen Sifrit
die minnekliche erwerben	tvostv des ich dih bite
vn– wirt mir zeinem trvote	daz herliche wip
ich wil durch dinen willen	wagen ere vn– lip
Des antwrte Sifrit	swie mir min dinch da chvom
gistv mir din swester	so bin ich dir frvom
die schonen Chriemhilde	ein kuniginne her
ine ger deheiner miete	nach minen arebeiten mer
Daz lobe ich	sprach do Gvnther	Sivrit	an dine hant
vn– kvomt div schone Prvnhilt	her in dizze lant
so wil ich dir ze wibe	die mine swester gebn
so mahtv mit der schonen	immer vroliche lebn
Des sworen si do eide	die rechen vil her
des wart ir arebeiten	verre deste mer
ê si die <wolgetanen>	brehten an den Rin
des mvsen die vil chvnen	starche sorgende sin
Von wilden getwergen	han ich gehoeret sagen
si sin in holn bergen	vn– daz si ze scherme tragen
einez	heizet tarnkappen	von wnderlicher art
swerz hat an sime libe	der sol vil gar wol sin bewart
vor slegen vn– vor stichen	in mvge ovch niemen sehen
swenner si darinne	beide horn vn– spehen
mag er nach sinem willen	daz in doch niemen siht
er si ovch verre stercher	als uns div auenture giht
Mit im fvrt Sifrit	die tarnkappen an
die der helt vil kune	nnit sorgen gewan
ab einem getwerge	daz hiez Albrich
sich bereiten zv der verte	die degn chune vn– rich
Also der starche Sifrit	die tarnkappen trvch
so het er dar inne	chrefte genvoch
zwelf ander manne sterche	als uns ist geseit
er gewan mit grozen listen	die vil <herlichen> meit
Ovch was div selbe tarnhvot	also getan
daz dar inne worhte	ein ieslicher man
swaz er selbe wolde	daz in doch niemen sach
so gewan er Prvonhilde	da von im leide sit geschach
Dv solt mir sagen	Sifrit	e unser vart erge
daz wir mit vollen eren	chomen an den se
svln wir iht ritter fvren	in Prvnh' lant
<zwei> tusint degene	die werdent schiere besant
Swie vil wir volches fvrten	sprach do Sifrit
ez pfliget div kuniginne	so eyslicher site
die mvsen alle ersterben	von ir vbervot
ich wil ivch baz bewisen	degen chvne vnde gvot
Wir svln in rechen wise	varn zetal den Rin
die wil ich iv nennen	die daz svln sin
zvo vns zwein noch zwene	vn– niemen me
so erwerben wir die frowen	swiez vns dar nach erge
Der gesellen sit ir einer	der ander sol ich wesn
Hagene si der dritte	wir mvgen wol genesn
Danehwart si der vierde	der vil chvene man
vns endurfen ander tvsint	mit strite nimmer bestan
Div mære ich [14r]wiste gerne	sprach der kunic do
e daz wir hinne schieden	des wære ich harte vro
waz wir kleider solden	vor <Prvnhilde> tragen
div uns da wol gezæmen	daz svlt ir mir bi zite sagen
Wat die aller besten	die ieman bevant
die treit man zallen citen	in Prvnh' lant
des suln wir richiv chleider	vor der frowen tragen
daz wirs iht habn scande	so man div mære hore sagen
Do sprach der degn gvter	so wil ich selbe gan
zv miner lieben mvter	ob ich erwerben chan
daz uns ir schone mægede	helfen <prvven> chleit
die wir tragen mit eren	fvr die herlichen meit
Do sprach von Tronege Hagene	mit herlichen siten
wes welt ir iwer mvter	solher dienste biten
lat <iwer> swester horen	wes wir habn mvot
si ist so chvnst riche	daz div chleider werdent gvt
Do enbot er siner swester	daz er si wolde sehn
vn– ovch der herre Sifrit	ê daz daz was geschehn
do hete sich div schone	ze wnsche wol gechleit
daz si sie sehn wolden	des was si vro vn– ovch gemeit
Do was ovch ir gesinde	gezieret als ir gezam
die fvrsten chomen beide	do si daz vernam
do stvnt si von dem sidele	mit zvhten si do gie
do si den gast vil edelen	vn– ovch ir bruder enpfie
Wilechomen si min bruder	vn– der geselle sin
div mære wist ich gerne	so sprach daz magedin
was ir werben woldet	sit ir ze hofe gat
daz lat mich beide horen	wiez iv hochgemvten stat
Do sprach der chunic riche	frowe	ich wilz iv sagn
wir mvzin michel sorgen	bi hohem mvte tragn
wir wellen hobeschen riten	verre in vremdiv lant
wir solden zv der reise	haben zierlich gewant
Nv sizzet	lieber brvoder	sprach daz kuniges kint
lat mich div mære hoeren	wer die frowen sint
der ir da gere mir minnen	in ander fuorsten lant
die vz erwelten beide	nam div frowe bi der hant
Do gie si mit den degenen	da si selbe saz
matraz div richen	ir svlt gelovben daz
lagen allenthalben	an dem vlezze nider
si heten bi den frowen	gvot kurzwile sider
Vil lieplicher bliche	vn– minneklichez sehn
des mohte da in beiden	harte vil <gescehen>
er trvch si imme hercen	si was im so der lip
er erwarp mit starchem dienste	daz si doch sider wart sin wip
Do sprach der kunic Gunther	vil edel swester min
ane dine helfe	sone kundez niht gesin
wir wellen zvercewilen	in Prvnhilde lant
da bedorften wir ze tragene	vor frowen herlich gewant
Do sprach div kuniginne	vil lieber brvder min
swaz der minen helfe	daran kan gesin
des bringe ich ivch wol innen	daz ich iv bin bereit
versagt iv ander iemen	daz wære Chriemh' leit
Irn svlt mich	ritter edele	niht sorgende biten
ia svlt ir mir gebieten	mit herlichen siten
swaz so iv gevalle	des bin ich bereit
vn– tvon ez willekliche	sprach div herliche meit
Wir wellen	liebiv swester	tragen gvt gewant
daz sol helfen prveuen	iwer wiziv hant
des volziehen iwer mægede	daz [14v]ez vns rehte stat
<wande> ich dirre verte	han deheiner slahte rat
Do sprach div iuncfrowe	ine wil iv niht versagn
ich han selbe siden	nu heizet uns her tragen
gestein vf den schilden	so machen wir div kleit
daz ir si traget mit eren	fvr die <herlichen> meit
Wer sint die gesellen	sprach div kunigin
die mit iv gekleidet	ze hofe svln sin
daz bin ich vn– Sifrit	vni zwene miner man
Danchwart vn– Hagene	die svln mit vns ze hofe gan
Nv merchet	liebiv swester	rehte waz wir sagen
daz wir vier gesellen	ze vier tagen tragen
ie drier hande kleider	vn– also gvot gewant
daz wir ane scande	rvemen Prunh' lant
Daz lobte si den rechen	die herren schieden dan
do hiez ir ivncfrowen	drizzech meide gan
vz ir kemenaten	Chriemh' div chunigin
die vil werch spæhen	ze chvnste heten grozen sin
Aller hande siden	vn– wiz so der sne
von Zazamanc dem lande	grvn also der kle
dar in si leiten steine	des wrden gvtiv kleit
selbe sneit si Chriemhilt	div vil minnekliche meit
Von vremder vische hvten	bezoch wolgetan
ze sehn werden lvten	swaz man der gewan
die dache man mit siden	golt dar in getragen
man mohte michel wnder	von der liehten wæte sagen
Von Marroch vz dem lande	vn– ovch von Libyan
die aller besten siden	die ie mer gewan
deheines kuniges chunne	der heten si genvoch
div frowe lie wol schinen	daz si in holden willen trvoch
Wande sis zer hovereise	heten so gegert
die hêrminen vedere	dvhten si vnwert
pfelle dar obe lagen	swarz alsam der chol
daz noch snellen degenen	stvnde in hochgeciten wol
Vz arabischem golde	vil gesteines schein
der frowen vnmvze	div enwas niht klein
inre sehs wochen	bereiten si div kleit
do was ovch ir gewæfen	den gvten degenen bereit
Do si bereitet waren	do was in vf den Rin
bereitet vlizekliche	ein starchez schiffelin
daz si tragen solde	vol nider vf <den> se
den schoenen <iuncfrowen>	tet ir arebeiten we
Do sagt man den rechen	in wærn nv bereit
div si da fveren solden	ir zierlichen kleit
also die helde gerten	daz was nv getan
done wolden si niht langer	bi dem Rine bestan
Nach den hergesellen	wart balde do gesant
ob si schowen wolden	niwez ir gewant
ob iz den helden wære	ze rehte kvrz vn– lanch
des sageten si den frowen	von schulden grozlichen danch
Fvr alle die si chomen	die mvsen in des iehen
daz si ze der werlde hæten	schoners niht gesehn
des mohten si sie gerne	da ze hove tragen
von bezzer helde wæte	chunde iv nieman niht gesagn
Vlizekliche danchen	wart da niht verdeit
vrlovbes von in gerten	die rechen vil gemeit
in ritterlichen zvhten	die herren taten daz	[15r]
des wrden liehtiv ovgen	weinens trvebe vn– naz
Si sprach	vil lieber brvder	ir mohtet noch bestan
vn– wrbet ander frowen	daz hiez ich wol getan
da iv so sere enwage	stvnde niht der lip
ir mvgt hie naher vinden	ein also hochgeborn wip
Ich wen in saget ir herce	daz inn da von geschach
si weinten al gemeine	swaz ieman drvmbe sprach
ir golt in vor den brusten	wart von træhenen sal
die vielen in genote	von den ovgen hin zetal
Si sprach	herre Sivrit	lat iv bevolhen sin
vf triwe vn– vf genade	den lieben brvder min
daz im iht gewerre	in Prvnhilde lant
daz lobt ir der herre	mit gvtem willen in die hant
Do sprach der degen chvene	ob mir min lip bestat
so svlt ir aller sorgen	frowe	haben rat
ich bringen <iv> gesunden	her wider an den Rin
daz habt vf mime libe	im <neich> daz schone magedin
Ir golt roten schilde	die trvg man vf den sant
vn– braht in zv dem schiffe	allez ir gewant
ir ross hiez man in ziehen	si wolden varn dan
do wart von schonen frowen	vil michel weinen getan
Do stvnden in den venstern	div minneklichen kint
ir sciff mit dem segele	daz rvort ein hoher wint
die stolzen hergesellen	vlvzzen zetal den Rin
do sprach der kunich Gunther	wer sol nv schiffmeister sin
Do sprach der starche Sivrit	ich kan ivch vf der flvot
hinnen wol gefveren	daz wizzet	helede gvot
die rehte wazzerstrazen	die sint mir wol bekant
mit frevden si do schiedenn	vz der Buregonden lant
Der kunich von Niderlanden	eine schalten genam
von stade begunde schieben	der helt vil lobesam
Gunther der chuene	selbe ein rvoder trvoc
si hvben sich von lande	vn– warn vrolich genvoch
Si fvrten riche spise	dar zv den besten win
den man inder chunde	vinden vmben Rin
Danchwart	Hagenen brvoder	der saz vn– zoch
an eime starchen rvoder	er trvch den mvot vnmazen hoch
Ir vil starchen segelseil	wrden in gestraht
si fvren manige mile	ê daz ez wrde naht
mit frevden si do chomen	vol nider an den se
ir starchez arebeiten	tet sit den hochgemvten we
Inre tage zwelven	so wir hoern sagen
heten si die winde	verre dan getragen
gein Isensteine	in Prvnh' lant
daz het von Tronege Hagene	ê vil selten bekant

Do> der chunic Gvnther	so vil der burge sach
vn– ovch die witen marche	wie balder do sprach
sagt mir	frivnt Sivrit	ist iv daz bechant
wes sint dise burge	vn– ovch daz herliche lant
Ine han bi minen ziten	ine wolde lvge iehn
so wol erbowen burge	mere nie gesehen
in deheinem ein lande	als ir hie vor uns stat
er mach wol wesen riche	der si hie gebowen hat
Des antwrt Sifrit	ez ist mir wol bekant	[15v]
ez ist frown Prvnhilt	livt vn– lant
vn– Isenstein div veste	als <ir> mich hortet iehen
da mvget ir noch hivte	schoner frowen vil gesehn
Vn– wil iv helden raten	ir habt einen mvot
daz wir iehn geliche	ia dvnchet ez mich gvot
swenne wir noh hivte	fvr Prvnhilde gan
so mvzen wir mit sorgen	for der kuniginnestan
So wir die minneklichen	bi ir gesinde sehn
so svlt ir	helede gvote	wan einer rede iehen
Gunther si min herre	ich si sin eigen man
so mag unser wille	harte wol an ir ergan
Des waren si bereite	swaz er si loben hiez
durch ir vbermvete	deheiner ez niht liez
si iahen swes er wolde	da von in wol geschach
do der kunic Gvnther	die schonen Prvnhilde sach
Ich enlob ez niht so verre	durch den willen din
so durch Chriemh'	daz schone magedin
div ist mir sam min sele	vn– so min eigen lip
ich wil daz gerne dienen	daz si werde min wip
In den selben citen	do was ir schiff gegan
der burge also nahenn	do sach der kunic stan
oben in den venstern	vil manige schone meit
do begunde vragen	der reche kvene vn– gemeit
Saget mir	frivnt Sifrit	durch den willen min
bekennet ir die frowen	vn– ovch div magedin
di dort her nider schowent	zvo zvns vf die flvot
si gebarent dem geliche	daz si hohe sint gemvot
Do sprach der chune Sifrit	ir svlt von hinnen spehn
tovgen in dem mvote	vn– svlt mir danne iehn
welhe ir nemen woldet	hetet irs gewalt
daz tvn ich	sprach do Gunther	der ritter chven vn– balt
So sihe ih vnder in eine	in ienem venster stan
in snewizer wæte	div ist so wolgetan
die wellent miniv ovgen	vil schoen ist <ir> der lip
ob ich gewalt des hæte	si mvse werden min wip
Dir hat erwelt vil rehte	diner ovgen schin
ez ist div starche Prvnhilt	daz schone magedin
die din herce minnet	der lip vn– ovch der mvot
elliv ir geberde	div dvhte Guntheren gvot
Do hiez div kuniginne	vz den venstern stan
ir minneklichen meide	sine solden niht da stan
den vremden an ze sehene	des waren si bereit
waz do die frowen tæten	daz ist vns sider ovch geseit
Gegen den vnchunden	strichen si ir lip
des ie site habeten	div wætlichen wip
an div engen venster	chomen si gegan
da si die rechen sahen	daz wart durch schowen getan
Ir waren niwan viere	di da chomen in daz lant
Sifrit der starche	ein ross zoch an der hant
daz sahen durch div venster	div minneklichen wip
des wart sit getivret	des kunic Guntheres lip
Er habt im da bi zovme	daz zierliche march
gvot vn– schone	vil michel vn– starch
vnze der kunic Gvnther	in den satel gesaz
also dient im Sifrit	des er doch sit vil gar vergaz
Do zoh er ovch daz sine	von dem schiffe dan
er hete solhen dienest	selten ê getan
daz er den stegereif	gehabt ie helede mer
daz sahen durch div venster	[16r]die frowen schoen vn– her
Reht in einer maze	den rittern vil gemeit
von sneblancher varwe	ir ross vn– ovch ir kleit
ez waren vil geliche	ir schilde wolgetan
die luhten von den handen	den vil wætlichen man
Ir sætele wol gesteinet	ir fvrbuoge smal
si riten herlichen	fvr <Prunhilde> sal
dar an so hiengen schellen	von liehtem golde rot
si chomen zv dem lande	als ez ir ellen in gebot
Mit spern niwo sliffen	mit swerten wol getan
div uf die sporn giengen	den wætlichen man
div fvrten die vil chvenen	scharpf vn– dar zv breit
daz sach allez Prvnh'	div vil minnekliche meit
Mit im chom ovch Danchwart	vn– Hagene
nv hoeret disiv mære	wie die degene
von rabenswarzer varwe	truogen richiv kleit
ir schilde waren schone	vil gvot	michel vn– breit
Von India dem lande	man sach si steine tragen
die chos man an ir wete	vil herliche wagen
sie liezen ane hvote	ir schiffel bi der flvot
svs riten zv der burge	die helde chuon vn– gvot
Sehs un– ahzech tuorne	si sahen drinne stan
dri palas wite	vn– einen sal wolgetan
von edelm marmelsteine	grven alsam ein gras
dar inne div kuniginne	mit ir ingesinde was
Div porte stvnt entslozzen	div bvrch vf getan
do liefen in engegene	die Prvnh' man
vn– enpfiengen wol die chvenen	in ir frowen lant
ir ross man hiez behalten	vn– ir schilde von der hant
Do sprach ein kamerære	ir svlt uns geben div swert
vn– ovch die liehten brvenne	des sit ir vngewert
sprach Hagene der chuone	wir selbe wellens tragen
do begunde in Sifrit	da von div rehten mære sagn
Man pfligt in dirre burge	daz wil ich iv sagen
daz decheine geste	hie waffen svln tragen
ir svlt si lan behalten	daz ist wolgetan
daz tet do vil ungerne	Hagen	der Gvntheres man
Den gesten hiez man schenchen	vn– schaffen ir gemach
vil manigen snellen rechen	man da ze hove sach
in fvrstenlicher wæte	allenthalben gan
da wart michel schowen	an die vil chvenen getan
Do tet man Prvnhilde	chvnt mit mæren
daz da vremde rechen	chomen wæren
in vil richer wæte	gevlozzen vof der flvot
da von begunde vragen	div magt schoen vn– gvot
Ir svlt mich lazen hoeren	sprach div kunigin
wer die vil vnchvnden	rechen mvgin sin
die in miner bverge	so herliche stan
vn– durch welhe schulde	die helde her gevarn han
Do sprach ein ir gesinde	frowe	ich mach wol iehn
daz ich ir deheinen	nimere habe gesehn
wan geliche Sifride	einer drvnder stat
den svlt ir wol enpfahen	daz ist mit triwen min rat
Der ander der gesellen	der ist so lobelich
ob er gewalt des hete	wol wær er kunic rich
ob witen fursten landen	ob er div mohte han
man siht in bi den andern	so rehte herliche stan
Der dritte der gesellen	[16v]der ist vil <gremlich>
vn– doch mit schome libe	kuniginne rich
von <swinden> sinen blichen	der er so vil getvot
er ist in sinen sinnen	ich wæn	vil grimme gemvot
Der der iungest ist darvnder	der ist so lobelich
in magtlichen zvhten	sihe ich den degen rich
mit gvtem gelæze	so minnekliche stan
wir mohtenz fvrhten alle	het im hie iemen iht getan
Swie blide er pflege der zvhte	vn– swie schoen im si der lip
er moehte wol erweinen	vil wætlichiv wip
swenner begunde zvernen	sin lip ist so gestalt
er ist in allen tvgenden	ein degn chvene vn– balt
Do sprach div kuniginne	nv brinch mir min gewant
vn– ist der starche Sivrit	chomen in daz lant
durch willen miner minne	ez gat im an den lip
ine fvrht in niht so sere	daz ich werde sin wip
Do wart chuniginne	schiere wol gekleit
do gie mit ir dannen	vil manic schoniv meit
wol hundert vn– mere	gezieret was ir lip
ez wolden sehen die geste	div vilminneklichen wip
Da mit giengen rechen	vzer Islant
die Prvnhilde degene	die trvgen swert enhant
fvnf hundert oder mere	daz was den gesten leit
do stunden von dem sedele	die helde chven vn– gemeit
Do div kuniginne	Sifriden sach
div magt zvhtekliche	zv dem rechen sprach
sit willechomen	Sivrit	her in dizze lant
waz iwer reise meine	gern het ich daz erkant
Vil michel iwer genade	min vrov Prunhilt
daz ir mich rvchet grvzen	fversten tohter milt
vor diesem chvnem rechen	der hie vor mir stat
wander ist min herre	der eren het ich gerne rat
Er ist geborn von Rine	daz tvot er dir bechant
er hat durch dinen willen	gesvchet dizze lant
der wil dich gerne minnen	swaz im da von geschiht
nv bedenche dihs bezite	min herre erlêt dihs niht
Er ist geheizen Gunther	vn– ist ein kunic her
erwrber dine minne	sone engert er nihtes mer
ia gebot mir her ze varne	der reche wolgetan
wan daz ich entorste	ich hietez gerne verlan
Si sprach	ist er din herre	vi bistv sin man
div spil div ich im teile	vn– tarrer div bestan
behabt er des die maisterschaft	so minne ich sinen lip
anders mvz er sterben	ê ich werde sin wip
Do sprach von Tronege Hagene	frow	nv lat vns sehen
iwer spil div starchen	e daz iv mvse iehn
Gunther min herre	da mvsez herte sin
er mach noch wol gewinnen	ein also schone magedin
Den stein den sol er werfen	vn– springen dar nach
den ger mit mir schiezen	lat iv niht sin ze gach
des bedenchet ivch vil ebene	sprach daz vil schone wip
gebristet im an dem einen	ez get iv allen an den lip
Sifrit der starche	zv dem kunige trat
allen sinen willen	er in reden bat
mit der kuniginne	[17r]ez kunde im geschaden niht
ez wirt al anders gendet	des sich ir vbermvot versiht
< o> sprach der kunich Gunther	kuniginnne her
nv teilt swaz ir gebietet	vn– wære is dannoch mer
daz bestvnde ich alliz gerne	durch iwern schonen lip
min hovbet wil ich wagen	irn werdet min wip
Do div kuniginne	sine rede vernam
der spile bat si gahen	als ir do daz gezam
si hiez ir dar gewinnen	balde ir stritgewant
eine veste brvnne	vn– einen gvten schildes rant
Einn wafenhemde sidin	daz leit an sich div meit
daz in deheime strite	wafen nIe versneit
von pfelle vzer Libia	ez was vil wolgetan
von porten lieht gewerhte	daz sach man schinen daran
Die zit wart disen rechen	harte vil gedrevot
Danchwart vn– Hagene	die waren vngefrevot
wiez dem kunige ergienge	des sorget in der mvot
si dahten	unser reise	ist vns rechen niht zegvot
Die wile was ovch Sivrit	der listige man
e iz iemen erfunde	in daz schiff gegan
da er die tarnkappen	verborgen ligen vant
dar in slavf er vil schiere	do was er niemen bechant
Er ilte hin widere	do vant er rechen vil
da div kuniginne	teilte ir hohen spil
dar gie er tovgenliche	von listen daz geschach
alle die da waren	daz in da niemen gesach
Der rinch der was bezeiget	da soldez spil geschehn
vor manigem chvenem rechen	die daz solden sehn
mer danne sibenhundert	die sah man waffen tragen
swer daz spil gewnne	daz ez die helde solden sagen
Do was nv komen Prvnhilt	gewaffent man die vant
sam ob si striten solde	vmbe elliv kuniges lant
ia trvoch si ob den siden	vil manigen stahel zein
ir minneklichiv varwe	dar vnder herlichen schein
Do chom ovch ir gesinde	die trugen dar zehant
von vil rotem golde	einen liehten schildes rant
mit stahel herten spangen	vil michel vn– breit
dar vnder spilen wolde	div vil herliche meit
Der frowen schiltvezzel	ein edel porte was
dar vffe lagen steine	gruoner denne ein gras
die luhten maniger hande	mit schine wider daz golt
der si solde minnen	der het iz hohe <verscolt>
Der schilt was under bvkelen	als uns daz ist geseit
wol drier hende dicke	den tragen solde div meit
von stale vn– ovch von golde	rich er was genvoch
den ir kamerære	selbe vierder kvnne trvoch
Also der karche Hagene	den schilt dar tragen sach
in vil grozem unmvote	der helt von Tronege sprach
wie nv	kunic Gunther	wie vliesen wir den lip
der ir da gert ze minnen	div ist des valandes wip
Vernemt noch von ir wæte	der hete si genuoch
von Azagovch der siden	einen waffenroch si trvoch
vil edel un– vil riche	ab des varwe schein
von der kuniginne	vil manic herlicher stein
Do trvoch man dar der frowen	swære un– dar zvo groz
einen ger vil [17v]starchen	den si alle <zite> schoz
scarpf un– ungefvge	michel vn– breit
der ze sinen ecken	harte vreislichen sneit
Von des geres swære	hoeret wnder sagen
wol vierdehalbiv mæsse	was der zv geslagen
in trvgen chvme drie	Prvnhilde man
Gvnther der vil chuone	harte sorgen began
Er daht in sinem mvote	waz sol dizze wesen
der tivfel von der helle	wie kunder da vor genesen
vn– wær ich da ze Rine	mit dem libe min
si mveste hie vil lange	vri fon miner minne sin
Im was in sinen sorgen	daz wizzet	leit genvoch
allez sin gewæfen	man im einen trvoch
da wart der chunic riche	wol gewaffent in
vor leide het Hagene	vil nach verwandelt den sin
Do sprach von Burgonden	der chvene Danchwart
mich mvz immer riwen	disiv hovevart
nv hiezen wir ie rechen	wie verliesen wir den lip
sulen vns in disen landen	nv verderben div wip
Mich mvet daz harte sere	daz ich chom in daz lant
vn– hete min brvoder Hagene	sin waffen an der hant
vn– ovch ich daz mine	so nnohten sanfte gan
durch ir vbermvote	alle Prvnhilde man
Ich sage iv bi den triwen	si soldenz wol bewarn
vn– het ich tusint eide	zeinem fride geswarn
e daz ich sterben sæhe	den lieben herren min
ia mvesen lip verliesen	daz vil schoene magedin
Wir solden vngevangen	wol rvmen dizze lant
ich un– min brvoder Danchwart	heten wir daz gewant
des wir ze not bedurfen	vn– unser swert vil gvot
so wrde wol gesenftet	der frowen starchiv vbermvot
Wol hort div kuniginne	waz der degen sprach
mit smielendem mvnde	si vber ahsel sach
nv er dunche sich so biderbe	so tragt in ir gewant
vn– ir vil scharpfen waffen	gebt den rechen an die hant
Mir ist als mære	daz si gewaffent sint
als ob si bloze stuonden	so sprach div kunigin
ihen furhte niemens sterche	den ich noh habe bechant
ieh getrowe wol gedingen	in strite vor sin eines hant
Do si div swert gewnnen	also div magt gebot
der vil chuone <Dancwart>	wart von frevden rot
nv spilen swes si wellen	sprach der snelle man
Gunther ist vnbetwngen	sit daz wir unser wafen han
Div Prunhilde sterche	vil groezlichen schein
man braht ir zvo dem ringe	einen swæren mermilstein
groz un– vngefvge	michel vn– wel
in trvgen chvme zwelfe	helde chven vn– snel
Den warf si zallen citen	so si den ger verschoz
der Burgonden sorge	wrden harte groz
wafen	sprach do Hagene	waz hat der kunic zetrvot
ia soldes in der helle	sin des vbeln tivfels brvot
An vil wizen armen	si die ermil want
si begvnde sere vazzen	den schilt an der hant
den ger si hohe zvochte	do giengez an den strit
Gunther vn– Sivrit	die vorhten Prvnhilde nit
Wær im der starche Sifrit	niht schiere ze helfe chomen
so hete si dem kunige	sinen lip be[18r]nomen
er gie dar tovgenliche	vn– rvort im sine hant
Gvnther sine liste	vil harte sorekliche ervant
Waz hat mich gerveret	gedaht der chvne man
do sah er allenthalben	er vant da niemen stan
er sprach	ich bin ez Sivrit	der liebe <frivnt> din
vor der kuniginne	soltv gar ane angest sin
Den schilt gib mir von hende	den la dv mich tragen
vn– merche mine lere	die dv mich hoerest sagn
nv habe dv die geberde	div werch wil ich began
do er vernam div mêre	der kunic trosten sich began
Nv hil dv mine liste	daz ist uns beiden gvot
sone mach div kuniginne	ir <starchen> vbermvot
an dir niht verenden	des si doch willen hat
nv sich wie angestliche	si gein dir amme ringe stat
Do <schoz> vil chreftichliche	div vil starche meit
den ger gein eime schilde	michel vn– breit
den trvg an siner hende	daz <Sigelinde> kint
daz fiwr spranch von stale	alsam ez wæte der wimt
Des starchen geres snide	so dvrch den schilt gebrach
daz man daz fivr lovgen	vz den ringen sach
des schvzzes beide strvochten	die vil starchen man
si ertwelten si so sere	daz si den lip nach heten lan
Sivride dem vil chvnen	vom mvnde brast daz blvot
vil balde spranch er widere	do nam der helet gvot
den ger	den si geschozzen	im hete durch den rant
den frvmt ir do hin widere	sin vil ellenthaftiv hant
Er daht	ich wil niht schiezen	daz schone magedin
er kert des geres snide	hindern rvcke sin
mit der gerstangen	schoz si der chvne man
also chreftikliche	daz si strvochen began
Daz fivr stavb vz stale	sam iz tribe der wint
den schvoz schoz mit ellen	daz Sigelinde kint
sine mohte mit ir chreften	des schvzzes niht gestan
ez enhet der chunic Gunther	entriwen nimmer getan
Prvnhilt div schoene	wie balde si vf spranch
Gvnther	ritter edele	des schuzzes habe danch
si wande daz erz hete	mit siner hant getan
ir was dar nach geslichen	ein verre kreftiger man
Do gie si hin vil balde	zornich was ir mvot
den stein den hvop si hohe	div schone maget gvot
si swanch in kreftekliche	so verre von ir dan
daz sin die chvne degene	sere wndern began
Der stein der was gevallen	wol zwelf klafter dan
den wrf prach do mit sprunge	div maget wol getan
dar gie der herre Sifrit	da der stein gelach
Gunther in do wegete	der helt in werfene pflach
Sifrit was vil chune	dar zvo starch vn– lanch
den stein den warf er verrer	dar zvo er witer spranch
daz was ein michel wnder	vn– kunsteklich gench
daz er mit dem sprunge	den kunic Gunther doch trvch
Der sprvnch der was ergangen	der stein der was gelegen
do sah man ander niemen	wan Gunther den degn
Prvnhilt div schone	wart in zorne rot	[18v]
Sifrit het geverret	des kunich Guntheres tot
Zvo zir ingesinde	div kuniginne sprach
do si zent des ringes	den helt gesunden sach
vil balde get her naher	ir mage vn– mine man
ir svlt dem kunech Gunther	alle wesen vndertan
Do leiten die vil chvenen	div wafen von der hant
si bvten sich ze fvozen	vz Burgonden lant
Gunthere dem richen	vil manic chvner man
si wanden daz er hete	div spil mit siner chraft getan
Er grvoztes minnekliche	wander was tvgentrich
do nam in bi der hende	div magt lobelich
si erlovbt im daz er solde	haben da gewalt
des frevte sich do Hagene	der reche chven vn– balt
Si bat den ritter edele	mit ir dannen gan
in einen palas witen	da was vil manic man
durch vorhte manz dem degene	deste baz erbot
von Sifrides ellen	si waren chomen vozer not
Sifrit der snelle	wiser was genvoch
die sinen tarnkappen	er aber behalten trvoch
do gie er hin widere	da vil der frowen saz
er sprach zv dem chvnige	vn– tet vil chundekliche daz
Wes bitet ir	min herre	wan beginnet ir der spil
der iv div kuniginne	teilet also vil
vn– lazet vns daz schowen	wie div sin getan
sam ob er ir niht ensæhe	gebart der listige man
Do sprach div kvniginne	wie ist daz geschehn
<daz> ir habt	her Sifrit	der spil niht gesehn
div hie hat errungen	div Guntheres hant
des antwort ir Hagene	vozer Burgonden lant
Da het ir also sere	getrvebet vns den mvot
do was bi dem schiffe	Sifrit der helet gvot
do der vogt von Rine	daz spil an iv gewan
des ist ez im vnkundich	sprach do der Guntheres man
So wol mich dirre mære	sprach Sivrit der degn
daz iwer hochverten	ist alsus gelegn
daz iemen lebt so chvene	der iwer meister mvge gesin
nv svlt ir	maget edele	vns volgen hinnen an den Rin
Do sprach div chuniginne	des enchan noch niht ergan
ez mvzen ê bevinden	mage vn– mine man
iane mag ich also lihte	gervmen miniv lant
di mine hohsten frivnde	mvzen werden ê besant
Do hiez si boten riten	allenthalben dan
si besande alle ir friwnde	mage vn– man
die bat si chomen balde	ze hove in Islant
vn– hiez in gebn allen	rich vn– herlich gewant
Si riten tægeliche	spate vn– frvo
der Prvnh'burge	scharhafte zvo
iara ia sprach Hagene	waz haben wir getan
wir erbeiten hie vil vbele	der schonen Prvnhilde man
So si nv mit ir kreften	choment in daz lant
der Prvnhilde wille	ist vns vnbechant
waz ob si also zvrnet	daz wir sin verlorn
so ist vns div maget edele	ze grozen sorgen geborn
Do sprach der herre Sifrit	daz sol ich understen
des ir da habet sorge	des enlaz ich niht ergen
ich sol iv helfe bringen	her in dizze lant [19r]
vz erwelten degenen	di iv noch wrden ie bechant
Irn svlt nach mir niht vragem	ich wil hinnen varn
got mvz iwer ere	di zite wol bewarn
ich chvm vil schiere widere	vn– bringe iv tvsint man
der aller besten degene	der iemen chvnde gewan
Sone sit et niht ze lange	sprach der chunich do
wir sin iwer helfe	vil pilliche vro
er sprach	ich chuom iv widere	in vil kurcen tagen
daz ir mich habt gesendet	daz svlt ir Prvnhilde sagen 

Sifrit der vil chvne	dannen gie zehant
siner tarnkappen	da er daz schiffil vant
dar an so stvnt vil tovgen	daz Sigemvndes chint
er fvrtez also balde	sam ob ez wæte der wint
Der vergen sach doch niemen	wie serez schiffel vloz
von Sifrides chreften	di warn also groz
man wande daz iz fvrte	ein svnder starcher wint
nein	ez fvrte Sivrit	der schonen Sigelinde kint
Bi des tages cite	vn– in der einen naht
chom er zeinem lande	mit groezlicher maht
daz hiez zen Nybelunge	vn– wæren sine man
lant vn– burge	daz was im allez vndertan
Der herre fvr aleine	vf einen wert vil breit
daz schiff gebant vil balde	der ritter vil gemeit
do gie er zeinem berge	da ein bvrch stvont
er svhte herberge	so noch die reismveden tvont
Do chome er fvr die porten	verslozzen im div stvnt
ia hvten si <ir> eren	so noch die lvten tvont
anz tor begvnde bozen	der vnchunde man
daz was vil wol behvetet	do vant er inrethaben dran
einen vngefuogen	der der porten pflach
bi dem sin gewæffen	zallen citen lach
der sprach	wer ist der bozet	vzen an daz tor
do wandelt sine stimme	der chvne Sivrit da vor
Er sprach	ich bin ein reche	entsliezet <vf> die tver
mir mvz eteslicher volgen	noch hivte der fver
der gerne sanfte læge	vnde hete sinen gemach
do zvrnder portenære	do daz Sifrit gesprach
Nv het der rise chuone	sin wæfen an sich genomen
sin helm vf sin hovbet	was im vil schiere chomen
den schilt er balde zvchte	daz tor er vf do swanch
wie rehte gremliche	er gegen Sivride spranch
Wie er getorste wechen	so manigen chvenen man
da wrde slege swinde	von siner hant getan
do begunde im schirmen	der herliche gast
do schvof der portenære	daz sin schilt gespenge brast
von einer isen stangen	des gie dem helde not
ein teil begunde fvrhten	Siurit den tot
do der portenære	so tobelichen slvoch
dar vmbe was im wæge	sin herre Sifrit genvoch
Si striten also sere	daz al div bvrch erdoz
wande ir beider sterche	was vnmazen groz
er twanc den portenære	daz er in <sit> gebant
do erschul[19v]len disiv mære	vber al der Nibelunge lant
Do hort daz grimme striten	verre dvrch den berch
Albrich der vil starche	ein chvne getwerch
er wart gewaffent balde	do lief er da er vant
disen gast vil edelen	der was in beiden vil vnbechant
Albrich was vil grimme	dar zvo starch genvoch
helm vn– ringe	er an dem libe trvoch
vn– eine geisel swêre	von golde an siner hant
do lief er harte sere	da er Sivriden vant
Siben knopfe sware	die hiengen vor daran
da mit er von den hende	den schilt dem <kunen> man
slvoch so bitterlichen	daz im des vil zebrast
des chom in groze sorge	do der wætlich gast
Den scherm er von der hende	gar zebrochen swanch
do warfer von im balde	sin wafen	daz was lanch
den sinen kamerære	wolder niht slahen tot
er schonte siner zvhte	als im sin tvgent gebot
Mit starchen sinen handen	lief er Albrichen an
do vieng er bi dem parte	den altgrisen man
er zogeten vngefvge	daz er vil lvot erscre
zvht des ivngen rechen	div tet Albriche we
Lvte rief der chvne	nv lazzet mich genesen
vn– moht ich iemens eigen	an einen rechen wesen
dem swor ich des eide	ich wære im vndertan
ich diende iv <e> ich stvrbe	so sprach der listige man
Do bant er Albrichen	alsam den risen ê
die Sifrides chrefte	taten im vil we
daz twerch begvnde vragen	wie sint ir genant
er sprach	ich bin ez Sifrit	ich wande ich wære iv wol bekant
So wol mich dirre mære	sprach aber daz getwerch
nv han ich wol erfvnden	div degenlichen werch
daz ir von waren schulden	mvget landes herre wesn
ich tvon swaz ir gebietet	daz ir lazet mich genesn
Do sprach der herre Sifrit	ir svlt balde gan
vn– bringet mir der rechen	der besten der wir han
tvsint Nibelunge	daz mich die hie gesehn
was er der aller wolde	des hort in niemen veriehn
Dem risen vn– Albrichen	lost er do div bant
do lief er harte balde	da er die rechen vant
er wacht in grozen <sorgen>	vil manigen chvnen man
er sprach	wol vf	ir helde	ir sult zv Sifride gan
Si sprungen von dem bette	vn– waren vil bereit
tvsint sneller degene	wrden wol gekleit
si chomen da si fvnden	Sifriden stan
da wart ein schone grvzen	ein teil mit vorhten getan
Vil kercen wart enzvndet	man schancht im luttertranch
daz si so balde chomen	des saget er in do danch
er sprach	ir mvzet hinnen	mit mir vber flvot
des vant er vil bereit	die helde chven vn– gvot
Wol <driezech> hundert rechen	die waren schiere komen
vz den wrden tusint	der besten <do> genomen
den braht man ir helme	vn– ander ir gewant
do er si fveren wolde	in daz Prvnhilde lant
Hort	ir gvten ritter	[20r]waz ich iv welle sagn
ir svlt vil richiv chleider	da ze hove tragen
da wir sehen mvzen	vi minnekliv wip
dar vmbe svlt ir zieren	mit gvter wæte den lip
Nv sprichet liht ein tvmber	ez mach wol lvge wesen
wie moehte so vil ritter	bi ein ander sin genesn
wa namen si die spise	wa namen si gewant
sine chvndenz niht verenden	vn– ob in dienten drizzech lannt
Sivrit was so riche	als ir wol habt gehort
im diente daz chunichriche	vn– Nibelunge hort
des gaber sinen degenen	vil vollechlich genvoch
wande sin wart doch niht minre	swie vil man von dem schatze
Vil frvo an einem morgen	hvben sie sih dan [ trvoch
waz sneller geverten	Sivrit do gewant
si fvrten ros div gvten	vn– herlich gewant
si chomen ritterliche	in daz Prvnhilt lant
Do stvnden in den venstern	div minneklichen kint
do sprach div kuniginne	weiz iemen wer die sint
die dort her gein vns vliezent	so verre vf ienem se
si fvrent segel riche	die sint noch wizzer danne ein sne
Do sprach der vogt von Rine	ez sint mine man
die het ich an der verte	hie nahe bi verlan
die han ich besendet	frowe	die sint chomen
der herlichen gesten	wart vil groze war genomen
Do sach man Sifride	vor in eime scheffe stan
in vil herlicher wæte	im volget manic man
do sprach div kuniginne	her chvnic	ir svlt mir sagen
sol ich die geste enpfahen	oder sol ich grvzen si verdagen
Ir svlt in begegene	sprach er	miht zvhten gan
ob wir si sehen gerne	daz si wol daz versten
do tet div kuniginne	daz ir der kunic geriet
Sifride mit dem grvoze	von den andern si do schiet
Man schvof in herberge	mit willen al zehant
do was so vil der geste	chomen in daz lant
daz si sich allenthalben	drvngen mit den scharn
do wolden die vil chvenen	zv den Burgonden varn
Do hiez div kuniginne	teilen sa zehant
golt vn– silber	ross vn– ovch gewant
den vremden vn– den chvnden	vil <manigem> werden man
des ir	<ir> vater hete	nach sime tode vil verlan
Si hiez ovch sagen von Rine	den rechen also her
daz si des schazzes næmen	minre oder mer
daz si daz mit ir brêhten	in Burgonden lant
des antwrt ir Hagene	in hohem mvte sa zehant
Vil edeliv kuniginne	iv si fvr war geseit
ez hat der kunic von Rine	golt vn– kleit
also vil ze gehene	daz wir des habn rat
daz wir iht hinnen fvren	iwer golt oder iwer wat
Nein	dvrch mine liebe	sprach daz magedin
ich wil mit mir hinnen	<fveren> zweinzich schrin
von golde vn– ovch siden	daz gebn sol min hant
so wir chomen vber	in daz Gvntheres lant
Do sprach div kuniginne	wem laz ich miniv lant
di sol nv hie bestiften	vnser beider hant
do sprach der kunic edele	[20v]nv heizet her gan
swer iv dar zvo gevalle	den svln wir vogt wesn lan
Ein ir hohsten mage	div frowe bi ir sach
er was ir mvter brvder	zv dem div maget sprach
nv lat iv sin bevolhen	die burge vn– ovch daz lant
vnze daz hie rihte	des kunich Guntheres hant
Do welt si ir gesindes	tvsint chvner man
die mit ir ze Rine	solden varn dan
zvo ienen tvsint rechen	von Nibelunge lant
si rihten sich zer verte	man sach sie riten vf den sant
Si fvrten mit ir dannen	sehs vn– ahzech wip
dar zvo wol hvndert mægede	vil schone was ir lip
sine sovmten sich niht langer	si ilten vaste dan
die si da heime liezen	hey was der weinen began
In tvgentlichen zuohten	si rvmt ir eigen lant
si chvst ir frivnt die nehsten	swaz si der bi ir vant
mit gvtem vrlovbe	si chomen vf den se
zvo zir vater lande	chome div frowe nimmer me
Do hort man vf der verte	maniger hande spil
aller kvrzewile	der heten si vil
do chome in zv zir reise	ein rehter wazzerwint
si fvren von dem lande	vil harte vrolichen sint
Iane wolde si den herren	niht minnen vf der vart
er wart ir kurzwile	vnz in sin hvs gespart
ze Wormez zv der burge	zeiner hochgecit
dar si vil frevden riche	chomen mit ir rechen sit

Do> si gevarn warn	vollen niwen tage
do sprach der chvne Hagene	nv merchet waz ih sage
ir svomt ivch mit den mæren	ze Wormeze an den Rin
die iwern boten solden	nv zen Burgonden sin
Do sprach der kunich Gvnther	ir habt mir reht geseit
nv hereitet ivch zer verte	ritter vil gemeit
wande wir in disen ziten	ander niemen han
der dar mvge geriten	do sprach der vbermvete man
Nv wizzet	lieber herre	ine bin niht bote gvot
ich wil ivch eins bewisen	der ez doch gerne tvot
Sivrit den chvnen	svlt ir iz niht verdagen
dvrch iwer swester liebe	getarrer erz iv nimmer versagen
Er sande nach dem rechen	der herre chom zehant
er sprach	sit daz wir nahen	heim in miniv lant
so solde ich boten senden	der lieben swester min
vn– ovch miner mvoter	daz wir nv nahen an den Rin
Des bitte ich ivch	her Sivrit	daz ir die reise tvot
daz ez mit mir verdiene	div edel maget gvot
mit allen minen frivnden	ritter vil gemeit
do sprach der degen chvne	der reise bin ich iv bereit
Nv enbietet swaz ir wellet	des wirdet niht verdaget
dvrch die vil minneklichen	so wirt ez gar gesaget
zwiv solde ih dir verzihen	die ich in hercen han
swaz ir durch si gebietet	daz ist allez getan
So sagt miner mvoter	vn– ovch der swester min
daz wir an dirre verte	in hohem mvote sin
lat wizzen [21r]mine brveder	wie wir geworben han
vn– ander unser frivnde	sol man div mære ovch horen lan
Chriemhilde vn– mine mvoter	svlt ir niht verdagen
min vn– Prvnh' dienest	svlt ir in beiden sagen
vn– allem ir gesinde	vn– allen minen man
dar nach ie ranc min herce	wie wol ich daz erworben han
Vn– sagt ovch minen brvdern	vn– andern frivnden min
daz si mit grozem vlize	dar zv gewarnt sin
vn– sol in vnsern landen	div mære wizzen lan
ich wil mit Prvnhilde	vil groze hochgecite han
Vn– bitet mine swester	so si daz habe vernomen
daz ich mit minen gesten	si ze lande chomen
daz si mit vlize enpfahe	die trvtinne min
daz wil immer mere	mit triwen dienende sin
Do der vil chvne reche	vrlovp von im genam
vn– ovch von Prvnhilde	der ritter lobesam
reit in grozen frevden	ze Wormeze an den Rin
ez enchunde in allen landen	ein bote bezzer niht gesin
Mit vier vn– zweinzech rechen	ze Wormeze er do reit
des chvniges chom er ane	do daz wart geseit
allez daz gedigene	vor iamer heten not
si vorhten daz ir herre	dort beliben wære tot
Die helde erbeizet waren	vil hohe stvont ir mvot
vil schier in chomen beide	die ivnge kvnige gvot
vn– al daz hofegesinde	der herre Gernot sprach
do er sinen <brvder>	niht bi Sivride ensach
Willechomen	ritter edele	ir svlt vns hoeren lan
wa ir minen brvder	<den> kunic	habt verlan
div Prvnhilde sterche	in wæn vns hat benomen
so ist vns ir hohiv minne	harte schedelich chomen
Iv edeln rechen beiden	vn– al den magen sin
enbivtet sinen dienest	der hergeselle min
den liez ih wol gesunden	er hat mich her gesant
ze boten mit den mæren	daz ich iv div tæte <bekant>
Ir svlt daz ahten schiere	swie so daz geschehe
daz ich iwer mvoter	vn– iwer swester sehe
die sol ich lazen horen	waz in enboten hat
Gunther der chvnic riche	des dinch in hohen eren stat
Do sprach der ivnge Giselher	da svlt ir dar gan
da habt ir miner mvoter	vil liebe an getan
div hat doch michel sorge	vmbe den brvoder min
si sehent ivch beide gerne	des svlt ir gar ane angest sin
Do sprach der herre Sivrit	swaz ich in dienen chan
daz sol vil willechlichen	mit triwen sin getan
wer sagt nv den frowen	daz ich wil dar gan
daz tvon ich	sprach do Giselher	der vil wætlich man
Der stolze chvene reche	ze siner mvoter sprach
vn– ovch zv siner swester	da er si beide sach
vns ist chomen Sivrit	der helt vz Niderlant
in hat min brvoder Gunther	ze Rine her von im gesant
Er bringet vns div mære	wiez vmben chvnich ste
nv svlt ir im erlovben	daz er ze hove ge
er bringet div rehten mære	her von Islant
noch was den ede[21v]len frowen	vil michel sorgen bechant
Si sprvngen nach ir wæte	do leiten si sich an
si baten Sivride	do hin ze hove gan
daz tet er willechliche	wand er si gerne sach
Chriemhilt div vil schone	zvo zim do gvetlichen sprach
Sit willechomen	herre Sivrit	ritter lobelich
war ist chomen min brvoder	Gvnther der kunic rich
von Prvnhilde sterche	den wæn wir haben verlorn
owe mir armen meide	daz ih danne ie wart geborn
Do sprach der ritter chvene	nv gebt mir botenbrot
ir edeln ivncfrowen	ir wænet ane not
ich liez in wol gesunden	daz tvn ich iv bechant
er vn– div schone Prvnhilt	hant mich iv beiden her gesant
Si enbietent iv ir dienest	mit triwen in daz lant
vil richiv kuniginne	daz tvon ih iv bechant
nv lazet iwer weinen	si wellent schiere chomen
sine het in langen citen	so lieber mære niht vernomen
Mit sneblanchen geren	ir ovgen wolgetan
wischte si nah trehenen	danchen si began
dem boten dirre mære	div ir da waren chomen
do was ir michel trvoren	vn– ovch ir weinen benomen
Den boten bat man sizzen	des was er bereit
do sprach div ivncfrowe	mir wære niht ze leit
ob ich ze botenmiete	iv solde gebn min golt
dar zvo sit ir ze riche	ich wil iv svs immer wesn holt
Ob ich nv eine hete	sprach er	drizzech lant
so enpfienge ich doch vil gerne	gabe vz iwer hant
do sprach div minnekliche	nv sol ez sin getan
si hiez ir kamærære	nach der botenmiete gan
Vier vn– zweinzich povge	mit gesteine gvot
die gab si im ze miete	do stvnt also sin mvot
ern woldes niht behalden	er gab ez sa zehant
ir nehstem ingesinde	die cr zer chemenaten vant
Ir mvter bot ir dienest	in gvtlichen an
ich sol iv sagen mere	sprach do der chvene man
wes ivch der kunich bitet	swenner nv chvmet her
daz weller immer dienen	daz ir leistet sinen ger
Die sine <richen> geste	bitet er ivch wol enpfan
des manter iwer vil sere	irn svlt des ovch niht lan
irn <ritet> im zegegene	fvr <Wormez> vf den sant
des sit ir von dem kunige	mit grozen triwen gemant
Do sprach div minnekliche	des bin ich vil bereit
swaz ich im kan gedienen	daz ist im vnverseit
in vrivntlichen triwen	so sol ez sin getan
do merte sich ir varwe	die si vor liebe do gewan
Ez enwart nie bote enpfangen	deheines fvrsten baz
getorste si in chvssen	div frowe tæte daz
wie rehte minnekliche	er von den frowen schiet
do taten Bvrgonden	als in Sivrit do geriet
Sindolt vn– Hvnolt	vn– Rvmolt der degen
die mvsen vil vnmvoze	zvo den citen pflegen
rihten daz gesidele	als in daz was bechant
des kuniges ambetlvte	man do mit arebeiten vant
<Ortwin> vn– Gere	des [22r]rechen kvniges man
die sanden allenthalben	nach den frivnden dan
vn– chvnten in die hochgecite	div da solde sin
da bereiten sich engegene	div vil schoenen magedin
Der palas vn– die wende	was allez vber al
gezieret gegen den gesten	der Gvnthers sal
wart vil wol bezimbert	dvrch manigen vremden man
div selbe groze hochgecite	hvop vil vrolichen an
Do riten allenthalben	die wege dvrch daz lant
der drier kunige mage	die het man besant
daz si den solden warten	die in da wolden chomen
do wart vz den chisten	richer wæte vil genomen
Do sagt man div mære	daz man nv riten sach
den chvnich mit sinen gesten	do hvop sich vngemach
von des volches chreften	in Burgonden lant
hey waz man sneller degene	bi frowen Prvnhilde vant
Do sprach div schone Chriemhilt	ir miniv mægedin
di an dem antpfange	mir mir wellen sin
die svochen vz den chisten	div aller besten chleit
di si mvgen vinden	daz si den frowen ovch geseit
Do chomen ovch die rechen	die hiezen tragen dar
die herlichen sætele	nach rotem golde var
die frowen solden riten	ze Wormeze an den Rin
bezzir pferit gereite	chvnde ninder gesin
Hey was da liehtes goldes	von <den> moren schein
ovch lagen an den zovmen	vil manic edel stein
die gvldinen schemil	ob liehten pfellen gvot
braht man dar den frowen	si waren hoh gemvot
Begvrtet mit den siden	vil schoen vn– starch
braht man den frowen	vil wnneklichiv march
div richen fvrbvege	sach man div more tragen
von den besten siden	da von iv iemen chvnde sagen
Sehs vn– ahzech frowen	hiez man chomen dan
die gebende trvogen	zv Chriemhilde stan
chomen di vil schonen	vn– heten liehtiv chleit
do wart ovch wol gezieret	vil manich minneklichiv meit
Fvnfzech vn– viere	von Buregonden lant
so waren ez die beste	die man ze hove vant
di sah man <valevahsen>	vnder liehten porten gan
<des> Gvnther an si gerte	daz wart mit vlize getan
Von liehten richen pfellen	verre voz heiden lant
si trvgen vor den gesten	so manic gvot gewant
daz ir genvoge schoene	ze rehte wol gezam
er wære in swachem mvote	der ir deheiner wære gram
Von zobel vn– ovch von harme	vil chleider man da vant
da wart vil wol gezieret	manich arm vn– hant
mit <bovgen> ob den siden	die si da solden tragen
iv enchvnde dizze vlizen	zende niemen gesagen
Vil manigen gvrtel spæhen	gvot vn– lanch
vber vil richiv kleider	manic wiziv hant do swanch
vber roche ferrans	vn– pfelle vz Arabin
daz si in al der werlde	bezzer nimmer chvnden sin
Ez wart in fver gespenge	manic schoniv meit
gen	næt vil minnekliche	ez moeht ir wesn leit
der ir vil liehtiv varwe	niht lvohte [22v]gegen der wat
so schones ingesindes	nv niht kuniges chvnne hat
Do die vil minneklichen	nv trvgen ir gewant
di si da fvren solden	die chomen al zehant
der hochgemvten rechen	ein vil michel chraft
man trvg ovch dar mit schilden	vil manigen esschinen schaft

Anderthalp> des Rines	sach man mit grozen scharn
den chunic mit sinen gesten	zv dem stade varn
ovch sach man da bi zovmen	leiten manige meit
di si enpfahen solden	die waren alle bereit
Do die von Islande	zen schiffen chomen dan
vn– ovch von Nibelungen	Sivrides man
si gahten zv dem lande	vnmvzich wart ir hant
da man des chvniges frivnde	des stades anderthalben vant
Nv hoert ovch disiv mære	von der chvnegin
Uten der vil richen	wie si div mægedin
gefrvmte von der bvrge	dar si do selbe reit
da gewan ein ander chvnde	vil manic ritter vn– meit
Der margrave Gere	Chriemhilde zovmte dan
niwan vz der burge	Sivrit der chvne man
dient ir do minnekliche	si was ein schoene kint
des wart im wol gelonet	von der ivncfrowen sint
Ortwin der chvne	bi fron Voten reit
vil gesellechlichen	manic ritter vn– meit
ze solhem antphange	des mach man wol veriehen
wart nie so vil der frowen	bi ein ander gesehn
Vil manic bvhvrt richen	sach man dan getribn
von helden loblichen	niht wol wær ez beliben
vor <Chriemhilde> der schoenen	al zv den schiffen dan
do hvop man von den moeren	manige frowen wolgetan
Der chvnich was chomen selbe	vn– manic werder gast
hey was starcher schefte	vor den frowen brast
man hort da hvrteklichen	von schilden manigen stoz
hey waz da richer bvckelen	von gedrange lvot erdoz
Die vil minneklichen	die stvnden an der habe
Gunther mit sinen gesten	gie von den schiffen abe
er fvorte Prvnhilde	selbe an siner hant
da lvhten wider ein ander	die edeln <stein> vn– ovch daz gewant
In vil grozen zvhren	frow Chriemh' do gie
da si Prvnhilde	mit ir gesinde enpfie
da wart gervchet hoher	mit wnneklicher hant
vil manic schapel riche	do si sie enpfiengen in daz lant
Do sprach gezogenliche	Chriemh' div chvniginne
ir svlt zv disen landen	groz willechomen sin
mir vn– miner mvoter	vnde allen die wir <han>
dar nach wart von den vrowen	mit trvten chvssen niht verlan
Do Prvnh' frowen	vol chomen vf den sant
da wart vil minneklichen	genomen bi der hant
von herlichen rechen	manich wip wol getan
man sah die schonen megede	vor den chvniginnen stan
E daz ir grvoz ergienge	[23r]das was ein langiv stvnt
ia wart da gechvsset	manic rosen varwer mvont
noh stvnden bi ein ander	die kuniges tohter rich
daz liebet an ze sehene	vil manigen rechen lobelich
Do speheten mit den ovgen	die ê horten iehn
daz	si so minnechliches	heten niht gesehn
so die frowen beide	des iach da manic man
daz si den pris an schoene	in manigen landen mvsen han
Die frowen spehen chvnden	vn– herlichen lip
die lobten durch ir schoene	daz Guntheres wip
doch sprachen da di wisen	die hetenz baz ersehn
man mohte Chriemh'	wol fvr <Prvnhilde> iehn
Wider ein ander giengen	beide magt vn– wip
man sach da wol gezieret	vil manigen schonen lip
da warn sidin hutten	vn– manich rich gezelt
der was da vil gespannen	vor Wormez vber al daz velt
Von des chuniges mâgen	wart dringen niht verlan
man hiez die chuniginne	beide dannen gan
vn– mit in al die frowen	da man den scaten vant
dar brahten si die degene	vzer Burgonden lant
Dv waren ovch die geste	zen rossen alle chomen
vil manic richiv tioste	durch schilde wart genomen
daz velt begunde stovben	sam ob al daz lant
mit lovge enbrunnen wære	da wrden degene bechant
Wes da die helde pflægen	daz sach vil manic meit
man sagt <daz> her Sivrit	mit sinen helden reit
manige widerchere	fvr die hutten dan
er fvrt der Nibelunge	tvsint wætlicher man
Do chom von Tronege Hagene	als im der wirt geriet
den bvhvrt frivntliche	do der helt geschiet
daz si ungestovbet liezen	div <minneklichen> kint
des wart do von den gesten	gevolget zvhtekliche sint
Do sprach der herre Gernot	div ross nv lazet stan
vnz ez beginne chvolen	so svlen wir ane van
dienen schoenen wiben	fvr den palas wit
so der chunic welle riten	daz ir bereite denne sit
Vor der <vesperzite>	do div sunne nider gie
vn– ez begunde chvolen	niht langer man daz lie
in die stat sich hvben	man	<magt> vn– wip
mit ovgen wart getrvtet	vil maniger ivncfrowen lip
Da wart von gvten rechen	vil chleider ab gerieten
von den hochgemvten	nach ir lande siten
vnz fvr den palas witen	der chunich da nider stvnt
da wart gedienet frowen	so helde hoch gemvote tvont
Do wrden ovch gescheiden	die richen kunigin
froe Vote vn– ovch ir tohter	die giengen beide hin
vn– mit ir ingesinde	in ein vil witez gadem
do hort man allenthalben	vil harte grozlichen chradem
Gerihtet wart gesidele	der chunic wolde gan
ze tische mit den gesten	do sach man bi im stan
die schonen Prvnhilden	chrone si do trvoch
in des <chvniges> lande	div was spæhe vn– rich genvoch
Vil manic hergesidele	mit gvo[23v]ten taveln breit
vol spise wart gesezzet	als vns daz ist geseit
des si haben solden	wie wenich des gebrast
do sach man bi dem kunige	vil manigen herlichen gast
Des wirtes kamerære	in pechen goldes rot
daz wazzer fvor trvogen	des wære lvzzil not
ob iv daz iemen seite	daz man diente baz
ze kuniges hochgeciten	ich gelovbe mvliche daz
E daz der vogt von Rine	wazzer do genam
do tet der herre Sivrit	als im do gezam
er mant in siner triwe	wes er im veriach
e daz er Prvnhilde	da heim in Islande sach
Er sprach zvo dem chvnege	ia swor mir iwer hant
swenne daz frov Prvnh'	chome in dizze lant
ir gæbt mir iwer swester	war sint die eide chomen
ich han an iwer reise	vil micheI arebeit genomen
Do sprach der chunic riche	ir habt mich reht ermant
iane sol niht meineide	werden des min hant
ich wilz iv helfen fvgen	so ich beste chan
do hiez man Chriemh'	ze hove zv dem chvnige gan
Mit ir schonen meiden	si chom fvr den sal
do spranch von einer stiegen	Giselher zetal
do hiez er wider wenden	ir schonen mægedin
niwan min swester eine	div sol mit vns ze hove sin
Do brahter <sine> swester	da man den chunic vant
da stvnden ritter edele	von maniger fvrsten lant
in dem sal enmitten	hiez man si stille stan
do was div frowe Prvnhilt	an ir sedel nv gegan
Sine wesse niht der mære	waz man da wolde tvon
do sprach zv sinen magen	der Danchrates svn
helfet mir daz min swester	Sivriden neme ze man
do sprachens al geliche	si mag in wol mit eren han
Do sprach der chunic Gvnther	la dirz niht wesn leit
min vil liebiv swester	vn– loese minen eit
ich swor dich eime rechen	vn– wirdet er din man
so hastv minen willen	mit grozen triwen getan
Do sprach div magt edele	vil lieber brvder min
irn svlt mich niht vlehen	ia wil ich immer sin
swie ir mir gebietet	daz sol sin getan
ich sol in loben gerne	den ir mir	herre	gebt ze man
Von lieber ovgenweide	wart Sivrides varwe rot
ze dienest sich der meide	do der reche boe
man hiez si zvo ein ander	in dem ringe stan
vn– vragtes	ob si wolde	den vil wætlichen man
In magtlichen zvehten	si schamte sich ein teil
iedoch so was gelucke	vn– Sivrides heil
daz si in niht versprechen	wolde da zehant
ovch lobte si ze wibe	der edel chunic von Niderlant
Do si in gelobte	vn– ovch er die meit
gvtlich vmbevahen	daz was da vil bereit
von Sivrides armen	daz minnekliche chint
nach siten wart gechvsset	div schone chvniginne sint
Sich teilte daz gesinde	als schiere daz geschach
an daz gegensidele	man Sivride sach
mit Chriemh' sizzen	dar dient im manic man
man sach die Nibelunge	nach im an den sedel gan	[24r]
Ovch was der wirt gesezzen	vn– Prunh' div meit
do sach si Chriemh'	do wart ir nie so leit
bi Sivride sizzen	weinen si began
ir vielen heize træhene	vber liehtiv wange dan
Do sprach der wirt des landes	waz ist iv	frowe min
daz ir so lazet trvben	liehter ovgen schin
ir mohtet sanfter lachen	wan iv ist vndertan
min lant vnde riche bvrege	vn– manic wætlicher man
Ich mac wol balde weinen	sprach div schone meit
vmbe dine swester	ist mir so grimme leit
di sich ich sizzen nahn	dem eigen holden din
daz mvoz mich immer riwen	vn– sol si also verstozen sin
Do sprach der chunich Gvnther	ir mvgt wol stille dagn
ich wil iv zandern citen	disiv mære sagn
warvmbe ich mine swester	dem rechen han gegebn
ia mac si mit dem degene	immer vroliche lebn
Si sprach	mich iamert immer	ir schoene vn– ovch ir zvht
vn– wesse ich war ich solde	ich hete gerne vluht
daz ich iv nimmer wolde	geligen nahen bi
irn saget mir	wa von Chriemh'	div wine Sivrides si
Do sprach der chvnic riche	ich tvonz iv wol bechant
er hat als wol burge	als ich vn– witiv lant
daz wizzet sicherlichen	er ist ein chunic rich
des gan ich im ze minnen	die schonen magt lobelich
Swaz ir der chunic sagete	si hete trvbin mvot
do gahete von den tisschen	vil manic ritter gvot
ir bvhurt wart so herte	daz al div bvrch erdoz
den wirt do bi den gesten	da ze wesene verdroz
Er daht er læge sanfter	der schonen frowen bi
do was er des gedingen	niht in hercen vri
im mvese von ir minne	ein hohez liep geschehen
er begunde vrivntliche	an die magt dicke sehen
Ir ritterschaft die geste	hiez man do ab lan
der chvnic mit sime wibe	ze bette wolde gan
vor des sales stiegen	die frowen schieden sich
in zhten minnekliche	als ich wol verwæne mich
Do chom ir ingesinde	die sovmten sich des niht
ir richen chamerære	die brahten in div lieht
sich teilten do die rechen	der zweier kunige man
do sach man vil der degene	dan mit Sivride gan
Die herren chomen beide	al da si solden ligen
do gedaht ir ieslicher	mit minnen an gesigen
den minneklichen frowen	daz trost in wol den mvot
Sivrides kvrzewile	div wart vil grozliche gvot
Do der herre Sivrit	bi Chriemh' lach
vn– er so minnekliche	der iuncfrowen pflach
mit sinen edeln minnen	si wart im so der lip
daz chvnde ovch <si> verdienen	als ein tvgende riche wip
Ine sage iv niht mere	wie er der frowen pflac
nv horet ovch disiv mære	wie Gunther gelach
bi der sinen brvte	der vil mære degen
was vil diche sanfter	bi andern frowen gelegn
Daz volch was im entwichen	frowen vn– man
do wart div kemenate	balde zv getan
er wande er solde trvten	ir minneklichen lip
ez was noch vil [24v]vnnahen	e daz si wrde sin wip
In sabenwizem hemede	si an ein bette gie
do daht der ritter edele	nv han ihz allez hie
des ich ie da gerte	in allen minen tagn
si mvos im dvrch ir schone	von grozen schulden wol behagn
Div lieht begunder bergen	div Guntheres hant
do gie der chunic riche	da er die frowen vant
er leite sich ir nahen	sin frevde div wart groz
die vil minneklichen	der helt mit armen vnbesloz
Minnekliche trvten	des chvnder vil began
ob im des div frowe	gegunnet wolde han
do zvrnde si so sere	daz in gemvete daz
er wande vinden frivnde	do vander vintlichen haz
Si sprach	ritter edele	ir svltez lazen stan
des ir da habt gedingen	iane mages niht ergan
ich wil noch magt beliben	ir svlt wol wizzen daz
vnz ich div rehten mære	ervinde an allen dingen baz
Do rang er nach ir minne	daz was der frowen leit
do greif nach eime gvrtel	div herliche meit
daz was ein starcher porte	den si alle cite trvoch
wie luzzil si dem kunige	sines willen do vertrvoch
Die fveze vn– ovch die hende	zesamne si im bant
si trvge in zeinem nagele	vn– hienge in an die want
daz enchunder niht erwenden	vil chreftich wart sin not
ia het er von ir sterche	vil nach gewnnen den tot
Do begvnde vlegen	der meister wande sin
nv loset min gebende	vil edeliv kunigin
ine trow iv	frowe	nimmer	mit minnen an gesigen
vn– sol ovh harte selten	iv so nahen mer geligen
Sine rvchte <wie> im wære	wande si vil sanfte lach
dort mvoser allez hangen	die naht vnz an den tach
vnze daz der morgen	dvrch div venster schein
des kuniges kurcewile	was die wile harte chlein
Nv sagt mir	her Gunther	wer iv daz iht leit
ob ivch gebvnden fvnden	so sprach div schone meit
die iwern kamerære	von einer frowen hant
do sprach der ritter <edele>	daz wrde iv vbel bewant
Ovch hete ichs luzzel ere	sprach der chvene man
dvrch iwer selber zvhte	so lat mich zvo ziv gan
sit daz iv min minne	sint so grimme leit
iane sol ich nimmer rveren	mit miner hant an iwer chleit
Do si daz gehorte	zehant si in verlie
wider an daz bette	er zv der frowen gie
er leite sich so verre	daz er ir schone wat
niht mohte gereichen	des wolde ovch si do haben rat
Do chom ir ingesinde	vn– brahten in div kleit
der was in an dem morgen	harte vil bereit
swie man da gebarte	trvrich was genvoch
der edel wirt des landes	swier des tages chrone trvoch
Nach siten der si pflagen	vnde man durch reht #begîe
der chunic mit siner frowen	niht langer daz enlie
si chomen zv dem mvenster	da man die messe sanch
ovch chom der herre Sivrit	sich hvop da grozlich gedranch
Nach chunichlichen eren	<was> in dar bereit [25r]
swaz si habn solden	ir chrone vn– ovch ir gekleit
do wrden si gewihet	do daz was getan
do sah mans alle viere	vnder chrone lobeliche stan
Vil knappen swert da namen	vier hundert oder baz
den kunigen zen eren	ir svlt gelovben daz
sich hvop vil michel frevde	in des kuniges lant
man horte schefte bresten	an der swertdegene hant
Do sazen in den venstern	div schonen magedin
si sahen vor in glesten	vil maniges schildes schin
do het sich gesundert	der chunic von sinen man
swes <ander> iemen pflæge	man sah in trvrende stan
Im vn– Sivride	vngeliche stvnt der mvot
wol wesse sine swære	der chune degn gvot
do gienger zv dem kvnige	vragen er began
wie ist iv hint gelungen	des wolt ich gerne chunde han
Do sprach der wirt zem gaste	ich chlag iv minen schaden
ich han den vbeln tivfel	heim ze hvs geladen
do ich si wande minnen	vil sere si mich bant
si trvge mich zeime nagele	vn– hie mich hohe an ein want
Da hienge ich angestlichen	die naht vnz an den tac
e daz si mich enbvnde	vnsanfte si min pflac
daz sol iv friwentliche	vf genade sin gechleit
do sprach der herre Sivrit	daz ist mir grozliche leit
Des bringe ich ivch wol innen	vn– lat irz ane nit
ich schaffe daz si noch hint	so nahen bi iv geleit
so daz si ivch ir minne	gesvmet nimmer mer
der rede was do Gunther	nach sinen arebeiten her
Nv schowe mine hende	wie di geswollen sint
die twanc si mir so sere	als ob ich wære ein kint
daz mir blvot zen nagelen	allenthalben dranch
ich het ze mime lebene	harte chleinen gedanch
Do sprach der starche Sivrit	dv maht noch wol genesn
vns zwein ist vngeliche	hinte gewesn
mir ist din swester Chriemh'	als min selbes lip
ez mvz div frowe Prvnh'	noch hinte werden din wip
Ich chvom ze naht vil tovgen	zer kemenate din
in miner tarnkappen	des soltv sicher sin
so daz sich miner liste	mach niemen wol verstan
so heiz die kamerære	zvo zir herbergen gan
So lesche ovch ich den kinden	div lieht an der hant
bi disem wortzeichen	sol dir sin bechant
daz ich bi dir si nahen	ia twing ich dir din wip
daz dv si hint minnest	oder ich verlivse den lip
Ane daz dv iht trvttest	sprach der chunic do
die mine lieben frowen	anders bin ich vro
so tvo ir swaz dv wellest	vn– næmstv ir den lip
daz solde ich wol verchiesen	si ist ein vngehivrez wip
Daz nim ich	so sprach Sivrit	vf die triwe min
daz ich ir niht en minne	div schoene swester din
div ist mir vor in allen	die ich noch ie gesach
des frowete sich do Gvnther	do daz Sivrit gesprach
Da was von churzewile	in gedrange not
den bvhurt vn– schallen	allez man verbot
da die frowen sol[25v]den	in den palas gan
do hiezen die kamerære	die lvte von dem wege stan
Von <rossen> vn– von lvten	gerovmet was der hofe
der frowen iesliche	fvrt ein bisscofe
do si vor den kunigen	ze tische solden gan
in volgte zv dem sidele	vil manic reche wolgetan
Der chunic in gvtem wane	bi sime wibe saz
daz im gelobte Sivrit	wol gedahter an daz
der eine tac in dvhte	wol drizzech tage lanc
an Prvnh' minne	stvnde im aller sin gedanc
Wander erbeite chvome	daz man ze naht von tische gie
die schonen Prvnhilde	man do chomen lie
vn– ovch Chriemh'	si bede an ir gemach
hey waz <man> chuner degene	bi den schonen frowen sach
Sivrit vn– Chriemh'	ie baz vn– baz
durch liebe ein ander trvoten	ir svlt gelovben daz
swaz si im gedienen chvnde	wie luzzil si des liez
do mvs ovch <leisten> Sivrit	alser Gunther gehiez
Er stal sich von den frowen	vil tovgen chom er dan
da er vil kamerære	vant mit liehten stan
div begunde leschen	den chinden an der hant
daz ez Sivrit wære	daz wart do Gunther bechant
Wol wesser waz er wolde	do hiez er dannen gan
mægede vn– frowen	do daz wart getan
er besloz mit vlize	selbe do die tvr
starcher rigele zwene	die warfer snelle der fvr
Div lieht verbarger schiere	vnder die bettewat
eines spils begunde	des was do niht rat
Sivrit der vil starche	vn– ovch div schone meit
daz was do dem chunige	beide lieb vn– leit
Der helt sich leite nahen	der iuncfrowen bi
si sprach	nv lat ez	Gvnther	als liep als iv daz si
daz ir niht arebeite	lidet alsam ê
sit getet div frowe	dem chunige Sifride we
Do hal er sine stimme	daz er niht ensprach
der kunic ez allez horte	swie er sin niht ensach
daz heimlicher dinge	von <in> da niht geschach
si heten an dem bette	harte kleinen gemach
Er gebarte sam ez wære	Gunther der chunic rich
er vmbesloz mit armen	die magt lobelich
si warfen vz dem bette	dabi vf einen banch
daz im sin hovbet lvote	an eime scamel erchlanch
Wider vf mit chreftin	spranch der vil snelle man
er woldez baz versvochen	do er des began
daz ers im wolde twingin	dem erz gelobet ê
solch wer deheiner frowen	wêin ich immer mer erge
Do er niht wolde erwinden	div magt balde vf spranch
irn svlt mir niht zefveren	min <hemede> also blanch
mit iwer groz vnfvge	wandez ist mir leit
des bringe ich ivch wol innen	sprach do div minneklichiv meit
Mit ir vil starchen armen	besloz si den degn
do wolde si in gebvnden	alsam den kunic legen
daz si an ir bette	mohte habn gemach
daz er ir wat zerfverte	div frowe ez grozliche rach
Waz half sine groziv sterche	vn– ovch sin michel chraft
si erzeigete wol dem [26r]degene	ir libes meisterschaft
si trvge in mit gewalte	da wart ir ellen schin
vn– trvchtin vngefvege	zwischen der <wende> vn– einen schrin
Owe	gedaht der reche	sol ich nv minen lip
von einer magt verliesen	so mvgen elliv wip
her nach immer mere	hohe tragen den mvot
so <versvochtet> ez vil mænegiv	div ez svs nimmer getvot
Do schamte sich vil sere	der vil chuone man
ob ir gelinge solde	zvrnen er began
mit vngefveger chrefte	sazter sich <ir> wider
er versvochtez angestlichen	an der chvniginne sider
Swie vaste si vf im læge	sin zorn in do twanch
vn– ovch sin starchez ellen	daz er an ir danch
sich wider vf gerihte	sin angest div was groz
si taten in dem gademe	her vn– dar vil manigen stoz
Ovch was der chunic Gvnther	niht an angest gar
er mvse dicke wenchen	vor in her vn– dar
si rungen also starche	daz ez groz wnder was
daz ir ieslichez	vor dem andern <ie> genas
Den kunich mvete sere	beidenthalp div not
doch vorhter michels mere	den Sivrides tot
wande si het dem degene	den lip nach benomen
wan daz er niht getorste	er were ze helfe im gerne chomen
Ja werte harte lange	vnder in der strit
doch braht er die frowen	wider an daz bette sit
swie vaste si sich werte	ir wer wart ze ivngest	chranch
der chunic in sinen sorgen	hete manigen gedanch
Ez dvhte in harte lenge	e daz er si betwanch
si drucht im sine hende	daz vz den nageln spranch
daz blvot im von ir chreften	daz was dem helede leit
sit brahter an ein lovgen	die vil herlichen meit
ir vngefvges willen	des si e da iach
der chunich iz allez horte	swier doeh niht ensprach
er drvchtes an daz bette	daz si vil lvt erschre
ir taten sine chrefte	do vil grozlichen we
Do greif si nach dem porten	da si den ligen vant
vn– wold in da mit binden	do wert ez so sin hant
daz ir div lit erchrachten	do verzagt ir lip
des wart der strit gescheiden	do wart si Gvntheres wip
Si sprach	kunic edele	ir svlt mich lebn lan
ez wirt vil wol versvenet	swaz ich iv han getan
ich gewer mich nimmer mere	der edeln minne din
wand ich han wol erfvnden	daz dv chanst frowen meister sin
Sivrit der stvnt dannen	ligen liez er die meit
sam er von sinem libe	ziehen wolt div chleit
er nam ir e ein vingerlin	von golde wol getan
daz wolde got von himele	daz er daz hete verlan
Dar zvo nam er ir gvrtel	daz was ein porte gvot
ine weiz ob er daz tæte	dvrch sinen hohen mvot
er gab ez sime wibe	daz wart im sider leit
do lagen bi ein ander	Gunther vn– Prunh' div meit
Er pflag ir minnekliche	als in daz beiden zam
do mvste si verchiesen	ir zorn vn– ovch ir scham
von siner heinliche	si wart ein luzzil bleich
hey waz ir von der min[26v]ne	ir vil grozen chrefte entweich
Done was ovch si niht stercher	dann ein ander wip
er trvote vil minnekliche	den ir vil schonen lip
ob siz versvochte mere	waz chvnde daz vervan
daz het ir der kunic Gunther	mit sinen minnen getan
Wie rehte minnekliche	si im nahen lac
mit vrivntlicher liebe	vnze an den liehten tac
ovch was der <herre> Sivrit	nv hin wider gegan
da warde wol enpfangen	von einer frowen wolgetan
Er vnderstunt ir vrage	der si doch hete mvot
vn– hal siz harte lange	der chune degn gvot
diz chleinoet er ir da heime	doch ze iungest gap
daz frumte vil der degene	mit samt im selben in daz grap
Der wirt wart an dem morgen	verre baz gemvot
denner da vor wære	des wart div froewde gvot
in allen sinen landen	von manigem hohen man
die er zv huse ladete	den wart do dienste vil getan
Div hochgecite do werte	vnz an den zwelften tac
daz in al der wile	der scal da nie gelac
von aller hande vrevden	der iemen solde pflegen
do wart des chuniges choste	vil harte hohe gewegn
Des edeln wirtes mage	als ez der kunic gebot
si gaben richiv chleider	dar zvo daz golt vil rot
ross vn– dar zv silber	vil manigem varnden man
die gabe nemen wolden	die schieden vrolichen dan
Sivrit der herre	vzer Niderlant
mit tvsint sinen rechen	allez daz gewant
daz si ze Rine brahten	daz wart gar hin gegebn
vn– ovch div ross mit sætelen	si chunden miltekliche lebn
E man die richen gabe	alle da verswanch
die wider ze lande wolden	die dvhte des ze lanch
ezn wart nie geste	mere baz gepflegn
svs endet sich div hochgecit	daz wolde Gunther der degen

SVon der Sigemundes	mit gvtlichem site
sprach zv sinen heleden	tvot des ich ivch bite
nv bereit vns die moere	ia wil ich in min lant
liep was ez sime wibe	do si div mære an im ervant
Si sprach zv dem herren	sit wir von hinnen varn
daz ich so harte gahe	daz heiz ich wol bewarn
mir suln e mine bruoder	teilen mit div lant
leit was ez Sivride	do erz an Chriemh' <ervant>
Die fuorsten zv zim giengen	vn– sprachen <alle> dri
nv wizzet daz	herre Sivrit	daz iv immer si
mit <triwen> vnser dienest	bereit vnz in den tot
des neiger do den degenen	do manz im so wol erbot
Wir suln ovch mit iv teilen	sprach Giselher daz kint
lant vn– burge	die unser eigen sint
swaz der witen erbe	vns ist undertan
der svlt ir teil vil gvten	mit samt <Chriemh'> han
Zv sinen chonemagen	do der reche sprach
do er den gvten willen	an den herren sach
got laze iv iwer erbe	immer [27r]selic sin
vn– ovch die lute drinne	ia tvot div wine min
des teiles wol ze rate	den ir ir woldet gebn
da si da sol tragen chrone	vn– svln wir daz gelebn
si mvoz <werden> richer	dann iemen lebender <si>
swaz ir svs gebietet	sten ich iv dienstlichen bi
Do sprach div frowe Chriemh'	habt ir der erbe rat
vmbe Buregonden degene	ez so lihte niene stat
sine mvge ein chunich gerne	fvren in sin lant
ia sol si mit mir teilen	miner lieben bruder hant
Do sprach der herre <Gernot>	nv nim dir swen dv wil
die mit dir gerne riten	der vindestv vil
von drizech hundert rechen	so habe dir tusint man
die sin din heimgesinde	daz was ir liebe getan
Si bereite sich zir verte	als ir vil wol gezam
ir edeln ingesindes	frov Chriemh' do nam
zwo un– drizzech mægede	dar zvo funfhvndert man
Ecgewart der grave	fvr mit siner frowen dan
Vrlovp si alle namen	beide ritter vn– kneht
<mægede> vn– frowen	daz was vil michel reht
mit chvssen gescheiden	wrden si zehant
si rovmten minnekliche	do der Buregonden lant
Do beleiten si ir mage	vil verre vf den wegen
man hiezin allenthalben	ir nahtselde legn
swa si si gerne namen	dvrch der chunige lant
do wrden boten balde	dem kunige Sigemvnt gesant
daz er daz wizzen solde	vn– ovch Sigelint
daz Sivrit chomen wolde	vn– ovch frown Voten kint
Chriemh' div vil schone	von Wormez vber Rin
done kunden in div mêre	nimmer lieber gesin
Nv wol mich	sprach do Sigemvnt	daz ich gelebt han
daz hie div schone Chriemhilt	sol gechronet <stan>
des mvezen wol getivret	sin div erbe min
Sivrit der vil chuene	sol hie nv selbe voget sin
Do gap div frowe Sigelint	vil manigen samyt rot
silber vn– golt daz swêre	daz was ir botenbrot
si vrevte sich der mære	vn– mit ir manic man
allez ir gesinde	mit vlize <chleiden> sich began
Man seit ir wer da choeme	mit Sivride in daz lant
do <hiezen> si gesidele	<rihten> alzehant
dar zv er vnder chrone	vor fvrsten solde gan
do riten im engegene	des kunich Sigemundes man
Ist iemen baz enpfangen	daz ist vns vnbechant
denne die helede wrden	ze Sigemundes lant
Sigelint sin mvoter	Chriemh' engegen reit
mit maniger schonen frowen	ir volgeten ritter gemeit
in einer tageweide	da man die geste sach
die vremeden vn– dic chvnden	die dolten vngemach
vnz daz si chomen	zer burge wol bechant
riche vn– mære	div was ze Santen genant
Mitt lachendem mvnde	Sigelint vn– Sigemvnt
chusten Chriemh'	mit vrovden sa zehant
darnach ir vil liebez kint	ir leit in was benomen
allez ir gesinde	was in groz willechomen
Do brahte man die geste	fvr Segemvndes sal
die schone iuncfrowen	[27v]hvben man da zetal
nider von den moeren	da was vil manic man
do man den edeln frowen	mit vlize dienen began
Swie groz ir hochgeciten	bi Rine was bechant
noch gab man hie den heleden	richer gewant
danne si ie getrvegen	noh bi allen ir tagen
man mohte michel wnder	von ir richeite sagn
Do si in ir wirde sazen	vn– heten genvoch
waz golt varwer geren	ir ingesinde trvoch
vn– vil der edeln steine	verwieret wol dar in
svs pflag ir vlizzekliche	Sigelint div kvnigin
Do sprach vor sinen mâgen	der herre Sigemvnt
allen minen frivnden	sol daz wesn chvnt
daz Sivrit mine chrone	hinnen fvr sol tragn
div mære horten gerne	die von Niderlanden sagn
Do bevalhe er im die chrone	geriht vn– ovch div lant
sit was er ir aller meister	die er inder vant
vn– da er rihten solde	daz wart so getan
daz man von schulden vorhte	der schonen Chriemh' man
In disen hohen eren	lebt er	daz ist war
vn– riht ovch vnder chrone	vnz in daz zwelfte iar
daz div schone <Chriemh'>	einen svn gewan
daz was des kuniges magen	nach ir willen wol ergan
Den ilte man do tavfen	vn– gab im den namen
Gunther nach sinem oheim	des dorfter sich niht schamen
geriet er nach den magen	er wrde ein chvner man
man zoh in wol mit vlize	daz wart von schulden getan
In den selben citen	do starp frov Sigelint
do het den gewalt mit alle	der edeln Voten kint
der so richer frowen	ob landen wol gezam
di mohten ir do dienen	mit grozen eren ane scham
Nv het ovch dort bi Rine	so wir horen sagen
bi Gunther dem richen	einen svn getragen
Prvnhilt div schone	in Burgonden lant
dvrch des rechen liebe	so wart er Sivrit genant
Wie rehte vlizekliche	man sin hvten hiez
Gunther der vil riche	im magtzogen liez
diez chunden leren tvgende	gewhs ez zeinem man
hey waz im vngelvche	sit der mage an gewan
Mære zallen citen	wart <wider> vn– dar geseit
wie rehte wnnekliche	die helde vil gemeit
lebten zallen stvnden	in Sigemundes lant
daz selbe tet ovch Gvnther	mit sinen <magen> vz erchant
Daz lant ze Nibelunge	Sivride nv diente hie
richer siner mage	wart deheiner nie
dar zv sins vaters erbe	ein was ein degn gvot
des trvch der vil chune	deste hoher den mvot
Hort den aller meisten	den ie kunic gewan
ane die ez e pflagn	hete nv der chune man
den er vor einem berge	mit siner hant erstreit
dar vmber slvoc ze tode	vil manigen ritter gemeit
Er het den wnsch der eren	vn– wæres niht geschehn
so mvse man von <schulden>	Sivride iehn
er ware ein der beste	der ie vf ors gesaz
man vorhte sine sterche	vn– tet vil pilliche daz

Nv> daht ovch alle cite	daz Gvntheres wip
wie treit et also hohe	<Chriemhilt> den lip
nv ist doch vnser eigen	Sivrit ir man
daz er vns niht endienet	des wolde ich gerne ein ende han
Diz trvoch si in ir hercen	vn– wart doch wol verdeit
daz si ir so vremde warrn	daz was der frowen leit
daz si niht zinses hete	von des fursten lant
wa von daz chomen wære	daz het si gerne bechant
Si versvchtez manigen ende	ob chunde daz geschehn
daz si Chriemh'	mohte noch gesehn
si reitez heinliche	des si da hete mvot
done duht den chunic riche	der frowen bete niht zegvot
Wie chunden wir si bringen	sprach der lobes rich
her zvo disen landen	daz wære vnmvgelich
si sint vns gar <ze> verre	ich getar sis niht gebiten
des antwrt im Prvnh'	in vil listigen siten
Swie hohe riche wære	deheines kuniges man
swaz im gebvte sin herre	wie torster daz verlan
des ersmielte Gvnther	do si daz gesprach
ern iach sin niht ze dienste	swie dicker Sivriden sach
Si sprach	vil lieber herre	dvrch den willen min
so hilf mir daz noch Sivrit	mit der swester din
chom zv disem lande	daz wir si hie gesehn
sone chunde mir zer werlde	nimmer lieber geschehn
Diner swester gvete	vn– ir vil zvhtich <mvot>
als ih daran gedenche	wie sanfte mir daz tvot
vn– ir vil wert enpfahen	do ich chom in daz lant
ez enwart nie antphanc richer	zer welde niemen bechant
Si gertes also lange	vnz daz der chunic sprach
ir mvget mich sanfte vlegen	wand ich gerner nie gesach
deheiner slahte geste	in den landen min
ich wil in boten senden	daz si zvns komen an den Rin
Do sprach div chuniginne	nv svlt ir mir sagn
wenne ir si welt besenden	oder in welhen tagn
svln vnser frivnde	chomen in daz lant
die ir dar senden wellet	die lat werden mir bechant
Daz tvn ich	sprach do Gunther	drizech miner man
wil ich dar lazen riten	die hiezer fvr sich gan
bi den enbot er mære	in Sivrides lant
ze liebe gab in Prvnh'	vil harte zierlich gewant
Do sprach do Gvnther	ir rechen	ir svlt sagen
swaz ich bi iv enbiete	des svlt ir niht verdagen
Sivrit	mine friunde	vn– ovch die swester min
daz enchan in der <werlde>	niemen holder gesin
Vn– bite si von vns beiden	leisten ane strit
daz si chomen rvchen	zvnser hochgecit
gein disen svnewenden	sol er mit sinen man
sehen hie vil <manigen>	der im vil grozer eren gan
Sime vater Sigemunde	sagt ovch den dienest min
daz ich mit minen magen	im immer wæge sin
vn– saget ovch miner swester	daz si niht laze daz
sine chom zir frivnde	irn gezam nie hocgeciten baz
Frov Vote vn– al die <frowen>	die man [28v]ze hove vant
enbuten ovch ir dienest	in Sivrides lant
den minneklichen meiden	vn– manigem chvnem man
Gere der vil chune	sich hvop mit den <mæren> dan
Si fvren reisliche	ir pfærit vn– ir gewant
daz was in chomen allen	do rvomten si daz lant
in zovgte wol der reise	dar si da solden varn
der kunic mit geleite	bat die boten wol bewarn
Inre tagn zwelfen	si chomen in daz lant
ze Nibelunges burge	dar warn si gesant
da vunden si mit frevden	den vil chvnen degn
div ross den boten waren	mvede von den langen wegn
Dem kunige vn– sime wibe	wart zehant geseit
in wærn chomen geste	die trvgen solhiv chleit
als man zen Burgonden	do der site pflach
Chriemh' spranch von dem bette	daran si bi ir liebe lach
Si bat an ein venster	ir mægede eine gen
div sach den chunen Geren	an dem hove sten
mit sinen hergesellen	die warn dar gesant
gein ir herceleide	wie <liebiv> mare si bevant
Si sprach zv dem kvnige	ir svlt vf sten
ieh sihe den starchen Geren	her ze hove gen
in hat min brvder Gunther	wætlich her gesant
waz der reche werbe	daz het ich gerne bechant
Allez daz gesinde	dar lief vn– gie
in vil grozen vrevden	man die geste enpfie
vn– taten in daz beste	daz si chunden do
wande si ir chunfte	in ir hercen warn vro
Gere wol enpfangen	wart mit sinen man
ir ross man hiez behalten	die helde braht man dan
da der herre Sivrit	bi Chriemh' saz
si sahen in vil gerne	daz svlt ir wizzen	ane haz
Gegen den lieben gesten	si stvnden vf zehant
wol wart <enpfangen> Gere	von Buregonden lant
vn– sine hergesellen	bi der hende dan
Chriemh' fvorte Geren	daz wart dvrch liebe getan
Si bat in zvozir sizzen	er sprach	wir suln sten
erlovbet vns die boteschaft	e daz wir sizzen gen
vn– horet disiv mære	waz iv enboten hat
Gvnther vn– Prunh'	der dinc an eren hohe stat
vn waz iv iwer mvoter	min frowe	her enbot
Giselher der iunge	vn– ovch Gernot
vn– iwer besten mage	die hant vns her gesant
vn– enbietent iv ir dienest	vzer Burgonden lant
Nv lon in got	sprach Sivrit	ich getrow in allen wol
triwen vn– gvotes	also man frivnden sol
daz selbe tvot ir swester	wie <si> gehabn sich
die unsern lieben frivnde	daz sult ir lazen horen mich
Sit daz wir von in schieden	hat ieman iht getan
den minen chonemagen	daz lazet mich verstan
daz wil ich in mit triwen	immer helfen tragen
vnze daz ir viende	den minen dienest mvzen klagen
Do sprach der marcgraue	Gere	ein reche gvot
si sint in allen tvgenden	mit frevden wol gemvot
si ladent ivch ze [29r]Rine	zeiner hochgecit
wande si ivch gerne sæhen	daz ir des ane zwifel sit
Vn– bitent mine frowen	si svln mit iv chomen
swenne so der winder	ein ende habe genomen
gein disen svnewenden	so wolden si ivch sehen
do sprach der herre Sivrit	daz chunde mvelich geschehn
Do sprach aber Gere	voz Buregonden lant
iwer mvoter Vote	div hat ivch gemant
vn– iwer brveder beide	ir svlt in niht versagen
daz ir in sit so verre	daz hoere ich si vil dicke klagen
Prvnh' min vrowe	vn– alle ir magedin
die froewent sich der gegene	ob daz chunde sin
daz si ivch gesehen noch	so si des habent mvot
da dvhten disiv mære	die schonen Chriemh' gvot
Gere was ir sippe	der wirt in sizzen hiez
den gesten hiez man schenchen	niht langer man daz liez
do was ovch chomen Sigemvont	do er die boten sach
der herre minnekliche	zv den Burgonden sprach
Sit willechomen	ir <rechen>	ir Gvntheres man
sit Chriemhilde ze <man>	minen svon gewan
so solde man ivch degene	dicker bi vns sehn
ob ir vns mit triwen	woldet frivntschefte iehn
Si sprachen	swenner wolde	si solden gerne chomen
in wart ir michel mvede	mit frevden vil benomen
die boten bat man sizzen	spise man in trvoch
der wart den lieben gesten	gegebn volleklich genvoch
Man gab in herberge	vn– schvf in gvot gemach
der herre zv den gesten	minneklichen sprach
lat ivch niht betragen	darvmbe ir sit gesant
her von vnsern friunden	wir svlenz iv schiere tvon bechant
Ich mvoz mihs noch beraten	mit den <friunden> min
er gie zeiner sprache	mit den rechen sin
er sprach	min frivnt Gunther	hat nach vns gesant
zeiner hochgecite	nv ist ze verre mir sin lant
Vn– bitent mine frowen	daz si mit var
nv ratent	liebe vriunde	wie sol si chomen dar
vn– solde ich herverten	durch si in drizech lant
da mvse in gerne dienen	hin div Sivrides hant
Do sprachen sine rechen	habt ir der reise mvot
so wellen wir iv raten	daz iv wirdet gvot
ir svlt mit tvsint rechen	riten an den Rin
so mvgt ir wol mit eren	da zer hochgecite sin
Do sprach von Niderlanden	der herre Sigemvnt
welt ir zir hochgecite	wan tvot ir mir daz kunt
ob ez iv niht versmahet	so rite ich mit iv dar
vn– bringe iv hundert degene	da mit mer ich iwer schar
Sit ir welt mit uns riten	vil lieber vater min
sprach der herre Sivrit	vro sol ich des sin
inre tage zwelfen	so rvom ich miniv lant
die si do furen wolden	den gap man ross vn– ovch gewant
Do der chunic edele	der reise hete mvot
do hiez man wider riten	die snellen boten gvot
den sinen chonemagen	enbot er an den Rin
daz er gerne wolde	[29v]da zir hochgecite sin
Sivrit vn– Chriemh'	als wir horen sagen
so vil den boten gaben	daz ez niht mohten tragen
ir moere heime ze lande	er was ein richer man
ir starchen sovmære	si triben vrolichen dan
Ir volche daz <kleite> Sivrit	vn– ovch Sigemvnt
Ecgewart der graue	der hiez do an der stvnt
frowen chleider svochen	die besten die man vant
oder iemen vinden chvnde	vber allez Sivrides lant
Sætil vn– schilde	bereiten man began
rittern vn– frowen	die mit im wolden dan
den gab man swaz si wolden	wie wenich in gebrast
do brahter sinen frivnden	manigen herlichen gast
Den boten zogete sere	wider vf den wegn
do chome wol ze lande	Gere der degen
er wart vil wol enpfangen	do stvnden si zetal
nider von den moeren	fvr den Guntheres sal
Der chunic durch groze liebe	vorn dem sedele spranch
daz so snelle chomen	des bat si haben danch
Prunhilt div schone	der kunich zen boten sprach
wie vert min frivnt Sivrit	von dem mir liebes vil geschach
Do sprach der chune Gere	da wart er frevden rot
er vn– iwer swester	nie frivnden baz enbot
so frivntlicher mære	deheiner slahte man
als iv der herre Sivrit	vn– ovch sin vater hat getan
Do sprach zem marcgrauen	des edeln kuniges wip
nv sagt mir	chvmet Chriemhilt	hat noch ir schoner lip
behalten iht der zvehte	der si wol chunde pflegen
er sprach	si choment beide	vn– mit in manic <kuner> degn
Frov Vote bat do drate	die boten zvo zir gen
daz mac man an ir vrage	harte wol versten
daz si vil gerne horte	was Chriemh' noch gesunt
er sagete wie er funde	vn– daz si chome in churzer stunt
Ovch wart von in div gabe	ze hove niht verdeit
die in dort gab Sivrit	golt	<silber> vn– kleit
daz brahte man ze sehene	der drier kunige man
der ir vil grozen milte	wart in do <danchens> vil getan
Er mac wol gebn ringe	sprach Hagene der degn
ern chundez niht verswenden	vn– solt er immer lebn
hort der Nibelunge	beslozzen hat sin hant
hey solden wir den teilen	noch in Buregonden lant
Allez daz gedigene	frevte sich der zvo
daz si chomen solden	spate vn– frvo
warn vil vnmvzich	des fursten ambtman
waz richer hergesidele	man da rihten began
Ortwin vn– Sindolt	die zwene chune degn
die warn vil vnmvezich	die zit si mvosin pflegen
der trvhsezze vn– der schenche	rihten manigen banch
des hulfen ir vndertanen	des sagete in Gvnther do danch
Rvomolt der chuchenmeister	vil wol berihte sit
die sinen vndertanen	vil manigen kezzil wit
hæfene vn– pfannen	hey waz man der da vant
do bereite man den spise	die da chomen in daz lant	[30r]
Der frowen arebeiten	was ovch niht kleine
da si bereiten ir chleider	die edeln steine
mit glanze verre glesten	verwieret in daz golt
do si sie ane leiten	daz in die lute wrden holt

Alle> ir vnmvze	die lazen wir nv sin
vn– sagen iv wie Chriemh'	vn– ovch ir magedin
zer hochgecite fvoren	von Nibelunge lant
nie getrugen moere	so manic herlich gewant
Vil der leitschrine	man schicte zv den wegen
do reit mit sinen frivndin	Sivrit der degen
vn– ovch div kuniginne	vf hoher frevden wan
ir frevde mvse leider	mit grozem iamer sit zergan
Da heime si do liezen	ir beider kindelin
beliben in ir landen	daz mvos et also sin
von ir hovereise	erstunden starchiv ser
vater vn– mvoter	gesach daz kindel nimmer mer
Da mite reit der herre	der kunic Sigemunt
solder der getrowen	wie ez im nach der stunt
zer hochgecite ergienge	ern het ir niht gesehen
ia chunde im in der werlde	leider nimmer geschehen
Boten man fvr sande	die div mære sagten dar
do reit ovch in engegene	mit maniger liehten schar
vil der gvten degene	der Guntheres man
der wirt sich gegen den gesten	sere vlizen began
Er gie zv Prvnhilde	da er si sizzen vant
wie enpfie et ivch min swester	do ir chomet in daz lant
sam svlt ovch ir enpfahen	daz Sivrides wip
daz tvn ih	sprach div frowe	<daz> hat verschuldet wol ir lip
Do sprach aber Gunther	si choment vns morgen frvo
nv ir si welt enpfahen	da grifet balde zvo
daz wir ir in der buorge	niht erbiten hie
mir chom in manigen ziten	so rehte lieber geste nie
Ir meide vn– ovch ir frowen	die hiez si do zehant
svchen gvtiv chleider	die besten die man vant
die si wol mit eren	vor gesten mohten tragen
wie gern si daz tæten	daz mac man lihte gesagen
Ovch ilten in do dienen	die Guntheres man
alle sine degene	der wirt zv sich gewan
da reit div kuniginne	mit ir frowen mite
gegen den lieben gesten	al nach friuntlichem site
Mit wie getanen eren	man die geste enpfie
si dvhte daz frov Chriemh'	Prunh' nie
so rehte wol enpfienge	in Burgonden lant
die si ê niene gesahen	den wart vil hoher mvot erchant
Nv was ovch komen Sivrit	mit den sinen man
man sach die helde wenden	wider vn– dan
des veldes allenthalben	mit vngefvgen scharn
dringen vn– stovben	chunde niemen da bewarn
Do der wirt des landes	Sivriden sach
vn– ovch Sigemunden	wie gutlicher sprach
nv sit mir groze willechomen	vn– al den vriunden min
der iwer hovereise	svln wir hochgemvte sin
Nv lone iv got	sprach Sigemunt	der ere gernder man
sit daz ivch min svn Sivrit	ze friunde gewan
do rieten [30v]mine sinne	daz ich ivch solde sehn
do sprach der wirt zem gaste	nv ist mir liebe dran geschehn
Sivrit wart enpfangen	als im daz wol gezam
mit vil grozen eren	im was da niemen gram
des half mit grozen zvhten	Giselher vn– Gernot
ich wæne man ez gesten	nie so minneklich erbot
Do nahten zvo zein ander	der zweier kunige wip
da wart vil sætil lære	maniger schonen frowen lip
wart von rechen <handen>	erhaben vf daz gras
die frowen gerne dienten	waz der mit vnmuozen was
Do giengen zvo zein ander	div minneklichen wip
des was in grozen freuden	uil maniges rechen lip
daz ir beider grvzen	so schone wart getan
do sahe man vil der degene	mit zvhten bi den frowen stan
Daz herrenlich gesinde	sich uiengen bi der hant
in zvhten groze nigen	des man vil da vant
vn– chussen minnekliche	von frowen wolgetan
daz was liep ze sehene	den <kunigen> vn– ir beider man
Sine biten da niht langer	si riten zv der stat
der wirt den sinen gesten	daz wol erzeigen bat
daz man si gerne sæhe	in Buregonden lant
vil manigen pvneyz richen	man vor den iuncfrowen vant
Vzer Tronege Hagene	vn–	ovch Ortewin
daz si gewaltich wæren	daz wart da vil wol schin
swaz si gebieten wolden	daz torste niemen lan
von in wart michel dienest	den edeln gesten getan
Vil schilde hort man schellen	da zem burgetor
von stichen vn– von stozen	vil lange habt der vor
der wirt mit sinen gesten	e daz si komen drin
ia gie in div stunde	mit vil grozen vreuden hin
Fvr den palas richen	mit frevden si do riten
vil manigen pfellel spæhen	rich vn– wol gesniten
sach man vber sætele	den frowen wolgetan
allenthalben hangen	do chomen Guntheres man
Die hiezen si do fvren	balde an ir gemach
vnder wilen blichen	man Prunh' sach
an frowen Chriemh'	div schone was genvoch
ir varwe gegen dem glanze	den schin vil herlichen trvoch
Allenthalben schallen	ze <Wormez> in der stat
hort manz gesinde	der wirt den marschalch bat
Danchwart	Hagenen brvder	er solde ir selbe pflegen
do begunder daz gesinde	harte gvtliche legen
Da vze vn– oech dar inne	spisen man si lie
ez enwart deheiner geste	baz gepflegen nie
allez daz si wolden	des was man in bereit
der chunich was so riche	daz da wart niemen niht verseit
Man dient in friuntliche	vn– ane allen haz
der wirt do ze tische	mit sinnen gesten saz
do mvse sizzen Sivrit	als er ê het getan
mit im gie ze tische	vil manic wætlicher man
Einlife hundert rechen	an dem ringe sin
mit im zem ezzen sazen	Prunh' div kunigin
gedaht daz eigen holde	niht richer chunden we[31r]sen
si was im noch so wæge	daz si in gerne lie genesn
Alda der wirt mit frevden	mit sinen gesten saz
vil der richen chleider	wart von wine naz
da die schenchen solden	zv den tischen gan
da wart vil voller dienest	mit grozem willen getan
So man ze hochgeciten	lange hat gepflegen
frowen vn– meide	hiez man schone legen
von swannen si dar chomen	der wirt in willen trvoch
mit vil grozen zvhten	man gab in allen genvoch
Do div naht het ende	vn– daz der tac erschein
vz den leitschrinen	vil manic edel stein
erluht in gvter wæte	die rvorte frowen hant
do wart dar fvr geschuochet	vil manic herlich gewant
E daz ez vol ertagete	do chomen fvr den sal
vil ritter vn– knehte	do hvop sich aber schal
vor einer frvo messe	die man dem kunige sanch
da riten iunge degene	daz mans in mvse sagen danch
Lvot un– ane maze	manic pusvon erdoz
von trumben vn– floyten	wart der schal so groz
daz Wormez div vil wite	dar nach vil lvte erschal
die hochgemvten degene	zen rossen chomen vber al
Do hvop sich in dem lande	harte hoh ein spil
von manigem gvten degene	der was da harte vil
den ir tvmbiv hercen	rieten hohen mvot
der sah man vnder schilde	manigen zieren rechen gvot
In div venster sazen	div herlichen wip
vn– vil der schonen mægede	gezieret was ir lip
si sahen kurcewile	von manigem chvnem man
der wirt mit sinen degenen	selbe riten da began
Also vergie ir wile	div dvhte si niht lanc
do horte man zem tvome	vil maniger glocken chlanch
do chomen in die more	die frowen riten dan
den edeln kuniginnen	volget vil manic chune man
Si stunden vor dem mvnster	nider vf daz gras
Prunh' ir gesten	dannoch vil wæge was
si giengen vnder chrone	in daz mvnster wit
div liebe wart sit gescheiden	daz frumte groezlicher nit
Do si gehorten messe	si fuoren wider dan
mit vil grozen zvhten	man sach si sider gan
ze tische minnekliche	ir frevde nie gelach
da zer hochgecite	vnz an den einliften tac
Do gedaht div kuniginne	ine mac niht langer dagn
swie ich daz gefuge	Chriemh' mvz mir sagen
warumbe vns also lange	denn zins versezzen hat
ir man	derst unser eigen	der vrage han ich cheinen rat
Svs warte si der wile	als ez der tivfel riet
die frovde vn– ovch die hohgecit	mit iamer si do schiet
daz ir lach amme hercen	ze lieht ez mvse chomen
des wart in manigen landen	von ir iamers vil vernomen

<Vor> einer <vespercite>	man vfem hove sach
ze rossen manigen rechen	hvsir vn– dach
was allez vol durch [31v]schowen	von luten vber al
do warn ovch die frowen	zen venstern chomen in den sal
Zesamene do gesazen	die kuniginne rich
si reiten von zwein rechen	die waeren lobelich
do sprach div frowe Chriemh'	ich han einen man
daz elliv disiv riche	zvo sinen henden solden stan
Des anwtwrt ir Prunhilt	daz mohte vil wol sin
ob niemen mere enlebte	wan sin vn– din
so mohten im div riche	wol wesn vndertann
die wile aber lebt Gunther	so chundez nimmer ergan
Do sprach aber Chriemh'	nv sihstv wier stat
wie rehte herrenliche	er vor den rechen gat
alsam der liehte mane	vor den sternen stat
des mvz ich wol von schulden	tragen vrolichen mvot
Do sprach div hvsfrowe	swie wætlich si din man
swie schone vn– swie biderbe	so mvstv vor im lan
Gunthern den rechen	den edeln prvder din
der mvz vor allen kunigen	mit lobe wærliche sin
Des antwrt ir Chriemh'	so tiwer ist wol min man
daz ich in ane schulde	niht gelobet han
an vil manigen tvgenden	ist sin ere groz
gelovbestv des	Prvnh'	er ist wol Gunthers genoz
Iane soltv mir ez	Chriemhilt	zarge niht vervan
wande ich doch ane schulde	die rede niht han getan
ich hort si iehn beide	do ihs alrerste sach
vn– da des kuniges wille	am mime libe geschach
<vn–> da er mine minne	so ritterlich gewan
do iach des selbe Sivrit	er w re skuniges man
des han ich in fvr eigen	sit ihs in horte iehn
do sprach div frowe Chriemhilt	so wær mir vbel geschehn
Wie heten so geworben	die edeln bruder min
daz ich eigen mannes	wine solde sin
des wil ich dich	Prunh'	vil vriuntlichen biten
daz dv die rede lazest	mit vil minneklichen siten
Ine mag ir niht gelazen	sprach do des kuniges wip
zwiv sold ich verchiesen	so maniges rechen lip
der uns mit dem kunige	ist dienstlich undertan
mich mvete daz ich so lange	niht zinsse von im gehabt han
Dv mvst in von im verchiesen	daz er dir nimmer bi
wone deheiner dienste	er ist tivrrer danne si
Gunther minn brvder	dv solt nimmer daz gelebn
daz er dir zinss deheinen	von sinen landen mvze gebn
Dv zivhest dich ze hohe	sprach aber des kuniges wip
nv wil ich sehn gerne	ob man den dinen lip
habe ze solhen eren	als man den minen tvot
die frowen waren beide	harte zornich gemvot
Do sprach div frowe Chriemh'	daz mvz et nv geschehn
sit dv mines mannes	fvr eigen hast veriehn
nv mvozen hivte chiesen	der zweier kunige man
ob ich vor kuniges wibe	tvrre zvo der kirchen gan
Ich laze dich wol schowen	daz ich bin adel vri
min man ist verre tiwere	danne der dine si
da mite wil ich selbe	niht bescholten sin
dv mvste daz hinte chiesen	wie div eigene div din
ze hove ge vor rechen	in Buregonde [32r]lant
ich wil selbe wesn edeler	danne iemen habe bechant
deheine kuniginne	div chrone ie her getrvoch
do hvop sich vnder den frowen	grozes nides genvoch
Do sprach aber Prunh'	wiltv niht eigen sin
so mvstv dich scheiden	von den frowen min
mit dinem ingesinde	da wir zem mvnster gan
entriwen	sprach do Chriemh'	daz sol werden getan
Nv kleidet ivch	min mægede	sprach Sivrides wip
ez mvz ane schande	beliben hie min lip
ir svlt daz lazen schowen	vn– habt ir riche wat
si mac sin lovgen gerne	des Prunh' veriehn hat
Man moht in lihte raten	si svchten richiv chleit
da wart vil wol gezieret	manic frowe vn– meit
do gie mit ir <gesinde>	des edeln wirtes wip
ze wnsche wart gechleidet	der schonen Chriemh' lip
mit drin un– vierzech meiden	di brahtes an den Rin
die trugen liehte pfellel	geworht in Arabin
sus chomen zv dem munster	die meide wolgetan
in warten vor dem huose	alle Sivrides man
Die lute nam des wnder	wa von daz geschach
daz man die kuniginne	nv gescheiden sach
daz si niht bi ein ander	giengen alsam ê
da von wart manigem degene	sit vil sorchlichen we
Hie stvnt vor dem munster	daz Guntheres wip
do hete kurcewile	vil maniges rechen lip
mit den schonen frowen	der si da namen war
do chome div edel Chriemh'	mit maniger herlichen schar
Swaz kleider ie getrugen	edeler ritter kint
wider ir gesinde	was iz gar ein wint
si was so rich des gvtes	daz drizech kunige wip
niht mohten wol erzivgen	daz tet der Chriemh' lip
Ob iemen wnschen solde	der chunde niht gesagn
daz man so richer chleider	geschehe ie mer getragn
als in der wile trvogen	ir meide wolgetan
wan ze leide Prunhilde	ez hete Chriemh' verlan
Zesamne si do chomen	vor dem munster wit
ez tet div husfrowe	durch einen grozen nit
die edeln Chriemh'	hiez si stille stan
ia sol vor kuniges wibe	nimmer eigen div gegan
Do sprach div frowe Chriemh'	zornic was ir mvot
chundest noch geswigen	daz wære dir gvot
dv hast geschendet selbe	den dinen schonen lip
wie mac immer chebse	mit rehte werden chuniges wip
Wen hastv hie verchebset	sprach des kuniges wip
daz tvn ich dich	sprach Chriemh'	den dinen schonen lip
minnet erste Sivrit	min vil lieber man
ia enwas ez niht min brvoder	der dir den magetvom an gewan
War chomen dine sinne	ez was ein arger list
zwiv lieze du in minnen	sit er din eigen ist
ich hore dich	sprach Chriemh'	ane alle schulde klagn
entriwen	sprach do Privnh'	daz wil ich Gunthere sagn
Dich hat din vbermvete	sprach Chriemh'	betrogen
dv hast mich ze dienste	mit rede dich an gezogen
daz wizze in rehten triwen	ez ist mir immer leit
getriwer hein[32v]liche	wirde ich dir nimmer mer bereit
Prvnh' do weinde	Chriemh' niht langer lie
vor des kuniges wibe	inz mvnster si do gie
mit ir ingesinde	do hvop sich grozer haz
des wrden liehtiv ovgen	vil starche trvebe vn– naz
Swaz man gote gediente	oder iemen da gesanch
des duhte Prunh'	div wile gar ze lanch
<wande> ir was vil trvebe	der lip vn– al der mvot
des mvsin sit engelten	rechen chvene vn– gvot
Prvnh' mit ir frowen	gie fvr daz munster stan
si gedahte	mich mvz Chriemh'	mere horen lan
des mich so lvte <zihet>	daz <worthorte> wip
vn– hat er <sichs> gervemet	ez gat Sivride an den lip
Nv chome div <frau> Chriemh'	mit manigem chvnen man
do sprach div husvrowe	ir sult mich ez lan <verstan>
<ir> iahet min ze chebsen	daz sult ir lazen sehn
vn– sult ez hie bew ren	wa mir daz laster si geschehen
Do sprach div schone Chriemh'	ir moeht mich lazen <gan>
ich erzivgez mit dem golde	daz ich an der hende han
daz brahte mir min vriedel	do er erste bi dir gelach
nie gelebte Prunh'	deheinen leidern tach
Diz golt ich wol erchenne	ez wart mir verstoln
sprach div kuniginne	vn– ist lange mich verholn
ich chvm es an ein ende	wer mirz habe genomen
die frowen beide waren	in groz vngemvote chomen
Do sprach aber Chriemh'	ine wils niht wesn diep
dv mohtes wol gedaht han	vn– wære dir ere liep
ich	erzivgez mit dem gurtel	den ich hie vmbe han
daz ich ez niht enlivge	ia wart min Sivrit din man
Von Ninnive der siden	si den porten trvoch
von edelem gesteine	gvot was er genvoch
do den Prunh' gesach	weinen si began
daz mvse vreischen Gunther	vn– alle Buregonde man
Do sprach div kuniginne	heizet her gan
den fursten vom Rine	ich wil in horen lan
wie mich hat gehoenet	siner swester lip
si sagt hie offenliche	ich si Sivrides wip
Der kunic chome mit rechen	weinen er do sach
die sinen truetinne	wie gvtlich er sprach
saget mir	liebiv frowe	waz ist iv getan
si sprach	vil lieber herre	von schulden mvoz ich trurich stan
Von allen minen eren	mich div swester din
gerne wolde scheiden	dir sol geklaget sin
si giht	mich habe gechebset	Sivrit ir man
do sprach der kunic Gunther	so hetes vbele getan
Si treit hie minen gurtil	den ich lange han verlorn
vn– ovch min guldin vingerlin	daz ich ie wart geborn
daz mvoz mich immer riwen	dvne beredest mich
kunic	der grozen schanden	daz diene ich immer vmbe dich
Do sprach der kunic Gunther	nv lat in her gan
hat er sichs gervemet	daz sol er horen lan
oder sin mvz lovgen	der helt vz Niderlant
den Chriemh' <vriedel>	hiez man bringen sa zehant
Do der herre [33r]Sivrit	die ungemvoten sach
ern wiste niht der mære	wie balde er do sprach
waz weinent dise frowen	daz het ich gerne erchant
oder von welhen schulden	der kunic habe nach mir gesant
Do sprach der chunic Gunther	daz ist mir durch dich leit
mir hat min frowe Prunh'	ein mære hie geseit
dv habst dich des gervmet	daz dv ir schonen lip
erste habest geminnet	daz seit frowe Chriemh' din wip
Do sprach der herre Sivrit	un– hat si daz geseit
e daz ich erwinde	ez sol ir werden leit
un– wil dir daz enpfuren	vor allen dinen man
mit minen hohen eiden	daz ichs ir niht gesaget han
Do sprach der kunich von Rine	daz soltv lazen sehen
daz gerihte daz dv bivtest	vn– mac daz hie geschehn
aller valscen dinge	wil ich dich ledic lan
man hiez zvo zeime ringe	die stolzen Buregonde gan
Sivrit gein dem eide	hohe bot die hant
do sprach der kunic riche	mir ist so wol erchant
iwer groz vnschulde	ich wil ivch ledic lan
des ivch min swester zihet	daz ir des nine habt getan
Do sprach aber Sivrit	genivzet es min wip
daz si so hat betrubet	den Prunhilde lip
daz ist mir sicherlichen	ane maze leit
do sahen zvo zein ander	die guten ritter gemeit
Man sol so frowen ziehen	sprach Sivrit der degn
daz si vppekliche spruche	lazen vnder wegen
verbivt ez dime wibe	der minen tvon ich sam
ir grozen vnfvge	ich mih wærlichen scam
Mit rede was gescheiden	manic schone wip
do trvret also sere	der Prunh' lip
daz ez erbarmen mvose	die Guntheres man
do chom von Tronege Hagene	zv siner frowen gegan
Er <vragte> waz ir wære	weinende er si vant
do sagtes im div mære	er lobt ir sa zehant
daz ez erarnen mvse	der <Chriemhilde> man
oder ern wolde nimmer	dar vmbe vrolich gestan
Zv der rede chom Ortwin	vn– ovch Gernot
da die helde rieten	den Sivrides tot
dar zvo chom ovch <Giselher>	der edeln Vten kint
do er ir rede gehorte	er sprach vil gutlichen sint
Owe	ir guten knehte	warvmbe tvot ir daz
iane gediente Sivrit	nie alsolhen haz
daz er darvmbe solde	verliesen sinen lip
ia ist es harte lihte	darvmbe zvrnent div wip
Svln wir govche ziehen	sprach aber Hagene
des habent lvzzil ere	so gvte degene
daz er sich hat gervemet	der lieben frowen min
darvmbe wil ich sterben	ez enge im an daz leben sin
Do sprach der kunic Gvnther	ern hat uns niht getan
wan getriwer dienste	man sol in lebn lan
waz tovg ob wir dem degene	wærn nv gehaz
er was vns ie getriwe	vn– tet vil willechliche daz
Do sprach vzer Mezzen	der degen Ortwin
iane kan in niht gehelfen	div groze sterche sin
erlovbt mirz min [33v]herre	ez mvoz im werden leit
do heten im die degene	ane schulde widerseit
Do liezen siz beliben	spilen man do sach
hey waz man starcher schefte	vor dem munster brach
vor Sivrides wibe	alzvo dem sale dan
do wrden in vnmvote	genvge Guntheres man
Sin gevolgete niemen	niwan daz Hagene
riet alle cite	Gunther dem degene
ob Sivrit niht enlebte	so wrde in vndertan
vil der kunige lande	der helt do trvoren began
Er sprach	nv lat beliben	den mortlichen zorn
er ist uns ze selden	vn– zen eren geborn
ovch ist so grimme chvene	der vil starche man
ob er sin innen wrde	sone torst in niemen bestan
Nein ich	sprach do Hagene	ir mvgt wol stille dagn
ich kanz heinliche	wol also an getragen
daz Prunh' weinen	sol im werden leit
ia mvoz im von Hagene	immer wesn widerseit
Do sprach der kunic Gunther	wie mohte daz ergan
des antwrt im Hagene	ich wilz ivch horen lan
wir heizen boten riten	zv zvns in daz lant
widersagen offenliche	die hie niemen sin bechant
So iehet vor den gesten	daz ir vn– iwer man
wellet herverten	also daz ist getan
so lobt er in die reise	des vlivset er den lip
da man in mac verhowen	div nnære saget mir sin wip
Der kunic gevolget vbele	Hagene sinem man
vil michel vntriwe	begunden tragen an
ê iemen daz erfunde	die rechen vz erchorn
von zweier frowen bagen	wart vil der degene verlorn

<An> dem vierden morgen	zwen vn– drizzech man
sach man ze hove riten	do wart ez kunt getan
Gunther dem vil richen	im wære widerseit
von lvoge erstunden frowen	div aller grozisten leit
Vrlovp si gewnnen	si solden fvr gao
vn– iahen daz si wæren	die Livdegers man
den ê da het betwngen	div Sivrides hant
vn– in ze gisel brahte	in daz Guntheres lant
Die boten er do grvzte	vn– hiez si sizzen gan
ir einer sprach dar vnder	herre	lat uns stan
vnz wir sagn div mære	di iv enboten sint
ia habt ir ze vinde	daz wizzet	manich mvter kint
Iv widersagt <Livdegast>	vn– Livdeger
den ir da wilen tatent	div gremlichen ser
die wellent zvo ziv riten	mit her in dizze lant
do begunde zvrnen Gunther	als ob ez wære im vnbechant
Man hiez die trvgenære	zen herbergen varn
wie chunde sich Sivrit	do da vor bewarn
er oder ander iemen	daz si trugen an
daz wart sider in selben	ze grozem leide getan
Der kvnic mit sinen frivnden	rvnende gie
Hagene von Tronege	in nie gerowen lie
noch heten ez gescheiden	gnvoge skuniges man
done wolde Hagene	niedes [34r]rates abe gan
Eines tages Sivrit	si rvonende vant
do begunde vragen	der helt von Niderlant
wie get so trvrekliche	der kunic un– sine man
daz sol ich immer rechen	hat im iemen iht getan
Do sprach der kunic Gunther	mir ist von schulden leit
Livdegast un– Livdeger	di hant mir widerseit
si wellent nv offenliche	riten in min lant
do sprach der degen chuene	daz sol div Sivrides hant
wol nach iwern eren	mit vlize vnderstan
ia getvn ich den degenen	als ich han ê getan
ich gelege in wste	ir burge vn– ovch ir lant
ê daz ich erwinde	des si min hvobet iwer pfant
Ir un– iwer rechen	ir sult hie bestan
vn– lat mich zvo zin riten	mit den vn– ich hie han
daz ich iv gerne diene	daz laz ich ivch gesehn
do begunde im Gunther	darvmbe groz genade iehn
Do schicten si die reise	mit den knehten dan
Sivride un– sinen degenen	ze sehn ez was getan
do hiez er sich bereiten	die von Niderlant
die vzerwelten degene	die svhten stritlich gewant
Do sprach der herre Sifrit	min vater Sigemunt
ir svlt hie beliben	ich chvom in kurcer stvnt
git uns got gelucke	her wider an den Rin
ir sult bi dem kunige	hie vil vroliche sin
Div zeichen si an bunden	also si wolden dan
do waren da genvge	Guntheres man
dine wessen niht der mære	wa von ez was geschehn
man mohte groz gesinde	do bi Sivride sehn
Ir helm vn– ovch ir pruenne	si bvnden vf div march
do wolde von dem lande	vil manich reche starch
do gie von Tronege Hagene	da er Chriemh' vant
vn– bat im gebn vrlovp	si wolden rvmen daz lant
So wol mich	sprach do Chriemh'	daz ich ie gewan den man
der minen lieben frivnden	so tar vor gestan
also min herre Sivrit	tvot den friunden min
des mvoz ich hohes mvtes	sprach div kuniginne	sin
Vil lieber frivnt Hagene	nv gedenchet an daz
daz ich iv gerne diene	vn– nie noch wart gehaz
des <lazet> mich geniezen	an minen lieben man
ern sol des niht engelten	hab ich Prunh' iht getan
Daz hat mih sit gerowen	sprach	daz edel wip
ovch hat er so zerblowen	dar vmbe minen lip
daz ich ie beswarte	ir mit rede den mvot
daz hat vil wol errochen	der helt chune vn– gvot
Ir werdet wol gefrivnde	her nach disen tagen
Chriemh'	liebiv frowe	ia sult ir mir sagen
wie ich iv mvge gedienen	an Sifride iwerm man
daz tvon ich	frowe	gerne	baz ihs niemen gan
Ich wær alle sorge	sprach daz edel wip
daz im niemen næme	in stvrme sinen lip
ob er niht volgen wolde	siner vbermvot
so wær ovch immer sicher	der helt chuene vn– gvot
Do sprach aber Hagene	frowe	habt ir wan
ob man in mvge [34v]versenden	ir svlt mich wizzen lan
mit wie getanen listen	ich daz svel vnderstan
ich wil im zehvote	immer riten vn– gan
Si sprach	dv bist min mag	sam bin ich der din
ich bevilhe dir mit triwen	den holden wine min
daz dv mir behvtest	den minen lieben man
si seit im kundiv mære	daz bezzer wære verlan
Si sprach min man ist chvene	dar zv starch genvoch
do er den lintrachen	an dem berge slvoch
do batte sich in dem blvote	der reche vil gemeit
da von in sit in stvremen	nie dehein wafen versneit
Idoch so han ich sorge	swenner in stvrme stat
vn– vil der gereschvzze	von rechen handen gat
daz ich da verliese	den minen lieben man
hey waz ich grozzer leide	dicke vmbe minnen frivnt han
Ich meldez vf genade	vil lieber frivnt	dir
daz dv dine triwe	behaldest ane mir
da man da mach verhowen	den minen lieben man
daz laz ich dich wol hoere	dest vf genade getan
Do von <des> trachen wnden	vloz daz heize blvot
vn– sich dar inne badete	der chuene reche gvot
do gehafte im zwischen herten	ein lindenblat vil breit
da mac man in verhowen	des ist mir sorgen vil bereit
Do sprach der ungetriwe	vf daz sin gewant
nêt ir ein kleinez zeichen	mit iwer selbes hant
wa ich in svle behvten	daz ich daz mvge verstan
si wanden helt do vristen	ez was vf sinen tot getan
Si sprach	mit kleinen siden	næ ich vf sin gewant
ein tovgenlichez cruce	da sol	helt	din hant
den minen man behveten	soz an die herte gat
vn– er in starchen sturmen	vor sinen vianden stat
Daz tvn ich	sprach do Hagene	vil liebiv frowe min
do wande ovch des div frowe	ez solde ir frvom sin
da mite was verraten	der vil chune man
vrlovp nam do Hagene	do gie er vroliche dan
Daz er revarn hete	bat im sin herre sagen
mvget ir die reise wenden	so suln wir riten iagen
ich han <nv> gar div mære	wie ich in gewinnen sol
mvget ir nv daz gefuege	daz tvon ich	sprach der kunic wohl
Des kuniges ingesinde	was allez wol gemvot
ich wæn immer rechen	deheiner mer getvot
so grozer meinrete	so von im ergie
do sich an sine triwe	Chriemh' div kuniginne verlie
An dem dritten morgen	mit tvsint siner man
reit der herre Sivrit	vroeliche dan
er wande solde rechen	siner friunde leit
Hagene im reit so nahen	daz er geschowet div kleit
Als er gesach daz pilde	do schicter tovgen dan
die sagten ander mære	zwene siner man
daz vride habn solde	Guntheres lant
si het der herre Livdeger	zvo dem kunige gesant
Wie vngerne Sivrit	do hin wider reit
ern getætes kuniges uinden	eteslichiv leit
wande in vil [35r]chvme erwanden	die Guntheres man
do reit er zv dem kunige	der wirt im danchen began
Nv lon iv got des willen	frivnt Sivrit
daz ir so willechlichen	tvot des ich ivch bite
daz sol ich immer dienen	als ich von rehte sol
vor allen minen frivnden	so getrwoe ich iv wol
Nv wir der hereverte	ledic worden sin
so wil ich iagen riten	von Wormez vber den Rin
vn– wil kurcewile	zem <Otenwalde> han
iagen mit den hunden	als ich vil dicke han getan
Allen minen gesten	den sol man daz sagen
daz ich vil frvo rite	die mit mir wellen iagen
daz si sich bereiten	die hie wellen bestan
hofschen mit den frowen	da si mir liebe getan
Do sprach der herre Sivrit	in herlichem site
swenne ir iagen ritet	da wil ich gerne mite
so svlt ir mir <lihen>	einen svochman
vn– eteslichen brachen	so rite ich mit iv in den tan
Bedurfet ir niht eines	sprach der kunic zehant
ich lihiv	welt ir	viere	den wol ist bechant
der walt vn– ovch die stige	swa div tiere hine gant
die ivch vrwise	nach vns riten niht enlant
Do die vil vngetriwen	vf geleiten sinen tot
si wistenz al gemeine	Giselher vn– Gernot
wolden niht iagen riten	ine weiz durch welhen nit
daz si in niht en warenden	idoch erarneten siz sit

Gvnther> vn– Hagene	die rechen vil balt
lobten mit vntriwen	ein pirsen in den walt
mit ir scharpfen geren	si wolden iagn swin
pern vn– wisende	waz mohte kuners gesin
Da mite reit ovch Sivrit	in vrolichem site
herrenliche spise	die fvrte man in mite
zeinem kalten brunnen	namens im den lip
daz het geraten Prunh'	des kunic Guntheres wip
Do gie der degene chvne	da er Chriemh' vant
ez was nv vf gesvomet	sin edel pirsgewant
vn– ander der gesellen	si wolden vber Rin
done dorfte Chriemh'	leider nimmer gesin
Die sinen trvtinne	die chuster an den mvnt
got laze mich dich	frowe	gesehn noch gesvnt
vn– mich div dinen ovgen	mit holden magen din
soltv kurcewilen	ine mac hie heime niht gesin
Do gedahtes an div mære	sine torst ir niht gesagen
da von si Hagen <e> vragte	do begunde klagen
div edele kuniginne	daz si ie gewan den lip
do weinte ane maze	des kunen Sivrides wip
Si sprach zv dem rechen	lat iwer iagen sin
mir trovmte hinte leide	wie ivch zwei wildiv swin
iagent vber heide	da wrden blvmen rot
daz ich so sere weine	daz tvot mir armem wibe not
Ja fvrhte ich	herre Sivrit	eteslichen rat
ob man der deheinen	missedie[35v]net hat
die vns gefvgen chunnen	<eteslichen> haz
belibet	herre Sivrit	mit triwen rate ich iv daz
Er sprach	liebiv frowe	ich chum in kurcen tagn
ine weiz hie niht der uinde	die vns iht hazzes tragen
alle dine mage	sint mir gemeine holt
ovch enhan ich an den degenen	hie niht anders verscholt
Neyna	herre Sivrit	ia vurht ich dinen val
mir trovmte hinte leide	wie ob dir zetal
vielen zwene berge	ich ensach dich nimmer me
wiltv nv mir scheiden	daz tvot mir <inneklichen> we
Er vmbevie mit armen	daz tugende riche wip
mie minneklichem chussen	trvot er ir schonen lip
mit vrlovbe er <dannen>	schiet in churcer stunt
sine gesach in leider	darnach nimmer mer gesvnt
Do riten si von dannen	in einen walt
durch kurcewile willen	vil manic degen balt
riten mit dem wirte	man fvrt ovch mit in dan
vil der edeln spise	die di helede solden han
Geladen vil der rosse	chom vor in vber Rin
die den iegeren trvgen	brot un– win
vleisc vn– uische	vn– anders manigen rat
den ein kvnic so <riche>	harte billechin hat
Si hiezen herbergen	fvr den grunen walt
da si da iagn solden
 vf einen wert vil breit
do chom der herre Sivrit	daz wart dem kunige geseit
Von dem iagtgesellen	wrden gar bestan
die warte an allen enden	do sprach der chune man
Sivrit der starche	wer sol vns durch den walt
wisen vor den bergen	ir rechen chven vn– balt
Ia mvzen wir vns scheiden	sprach do Hagene
e daz wir beginnen	hie ze iagene
da bi wir bechennen	ich un– der herre min
wer <die> besten iægere	an dirre waltreise sin
Lvot vn– ovch gehvende	wir suln teilen gar
so cher ieslicher	swar er gerne var
der danne iage daz beste	des sage man im danch
do wart ir biten	niht zen herbergen lanch
Do sprach der herre Sivrit	ich han der hvnde rat
niwan einen brachen	der so genozzen hat
daz er die verte erchenne	der tyere durch den tan
do schvf der kunic Gunther	zvo zim den er <wolde> han
Do nam er einen iæger meister	einen gvten spvrhunt
er brahte den <herren>	in einer kurcen stunt
da si vil tyere funden	swaz der von legere stvnt
die eriageten die gesellen	so noh gvte iægere tunt
Swaz ir ber brache ersprancte	die sluoc mit siner hant
Sivrit der vil chvene	der helt vz Niderlant
sin ross daz livf so sere	daz ir im niht entran
daz lop an dem geiægede	er vor in allen da gewan
Er was an allen dingen	biderbe genvoch
sin tyere <was> daz erste	daz er ze tode sluoch
ein vil starchez halpfwol	mit der sinen hant
dar nach er harte schiere	einen grimmen lewen vant
Do der wart ersprenget	den [36r]schoz er mit dem bogen
eine scharpfe stralen	het er dar in gezogen
der lewe lief nach dem schuzze	wan drier sprunge lanch
die sinen iagtgesellen	die sagten Sivride danch
Darnach slvger schiere	einen wisent vn– elch
starcher vore viere	un– einen grimmen schelch
sin ross trvg in so <balde>	daz ir im niht entran
hirz oder hinden	chund im wenic iht engan
Einen ebyr grozen	den sach der spurehvnt
als er begunde vliehen	do chom an der stvnt
des selben geiægedes meister	der bestunt in vf der sla
daz swin vil zornikliche	lief an den chunen rechen sa
Do slvg in mit dem swerte	der Chriemh' man
ez hete ein ander iægere	so sanfte niht getan
do er in het ervellet	man vie den spurehunt
do wart sin iagt daz riche	wol den Buregonden kunt
Do sprachen sine iægere	magez mit hulden wesn
so lat uns	herre Sivrit	der tyer ein teil genesn
ir tvot uns <hivte> lære	den berch un– ovch den walt
des begunde smielen	der degn chune vn– balt
Do hortens allenthalben	lvdem un– doz
von lvten vn– ovch von hunden	der schal was so groz
daz in da von antwrte	berge vn– ovch der tan
vier vn– drizzech rvore	die iægere heten verlan
Do mvse vil der tyere	verliesen da daz lebn
do wanden si <daz> fvegen	daz man in mvste geben
den pris an dem geiægede	des enchunde niht geschehn
do der starche Sivrit	wart zer	viwerstete gesehn
Daz pirsen was ergangen	vn– idoch niht gar
die zem viwer wolden	di brahten mit in dar
vil maniger hande tyere	vn– wildes genvoch
hey waz man des zer chuchen	des kuniges ingesinde trvoch
Do hiez der kunic kuonden	den iægern voz erchorn
daz er enbizen wolde	do wart vil lvot ein horn
zeiner stunt geblasen	da mit in wart erchant
daz man den fursten edele	da zen herbergen vant
Ein Sivrides iægere	sprach	ich han vernomen
von eines hornes duzze	daz wir nv suln chomen
zv den herbergen	antwrten ich des wil
do wart nach den iægeren	gevraget blasende vil
Do sprach der herre Sivrit	nv rvomen ovch wir den tan
sin ros daz truogin ebene	si ilten mit im dan
si ersprancten mit ir scalle	ein tyer vil gremilich
daz was ein ber wilde	do sprach der degn hinder sich
Welt ir uns hergesellen	kurcewile wern
den brachen sult ir lazen	ia sih ich einen bern
der sol zen herbergen	mit uns hinnen varn
swie vbel er gebare	ern chan sihs nimmer bewarn
Der brache wart verlazen	der ber spranch von dan
do <wolde> in erriten	der Chriemh' man
er chom in ein gevelle	done chundes niht wesn
daz starche tyer do wande	vor dem iægere genesn
Do spranch von sinem [36v]rosse	der stolze ritter gvot
er begunde laufen sere	daz tyere was vnbehvot
ez enchunde im niht entrinnen	do vienger ez zehant
ane aller slahte wnden	der helt ez schiere gebant
Chrazzen noch gebizen	chundez niht den man
er bandez zvo dem satele	gewalteklichen dan
braht erz an die fivrstat	durch sinen hohen mvot
zeiner kurcewile	der reche kvene vn– gvot
Wie rehte weigerliche	er zen herbergen reit
sin gere was vil michel	starch vn– breit
im hienge en–n starchez waffen	nider an den sporn
von vil rotem golde	fvrter ein herlichez horn
Von bezzerm birsgewæte	gehort ir nie gesagen
einen roch von swarzem pfellel	den sah man in tragen
un– einen hvot von zobele	der riche was genvoch
hey waz er gvter porten	an sinem chochære trvoch
Ein hvot von einem pantel	dar vber was gezogn
durch richeite vn– durch sveze	ovch fvrter einen bogn
den man ziehen mvse	mit antwerche dan
der in spannen solde	ern hete iz selbe getan
Von einer lvdemes hvte	was allez sin gewant
von hovpte vnz an daz ende	gestrvete man drvfe vant
vz der liehten rvhe	vil manic goldes zein
ze beiden sinen siten	<dem> kuonin iægermeister schein
Ovch furter Palmvngen	ein ziere wafen breit
so starch un– ovch so scherpfe	wie vreislich ez sneit
swa man ez slvoch vf helme	sin ecke warn gvot
der hereliche iægere	der was vil hohgemvot
Sit daz ich ivch der mære	gar bescheiden sol
im was sin gvot chocher	vil gvoter stralen vol
mit guldinnen tullen	div sahs wol spannen breit
ez mvse bald ersterbn	swaz er mit schiezen versneit
Do reit der ritter edele	vil weidenlichen dan
in sahen zvo zin chumende	die Guntheres man
si liefen im engegene	vn– enpfiengen im daz march
do fvrter bi dem satele	einen bern groz vn– starch
Als er gestvnt von rosse	do loster im div bant
von fvezen vnt von munde	do erlutte da zehant
vil groze daz gehunde	swaz des den bern sach
daz tyer ze walde wolde	die lvte heten vngemach
Der ber von <dem> schalle	durch die chvchen geriet
hey waz er chuchenknehte	von dem fivre schiet
vil chezzil wart gervret	zerfvret manic brant
hey waz man gvter spise	in der aschen ligen vant
Do sprungen von dem sedele	die herren vn– ir man
der ber begunde zvrnen	der kunic hiez do lan
allez daz gehunde	daz an seilen lach
wær iz wol verendet	si heten vrolichen tach
Mit bogen vn– mit spiezen	niht langer man daz lie
do liefen dar die snellen	da der ber gie
so vil was der hvnde	daz da niemen schoz
von dem <gro> [37r]schalle	beidiv berch vn– walt erdoz
Der ber begunde vliehen	vor den hunden dan
im enchunde niht gevolgen	wan Chriemh' man
der erliefen mit <dem> swerte	ze tode er in do slvoch
hin wider zv der chuochen	man den bern sider trvoch
Do sprachen die daz sahen	er wær ein chreftic man
die stolzen iagtgesellen	hiez man zen tischen gan
vf einen schonen anger	saz ir da genvoc
waz man do richer spise	den iagtgesellen dar trvoc
Die schenchen chomen seine	die tragen solden win
ez enchunde baz gedienet	nimmer heleden sin
heten si dar vnder	niht so valschen mvot
so wæren wol die degene	vor allen schanden behvot
Done hete nilnt der sinne	der chuene veige man
daz er sich ir untriwe	chunde han verstan
er was in ganzen tugenden	alles <valsches> bloz
sins sterbes mvose engelten	sit der sin nie niht genoz
Do sprach der herre Sivrit	wnder mich des hat
sit man vns von der chuchen	git so manigen rat
durch waz uns die schenchen	bringen niht den win
man enpflege baz der iægere	ine wil niht iagtgeselle sin
Ich hete wol gedienet	daz man min næme war
der chunic ob dem tische	sprach in valsche dar
man solz iv gerne bvzen	swes wir gebresten han
wir sin von Hagene schulde	hivt ane trinchen bestan
Do sprach der von Tronege	vil lieber herre min
ich wande daz diz pirsen	hivte solde sin
da zem Spehtsharte	den win den sande ich dar
sin wir hie vngetrunchen	wie wol ihz immer mer bewar
Do sprach der herre Sivrit	ir lip der habe vndanc
man solde mir siben savme	win un– luttertranc
habn her gefveret	do des niht mohte sin
do solde man vns naher	han gesidelt an den Rin
Do sprach aber Hagene	ir edeln ritter balt
ich weiz hie vil nahen	einen brunnen	der ist chalt
daz ir niht enzvrnet	da svln wir hine gan
der rat wart manigem degene	ze grozen sorgen getan
Den helt von Niderlanden	dwanch des durstes not
den tische er deste ziter	rvchen dan gebot
er wolde fvr die berge	zv dem brunnen gan
do was der rat mit meine	von den degenen getan
Div tyer man hiez vf wægenen	fveren in daz lant
div da verhowen hete	div Sivrides hant
man iah im grozer eren	swer ez ie gesach
Gunther sine triwe	vaste an Sivride brach
Do si dannen wolden	zvo der linden breit
do sprach aber Hagene	mir ist dicke daz geseit
daz niht gevolgen chunne	dem Chriemh' man
swenner wolde gahen	hey wolde vns daz sehn lan
Do sprach von Niderlanden	der herre Sivrit
ir mvgt ez wol <versvchen>	welt ir mir lovfen mite
ze wette zv dem brunnen	so daz si getan
der sol han [37v]gewnnen	den man siht ze vorderst stan
Nv welle ovch wirz versvochen	sprach Hagene der degn
do sprach der starche Sivrit	so wil ich mich legn
fvr die iwern fveze	nider an daz gras
do Gunther daz gehorte	hey wie lieb im daz was
Do sprach der degn chvne	ich wil iv mære sagn
allez min gewæte	wil ich an mir tragn
den ger zv dem schilte	vn– al min pirsgewant
den chocher zvo dem swerte	vil schier er vmbe gebant
Do zvgen si div chleider	von dem libe dan
in zwein wizen hemeden	sach man si beide stan
sam zwei wildiv pantel	si liefen durch dcn kle
doch sah man bi dem brunnen	den snellen Sivriden ê
Den pris an allen dingen	trvger vor manigem man
daz swert er loste balde	den chocher leit er dan
sinen ger den starchen	leinter an der linden ast
bi des prunnen vlvozze	stunt der herliche gast
Di Sivrides tugende	warn harte groz
den schilt leit er nidere	al da der brunne vloz
swie harte so in durste	der helt doch niene tranch
e daz der kunic choeme	daz dvhte Sivriden lanch
Der brunne was vil chvele	lutter un– gvot
Gunther sich do legete	nider zv der flvot
daz wazzer mit dem munde	er von der flvote nam
si gedahten daz ovch Sivrit	nach im mvese tvon alsam
Do engalt er siner zvehte	den bogen vn– daz swert
daz trvog allez Hagene	von im dane wert
do spranger hin widere	da er den ger da vant
er sach nach eime cruce	an des kuniges gewant
Da der herre Sivrit	ob dem brunnen tranch
er schoz <in> durch daz chruce	daz vz der wnden spranc
daz blvt im von dem hercen	an die Hagenen wat
so groze missewende	ein helt nv nimmer mer begat
Den ger gegen dem hercen	stechen er im lie
also angestlichen	ze flvhten Hagene nie
gelief noch in der werlde	vor decheinem man
do sich der herre Sivrit	der starchen wnden versan
der reche tobliche	von dem brunnen spranch
im ragete von dem hercen	ein gerstange lanch
der fvrste wande vinden	bogen oder swert
so mvse wesn Hagene	nach sime dienste gewert
Do der sere wnde	des swertes niht envant
done het et er niht mere	wan des schildes rant
den zvhter von dem brunnen	do lief er Hagenen an
done chunde im niht entrinnen	der vil vngetriwe man
Swie wnt er was zem tode	so chrefteklich er slvoc
daz vzer dem schilde	dræte genvoc
des edeln gesteines	der schilt vil gar zebrast
sich hete gerne errochen	der vil herlich gast
Hagene mvse vallen	von siner hant zetal
von des slages chrefte	der wert vil lvte erhal
het er daz swert enhende	so wær ez Hagenen tot
der helt en[38r]tran vil chvme	vz der <angestlichen> not
Sin chraft was im geswichen	ern kunde niht gestan
sines libes sterche	div mvse gar zergan
wander des todes zeichen	bi liehter varwe truoc
sit wart er beweinet	von schoenen vrowen genvoc
Do uiel in die blvomen	der Chriemh' man
daz blvot von sinen wnden	sach man vaste gan
do begvnder schelten	des twanch in michel not
die vfin geraten	heten den ungetriwen tot
Do sprach der sere wnde	ia	ir vil bose zagn
waz hilfet mich min dienest	daz ir mich habt erslagen
ich was <iv> ie getriwe	des ich engolten han
ir habt an iwern magen	leider vbel getan
Die sint da von bescholten	swaz ir wirt geborn
her nach disen ziten	ia habt ir iwern zorn
vil vbele gerochen	an dem libe min
mit laster ir gescheiden	svlt von gvten <rechen> sin
Die lvte liefen alle	da er reslagen lac
ez was ir genvgen	ein frevdeloser tac
die iht triwe heten	von den wart er bekleit
daz het wol gedienet	der ritter chn vn– gemeit
Der kunic von Burgonden	klagete sinen tot
do sprach der verchwnde	daz ist ane not
daz der nach schaden weinet	der in da hat getan
der dienit michel schelten	ez wære bezzer verlan
Do sprach der grimme Hagene	iane weiz ich waz er kleit
ez hat nv allez ende	vnser sorge vn– vnser leit
wir vinden ir vil kleine	die turren vns bestan
wol mich deich siner herschaft	han ze rate getan
Ir mvgt ivch lihte rvemen	sprach do Sivrit
het ich an iv erchennet	den mortlichen sit
ich hete wol behalten	vor iv minen lip
mich enriwet niht so sere	so froe Chriemh' min wip
Nv mvze got erbarnnen	deich ie gewan den <svn>
dem solch itewizen	sol nach den ziten tvon
daz siner mage iemen	mit morde habn erslagn
moht ich	so sprach Sivrit	daz solt ich billiche klagn
Zer werlde wart nie mere	grozer mort began
sprach er zvo dem kunige	denne an mir ist getan
ich behielt iv lib vn– ere	in angestlicher not
ich hans engolten sere	daz ihz iv ie so wol erbot
Do sprach vil seneliche	der verchwnde man
welt ir	kunic riche	triwen iht began
in der werlt an iemen	lat iv bevolhen sin
vf triwe un– vf genade	di lieben truttinne min
Vn– lat si des geniezen	daz si iv swester si
durch aller fursten tvgende	wont ir mit triwen bi
mir mvzen warten lange	min vater vn– mine man
ez enwart nie frowen mere	an frivnde leider getan
Er rampf sich bitterliche	als im div not gebot
vn– sprach do iæmirliche	der mortlich tot
mag ivch wol geriwen	her nach disen tagen
gelovbt [38v]an rehten triwen	daz ir ivch selben habt erslagn
Die blumen allenthalben	von blvote warn naz
do ranger mit dem tode	vnlange tet er daz
wande in des todes wafen	al ze sere sneit
do mohte reden niht mere	der reche chven un– gemeit
Do die herren sahen	daz der helt was tot
si leiten in vf einen schilt	der was von golde rot
vn– wrden des ze rate	wie daz solde ergan
daz man iz verhêle	daz iz het Hagene getan
Do sprachen ir genvoge	vns ist vbele geschehn
ir sult ez heln alle	vn– svlt geliche iehn
da er rite iagn eine	der Chriemh' man
in slvgen schachære	da er fvre durch den tan
Do sprach der ungetriwe	ich fvren n–n daz lant
mir ist vil vnmære	vn– wirt ez ir bechant
div so hat getrubet	miner frowen mvot
ez ahtet mih vil ringe	swaz si weinens getvot
Von dem selben brunnen	da Sivrit wart erslagen
sult ir div rehten mære	von mir hoern sagn
vor dem Otenwalde	ein dorf lit	Otenhaim
da vliuzet noch der brunne	des ist zwifel dehein

<Do> erbiten si der nahte	vn– fvren vber Rin
von heleden chunde nimmer	wirs geiaget sin
ein tyer daz si da slugen	daz weinten edeliv kint
ia mvsin sin engelten	vil gvte wigande sint
Von grozer vbermvete	mvgt ir nv horen sagn
vn– von starcher rache	do hiez Hagen tragn
Sivride den herren	von Nibelunge lant
fvr eine kemenaten	da man Chriemh' vant
Er hiez in also toten	legn an die tvr
daz si in da solde vinden	so si der gienge fvr
hin zer mettine	e daz ez wrde tac
der div frowe Chriemh'	deheine selten verlac
Man lvote da zem munster	nach gewonheit
do wachte div frowe	vor ir manige meit
si bat ir balde bringen	lieht un– ir gewant
do chom ein kamerære	da er Sivriden vant
Er sach in blvtes roten	sin wat was elliv naz
daz ez sin herre wære	niht enwesser daz
hin zer kemenaten	daz lieht trvog an der hant
von dem vil leider mære	sit vroe Chriemhilt ervant
Do si mit ir frowen	zem munster wolde gan
do sprach der kamerære	ia sult ir stille stan
ez lit vor dem gademe	ein ritter tot erslagn
da begunde Chriemh'	harte vnmæzliche klagn
E daz si reht erfunde	daz ez wære ir man
an die Hagenen vrage	denchen si began
wier in wolde vristen	do wart ir erste leit
ir was alle ir freuden	mit sime tode widerseit
Do seich si zv der erden	daz si niht ensprach
die schonen frev[39r]delosen	ligen man do sach
der edeln frowen iamer	wart unmazen groz
do erschre si nach unchrefte	daz al div kemenate erdoz
Do sprach ir gesinde	waz ob ez ist ein gast
daz blvot ir vzem munde	von hercen iamer brast
si sprach	ez ist Sivrit	der min vil lieber man
ez hat geraten Prunh'	daz ez hat Hagene getan
Div frowe bat sich wisen	da si den rechen vant
si hvop sin schone hovbet	mit ir wizen hant
swie rot er was von blvote	si het in schier bechant
do was missevarwe	des chunen degenes gewant
Do rief vil iæmerliche	div kuniginne milt
owe mir miner leide	nvne ist dir din schilt
mit swerten niht verhowen	dv list ermorderot
vn– wesse ich wer daz tæte	ich riet im immer sinen tot
Allez ir gesinde	chlagt un– schre
mit ir vil lieben frowen	wande in starche we
vmbe ir vil edeln herren	den si da heten verlorn
do het gerochen Hagene	harte Prunh' zorn
Do sprach div iamerhafte	man sol hin gan
vn– wechen	die Sivrides man
vn– sol ovch Sigemunde	disiv mære sagen
ob er mir helfen welle	den herren Sivriden chlagen
Do lief ein bote balde	da er ligen vant
die Sivrides helede	von Nibelunge lant
mit disen leiden mæren	wachter manigen man
die sprungen ane sinne	vil balde von ir betten dan
Ovch kom der bote <schiere>	da der kunic lac
Sigemunt der herre	der slafes niht enpflac
ich wæn sin herce im sagete	daz im da was geschehn
ern mohte sinen lieben svon	lebnden nimmer me gesehn
Wachet	herre Sigemunt	wande ir svlt balde gan
ze Chriemh' miner frowen	der ist ein leit getan
daz ir vor allen leiden	an ir herce gat
daz sult ir klagen helfeo	wandez ivch sere bestat
Vf rihte sich do Sigemunt	er sprach	<waz> sint div leit
der schonen Chriemh'	di dv mir hast geseit
der bote sprach mit iamer	si mvoz von schulden chlagen
ia ist von Niderlanden	der chuone Sivrit erslagn
Do sprach der herre Sigemvnt	lat daz schimpfen sin
vn– also bosiv mære	von dem svne min
daz ir daz saget iemen	daz er si erslagn
wande ich en chunde in nimmer	vnz an min ende verklagn
Vn– welt ir niht gelovben	daz ir mich hoeret sagn
ir mvegt wol selbe hoeren	Chriemh' klagn
vn– allez ir gesinde	den Sivrides tot
vil sere erschrach do Sigemunt	des gie im groezliche not
Mit hundert sinen mannen	er von den betten spranch
si zvchten zv den handen	div scharpfen wafen lanch
si liefen zvo dem wofe	vil seneliche dan
do chomen tusint rechen	des chunen Sivri[39v]des man
Do si so iamerliche	die frowen horten chlagn
do wande sumeliche	si solden chleider tragn
iane mohten si der sinne	vor leide niht gehabn
in was vil starchiv swêre	in ir hercen begrabn
Do chom der kunic Sigemunt	da er Chriemh' vant
er sprach	owe der reise	her in <ditzce> lant
wer hat mich mines kindes	vn– ivch iwers man
bi so guoten friunden	vergebne ane getan
Hey solde ich den bechennen	sprach daz edel wip
holt enwrde im nimmer	min herce vn– ovch der lip
ich getæt im als leide	daz die mage sin
mit iamer mvesen weinen	daz wizzet	von den schulden min
Sigemvnt mit armen	den fursten vmbesloz
do wart von sinen frivnden	der iamer also groz
daz von dem starchen wofe	palas un– sal
vn– ovch div stat ze Wormz	von ir weinen erschal
Done chunde niemen trosten	daz Sivrides wip
man zoch vz den chleidern	den sinen schonen lip
den edeln kunich riche	si leiten vf den re
do was von grozem iamer	sinen luten allen we
Do sprachen sine rechen	von Nibelunge lant
in sol immer rechen	mit willen unser hant
er ist in dirre burege	der iz da hat getan
do ilten nach gewefen	alle Sivrides man
Die vz erwelten rechen	mit schilden chomen dar
einlief hundert rechen	die het an siner schar
Sigemunt der herre	den Sivrides tot
den wolde gerne rechen	des gie im wærliche not
Sine wessen wen si solden	mit strite bestan
sine tætenz Gunther	vn– sine man
mit den der herre Sivrit	an daz geiægede reit
Chriemh' si sach gewafent	do was ir grozliche leit
Swie starch ir iamer wære	vn– swie groz ir not
do vorhte si so sere	der Nibelunget tot
von Gunthers mannen	daz si ez vnderstunt
si warnt si guotliche	so frivnt noch liebe frivnde tvont
Do rief div iamers riche	min her Sigemunt
wes welt ir beginnen	iv enist niht rehte chunt
ez hat der chunich Gunther	so manigen chunen man
ir sit verlorn alle	welt ir mit strite si bestan
Mit vf erburten schilden	ze strite was in not
Chriemh' div frowe	bat vn– ovch gebot
daz siz niden solden	die rechen vil gemeit
ob siz niht wenden chunde	daz wære ir bedenthalben leit
Si sprach	herre Sigemunt	ir svlt iz lazen stan
vnz iz sich baz gefvege	so wil ich minen man
immer mit iv rechen	der mir in hat benomen
wirde ich des bewiset	ich sol im schædeliche komen
Ez ist der vbermveten	hie bi Rine vil
da von ich iv des strites	raten niene wil
si habent wider einen	ie wol drizzech man	[4or]
nv laz in got gelinngen	als si an vns gedienet han
Ir sult hie beliben	vn– dolt mit mir div leit
so ez tagen beginne	ir helde vil gemeit
so helfet mir besarchen	den minen lieben man
do sprachen die degene	daz sol werden getan
Nvne chuondiv niemen	daz wnder wol gesagn
von rittern vn– frowen	wie man die horte klagn
do wart man des wofes	in der stete gewar
vil der burgære	dic chomen gahende dar
Si klagten mit den gesten	wande in was starche leit
die Sivrides schulde	in niemen het geseit
wa von der edele reche	verlvr den sinen lip
do weinten mit den frowen	der gvten chavflvte wip
Smide hiez man gahen	bewrchen einen sarch
von edelm mærmelsteine	vil michel vn– starch
man hiez in vaste binden	mit gespenge gvot
do was al den lvten	harte trurich der mvot
Div naht div was zergangen	man sagt iz wolde tagen
do bat div edele frowe	zv dem mvnster tragen
den vil edeln toten	ir vil lieben man
swaz er da frivnde hete	die sah man weinende gan
Do man in zem <munster> brahte	vil der glocken chlanc
man horte von den pfaffen	vil michel gesanc
do chom der chunic Gunther	mit den sinen man
mit im der grimme Hagene	zv dem wofe gegan
Er sprach	vil liebiv swester	owe der laide din
daz wir der starchen leide	niht mohten vber sin
wir mvzen klagn immer	den sinen schonen lip
daz tvot ir ane schulde	sprach do daz iamerhafte wip
Wær iv dar vmbe leide	sone wær es niht geschehn
ir hetet min vergezzen	des mage ich wol nv iehn
da ich da wart gescheiden	von mime lieben man
daz wolde got von himele	wær ez mir selber getan
Dir ist von minen lvten	leides niht geschehen
sprach der kunic Gunther	des wil ich dir veriehn
die wellen sin vnschuldich	die heizet naher gen
sprach si	zvo der bare	daz wir die warheit versten
Daz ist ein michel wnder	vil dicke ez noch geschiht
swa man den mortmeilen	bi dem toten siht
so blvtent im die wnden	als ovch da geschach
da von man die sculde	da ze Hagene gesach
Die wnden vluzzen sere	also si taten ê
die ê da sere chlageten	des wart nv michel me
do sprach der kunich Gunther	ich wilz ivch wizzen lan
in slvgen schachære	Hagene hat es niht getan
Si sprach	die selben schachman	sint mir wol bechant
got laz iz noch errechen	siner friunde hant
Gunther vn– Hagene	ia habt ir ez getan
die Sivrides rechen	heten do ze strite wan	[4ov]
Do sprach aber Chriemh'	nv dolt mit mir die not
do chomen dise beide	da si in funden tot
Gernot ir bruder	vn– Giselher daz kint
in triwen si in chlageten	mit den anderen sint
Si weinten innekliche	den Chriemh' man
man solde messe singin	zvo dem munster dan
giengen allenthalben	man	<wip> unt kint
die sin doch lihte enbaren	die weinten Sivriden sint
Gernot vn– Giselher	sprachen	swester min
nv troste dich nach tode	als ez doch mvoz nvo sin
wir wellens dich ergezzen	die wil unt wir gelebn
done chunde ir trost decheinen	zer werlde niemen gegebn
Sin sarch der was bereitet	vmben mitten tac
man hvb in von der bare	da er vof lac
noch enwolde si den rechen	lazen niht begraben
des mvsen al die lvte	vil michel arebeite habn
In einen richen pfellel	man den toten want
ich wæne man da iemen	ane weinen vant
do chlagete hercenliche	Vote	ein edel wip
vn– allez ir gesinde	den sinen wætlichen lip
Do man daz gehorte	daz man zem munster sanc
vn– in gesarchet hete	vil groz wart der gedranc
durch willen siner sele	waz opfers rnan do truoch
er hete bi den vinden	gvoter frivnde doch genvoch
Do man da gote gediente	daz volch hvop sich von dan
do sprach div kuniginne	irn svlt niht eine lan
mich hinte bewachen	den voz erwelten degn
ist an sime libe	al min frevde gelegn
Dri tage un– dri nahte	wil ich in lazen stan
vnz ich mich wol geniete	mins vil lieben man
waz ob daz got gebivtet	daz mich ovch nimt der tot
so wære wol verendet	min armer <Chriemhilde> not
Zen herbergen giengen	die lvte von der stat
pfaffen un– mveniche	si beliben bat
un– allez sin gesinde	daz sin von rehte pflac
si heten naht vil arge	vn– ovch vil mvelichen tac
Ane ezzen vn– ane trinchen	beleip da manic man
die ez nemen wolden	den wart daz chunt getan
man gæb es in den vollen	daz schvof Sigemunt
do was den Nibelungen	michel arebeiten chunt
Die drîe tagecite	so wir horn sagn
di da singen <chunden>	da si mvsn tragen
vil michel arebeite	durch ir hercen ser
si baten vmbe die sele	des rechen chven vn– her
Vrbor vf der erden	div teiltes in div lant
swa so man div chloster	un– gvte lvte vant
ovch hiez si gebn den armen	der sinen habe genvoch
si tet dem wol geliche	daz si im holden willen trvoch
An dern dritten morgen	ze rehter messe cît
so was bi dem munster	der chirchof also wit
von den lantlvten	weinens harte vol
si dienten im nach tode	als man lieben frivnden sol
In den tagen vieren	ist uns [41r]gesagt daz
ze drizzech tusint marchen	oder dannoch baz
wart durch sine sele	den armen da gegebn
do was gelegn ringe	sin groziv <schoene> vn– ovch sin lebn
Do gote wart da gedienet	vn– daz man da gesanch
mit ungefugem leide	vil des volches ranch
man hiez in vz dem munster	zv dem grabe tragn
die sin doch liht enbaren	die sah man weinen vn– klagn
Vil lvote schriende	daz volch gie mit im dan
vro enwas da niemen	weder wip noch man
ê er begrabn wrde	man sanch un– las
hey waz der wisen pfaffen	bi siner bivilde was
E daz zem grabe choeme	daz Sivrides wip
do ranch mit solhem iamer	der ir getriwer lip
daz man si mit wazzer	vil diche da begoz
ez was ir ungemvete	hart vnmæzlich groz
Ez was ein michel wnder	daz si ie genas
mit klage ir helfende	vil manic frowe was
do sprach div kuniginne	ir Sivrides man
ir sult durch iwer triwe	dise genade an mir began
Lat mir nach mime leide	daz chleine liep geschehn
daz ich sin schone hovbt	noch eines mvze sehn
do bat sis also lange	mit iamers siten starch
daz man wider vf brechen	mvose den herlichen sarch
Do brahte man die frowen	da si in ligen vant
si hvop sin schoene hovbet	mit ir wizen hant
do chustes also toten	den edeln ritter gvot
ir vil liehten ovgen	vor leide weinten do blvot
Ein iæmerlichez scheiden	wart do da getan
man trvoch die frowen dannen	sine mohte niht gegan
do lac in unsinne	daz herliche wip
vor leide moht ersterben	der ir vil wnnekliche lip
Do marn den edeln herren	hete nv begrabn
leit ane maze	sah man die alle habn
die mit im chomen waren	von Nibelunge lant
vil selten wol gemvten	man do Sigemunden vant
Do was der etelicher	der drier tage lanc
vor dem starchen leide	niht az noch entranch
doch enmohten si dem libe	so gar geswichen niht
si nerten sich nach iamer	so noch genvogen geschiht
Chriemh' unversunnen	in vnchreften lac
den tac un– den abent	vnz an den andern tac
swaz iemen sprechen chvnde	daz was ir gar vnchunt
in den selben noeten	lage ovch der kunich Sigemunt
Vil chume wart der herre	wider ze sinnen braht
von dem starchen leide	chranch was gar sin maht
daz enwas niht wnder	do sprachen sine man
herre	ir sult ze lande	wir mugen niht langer hie bestan

<Do> brahte man den herren	da er Chriemh' vant
er sprach zer kvniginne	wir svln in vnser lant
wir wæn vnmære geste	hie ze Rinne sin
min vil liebiv frowe	nv vart ir zv den landen min
Sit daz vns untriwe	ane hat getan
hie in disen landen	des ivren edeln man
des ensvlt ir niht engelten	ich wil iv wæge sin
durch mins svns liebe	des svlt ir gar ane angest sin
Ir svlt ovch haben	frowe	allen den gewalt
den iv e tet kunde	der chuone degn balt
daz lant vn– ovch die chrone	daz si iv vndertan
iv svln gerne dienen	alle Sivrides man
Do sagte man den knehten	si solden riten dan
do wart ein michel gahen	nah rossen getan
bi ir starchen uinden	was in ze wesen leit
der frowen un– ir mægeden	hiez man svchen div kleit
Do der kunic Sigemunt	wolde sin geriten
do begunden Chriemh'	ir besten frivnde biten
daz si bi ir frivnden	solde da bestan
do sprach div kuniginne	daz chunde mvlich ergan
Wie moht ich den mit ovgen	immer an gesehn
von dem mir armem wibe	so leide ist geschehn
do sprach ir bruder Giselher	vil liebiv swester min
dv solt durch dine triwe	hie bi diner mvoter sin
Die dir <da> hant betrvbet	den lip un– ovch den mvot
der bedarfstv vil chleine.	zer min eines gvot
si sprach zvo dem degene	wie chunde daz geschehn
vor leide mves ich sterben	swenne ich Hagenen solde sehn
Des tvon ich dir ze rate	vil liebiv swester min
dv solt bi dinen brvder	Giselhere sin
ich wil dich ergezzen	dines mannes tot
do sprach div kuniginne	des wær mir armen wibe not
Do ez ir der iunge	so gvotlich erbot
si begunden vlegen	Vote vn– Gernot
vn– ir getriwen mage	si baten da bestan
si hete luzzil frivnde	bi den Sivrides man
Si simt iv alle fremede	so sprach Gernot
niemen lebt so starcher	ern mvze ligen tot
daz bedenchet	swester	vn– getrostet ivren mvot
belibet bi den friunden	ez wirt iv wærlichen gvot
Do lobte si ir magen	si wolde da bestan
div ross bereitet warn	den Sigemundes man
also si wolden riten	heim in Niderlant
si heten vf gesovmet	al der rechen gewant
Do gie der herre Sigemvnt	zv Chriemh' stan
er sprach zv der frowen	die Sivrides man
iv wartent bi den rossen	wir svln riten hin
wande ich vil vngerne	bi den Buregonden bin
Do sprach div frowe Chriemh'	mir ratent frivnde min
swaz ich han der getriwen	ich svle hie bi in sin
ich habe luzzel mage	in Nibelunge lant
leit was ez Sigemunde	do er div mære an ir ervant [42r]
Do sprach der kunic Sigemvnt	daz enlat iv niemen sagen
vor allen minen magen	svlt ir chrone tragen
alsam gewaltekliche	als ir ê habt getan
irn svlt des niht engelten	daz wir den helt verlorn han
Vn– vart ovch mit vns widere	durch iwer kindelin
daz ensvlt ir so niht	frowe	verweiset lazen sin
swenne iwer svon gewæhset	der trostet iv den mvot
die wile sol iv dienen	von rechen manic helt gvot
Si sprach	herre Sigemunt	ine mac geriten niht
ich mvoz hie beliben	swaz halt mir geschiht
bi den minen magen	daz si mir helfen klagn
do begunde disiv mære	den gvten rechen missehagn
Si sprachen al geliche	so mohten wir wol gehn
daz vns allererste	wære leit geschehn
ob ir beliben woldet	bi vnsern uinden hie
so geriten hovereise	noch helde sorchlicher nie
Ir sult ane alle sorge	gote bevolhen varn
ich schaffe iv gvot geleite	vn– heiz ivch wol bewarn
zv Sigemundes lande	min liebez kindelin
daz sol vf genade	iv rechen wol bevolhen sin
Do si daz <vernamen>	daz si niht wolde dan
do weinten al gemeine	die Sivrides man
wie rehte iæmerliche	sich schiet Sigemunt
von der kuniginne	do was im vngemvete chunt
We geschehe der hochgecite	sprach der kunic her
ez geschiht von churcewile	leider nimmer mer
deheinen kuniges magen	danne vns ist geschehn
man sol vns nimmer mere	hie zen Buregonden sehn
Do sprachen offenliche	die Sivrides mann
ez mohte noch ein reise	in dizze lant ergan
so wir den reht erfunden	der vns den herren erslvoch
si hant von sinen magen	der starchen vinde genvoch
Er chuste Chriemh'	wie iæmerlich er sprach
do si niht riten wolde	vn– ez daz reht ersach
nv riten vrevden ane	heim in unser lant
alle mine sorge	sint mir erste nv bechant
Si riten vngeleitet	von Wormez zetal den Rin
si mohten sicherlichen	wol des mvtes sin
ob si in vintschefte	wrden an gerant
daz sich wem wolde	der chunen Nibelunge hant
Sine gerten vrlovbes	da ze cheinem man
do sah man Gernoten	vn– Giselhern gan
zvo zim minneklichen	in was sin schade leit
des brahten in wol innen	die helde kvn vn– gemeit
Do sprach gezogenliche	der kunic Gernot
<got> weiz daz wol von himele	an Sivrides tot
gewan ich nie die schulde	daz ich daz horte sagn
wer im hie vint wêre	ich sol in pilliche klagen
Do gab in sin geleite	Giselher daz kint
er brahte sorgende	vz dem lande sint
den kunic mit sinen rechen	heim ze Niderlant
wie luzzil man der [42v]mage	dar inne vroliche vant
Wie si nv gefuoren	des enkan ich niht gesagn
man horte zallen citen	hie Chriemh' klagn
daz ir niemen troste	daz herce vn– ovch den mvot
ez entæt ir brvder Giselher	der was getriwe un– gvot
Prvnh' div schone	mit vbermvte saz
swaz Chriemh' geweinte	vnmære was ir daz
sine wart ir rehter triwen	nimmer me bereit
sit geriet ovch ir vroe Chriemh'	ich wæn als ungefvegiv leit

<Do> div minnekliche	also verwitewet wart
bi ir ime lande	der grave Eckewart
beleip mit sinen mannen	sin triwe im daz gebot
er diente siner frowen	mit willen vnz an sinen tot
Ze Wormze bi dem munster	ein gezimber man ir sloz
von holze harte michel	wit un– groz
da si mit ir gesinde	sit ane frevde saz
si was zer chirchen gerne	vn– tet vil willechliche daz
Da man begrvop ir vriedel	wie selten si daz lie
mit trvrigem mvote	si alle cite dar gie
si bat got den richen	der sinen sele pflegn
vil diche wart beweinet	mit grozen triwen der degn
Vote vn– ir gesinde	si trosten zaller stvnt
do was ir daz herce	so grozliche wnt
ez chunde niht vervahen	swaz man ir trostes bot
si hete nach ir frivnde	die allergrozisten not
die nach liebem manne	ie mere wip gewan
man moht ir starche tvgende	chiesen wol dar an
si chlaget unz an ir ende	die wile wert ir lip
sit rach sich harte swinde	in grozen triwen daz wip
Svs saz si in ir leiden	daz ist al war
nach ir mannes tode	vnz in daz vierde iar
daz si zir brvder Gunther	dehein wort nie gesprach
un– ovch ir vint Hagenen	in der zite niene gesach
Hagene sprach zem chunige	mohten wir daz tragen an
daz ir iwer swester	hulde mohtet han
so choem zv disen landen	daz Nibelunges golt
des wrde vns vil ze teile	wær uns div kuniginne holt
Daz schuln wir versvchen	sprach der kunic sa
ich wil ez mine brveder	hin ze ir werbn lan
daz si mir daz fvegen	daz si vns gerne sehe
ine trowes niht	sprach Hagene	daz ez immer geschehe
Do hiez er Ortwinen	hin ze hove gan
vn– der marchrauin Geren	do daz was getan
man braht ovch Gernoten	vn– Giselher daz kint
si versvohtenz vrivntliche	an frowen Chriemh' sint
Do sprach von Buregonden	der chuone Gernot
frowe	ir chlaget ze lange	den Sivrides tot
nv wil der kunich iv rihten	daz ers niht hat erslagen
man hoert ivch zallen ziten	so rehte groezliche klagn
Si sprach	des zihet <niemen> in	[43r]in slvoch div Hagenen hant
wa man in verhowen moehte	do er daz an mir ervant
solt ich des getrowen	daz er im trvege haz
ich hete wol behvetet	sprach div kuniginne	daz
daz ich niht vermeldet	hete sinen lip
so liez ich nv min weinen	ich vil armez wip
holt wirde ich in nimmer	die ez da habent getan
do begunde <vlegen> Giselher	der vil wætlich man
Si sprach ich mvoz in grvezen	irn welts mich niht erlan
der habe groze sunde	der kunic hat mir getan
so vil der hercen swære	gar ane mine scholt
min mvnt im giht der svone	im wirt daz herce nimmer holt
Dar nach wirt ez bezzer	sprachen ir mage do
waz ob er ir an verdienet	daz si noch wirdet vro
er mac si wol ergezzen	sprach Gernot der helt
do sprach div iamersriche	seht	nv tvon ich swaz ir welt
Si wolden kunic grvzen	do si in des veriach
mit sinen besten frivnden	ers in ir hvse sach
done torste Hagene	fvr si niht gegan
wol wesser sine schulde	er het ir leide getan
Do si verchiesen wolde	vf in den grozen haz
Gunther gezogenliche	gie gegen ir dar naher baz
durch des hordes liebe	was der rat getan
dar vmbe riet die svone	der vil vngetriwe man
Ez enwart nie svone	mit so vil træhenen me
mit valsche gefvget	ir tet ir schade we
si verchos vf si alle	wan vf den einen man
in het erslagen niemen	het ez niht Hagene getan
Dar nach uil unlange	do trvgen si daz an
daz div kuniginne	den grozen hort gewan
von Nibelunge lande	vn– fvrt in an den Rin
ez was ir morgengabe	er solt ir wol von rehte sin
Dar nach si beide fvren	Giselher un– Gernot
zwelf hundert mannen	Chriemh' do gebot
die in da holn solden	da er verborgen lac
da sin der degn Albrich	mit sinen besten friunden pflac
Do die uon <Rine> chomen	in Nibelunge lant
do sprach zvo sinen magen	Albrich al zehant
wir mvgn ir des hordes	vor gehabn niht
sit sin ze morgengabe	div edele kuniginne giht
Doch enwrde ez nimmer	sprach Albrich	getan
niwan daz wir vbele	da verlorn han
mit dem vil edeln rechen	die gvten Tarn hvot
die trvoch von allem rehten	der schonen Chriemh' trvot
Nv ist ez leider vbele	Sivride chomen
daz vns die tarnkappen	het der helt benomen
vn– daz im mvse dienen	mit vorhten dizze lant
do gie der chamerære	da er des hordes sluzzel vant
Ez stvnden vor dem berge	die Chriemh' man
vn– ovch ein teil ir mage	den schazze man trvge dan
nider zv den unden	an div schiffelin
den fvrt man vf dem sewe	vof ze berge vnz in den Rin
Nv mvgt ir von dem horde	wnder [43v]horn sagn
swaz zwelf kanzwægene	meiste mohten tragen
viere tage lange	von dem berge dan
ovch mvos ir ieslicher	des tages nivn stvnden gan
Ezen was niht anders	wan gesteine vn– golt
vn– ob man die werlt alle	het da von gesolt
sine wrde nimmer minre	einer marche wert
iane hete is Hagene	ane schulde niht gegert
Der wnsch der lac dar vnder	von golde ein rvrelin
der daz het erchunnen	der mohte meister sin
wol in aller werlde	vber ieslichen man
der Albriches mage	chom mit Gernote vil dan
Do sich der herre Germot	vn– Giselher daz chint
des hordes underwnden	do vnderwnden si sich sint
des landes un– der burge	vn– maniges rechen balt
daz mvos in sider dienen	bediv durch vorht vn– gewalt
Do si den hort behielten	in Guntheres lant
vn– sihs div kuniginne	alles underwant
kamern vn– tvrne	sin wrden vol getragn
man gehort daz wnder	von gvte mere nie gesagn
Vn– wær sin tusint stunden	noch also vil gewesn
vn– solt der herre Sivrit	gesvnder sin gewesn
bi im wære Chriemh'	hende bloz bestan
getriwer wibes kunne	ein helt nie mere noch gewan
Do si den hort nv hete	do brahtes in daz lant
vil der vremden rechen	ia gab der frowen hant
daz man so grozer milte	mere nie gesach
si pflac vil grozer tvgende	des man der kuniginne iach
Den armen vn– den richen	begunde si do geben
daz daz reite Hagene	ob si solde leben
noch deheine wile	daz si so manigen man
ze dienste ir gewnne	daz si des angest mvsen han
Do sprach der chunic Gunther	ir ist lip un– gvot
zwiv solde ich daz wenden	swaz si da mit getvot
ich erwarbez vil chume	daz si mir wart sider holt
nvne rvchen war si teile	bediv ir silber vn– ir golt
Hagene sprach zem chunige	ez ensolde ein frvmer man
deheinem einem wibe	niht <des> hordes lan
si bringet ez mit gabe	noch unz vf den tac
daz vil wol geriwen	die chvenen Burgonden mac
Des antwrt im Gunther	ich swor ir einen eit
daz ich ir getæte	nimmer mere leit
vn– wil es furbaz hveten	si ist div swester min
do sprach aber Hagene	lat mich der schuldige sin
Ir svmelicher eide	waren vnbehvot
do namen si der witewen	daz vil groze gvot
Hagen sich der sluzzel	aller underwant
vil sere ez zvrnde Gernot	daz er daz rehte ervant
Do sprach der herre Giselher	miner swester hat getan
Hagene so vil der leide	ich soldez understan
vn– wær er mir niht sippe	ez gienge im an den lip
ieteniwez weinen	tet do Sivrides wip
Do sprach der [44r]herre Gernot	e daz wir immer sin
gemvet mit disem golde	wir soldenz in den Rin
allez heizen senchen	daz immer wrde man
si gie vil klageliche	fver Giselher ir brvder stan
Si sprach	vil lieber bruder	dv solt gedenchen min
des libes un– des gvtes	soltv min vogt sin
er sprach	vil liebiv swester	daz sol sin getan
als wir chomen widere	wir han ze riten wan
Der chunic unt sine mage	rvmten do daz lant
mit in die besten drunder	die man inder vant
niwan aleine Hagene	der beleip da durch den haz
den er trvoch der frowen	vn– tet vil willechliche daz
Die herren sworen eide	vnz si moehten leben
daz si den schazt niht <zeigen>	noch niemen solden geben
wan mit gemeinem rate	so si des duhte gvot
des mvsen si in vliesen	durch ir giteklichen mvot
E daz die chumige widere	ze Rine wæren chomen
die wile hete Hagene	den grozen hort genomen
er sancten da zem loche	allen in den Rin
er wande in niezen eine	des enchunde sider niht gesin
Erne mohte des hordes	sit gewinnen niht
daz den ungetriwen	vil dicche noch geschiht
er wande in niezen eine	die wil er moehte lebn
sit moht ers im selben	noch ander nieman gegebn
Die fvrsten chomen widere	mit in vil manic man
Chriemh' ir schaden grozen	chlagen do began
mit meiden vn– mit frowen	in was harte leit
do gebarten die degene	sam si im heten widerseit
Do sprachen si gemeine	er hat vbele getan
er entweich der fversten zorne	also lange dan
vnz er gewan ir hulde	si <liezen> in genesn
doch enchunde im Chriemh'	nimmer vinder gewesn
Mit iteniwem leide	beswæret <was> ir mvot
vmhe ir mannes ende	un– do si ir daz gvot
also gar genamen	do gestunt ir iamers chlage
des libes immer mere	vnz an ir iungeste tage
Nach Sivrides tode	daz ist al war
was si in manigen leiden	vnz in daz zwelfte iar
daz si des rechen todes	mit chlage nie vergaz
si was triwen stæte	vn– tet vil willechliche daz
Eine riche fursten aptey	stifte vroe Vote
nach Danchrates tode	von ir gvote
mit starchen richen vrborn	als ez noch hivte hat
daz kloster da ze Lorse	des dinch vil hohe an eren stat
Dar zvo gab ovch Chriemh'	sit ein michel teil
durch Sivrides sele	vn– vmb aller sele heil
golt un– edel steine	mit williger hant
getriwer wip decheine	ist uns selten ê bechant
Sit daz div frowe Chriemh'	vof Gunther verchos
vn– doch von sinen schuden	den grozen hort verlos
do wart ir hercen leide	tusint stvnde mer
do ware gerne dannen	diu frowe edel vn– her	[44v]
Do was der frowen Voten	ein sedelhof bereit
ze Lorse bi ir chloster	mit grozer richeite
dar zoch sich div witewe	von ir chinden sit
da noch div frowe here	begrabn in eime sarche lit
Do sprach div kuniginne	vil liebiv tohter min
sit dv hie niht maht beliben	so soltv bi mir sin
ze Lorse in mime hvose	vn– solt din weinen lan
des antwrt ir Chriemh'	wem liez ich danne minen man
Den laz et hie beliben	sprach froe Vote
nvne welle got von himele	sprach aber div gvot
min vil liebiv mvoter	daz sol ich wol bewarn
wander mvoz fon hinnen	mit mir wærliche varn
Do schvof div iamers riche	daz er wart vof erhabn
sin edelez gebeine	wart ander stvnt begrabn
ze Lorse bi dem munster	vil werdechlichen sit
da der helt vil chuone	in eime langen sarche lit
In den selben ziten	do Chriemh' solde
varn mit ir mvter	dar si doch wolde
do mvste si beliben	als ez solde sin
daz understvnden mære	vil verre chomen vber Rin

<Daz> geschach in den geciten	do froe Helche erstarp
vn– daz der chunic Ezele	ein ander wip warp
do rieten sine frivnde	in Buregonden lant
zeiner werden witewen	div froe Chriemh' genant
Sit daz erstorben ware	der schoenen Helchen lip
si sprachen	welt ir immer	gewinnen edel wip
die hoehsten un– die besten	die ie kunich gewan
so nemt die selben witewen	der starche Sivrit was ir man
Do sprach der chunich riche	wie chunde daz ergan
sit ich bin ein heiden	vnt tovfes nine han
so ist div frowe christen	vn– tvot es lihte niht
ez mvoz sin ein wnder	ob ez immer geschiht
Do sprachen aber die snellen	waz ob siz lihte tvot
durch iwern namen den hohen	vn– iwer michel gvot
so sol manz doch versvochen	an daz vil edel wip
so mvgt ir gerne minnen	den ir vil wnneklichen lip
Do sprach der kunic Ezele	wem ist under iv bechant
bi Rine aller beste	lvte vn– ovch daz lant
do sprach von Bechelaren	der gvte Rudeger
ich han irkant von kinde	die edeln kuniginne her
Gunthern vn– Gernoten	die chunen ritter gvot
Giselher der iunge	ir ieslicher tvot
swaz er der hohen eren	mit tvgenden mac began
ovch hant ir alten mage	al daz selbe her getan
Do sprach der kunich riche	frivnt	dv solt mir sagn
ob si ob minen landen	chrone solde tragn
ist ir lip so schoene	so man mir hat geseit
des antwrt im Rvdeger	der reche chve[45r]ne vn– gemeit
Si gelichet sich mit schoene	wol der frowen min
Helchen der vil richen	vn– chunde niht gesin
in dirre werlde schoner	deheines kvniges wip
den si lobt ze frivnde	der mac wol trosten den lip
Er sprach	so wirbez	Rvdeger	so lieb als ich dir si
vn– sol ich Chriemh'	immer geligen bi
des wil ich dir lonen	so ich beste chan
so hastv minen willen	mit grozen triwen getan
Vzer miner chameren	so heiz ich dir gebn
daz dv vn– dine geverten	vroliche mvgt lebn
von chleidern	von rossen	des nime swaz dv wil
des gib ich dir zware	zv der boteschefte vil
Des antwrte Rvdeger	der marcgrave rich
gert ich dines gvotes	daz ware vnlobelich
ich wil din bote gerne	wesn an den Rin
mit min selbes gvote	des soltv gar ane angest sin
Do sprach der kunic Ezele	nv wenne welt ir varn
nach der vil minneklichen	got sol ivch bewarn
der reise an allen eren	vn– ovch die frowen min
des helfe mir gelucke	daz si vns genedic <mvze> sin
Do sprach aber Rvdeger	ê ich rvme dizze lant
wir mvzin ê bereiten	waffen un– gewant
schilde vn– sætele	des wir ere han
ich wil ze Rine fveren	fvnf hundert miner chuonen man
Swa man in vremden landen	<mih> un– die mine sehe
daz ir ieslicher	denne dir des iehe
daz nie kunic deheiner	also manigen man
so verre baz gesande	danne dv ze <Rine> habst getan
Ob duz	kunich riche	dar vmbe niht wellest lan
si was ir edeln minne	Sivride vndertan
dem Sigemundes kinde	den hastv hie gesehn
man mvse im grozer eren	mit rehter warheite iehn
Dar vmbe ich si niht vremde	was si des rechen wip
ia was wol also tivre	sin vil edel lip
daz ich niht versmahen	die kuniginne sol
durch ir grozen schone	so gevellet si mir wol
So wil ich iv die wareheit	sprach Rvdeger do	sagn
daz wir hinnen riten	in vier vn– zweinzich tagen
ich enbivt ez Gotelinde	der vil lieben frowen min
daz ich nach Chriemh'	selbe bote welle sin
Hin ze Bechelaren	sande Rvdeger
boten sime wibe	der marcravinne her
vn– enbot ir daz er solde	dem kunige werbn wip
si gedahte frivntliche	an der gvten Helchen lip
Do div marcgrauinne	die boteschaft vernam
der mære si sich frevte	doch weinens si gezam
ob si gewinnen solde	noch frowen alsam ê
so si gedaht an Helchen	daz tet Gotlinde we
Vzer Hunin lande	der marcgrave reit
des was der kunich Ezele	vro vn– ovch gemeit
da zer stat ze Wiene	bereite man [45v]in wat
die er fvren solde	als man vns gesagt hat
Da ze Bechelaren	im warte Gotelint
div ivnge marcgrauinne	daz Rudegeres kint
sah ir vater gerne	vn– ovch sine man
do wart ein liebez biten	von schonen kinden getan
Do der marcgrave	ze Bechelaren reit
do was in mit vlize	ir gewefen vn– ir kleit
bereitet gar ze wnsche	im un– sinen man
ir sovmer vf der straze	sah man mit in zogen dan
Do si ze Bechelaren	chomen in die stat
disinen reisgesellen	herebergen bat
der wirt vil minneklichen	vn– schvof in gvot gemach
Gotelint div riche	den wirt si niht zvngerne sach
Sam tet sin liebiv tohter	div ivnge marcgravin
div enchunde ir vater chvnfte	niht hohers mvotes sin
die von Hvnen landen	wie gerne si die sach
mit laehendem mvnde	div sveze iunchfrowe sprach
Nv si vns groze willechomen	min vater un– sine man
do wart vil groze danchen	mit vlize getan
des marcgraven kinde	von manigem rechen gvot
vil wol erchande Gotelint	des gvten Rvdegeres mvot
Do si des nahtes nahen	bi Rvdegere lach
vil minnekliche vragen	in div frowe pflach
war in gesendet hete	der kunic von Hvnin lant
er sprach	min liebiv frowe	daz sol werden dir bechant
Ich sol minne herren	werben vmbe ein wip
sit daz ist erstorben	miner frowen lip
ich wil nach Chriemh'	riten an den Rin
div sol hie zen Hvnen	gewaltech kuniginne sin
Daz wolde got	sprach Goetelint	moht uns daz heil geschehn
sit daz wir ir hoeren	so grozer eren iehen
si ergazt uns miner frowen	liht in alten tagen
mit ir hohen tvgenden	daz wir mvsin si verchlagen
Do sprach der marcgrave	trutinne min
di mit mir svln riten	hinnen an den Rin
den sult ir frivntliche	bieten iwer gvot
so helde varent riche	so sint vroelich gemvot
Si sprach	ez ist deheiner	derz von mir gerne nimt
ine geb ir ieselichem	swaz im wol gezimt
e daz ir hinnen scheidet	mit den iwern man
daz si dem wirte lobte	daz wart mit vlize getan
Hey waz man do von kamere	der richen pfellil trvoch
der wart mit den rechen	geteilet do genvoch
erfvllet vlizekliche	vonn halse vnz vf den sporn
die im da zvo behageten	die het im Rvdeger erchorn
An dem sibnden morgen	von Bechelaren reit
der wirt mit sinen degenen	wafen vn– chleit
furten si den vollen	dvrch der Baier lant
si wrden vf der strazen	dvrch rovben selten an gerant
Da die helede fvoren	niemen niht in nam
man moeht in dannen die[46r]nen	als im wol gezam
ritter un– knehte	die waren wol gechleit
der gvte marcgraue	alsvs von Bechelaren reit
Inre tagen zwelfen	si chomen an den Rin
done chunden disiv mære	niht verholn sin
man sagte dem chunige	vn– ovch sinen man
da chomen hohe geste	der wirt do vragen began
ob iemen si bechande	daz manz im solde sagn
man sah ir sovmere	so rehte swære tragn
daz si vil riche wæren	daz wart da wol bechant
man hiez si herbergen	da ze Wormez al zehant
Do die geste waren	zen herebergen chomen
do wart ir gevertes	vaste war genomen
si wndert wannen fveren	die rechen an den Rin
der wirt nach Hagene sande	ob ez im chundich mohte sin
Do sprach der von Tronege	nv lat mich si sehn
als ich si nv geschowe	ich chan iv wol veriehn
von swannen si gesendet	sin in dizze lant
si svln sin vil vremden	ine habe si schiere bekant
Inlende heten	die geste nv genomen
in vil richiv chleider	was der bote chomen
mit sinen hergesellen	ze hove si do riten
si fvrten gvtiv chleider	wol vn– spæhe gesniten
Do sprach der snelle Hagene	als ich mich chan verstan
wande ich die helde lange	niht gesehn han
si varnt dem geliche	als ez si Rvdeger
von hunischen richen	der degn chvne vn– her
Wie solde ich des getrowen	sprach der chunich zehant
daz der von Bechelaren	choeme in dizze lant
e daz <der> chunich riche	die rede vol sprach
Hagene der chvene	den gvten Rvdegern sach
Mit sinen besten frivndem	lief er zv zim dan
man sach fvnfhundert degene	von den rossen stan
do wrden wol enpfangen	die von Hvnin lannt
boten nie getrvgen	also herlich gewant
Do sprach in hoher stimme	der herre Hagene
nv sin groze willechomen	dise degene
der vogt von Bechelaren	un– alle sine man
daz grvzen wart mit eren	den snellen Hvnin getan
Des kuniges nehsten mage	chomen da man si sach
Ortwin von Mezzin	zv Rvdegere sprach
wir habn in aller wile	mere nie gesehn
geste hie so gerne	des wil ich wærliche iehn
Des grvzes si do danchten	den helden vber al
mit dem hergesinde	si giengen in den sal
da si den kunich fvnden	bi nnanigem chvnen man
der wirt do von dem sedele	gie gegen Rvdegere dan
Wie rehte frivntliche	er den gast enpfie
vn– alle sine degene	Gernot do niht enlie
ern enpfienge in ovch mit eren	vn– alle sine man
der chunic Rvdegere	fvrte bi der hende dan
Er braht in zv dem sedele	da er selbe saz
den gesten hiez man schenchen	mit willen tet man daz
mete den vil gvten	vn– den besten win
den iemen uin[46v]den chvnde	in dem lande al vmben Rin
Giselher vn– Gere	die bede warn komen
Danchwart vn– Volker	die lneten wol vernomen
von den werden gesten	si wæren hochgemvot
si enpfiengen vor dem kunige	die ritter edel vnde gvot
Do sprach zvo sime herren	der degen Hagene
ez solden immer dienen	alle iwer degene
daz vns der marcgrave	ze liebe hat getan
des solde man enpfahen	wol den Gotelinde man
Do sprach der kunic Gvnther	ine chan niht langer dagn
wie si sich gehaben beide	daz svlt ir mir sagn
Ezele vn– Helche	vzer Hvnin lant
do sprach der marcgraue	ich solz iv sagn hie zehant
Do stvnt er von dem sedele	mit allen sinen man
er sprach zv dem chunige	lat mih vrlovp han
ze sagene solhiv mære	dar vmbe ich bin gesant
von deme chunic Ezele	her zv der Buregonden lant
Er sprach	swaz man vns mære	bi iv enboten hat
div erlovb ich iv ze sagene	ane frivnde rat
ir svlt si lazen hoeren	mich vn– mine man
wande ich iv aller eren	hie ze werbene gan
Do sprach der bote here	iv enbivtet an den Rin
getriwelichen dienest	der groze voget min
vn– allen iwern frivnden	die ir mvget han
vnde wizzet	disiv boteschaft	ist in triwen gar getan
Iv bat der chunic edele	chlagen sine not
siniv lant sint verweiset	min frowe div ist tot
Helche div vil riche	ein kuniginne her
nach der min herre lidet	daz wizzet	vngefuogiv ser
Kint der edeln fvrsten	div si gezogen hat
dar an ez inme lande	vil iæmerlichen stat
die enhant nv leider niemen	der ir mit triwen pflege
des wen ovch sich vil <seine>	des kuniges sorge gelege
Nv lon im got	sprach Gunther	daz er den dienest sin
so willechlich enbvtet	mir un– den frivnden min
sinen grvoz ich gerne	hie vernomen han
den mir enbivtet Ezele	des sol er groz genade han
Do sprach von Burgonden	der herre Gernot
die werlt mac wol riwen	der schonen Helchen tot
dvrch ir manige tvgende	der si wol chunde pflegn
der rede gestvnt im Hagene	der vil zierliche degn
Do sprach aber Rvdeger	der edel bote her
sit ir mir	chunic	erlovbet	ich sol iv sagen mer
waz iv min lieber herre	her enboten hat
sit im nach miner frowen	sin dinch so chumberlichen stat
Man sagt mime herren	iwer swester si ane man
Sivrit si erstorben	ist daz also getan
so sol min frov Chriemh'	die richen chrone tragn
vor den Ezelen rechen	diz bat iv der chunic sagn
Do sprach der chunic riche	wol gezogen was sin mvot
so hoeret minen willen	ob siz gerne tvot
den wil ich iv chunden	in disen siben [47r]tagen
ê ihz an ir erfvere	zwiv solde ich Ezelen versagn
Die wile man den gesten	hiez schaffen <gvot> gemach
in wart da so gedienet	daz Rvdeger des iach
daz er da frivnde hæte	bi Guntheres man
Hagene im diente gerne	er hete im alsam getan
Alsvs beleip do Rvdeger	vnz an den vierden tac
der kunich nach rate sande	wie wiselich er pflach
vragen sine mage	ob si dvhte gvot getan
daz Chriemh' nemen solde	den chunich Ezelen ze man
Si rietenz al gemeine	wan eine Hagene
der sprach ze Gunthere	dem degene
habt ir rehte sinne	so wirt ez wol behvot
ob sis ioch volgen wolde	daz irz nimmer getvot
Warvmbe	sprach do Gunther	solde ihs volgen niht
swaz der kuniginne	liebes geschiht
des sol ich ir wol gvnnen	si ist div swester min
wir soldenz selbe werben	ob ez ir ere mohte sin
Do sprach aber Hagene	nv lat die rede stan
vn– het ir Ezelen chunde	als ich sin chvnde han
solte si in danne minnen	als ich ivch hoere iehn
so wære iv aller erste	von schulden sorgen geschehn
Warumbe	sprach do Gvnther	ich behvete wol immer daz
daz ich im chome so nahen	daz ich deheinen haz
von im mvese dvlden	vn– wrde si sin wip
do sprach aber Hagene	ez gerætet nimmer min lip
Man hiez nah Gernote	vn– Giselhere gan
ob der frowen brveder	dvhte gvote getan
daz Chriemhilt neme solde	den richen chunic her
noch widerreit ez Hagene	vn– ander niemen mer
Do sprach von Burgonden	Giselher der degn
nv mvgt ir	frivnt Hagene	noch der triwen pflegn
ergetzet si der leide	vn– ir ir habt getan
swar an ir wol gelunge	daz solt ir vngevehet lan
Ia habt ir miner swester	getan so starchiv leit
so sprach aber Giselher	der degn vil gemeit
daz si des hete schulde	ob si iv wære gram
nie man deheiner frowen	mere frevden noch genam
Daz ich da wol bechenne	daz tvn ich iv chvnt
sol si nemen Ezele	gelebt si an die stvnt
si getvot uns leide	swie siz getraget an
ia gewinnet si ze dienste	daz wizzet	manigen chvenen man
Des antwrt Hagene	der herre Gernot
ez mag also beliben	vnz an ir beider tot
daz wir geriten immer	in Ezelen lant
wir svln ir leisten triwe	daz ist zen eren vns gewant
Do sprach aber Hagene	mir chan niemen widersagn
vn– sol div frowe Chriemh'	Helchen chrone tragn
si getvot vns leide	swie si gefvget daz
ir svlt ez lan beliben	daz chvmt iv rechen michel baz
Mit zorne sprach do Giselher	der edeln Voten svon
wir ensvlen niht alle	meinliche tvn
swaz liebes ir geschêhe	vro solten wir des sin
swaz ir geredet Hagne	ich diene ir durch die triwe min
Do daz Hagene horte	do wart er vngemvot
Gernot vn– Giselher	die stolzen ritter gvot
vn– Gunther der riche	gerieten sider daz
ob siz loben wolde	daz siz liezen ane haz
Do sprach der chvene Gere	so wil ich hine gan
vn– wil mine frowen	die rede wizzen lan
waz ir der kunich Ezele	her enboten hat
ob si in nemen welle	daz si mit triwen vnser rat
Do gie der snelle reche	da er Chriemh' sach
si enpfie in minnekliche	wie balde er do sprach
ir mvgt mich gerne grvzen	vn– gebn botenprot
ivch wil gelucke scheiden	vzir aller iwer not
Ez hat durch iwer minne	frowe	her gesant
ein der aller beste	der ie kuniges lant
besaz mit vollen eren	oder chrone solde tragn
ez werbent boten edele	daz hiezen iv die kunige sagn
Do sprach div iamers riche	iv sol verbieten got
vn– andern minen frivnden	daz si deheinen spot
an mir armen vben	waz soldich einem man
der ie hercen liebe	von gvtem wibe gewan
Si widerreit iz sere	do chomen aber sint
Gernot ir brvoder	vn– Giselher daz kint
di baten minnekliche	trosten si den mvot
ob si den chunic næme	ez wær ir wærlichen gvot
Vberwinden niemen	chunde do daz wip
daz si minnen wolde	deheines mannes lip
do baten si die rechen	nv lazet doch geschehn
ob er niht anders wellet tvon	so svlt ir Rvdegeren sehn
Daz enwil ich niht versprechen	ine welle in gerne sehn
den gvten Rvdegeren	daz laz ich wol geschehn
dvrch sine manige tvgende	wær er niht her gesant
swerz ander boten wæren	den wær ich immer vnbechant
Si sprach	ir svlt in morgen	heizen her gan
zv miner chemenaten	ich wil in hoeren lan
wes ich mich habe beraten	wil ich im denne sagn
ir wart eriteniwet	daz ir vil groezlich chlagn
Do engert ovch nihtes mere	der edel Rvdegere
niwan daz er gesæhe	die kuniginne here
er wiste sich so wisen	daz er wol an getragen
mohte swaz er wolde	ir rede im mvose wol behagen
Des andern morgens	do man frvemesse sanch
die edeln boten chomen	do wart da groz gedranch
die mit Rvdegere	ze lnofe solden gan
der sach man wol gekleidet	manigen wætlichen man
Chriemh' div vil arme	div trvrich gemvot
si warte Rvdegere	dem edeln boten gvot
der vant si in der wæte	die si alle cite trvch
da bi het ir gesinde	richer chleider genvoch
Si gie in hin begegene	zvo der tvere stan
vn– empfie vil liepliche	den Ezelen man
niwan mit zwelf gesellen	man in dar in verlie
man bot im michel ere	ir chom ein hoher bote nie
Man bat den herren sizzen	vn– sine man
die zwene marcgraven	sach man [48r]vor in stan
Gern vn– Ecgewarten	daz schvof div kuniginne
die selben boten chunden	nimmer baz gewirdet sin
Do si da wol gesazen	vn– sahn manich wip
do pflach niwan weinens	der Chriemh' lip
ir <wat> was vor <den> brusten	der heizen træhene naz
daz sach der marcgrave	der helt niht langer do da saz
Er sprach in grozen zvhten	vil edel kuniges chint
mir vn– minen geverten	di mit mir chomen sint
svlt ir	frow	erlovben	daz wir <fvr> ivch stan
vn– sagen iv div mære	durch waz wir her geriten han
Nv si iv erlovbet	sprach div kunigin
ze sagen iwer mære	also stat min sin
sprechet swaz ir wellet	des ivch dunche gvot
di boten an ir wol sahen	ir vil trvrigen mvot
Do sprach von Bechelaren	der fvrste Rvdeger
dienst un– triwe	Ezel	ein kunic her
hat iv enboten	frowe	her in dizze lant
er hat nach iwer minne	vil gvte degene gesant
Vn– enbivtet iv innekliche	frevde ane leit
der stæten frivntschefte	si er iv bereit
als Helchen miner frowen	div im ze hercen lach
ir sult nv tragen chrone	der min frowe wilen pflach
Do sprach div kuniginne	vil edel Rvdeger
wær ieman der bechande	div minen scharpfen ser
der riete mir niht trvten	noch deheinen man
wan ich vlos ein den besten	den ie frowe mer gewan
Waz mag ergezzen leides	sprach do der chvne man
wan vrivntliche liebe	swer die chan began
vn– dann der einen chivset	der im ze rehte chvmet
fvr hercenliche swære	niht so grozliche frvmet
Vn– rvchet ir ze minnen	den hohen voget min
zwelf richer chrone	svlt ir frowe sin
dar zv git iv min herre	wol drizech fvrsten lant
div hat er betwngen	mit siner ellenthaften hant
Ir svlt ovch werden frowe	vber manigen chvnen man
die ovch miner frowen	waren vndertan
vn– vil der schonen mægede	der si hete gewalt
vn– hoher rechen magen	edel	<chven> vn– balt
Darzv iv min <herre> git	daz heizet er iv sagen
ob ir gervchet chrone	bi dem chunige tragen
gewalt den aller hohsten	den Helche ie gewan
den svlt ir gewaldechliche	han ob allen sinen man
Do sprach div kuniginne	wie mohte minen lip
immer des gelvsten	deich wrde heledes wip
mir hat der tot an einem	so rehte leit getan
des ich vnz an min ende	mvz in riwen immer stan
Do sprachen aber die Hvnin	kuniginne rich
iwer leben wirt bi Ezele	so rehte lobelich
daz ir des wol vergezzet	ist daz ez ergat
wan der kunic riche	vil manigen zieren degen hat
Die miner frowen mægede	vn– iwer mægedin
svln die [48a]bi ein ander	ein gesinde sin
da bi so mohten rechen	werden wol gemvot
lat ez iv	frowe	raten	ez wirt iv werlichen gvot
Si sprach in ir zvehten	nv lat die rede stan
vnze morgen frveie	so svlt ir her gan
so wil ich iv antwrten	des ir da habet mvot
des mvsen do gevolgen	die rechen chvne un– gvot
Do si zen herbergen	alle chomen dan
do hiez div frowe Chriemh'	nach <Giselhere> gan
vn– ovch nach ir mvoter	si saget in beiden daz
daz si gezæme weinen	vn– niht anders baz
Do sprach ir brvoder Giselher	swester	mir ist geseit
vn– wilz ovch gelovben wol	daz elliv diniv leit
Ezel der chunic swende	vn– nimstv in ze man
swaz ander iemen rate	so dunchet ez mich gvot getan
Er mac dich wol ergezzen	sprach aber Giselher
vonme Roten zv dem Rine	vf bi Elbe vnz an daz mer
so ist ir deheiner	also gewaltich niht
dv maht dich frevn balde	sor din ze kuniginne giht
Si sprach zvo zir brvder	zwiv rætestv mir daz
chlagen un– weinen	mir immer zæme baz
wie solde ich vor rechen	da ze hove gan
wart min lip ie schone	des bin ich ane getan
Vote	ir beider mvoter	sprach ir tohter zvo
swaz dine brveder raten	vil liebez chint	daz tvo
nv volge dinen frivnden	so mach dir wol geschehen
ich han dich doch so lange	in grozem leide gesehn
Do bat si got den riche	fvgen ir den rat
daz si ze gebene hete	golt	<silber> vn– wat
sam bi ir ersten manne	do der noch was gesvnt
si gelebte doch nimmer mere	sit so vroliche stvnt
Do gedahtes in ir sinne	sol ich minen lip
gebn einem heiden	ich bin ein christen wip
des mvse ich von der werlde	groz itewize han
gêb er mir elliv riche	so ist ez immer vngetan
Da mite siz lie beliben	die naht unz an den tac
div frowe in vil gedanchen	an ir bette lac
div ir vil liehten ovgen	wrden trvchen nie
vnze si aber den morgen	hin zer mettine gie
Ze rehter messecite	die herren waren chomen
si heten aber ir swester	vnder hende genomen
ia rieten si ir minnen	den chunic vz Hvnen lant
die frowen ir deheiner	vil luzzil vroliche vant
Si baten dar gewinnen	die Ezelen man
Rvdeger der riche	biten do began
die frowen minnekliche	waz si nv wolde tvon
ob si ze manne wolde	des kunic Botelunges svon
Si iach daz si geminnen	nimmer mere wolde man
do sprach der marcgrave	daz wære missetan
zwiv woldet ir verderben	also sconen lip
ir mvget noch mit eren	werden hohes rechen wip
Niht half daz si gebaten	vnze Rvdeger
sprach in heinliche	die kuniginne her	[49r]
er wolde si ergezzen	swaz ir ie geschach
ein teil begundir senften	ir vil vnsenftez vngemach
Er sprach	frowe here	lat iwer <weinen>
ob ir zen Hvnin hetent	niemens danne min
getriwer miner frivnde	vn– ovch der minen marn
er mveses sere engelten	vn– het iv iemen iht getan
Da von ein teil geringet	wart do der frowen mvot
si sprach	so swert mir	Rvdeger	swaz mir iemen tvot
daz ir mir sit der næhste	der reche miniv leit
do sprach der marcgrave	des bin ich	frowe	bereit
Mit allen sinen mannen	swor ir do Rvdeger
mit triwen immer dienen	vn– daz die rechen her
ir nimmer niht versageten	vz Ezelen lant
des si ere habn solde	des sichert ir Rvdegeres hant
Do gedahte div getriwe	sit daz ich frivnde han
also vil gewnnen	nv sol ich reden lan
die lvte swaz si wellen	ich iamerhaftez wip
waz ob noch wirt errochen	mins vil lieben mannes lip
Si gedahte	sit daz Ezele	der rechen hat so vil
sol ich den gebieten	so tvn ich swaz ich wil
er ist ovch wol so riche	daz ich ze gebene han
mich hat der mordær Hagene	des minen ane gar getan
Si sprach ze Rvedegere	het ich daz vernomen
daz er niht wære ein heiden	so wolde ich gerne chomen
swar er hete willen	vn– næme in zeinem man
do sprach der marcgrave	die rede svlt ir	frowe	lan
Ern ist niht gar ein heiden	des svlt ir sicher sin
ia was vil wol becheret	der liebe herre min
wan daz er sich widere	vernogieret hat
wolt ir <in> frowe minnen	so mohte sin noch werden rat
Ovch hat er so vil rechen	in christenlicher ê
daz iv bi dem kunige	nimmer wirdet we
ir mvegt ovch lihte erwerben	daz der fverste gvot
wider ze gote wendet	beide sele vn– mvot
Do sprachen aber ir brveder	lobt ir swester min
iwer vngemvete	svlt ir nv lazen sin
si gertens also lange	daz ir vil trvrich lip
lobte vor den degenen	si wrde Ezelen wip
Si sprach	ich mvz iv volgen	ir armiv kunigin
daz ih var zen Hvnin	so daz nv mac gesin
swenne ich die frivnt gewinne	die mich fvren in sin lant
des bot div kuniginne	vor den degn ir hant
Do sprach der marcgrave	habt ir zwene man
dar zvo han ich ir mere	ez wirdet wol getan
daz wir ivch mit den eren	bringen vber Rin
ine laze ivch nv niht langer	hie zen Buregonden sin
Fvnf hundert miner manne	vn– ovch der mage min
die svln iv hie dienen	vn– ovch da heime sin
swie ir in gebietet	ich selbe tvon alsam
so ir mich ermant der mære	daz ihs nimmer mich gescham
Nv heizet iv bereiten	iwer pferitchleit
die Rvdegeres ræte	iv nimmer werdent leit
vn– sagetez iwern mægeden	die ir da fvren welt
ia chumet vns begegene	<vil> manic vz erwelter [49v]helt
Si heten noch gesmide	daz man da vor reit
bi Sivrides ziten	daz si vil manige meit
mit eren mohten fvren	so si wolden dan
hey waz man gvter sætele	den schonen frowen gewan
Ob si da vor getrvgen	deheiniv richen chleit
der wart in zv der verte	vil manigez nv bereit
wande in von dem chunige	so vil gesaget wart
si slvzzen vf die kisten	die ê stunden wol bespart
Si heten groz vnmvoze	vnz an den zwelften tac
si svochten vz den valden	des vil dar inne lach
Chriemh' hiez entsliezen	balde ir chameren dan
si wolde machen riche	alle Rvdegeres man
Si hete noch des goldes	von Nibelunge lant
si wande ez da zen Hv^nin	teilen solde ir hant
daz iz sehs hundert moere	ninder chunden tragen
div mære horte Hagene	da von Chriemh' sagen
Er sprach	sit mir Chriemh'	doch nimmer wirdet holt
so mvoz ovch hie beliben	daz Sivrides golt
zwiv solde ich minen vinden	lan so michel gvot
ich wæiz wol daz div frowe	wnder mit dem schazze getvot
Vn– bræhte si in zen Hvnin	ich wil gelovben daz
er wrde doch zerteilet	niwan vf minen haz
sine habent ovch niht der rosse	die in solden tragen
in wil behalten Hagene	daz sol man Chriemh' sagen
Do si vernam div mære	do wart ir grimme leit
ez wart ovch den kunigen	allen drin geseit
si woldenz gerne wenden	do des niht geschach
Rvdeger der edele	dar zvo herliche sprach
Vil richiv kuniginne	zwiv chlaget ir daz golt
iv ist der chvnic Ezele	in der maze holt
gesehent ivch siniv ovgen	er git iv also vil
daz irz zerteilet nimmer	des ich iv eide swern wil
Do sprach div chvniginne	vil edel Rvdeger
ez gewan nie kuniges tohter	die richeite mer
denne der mich Hagene	ane hat getan
do chome der starche Gernot	hin zer chameren gegan
Mit gewalt des chuniges slvzzil	stiez er an die tver
golt daz Chriemh'	reichte man derfver
ze drizzech tvsint marchen	oder dannoch baz
hiez er nemen die geste	liep was Gunthere daz
Do sprach von Bechelaren	der Gotelinde man
ob ez min frowe Chriemh'	allez moehte han
swaz sin ie wart gefveret	von Nibelunge lant
sin gervret nimmer nnarche	min noch der kuniginne hant
Lat ez nemen	frowe	swerz gerne haben wil
ich brahte vz mime lande	des minen also vil
daz wir <es> vf der straze	habn gvten rat
vn– unser choste hinnen	mit vollen herlichen stat
Da vor in aller wile	erfullet zwelf schrin
des aller besten goldes	daz inder mohte sin
heten noch ir meide	daz fvrte man von dan
mit der chuniginne	daz ander [5or]mvsin si da lan
Gewalt des vbelen Hagenen	der duhte si ze starch
si het ir opfer goldes	noch wol tusint march
daz teilte si der sele	irs vil <lieben> man
daz dvohte Rvdegere	in grozen triwen getan
Do sprach div frowe Chriemh'	wa nv	frivnde min
die dvrch mich ellende	zen Hunin wellen sin
vn– mit mir svln riten	in Ezelen lant
die nemen golt daz mine	vn– chavffen rosse vn– ovch gewant
Des antwrte ir schiere	der marcgrave Ekkewart
sit ich iwer gesinde	ie von erste wart
so entweich ich iv nie triwen	sprach der chune degn
vn– wil iv immer dienen	die wile wir beide lebn megn
Ich wil ovch mit mir fveren	hundert miner man
der ich iv ze dienste	wol mit triwen gan
wir sin vngescheiden	ez entvo der tot
der rede neig im Chriemh'	daz irz der helt so wol erbot
Do zoh man dar die moere	si wolden varn dan
da wart vil michel weinen	von frivnden getan
frov Vote div gvote	vn– manic schoene meit
die zeigeten daz in wâre	nach der kuniginne leit
Hvndert schoner megede	div frowe mit ir nam
die wrden so gechleidet	als in daz wol gezam
vf ir vil liehten bovge	die træhene vielen nider
si gelebten vil der frevde	dort bi Ezelen sider
Ir brvoder chomen beide	Giselher un– Gernot
mit ir ingesinde	als in ir zvht gebot
do wolden si beleiten	ir liebe swester dan
ovch fvrten si ir degene	mit in wol tvsint chune man
Do chom der snelle Gere	vn– ovch Ortewin
Rvmolt der chuchenmeister	da mite mvse sin
si schvfen die nahtselde	der frowen vf den wegn
Volcher was ir marschalch	der solde ir herberge pflegen
Nach chussen michel weinen	wart da vil vernomen
ê daz si von der burge	ze velde wærn chomen
vz riten vn– giengen	die sis niene gebat
do reit der chunic Gunther	mit ir ein wenich fver die stat
ê si von huse fveren	si heten fver gesant
ir boten harte snelle	in der Hunin lant
die dem chvnige sageten	daz im Rvdeger
ze wibe hete gewnnen	die edeln chuniginne her
Di boten strichen sere	in was der reise not
durch die grozen ere	vn– durch richiv potenbrot
do si ze lande waren	mit den mæren chomen
do het der chunic Ezele	nie so liebes niht vernomen
Durch disiv lieben mære	hiez der chunich gebn
den boten solhe gabe	daz si wol mohten lebn
mit frevden immer mere	dar nach vnze an ir tot
mit liebe was verswnden	des chuniges chumber vnde <NOT>

<Die> boten lazen riten	vn– tvn iv daz erchant
wie div kvniginne	fvre dvrch daz lant
der wa von ir cherten	ir brvder beide wider
si heten ir so gedienet	daz sis in mvse danchen sider
Vrlovbes von ir gerte	do vil manic degen
si mvsin sich ze Vergen	der reise hine bewegn
do si wider wolden	riten an den Rin
done mohtez ane weinen	von lieben frivnden niht gesin
Giselher der snelle	sprach zer swester sin
swenne daz dv	frowe	bedurfen wellest min
ob dir iht gewerre	daz tvo mir bechant
so rite ich dir ze dienste	in daz Ezelen lant
Die ir sippe waren	die chustes an den munt
vil minneklichez scheiden	chos man an der stvnt
die snellen Burgonden	von Rvdegeres man
do fvrt div kuniginne	manige magt wolgetan
Hundert vn– viere	die trugen pfawen chleit
von genagelten richen pfellen	vil der schilde breit
man fvrte bi den frowen	nahen vf den wegn
do nam ovch vrlovp Volker	der vil zierliche degn
Do si vber Tvonowe	chomen in Beyerlant
do wrden disiv mêre	witen bechant
daz zen Hunin fvere	Chriemh' div kunigin
des frevt sich ir Oeheim	ein bischof der hiez Pilgerin
In der stat ze Pazzowe	was er bisschof
die herberge wrden lære	vn– ovch des fvrsten hof
si ilten gegen den gesten	vf in Bayerlant
da der bisscof Pilgerin	die schonen Chriemh' vant
Sinem ingesinde	was daz niht ze leit
daz si ir volgen sahen	so manige schone meit
da trvote man mit ovgen	der <edeln> ritter chint
vil riche herberge	gap man den edeln gesten sint
Da ze Pledelingen	schvf man in gemach
daz volch man allenthalben	zvo zin riten sach
man gab in willechliche	des si bedorften da
si namenz wol mit eren	als tet man sider anderswa
Div frowe mit ir oeheim	ze Pazzowe reit
ez was den burgæren	darinne niht ze leit
daz dar chomen solde	des fursten swester chint
si wart vil wol enpfangen	von den kovflvten sint
Daz si beliben solden	der bisscof hetes wan
do sprach der marcgrave	es enmac niht ergan
wir mvzin nider riten	in der Hvnin lant
vns wartet vil der degene	wande ez in allen ist bechant
Disiv mære ovch wiste	div schone Goetelint
si bereite sich mit vlize	gein ir frowen sint
ir het enboten Rvdeger	daz in daz dvhte gvot
daz si der kuniginne	da mite troste den mvot
daz si ir rite engegene	mit den sinen man
vf zvo der Ense	do daz wart getan
do sah man allenthalben	vil vnmvoze pflegn	[51r]
durch der geste liebe	si mvsin rowe sich bewegn
Si was der næhsten nahte	ze Everdingen chomen
gnvoge vz Bayerlande	solden si han genomen
den rovp vf der straze	nach ir gewonheit
so heten si den gesten	erboten eteslichiv leit
Daz hete wol behvetet	der edel Rvedeger
er fvorte tvsint ritter	vn– dannoch mer
do was oech chomen Gotelint	des marcgraven wip
mit ir fvor herrenliche	vil maniges chvnen rechen lip
Do si vber die Trvone chomen	bi Ense vf daz velt
do sah man vf gespannen	hvetten vn– gezelt
da die geste solden	die nahtselde han
von Rvdegeres frivnden	wart in dienste vil getan
Gotelint div schoene	die herberge lie
hinder ir beliben	vf den wegn gie
mit chlingenden zoemen	die moere wolgetan
der antfanch wart vil schoene	liep was iz Rvdegere ir man
Di in ze beden siten	chomen vf den wegen
die riten vroliche	der was vil manic degen
si pflagen ritterschefte	daz sach vil manic meit
ovch was der helede dienest	den schonen frowen niht ze leit
Do zvo den gesten chomen	die Rvdegeres man
vil der trvonzvne	sach man ze berge gan
von den rechen handen	mit ritterlichen siten
da wart wol ze prise	vor den frowen geriten
Daz liezen si beliben	do grvzte manic man
vil gvtlich ein ander	do fvrten si von dan
die schonen Gotelinde	da si Chriemh' sach
die frowen dienen chunden	die musin liden vngemach
Der voget von Bechelaren	zv sime wibe reit
der edelen marcgrauinne	was daz niht ze leit
daz er so wol gesunder	was von Rine chomen
ia was ir vil ir sorgen	mit grozen vrevden benomen
Do si in het enpfangen	er <si> hiez vf daz gras
erbeizen mit den frowen	swaz ir da mit ir was
mit dienste was vnmvzich	da vil manic man
der wart den schonen frowen	mit grozem vlize getan
Do sach div kuniginne	hie Gotelinde sten
mit ir ingesinde	si lie niht naher gen
daz pferit mit dem zovme	zvchen si began
si bat sich heben balde	nider von dem satel dan
Den bisscof sach man wisen	siner swester chint
 in vn– Ekkewarten	zvo Gotelinde sint
da wart vil michel wichen	an der selben stvnt
do chuste div ellende	an der marcgrauinne munt
Do sprach vil minnekliche	daz Rvdegeres wip
nv wol mich	liebiv frowe	deich iwern schonen lip
han in disen landen	mit frevden hie gesehn
mir enchvnde in disen citen	nimmer lieber geschehen
Nv lon iv got	sprach Chriemh'	vil edel Gotelint
sol ich gesvnt beliben	vn– Botelunges chint
ez mag [51v]iv chomen ze liebe	daz ir mich habt gesehn
in beiden was unchvnde	daz sider mvose geschehn
Mit zvhten zv zein ander	si sazen vf den chlê
die gerne frowen sahen	den was da niht ze we
ir sveziv ovgenweide	braht in hohen mvot
den wiben sam den mannen	als ez noch vil dicke tvot
Man hiez den gesten schenchen	ez was wol mitter tac
daz edel ingesinde	da niht langer lac
si riten da si fvnden	vil manige hvtten breit
da was den werden gesten	vil groziv wirtschaft bereit
Die naht si heten rowe	vnz an den morgen frvo
die von Bechelaren	bereiten sich dar zvo
wie si behalten solden	vil manigen werden gast
wol het geschaffen Rvdeger	daz in vil wenich iht gebrast
Div venster an den mvoren	sah man offen stan
div guote Bechelaren	div was vf getan
dar ine riten geste	die man vil gerne sach
den het der wirt vil edele	schaffen richen gemach
Div Rvdegeres tohter	mit ir gesinde gie
da si die kvniginne	vil minneklich enpfie
da bi was ovch ir mvoter	des marcgraven wip
mit liebe wart gegrvezet	vil maniger ivncfrowen lip
Si viengen sich bi henden	vn– giengen dan
in einen palas witen	der was vil wolgetan
da div Tvonowe	vnden hine vloz
si sazen gegen dem lvofte	vn– heten churcewile groz
Wes si nv mere pflêgen	des enchan niht gesagn
daz in so vbele zogete	daz horte man do chlagen
die Chriemh' rechen	wandez was in leit
hey waz gvter degene	mit ir von Bechelaren reit
Vil minneklichen dienest	der marcgrave in bot
do gabt div kuniginne	zwelf povge rot
der Gotlinde tohter	vn– also gvot gewant
daz si niht bezzers brahte	in daz Etzelen lant
Swie ir genomen wære	der Nibelunge golt
alle	die si gesahen	die machte si ir holt
noch mit dem chleinem gvote	daz si da mohte han
des wirtes ingesinde	wart michel gabe getan
Da widere bot do ere	div frowe Gotelint
den gesten von dem Rine	so minnekliche sint
daz man do der fremden	harte wenich vant
sine trvgen ir gesteine	oder ir vil herlich gewant
Do si enbizzen waren	vn– daz si solden dan
von der hvosfrowen	wart geboten an
getriwelicher dienest	daz Etzelen wip
do wart ovch vil getrvtet	der schonen iuncfrowen lip
Si sprach zer kuniginne	swenne ivch nv dunchet gvot
ich weiz wol daz iz gerne	min lieber vater tvot
daz er mich zvo ziv sendet	in der Hvnin [52r]lant
daz si ir getriwe wære	vil wol daz Chriemh' ervant
Div ros bereitet waren	fvr Bechelaren chomen
ovch het div kuniginne	vrlovp nv genomen
von Rvdegeres wibe	vn– von der tohter sin
do schiet ovch sich mit grveze	vil manic schone magedin
Ein ander si vil selten	gesahen nach den tagen
vzer Medeliche	vf handen wart getragen
manic goltvaz riche	dar inne braht man win
den gesten vf die straze	vn– bat si willechomen sin
Ein wirt <	> da gesezzen	Astolt was der nant
der wiste si die straze	nider in Osterlande
gegen Mvtaren	die Tnowe nider
da wart vil wol gedienet	der richen kuniginne sider
Der bisschof minnekliche	von siner nifteln schiet
daz si den kunic beeherte	wie vast er ir daz riet
vn– daz si ir ere chovfte	sam Helche het getan
hey waz si grozer eren	sit da zen Hvnin gewan
Zvo der Treysem brahte	man die geste dan
ir pflagen vlizzekliche	die Rvdegeres man
vnze daz die Huninn	riten vber lant
do wart der chuniginne	vil michel ere bechant
Bi der Treysem hete	der kunic von Hunin lant
eine burch vil riche	div was wol bechant
geheizen Treysenmvore	frov Helche saz da ê
vn– pflach so grozer tugende	deiz wetlich nimmer mer erge
ezen tæte danne Chriemh'	div also chvnde gebn
si mohte nach ir leide	daz liep vil wol gelebn
daz ir iahen ere	die Etzelen man
der si sit grozen vollen	bi den helden gewan
Div Etzelen herschaft	was so wit erchant
daz nnan zallen citen	in sime hofe vant
die aller besten rechen	von den ie wart vernomen
vnder kristen un– vnder heiden	die waren gein der brvte chomen
Bi im was zallen citen	daz wætlich mer erge
kristenlicher orden	vn– ovch der heiden ê
in swie getanem lebene	sich ieslicher trvoc
daz schvof des kuniges milte	daz man allen gap genvoch

<Si> was ze Treysenmvore	vnz an den vierden tac
div molte vof der straze	die wile nie gelac
sine stvbe sam iz brunne	allenthalben dan
da riten durch Osterriche	des kunic Ezelen man
Do waren ovch dem kunige	div mære nv geseit
des im von gedanchen	swnden siniv leit
wie herrenlichen Chriemh'	da chome durch div lant
er begunde vaste gahen	da er die minneklichen vant
Von vil maniger sprache	sah man vf den wegn
vor Ezelen riten	vil manigenn chvnen degen
kristen vn– heiden	vil ma[52v]nic witiv schar
da si ir frowen fvnden	si fvren vrolichen dar
Von Rvzzen vn– von Chriechen	reit da vil manic man
Polanen vn– Vlachen	den sah man ebene gan
ir pferit vn– ros div gvten	da si mit chreftin riten
swaz si site habeten	der wart vil wenich iht vermiten
Von dem lande vz Chyewen	reit ovch da manic man
vn– die wilden Pescenære	da wart des vil getan
mit den bogen schiezen	zen vogelen die da flvogen
ir pfile si vil sere	mit chraft vnz an die wende zvogen
Ein stat bi Tvonowe	lit in Osterlant
div ist geheizen Tvlme	da wart ir sit bechant
vil manic site vremde	den si nie da vor gesach
si enpfiengen da genvge	den leide sit von ir geschach
Vor Ezele dem richen	ein gesinde reit
vro	in hohem mvote	hobesch vn– ovch gemeit
wol vier vn– zweinzech fvrsten	rich un– her
daz si ir frowen sêhen	da von negerten si niht mer
Der herzoge Ramunch	vzer Vlâchen lant
mit sibenhundert mannen	chom er fvr si gerant
sam die wilden vogele	so sah man si varn
do chome der fvrste Gibeche	mit vil herlichen scharn
Hornboge der snelle	wol mit tvsint man
kerte vonme kunige	gein siner frowen dan
vil lvte wart geschallet	nach des landes siten
von den Hunin magen	wart ovch da sere geriten
Do chom von Tenemarche	der chvene Hawart
un– Irinch der starche	vor valsche wol bewart
vn– Irnfrit von Dvringen	ein fverste lobesam
die enpfiengen Chriemh'	als ez ir eren wol gezam
mit zwelf hundert mannen	die hetens in ir schar
ovch chom der herre Bloedelin	mit tusint helden dar
der Etzelen brvoder	vz der Hunin lant
der ilte mit den sinen	da er die kuniginne vant
Do chom der kunic Ezele	vn– ovch herre Dietrich
mit allen sinen degenen	da was vil lobelich
manic ritter edele	biderb vn– gvot
des wart der chvniginne	ein teil gesenftet der mvot
Do sprach von Bechelaren	der herre Rvdeger
frowe	ivch wil enpfahen	hie der kunic her
swen ich iv rate chvssen	daz sol sin getan
iane mvgt ir niht geliche	grvzen <alle> skuniges man
Do hvp man von dem moere	die kuniginne her
Ezele der riche	enbeite ovch do niht mer
er stvnt von sinem rosse	mit manigem chvnen man
man sah in vroliche	gein Chriemh' gen
Zwen fvrsten riche	als vns daz ist geseit
bi der frowen giengen	vn– habten ir div kleit
do ir der kunic Ezele	hin begegene gie
da si den fursten edele	mit chusse gvtlich enpfie
Vf rihte si ir geben[53r]de	ir varwe wolgetan
div lvhte ir vzem golde	da stvnt vil manic man
die iahen daz froe Helche	niht schoner chunde sin
da bi stvnt vil nahen	des wirtes <brvder> Bloedelin
Den hiez si chussen Rvedeger	der marcgrave rich
vnt den kunic Gibechen	da stvnt ovch her Dietrich
der rechen chuste zwelfe	daz Ezelen wip
do enpfie si svs mit grvoze	vil maniges chvnen rechen lip
In der selben wile	vn– Ezele bi ir stvont
do gebarten da die tvmben	so noch die lvte tvont
vil manigen pvneyz langen	sah man da geriten
daz taten kristen degene	vn– ovch die heiden nach ir siten
Wie rehte hurteklichen	die Dietriches man
die schefte liezen vliegen	mit trvnzvonen dan
vil hohe vber schilde	von gvter ritter hant
die si da gerne sahen	die wrden schiere bechant
Da wart von schefte brechen	vil michel chrach vernomen
do waren von dem lande	die rechen alle chomen
vn– ovch des chuniges geste	vil manic edel man
do gie der kunic riche	mit der kuniginne dan
Si sahen bi in stende	ein vil herlich gezelt
von hutten was erfvllet	alumbe gar daz velt
da si vnder solden rvowen	nach ir arebeit
von helden wart gewiset	vil manic wætlichiv meit
mit Chriemh' dannen	da si sit gesaz
vf riche gesidele	der marcgrave daz
hete so geschaffen	daz man ez vant vil gvot
do stvnt dem kunige Ezelen	harte hohe der mvot
Waz si zesamne redeten	daz ist mir vnbechant
wan zwisschen sinen handen	was ir wiziv hant
si gesazen minnekliche	da Rvdeger der degen
den kunic niht lazen wolde	der frowen heinliche pflegen
Do hiez man lan beliben	den buhvrt vber al
mit eren wart verendet	da der groze schal
do giengen zvo den hutten	die Ezelen man
man gab in herberge	vil witen allenthalben dan
Den abent zvo der nahte	si heten gvot gemach
vnz man den liehten morgen	aber schinen sach
do was gesatelet Ezelen	vn– allen sinen man
vil maniger chvrcewile	man im zen eren da began
Der chunic ez lobeliche	die Hunin scaffen bat
do riten si von Tvlme	ze Wiene zv der stat
da was vil wol gezieret	vil maniger frowen lip
si enpfiengen wol mit eren	des kunic Ezelen wip
Mit vil grozem vollen	so was in bereit
swaz si haben solden	vil manic helt gemeit
entrvsten riche sætele	die Ezelen man
sich hvp mit grozen eren	des kuniges hochgeciten an
Sine mohten niht beliben	ze Wiene in der stat
die niht geste waren	Rvdeger die bat
von der burege [53v]dannen	herbergen in daz lant
ich wæn man alle cite	bi frowen Chriemh' vant
den herren Dietrichen	vn– anders manigen degn
si heten sich der rowe	mit arebeite bewegn
durch daz si den gesten	getrosten wol den mvot
der kunic mit sinen frivnden	hete churcewile gvot
Div hochgecite was gevallen	an einen pfinxtach
do der kunic Ezele	bi Chriemh' lach
in der stat ze <Wiene>	si wæn so manigen man
bi ir ersten vriedel	nie ze dienste gewan
Si chvnte sich mit gabe	dem der si nie gesach
vil maniger darvnder	zvo den gesten sprach
wir wanden daz frov Chriemh'	niht gvetes mohte han
nv ist hie michel wnder	von ir gabe getan
Div hochgecit do werte	wol sibenzehn tage
ob chunic ie deheiner	mit warheit oder nach sage
deheine grozer gewnne	daz ist vns gar verdeit
alle di da waren	die trvgen iteniwe chleit
Si wæn in Niderlanden	da vor nie gesaz
mit so manigem rechen	da von gelovbe ich daz
was Sivrit rich des gvotes	daz er doch nie gewan
so manigen rechen edelen	als si zen Hunin mohte han
Ovch gab ir nie deheiner	zvo sin selbes hochgezit
so manigen richen mantel	lanch	<tief> vn– wit
noch so richer chleider	der si vil mohten han
so si durch Chriemh'	alle heten hie getan
Die chunden un– die geste	die heten einen mvot
daz si da niht sparten	deheiner slahte gvot
swes ieman an si gerte	daz gaben si bereit
des stvnt da vil der degene	von milte bloz ane chleit
Wie si ze Rine sæze	si gedaht an daz
bi ir vil edelem manne	ir ovgen wrden naz
si hetes vaste hæle	deiz iemen chunde sehn
ir was nach manigem leide	so vil der eren hie geschehen
Swaz iemen tet mit milte	daz was gar ein wint
vnz an Dietrichen	swaz Botelunges chint
im gegebn hete	daz was gar verswant
ovch tet da michel wnder	des milten Rvdegeres hant
Vzer Vngerlande	der fvrste Bloedelin
der hiez da machen lære	vil manigiv leitschrin
von silber vn– von golde	daz wart gar hin gegebn
man gesach nie kuniges degene	so rehte vroliche lebn
Swemmel vn– Wêrbel	die Ezelen spileman
ih wæn ir ieslicher	zer hochgecite da gewan
wol ze tvsint marchen	oder dannoch baz
da div frowe Chriemh'	bi Ezelen vnder chronen saz
An dem ahtzehenden morgen	von Wiene si do riten
da wart in ritterschefte	schilde vil versniten
von spern	die da fvrten	die rechen an der hant
svs chome der kunic Ezele	mit frevden in der Hunin lant
Ze Heimburch der alten	si waren vber naht
done chunde niemen wizzen	wol des volches aht	[54r]
mit wie getaner chrefte	si riten dvrch daz lant
hey waz man schoner frowen	in ir heymvete vant
Ze Miesenburch der richen	da schiften si sich an
daz wazzer wart verdechet	von ross vn– ovch von man
sam ez erde wære	swaz man sin vbersach
die <wegemveden> frowen	heten senfte vn– oech gemach
Zesamne was gebunden	manic schif vil gvot
daz in niht schaden chunde	die venden noch div flvot
dar vber was gespannen	vil manic gvot gezelt
sam ob si noch heten	bediv lant vn– velt
Ze Ezelen buorge	div mære chomen dan
do frevten sich dar inne	wibe vn– man
daz Helchen ingesinde	des ê div frowe pflach
gelebte bi Chriemh'	sit manigen froelichen tach
Do stvnt in lieber warte	vil manic edel meit
die von Helchen tode	heten manigiv leit
siben chunige tohter	Chriemh' noch da vant
von den was wol gezieret	allez Ezelen lant
Div iuncfrowe Herrat	noch des gesindes pflac
div Helchen swester tohter	an der vil tugende lac
div gemahle Dietriches	eins richen chuniges chint
div tohter Næntwines	div hete vil der eren sint
Von der geste chunfte	so troste sich ir mvot
ovch was dar zv bereitet	vil chreftechlichez gvot
wer chunde iv daz bescheiden	wie sit der kunic saz
sine gelebten da zen Hunin	mit deheiner chvniginne baz
Do der wirt mit sime wibe	von dem stade reit
wer ieslichiv wære	daz wart zehant geseit
der edeln kuniginne	si grvztes deste baz
hey wie gewaltekliche	sit an Helchen stat gesaz
Mit triwen hoher dienste	wart ir vil	bechant
do teilte div frowe Chriemh'	golt vn– ovch gewant
silber un– gesteine	swaz si des vber Rin
mit ir zen Hvnin brahte	daz mvse gar zerteilet sin
Ovch wrden ir mit dienste	sider vndertan
al des chuniges mage	vn– alle sine man
daz nie div frowe Helche	so gewaldechlich gebot
so si nv mvsin dienen	vnz an den Chriemh' tot
Do stvnt mit solhen eren	der hof vn– oech daz lant
daz man da zallen ziten	die churzewile vant
swar nach ieslichem	daz herce trvch den mvot
durch des kuniges liebe	vn– ovch die kvniginne gvot

<In> also hohen eren	daz ist alwar
si <wonte> bi dem kunige	vn–z in daz sibende iar
di zit div kuniginne	eines svnes was genesen
des chunde der chunic Ezele	nimmer vrolicher gewesn
Sine wolde niht erwinden	sine wrbe sint
daz getovfet wrde	daz Ezelen chint
nach christenlichem rehte	Ortliep wart <ez> genant
si woldenz [54v]han ze herren	vber elliv Ezelen lant
Swaz ie gvoter tugende	an froen Helchen lac
des vleiz sich froe Chriemh'	dar nach vil mannigen tac
die site si lerte Herrat	div ellende meit
div hete tovgenliche	nach ir frowen groziv leit
Die fremden vn– die chunden	die iahen da zehant
daz nie milter frowe	besæze ein kuniges lant
noch deheiniv tirr lebte	des iach man ir fvr war
si erwarp ir lop vil grozen	zen Hunin in daz zwelfte iar
Si hete nv wol erchvnnen	daz ir niemen widerstvnt
als iz noch fursten wibe	kuniges rechen tvont
vn– daz si alle cite	zwelf kunige vor ir sach
do gedahtes maniger leide	der ir da heime geschach
Si gedaht ovch maniger eren	von Nibelunge lant
der si da was gewaltech	vn– die ir Hagenen hant
mit Sivrides tode	hete gar benomen
si gedaht	ob im daz immer	noch ze leide moehte chomen
Si wnschte daz ir mvoter	wære in Hunin lant
ir trovmte daz ir Giselher	gienge an der hant
bi Ezele denn chunige	si chvsten zaller stvont
vil diche in senftem slafe	sit wart in arebeiten chvnt
Sine chvnde ovch nie vergezzen	swie wol ir anders was
ir starchen hercen leide	in ir hercen si ez las
mit iamer zallen stvnden	daz man sit wol bevant
do begvnde ir aber salwen	von heizen trahen ir gewant
Ez lac ir an dem hercen	spat un– frvo
wie man si ane schulde	brahte der zvo
daz si mvose minnen	einen heiden man
daz het ir frivnt Hagene	vn– ovch Gunther getan
Daz si daz rechen moehte	des wnschtes alle tage
ich bin nv wol so riche	swem iz ovch missehage
daz ich wol minen vinden	mac gefvegen leit
des wær et ich von Tronege	Hagene gerne bereit
Nach den getriwen iamert	dichez herce min
die mir da leide taten	moeht ich bi den gesin
so wrde noch errochen	nmines mannes lip
des ich vil chvme erbite	sprach daz iamerhafte wip
Ze liebe si do heten	alle skuniges man
die Chriemh' rechen	daz was wol getan
der kamern der pflac Ekkewart	da von er frivnt gewan
den Chriemh' willen	mohte niemen verstan
Si gedahte zallen citen	si wolden kunic biten
daz er ir des gunde	mit gvetlichen siten
daz man ir <frivnde> bræhte	in der Hunin lant
den argen willen niemen	an frown Chriemh' ervant
Do si eines nahtes	bi dem kunige lac
mit armen vmbevangen	als er vil dicke pflac
die edelen frowen trveten	si was im so der lip
do gedahte an ir vinde	daz vil herliche wip
Si sprach zv dem kunige	vil lieber herre min
ich <wolde> ivch biten gerne	moeht [55r]ez mit fvege sin
daz ich mich sehn liezet	wie ich hete daz versolt
ob ir minen frivnden	wæret innechlichen holt
Do sprach der kunich riche	getriwe was sin mvot
ich bringe ivch des wol innen	swa lieb vn– gvot
den helden widerfvere	des mves ich frevde han
wande ich von wibes minne	bezzer frivnde nie gewan
Do sprach div kuniginne	iv ist daz wol geseit
ich han vil hoher mage	darvmbe ist mir so leit
daz mich die so selten	rvchent hie gesehn
ich hore min die lvte	niwan fvr ellende iehn
Do sprach der kunic Ezele	vil liebiv frowe min
dvhtez si niht ze verre	so ladet ich vber Rin
swelh ir da gerne sæhit	her in miniv lant
div rede ir wol behagete	da si den willen sin ervant
Si sprach	welt ir mir triwe	leisten	herre min
so svlt ir boten senden	von vns vber Rin
sone bivte ich minen magen	des ich da habe mvot
so chvmt vns her ze lande	vil manic edel ritter gvot
Er sprach	swenne ir gebietet	so lazet ez geschehn
irn dorftet iwer frivnde	nie so gerne sehn
als ich hie gesæhe	der edeln voten chint
mich mvet daz harte sere	daz si vns so lange fremde sint
Er sprach	ob dv ez ratest	vil liebiv frowe min
di mine videlêre	nach den frivnden din
wil ich ze boten senden	in Burgonden lant
die Ezelen videlære	hiez man bringe sa zehant
Die knappen chomen beide	da ir herre saz
bi der kuniginne	der kunic in sagte daz
si solden boten werden	in siner frivnde lant
do hiez man in bereiten	harte schiere gvot gewant
vn– ir vartgesellen	vier unt zweinzech man
di mit in varn solden	zen Burgonden dan
in tet der chvnich Ezele	chvnt den willen sin
wie si laden solden	Gvnthern mit den frivnden sin
Do sprach der kunich riche	ich chvndiv minen mvot
ich enbivt minen frivnden	lieb vn– allez gvot
daz si gervchen riten	her in miniv leit
ich han so lieber geste	harte selten noch bechant
vn– ob si mines willen	wellen iht began
die mine chonemage	daz si des niht lan
sine chomen mir ze liebe	zvo miner hochgecit
wande vil der minen wenne	an miner frowen magen lit
Do sprach der knappen einer	der hiez Swæmmelin
benennet vns die hochgecit	wenne sol div sin
daz miner frowen frivnde	dar zvo mvgen chomen
des wart der kuniginne	ir leides harte vil benomen
Do sprach der kvnic here	die minen hochgecit
svlt ir ze Rine chvnden	daz ir gewis des sit
ze næhsten svnewenden	so wil ich si han
die vns mit triwen minnen	daz si die reise niht enlan
Wir tvon swaz [55v]ir gebietet	sprach do Wærbelin
in ir kemenaten	bat si div kunigin
bringen tovgenlichen	da si <die> boten sprach
da von sit manigem degene	harte leide geschach
Si sprach zen boten beiden	ir dienet michel gvot
ob ir minen willen	tovgenlichen tvot
so sagt swaz ich enbiete	heim in vnser lant
ich mache ivch gvtes riche	vn– gibe iv herlich gewant
Swaz ir der minen frivnde	immer mvget gesehn
ze Wormze bi dem Rine	den svlt ir niht veriehn
daz ir noch ie gesæhet	betrvebet minen mvot
vn– saget minen dienest	den heleden <chven> vn– gvot
Bitet daz si leisten	daz in der kunic enbot
vn– mich da mite scheiden	von aller miner not
die Hvnen mvgen wænen	deich ane frivnde si
ob ich ein ritter hieze	ich wær in eteswenne bi
Ir saget ovch Gernote	dem lieben brvoder min
daz im zer werlde niemen	holder mvege sin
vn– bitte in daz er fvere	mit im in dizze lant
die vnser besten frivnde	deiz vns zen eren si gewant
Vn– sagt ovch Giselhere	er denche wol dar an
daz er von minen schulden	nie leides niht gewan
des sêhen in vil gerne	hie div ovgen min
daz wolde ich immer mere	hinz im diende sin
Nv sagt ovch miner mvoter	die ere die ich han
vn– ob von Tronege Hagene	welle dort bestan
wer <si> danne solde	wisen durch div lant
dem sint die wege von kinde	her zen Hvnin wol bekant
Die boten niene wessen	wa von daz was getan
daz Hagene der chvene	solde niht bestan
hinder in Rine	daz wart in sider leit
mit im was manigem degene	zem grimmem tode widerseit
Boteschaft vn– brieve	daz was nv gegebn
si fvren gvotes riche	vn– mohten schone lebn
vrlovp gab in Ezele	vn– ovch des <kuniges> wip
in was mit richer wæte	vil wol gezieret der lip
Do der kunic Ezele	von im gesande
sine boten zvo dem Rine	von manigem lande
braht er vil der rechen	zvo siner hochgecit
der deheiner nimmer mere	chom zvo sime lande <SIT>

<Die> boten dannen fvren	vber Hvnin lant
zvo den Burgonden	dar waren si gesant
nach drin edeln kunigen	vn– ovch nach ir man
die solden chomen Ezelen	des man gahen do began
Hin ze Bechelaren	chomen si geriten
da diente man in gerne	daz wart niht vermiten
sin dienst enbot do Rvdeger	vn– ovch Gotelint
bi in hin ze Rine	vn– ovch des marcgraven kint
Sine liezens ane gabe	von in niht schei[56r]den dan
daz deste baz gefveren	die Ezelen man
Vten vn– ir kinden	enbot do Rvedeger
sine heten in so wæge	deheinen marcgraven mer
Si enbvten ovch Prvnh'	dienste vn– gvot
triwe un– minne	vn– willigen mvot
do si die rede gehorte	die boten mvsin varn
si bat div marcgrauinne	got von himele bewarn
E daz di boten chomen	vol dvrch Bayerlant
Wærbel der vil snelle	den gvten bisschof vant
waz der do sinen frivnden	hin ze Rine enbot
daz ist mir vngewizzen	niwan sin golt also rot
daz gab er in ze minne	ritern er si lie
do sprach der bisschof Pilgerim	solde ich si sehen hie
mir wære wol ze mvote	die swester svne min
ich mach leider selten	zvo zin chomen an den Rin
Welhe wege si fvoren	ze Rine dvrch div lant
desen chan ich niht bescheiden	ir golt vn– ir gewant
daz ennam in niemen	man vorht ir herren haz
Ezel was vil gewaltich	man erchande in allen landen daz
Inre tagen zehenen	si chomen an den Rin
ze Wormze zv der veste	Wærbel vn– Swæmmelin
do sagte man div mære	den kvnigen vn– ir man
da choemen boten vremde	Gunther vragen do began
Do sprach der vogt von Rine	wer tvot vns bechant
von disen vremden rechen	die choment in daz lant
daz enwesse nieman	vnze si gesach
Hagene der chvene	der helt zvo Gunthere sprach
Uns choment niwe mære	des wil ich iv veriehn
die Ezeln videlære	die han ich hie gesehn
si hat iwer swester	gesendet an den Rin
durch die Ezelen liebe	si svln vns willechomen sin
Si riten vil bereite	fver den palas dan
ez gefvren herrenlicher	nie fvrsten spileman
des chuniges ingesinde	enpfie si sa zehant
ir rôs man herbergen	vn– hiez behalten ir gewant
Ir reisechleider waren	rich vn– so getan
daz si mit eren mohten	fvr den kunic gan
der enwolden si niht mere	da ze hove tragn
obs iemen nemen wolde	die boten hiezen daz sagn
In der selben maze	man ovch lvte vant
die ez vil gerne namen	den wart ez gesant
do leiten an die geste	verre richer wat
als ez boten kuniges	ze tragen herlichen stat
Do gie mit vrlovbe	da der kunic saz
daz Ezelen gesinde	vil gerne sah man daz
Hagene von den sedele	gein den boten spranch
vn– lief in engegene	des sagten im die chnappen danch
Durch div chvnden mære	vragen er began
wie sich gehabte Ezele	vn– ovch sine man
do sprach der videlære	daz lant gestvnt nie baz
noch wrden vro die [56v]die lvote	ich sagiv endechliche daz
Er brahtes zv den wirte	der palas der was vol
do enpfie man die geste	so man von rehte sol
minnechliche grvezen	in ander kvnige lant
Swæmmil vil der degene	da bi Gunthere vant
Der chunic gezogenliche	grvzen si began
sit willechomen beide	ir Ezelen spileman
vn– iwer hergesellen	hat ivch her gesant
der kunic von den Hvnin	zvo der Burgonden lant
Mit zvht si nigen beide	do sprach Wærbelin
iv enbivtet sinen dienest	der liebe herre min
vn– Chriemh' iwer swester	her in dizze lant
si habent vns iv heleden	in grozen triwen her gesant
Do sprach der fvrste riche	der mære bin ich vro
wie gehabt sich Ezele	so sprach der chunic do
vn– Chriemh' min swester	vzer Hvnen lant
do sprach der videlære	div mære tvn ich iv bechant
Sich gehabten chunige	ir svlt wol wizzen daz
in deheinem lande	vrolicher noch baz
vn– allez ir gedigene	die mage vn– ovch ir man
si frevten sich der reise	do wir schieden von in dan
Gnade siner dienste	die er mir enboten hat
vn– ovch miner swester	mir ist liep daz also stat
daz si so lebnt mit vrevden	der chunic vnt sine man
wande ich doch der mære	gevraget sorgende han
Die zwene ivngen chvnige	waren ovch nv chomen
wande si div mære	heten erst vernomen
dvrch ir swester liebe	die boten gerne sach
Giselher der ivnge	der zvo zin gvetlichen sprach
Ir boten soldet groze	vns willechomen sin
ob ir dicker woldet	zvns riten an den Rin
ich wæn ir frivnde fvndet	die ir gerne moehtet sehen
iv solde von vns degenen	lvzzil leides geschehn
Wir getrwoen iv aller eren	sprach do Swæmmelin
ine chvnd iv niht bewæren	mit den sinnen min
wie minneklich iv Ezele	her enboten hat
vn– iwer edeliv swester	der dinch in hoher wirde stat
Gnade vn– triwe	mant ivch des kuniges wip
vn– daz ir ie was wæge	iwer herce vn– iwer lip
vn– ze vorderst dem kunige	sin wir her gesant
daz ir gervchet riten	zvo zin in der Hvnin lant
Ez sol ovch mit iv riten	der herre Gernot
Ezele der riche	iv allen daz enbot
ob ir ivch iwer swester	niht sehn woldet lan
so wolde er gerne wizzen	waz er iv rechen hete getan
daz ir also vremdet	in vn– siniv lant
ob iv div kuniginne	wære nie bechant
so moeht er doch verdienen	daz in ir rvchet sehn
swenne daz geschêhe	so wær im liebe geschehn
Do sprach der kunic Gvnther	nv lat die rede stan
vn– vart ze herbergen	ich wil ivch hoeren lan
in disen siben [S 91r Z 5] nachten	wil ich in sein lant
swes ich mich berate	die maere tun ich ew bechant
Do sprach der bote Waerbel	chünde daz geschehen
das wir meine frawn	mochte e gesehen
Vtten die vil reichen	e wir schufen vns gemach
Geyselher der edel	do ail zuchticleich sprach
Das ensol ew niermant wenden	welt ir fur si gan
da habt ir meiner mueter	willen an getan
wan– si sicht ew gern	durch die szvester meine
vnd durch den chünig Etzln	des sult ir an zweiuel sein
Geyselher si pracht	da sein muter sas
sy sach die boten gern–	mit trewen tet si das
si grüzt sei mit tugent	wan si was wol gemuot
ia daucht [91v]si die maere	von der chüniginne guot
Mein fraw ew here enbivtet	so sprach Swaemmelin
ir dienst in grossen trewen	des sult ir sicher sein
das ir seit ir so frömde	daz haizzet si ew
 mute tragen
Da sprach die chünigin	das mag nicht laider gesein
swie gern ich dikch saech	die liebe tochter meine
ia ist mir ze verre	des edln chunigs weip
nu sein immer <saelich>	baide si vn– Ettzln leip
Ir solt mich lazzen wissen	e daz ir raumet hie
wenne ir reiten wellet	in gesach so gern nie
boten in langen zeiten	danne ich ew hhan gesehhen
die boten ir do lobten	daz si das liezzen geschehen
Zen herbergen do fuoren	die von Heunen lannt
da het der chünig reiche	nach den frivnden sein gesant
Gunther der vil edel	fragt sein man
wie in die rede behagte	vil manger raten do began
er rite wol mit ern	in chünig Ettzeln lant
das rieten im die pesten	die dar vnder vant
newer Hagen alaine	dem waz ez grimme lait
er sprach [92r]zu dem chhünig taugen	ir habt ew selben widersait
Nu ist ew wol gewissen	was wir han getan
des müg wir immer sorge	auf Chrimhilden han
auch slug ich ze tode	ir man mit meiner hant
wie getorsten wir gereiten	in des chünigs Ettzln lant
Do sprach der chünig reiche	mneine swester lie den tzorn
mit chüsse minnicleich	si hat auf vns verchorn
daz wir ir ie getaten	e daz si hinnen rait
ez en sey et Hagen danne	ew ainer von ir widerseit
Nu lat ew nicht betrigen	sprach Hagen	swes si iehen
die boten von den Heunen	vnd welt ir Chrimhilden sehen
ir mugt do wol verliesen	ewer ere vn– ewrn leip
ez ist vil lanch raeche	des reichen chünig Etzeln weip
Do sprach zu dem rate	der fürste Gernot
ob ir nu von schulden	forchtet den tod
in <heunischen> reichen	solden wir ez dar durch lan
wir <ensaehn–> vnser swester	daz waer zaegleich getan
Do sprach der herre Geyselher	zu dem [92v]degen
seit ir ew schuldig wizzet	frivnt her Hagen
so sultir hie beleiben	vnd vil wol bewaren
vnd lazzet die getürren	mit vns <zu> den Heunen varen
Do begunde zuren	von Tronge der degen
ich wil daz ir iemant	füret auf den wegen
der mit ew türre reiten	hin ze houe pas
seit ir nicht welt erwinden	ich lazze ew wol versuchen das
Do sprach der chüchen maister	Ruomolt der degen
gester vnd ewer selber	mügt ir haizzen phlegen
nach ewers selben willen	zr habt vil guten rat
vnd wizzet daz ew Hagen	daz waegist noch geraten hat
Vnd wolt ir im nicht volgen	ew ratet Ruomolt
ich pin ew mit trewen	vil dienstleichn– holt
daz ir hie beleibet	durch den willen meine
vnd lat den chünig Etzel	dort pei Chrimhilden seine
Wie chunde ew in der wolde	immer pas gewesen
ir mügt vor ewrn veinden	hie haime wol genesen
ir sult mit reicher waete	ziren wol den leip
trinchet [93r]wein den pesten	vnd minnet waetleichiv weip
Dar zu geit man ew speise	die pesten die man hat
indert in der werlde	ewer lant vil schon stat
ir mügt euch wol Etzln hochtzeit	mit ern wol bewegen
vnd mügt mit ewrn frewnden	vil guter chürtzweile pflegen
Ob ir nicht anders hiete	daz ir möchte geleben
ich wolde ew ain speizze	den volln immer geben
sieden in öl geprawen	daz ist Ruomoldes rat
so ist ez sust angistleichn–	erhebn da zen <Heunen> stat
Ich waiz daz meine frawe Grimhhilde	ew nimmer wirdet holt
auch habt ir vn– Hagen	zu ir anders nicht versolt
des sult ir beleiben	ez mag ew werden leit
ir chomet ez an aine ende	daz ich ew nicht han missesait
Des rat ich ew
 michel sanfte	lösen hie die phant
danne da zen Heunen	ich wais wie ez da gestat
ir sult beleiben	herre	daz ist trewen meine rat
Wir enwellen nicht beleiben	sprach do Gernot
seit das vns meine swester	so [93v]frivntlieh enbot
vnd Etzel der reiche	zweu solde wir das lan
der dar nicht welle	der mag hie heime bestan
Entrewen	sprach do Ruomolt	ich sols der aine sein
der durch Etzel hochtzeit	chuompt nimmer vber den Rein
<zweu> sold ich daz wagen	daz ich waegers han
die weil ich mag immer	ich wil mich selben leben lan
Des selben wil ich volgen	sprach Ortwin der degen
ich wil des geschhaftes	hie haime mit ew phlegen
do sprach ir genuog	si woldens auch bewaren
got lazz ew	liebn– herrn	zen Heunen wol bewaren
Der chünig begunde züren	do er daz gesach
daz die hie haime wolden	schaffen ir gemachh
darvmb wir ez nicht lazzen [57r]	wir mvzen an die vart
ez waldet gvter sinne	der sich alle zite bewart
Nv lat ivch vnbilden	sprach do Hagene	niht
mine rede darvmbe	swie halt iv geschiht
ich rat iv an den triwen	welt ir ivch wol bewarn
so svlt ir zvo den Hvnen	vil gewærliche varn
Sit ir niht welt erwinden	so besendet iwer man
die besten die ir vinden	oder inder mvget han
so wel ich voz in allen	tvsent ritter gvot
sone chan vns niht gewerren	der argen Chriemh' mvot
Des wil ich gerne volgen	sprach der kunic zehant
do hiez er boten riten	witen in sin lant
do brahte man der helde	driv tvsint vn– mer
si wanden niht erwerben	also gremelichiv ser
Si riten willechliche	in Gunthers lant
man hiez in gebn allen	rosse vn– ovch gewant
die mit in varn wolden	zvo den Hvnen dan
der kunic in gvtem willen	der vil manigen gewan
Do hiez von Tronege Hagene	Danchwart den brvoder sin
ir beider rechen sehzich	bringen an den Rin
die chomen ritterliche	harnasch vn– gewant
des brahten vil die degene	in daz Gunthers lant
Do chom der herre Volker	ein kvene spileman
hin ze hove nach eren	mit drizzech siner man
die heten soelch gewæte	ez moeht ein kunic tragen
daz er zen Hvnin wolde	daz hiez er dem chvnige sagen
Wer der Volker wære	daz wil ich wizzen lan
er was ein edel herre	im was ovch vndertan
vil der gvoten rechen	in Burgonden lant
dvrch daz er videln kunde	was er der spileman genant
Tvsent welt Hagene	die hete er wol bechant
vn– swaz in starchen stvermen	hete gefrvemt ir hant
vn– swaz si ie begiengen	des het er vil gesehn
in chvnde ovch anders niemen	niwan frvemcheite iehn
Die boten von den Hvnen	vil sere da verdroz
wande ir vorht zir herren	div was harte groz
si gerten tægeliche	vrlovbes von dan
des engunde niht Hagene	daz was dvrch liste getan
Er sprach zvo sime herren	wir svln daz wol bewarn
daz wir si iht lazen riten	e daz wir selbe varn
dar nach in tagen sibenen	wider in ir lant
treit vns iemen argen mvot	daz wirt vns deste baz bechant
Sone chan ovch sich vroe Chriemh'	bereiten niht dar zvo
daz vns durch ir ræte	iemen schaden tvo
hat aber si den willen	ez mag ir leide ergan
wande wir fveren hinnen	manigen vz erwelten man
Sætil vn– schilde	vn– ander ir gewant
daz si fveren solden	in Ezelen lant
daz was nv gar bereitet	vil manigem chvenem man
die Ezelen videlære	hiez man do ze hove gan
Do si die fvrsten sahen	do sprach Gernot
der chvnic wil nv lei[57v]sten	daz Ezel vns enbot
wir wellen chomen gerne	z siner hochgezit
vn– sehn vnser swester	daz ir des ane zwivel sit
Do sprach der kunic Gvnther	ir svlt vns wizzen lan
wenne si die hochgezit	zen Hunen wellen han
des antwrtem kvnige	der bote Swæmmelin
ze næhsten svenewenden	so sol si sicherchen sin
Der chvnich in erlovbte	des was noch niht geschehn
ob si gerne wolden	Prvnh' sehn
daz si fvr si solden	mit sime willen gan
daz vnderstvnt do Volker	daz was ir liebe getan
Ian ist	so sprach Volker	ein <edel> ritter gvot
Prvnh' min frowe	nv niht wol gemvvot
bitet vnze morgen	so læt mans ivch sehn
do si sie wanden schowen	done chvndes niht geschehen
Do hiez der chvnic riche	der was den boten holt
dvrch sines hercen tvgende	tragen dar sin golt
vf den breiten schilden	des er vil mohte han
ovch wart in richiv gabe	von sinen frivnden getan
Gernot vn– Giselher	Gere vn– oertwin
daz ovch si milte wæren	daz wart da vil wol schin
also riche gabe	si sie bvten an
daz si ir vor ir herren	deheine torsten enpfan
Do sprach zvo dem chunige	der bote Wærbelin
her chvnic	lat iwer gabe	in ivrem lande sin
wir mvgen ir niht gefvren	min herre ez vns verbot
daz wir iht gabe enpfiengen	ovch ist es decheiner slahte not
Des wart der chvnic here	sere vngemvot
daz si versprechen wolden	so riches kvniges gvot
doch mvsten si enpfahen	sin golt vn– sin gewant
daz si mit in brahten	sit in Ezelen lant
Si wolden sehen Vten	ê daz si schieden dan
Giselher der snelle	braht die spileman
ze hove fvr sine mvoter	div frowe enbot do dan
swaz si eren hete	daz wære ir liebe getan
Do hiez div kuniginne	ir porten vn– ir golt
gebn dvrch Chriemh'	wan der was si holt
vn– dvrch den kunec Ezelen	den selben spileman
si mohtenz wol enpfahen	ez was mit triwen getan
Vrlovp genomen heten	von wibe vn– von man
die boten Chriemh'	mit frevden si do dan
fvrn vnz in Swaben	dar hiez si Gernot
sine lvte leiten	daz ez in niemen missebot
Do sich die von in schieden	die ir solden pflegn
div Ezelen herschaft	si vridet vof allen wegn
des ennam in niemen	ir ros noch ir gewant
si begvnden vaste gahen	wider in der Hvnen lant
Swa si ir frivnde iht wisten	daz taten i den chvnt
daz die Burgonden	in vil chvrcer stvnt
zetal von Rine fveren	in der Hvnen lant
dem bisschofe Pilgerine	div mære wrden ovch bechant
Do si mit solher ile	fvr Bechelaren riten
si sagtenz Rvde[96r]ger	des wart nicht vermiten
vnd auch Gotlinde	des margraffen weip
daz si sew sehen solden	des wart vil vroleichn– ir leip
Gahen mit den maern	sach man die poten dan
Etzln si funden	in der stat ze Gran
dienst vbir dienst	des man in vil enpot
sagten si dem chünig	vor liebe wart er freunden rot
Do die chuniginne	die maere recht enphant
daz ir brüder solden	chomen in das lant
do was ir wol ze muote	si gab den spilman
also reiche gabe	[96v]si mochtens immer frumen han
Si sprach	nu sagt rnir paide	vil lieben poten mein
welcher meiner frewnde	hie pei vns welle sein
der hochsten die wir ladaeten	her in ditz lant
si sprach	was redet Hagen	do er die maere bechant
Er sprach	er chome ze frage	an ainem morgen fru
nicht guotleicher sprache	redt er do zu
do si die raise lobten	von Wurmtz vbir Reine
daz wyzzet	chüniginne	ez chunde im laider nicht gesein
Ez chomen ewr brüder	die chünig al drey
in herleichen mute	wer rekchen mit im sei
der maer ich endleiehe	wizzen niman chan
ez lobten mit im reiten	Volker der chüne spilman
Des enbaer ich leichte	sprach des chunigs weip
daz ich immer hie gesaehe	den Volkers leip
Hagen pin ich waege	der ist ein rekche gut
daz er chumpt zen Heunen	des stat mir höch der mut
Da gie die chüniginne	da si den chünig sach
wie rechte minicleichen	frawe Chrimhild do sprach
wie zaement ew die maer	vil lieber herre
des ie meine hertze gerte	daz sol nu wol verendet [97r]sein
Dein wille der ist mein freude	sprach der chünig do
ich enwart meine selbes mage	nie so rechte vro
so ich si weste chomende	her in ditze lant
durch liebe deiner frewnde	ist meine sorge gar verswant
Des chünigs amptleut	die hiezzen vbir al
mir gesidel richten	palas vnd sal
gen den lieben gesten	die in da solden chomen
seit wart von dem chunige	vil michel wunne benomen

Nv lazzen das belaiben	wie si gebaren bie
hoch gemuter rekchen	die gefuoren nie
so rechte herleichn–	in dhaines chünigs lant
si hetten was si wolden	dar zu waffen vn– gewant
Der vogt von dem Rein	chlaidet sein man
sechtzig vnd tawsent	als ich vernomen han
vnd newne tawsent chnechte	gen der hochtzeit
die si dahaime liezzen	die bewainten ez seit
Do truog man die geraite	ze Wuormtz vbir den hof
da sprach do von Speier	ain alter bischoff
zu der alten chü[97v]niginne	vnser frewnt die wellent varen
hin zer hochtzeite	got muzze ir er wol bewaren
Do sprach zu ir	du edel Vte
ir möchte noch beleiben	holde guote
ich sach heint in treume	vil angestlichhe not
wie alles daz gefügel	in disem lande lait tot
Swer gelawbet trawmen	sprach do Hagene
der enwais der rechten maere	nicht zu sagene
wenne ez im nach dem ern	vollichen ste
ja wil ich daz meine herre	ze houe nach vrlaup ge
Wir sullen gern reiten	in Etzln lant
so mag wol chünigen dienen	guter helde hant
da wir do müzzen schawen	Chrimhilden hochtzeit
Hagen riet die raise	iedoch gerawe ez in seit
Ez het ez wider rate	newr das Gernot
mit vns efügen sprechen	im sere missebot
er mant in Seifrides	frawn Chrimhilden man
er sprach	do vorz wil Hagen	die grozzen houe raisen lan
Do sprach der von Tronge	[98r]durch vorcht ez nieman tu
swenne ir	helde	wellet	so sult ir greiffen zu
ia reite ich mit ew	in Etzln lant
seit wart von im verhawen	manig helm vnd rant
Dew scheff beraitet waren	ze varen vbir Rein
swas si chlaider beten	die trug man dar ein
si waren vil vnmüssig	vor abendes zeit
doch chomen si von haus	vil harte froleich seit
Gezelt vnd hütten	si spinen an daz gras
an der halb des Reines	do daz geschehen was
den chünig pat noch beleibn–	sein vil schones weip
si traute noch des nachtz	seinen waetlichn– leip
Floiten vn– videln	hup si des morgens fru
da si da hin musten	do griffen si do zu
swer hete lieb an arme	der traute frewdes leip
des schiet seit mit laide	des chünig Etzln weip
Ruomolt der chuochenmaister	ein vil chüne man
der nan sein herrn	haimleich dan
do sagt er dem chünig	taugen seinen muot
er sprach	des muozz [98v]ich trawren	daz ir die houe reizze tut
Ich <han> ewch vil gewarent	vnd auch genug gemant
er sprach	wem welt ir lazzen	leute vnd lant
daz niemant chan erwenden	ew rekchn– tumbn– mut
dew Chrimhilde maere	nie gedauchtn– si mich gut
Daz lant sei dir enpholhn–	vnd andern meinen man
die ich haime lazze	vnd alles daz ich han
mein chint vnd meine gesinde	vnd meiner frawen leip
ia getut vns nimmer laide	dez chünig Etzln weip
E daz si schieden danne	der chunig zu rate gie
mit seinen hochsten mannen	vnberichtet er nicht lie
lant vnd burge	die der solden pflegen
den liez er ze huote	vil mangen auzerwelten degen
Die ros beraitet waren	der chunigen vn– ir man
mit minecleichn– chüssen	schiede vil manger dan
dem in hohn– muote	lept do der leip
daz must seit bewainen	vil manich waetleich weip
Wuoffen vnd [99r]wainen	des hort man genug
ir chint die chüniginne	zu dem chünig auff armen trug
wie welt ir im verwaisen	vnser paider leip
ir solt durch vns belaibn–	so sait daz iamerhafte weip
Ir sult nicht	fraw	wainen	durch den willen meine
ir sult in hoben muote	hie haime an angst sein
wir chormen schir wider	mit frewden wol gesunt
si schiedn– minnicleichn–	von ir frivndn– sa ze stunt
Do man die snellen rekchn–	sach zu den rossen gan
do chost man wainende	vil mange frawen stan
daz ir vil langes scheiden	sagt in wol ir mut
auff grozzen schaden ze chomene	daz hertzen niemant sanfte tut
Die snellen Borgonden	sich an hubn–
da wart in dem lande	ein michel üben
paidentbalbn– des Raines	wainten weip vnd man
swie dort ir volche getarte	si furen fröleich dann
In der selben tzeiten	[99v]was der gelaube nach chrankch
doch fruomtens ainen capplan	der in messe sanch
der <chome> gesunder wider	wan der vil chaume entran
die andern musten alle	da zen Heunen bestan
Do schikchten si ir raise gen den Nevnen dan
auf durch Osterfrankchn–	der dreier chünig man
dar laite si do Hagen	dem was ez wol bechant
Danchwart was marsalch	der helt von Burgunden lant
Do si durch Swanvelde	riten von Osterffranchen
do mocht man si chiesen	an herleiehen siten
di fürsten vnd er ir mage	die helde lobesam
an dern tzwelften morgen	der chunig ze Tunawe quam
Do rait von Tronge Hagen	ze aller foderst
ez was den Nybelungen	ein hilfleicher trost
do stunt der degen chüne	nider auf den sant
sein ros er harte balde	zu einem pawm gepant
Daz wazzer was engozzen	die scheff verporgen
ez chome den Nybelungen	ze grozzen sorgen
wie si chomen [roor]vbir den wach	der was gar ze berait
do erbant zu der erden	manich ritter gemait
Laider	sprach so Hagen	mag dir wol hie geschehen
voget von dem Reine	nu möcht du selbe sehhen
daz wazzer ist engozzen	vil starche ist im sein flut
ich waen wir hie verliesen	noch hewte vil mangen ritter gut
Waz weizzet ir mir	Hagen	sprach do der chünich her
durch ewr selbs tugent	vntrost vns nicht mer
den furt sult ir vns suchn–	hin vbir das lant
daz wir hinnen bringen	baidew ros vnd gewant
Ja en ist mir	sprach da Hagen	mein lebn– nicht so lait
daz ich mich ertrenkchn–	in disem wage berait
er sol von meinen handen	ersterbn– manich man
in Etzln landen	des ich vil guten willen han
Beleibet bei dem wazzer	ir stoltzen ritter gut
ich wil die vergen suchen	selbe pei der flut
die vns vbir bringen	in das Etzln lant	[100v]
Hagen der chüne	nam seinen schilde an die hant
Der holt vil gut gewaeffen	an seinen leip trug
vnd ainen helm auf seinem hawpt	lauter genuch
do trug er ob der prum	aine waffen also prait
daz zu seinen eken	hart pitterleich snait
Er suchte nach den vergen	wider vnd dan
er horte wazzer giezzen	<lozzen> er began
in ainem schonen prunn	daz taten weisew weip
die chülten sich dar ynne vn– bedawten iren leip
Hagen wart ir ynne	er slaich in sanfte nach
do si den helt ersahen	do ward in von in gach
daz si im entrunnen	des waren si vil her
da nam er ir gewaete	der helt der schadet in nicht mer
Da sprach das aine merweip	die was Haderburg genant
her Hagen	gebt uns wider	vnser gewant
do ir vns	edel rekch	gebt wider vnser [101r]wat
ich sag ew wie ewer raise	hin zen Heunen ergat
Si swebten so die vogle	vor im auf der flut
des dauchten in ir list	starkch vnd gut
swas si im sageten	er gelawbt ins dester pas
des er an si gerte	ir ainew sagt im daz
Si sprach	ir mügt wol reiten	in Etzln lant
des sei mein trewe bürg	mein haubt sei ewr phant
daz held nie gefuoren	in dhaine reiche pas
nach also grozzen ern	ir solt wol gelauben daz
Die rede waz da Hagen	in seinem hertzen her
er gab ir wider ir chlaider	der helt sampt sich nicht mer
do si do an geleten	ir wunderleich gewant
do sagten si im die raise	in daz Etzln lant
Do sagt daz ander merweip	die hiez Winelint
ich wil dich waren	das Adrianes chint
durch der waete liebe	hat mein muome dir gelegen
vn– chuompst [101v]zu den Heunen	so pist du sere betrogen
Do solt du cheren wider	daz ist an der tzeit
wande ir helde chüne	also geladet seit
daz ir ersterben müset	in der Heunen lant
swelch dar gereitent	die hant den tot an der hant
Des antwort Hagen	ir trieget an not
wie chünde sich gefügen	daz wir alle tot
zer hochtzeit gelegen	durch iemandes has
do begunde si im die maer	sagen chundleich pas
Si sprach	nu merchet	Hagen	ia muoz ez also wesen
daz ewer dhainer	da nicht chan genesen
wan aine des chünigs cappelan	da bei sei ew bechant
der chuompt gesunder wider	in des Günthers lant
Da sprach in grimmem mute	der chüne Hagen
daz waer meinen herrn	müleich ze sagen
daz wir zen Heunen solden	fliezzen alle den leip
nv zaig vns vbir daz wasser	das aller weisiste weip
Si sprach	seit ir der verte	nicht wellet habn– [102r]rat
swa ienhalbe pei dem wazzer	ain berberge stat
dar inne ist ein verg	vnd niendert anderswo
der maere der er fragt	der gelaubet er sich sa
Dem vngemuten rekchen	sprach ir ainer nach
nu baitet nah	her Hagen	lat ew nicht sein ze gach
vernempt pas div maere	wir ir chömt vbir sant
dirr marcherre	der ist Else genant
Dem pruder ist geheisen	Gelpfrat
ein vogt in Baierlande	dez ez ew muoleich stat
welt ir durch sein marche	ir solt ew wol bewaren
vn– sult auch mit dem vergen	vil beschaidenleich varen
Der ist so grimmes mutes	er lat ew nicht genesen
iren welt mit guten sinnen	bei dem holt wesen
welt ir daz er euch fuore	so gibt im den solt
er hütet ditz landes	vnd Gelpfrade holt
Vnd cham ere nicht vil schiere	so ruffet vbir fluot
iocht	ir seit Amelrinch	<[102v]>	daz was ein reck gut
der durch veintscheft	rawmt dise lant
so kuompt euch der verge	als im der nam wirt genant
Der übermut Hagen	den frawen do neyg
des rates vnd der lere	der helt vil still sweig
da ging er bey der flute	hoher an den sant
do er anderhalp	ein herwerg vant
Er begond ruffen	vaste über fluote
hol mich hy	vorge	sprach der degen gute
so gib ich dir ze mite	vol gold einen pauch vil rot
ia ist mir dirr verte	daz wiß	werlichen not
Der verig was so reich	daz im nicht dienen zäm
da von er lon vil selten	von ymant da genam
auch warn seine knecht	vil hochgemut
noch stund allz Hagen	dishalb der flut
Da da ruft er mit der krefte	daz aller wag erdoz
wann des heldes sterck	was michel vnd groz
nu hol mich Amelreichen	des herrn Elsen man
der von disen landen	[103r]durch groß veintscheft entran
Vil hoch an seinem swerte	er im den pauchk do pot
vil licht vnd vil schon	was er von golde rot
daz er in überfürte	in des Elsen lant
der übermut verge	nam daz ruder selb in dy hant
Auch was der selb verg	vil mülich gesit
zu girde nach großem gut	vol bösez ende gibt
da wänt er verdinen	daz Hagen golt so rot
daz laid er von dem degen	sint den grimmigen tot
Der verg zog genote	hin uber an daz lant
den er da nennen hort	do er des nicht <en> vant
ez müet in hart ser	als er Hagen sach
der helde wider den recken	in vil großen zorn–
Ir mügt wol sein geheißen	Armelreich benamen
des ich mich hy verwen	dem seit ir vngleich
von vater vnd von muter	was er der bruder mein
nu ir mich sust betrogen habt	ir muoßt dishalben sein
Nein durch got den reichen	sprach do Hagen
ich pin ein frömder [103v]reck	vnd sorg auff degen
nu nempt hin minniclelich	mein ellendes solt
daz ir mich füret über	ich wil euch ymmer wesen holt
Des antwort der verg	ia kan ez nichte gesein
ez hab vinande	den liben hern– mein
 frivnde fur in diß lant
als lip dir sey ze leben	so trit bald auß an daz lant
Des entut ir nicht	sprach Hagen	mir ist der reyse not
vnd nempt von mir ze lon	disen pouch von golde rot
vnd fürt mir über tausent ros	vnd also manchen man
entrewn–	sprach der verg	daz wirt nymmer getan
Er hub ein starckez ruder	michel vnd breyt
vnd slug ez auff Hagen	des was er vngemeit
daz er in dem schiff	straucht auff seine kny
so rechte grimmer verge	kome dem helde von Trong nie
Er wold baz ertzürnen	den vngermuten gast
do slug er einen schalten	daz da gar zerprast
Hagen über daz heupt	er was ein starcker man
da von der Elsen verg	großen schaden gewan
Mit grymmigem mute	des [104r]keünen Hagen hant
greiff zu einer scheiden	do er seine waffen vant
er slug im ab daz hewpt	vnd warff ez an den grunt
dy mer wurden schir	den Burgunden kunt
An den selben stunden	do er den vergen slug
daz schiff floz hinnaw	daz was im leit genug
e ers gericht wider	müden er began
da tzoch vil krefticklich	zu des Günthers man
Hagen was vil ring	des starcken vergen val
da kert er hart bald	daz waßer hin zetal
da vand er seinen herren	an dem stade stan
da ging im engegen	manig weydlich man
Mit gruß in wol enpfingen	dy selben ritter gut
do sahen sy in dem schiff	noch richen daz blut
von einer starcken wunden	dy er dem vergen slug
da von so muß Hagen	hören fragen genug
Do der künig Günther	daz heiß blut ersach
swebende in dem schiff	wy bald er do sprach
wan saget ir mir	Hagen	war ist der verge nu kumen
ewer starcken ellen	ym [104v]daz leben hat benomen
Do sprach er lawgenlichen	do ich daz schiff da vant
bey einer wilden widen	da lost ez mein hant
ich han keinen vergen	nindert hy gesehen
ez ist auch nimant laide	von meinen schulden hy geschehen
Do sprach von Burgundn–	der starcke Gernot
hewt muß ich sorgen	auff liber frewnde tot
sint wir der schifflewt	zu dem scheff nymant han
wy wir nu komen über daz waßer	darümb muß ich frewd lan
Vil laut riff do Hagen	legt nider auff daz gras
ir knechte	da gereit	ia gedenck ich daz ich was
der allerbeste verge	den man bey dem Rein vant
ich getraw euch wol füren über in des Gelpfrades lant
Do sy gewärlich	komen über flut
dy ros sy gar an slugen	der swimmen daz wart gut
wan in der starcken vnden	keines da benam
etlichz ran verren	als ez ir müde gezam
Da trugen sy zu dem schiff	ir golde vnd auch ir wat
sind daz sy der verte	nicht möchten baben [105r]rat
Hagen was da meister	des furt er über sant
vil manchen künen recken	in daz vnkunde lant
Zu dem ersten bracht er über	tawsent ritter her
vnd sechtzig seiner degen	dennoch was ir mer
newn tawsent knechte	furt er an den sant
des tages was vil vnmüssig	des vil künen Hagen hant
Daz schiff zu seiner leng	was starck weit vnd groz
des in dem geding	manig helt genoz
ez trug wol mit ein ander	vir hundert über flut
an rimen musten tzihen	des tages manig recken gut
Do er sy wol gesunt	bracht über dy flut
do gedacht frömder mere	der snell degen gut
dy im e da sagten	dy wilden mere weip
des hett des künigs capplan	vil nach verlorn– den leip
Bey dem cappelsaüm	er den priester vant
heiligtum genug	lag vnter seiner hant
des mocht er nicht genißen	do in Hagen ersach
der vil <arme> capplan	must leiden vngemach
Er swang in auß dem schiff	[105v]dar tzu was im gach
da riffen ir genug	vach herr vach
Geiseler der iung	tzürnen do began
darvmb er ez nicht laßen wolde	daz was im leyd getan
Do sprach von Burgunden	der starcke Gernot
waz hilfft euch nu	Hagen	des capplans tot
tet ez anders ymand	ez schold euch wesen leyt
vmb welch schuld	habt ir dem prister widerseyt
Der pfaff swam genote	er wold sein genesen
ob ym ymand hülff	des mocht da nicht gewesen
wan– der grimm Hagen	tzornig was genug
er stiß in zu dem grund	daz daucht sy michel vngefug
Do der arme priester	der hilff nicht ensach
da kert er wider uber	des leid er vngemach
wy er do nicht swimmen konde	im halff dy gotes hant
daz er kam wol gesunder	hinüber an daz lant
Da stund der arme prister	vnd schawet sein gewant
da bey sach wol Hagen	daz er wär vngewant
daz im e da sagte	dy weisen mer[106r]weip
er gedacht	diser degen	muß verlisn– den leip
Do sy daz schiff entluden	vnd gar getrugen dan
waz sy darauff hetten	der dreier künig man
Hagen ez schrit zu stücken	vnd stiß ez an dy flut
des hettn– michel wunder	dy recken gut
Warvmb tut ir daz	bruder	sprach do Danchwart
wye schüll wir kumen uber	so wir dy widervart
riten von den Hewnen	wider an den Rein
seht	do sagt im Hagen	daz des nicht kond gesein
Do sprach der helt von Trong	ich tun ez auff den wan
ob wir an diser verte	keinen tzagen hagen
der vns entrinnen wöll	durch tzaglich not
der muß an disem wage	doch ligen schemlichen tot
Sy furten mit in einen	von Burgunden lant
der was ein helt zen handen	Volker was er genant
der redet spehlich	seinen mut
waz y begond <Hagen>	daz daucht den vidler gut
Do des küniges capplan	daz schiff zuhawen sach
hin wider über daz waßer	er zu Hagen [106v]sprach
ir mörder vngetrewer	waz hett ich euch getan
daz ir mich on schuld	ertrenckt wollt han
Des antwort im Hagen	nu laßt dy red wesen
mir ist leit auff mein trew	daz ir seyt genesen
hy vor meinen handen	daz wißt sunder an spot
do sprach der arm capplan	des wil ich ymmer loben got
Ich fürcht euch nu vil kleine	des schüllet ir sicher sein
nu vart ir zu den Hewnen	so wil ich an den Rein
got en laß euch nymmer	zu dem Rein wider kurmen
des wünschen ich euch vil ser ir hett mir nahen den leip benomen
Do sprach der künig Günther	zu seinem capplan
ez wirt euch wol gebüßt	waz euch hat getan
Hagen in seinem tzorn	vnd kum ich an	den Rein
wider mit meinem leben	des schüllt ir on angst sein
Vart wider heim ze lande	wan– ez muß nu sein
ich enpewt meinen dienst	der liben frawen mein
vnd andern meinen magen	als ich von rechte schol
ir sagt [107r]in libe mere	daz wir noch alle varen wol

<Do> sy nu wol gesunt	kamen auff den sant
der künig begonde fragen	wer schol vns durch daz lant
dy rechten weg weisen	daz wir nicht vervaren
do sprach der kün Volcker	daz schol ich ein wol bewarn–
Nu enthaltet euch	sprach Hagen	ritter vnd knecht
vnd engahet nicht ze sere	daz düncket mich recht
vil vngefüge mär	tun ich euch bekant
wir kumen nymmer	heym in vnser lant
Daz sagten mir tzwey mer weip	hewt morgen fru
wir enkemen nymmer wider	nu rat ich waz man tu
daz ir euch waffent	helde	vnd zu streit euch wol bewart
wir haben hy starcke veind	daz ir gewerlichen vart
Ich wande an lugen funde	dy waßer <weisen> weip
sy iahen daz besunder	daz vnser keines leip
wider ze land kem	newr der capplan
darümb ich in [107v]gern	hewt ertrenckt wolt han
Da flugen dise mer	von scharen baz zu scharen
des wurden snell beld	vor leid missvar
do sy begonden sorgen	auff den grimmigen tot
an der hoff reys	des ging sy werlichen not
Da ze Moringe	si waren über kumen
do dem Else vergen	was der leip benomen
do sprach aber Hagen	seint daz ich [58r] vinde han
an dirre vart erworben	wir werden sicherlich bestan
Ich slvoch der herren vergen	hivte morgen frvo
si wizen wol div mære	nv grifet balde zvo
ob Else vn– Gelpfrat	noch hivte hie bestat
vnser ingesinde	daz ez in schedelich erge
Ich erchenne si so chvene	ez wirdet niht verlan
div ros div svlt ir lazen	deste sanfter gan
daz des iemen wæne	wir vliehen vf den wegen
des rates svln wir volgen	sprach da vil maniger chvner degen
Wer sol nv daz gesinde	wisen vber lant
si sprachen	daz tvo Volker	dem sint hie wol bechant
stige vn– straze	der chune spileman
ê daz manz gespræche	do sah man wol gewafent stan
den snellen videlære	den helm er vf gebant
in herlicher varwe	was al sin wichgewant
er bant ovch zeime <scafte>	ein zeichen	daz was rot
sit chom er mit den chvnigen	in eine grozliche not
Do was tot des vergen	nv Gelpfrate chomen
mit eime waren mære	do het iz ovch vernomen
sin brvoder Else	ez was in beiden leit
si sanden nach ir degenen	die waren schiere bereit
In vil churcen citen	als wir vernomen han
sah man zv zin riten	die heten scaden getan
in starchem vrlivge	vil vngefvgiv ser
der chomen Gelpfrate	wol siben hundert oder mer
Do si ir grimmen vinden	begunden riten nach
ia leiten si ir herren	den was ein teil ze gach
nach den chvenen gesten	si wolden anden zorn
des wart der herren frivnde	sider mere verlorn
Do het der wise Hagene	wol gefvget daz
wie mohte siner frivnde	ein helt gehuten baz
er pflac der nachhvote	mit sehzech siner man
vn– Danchwart siner brvder	daz was vil wislich getan
In was des tages zervnnen	des heten si niht mer
er vorht an sinen frivnden	leit vn– ser
si riten vnder schilden	durch der Beyer lant
dar nach in churcen stvnden	die helde wrden an gerant
Beidenthalp der strazen	vn– hinden vaste nnach
hvofslege si horten	dem volche was ze gach
do sprach der chvne Danchwart	man wil hie vns bestan
nv binden vf die helme	daz ist ratlich getan
Si hielten ab ir verte	als ez do mvose sin
si sahen in der vinster	der liehten helme schin
done wolde Hagene	niht lamger si verdagen
wer iagt vns vf der straze	daz mvos im Gelpfrat do sagen
Do sprach der marcgrave	vzer Beyerlant
wir haben vnsern vinden	da her nach gerant
ine weiz niht wer mir hvte	minen vergen slvoc
der was ein helt zen handenn	daz ist mir leide genvoc
Do sprach von Tronege Hagene	was der verge din
der enwolde uns niht fvren	[58v]des ist div schulde min
do slvog ich dinen vergen	deiswar des gie mir not
ich hete von dem degene	vil nach gewnnen den tot
Ich bot im mine miete	golt	silber vn– gewant
daz er vns vber fvrte	her in iwer lant
daz mvte in harte sere	in zorne er mich do slvoc
mit einer starchen schalten	vil wenic ich im do vertrvoc
Do kom ich zvo dem swerte	vn– wert im sinen zorn
mit einer starchen wnden	des wart der helt verlorn
daz bringe ich <iv> ze svone	swie ivch nv dvnchet gvot
do giengez an ein striten	si wrden zornic gemvot
Ich wistez wol <sprach> Gelpfrat	do hie fver gereit
Gvnther mit den sinen	daz vns geschêhe leit
von Hagen vbermvete	nv ensol er niht genesen
fvr des vergen ende	sol er pfant hie wesen
Si neigten vber schilde	ze stiche div starchen sper
Gelpfrat vn– Hagene	in was zein ander ger
Else vn– Danchwart	ovch zesamne riten
in vil hohem mvote	da wart grimme do gestriten
Wie chunden sich versvchen	immer helde baz
von eime starchen schafte	hinder ors gesaz
Hagene der chvene	vor Gelpfrates hant
im brast daz fverbvege	do wart im vallen bechant
Uon ir ingesinde	der chrach der schefte schal
do erholt ovch sich dort Hagene	der ê des was zetal
chomen von der tioste	nider an daz gras
er wæn vnsænftes mvtes	wider Gelpfrate was
Wer in div ros behielte	daz ist mir vnbechant
si warn von den sætelen	chomen vf den sant
Gelpfrate vn– Hagene	ein ander liefen an
des hvlfen ir gesellen	da wart striten getan
Swie chreftechlichen Hagene	zvo Gelpfrate spranch
der edel marcgrave	des schiltes hin im swanch
wol gegen einer ellen	daz fivre dræte dan
des was vil nach erstorben	des kunich Gunthers man
Do begunder rvefen	Danchwarten an
hilfa	lieber brvoder	ia hat mich bestan
ein rehter helt zen handen	ern læt mich niht genesn
do sprach der chvene Danchwart	des schol ich scheidere wesn
Do spranger dar vil balde	vn– slvg im einen slac
da von der herre Gelpfrat	vor im got gelac
Else wolde gerne	rechen do den man
sit mvser schedeliche	mit den sinen cheren dan
Im was erslagen der brvoder	selbe was er wnt
wol ahzech siner degene	beliben an der stvnt
mit dem vil grimme tode	Else mvse dan
flvhtechliche wenden	daz heten geste getan
Do die von Bayerlanden	wichen vf dem wege
do horte man noch hellen	die vreislichen slege
do iageten die von Tronege	ir vianden nach
die ez niht engelten wanden	den was allen ze gach
Do sprach an ir vlvehte	Danch[110r Z 10]wart der degen
wir schüllen widerkern–	balde auff disen wegen
vnd laß wir sy reiten	sy sint von blute naz
gahen wir zu den frewndn–	an trewn– rat ich daz
Do sy hin wider kamen	do der streit was geschehen
do sprach der kün Hagen	helt	ir schüllt besehen
wes vns hy geprest	oder wen wir haben verlorn–
in disem herten streite	durch disen Gelpfrades tzorn–
Sy hetten verlorn– vir	daz lißen sy also sein
ez was wol vergoltn–	mit wunden vnter in
den von Baierlanden	[110v]sy hundert lißen tod
des waren den von Trongen	ir schild trüb vnd rot
Ein teil schein auß den wolcken	des lichten manen brehen
do sprach aber Hagen	nymant schol veriehen
dem meinen liben herren	daz wir hy haben getan
man schol sy an sorgen	vntz morgen reiten <lan>
Do sy da nach in kamen	dy dort da striten ee
da tet dem ingesind	dy müde starcke we
wy lang schüll wir reiten	des fraget manich man
do sprach der kün Danckwart	wir mügen nicht herwerg gehan
Ir müßt alle reiten	vntz daz ez werd tag
Volcker der kün	der der phan– pfhlag
bat den marschalck vragen	wo schüll wir heint sein
da geru vnser mere	vnd auch dy liben herrn– mein
Do sprach der kün Danckwart	ich kan euch ez nicht gesagen
wir mügen nicht geruen	e ez beginnet tagen
wo wir ez dann finden	so ligen in einem gras
do sy daz vernamen	wy leid [111r]in etlichen was
Si bliben vnuermailet	des heißen blutes rot
vntz daz dy sun–	ir lichtez scheinen bot
den morgen über berge	do daz der künig gesach
daz sy gestriten hetten	der künig vil tzörnicklichn– sprach
Wy nu	frewnt Hagen	ich waen versmaht daz
daz ich bey euch wäre	daz euch dy ringe naz
sust wurden von dem blute	wer hat euch daz getan
er sprach	daz tet Gelpfrat	der hett vns nahen bestan
Durch den seinen vergen	wir wurden angerant
do slug Gelpfrads	meines bruder hant
seint entran vns Else	des twang in michel not
yn hundert vnd vns vir	bliben in dem streite tot
Wir enkonden nicht bescheiden	war sy sich legten nider
all dy lantlewt	erfunden ez wol sider
daz ze bof füren	der edeln– Vtten kint
sy wurden wol enpfangn–	da ze Paßaw sint
Der <edeln–> fürsten öhem	bischoff Pilgrem
dem ward vil wol zu mute	do er dy neuen sein
sab mit so vil der recken	kumen in daz [111v]lant
daz er sy gern säh	daz ward im schir bekant
Sy wurden wol enpfangen	von frewnden auff den wegen
da zu Paßaw	kond er sy nicht gelegen
sy musten über daz waßer	da sy funden velt
da slugen auff dy knechte	manig hut vnd getzelt
Sy musten da bleiben	allen einen tag
vnd auch dy nacht mit vollen	wy schon man ir pfhlag
darnach sy musten reiten	in Rüdigers lant
dem kamen auch dy mere	daz was in libe bekant
Do dy wege müden	rue genamen
vnd sy dem lande naher bekamen
sy funden auff der vart	slaffend einen man
dem von Trong Hagen	sein starckez waffen an gewan
Eckhart was geheißen	der selb ritter gut
er gewan darümb	vil trawrigen mut
daz er verlos sein waffen	von der helde vart
dy march Rüdigers	fundens übel bewart
Awe mir diser schaden	sprach do Eckhart
ja rewet mich sere	der Burgunden vart
sint ichs in friden verlos	do was mein frewd ergan	[112r]
awe	herr Rüdiger	wy ich wider dich geworben han
Hagen vil wol hort sein clagen	sorg im klagen gepot
er gab im wider sein wappen	vnd sechs pouche rot
dy hab dir	helt	ze minnen	daz du mein frewnt seyst
du bist ein degen küne	wy ein du auff der march seist
Got lan euch ewer gabe	sprach da Eckgewart
doch rewet mich vil sere	zu den Hewnen ewer vart
ir sluget Seifriden	man ist euch gehaz
daz ir euch wol behütet	in trewen rate ich euch daz
Nu müß vns got behüten	sprach do Hagen
wir haben an disen tzeiten	nicht mer ze tragen
nur wo mein hern	noch heinte mügen han
nachtseld in disem lande	da sy geruen vnd ir man
Dy ros sind vns <vermüdet>	auff den verren wegen
vnd der speis zerinnen	sprach Hagen der degen
wir findens nindert feyl	vns wär wirtes not
der vns noch heinte geb	durch sein mild sein brot
Des antwort im da Eckhart	ich tzeig euch einen wirt
daz ir ze haws [112v]selten	so wol bekomen pirt
in keinem frömden lande	als euch wol mag geschehen
ob ir	vil snelle degen	wöllet Rüdigern– sehen
Der sitzet bey der strazz	vnd ist der beste wirt
der y kam ze haws	sein hertz tugent birt
als der lichte meye	daz gras mit blumen tut
so er schol helden dienen	so ist er frölich gemut
Do sprach der künig Günthher	wöllt ir mein bot sein
ob vns wöll enthalten	durch den willen mein
der markegraff Rüdiger	vnser mag vnd vnser man
daz wil ich ymmer dinen	mit trewen so ich beste kan
Der bot pin ich gern–	sprach da Eckgewart
in vil gutem willen	hub er sich an dy vart
vnd sagte Rüdiger	wen er hett gesehen
vnd auch Götlinde	do was in lib geschehen
Man sah ze Bechlarn	gahen einen degen
selb erkant in Rüdiger	er sprach	auff disen wegen
dort her gahet Eckewart	ein Crimhilden [59r]man
er wande daz die viende	im heten etewaz getan
Do gie er fvr die porte	da er den boten vant
daz swert er von im gvrte	vn– leit ez von der hant
er sprach zv dem degene	waz habt ir vernomen
daz ir also sere	hat vns iemen iht genomen
Vns hat geschadet niemen	sprach Eckewart zehant
mich habent dri kunige	her zvo ziv gesant
Gunther von Burgonden	Giselher vn– Gernot
der rechen ieslicher	iv sinen dienest her enbot
Daz selbe tvot her Hagene	vn– ovch Volker
ir dienest willechliche	noch sage ich iv mer
daz iv des kuniges marschalch	Dancwart daz enbot
daz den gvten degenen	wêr iwer herberge not
Mit lachendem munde	sprach do Rvdeger
nv wol mich dirre mære	daz die kunige her
miner herberge rvochent	div wirt in niht verseit
choement si mir ze hvose	mit dienste bin ich in bereit
Ivch hat des kuniges <marschalch>	heizen wizzen lan
wen ir ze herbergen	noch hinte mvzet han
sehzech chuoner rechen	vn– tvsent ritter gvot
vn– nivn tvsent knehte	do wart er vroelich gemvot
So wol mich dirre geste	sprach do Rvdeger
daz mir choment ze hvose	die rechen also her
den ich noch vil selten	iht gedienet han
nv riten in begegene	mine mage vn– man
Uon gahen zv den rossen	hvop sich da michel not
von rittern vn– von knehten	der wirt do gebot
den sinen ambtlvten	si schvffenz deste baz
noch <enwistes> niht frov Gotelint	div in ir kemenaten saz
Do gie der marcgrave	da er die frowen vant
sine wip vn– sine tohter	do sagter in zehant
div vil lieben mære	div er hete vernomen
daz ir frowen brvder	ir ze hvse solden chomen
Vil liebiv trvtinne	sprach do Rvdeger
ir svlt vil wol enpfahen	die edeln kunige her
so si mit ir gesinde	fvr ivch ze hove gan
ir svlt oech schone grvzen	Hagenen	Guntheres man
Mit in chvmt ovch einer	der heizet Dancwart
der ander heizet Volker	an zvhten wol bewart
die sehse svlt ir chussen	ir vnt div tohter min
vn– svlt ovch bi den degenen	inzvehten groezliche sin
Daz lobten do die frowen	vn– warens vil bereit
si svhten vz den kisten	div maniger <handen> chleit
dar inne si begegene	den rechen wolden gan
da wart vil michel vlizen	von schonen frowen getan

<In> solhen unmvzen	svln wir die frowen lan
hie wart vil michel gahen	vber velt getan
von Rvdegeres frivnden	da man die geste vant
si wrden [59v]wol enpfangen	in des marcgraven lant
Do si der marcgrave	zvo zim chomen sach
Rvdeger der snelle	wie vrolich er sprach
sit willechomen	ir herren	vn– ovch iwer man
hie in disem lande	wie gern ih ivch gesehn han
Do danchtem im die rechen	mit triwen ane haz
daz er in willechomen wære	vil wol erzeichter daz
svnder grvozter Hagenen	den het er <ê> bechant
sam tet er Volkeren	den helt von Burgonden lant
Do sprach zem marcgraven	Danchwart der degen
sit ir vns welt bervochen	wer sol vns danne pflegen
des vnsern ingesindes	von Wormez vber Rin
do sprach der marcgrave	die angest svlt ir lazen sin
Ez wirdet wol behalden	swaz ir in daz lant
habt mit iv gefvret	ros	silber vn– gewant
dem schaffe ich <solhe> hvte	daz sin wirt niht verlorn
daz iv ze schaden bringe	gegen einem halben sporn
Spannet vf	ir knehte	die hvtten an daz velt
swaz ir hie verlieset	des wil ich wesen gelt
vn– ziehet abe die zovme	div ros div lazet gan
daz het in wirt deheiner	da vor vil selten getan
Des frevten sich die geste	do daz geschaffen was
die herren riten dannen	sich leiten in daz gras
vber al die knehte	si heten gvot gemach
ich wæn in an der verte	nie so sanfte geschach
Nv was div marcgrauinne	fvr daz tor gegan
mit ir vil schonen tohter	do sah man bi ir stan
die <minneklichen> frowen	vn– manige schone meit
die trvgen vil der boege	vn– oech die herlichen chleit
Daz edele gesteine	verre lvhte von in dan
vz ir vil richen wæte	die warn wol getan
do chomen ovch die rechen	vn– erbeizten sa zehant
hey waz man grozer zvehte	an den Burgonden vant
Sehs vn– drizzech meide	vn– ander manic wip
den was ze wnsche schone	vn– minneklich der lip
die giengen in engegene	vn– wolden si enpfan
da wart ein schone grvzen	von den frowen getan
Div ivnge marcgrauinne	chvste die kunige dri
alsam tet ir mvter	da stvnt ovch Hagen bi
den bat ir vater chvssen	do blicte si in an
er dvhte si so gremlich	daz siz gerne hete lan
Doch mvste si da leisten	daz ir der wirt gebot
gemisschet wart ir varwe	bleich vn– rot
si chvste oech Danchwarten	dar nach den spileman
durch sines libes ellen	wart im daz grvzen getan
Div iunge marcgravinne	nam do bi der hant
Giselhern den rechen	von Burgonden lant
alsam tet ir mvoter	Gunthern den chvnen man
Gernoten fvrte Rvdeger	mit in minnechlichen dan
In der schonen buorge	stvnt ein witer sal
ritter vn– frowen	gesazen da zetal
do hiez man balde schenchen	den gesten gvten [60r]win
ez endorften nimmer helede	gehandelt gvetlicher sin
Mit lieben ovgen blichen	wart vil gesehn an
div Rvdegeres tohter	do was so wolgetan
ia trvotes in dem hercen	vil manic ritter gvot
daz chunde ovch si verdienen	si was vil hohe gemvot
Si gedahten swes si wolden	es enmoht aber niht geschehn
an mægede vn– oech an frowen	wart da vil gesehn
fvr vn– widere	wande ir saz da genvoc
der edel videlære	dem wirte holden willen trvoc
Nach gewonheite	do schieden si sich da
ritter vn– frowen	die giengen anderswa
do rihte man die tische	in demn sale wit
den vil lieben gesten	man diente willekliche sit
Dvrch der geste liebe	hin ze tische gie
niwan div marcgravinne	ir tohter si do lie
beliben bi den kinden	da si von rehte saz
daz si ir niht ensahen	die geste mvete sere daz
Do si mit frevden heten	gegezzen vber al
do wiste man die schonen	wider in den sal
gæmelicher spruoche	der wart da niht verdeit
der reit vil da Volker	ein degen chven vn– gemeit
Do sprach offenliche	der tivre spileman
vil richer marcgrave	got hat an iv getan
vil genædekliche	daz er iv hat gegeben
ein wip so rehte schoene	dar zvo ein wnneklichez lebn
Ob ich ein fvrste wære	sprach aber der spileman
vn– solde ich tragen chrone	ze wibe wolde ich han
die iwern schonen tohter	des wonnet mir der mvot
div ist minneklich ze sehene	dar zvo edel vn– gvot
Do sprach der marcgrave	wie moehte daz gesin
daz immer kunic gegerte	der lieben tohter min
wir sin beide ellende	ich vn– ovch min wip
vn– haben niht ze gebene	waz hilfet danne ir schoner lip
Do sprach der herre Gernot	ir svlt die rede lan
vn– solde ich trvttinne	nach mime willen han
ane gvot ze wibe	wær ich ir immer vro
des antwrte Hagene	vil harte minneklichen do
Nv sol doch her Giselher	min herre nemen wip
ez ist so hoher mage	der marcgravinne lip
daz wir ir dienten gerne	ich vn– ander iwer man
vn– soldes under chrone	da zen Burgonden gan
Div rede Rvdegeren	von in dvhte gvot
vn– ovch die marcgrauinne	ia frevtez in den mvot
sit trvgen an die helde	daz si ze wibe nam
Giselher der edele	wandez in beiden wol gezam
Swaz sich sol gefvgen	wer mac daz vndersten
man bat die ivncfrowen	hin ze hove gen
do swor man im ze gebene	daz wnnekliche kint
oech lobt er ze nemene	die vil <minneklichen> sint
Man beschiet der ivncfrowen	bvrge vn– lant
des sichert da mit eiden	des richen chuniges hant
vn– Gernot der herre	daz wrde daz getan
do sprach der marcgrave	sit ich der lande niht enhan
sone lat iv niht versmahen	min ellendes solt
ich gibe [60v]zv miner tohter	silber un– golt
swaz zwei hvndert moere	meiste mvgen getragen
div rede mvste den degenen	beidenthalben wol behagen
Nach gewonheite	man hiez an einen rinch
sten die minneklichen	manec sneller ivngelinch
in gezweietem mvote	ir ze gegene stvnt
si gedahten in ir sinne	so noch die tvmben dicke tvont
Do man begunde vragen	die minneklichen meit
ob si den rechen wolde	ein teil was ez ir leit
vn– dahte doch ze nemene	den wætlichen man
si schamte sich der vrage	so manic maget hat getan
Ir rvonte ir vater Rvdeger	daz si spræche ia
vn– in vil gerne næme	vil schiere was do da
mit sinen wizen handen	der si do vnbesloz
Giselher der ivnge	swie lvzzil si des sit genoz
Do sprach der marcgrave	ir edeln kunige rich
als ir nv wider wendet	daz ist gewonlich
heim zvo zivren landen	so gib ich iv min kint
daz ir si mit iv fvret	daz gelobten si sint
Swaz man da schalles horte	den mvsen si doch lan
man hiez die iuncfrowen	zir kemenaten gan
vn– oech die geste slafen	si erbiten an den tac
do bereite man die spise	der wirt ir minneklichen pflac
Do si nv gezzen heten	vn– wolden dannen varn
gein der Hvnen landen	daz heiz ich wol bewarn
sprach der wirt vil edele	ir svlt noch hie bestan
wande ich so lieber geste	selten her gewnnen han
Des antwrte Danchwart	iane mages niht gesin
wa næmet ir die spise	daz brot vn– ovch den win
daz so manigem manne	wære hie bereit
do daz der wirt gehorte	ez was im ane maze leit
Do sprach der marcgrave	div rede ist ane not
ze vierzehen nêhten	win vn– brot
gêbe ich iv voelleklichen	mit den	die ir noch hie hat
ir mvzet hie beliben	des ist deheiner slahte rat
Swie vil si dannen gerten	si mvsen da bestan
vnz an den vierden morgen	do wart ovch da getan
von des wirtes milte	daz verre wart geseit
er gap den sinen gesten	beidiv wafen vn– kleit
Ez mohte wern niht langer	si mvsen dannen varn
Rvdeger der chunde	vil wenic iht gesparn
von der sinen milte	swes iemen gerte nemen
daz versagt er niemen	ez mvse in allen gezemen
Daz edel ingesinde	brahte fvr daz tor
gesatelt vil der rosse	do warte ovch in da vor
vil der gvten rechen	die trvgen schilde enhant
wande si riten wolden	nider in der Hunen lant
Der wirt do sine gabe	bot vber al
e daz die edeln geste	choemen fvr den sal
er chvnde miltekliclhe	mit grozen eren lebn
die sine schonen tohter	die het er Giselher gegebn
Do gab er Gvnthere	dem helde lobelich
daz wol trvoc mit eren	der edel kunic rich
swier [61r]nie gabe enpfienge	ein waffenlich gewant
do neich der fvrste here	des milten Rvdegers hant
Do gab er Gernote	ein wafen gvot genvoc
daz er sit in stvrmen	vil herlichen trvoch
der gabe im vil wol gvnde	des marcgraven wip
da von der gvte Rvdeger	mvse vliesen sit den lip
Do bot div marcgrauinne	Hagen ir gabe alsam
mit bete minnekliche	sit si der kunec nam
daz er ane ir stivre	zvo der hochgecit
varn niene solde	der helt gelobt ez ane strit
Alles des ich ie gesach	sprach do Hagene
sone gerte ich niht mere	nv ze habene
niwan ienes schildes	der dort hanget an der want
den wolde ich gerne fvren	mit mir in der Hvnen lant
Do div marcgrauinne	Hagen bete vernam
ez mante si ir leide	weinen si gezam
do gedahte si vil tivre	an Nuodvnges tot
den het erslagen Witege	des twanc si iæmerlichiv not
Si sprach zvo dem degene	den schilt wil ich iv gebem
daz wolde got von himele	daz er noh solde leben
der in da trvg enhende	der lag in stvrme tot
den mvz ich immer weinen	des gat mir <armen> wibe not
Div edel marcgravinne	von ir sedele gie
bi dem schilt vezzil	si den schilt gevie
do brahte si in Hagene	si selbe mit ir hant
div gabe was mit eren	an den rechen gewant
Ein hvlft von liehtem pfelle	ob siner varwe lac
bezzer schilt deheinen	belvhte nie der tac
von edelm gesteine	swers ze chovfen hete gegert
oder in veil hete	er was wol tvsint marche wert
Den schilt hiez do Hagene	von im tragen dan
do chom sin brvder Danchwart	hin ze hove gegan
dem gap vil richiv chleider	des marcgraven kint
die er da zen Hvnen	trvoc vil herlichen sint
Allez daz der gabe	von in da wart genomen
in ir deheines hende	wær ir niht bechomen
wan dvrch des wirtes liebe	derz in so schone erbot
sit wrdens im so vint	daz si in mvsen slahen tot
Volker mit siner	videlen dan
chom gezogenliche	fvr Gotelinde stan
er videlt sveze done	vn– sang ir siniv liet
da mite nam er vrlovp	do er von Bechelaren sciet
Ir hiez div marcgravinne	eine lade tragen
von frivntlicher gabe	mveget ir nv horen sagen
dar vz si nam sehs povge	vn– spiens im an die hant
die svlt ir fvren	Volker	von mir in der Hunen lant
vn– svlt dvrch minen willen	si da ze hove tragen
swenne ir wider wendet	daz man mir mvge sagen
wie ir mir habt gedienet	da zer hochgecit
des si zem rechen gerte	vil wol gewert er sis sit
Do sprach der wirt zen gesten	ir svlt dest sanfter varn
ich wil ivch selbe leiten	vn– heizen wol bewarn
daz man [61v]iv vf der strazen	nêm deheiniv pfant
ich sol ivch selbe leiten	in daz Ezelen lant
Der wirt wart wol bereit	mit fvnf hundert man
ze rossen vn– ze chleidern	die fvrt er mit im dan
in vrolichem mvote	zv der hochgecit
der deheiner nimmer mere	chom ze Bechelaren sit
Mit chvsse minnekliche	der wirt do dannen schiet
also tet ovch Giselher	als im div liebe riet
mit vnbeslozzen armen	si trvten schoeniv wip
daz mvose sit bewæinen	vil maniger ivncfrowen lip
Vil venster wart entslozzen	vn– wit vf getan
der wirt mit sinen mannen	zen rossen wolde gan
in wæn ir hercen sageten	div chrefteklichen ser
daz si der lieben <frivnde>	dar nach gesahen nimmer mer
Nach ir lieben frivnden	heten genvge leit
do weinten ane maze	vil frowen vn– manic meit
doch riten si mit frevden	nider vber sant
zetal bi Tvonowe	vnz in daz hunische lant
Do sprach zen Bvrgonden	der ritter vnverzaget
Rvdeger der edele	ia svln niht sin verdaget
Ezeln disiv mære	daz wir zen Hvnen chomen
vn– oech mine frowen	sine hant so liebes niht vernomen
Ze tal dvrch Oestiriche	vil manec bote reit
den lvten allenthalben	wart daz wol geseit
daz die herren choemen	von Wormez vber Rin
dem Ezeln ingesinde	chunde niht lieber gesin
Die boten fvr strichen	mit disen mæren
daz die Nibelunge	zen Hvnen wæren
dv solt si wol enpfahen	Chriemh'	frowe min
dir choment nach grozen eren	her die stolzen brveder din
Do div kuniginne	vernam div mære
ir begunde entwichen	ein teil ir swære
von ir vater lande	chom ir vil manic man
da von der kunic Ezele	vil manigen iamer <sit> gewan
Si gedahte tovgenliche	noch mohte is werden rat
der mich an minen frevden	also gepfendet hat
mag ich daz gefvgen	ez sol im leide ergan
ze dirre hochgecite	des ich vil gvten willen han
Ich solz also schaffen	daz min rache erge
in dirre hochgecite	swiez dar nach geste
an sinem argen libe	der mir hat benomen
vil der minen wnne	des sol ich nv ze gelte chomen

<Do> die Nibelunge	chomen in daz lant
do vrieschez von <Berne>	meister Hildebrant
ez sagtez sime herren	ez was im grimme leit
er bat in wol enpfahen	die chvnen ritter gemeit
Do hiez der starche Wolfhart	bringen in div march
do reit mit Dietriche	vil manic reche starch
da si se enpfa[62r]hen wolden	zvo zin an daz velt
da hetens vf gebunden	vil manic herlich gezelt
Do si von Tronege Hagene	verrest chomen sach
zv den sinen herren	der helt vil balde sprach
nv svlt ir	snellen degene	von dem sedele stan
vn– get in hin begegene	die ivch hie wellent enpfan
Dort chvmt her ein gesinde	daz ist mir wol bechant
ez sint vil snelle degene	von Amelvnge lant
die fvret	der von Berne	si sint vil hochgemvot
ir svltz in wol erbieten	daz rat ich	sprach der degen gvot
Do stvnden von den rossen	daz was vil michel reht
nider mit Dietriche	manic ritter vn– kneht
si giengen zv den gesten	da man die helede vant
si grvzten minnekliche	die von Bvregonden lant
Do si der herre Dietrich	zvo zin chomen sach
beide liebe vnde leide	im dar an geschach
er weste wol div mære	ir reise	was im leit
er wande ez weste Rvdeger	daz erz het in geseit
Sit willechomen	her Gunther	Gernot vn– Giselher
Hagen vn– Danchwart	sam si ovch Volker
 vn– allez iwr gedigene	den Sivrides tot
 weinet min froe Chriemh'	noch diche in angestlicher not
Si mac vil geweinen	sprach do Hagene
er lit vor manigem iare	ze tode erslagene
den kunech von den Hvnen	den si genomen hat
den sol si nv minnen	Sivrit so gahes niht erstat
Tot des chunen rechen	lazen wir nv sten
sol lebn min froe Chriemh'	noch mac schade ergen
so redete von Berne	der herre bieterich
trost der Nibelunge	da vor behvet dv dich
Wie sol ich mich behvten	sprach der kunic her
Ezel vns boten sande	wes sol ich vragen mer
daz wir zvo zim chomen	her in siniv lant
oech hat vns vnser swester	aller triwen gemant
So wil ich iv wol raten	sprach do Hagene
nv bitet iv div mære	baz ze sagene
den herren Dietrichen	vn– sine helde gvot
daz si ivch lazen wizzen	der frowen Chriemh' mvot
Do giengen svndersprachen	die dri kunige rich
Gunther unde Gernot	vn– ovch her Dietrich
nv sage vns	von Berne	vil edel ritter gvot
wie dir si gewizzen	der frowen Chriemh' mvot
Do sprach der vogt von Berne	waz sol ich iv mere sagen
wan alle morgen frveie	weinen un– klagen
hoere ich vil iæmerliche	daz Ezeln wip
dem richen got von himele	des starchen Sivrides lip
Ez ist et vnerwendet	sprach do der spileman
Volker der vil chvene	daz wir vernomen han
wir svln ze hove riten	vn– svln daz besehn
waz vns snellen degenen	mvge zen Hvnen geschehn
Die chunin Burgonden	hin ze hove riten
si chomen herrenliche	nach ir landes siten
do [62v]wndert da zen Hvnin	vil manigen chvnen man
vmbe Hagenen von Tronege	wie der wære getan
Dvrch daz man saget mære	des was im genvoc
daz er von Niderlanden	Sivriden slvoc
sterchist aller rechen	den Chriemh' man
des wart michel vragen	ze hove nach Hagenen getan
Der helt was wol gewahsen	daz ist al war
groz was er zen brvsten	gemischet was sin har
mit einer grisen varwe	div bein im warn lanc
vn eyslich sin gesihene	er het herlichen ganc
Do hiez man herbergen	vil manigen chvnen man
daz gesinde von dem Rine	wart gesvndert dan
daz riet div kuniginne	div in argen willen trvoch
da von man sit die knehte	an der herberge slvoch
Danchwart	Hagenen brvder	der was marschalch
der kunec im sin gesinde	vil vlizeklich bevalch
daz er ir vollechliche	mit spise solde pflegen
daz tet do willechliche	mit triwen der vil chvne degen
Chriemh' div kuniginne	mit ir gesinde gie
da si die Nibelvnge	in valschem mvte enpfie
si chvste Giselhere	vn– nam in bi der hant
do daz gesach Hagene	den helm er vaster gebant
Nach svs getanem grvoze	sprach do Hagene
mvgen sich bedenchen	wol snelle degene
man grvzet sunderlingen	die fvrsten un– ir man
wir han niht gvter reise	zv dirre hochgecite getan
Nv sit	sprach si	willechomen	swer ivch gerne siht
dvrch iwer selbes frivntschaft	engrvz ich ivch niht
nv sagt waz ir mir bringet	von Wormez vber Rin
dar vmbe ir mir so groze	soldet willechomen sin
Het ich gewist div mære	sprach do Hagene
daz iv gabe bringen	solden degene
ich wære wol so riche	het ich mihs baz verdaht
daz ich iv mine gabe	her zen Hvnen hete braht
Nv svlt ir mich der mære	mere wizzen lan
hort der Nibelunge	wa habt ir den getan
der was idoch min eigen	daz ist iv wol bechant
den solt ir mir gefveret han	her in Ezelen lant
Entriwen	min frov Chriemh'	des ist vil manic tac
deich hort der Nibelunge	niene gepflach
den hiezen mine herren	senchenin den Rin
da mvoz er wætliche	vnz an daz ivngeste sin
Do sprach div <kuneginne>	ich hans ovch ê gedaht
mir ist sin harte chleine	noch her ze lande braht
swer min eigen wære	vn– ich sin wilen pflac
nach im vn– sime herren	han ich vil manigen leiden tac
Daz ist verlorn arebeit	sprach aber Hagene
wie mohte ich iv iht bringen	iclh han vil ze tragene
an <halsperge> vn– an schilte	an mime helme lieht
diz swert an miner hende	des enbringe ich iv nieht
Iane rede ihz niht darvmbe	deich mere goldes wel[63r]le gern
ich hans so vil ze gebene	deich iwer gabe mac enbern
ein mort vn– zwene rovbe	die mir sint genomen
des mohte ich vil arme	noch ze liebem gelte chomen
Div frowe hiez do chunden	den rechen vber al
daz niemen tragen solde	dehein wafen in den sal
ir helde	ir svlt mirs vf geben	ich sol si behalten lan
entriwen	sprach do Hagene	daz wirdet nimmer getan
Iane ger ich niht der eren	fvrsten wine milt
daz ir zen herbergen	trvget minen schilt
vn– ander min gewæfen	ir sit ein kunigin
daz enlerte mich vater niht	ich wil selbe kamerære sin
Owe mir der leide	sprach do Chriemh'
warvmbe wil min brvder	vn– Hagen sinen schilt
von in niht tragen lazen	si sint gewarnot
vn– wesse ich wer iz tæte	ich riet im immer sinen tot
Des antwort in zorne	der herre Dietrich
ich binz der hat gewarnet	die edeln fvrsten rich
vn– Hagenen den starchen	den Buregonden man
nv zvo vahendinne	dv solt mihs niht geniezen lan
Des schamte sich vil sere	daz Ezelen wip
si vorhte bitterliche	den Dietriches lip
do gie si von in dannen	daz si niht mere ensprach
wan daz si swinde bliche	an ir viande sach
Bi henden sich do viengen	zwene degene
daz eine was her Dietrich	daz ander Hagene
do sprach gezogenliche	der reche vil gemeit
daz iwer chomen zen Hvnen	daz ist mir grozelichen leit
Do stvnden bi ein ander	die rechen lobelich
Hagene von Tronege	vn– oech her Dietrich
in grozen zvhten manigen	die ritter wolgetan
daz sach der kunec Ezele	darvmbe er vragen do began
Div mære ich wiste gerne	sprach der kunic rich
wer iener reche wære	den dort her Dietrich
so frivntlich enpfæhet	er treit vil hohen mvot
swer sin vater wære	er mach wol sin ein helt gvot
Des antwrtem kunige	ein Chriemh' man
er ist geborn von Tronege	sin vater hiez Adrian
swie blider hie gebarte	er ist ein grimmer man
ich laze ivch daz wol schowen	daz ich gelogen niene han
Wie sol ich daz erchennen	daz er so grimmech ist
noch dann er niht enwiste	vil manigen argen list
den div kvniginne	an ir frivnden begie
daz si ir mit dem lebene	niht einen dannen chomen lie
Wol erchande ich Adrianen	der was min man
lob vn– michel ere	er hie bi mir gewan
ich machet in ze ritter	vn– gab im min golt
Helche div getriwe	was im inneklichen holt
Da von ich wol erchenne	allez Hagenen sint
ez wrden mine gisel	zwei wætlichiv kint
er vn– von Spane Walther	die wohsen hie ze man
Hagenen sande ich widere	Walther mit Hiltegunde entran
Er [63v]gedahte langer mære	div warn ê geschehn
siner frivnt von Tronege	den het er reht ersehn
der im in siner ivgende	vil starchen dienest bot
sit frvmter im in alter	vil manigen frivnt tot

<Do> schieden sich die zwene	rechen lobelich
Hagen von Tronege	vn– ovch her Dietrich
do blicht vber ahsel	der Guntheres man
nach einem hergesellen	den er vil schiere do gewan
Er sach den videlære	bi Giselhere sten
Volchern den vil chvenen	den bat er mit im gen
wander vil wol erchande	den sinen grimmen mvot
er was an allen tvgenden	ein ritter chven vn– 'gvot
Noch liezen si die herren	vfem hove sten
niwan si einen zwene	di sach man dannen gen
vber den hof vil verre	fvr ein palas wit
die vzerwelten beide	vorhten niemannes nit
Si gesazen vor dem hvose	gegen eime sal
der was <Chriemhilde>	vf eine banch zetal
do lvohte in vor ir libe	ir herlich gewant
gnvoge die si sahen	si heten gerne bechant
Alsam tyer div wilden	wrden gekapfet an
die vbermveten helde	von manigem Hvnen man
do ersach si durch ein venter	daz Ezeln wip
des wart do vil trvebe	der frowen Chriemh' lip
Ez mante si ir leide	weinen si began
des hete michel wnder	die Ezeln man
waz ir so snelle ertrvbet	het ir hohen mvot
si sprach	daz hat Hagene	ir helde chvene vn– gvot
Si sprachen	frowe here	wie ist daz geschehn
wir habn ivch niwliche	so fro <gemvot> gesehn
niemen ist so chvene	swerz iv hat getan
heizet irz vns rechen	ez sol im an sin lebn gan
Daz wolde ich immer dienen	swer reche miniv leit
allez daz er wolde	des wær ich im bereit
ich bivt mich iv ze fvzen	sprach des kuniges wip
rechet mich an Hagene	daz er verliese den lip
Do garten sich ze handen	wol sehzech chvner man
dvrch der frowen liebe	si wolden hin gan
vn– wolden slahen Hagenen	den vil chvnen man
vn– oech den videlære	daz wart mit rate getan
Do div kvniginne	ir schar so kleine sach
in eime grimmen mvote	si zen helden sprach
des ir da habt gedingen	des svlt ir ab gan
iane dvrfet ir so ringe	nimmer Hagenen bestan
Swie starche vn– swie chvene	der von Tronege si
noch ist verre chvener	der im da sizzet bi
Volker der videlære	der ist ein vbel man
iane svlt ir die degene	niht so lihte bestan
Do si daz gehorten	do garte sich ir mer
driv hvndert sneller rechen	div <kuneginne> her
was des vil genoete	daz si geræche ir leit
da von wart sit den degenen	vil michel arebeit be[64r]reit
Do si nv wol gewafent	ir gesinde sach
zv den snellen degenen	div kuniginne sprach
nv bitet eine wile	ir svlt noch stille stan
ia wil ich vnder chrone	mit iv zvo minen vinden gan
Vn– hoeret itewizze	waz mir hat getan
Hagen von Tronege	der Guntheres man
ich weiz in wol so chvnen	daz er mir lovgent niht
so ist ovch mir vnmære	swaz im darvmbe geschiht
Do sach der videlære	ein vil chvene man
die edeln kuniginne	ab einer stiegen gan
nider vz eime hvose	als er daz gesach
der vil wise reche	zvo sime hergesellen sprach
Nv schowet	frivnt Hagene	wa si her gat
div vns in vntriwen	inz lant geladet hat
ich gesach mit kuniginne	nie so manigen man
die swert enhende trvegen	also striteklichen gan
<Wizzet> ir	frivnt Hagene	daz si iv sin gehaz
so rat ich iv mit triwen	ir hvtet deste baz
des libes un– der eren	ia dunchet ez mich gvot
als ich mich versinne	si sint vil vbele gemvot
Vn– sint ovch svmeliche	zen brvsten also wit
swer sin selbes hvete	der tvo daz encit
ich wæn si vnder siden	die vesten prvnne tragen
waz si da mite meinen	daz kan ich niemen gesagen
Do sprach in zornes mvote	der vil chvne man
ich weiz wol daz iz allez	ist vf mich getan
daz si div liehten waffen	tragent an der hant
vor den moehte ich geriten	noch in der Bvrgonden lant
Nv saget mir	frivnt Volker	welt ir mir gestan
ob mit mir striten wellent	die Chriemh' man
daz lazet ir mich hoeren	als liebe als ich iv si
ich won iv immer mere	mit triwen dienstlichen bi
Ich hilf iv sicherlichen	sprach do der spileman
ob ich vns hie begegene	sæhe en kunic gan
mit allen sinen rechen	die wile ich leben mvoz
so entwiche ich iv durch vorhte	vz helfe nimmer einen fvoz
Nv lone iv got von himele	vil edel Volker
ob si mit mir striten	wes bedorft ich danne mer
sit ir mir helfen wellet	als ich vernomen han
so svln dise degene	vil gewærlichen gan
Nv sten wir von dem sedele	sprach do der spileman
si ist ein kuniginne	vn– lan si fvr gan
bieten ir die ere	si ist ein edel wip
da mit ist ovch getivret	an zvhten vnser beider lip
Nein	dvrch mine liebe	sprach aber Hagene
so wolden lihte wænen	dise degene
daz ihz dvrch vorhte tæte	vn– solde ich hin gan
ine wil durch ir deheinen	nimmer von dem sedel stan
Ia zimt ez vns beiden	zware lazen baz
zwiv solde ich den eren	der mir ist gehaz
daz entvon ich nimmer	die wil ich han den lip
iane rvche ich waz mich hazzet	des kunic Ezeln wip
Hagene der starche	der leit vber bein
ein vil liehtez [64v]wafen	vz des knopfe erschein
ein vil liehter jaspes	grvner danne ein gras
wol erchandez Chriemh'	daz ez ê Sivrides was
Do si daz swert erchande	des gie si michel not
sin gehilze daz was gvldin	div scheide porten rot
ez mante si ir leide	weinen si began
ich wæn iz hete Hagene	ir ze reizen getan
Volker der vil chvene	zoch naher vf der banch
einen videlbogen <starchen>	michel vn– lanch
gelich eime starpfen swerte	vil lieht vn– breit
do sazen vnervorhten	die zwene degene gemeit
Nv dvhten sich so here	die zwene chvne man
daz si niht enwolden	von dem sedele stan
dvrch deheine vorhte	des gie in an den fvz
div edel kuniginne	vn– bot in vintlichen grvoz
Si sprach	nv sagt mir	Hagene	wer hat nach iv gesant
daz ir getorstet riten	her in dizze lant
zvo also starchen leiden	vn– ich von iv han
het ir rehte sinne	so het irz pilliche lan
Nach mir ensande niemen	sprach do Hagene
man ladet her ze lande	drie degene
die heizent mine herren	so bin ich ir man
deheiner hovereise	bin ich vil selten ir bestan
Si sprach	nv saget mir mere	warvmbe tat ir daz
daz ir daz habt verdienet	daz ich iv bin gehaz
ir slvget Sivride	den minen lieben man
des ich vnz an min ende	immer gnvoc ze weinen han
Waz sol der rede mere	sprach er	ir ist genvoc
ich binz et aber Hagene	der Sivriden slvoc
einen helt ze sinen handen	wie sere er des engalt
daz div frowe Chriemh'	den schonen Prvnh' schalt
Ez ist et ane lovgen	kuniginne rich
ich han is alles schulde	des schaden schedelich
nv rechez swer der welle	ez si wip oder man
ihn wolde danne liegen	ich han iv leides vil getan
Si sprach	nv hoert	ir rechen	wa er mir lovgent niht
aller miner leide	swaz im da von geschiht
daz sol mir sin vnmære	ir Ezeln man
die vber mveten degene	sahen vaste ein ander an
Swer den strit da hvebe	so wêre da geschehn
daz man den zwein gesellen	der eren mvese iehn
wan siz in stvrmen heten	vil dicke wol getan
des sich iene vermazen	dvrch vorhte mvsen si daz lan
Do sprach ein der reche	wes seht ir mich an
daz ich ê da lobte	des wil ich ab gan
dvrch niemannes gabe	verliesen minen lip
ia wil vns verleiten	des kunic Ezeln wip
Do sprach aber ein ander	des selben han ich mvot
der mir gæbe tverne	von rotem golde gvot
disen videlære	woldeich niht bestan
dvrch sine swinde bliche	die ich an im gesehn han
Ovch erchenne ich Hagenen	von sinen iungen tagen
des mach man von dem rechen	lihte mir gesagen	[65r]
in zwein vn– zweinzech stvrmen	han ich in gesehn
da vil maniger frowen	ist hercenleide geschehn
Er vnt der von Spane	die traten manigen stic
do si hie bi Ezelen	vahten manigen wic
zen eren dem kunige	des ist von im vil geschehn
dar vmbe mvoz man Hagene	der eren wol von schulden iehen
Dannoch was der reche	siner iar ein kint
daz do tvmben waren	wie grise die nv sint
nv ist er chomen ze wizzen	vn– ist ein grimmech man
ovch treit er Palmungen	da vor <enchvnde> niht <gestan>
Da mite was gescheiden	daz da niemen streit
do wart der chvniginne	vil hercenliche leit
die helde cherten dannen	ia vorhten si den tot
von dem videlære	des gie in wærliche not
Do sprach der chvne Volker	wir han daz wol ersehn
daz wir hie <viende> vinden	als wir ê horten iehn
wir svln zv den kunigen	hin ze hove gan
sone tar vnser herren	mit strite niemen bestan
Wie diche man durch vorhte	manigiv dinch verlat
swa so frivnt frivnde	frivntlich gestat
vn– hat er gvte sinne	daz erz wisliche tvot
schade vil maniges mannes	wirt von sinnen wol behvot
Nv wil ich iv volgen	sprach do Hagene
si giengen da si fvnden	vil der degene
in grozem antpfange	noch an dem hove stan
Volker der vil chvene	lvote rvefen began
Er sprach zv sinen herren	wie lange welt ir sten
daz ir ivch lazet dringen	ir svlt ze hove gen
vn– hoeret an dem kunige	wi der si gemvot
do sah man gesellen sich	die helde chven vn– gvot
Der fvrste von Berne	der nam an die hant
Gunthern der richen	von Burgonden lant
Irenvrit Gernoten	einen chvenen man
do sah man Giselheren	ze hove mit sinem sweher gan
Swie iemen sich gesellete	vn– ovch ze hove gie
Volker vn– Hagene	geschieden sich nie
niwan in eime stvrme	an ir endes zit
daz mvsen beweinen	vil schone iuncfrowen sit
Do sach man mit den kunigen	hin ze hove gan
ir edeln ingesindes	tvsent chuner man
dar vber sehzech rechen	mit in warn chomen
die het in sime lande	der chvene Hagen genomen
Hawart vn– ovch Irinch	zwene vz erwelte man
die sah man frivntliche	bi den kunigen gan
Danchwart vn– Wolfhart	die heten sich bewegen
man sach si grozer tvgende	in ir vbermvte pflegn
Do der vogt von Rine	in den palas gie
Ezele der riche	daz niht langer lie
er spranch von sime sedele	als er si chomen sach
ein grvoz so rehte schone	von kunige nie mer geschach
Sit willechomen	her Gunther	vn– ovch her Gernot
vn– iwer brvder Giselher	dem ich min dienst enbot
mit triwen vlizzechli[65v]che	ze Wormez vber Rin
vn– allez daz gedigene	sol mir willechomen sin
Nv sit vns groz willechomen	ir zwene degene
Volker der chuone	vn– ovch her Hagene
mir vn– miner frowen	her in dizze lant
si hat in grozen triwen	vil diche mich vmbe ivch gemant
Do sprach der starche Hagene	daz haben wir wol vernomen
wær ich durch mine herren	zen Hvnen niht bechomen
so wær ich iv zen eren	geriten in daz lant
do nam der wirt vil edele	die lieben geste zehant
vn– brahte si zem sedele	da er selbe saz
do schancte man den gesten	mit vlize tet man daz
in witen goldes schalen	moraz vn– win
vn– bat die ellenden	groze willechomen sin
Do sprach der kunic der Hunin	des wil ich iv veriehn
mirn enchvnde in disen citen	lieber niht geschehn
denne ovch an iv rechen	daz ir vns her sit chomen
des ist miner frowen	michel trvren benomen
Mich nimt des michel wnder	waz ich iv habe getan
so manigen gast vil edelen	den ich gewnnen han
daz ir nie chomen rvochet	her in miniv lant
daz ich ivch nv gesehn han	daz ist zen vrevden mir gewant
Des antwrt Rvdeger	ein ritter hoch gemvot
ir mveget si sehn gerne	ir triwe div ist gvot
der miner frowen mage	so schone chvnnen pflegen
si bringent iv ze hvse	vil manigen wætlichen degen
An svnewenden abent	als wir han vernomen
waren si ze <Ezelen> bverge	dem chvnige ze hvse chomen
ein wirt nie sine geste	so minneklich enpfie
dar nach er zv den tischen	mit in vil vroliche gie
Ein kunec bi sinen gesten	schoner nie gesaz
man gab in vollechliche	trinchen vn– maz
vn– allez daz si wolden	des was man in bereit
man hete von den degenen	vil michel wnder geseit
Ezele der riche	het an <bow> geleit
sinen vliz kostenliche	mit grozer arebeit
palas un– tvrne	kemenaten ane zal
in einer witen burge	vn– einen herlichen sal
Den het er heizen bowen	lanch	hoch vn– wit
dvrch daz so vil der rechen	in svhte zaller cit
an ander sin gesinde	zwelf riche kunige her
vn– vil der werden degene	het er zallen citen mer
denne ir kvnic ie gewnne	als ich vernomen han
er lebt in hoher wnne	von magen vn– man
schallen vn– dringen	het der fvrste gvot
von manigem snellem degene	des stvont im hohe der mvot

<Der> tac der het nv ende	vn– nahet in div naht
den wegemvden degenen	ir sorgens an vaht
die herren solden rowen	vn– an ir bette gan
daz bereite Hagene	ez wart [66r]in schiere chvnt getan
Gvnther sprach zem wirte	got laze ivch mit frevden lebn
wir wellen varn slafen	ir svlt vns vrlovp gebn
als ir vns gebietet	wir chomen morgen frvo
er schiet von sinen gesten	vil harte minneklichen do
Dringen allenthalben	die geste man do sach
Volker der chvene	zv den Hvnen sprach
wie getvrret ir den rechen	vf die fvze gan
vn– welt irs niht ivch mazen	so wirt iv leide getan
So slah ich eteslichem	so swæren gigenslac
hat er getriwen iemen	daz erz beweinen mac
wan wichet ir vns rechen	ia dvnchet ez mich gvot
ez heizent alle degene	vn– sint geliche niht gemvot
Do der videlære	so zornechliche sprach
Hagen der chvene	vber ahsel sach
er saget	iv rætet rehte	der chvne spileman
ir Chriemh' degene	ir svlt zen herbergen gan
Des ir da habet willen	ich wæn ez iemen tvo
welt ir sin beginnen	so chomt vns morgen frvo
vn– lat vns wegemvden	hint haben gemach
ia wæn ez von heleden	mit solchem willen ie geschach
Do brahte man die geste	in einen witen sal
dar inne si sit namen	den totlichen val
da fvnden si gerihtet	vil manigiv bette breit
in riet div kuneginne	div aller groezisten leit
Vil manigen kvlter spæhe	von Arraz man da sach
von vil liehten pfellen	vn– manige bette dach
von arabischen siden	so si beste chvnden sin
ovch lage in vf den enden	von golde herlicher schin
Div dechelachen hærmin	vil menegiv man da sach
vn– ovch von swarcem zobele	dar vnder si ir gemach
des nahtes solden schaffen	vnz an den liehten tac
ein kunec mit sinen frivnden	nie so herlich gelach
Owe der nahtselde	sprach <Giselher> daz kint
vn– owe miner frivnde	die mit mir chomen sint
swie et ez min swester	mir gvetlich erbot
ir fverhte daz wir mvzen	von ir schulden ligen tot
Nv lazet iwer sorgen	sprach Hagen der degen
ich wil der schiltwache	noch hinte selbe pflegen
ich behvete ivch wol mit triwen	vnz vns chvmt der tac
daz wizzet	snelle degene	so genese swer der mac
Do nigen si im alle	vn– sagten im des danc
si giengen zvo den betten	div wile was niht lanc
daz sich engestet heten	die ellenden man
Hagene der starche	sich do wafen began
Do sprach der videlære	Volker der degen
versmahtez iv niht	Hagene	so wolde ich mit iv pflegen
der schiltwache hinte	vnze morgen frvo
der helt vil minnekliche	danchte Volkere dvo
Nv lone iv got von himele	vil edel Volker
zallen minen sorgen	sone gert ich niemens mer
niwan ivch aleine	swa ich hete [66v]not
ich sol ez wol verdienen	mich enwendes der tot
Do garten si sich beide	in liehtez ir gewant
do nam ir ietewedere	den schilt an sine hant
vn– giengen vz dem hvse	fvr die tvr do stan
do hvten si der degene	daz was mit triwen getan
Volker der vil snelle	zv des sales want
sinen schilt den gvten	leinte von der hant
do gie er hin widere	die videln er genam
do dienter sinen frivnden	als ez dem degene gezam
Vnder <die> tvr des hvses	saz er vf den stein
chvner videlære	div svnne nie beschein
do im der seiten doenen	so svozlich erchlanch
die stolzen ellenden	sagten im des grozen danc
Do chlvngen sine seiten	daz al daz hvos erdoz
sin ellen zv der fvoge	div beide warn groz
senfter vn– svezer	videln er began
do enswebter an dem bette	vil manigen sorgenden man
Do si wol entslafen waren	<vnde> er daz ervant
do nam der degene widere	den schilt an sine hant
do gie er vz dem hvose	fvr die tvre stan
vn– hvote siner frivnde	vor den Chriemh' man
Nach dem ersten slafe	ich wæn ez e geschach
Volker der vil chvene	einen helm schinen sach
verre vz einer vinster	die <Chriemhilde> man
wolden an den gesten	schaden gerne han getan
Ê Chriemhilt dise rechen	hete dan gesant
si sprach	ob irs also vindet	dvrch got so sit gemant
daz ir da slahet niemen	wan den einen man
den vngetriwen Hagenen	die andern svlt ir lebn lan
Do sprach der videlære	nv seht	her Hagene
iane zimt mir diz mære	niht ze dagene
ia sih ich mit gewæfen	dort her lvte gan
als ich mich versinne	ich wæn si wellent vns bestan
Nv swiget	sprach do Hagene	lats vns her naher baz
e si <vn> werden innen	so wirt hie helme vaz
mit swerten verrvcket	von der minen hant
si werdent hint ir frowen	hin wider vbele gesant
Ein der Hvnen rechen	vil schiere daz gesach
daz div tivre was behvetet	wie balde er do sprach
des wir da heten willen	iane mag es niht engan
ich sihe den videlære	an der schiltwache stan
Der treit vf sime hovbte	einen helm glanz
lvotter vn– herte	veste vn– ganz
ovch lohent sine ringe	sam daz fivre tvot
bi im stet ovch Hagene	des sint die geste wol behvot
Zehant si widercherten	do Volker daz ersach
zv sime hergesellen	er zorneklichen sprach
lat mich zv den rechen	von dem hvose gan
ich wil vragen der mære	der frovn Chriemh' man
Nein	durch mine liebe	sprach Hagene der degen
welt ir deheines strites	mit den helden pflegen
so bestent si ivch mit swerten	[67r]vn– bringent ivch in not
so mvese ich iv helfen	wêrz aller miner mage tot
So wir danne beide	komen in den strit
zwene oder viere	in einer kurzen zit
die sprvngen zv dem hvose	vn– tæten vns div leit
an den slafenden	div nimmer wrden verkleit
Do sprach aber Volker	so lat doch daz geschehn
daz wir si innen bringen	daz ich si habe gesehn
daz des niht haben lovgen	die Chriemh' man
daz si vil mortliche	gerne heten getan
Do sprach der videlære	den Hvnen vaste nach
wie get ir svs gewafent	war ist iv so gach
welt ir schaden riten	ir Chriemh' man
dar svlt ir mih ze helfe	vn– minen hergesellen han
Des antwrte im niemen	zornic was sin mvot
pfi	ir zagen boese	sprach der degen gvot
wolt ir slafende	vns ermordet han
daz ist so gvoten degenen	her vil selten noch getan
Do wart der kuniginne	rehte daz geseit
daz ir boten niht enwrben	von schulden was ir leit
do fvogte siz sit anders	vil grimmech was ir mvot
des mvsen sit engelten	degene chvene vnde <GvoT>

<Mir> chvolint so die ringe	so sprach Volker
ia wæn div naht vns welle	nv niht wern mer
ich chivsez von dem lvfte	ez ist vil schiere tac
do wachten si der manigen	der noch slafende lach
Do erschein der liehte morgen	den gesten in den sal
Hagen begunde vragen	die rechen vber al
ob si zem mvnster wolden	zvo der messe gan
nach siten kristenlichen	man vil lvtten began
Si svngen vngeliche	daz da vil wol schein
kristen vn– heiden	die zvgen niht enein
do wolden zv den chirchen	die Guntheres man
si warn von den betten	al geliche nv gestan
Do næten sich die rechen	in also gvot gewant
daz nie helde mere	in deheines kuniges lant
bezzer kleider brahten	daz was Hagene leit
er sprach	ia svlt ir degene	hie tragen anderiv kleit
Nv sint iv doch genvogen	div mære wol bechant
nv traget fvr die rôsen	div wafen an der hant
fvr schapel wol gesteinet	die liehten helme gvot
sit wir so wol erchennen	der argen Chriemh' mvot
Wir mvzen hivte striten	daz wil ich iv sagen
ir svlt fvr siden hemde	die liehten prvenne tragen
vn– fvr die tiefen mæntil	die vesten schilde wit
ob iemen mit iv zvrne	daz ir vil werliche sit
Mine vil lieben herren	darzvo mage vn– man
ir svlt vil willechliche	zvo der chirchen gan
vn– chlaget got dem richen	sorge un– iwer not
vn– wizzet sicherlichen	daz vns na [67v]het der tot
Irn svlt ovch niht vergezzen	swaz ir habt getan
vn– svlt vil vlegeliche	da gegen gote <stan>
ir svlt sin gewarnet	recken also her
ez enwelle got von himele	ir vernemt messe nimmer mer
Svs giengen zv dem mvnster	die fvrsten vn– ir man
vf den vronen chirchof	do hiez si stille stan
Hagene der chvene	daz si sich schieden niht
er sprach	iane <weiz> noch niemen	waz von den Hvnen vns
Leget	mine frivnde	die schilde fvr den fvoz	[ geschiht
vn– geltet	ob iv iemen	biete swachen grvoz
mit tiefen verchwnden	daz ist Hagenen rat
daz ir so werdet fvnden	daz ez iv lobelichen stat
Volker vn– Hagene	die zwene giengen dan
fvr daz mvnster	daz wart dvrch daz getan
daz si daz wolden wizzen	daz des kuniges wip
mit in da mvese dringen	ia was vil grimmech ir lip
Do chom der wirt des landes	vnt ovch sin schone wip
mit vil richem gewande	gezieret was ir lip
der rechen genvoge	die man sach mit ir varn
do chos man hohe stovben	von der kuniginne scharn
Do der kunic Ezele	alsvs gewaffent sach
die rechen von dem Rine	wie balde er do sprach
wie sihe ich frivnde min	vnder helmen gan
mirst leit vf mine triwe	vn– hat in iemen iht getan
Ich sol in gerne bvzen	swie si dvnchet gvot
hat iemen in beswæret	daz herce vn– ovch den mvot
des bringe ich si wol innen	daz ez mir ist vil leit
swie si mir gebietent	des bin ich alles in bereit
Do sprach von Tronege Hagene	vns hat niemen niht getan
ez ist site miner herren	daz si wafent gan
zallen hochgeciten	ze vollen drien tagen
het vns iemen iht getan	wir soldenz iv billiche sagen
Wol hort div kuniginne	waz Hagene sprach
wie rehte vintliche	si im vnder dovgen sach
sine wolde doch niht melden	die site von ir lant
swie lange si sie da heime	mit frevden hete bechant
Swie grimme vn– ovch swie starche	si in vient wære
het iemen gesaget Ezelen	div rehten mære
er het iz vnderstanden	daz niht da wære geschehn
si liezenz dvrch ir vbermvot	daz sis im wolden niht veriehn
Do gie div kuniginne	mit grozer menege dan
done wolden dise zwene	idoch niht hoher stan
drier trite breiter	daz was den Hvnen leit
ia mvse si sich dringen	mit den degenen gemeit
Die Ezeln kamerære	dvote daz niht gvot
ia heten si den rechen	erzvrnet do den mvot
wan daz sine torsten	vor dem kunige her
da was vil michel dringen	vn– doch niht <anders> mer
Do man da gote gediente	vnt [68r]da si wolden dan
do chomen da zen rossen	vil manic Hvnen man
ovch was bi Chriemh'	vil manic schoniv meit
wol sibent tvsent degene	bi der kuneginne reit
In des sales venster	Chriemh' gesaz
mit maniger schonen frowen	mit frevden ane haz
Ezele der riche	gesaz ovch zv zir nider
vn– sahen kurcewile	von den gvten rechen sider
Nv was ovch in der marschalch	mit den rossen chomen
Danchwart der snelle	er het zvo zim genomen
sins herren ingesinde	von Bvregonden lant
div ros man wol gesatelet	den ellenden rechen vant
Do si zen rossen chomen	die kunige vn– ir man
Volker der chvene	raten do began
si solden bvhvrdieren	nach ir landes siten
des wart von degenen	sit vil herlich geriten
Vof den hof vil witen	chom do manic man
Ezele vn– Chriemh'	ez sahen allez an
der bvhvrt vn– schallen	div beidiv wrden groz
von kristen vn– von heiden	wie lvzzil iemen da verdroz
Vf den buhurt chomen	al zehant geriten
die Dietriches rechen	in hochverteklichen siten
si wolde kurcewile	mit den gesten han
do enwolde ers in niht gvnnen	ir herre hiez siz balde lan
Mit Guntheres mannen	daz spil er in verbot
er vorhte siner degene	des gie im groziv not
do chomen von Bechelaren	die Rvdegeres man
dar vmbe do der edele	starche zvrnen began
Er chom zvo zin vil balde	gedrvngen dvrch die schar
vn– sagete sinen degenen	si wæren des gewar
daz in vnmvte wæren	die Gvnthers man
ob si den bvhvrt liezen	daz wære im liebe getan
Do sich die von in schieden	als vns ist geseit
do chomen da von Dvringen	helde vil gemeit
vn– die von Tenemarchen	wol tvsent chvner man
von stichhen sah man vliegen	vil der trvonzvone dan
Hawart vnt ovch Irnfrit	gesellechliche siten
des waren die von Rine	in hochvertiklichen siten
si bvten manige tioste	den von Dvringen lant
des wart von stichen dvrchel	vil manic herlicher rant
Do chom ovch zv dem schalle	der herre Bloedelin
mit tusent siner rechen	die taten da wol schin
wie si riten chvnden	sich hvop groz vngemach
Chriemh' ez vil gerne	dvrch leit der Bvregonde sach
Si gedaht in ir mvote	als ez was nach geschehn
geschæhe iemen von in leide	so moehte ich mich versehn
daz ez erhaben wrde	an den vienden min
wrde ich wol errochen	des wolde ich gar an angest sin
Schrvotan vn– Gibeche	vf den buhvrt riten
Hornboge vn– Ramunch	nach <hvnischen> siten
si hielten gein den helden	vz Buregonden lant
die schefte dræten hohe	mit chreften fvr des sales want
Swes da iemen pflêge	so was [68v]ez niwan schal
man horte von schilde stozen	palas vn– sal
harte lvot erdiezen	von Gunthers man
den lop daz sin gesinde	mit grozen eren da gewan
Do was ir churcewile	so lanc vn– ovch so groz
daz dvrch die chovertivre	der blanche sweiz do vloz
von den vil gvten marchen	die di helde riten
si svohtenz an den Hvnen	in vil hochvertlichen siten
Do sprach der videlære	Volker der chvne man
ich wên vns dise rechen	tvrren niht bestan
ich hort ie sagen mære	daz si vns trvgen haz
nvne chvndez sich zer werlde	zware nimmer fvegen baz
Zen herbergen fveren	sprach der kunec her
sol man nv di moere	vnde riten danne mer
gegen abende	so des wirdet cit
waz ob div kuniginne	lop den vnchunden git
Do sahens eincn riten	so waigerlichen hie
daz ez al der Hvnen	tet deheiner nie
ia mohter in den venstern	wol haben hercen trvot
er was so wol gechleidet	sam eins vil werden ritters brvot
Do sprach aber Volker	wie moehte ich daz verlan
iener trvot der frowen	mvz eine <gebvze> han
daz chunde niemen wenden	ez get im an den lip
iane rvoche ich ob ez zvrne	des kunic Ezeln wip
Nein	dvrch mine liebe	sprach der kunec san
ez wizzent vns die lvte	ob wir si bestan
ir lat ez heben die Hvnen	daz fvget sich noch baz
dannoch der kunec Ezele	bi der kuniginne saz
Ine mag es niht gelazen	sprach do Volker
den bvhvrt reit er widere	mit vollechlicher ger
stach er dem richen heiden	daz sper dvrch sinen lip
daz sah man sit beweinen	beide maget vn– wip
Do rvochte hvrtekliche	Hagene nach im dan
mit sehzich siner degene	riten er began
nach dem videlære	da div tiost geschach
Ezel vn– Chriemh'	ez bescheidenliche sach
Done wolden ovch die kunige	den ir spileman
bi den vianden	niht ane helfe lan
da wart von tvsent heleden	vil chunsteklich geriten
si taten daz si wolden	in vil hochvertlichen siten
Da der riche Hvne	ze tode was erslagen
man horte sine mage	weinen vn– klagen
do vragt al daz gesinde	wer hat ez getan
do sprachen die daz sahen	daz hat der starche spileman
Nach swerten vn– nach schilden	riefen da zehant
des marcgraven mage	von der Hvnen lant
do wolden si den spileman	ze tode erslagen han
der wirt vz eime venster	sere gahen do began
Do hvop sich von den lvten	allenthalben schal
die Guntheres rechen	erbeizten vber al
div ros ze rvcke stiezen	die kunige vn– al ir man
do chom der kunic Ezele	der helt ez schaiden began
Ein des Hvnen mage	den er da bi im vant
ein vil starchez wafen	[69r]brach er im vz der hant
do slvgers alle widere	wan im was vil zorn
wie het ich minen dienest	an disen heleden verlorn
Ob ir nv disen spileman	het darvmbe erslagen
ich hiez ivch alle hahen	daz wil ich iv sagen
ich sah vil wol sin riten	do er den Hvnen stach
deiz ane sinen willen	von eime strvche geschach
Ir mvzet mine geste	vride lazen han
do wart er geleite	div ros div zoch man dan
zv den herbergen	si heten manigen kneht
die in ze dienste waren	mit allem vlize gereht
Der wirt mit sinen frivnden	in den palas gie
zorn er mer deheinen	da niht werden lie
do rihte man die tische	daz wazzer man in trvoc
do heten die von Rine	viende da genvoc
Swie leit ez Ezeln wære	gewafent manige schar
sach man nach fvrsten dringen	vn– wol ze vlizze gar
da si zen tischen giengen	dvrch der geste haz
ir mâch si rechen wolden	<ob> sich gefvgen chvnde daz
Sit ir gewafent gerner	ezzet danne bloz
sprach der wirt des landes	div vnzvht ist cze groz
swer aber minen gesten	hie tvot deheiniv leit
ez get im an sin hovbet	daz sie iv Hvnen geseit
ê die herren gesezzen	daz was hartelanch
div Chriemh' sorge	si al ze sere twanc
si sprach herre Dietrich	ich svches dinen rat
helfe vn– genade	min dinch mir angestlichen stat
Do sprach fvr sinen herren	Hildebrant	der ellens rich
swer sleht die Nibelunge	der tvot ez ane mich
dvrch deheines schazzes liebe	ez mag im werden leit
si sint noch vnbetwngen	die snellen degene gemeit
Si sprach	ia hat mir Hagene	also vil getan
er morte Sivriden	den minen lieben man
der in vz den andern schiede	dem wær min golt bereit
engvltes ander iemen	daz wær mir inneklichen leit
Do sprach meister Hiltebrant	wie chunde daz geschehn
daz man in bi in slvge	ich lieze ivch daz gesehn
ob man den helt bestvnde	sich hvbe liht ein not
daz arme vn– riche	dar vmbe mvsen ligen tot
Do sprach in sinen zvehten	dar zvo her Dietrich
die bete la beliben	kuniginne rich
mir habent dine mage	der leide niht getan
daz ich die edeln degene	mit strite welle bestan
Div bet dich lvzzel eret	vil edeles fvrsten lip
daz dv dinen mâgen	rætest an den lip
si chomen vf genade	her in dizze lant
Sivrit ist vnerrochen	von der Dietriches hant
Do si an dem Bernære	den willen niht envant
do lobtes also balde	an Bloedelines hant
eine wite marche	die Nvodvnch ê besaz
sit do slvog in Danchwart	daz er der gabe gar vergaz	[69v]
Si sprach	dv solt mir helfen	herre Bloedelin
ez sint in disem hvose	die viande min
die Sivriden slvgen	den minen lieben man
der mir daz hilfet rechen	dem bin ih immer vndertan
Des anwrt ir Bloedel	da er bi ir saz
ia ne getarre ich dinen magen	geraten cheinen haz
wande si min brvoder	bi im gerne siht
ob ich si bestunde	der kunec vertrvge mir sin niht
Neyna	herre Bloedel	ich bin dir immer holt
ia gib ich dir dar vmbe	min silber vn– min golt
vn– eine schone frowen	daz Nvdvnges wip
so mahtv gerne trvten	den ir vil minneklichen lip
Daz lant zvo den burgen	soltv haben dir
vil tivrlicher reche	dv solt gelovben mir
daz ich dich <sicherlichen>	alles des gewer
daz ich dir hie benennet han	ob dv leistes mine ger
Do der herre Bloedel	die miete vernam
vn– daz im dvrch ir schone	div frowe wol gezam
mit strite wander dienen	daz minnekliche wip
dar vmbe mvosen rechen	mit im verliesen den lip
Er sprach	man sol geswigen	der rede vber al
ê man is <werde> inne	so heb ich einen schal
ez mvz arnen Hagene	swaz er iv hat getan
oder ich wil dar vmbe	minen <lip> verlorn han
Nv wafent ivch	sprach Bloedel	alle mine man
wil svln den vianden	in ir herberge gan
des wil mich niht erlazen	daz Ezeln wip
dar vmbe svln wir degene	alle wagen den lip
Do div kuniginne	Bloedelinen lie
in des strites willen	ze tische si do gie
mit Ezele dem kunige	vn– ovch mit sinen man
si hete swinde ræte	an die geste getan
Wie si ze tische gienge	daz wil ich iv sagen
man sach da kunige riche	chrone vor ir tragen
vil manigen hohen fvrsten	vn– manigen werden degn
die sah man grozer zvhte	vor der kuniginne pflegen
Der wirt der schvf den gesten	den sedel vber al
den hohsten vn– den besten	zvo zim in den sal
den christen vn– den heiden	ir spise er vnderschiet
man gab genvoc in beiden	als ez der wise kunec beriet
Ir ander ingesinde	zen herbergen azen
den warn trvhsazen	ze dienste lazen
die mvsen ir spise	wol ze vlize pflegen
ir wirtschaft vn– ir frevde	wart sit mit iamer widerwegen
Do die fvrsten gesezzen	warn vber al
vn– nv begvnden ezzen	do wart in den sal
getragen zvo den fversten	daz Ezeln kint
da von der kunec riche	gewan vil starchen iamer sint
Dar giengen an der stvnde	vier Ezeln man
si trvogen Ortlieben	den ivngen kunec	dan
zv der fvrsten tische	da ovch Hagene saz
des mvsiz kint ersterben	dvrch sinen mortlichen haz
Do [70r]der kunich riche	sinen svon ersach
zvo sinen chonemâgen	er gvetliche sprach
nv seht ir	frivnde mine	daz ist min einech man
vn– ovch iwer swester	der magiv noh vil dienste tvon
Gevehter nach dem chvnne	ein wirt ein kvne man
rich vn– ovch vil edele	starch vn– wolgetan
leb ich deheine wile	ich gib im drizzech lant
so magiv wol gedienen	des iungen Ortliebes hant
Dar vmbe ich bite gerne	ivch	lieben frivnde min
swenne ir ze lande widere	ritet an den Rin
so svlt ir mit iv fvren	den iwern swester svon
vn– svlt ovch an dem kinde	vil genædekliche tvon
Ziehet in zen erein	vnz er werde ze man
hat iv in den landen	iemen iht getan
daz hilfet er iv rechen	daz habt vf minen lip
die rede hort ovch Chriemh'	des kunec Ezeln wip
Im solden wol getrowen	dise degene
gewhser zeinem manne	so sprach Hagene
doch ist der kunec ivnge	so veicklich getan
man sol mich sehen selten	ze hove nach Ortliebe gan
Der kvnich Hagenen an blichte	im was div rede leit
swie niht dar vmbe en redete	der fvrste vil gemeit
ez betrvebte im sin herce	vn– bewart im den mvot
do was der Hagenen wille	niht ze kurcewile gvot
Ez tet den fvrsten allen	mit dem kunige we
daz Hagen von sime kinde	het gesprochen ê
daz siz versizzen solden	daz was in vngemach
sine wessen niht der mære	waz von dem rechen sit geschach
Gnvge	di ez horten	vn– im doch warn gram
in heten gerne bestanden	ovch het der kunec alsam
getorster von sinen eren	so wær ers chomen in not
sit tet im Hagene mere	er slvogen vor sinen ovgen tot

<Die> Bloedelines rechen	die warn alle gar
mit tusent <halspergen>	hvben si sich dar
da Danchwart mit den knehten	ob den tischen saz
do hvop sich vnder degenen	mort vn– nitlicher haz
Also der herre Bloedel	fver die tische gie
Danchwart der marschalch	in gvetlich enpfie
willechomen her ze hvse	min her Bloedelin
waz iwer reise meine	des wndert gar die sinne min
Iane darftv mih niht grvezen	sprach do Bloedelin
wan dizze chomen daz mine	daz sol din ende sin
dvrch Hagenen dinen brvoder	der Sivriden slvoc
des engiltestv zen Hvnen	vn– ander degene genvoc
Neina	herre Bloedel	sprach do Danchwart
so mohte vns balde riwen	disiv hovevart
ich was ein vil kleiner kneht	do Sivrit vlos den lip
iane weiz ich waz mir wi[70v]zet	des kunec Ezeln wip
Iane weiz ich dir <der> mære	nimer ze sagene
ez taten dine mage	Gunther vn– Hagene
nv wert ivch vil ellenden	ir chvnnet niht genesen
ir mvzet mit dem tode	pfant daz Chriemh' wesen
So enwelt ir niht erwinden	sprach do Danchwart
so riwet mich min vlehen	daz wære baz verspart
der snelle degen chvne	von dem tische spranch
er zoch ein scharpfez wafen	daz was michel vn– lanch
Do slvoger Bloedeline	einen swinden swertes slac
daz imz hovbet mit helme	vor den fvezen lac
daz si din morgengabe	sprach Danchwart der helt
zvo Nvodvnges brvte	die dv ze frevden hast erwelt
Si mac sich morgen mæhelen	einem andern man
wil er die brvote miete	ez mac im sam ergan
ein getriwer Hvne	het im daz geseit
daz in div kuniginne	riet so groezlichiv leit
Do sahen Bloedelines man	ir herre lac erslagen
daz enwolden si den gesten	langer niht vertragen
mit vf erbvrten swerten	si sprvngen fvr div kint
in eime grimme mte	ia gerowez si sint
Vil lvte rief der marschalch	al die knappen an
ir seht wol	edeln knehte	wie ez wil vmbe gan
nv wert ivch ellenden	als ivch des twinget not
daz ir frvomchliche	ane schande <liget> tot
Die swerte niht enheten	die reichten fvr die banch
si hvben vz den fvzen	vil manigen schamel lanch
der Buregonden knehte	in wolden niht vertragen
da wart von swæren stvlen	dvrch helme bvlen vil geslagen
Wie grimme sich do werten	div ellenden kint
si triben vzem hvse	die gewafenden sint
doch beleib ir tot dar inne	fvnf hvndert oder baz
do was daz ingesinde	von blvote rot unde naz
Disiv starchen mære	wrden dan geseit
den Ezeln rechen	ez was in grimme leit
daz erslagen wære	der herre un– sine man
daz het der Hagen brvoder	mit den knehten getan
Ê manz ze hove erfvnde	die Hvnen dvrch ir haz
der garte sich zwei tvsent	oder dannoch baz
si giengen zv den knehten	daz mvos et also wesen
vn– liezen des gesindes	ninder einen genesen
Do die vil ungetriwen	drvngen in daz gadem
do hvop sich zwischen den rechen	vil vngefvger kradem
waz half ir baldez ellen	si mvsen ligen tot
dar nach in chvrcen stvnden	hvop sich êngestlichiv not
Hie mvgt ir horen wnder	bi vnfvge sagen
niwan tvsent knehte	die lagen tot erslagen
dar vber ritter zwelfe	der Danchwarres man
man sach in alterseine	noch bi den vianden stan
Der schal der was geswiftet	der doz der was gelegn	[71r]
do blichte vber ahsel	Danchwart der degen
Er sprach	owe der frivnde	die ich verlorn han
nv mvz ich leider eine	bi minen vianden stan
Div swert genote vielen	vf sin eines lip
daz mvse sit beweinen	vil maniges heldes wip
den schilt er rvochter hoher	den vezzel nider baz
do frvmt er vil der ringe	mit blvte vliezende naz
Owe mir dirre leide	sprach Adrians kint
nv wichent	Hvnen rechen	ir lat mich an den wint
daz der lvfte erchvele	mih stvrme mveden man
do begvnder an ir willen	in strite gegen der tvre gan
Der helt in grozem zorne	zvov dem hvse spranch
waz iteniwer swerte	vf sime libe erchlanch
die niht gesehen heten	waz wnders tet sin hant
die mvsen da beliben	von dem vz Burgonden lant
Nv wolde got	sprach Dancwart	mohte ich den boten han
der minen brvder Hagenen	chvnde wizzen lan
daz ich vor disen rechen	sten in solher not
er hvlfe mir von hinnen	oder er gelege bi mir tot
Do sprachen Hvnen rechen	der bote mvstv sin
so wir dich tragen toten	fvr den brvder din
so siht im erste leide	der Gunthers man
dv hast dem kvnege Ezelen	so grozen schaden <hie> getan
Nv lat die dro beliben	vn– stet vf hoher baz
ia getvn ich eteslichem	noch die ringe naz
nv wer mirz swer der welle	ich wil ze hove gan
vn– wil selbe disiv mære	minen herren wizzen lan
Er leidete sich so sere	den Ezeln man
daz si in mit den swerten	nv torsten niht bestan
do schvzzen si der gere	so vil in sinen rant
daz er in dvrch die swære	mvse lazen von der hant
Si wanden in betwingen	do er niht schildes trvoc
hey waz er tiefer wnden	sit dvrch helme slvoc
des mvse vor im strvochen	vil manic kvner man
darvmbe lop vil grozen	der chvne Danchwart gewan
Ze beiden sinen siten	si im sprvngen zvo
ia chom ir eteslicher	in den strit ze frvo
er gie vor sinen vienden	alsam ein eberswin
ze walde tvot vor hvnden	wie moehter kvner gesin
Sin vart div wart erniwet	von heizem blvte naz
iane chvnde ein einer reche	gestriten nimmer baz
mit also vil der viende	denner hete getan
do mvsen si in lazen	ane ir danc ze hove gan
Trvhsêzzen vn– schenchen	die horten swerte chlanc
vil maniger do daz trinchen	von der hende swanch
vn– svmeliche spise	die man ze hove trvoc
do chom im vor der stiegen	der starchen viende genvoc
Wie nv	ir gvten knehte	sprach der mvde degen
ia soldet ir der geste	gvetliche pflegen
vn– soldet nv den herren	die edeln spise tragen
vn– liezet [71v]mich div mere	ze hove minen herren sagen
Swelher dvrch sin ellen	im fvr die stiegen spranch
der slvger eteslichem	so swæren swertes swanc
daz si dvrch die vorhte	vf hoher mvsen stan
ia het sin starchez ellen	vil maniges ende getan
Also der chvne Danehwart	vnder die tvre getrat
daz Ezeln gesinde	er hoher wichen bat
mit blvote bervnnen	was allez sin gewant
ein vil starchez wafen	daz trvger bloz an siner hant
Ez was reht in der wile	do Danchwart chom fvr die tver
daz man Ortlieben	trvoc wider vn– fver
von tische ze tischen	den fvrsten wol geborn
von disen starchen mæren	wart daz kindelin verlorn

<Uil> lvote rief do Danchwart	eime degene
ir sizzet al ze lange	brvoder Hagene
iv vn– got von himele	chlage ich vnser not
ritter vn– knehte	sint in der herberge tot
Er rief im engegene	wer hat daz getan
daz hat der herre <Bloedel>	vn– sine man
ovch hat ers niht genozzen	div wil ich iv sagen
ich han im sin hovbet	mit minen handen abe geslagen
Daz ist ein schade kleine	sprach aber Hagene
swa man solhiv mære	saget von degene
ob er von rechen handen	verlivset sinen lip
in svln deste ringer	klagen wætlichiv wip
Nv saget mir	lieber brvoder	wie sit ir so rot
ich wæn ir uon wnden	lidet groze not
ist er inder inme lande	derz iv hat getan
in erner der <vbel> tivfel	ez mvz im an sin leben gan
Ir seht mich wol gesunden	min wat ist blvotes naz
von ander mannen wnden	ist mir geschehn daz
der ich also manigen	hivte han erslahen
ob ich des swern solde	ine chvndez nimmer gesagen
Er sprach	brvoder Danchwart	so hvtet vns der tver
vn– enlat der Hvnen einen	chomen niht derfver
ich wil reden mit den rechen	des vns nv dwinget not
vnser ingesinde	lit vnverdienet hie tot
Sol ich sin kamerære	sprach do der kvene man
also richen kvnegen	ich wol gedienen chan
<so> ich der stiegen	nach den eren min
den Chriemh' degenen	chvnde leider niht gesin
Mich nimt des michel wnder	sprach do Hagene
 rvnen in disem gademe
si wæn des lihte enbêrn	der an der tver dort stat
vn– ovch div hovemære	gesaget den Bvrgonden hat
Ich han gehort vil lange	von Chriemh' sagen
daz si ir hercen leide	wolde niht vertragen
nv trinchen wir die minne	vn– gelten skvniges win
der [72r]ivnge vogt der Hvnen	der mvoz hie der erste sin
Do slvoc daz kint Ortlieben	Hagen der helt gvot
daz im an dem swerte	zer hende vloz daz blvot
vnt daz des kindes hovbet	spranch Chriemh' <in> ir schoz
do hvop sich vnder degenen	ein mort vil grimmech vn– groz
Ovch slvoger den magetzogen	einen swinden slac
mit beiden sinen handen	der Ortliebes pflac
daz im daz hovbet schiere	vor tischen nider lac
ez was ein iæmerlicher lon	den er dem magtzogen wach
Er sach vor Ezeln tische	einen spileman
Hagen in sime zorne	gahen dar began
er slvog im vf der videlen	ab die einen hant
daz habe der boteschefte	in der Bvrgonden lant
Owe mir	sprach Werbel	der Ezeln spileman
her Hagen von Tronege	waz het ich iv getan
ich kom vf groze triwe	in iwer herren lant
wie chlenche ich nv die doene	sit ih nv verlorn han die hant
Hagenen ahte ringe	gevidelter nimmer mer
do frvmt er in dem hvse	div werch grimmen ser
an den Ezelen rechen	der er so manigen slvoc
er braht ir in dem gademe	zvo dem tode genvoc
Volker sin geselle	von tische spranch
sin videlboge im lvote	an siner hende erchlanc
do videlte vngefvege	der kunige spileman
hey waz er im ze vienden	der chvnen Hvnen gewan
Do sprvngen von den tischen	die drie kvnige her
si woldenz gerne scheiden	e des schaden wrde mer
sine chvndenz mit ir sinnen	do niht vnderstan
do Volker vn– Hagene	so sere weten began
Do sach der vogt von Rine	vngescheiden den strit
do slvoc der fvrste selbe	vil manige wnden wit
dvrch die liehten ringe	den vianden sin
er was ein helt zen handen	daz wart da grozlichen schin
Do chom ovch zvo dem strite	der starche Gernot
ia frvomt er den Hvnen	vil manigen helt tot
mit dem scharpfen swerte	daz im gap Rvdeger
den Ezeln magen	frvmrer div grozlichen ser
Der ivnge svon frovn Vten	zvo dem strite spranch
sin wafen herrenliche	dvrch die helme erchlanc
den Ezeln rechen	vzer Hvnen lant
da tet vil michel wnder	div Giselheres hant
Swie frvom si alle wæren	die kvnige vn– ovch ir man
doch sah man Giselhere	ze vorderest stan
bi den vianden	er was ein helt gvot
er schvf da mit den wnden	vil manigen nider in daz blvot
Ovch werten sich vil sere	die Ezeln man
do sah man die geste	howende gan
mit den liehten swerten	dvrch des kvniges sal
do hort man allenthalben	von strite grozlichen schal	[72v]
Do wolden die dar vzen	mit frivnden sin dar in
si namen an der stiegen	vil kleinen gewin
do wolden si dar inne	vil gerne fvr die tver
done lie der portenære	ir deheinen dar fver
Do hvop sich in der porte	vil grozer der gedranc
vn– ovch von den swerten	vf helme lvoter klanc
des chom der kvne Danchwart	in vil starche not
daz bedahte Hagene	als im sin triwe gebot
Vil lvte rief do Hagene	Volkern an
seht ir dort	geselle	minen brvoder stan
vor hvnischen rechen	vnder starchen slegen
frivnt	nert mir den brvoder	ê wir vliesen den degn
Daz tvon ich sicherlichen	sprach der man
er begvnde vil videlende	dvrch den palas gan
ein scharpfez <swert> im diche	an siner hende erchlanc
die rechen bi dem Rine	sagten im des grozen danch
Volker der vil chvene	zvo Danchwarte sprach
ir habt erliten hivte	grozen vngemach
mich bat iwer brvoder	dvrch helfe zv zw gan
welt ir nv sit dar vze	so wil ich inrethalben stan
Danchwart der vil snelle	stvnt vzerhalp der tver
do wert er in die stiegen	swaz ir chom der fver
des hort man waffen hellen	an der helede hant
sam tet ovch inrethalben	Volker von Bvregonden lant
Der chvne videlære	rief zvo dem degene
daz hvs ist wol beslozen	frivnt Hagene
ez ist also verschranchet	div Ezeln tver
von zweier rechen handen	da <gent> wol tvsent rigel fver
Do der starche Hagene	die tver so sach behvot
den schilt warf do zervcke	der chvne degen gvot
do erst begunder rechen	siner frivnde leit
sines zornes mvose engelten	vil manic ritter gemeit
Do der voget von Berne	daz wnder reht ersach
daz Hagene der starche	so manigen helm brach
der kunic der Amelvnge	sprach vf einen banch
er sprach	hie schenchet Hagene	daz aller wirsiste tranch
Der wirt het groze sorge	sin wip div het alsam
waz man im lieber frivnde	vor sinen ovgen nam
wander von sinen vinden	vil chvme da genas
er saz vil angestliche	waz half in daz er kunec was
Chriemh' div frowe	rief Dietrichen an
nv hilf mir von dem sedele	ritter	von in dan
dvrch aller fvrsten tvgende	vz Amelvnge lant
vn– erreichet mich dort Hagene	ich han den tot an der hant
Wie sol ich iv gehelfen	sprach do Dietrich
vil edeliv kuneginne	nv sorge ich vmbe mich
ez sint so sere erzvrnet	die Guntheres man
daz ich an disen citen	gevriden niemen enchan
Neina	herre Dietrich	vil edel ritter gvot
laza hivte schinen	den tvgentlichen [73r]mvt
daz dv mir helfest hinnen	oder ich belibe tot
nv hilf mir vn– dem kvnige	vz dirre angestlicher not
Daz wil ich versvochen	ob ich iv helfen chan
wande ich in langen citen	niht gesehn han
so pitterlich erzvrnet	manigen ritter gvot
ia <sahe> dvrch die helme	von swerten vliezen daz blvot
Mit chraft begunde rufen	der degen vz erchorn
daz im sin stimme erlvote	alsam ein wisents horn
vn– daz der palas wite	von siner chraft erdoz
div sterche Dietriches	was vil vnmæzliche groz
Do gehorte Gvnther	rvfen disen man
in dem starchen stvrme	losen er began
er sprach	Dietriches stimme	ist in min ore chomen
ich wæn im vnser degene	etewen hie benomen
Ich sihe in vf dem tische	er winchet mit der hant
ir frivnt vn– mage	von Burgonden lant
gehabt vf des strites	lat hoeren vn– sehn
waz hie Dietriche	von vns ze schaden si geschehn
Do der kunic Gunther	bat vn– ovch gebot
si habten vf mit swerten	in des stvrmes not
daz was gewalt vil grozer	daz do niemen streit
do reiten mit ein ander	die kvnen rechen gemeit
Er sprach	vil edel Dietrich	waz ist iv hie getan
von den minen magen	willen ich des han
svne vn– bvze	bin ich iv bereit
swaz iv iemen tæte	daz wær mir inneklichen leit
Do sprach der herre Dietrich	mir ist noch niht getan
des ich schaden deheinen	von iv mvge han
wan lar mih von dem strite	mit dem gesinde min
daz wil ich vmbe ivch degene	immer dienende sin
Wie vleget ir so sere	sprach do Wolfhart
iane hat der videlære	die tver nie so verspart
wir entsliezen si so wite	daz wir dar fvre gan
nv swiget	sprach her Dietrich	ir habt den tivfel getan
Do sprach der kunic Gvnther	erlovben ich iv wil
fvret vz dem hvse	lvzzil oder vil
ane mine vinde	die svln hie bestan
si habent mir zen Hvnen	leides vil getan
Der herre von Berne	vnder einen arm besloz
die edeln kuniginne	der angest div was groz
do fvrt er anderthalben	Ezeln mit im dan
ovch giengen mit im dannen	sehs hvndert siner chvener man
Do sprach der marcgrave	der edel Rvdeger
sol aber ozem hvse	iemen chomen mer
die iv doch dienen gerne	daz lazet vns vernemen
so sol ovch fride der stæte	gvten frivnden immer zemen
Des antwrte Giselher	sime sweher zehant
vride vn– svone	si iv von uns bechant
sit ir sit triwen stæte	beide ir vn– iwer man
svlt gemeinliche	mit iwern frivnden hinnen gan
Do der marcgrave	gervmte den sal
fvnf hundert vn– mere	[73v]im volgten zetal
die stiegen von dem hvose	daz warn sine man
von den der kvnec Gvnther	vil grozen schaden sit gewan
Do sach ein Hvnen reche	Ezelen gan
bidem Bernære	genozzen wolders han
dem gap der videlære	einen swern slac
daz im vor Ezeln fvezen	daz hovbet schiere gelac
Do der wirt des landes	chom von dem hvse dan
do cherte er sich hin widere	vn– sach Volkeren an
owe mir dirre geste	daz ist ein grimmniv not
daz alle mine frivnde	svln vor in ligen tot
Ach we der hochgecite	sprach der kvnec her
da vihter einer inne	der heizet Volker
alsam ein eber wilde	vn– ist ein spileman
ich danches mime heile	daz ich dem valande entran
Sine leyche lvtent vbele	sine zvege die sint rot
ia velent sine doene	vil manigen helt tot
ine weiz niht waz vns wize	der selbe spileman
wan ich gast neheinen	nie so leiden gewan
Zir herbergen giengen	die rechen also her
der herre von Berne	vn– ovch Rvdeger
sine wolden mit dem strite	niht ze schaffen han
vn– gebvten ovch ir degenen	daz sis mit fride solden lan
Vn– heten si getrowet	alsolher swære
daz in div von in beiden	so chvnftich wære
sine wærn von dem <hvse>	niht so sanfte chomen
si <heten> eine strovfe	an den vil chvnen ê genomen
Si heten die si wolden	lazen vz dem sal
<do> hvop sich inrethalben	ein grozlicher schal
die geste sere rachen	daz in ê geschach
Volker der vil chvene	hey waz er liehter helme brach
Sich cherte gein dem schalle	Gunther der kunec her
hort ir die doene	Hagene	die dort Volker
mit den Hvnen videlet	swer gegen der tvor gat
ez ist ein roter anstrich	den er zem videlbogen hat
Mich riwet ane maze	sprach do Hagene
daz ich vor Volkere	ie gesaz dem degene
ich was sin geselle	vn– ovch er der min
vn– chom wir immer widere	daz svln wir noch mit triwen sin
Nv schowe	kvnec Gvnther	Volker ist dir holt
er dienet willechliche	din silber vn– <din> golt
sin videlbogeim snidet	dvrch den herten stal
er brichet vf den helmen	div liehten schinende mal
Man gesach nie videlære	so herlichen stan
also der degen Volker	hivte hat getan
die sinen leyche hellent	dvrch helm vn– dvrch den rant
ia sol er riten gvtiv ros	vn– tragen herlich gewant
Swaz der Hvnen mage	in dem hvse was gewesen
der enwas nv deheiner	dar inne genesen
des was der schal geswiftet	daz niemen mit in streit
div swert von [74r]handen legeten	die kvnen degene gemeit

Die herren nach ir mvede	gesazen do zetal
Volker vn– Hagene	die giengen fvr den sal
sich leinten vf die schilde	die vbermvten man
da wart rede genvoge	von in beiden getan
Do sprach von Burgonden	Giselher der degen
iane mvegt ir	lieben frivnde	niht rowe noch gepflegen
ir svlt die toten lvte	vz dem hvse tragen
wir werden noch bestanden	ich wilz iv wærliche sagen
So wol mich solhes herren	sprach do Hagene
der rat enzæme niemen	wan eime degene
den vns min ivnger herre	hivte hat getan
des mvgt ir Bvrgonden	alle vroeliche stan
Do volgeten si dem kinde	vn– trvgen fvr die tver
wol zwei tvsent toten	wrfen si derfver
vor des sales stiegen	vielen si zetal
do hvop sich von ir mâgen	ein vil klagelicher schal
Ez was ir etelicher	so mæzliche wnt
der sin mit helfe pflæge	er wrde noch gesvnt
der von dem hohem valle	mvse ligen tot
die klagten do ir frivnde	des twanch si iamerhaftiv not
Do sprach der videlære	ein reche vil gemeit
nv chivse ich des die wareheit	als ma mir hat gesæit
die Hvnen sint vil boese	si chlagent sam div wip
nv solden si bervchen	der vil sere wnder lip
Do wande ein marcgrave	er reit ez dvrch gvot
er sach einen sinen mach	gevallen in daz blvot
er besloz in mit den armen	vn– wolde in tragen dan
den schoz ob im ze tode	der vil chvne spileman
Do dandern daz gesahen	div flvht hvp sich von dan
si begvnden alle flvchen	dem selben spileman
noh hvob er vnder fvzen	einen ger vil hart
der von eime Hvnen	in daz hvs geschozzen wart
Den schoz er do hin widere	dvrch die bvrch dan
mit siner chraft so verre	den Ezelen man
gaber herberge	vof hoher von dem sal
daz sin vil starchez ellen	die lvte vorhten vber al
Do stvnden vor dem hvose	Ezel vn– sine man
Volker vn– Hagene	reden do began
mit der Hvnen kvnige	ir willen vn– mvot
des chomen sit in sorgen	die helede chven vn– gvot
Ez zæme	so sprach Hagene	vil wol volches trost
daz die herren væhten	zaller vorderost
also der kvnec Gvnther	vnde Gernot hie tvot
die howent dvrch die helme	nach swerten vlvzet daz blvot
Ezele was so chvne	er vazzete sinen schilt
nv vart gewærliche	sprach min frov Chriemh'
vn– bietet ir den rechen	daz golt vber rant
wan erreichet ivch dort Hagene	ir habt den tot an der hant
Done wolde der kvnec here	des strites erwinden niht
daz von so ri[74v]chen fvrsten	selten nv geschiht
man mvos in bi dem <vezzil>	wider ziehen dan
Hagene der grimme	sin spotten aber began
Ez was ein nahiv sippe	sprach do Hagene
die Sivrit vn– Ezele	<heten> zesamene
er minnete Chriemh'	ê si ie gesæhe dich
kvnic vil boese	warvmbe rætest an mich
Dise rede horte	wol des kvniges wip
des wart vil vnmvtes	der Chriemh' lip
daz er si torste schelten	vor Ezelen man
dar vmbe si aber raten	an die geste began
Si sprach	der mir von Tronegen	Hagenen slvege
vn– mir sin hovbet	ze gibe trvge
dem fvlt ich rotes goldes	den Ezeln rant
ovch gæb ich im ze miete	vil gvte bvrge vn– lant
Nvne weiz ich wes si bitent	sprach der spileman
ine gesach nie helde mere	so zageliche stan
da man horte bieten	so rehte richen solt
si mohten gerne dienen	die bvrge vn– ovch daz rote golt
Ezele der vil riche	hete iamer vn– not
er klagte pitterliche	mage vn– manne tot
da stvnt von manigen landen	vil rechen gemeit
die weinten mit dem kvnige	siniv chreftigen leit
Des begvnde spotten	der kvne Volker
ich sihe hie sere weinen	vil manigen rechen her
si gestent ir herren vbele	in siner starchen not
ia ezzent si mit schanden	nv vil lange hie sin brot
Do gedahten in die besten	er hat vns war geseit
doch enwas ez da niemen	so hercenliche leit
als ovch Iringe	dem helede vz Tenelant
daz man in churcen citen	mit der wareheite wol bevant

<Do> rief von Tenemarche	der marcgrave Irinch
ich han vferelazen	nv lange miniv dinch
vn– han in volches stvermen	des besten vil getan
nv brinch mir min gewæfen	ia wil ich Hagenen bestan
Daz wil ich widerraten	sprach do Hagene
so gewinnent iwer mage	mer ze klagene
gespringent iwer zwene	oder dri zvo mir her in
ist daz si min erbitent	si scheident schedeliche hin
<Darvmbe> ihz niht enlaze	sprach aber Irinch
ich han ovch ê versvchet	sam sorchlichiv dinc
ia wil ich mit dem swerte	aleine dich bestan
ob dv mit strite hetest	mer danne iemen getan
Do wart gewafent Irinch	nach <ritterlichem> sit
alsam wart von Dvrigen	der lantgrave Irnfrit
vn– Hawart der starche	wol mit tvsent man
swes Irinch begvnde	si woldens alle im gestan
Do sach der videlære	eine groze schar
die mit Iringe	gewafent chomen dar
si trvgen vf gebvnden	vil manigen helm gvot
des wart der chvne Volker	[75r]ein teil vil zornic gemvot
Er sprach	seht ir	Hagene	dort Iringen gan
der ivch hie mit dem swerte	lobt eine bestan
wie zimt helede lvgene	ich wil vnprisen daz
ez gent mit im gewafent	wol tvsent rechen oder baz
Nv heizet mich niht liegen	sprach Hawartes man
ich wil ez leisten gerne	swaz ich gelobet han
dvrch deheine vorhte	wil ihs abe gan
wie vreislich nv si Hagene	vzer Bvrgonden lant
Doch bat er si so lange	daz ez sit geschach
do daz ingesinde	den willen sin ersach
daz er warp nach eren	do liezen si in gan
do wart ein grimmez striten	von in beiden da getan
Irinch der vil starche	hohe erbvrt den ger
den schilt er fvr sich zvchte	der tivr degen her
do lief vz zv Hagene	vaste fvr den sal
do hvop sich von den degenen	ein vil grozlicher schal
Do schvzzen si die gere	mit chreften von der hant
dvrch die vil vesten schilde	vf liehtez ir gewant
daz die gerstangen	vil hohe dræten dan
do griefen zv den swerten	die vil grimme chvnen man
Des starchen Hagenen ellen	was in vnmazen groz
ovch slvg vf <in> Irinch	daz al div bvrch erdoz
Palas vn– Tverne	erhullen nach ir slegen
done chunde niht verenden	des sinen willen der degen
Irinch lie do Hagenen	vnverwndet stan
zvo dem videlære	gahen er began
er wande in solde twingen	mit den grimmen slegen
sich chunde wol beschirmen	der vil zierliche degen
Do slvoc der videlære	daz vber schildes rant
dræte daz gespenge	von Volkers hant
den liez er do beliben	ein was ein vbel man
er lief den kunic Gvnther	da von Buregonden an
Do was ir ietwedere	ze strite starch genvoc
swaz Gunther on Irinch	vf ein ander slvoch
daz enbrahte niht von wnden	dar vliezende blvot
daz behvote ir gewæfen	daz was veste vn– gvot
Gvnthern er lie beliben	Gernoten lief er an
daz fivr vzen ringen	er howen im began
do hete von Bvregonden	der starche Gernot
den chvnen Iringin	vil nach gesendet in den tot
Do spranger von dem fvrsten	snel er was genvoc
der Bvrgonden viere	der helt vil schiere slvoc
des edeln ingesindes	von Wormez vber Rin
done chunde Giselhere	zornær nimmer gesin
Gote weiz	her Irinch	sprach Giselher daz kint
ir mvzet mir die gelten	die veige vor iv sint
gelegen hie ze stvnden	do lief er in an
er slvoc den Tenemarche	daz er strvchen began
Er schoz vor sinen fvezen	nider in daz blvot
daz si alle wolden wænen	daz der helt gvot
ze strite nimmer mere	geslvge cheinen slac
Irinch noch ane wnden	hie vor Giselhere lac	[75v]
Von des helmes doze	vn– von des swertes chlanc
wæren sine wizze	worden also chranc
daz sich der degen Irinch	des lebenes niht versan
daz het mit siner sterche	der chvne Giselher getan
Do im begunde wichen	von hovbte der doz
von helm vn– ovch von swerte	der was gewesen groz
er dahte	ih bin noch lebnde	min lip ist ninder wnt
nv ist mir aller erste	daz ellen Giselhers kvnt
Do horter beidenhalben	die viande stan
heten siz gewisset	im wære mer getan
ovch het er Giselhere	da bi im vernomen
er dahte wie er solde	mit dem libe dannen chomen
Wie rehte tobeliche	er vzem blvote spranch
der siner snelheite	er mohte <danch>
do lief er vzem hvose	da er aber Hagenen vant
vn– slvg im slege swinde	mit siner ellenthafter hant
Do gedaht ovch Hagene	dv solt der mine wesen
dich enner der vbel tivfel	dv enchanst nv niht genesen
doch wndet Irinch Hagenen	dvrch sinen helmhvot
daz tet der helt mit Wasechen	daz was ein wafen also gvot
Do der grimme Hagene	der wnden enpfant
do erwaget im vngefvege	daz swert an siner hant
al da mvose im entwichen	der Hawartes man
zetal von dem hvse	Hagen volgen im began
Irinch vber hovbet	den schilt vil balde swanc
vn– wær div selbe stiege	drier stiegen lanch
done liez in Hagene	slahen deheinen slac
hey waz roter vanchen	ob sime helme gelac
Do sahen sine frivnde	Iringen noch gesvnt
do wrden disiv mære	Chriemh' chvnt
waz er dem von Tronege	mit strite hete getan
desim div chuniginne	hohe danchen began
Nv lone dir got	Irinch	vil mærrer helt gvot
dv hast mir wol getrostet	daz herce vn– ovch den mvot
nv sihe ich Hagene rotez	von blvte sin gewant
do nam si im selbe	den schilt vor liebe von der hant
Ir mvgt im maze danchen	sprach do Hagene
ia ist noch harte chleine	da von ze sagene
vn– wolt erz noch versvchen	so wær er chven ein man
div wnde frvmt ivch chleine	die ich von im gewnnen han
Daz ir von miner wnden	die ringe sehet rot
daz hat mich erreizet	vf maniges mannes tot
ich bin alrerste erzvrnet	vf in vn– manigen man
mir hat der degen Irinch	schaden chleinen noch getan
Do stvnt gegen dem winde	Irinch von Tenelant
er chvlte sich in ringen	den helm er abe gebant
do sprachen al die lvte	sin ellen wære gvot
des het der marcgrave	von schulden <hohen> mvot
Irinch der vil chvene	sinen frivnden sagte daz
nv wafent mich vil balde	ich wilz versvchen baz
ob ich noch mvge betwingen	den vbermveten [76r]man
sin schilt der was verhowen	einen bezzern er gewan
Vil schiere wart der reche	aber gewafent baz
vn– einen ger vil starchen	den nam er vf den haz
daz er da mite Hagenen	wolde noch bestan
ez wær im frvom vn– ere	ob erz hete nv verlan
Sin mohte niht erbiten	Hagene der degen
do lief er im engegene	mit stichen vn– mit slegen
der stiege vnze an ein ende	sin zvrnen daz was groz
Irinch siner sterche	harte wenic do genoz
Si slvogen dvrch die schilde	deiz lovgen began
von vivr roten winden	der Hawartes man
wart von Hagenen swerte	vil kreftiklichen wnt
dvrch schilt vn– dvrch die brvenne	des er wart nimmer mer gesvnt
Do der degen Irinch	der wnden enpfant
den schilt er baz bedachte	vber div helmbant
des schaden in dvht der volle	den er da gewan
sit tet im noch mere	der vil vbermvete man
Hagen vor sinen fvzen	einen ger er ligen vant
do schoz er Iringen	den helt von Tenelant
daz im von dem hovbte	der gere ragete dan
im het der vbermvete	den grimmen ende getan
Irinch mvse wichen	zv den von Tenelant
e daz man do dem degene	dem helm ab gebant
den ger man brach von hbet	do nahet im der tot
daz weinten sine mage	des gie in wærliche not
Chriemh' div frowe	chlagen ovch began
den chvnen Iringen	den schadehaften man
si weinte sine wnden	wande ez was ir leit
do sprach vor sinen magen	der snelle reche gemeit
Lat iwer klage beliben	vil herlichez wip
waz hilfet iwer weinen	ia mvoz <ich> minen lip
verliesen von den wnden	die ich enpfangen han
der tot wil mich niht dienen	iv vn– Ezeln lan
Er sprach zv den von Dvrigen	vnt den von Tenelant
die gabe sol enpfahen	iwer deheines hant
von der kvniginne	ir liehtez golt so rot
vn– bestet ir Hagenen	ir mvzet liden den tot
Sin varwe was erblichen	des todes zeichen trvoc
Irinch der chvene	daz was in leit genvoc
genesen niht enchunde	der Hawartes man
do mvos ez an ein striten	von den sinen frivnden gan
Irnfrit vn– Hawart	die sprvngen fvr daz gadem
wol mit tvsent heleden	vil vngefvgen chradem
hort man allenthalben	vil chreftechlichen groz
hey waz man starcher gere	vf die Bvrgonde schoz
Irnvrit der herre	lief an den spileman
des er schaden grozen	von siner hant gewan
der chvene videlære	den lantgraven slvoc
dvrch einen helm vesten	ia was er grimme genvoc
Do slvoc der lantgrave	den chvnen spileman
daz im mvsen bresten	ringes gespan	[76v]
vn– daz sich beschvtte	div prvenne fivr rot
do vil lantgrave	vor dem vidælære tot
Hawart vn– Hagene	zesamne warn chomen
er mohte wnder chiesen	ders hete war genomen
div swert genote vielen	den rechen an der hant
Hawart mvose ersterben	von dem vz Bvrgonde lant
Die Durigen vn– die Tenen	ir herren sahen tot
do hvop sich vor dem hvose	ein vil grimmiv not
ê si die tvr gewnnen	mit ellenthafter hant
des wart da verhowen	vil manic helm vn– rant
Wichet	sprach do Volker	lat si her in gan
ez ist svs vnverendet	des si da habent wan
si mvzen drinne ersterben	in vil chvrcer zit
si arnent mit dem tode	daz in div kvniginne git
Do die vbermveten	chomen in den sal
manigem wart daz hovbet	geneiget so zetal
daz er mvse ersterben	von ir grimmen slegen
wol streit der chvne Gernot	sam tet ovch Giselher der degen
Tvsent vn– viere	die chomen dar in
die erzeigten drinne schiere	ir degenlichen sin
si wrden von den gesten	alle zehant erslagen
man mohte michel wnder	von den Burgonden sagen
Dar nach wart ein stille	daz der schal verdoz
daz blvot do allenthalben	dvrch div locher vloz
vn– da zen rigelsteinen	von den chvnen man
daz heten die von Rine	mit grozem ellen getan
Do sazen aber rvowen	die chomen in daz lant
ir schilde vnt wafen	si leiten von der hant
do stvnt noch vor dem hvose	der chvne spileman
ob iemen zvo zin wolde	mit strite zvo dem sale gan
Der chvnic klagte sere	sam tet ovch sin wip
mægde vn– frowen	die qvelten ovch den lip
ich wæne des	daz hete	der tot vf si gesworn
des wart noch vil der degene	von den gesten verlorn

<Nv> bindet abe die helme	sprach do Hagene
ia lazen wir den Hvnen	so vil ze chlagene
daz si der hochgecite	vergezzent nimmer hie
waz hilfet nv Chriemh'	daz si vns ze Rine niht enlie
Do entwaffent da dez hovbet	manic ritter gvot
si sazen vf den veigen	die vor in in daz blvot
waren in dem strite	mit dem tode chomen
sit wart der Ezeln geste	vil vbel govme genomen
Vor abendes zite	geschvof der kunic daz
vn– ovch div kvniginne	daz iz versvochten baz
die hvnischen rechen	dvrch der geste leit
des man an si gerte	die helde warens bereit
Sich hvob ein stvrme herte	hier vz vn– ovch dar in
Danchwart	[77r]Hagenen brvoder	dvrch degenlichen sin
spranch vor sinen herren	zen vinden vz der <tvr>
sich versahen sines todes	er chom gesunder wol dar fvor
Der herte strit do werte	vnz iz div naht benam
do werten sich die geste	als iz in wol gezam
den Ezeln degenen	den svmerlangen tac
hey waz noch der helede	vor in veige gelac
Zeinen svnewenden	der groze mort geschach
daz div kuniginne	ir hercenleit errach
an ir næhsten magen	vn– svs an manigem man
da von der kvnec Ezele	vil manigen <siechchen> gewan
Sine het der grozen slahte	also niht gedaht
si het ez in ir ahte	vil gerne dar zvo brahte
daz niwan Hagene aleine	den lip da hete lan
do geschvof der vbel tivfel	deiz vber si alle mvose ergan
In was des tages zerrvnnen	do gie in sorgen not
si gedahten daz in bezzer	wær ein kurcer tot
denne lange da ze qvelne	vf vngefvegiv leit
eins vrides si do gerten	die stolzen ritter gemeit
Si baten daz man bræhte	Ezelen dar
die blvotvarwen degene	vn– schone harnasch var
traten vz dem hvse	die drie kvnige her
sine wessen wem ze klagene	div ir vil grozlichen ser
Ezel vn– Chriemh'	die chomen beide dar
daz lant daz was ir eigen	des merte sich ir schar
er sprach zv den kunigen	sagt	waz welt ir min
ir wênet vride gewinnen	daz chvnde mvelich gesin
vf schaden also grozen	als ir mir habt getan
irn svltes niht geniezen	sol ich min lebn han
min kint daz ir mir slvoget	vnde vil der mage min
des ensol mit sime lebene	iwer deheiner chomen hin
Des antwrte Gvnther	des twanch vns starchiv not
allez min gesinde	lac von den dinen tot
an den herbergen	wie het ich daz versolt
ich chom zv dir vf triwe	vn– wande daz dv mir wærest holt
Do sprach von Bvrgonden	Giselher daz kint
ir Ezeln rechen	die noch hie lebende sint
waz wizet ir mir	degene	waz han ich iv getan
wande ich vil minnekliche	in dizze lant geriten han
Si sprachen	diner gvete	ist al div bvrch vol
mit iamer zv dem lande	ia gvnden wir dir wol
daz dv nie chomen wærest	von Wormez vber Rin
diz lant ist gar verweiset	von dir vn– ovch den magen din
Do sprach in zornes mvote	Gvnther der degen
welt ir dizze starchez hazzen	zeiner svone legen
mit vns vil ellenden	deist beidenthalben gvot
ez ist gar ane schulde	swaz vns Ezele getvot
Do sprach der wirt zen gesten	min un– iwer leit
div sint [77v]vil vngeliche	div michel arebeit
des scaden zv den schanden	die ich han genomen
des sol iv deheiner	mit dem libe hinnen chomen
Do sprach zv dem kunige	Gernot der hochgemvot
so sol iv got gebieten	daz ir wol tvot
wichet von dem hvose	vn– lat vns zvo ziv gan
sit wir zv dem lebene	haben also chleinen wan
Swaz vns geschehn chvenne	daz lazet chvrz ergan
ir habt so vil gesvndr	vn– tvrrens vns bestan
daz si vns stvrmen mvede	lazent niht genesen
sit daz ist vnwendech	wir mvzen hie verderbet wesen
Die Ezeln rechen	die heten ez nach getan
<daz> si se vz dem hvse	wolden lazen gan
do daz gehorte Chriemh'	ez was ir grimme leit
des wart den ellenden	do der vride widerseit
Neina	Hvnen rechen	des ir da habet mvot
ich rat an rehten triwen	daz ir des niene tvot
daz ir die mortrechen	iht lazet fvr den sal
so mvsen iwer frivnde	liden totlichen val
Ob ir nv niemen lebte	niwan div voten kint
die minen edeln brveder	vn– chomens an den wint
erchvlten in die ringe	so sit ir <alle> verlorn
ez enwrden chvner degene	nie zer werlde geborn
Do sprach der herre Giselher	vil liebiv swester min
wie mohte ich des getrowen	do dv mich vber Rin
so minneklichen ladetes	her in dizze lant
daz mir so grozer chumber	solde werden hie bechant
Ich was dir ie getriwe	nie getet ich dir leit
vf solhen gedingen	ich her ze hove reit
daz dv min frivnt wærest	vil edeliv swester min
begench an vns genade	sit ez niht anders kan gesin
Ine mag iv niht genaden	vngenade ich han
mir hat von Tronege Hagene	so leide getan
da heime	vn– hie ze lande	slvoger mir min kint
des mvzen sere engelten	die mit iv da her chomen sint
Welt aber ir mir ze gisel	den min vint geben
sone wil ichz niht versprechen	ichn welle ivch lazen leben
wan ir sit min brvoder	vn– einer mvoter chint
so rede ihz zeiner svone	mit disen rechen die hie sint
Nvne welle got von himele	sprach do Gernot
ob vnser tvsent wæren	wir legen alle tot
der sippen diner mage	ê wir dir einen man
gæben hie ze gisel	ez wirdet nimmer getan
Wir mvesen doch ersterben	sprach do Giselher
vns enscheidet niemen	von ritterlicher wer
swer gerne mit vns strite	wir sin et aber hie
wande ich der minen frivnde	an triwen nie deheinen lie
Do sprach der chvene Danchwart	fvr die degene	[78r]
iane stet noh niht eine	min brvoder Hagene
die hie den vride versprechent	ez mag in werden leit
des bringen wir ivch innen	daz si iv wêrlich geseit
Do sprach div kvniginne	ir helde vil gemeit
nv get der stiegen naher	vn– rechet vnser leit
daz wil ich immer dienen	als ich von rehte sol
der Hagenen vber mvete	der gelon ich im wol
Springet zv dem hvse	ir rechen	vber al
so heiz ich vieren enden	zvnden an den sal
so werdent wol errochen	elliv vnser leit
die Ezelen degene	die wrden schiere bereit
Die noch hier vzen stvnden	die triben si dar in
mit slegen vn– mit schvzzen	wider in den palas hin
sich wolden nie gescheiden	die fursten vn– ir man
sine mohten von ir triwen	niht ein ander verlan
Den sal hiez do zvnden	daz Ezeln wip
do qvelte man den rechen	mit fivre da den lip
daz hvos von einem winde	mit chraft vil hohe enbran
ich wæn ie volch deheinez	grozer angest mer gewan
Genvge rvften drinne	owe dirre not
wir mohten michel gerner	sin in stvrme tot
daz mvze got erbarmen	wie vlisen wir den lip
nv richet vngefvoge	ir zorn an vns des kvniges wip
Ir einer sprach dar inne	wir mvzen ligen tot
vor rovche vn– ovch vor hizze	deist ein grimmiv not
mir tvot vor starcher hizze	der dvrst so rehte we
des <wen> min leben schiere	in disen sorgen zerge
Do sprach von Tronege Hagene	ir edeln ritter gvot
swen der dvrste nv twinge	der trinche hie daz blvot
daz ist in solhen noten	noch bezzer danne win
fvr trinchen vn– fvr spise	kan niht anders nv gesin
Do gie der rechen einer	do er einen toten vant
er kniet im zv der wnden	den helm er abe gebant
do begvnder trinchen	daz vliezende blvot
swie vngewon er des wære	ez dvhte in groezlichen gvot
Nv lon iv got von himele	sprach der mvde man
daz ich von ivrem rate	so wol getrvnchen han
mir ist geschenchet selten	dehein bezzer win
leb ich deheine wile	ich sol ez dienende sin
Do dandern daz gehorten	daz ez in dvhte gvot
do wart ir michel mere	die trvnchen ovch daz blvot
da von begunde chreften	der gvten rechen lip
des engalt an lieben frivnden	sit vil manic schone wip
Daz fivr <viel> genote	zvo zin in den sal
do leitten siz mit schilden	von in hin zetal
der rovch vn– ovch div hizze	in beidiv taten we
ia wæn ez an heleden	der iamer immer mer erge
Do sprach von Tronege Hagene	stet zv des sales want
lat niht die [78v]brende vallen	vf iwer helmbant
vn– tret si mit den fvzen	tieferin daz blvot
ez ist ein vbel hochgecit	die vns div kvneginne tvot
In svs getanen leiden	in iedoch der naht zerran
noch stvnden vor dem hvse	die zwene chvne man
Volker vn– Hagene	geleinet vber rant
si hvten ir gesindes	vzer Burgonden lant
Die geste half daz sere	daz der sal gewelbet was
da von ir deste mere	in der not genas
wan daz si zen venstern	von fivre liten not
do nerten sich die degene	als in ir ellen daz gebot
Do sprach der videlære	nv ge wir in den sal
so wellent die Hvnen	wenen vber al
wir sin in not erstorben	div an vns ist getan
si sehent vns begegene	noch ir eteslichen gan
Do sprach von Bvrgonden	Giselher daz kint
ich wæn ez tagen welle	sich hebt ein chveler wint
nv laze vns got von himele	noch lieber cit geleben
vns hat min swester Chriemh'	ein arge hochgecite gegebn
Do sprach aber einer	ich chivse nv den tac
sit daz ez vns bezzer	wesn nine mac
so bereitet ir ivch	rechen	ze strite	deist vns not
wir chomen doch nimmer hinnen	daz wir mit eren ligen tot
Der chvnich wolde wænen	die geste wæren tot
vn– ovch div kuniginne	von des fivres not
do lebt ir noch dar inne	sehs hundert chvner man
daz nie kunec deheiner	bezzer degene gewan
Der ellenden hvote	hete wol ersehen
daz noch die geste lebten	swie vil in was geschehen
ze schaden vn– ze leide	den kvnigen vn– ir man
man sah ir noch genvoge	vil wol <gesunt> dort inne stan
Man sagt der kuniginne	ir wære vil genesen
do sprach div frowe here	daz enchvnde nimmer wesen
<daz> ir deheiner lebte	in des fivres not
ich wil des baz getrowen	daz si alle ligen tot
Noch genæsen gerne	die fvrsten vn– ir man
ob in iemen hæte	genade da getan
den kunden si niht vinden	an den von Hvnen lant
do rachen si ir sterben	mit vil willechlicher hant
Vil frvo wider morgen	grvzen man in bot
mit starchem vrlivge	des chomen helde in not
do wart zvo zin geschozzin	vil manic scharpfer ger
noch fvnden si dar inne	ze wer die reehen also her
Dem Ezeln gesinde	erwegt was der mvot
si wolden vaste dienen	daz Chriemh' gvot
dar zv si wolden leisten	daz in der kvnec gebot
des chomen aber die degene	in vil angestliche not
Uon geheize vn– ovch von gabe	man mohte wnder sagen
dar hi[79r]ez si golt daz rote	in den schilden tragen
si gab ez swer sin rvochte	vnde ez wolde enpfan
iane wart nie grozer solden	mer vf vinde getan
Ein michel chraft der rechen	dar zv gewafent gie
do sprach der videlære	wir sin et aber hie
ine gesach zem tode	nie helde gerner chomen
die daz golt des kuniges	vns ze vare hant genomen
Do riefen ir genvge	naher	helede	baz
daz wir da svlen enden	vn– tvon bezite daz
hie belibet niemen	wan doch der sterben sol
do sahe man schiere ir schilde	stechen gerschvzze vol
Waz inag ich sagen mere	wol zwelf hvndert man
versvhten ez vil sere	wider vn– dan
do chvlten an den vinden	die geste wol ir mvot
ez enmohte niemen scheiden	des sah man vliezen daz blvot
von verchtiefen wnden	der wart da vil geslagen
do horte man genvoge	nach ir <frivnden> chlagen
die frvmen stvrben alle	dem richen kvnige her
des heten holde mage	nach in iamer vn– ser

<Ez> heten die ellenden	wider morgen gvot getan
wine der Gotelinde	chom ze hove gegan
do sah er beidenthalben	div vngefvgen ser
daz weinte innechliche	der <getriwe> Rvdeger
Owe	sprach der reche	deich ie den lip gewan
daz disen starchen iamer	chan niemen vnderstan
swie gern ihz vriden wolde	der kvnic entvot es niht
wander der sinen leide	ie mere vn– mere geschiht
Do sande an Dietrichen	der gvte Rvdeger
ob siz noch chunden wenden	an den kvnigen her
do enbot im der von Berne	wer moht ez vnderstan
ezn wil der kunic Ezele	scheiden niemene lan
Do sah ein Hvnen reche	Rvdegeren stan
mit weinenden ovgen	vn– het des vil getan
do sprach zer kvniginne	nv seht ir wie er stat
der doch gewalt den meisten	bi iv vn– Ezeln hat
vn– dem ez allez dienet	livt vn– ovch div lant
wie ist so vil der bvrge	vn– der erbe an in gewant
der er von dem kvnige	so vil gehaben mac
er geslvc in disen stvrmen	noch nie <lobelichen> slac
Mich dvnchet ern rvche	wie ez hie vmbe gat
daz et er den vollen	nach sime willen hat
man giht im	er si chvener	danne iemen mvge sin
daz ist in disen sorgen	worden boeseliche schin
Mit trvrigem mvote	der vil getriwer man
den er daz reden horte	der helt der blicht in an
er daht	dv solt ez arnen	dv gihest	ich si verzaget	[79v]
dv hast div dinen mære	ze hove ze lvte gesaget
Die fvost begvnder twingen	do lief er in an
er slvoc so chreftechliche	den hvnischen man
daz er im vor den fvzen	lac vil schiere tot
do was aber gemeret	des kvnic Ezeln not
Fvrder	zage bose	sprach do Rvdeger
ich han doch genvoge	leit vn– ser
daz ich hie niht enstrite	zwiv wizzestv mir daz
ia wær ih den gesten	grozlichen haz
vn– allez daz ich mohte	daz het ich in getan
niwan daz ich die degene	her gefvret han
ich was ir geleitte	in mines herren lan
des ensol mit in niht striten	min vil ellendes hant
Do sprach zem marcgraven	Ezel der kunec her
wie habt ir vns geholfen	vil edel Rvdeger
wan wir so vil der veigen	hie ze lande han
wir bedorften ir niht mere	ir habt vil vbele getan
Do sprach der ritter edele	da beswart er mir den mvot
vn– hat mir verwizzen	ere vn– gvot
des ich von dinen handen	habe so vil genomen
daz ist dem lvgenære	ein teil vnstætelichen chomen
D Chriemh' saz bi Ezelen	div het ez ovch gesehen
daz von des rechen zorne	dem Hvnen was geschehen
si chleit iz vngefvge	ir ovgen warn naz
si sprach zvo Rvdegere	wie haben wir verdienet daz
daz ir mir un– dem kvnige	meret vnser leit
nv habt ir vns doch	Rvdeger	allez her geseit
ir woldet durch vns wagen	die ere vn– ovch daz leben
ich hort iv vil der rechen	den pris vil grozlichen gebn
Ich man <ivch> der genaden	vn– ir mir habt geswarn
do ir mir zvo Ezelen	her ze lande rietet varn
daz ir mir woldet dienen	an vnser eines tot
des enwart mir armen wibe	nie so grozliche not
Daz ist ane lovgen	ich swor iv	edel wip
ich wolde dvrch ivch wagen	die ere vn– ovch den lip
daz ich die sele vliese	des enhan ich niht gesworn
ia braht ich her ze lande	die iwern brvder wol geborn
Si sprach	gedenche	Rvdeger	der grozen triwen din
der stæte vn– ovch der eide	daz dv den schaden min
immer woldest <rechen>	vn– elliv miniv leit
des man ich dich hivte	degen chvne vn– gemeit
Ezele der riche	vlegen ovch began
do bvten si sich beide	ze fvzen fvr den man
den gvten marcgraven	trvren man do sach
der vil getriwe reche	harte iæmerlichen sprach
Owe mir gotes armen	sprach der getriwe man
aller miner eren	der mvoz ich ab stan
triwen vn– zvhte	der got an mir gebot
vil richer got von himele	daz mihs wendet niht der tot
Swelhez ich nv laze	vn– daz ander began
so han ich bosliche	vn– vbel getan
laz aber [80r]ih si beide	mich schiltet elliv diet
nv rvche mich bewisen	der mir ze lebene geriet
Do baten si genote	der kunic vn– ovch sin wip
des mvsen sider degene	verliesen den lip
vor Rvdegeres handen	da ovch der helt erstarp
ir mvget daz balde horen	daz er vil iæmerlichen warp
Er wiste schaden gewinnen	vn– vngefvgiv leit
er het dem kunige	vil gerne verseit
vn– ovch der kvniginne	vil ser vorht er daz
ob er ir einen slvege	daz im div werlt trvge haz
Do sprach der marcgrave Rvdeger	der chvne man
her chvnic	nv nemt hin widere	al daz ich von iv han
lant vn– burge	des sol mir niht besten
ich wil vf minen fvzen	in daz ellende gen
Alles gvtes ane	so rvom ich iv div lant
min wip vn– mine tohter	nim ich an mine hant
ê daz ich ane triwe	beliben mvse tot
ich het genomen vbele	iwer golt also rot
Do sprach der kunic Ezele	wer hvlfe danne mir
daz lant zvo den bvrgen	daz gib ich allez dir
daz dv mich rechest	Rvdeger	an den vinden min
dv solt ein kvnic gewaltech	benebn mime libe sin
Do sprach aber Rvdeger	wie sol ihz ane van
heim ze mime hvose	ich si geladet han
trinchen vn– spise	ich in mit triwen bot
vn– gab in mine gabe	sol ich si dar zvo slahen tot
Die lvte wænent lihte	daz ich si verzaget
deheinen minen dienest	han ich in widersaget
solde ich nv mit in striten	daz wære missetan
so rowe mich div frivntschaft	die ich mit in geworben han
Giselher dem degene	gab ich die tohter min
sine chvnde in dirre werlde	niht baz verwendet sin
vf zvht vn– ovch vf ere	vf triwe vn– ovch vf gvot
ine gesach nie kunec so ivngen	so rehte tvgentlich gemvot
Do sprach aber Chriemh'	vil edel Rvdeger
nv la dich erbarmen	vnser beider ser
min vn– ovch des kuniges	gedenche wol dar an
daz nie wirt deheiner	so leide geste gewan
Do sprac der marcgrave	wider daz edel wip
ez mvz noch hivte gelten	der Rvdegeres lip
swaz ir vn– ovch min herre	mir liebes habt getan
dar vmbe mvz ich sterben	ez mac niht langer nv gestan
<Ich> weiz wol daz noch hivte	mine burge vn– miniv lant
iv ledech mvzen werden	von ir etesliches hant
ich bevilhe iv vf genade	min wip vn– min chint
vn– die vil ellenden	die da zen Bechelaren sint
Nv lon dir got	Rvdeger	sprach der kunic do
er vn– div kvniginne	si wrden beidiv vro
vns svln dine lvte	vil wol bevolhen wesen
ovch getrowe ich mime heile	daz dv maht selbe wol genesen
Do liez er an die wâge	die sele vn– ovch den lip
do begunde weinen	daz [8ov]Ezeln wip
er sprach	ich wil iv leisten	als ich gelobet han
owe der minen frivnde	die ich leider mvoz bestan
Man sah in von dem kvnige	in starchen riwen gen
do sah er siner rechen	ein teil da nahen sten
er sprach	ir svlt ivch wafen	alle mine man
die chvnen Burgonden	mvz ich nv leider bestan
Do brahte man den rechen	ir gewæfen al zehant
ez der helm wære	vn– ovch des schildes rant
von ir <ingesinde>	wart ez in dar getragen
sit horten leidiv mære	die chvnen ellenden sagen
Gewafent wart do Rvdeger	mit fvnfhvndert man
dar vber zwelf rechen	ze helf er ovch gewan
die wolden pris erwerben	in des stvrmes not
sine wisten niht der mære	daz so nahte der tot
Do sah man Rvdegere	vnder helme gan
ez trvgen swert div scharpfen	des marcgraven man
vn– dar zv vor ir handen	die liehten schilde breit
daz sach der videlære	ez was im ane maze leit
Ovch sach der ivnge Giselher	sinen sweher gen
mit vf gebvndem helme	wie mohter do versten
waz er da mite meinte	niwan allez gvot
des wart der kvnic edele	von hercen vrolich gemvot
Nv wol mich solher frivnde	sprach Giselher der degn
die wir han gewnnen	her vf disen wegn
wir svln mines wibes	vil wol geniezen hie
mir ist liep vf mine triwe	daz ie der hyrat ergie
Ine weiz wes ir ivh troestet	sprach do der spileman
wa gesaliet ir ie dvrch svne	so manigen rechen gan
mit vf gebvnden helmen	die trvegen swert enhant
an vns wil dienen	Rvdeger	sine burge vn– siniv lant
Bedaz der videlære	die rede vol sprach
den gvten marcgraven	man vor dem hvse sach
sinen schilt den gvten	sazter fvr den fvoz
do mvser den gesten	versagen dienest vn– grvoz
Der edel marcgrave	rief hin vf zehant
nv wert ivch	edeln <rechen>	von Burgonden lant
ir soldet min geniezen	ir engeltet leider min
ê do waren wir gefrivnde	nv mvz ich iwer vient sin
Do erschracten dirre mære	die nothaften man
in was der trost enpfallen	den si da wanden han
do mit in wolde striten	dem si da warn holt
si heten doh von vienden	vil michel arebeit gedolt
Nvne welle got von himele	sprach Gvnther der degen
daz ir ivch svlt genaden	noch an vns bewegen
vn– der vil grozen triwe	der wir doch heten mvot
ich wil iv des baz getrowen	daz ir ez nimmer getvot
Ine mages niht gelazen	sprach do der chvene man
ich mvoz mit iv striten	wande ihz gelobet han
nv wert ivch	chvnen degene	so lieb iv si der lip
mich enwoldes niht erlazen	des [82r]kvnec Ezeln wip
Ir widersaget vns nv ze spate	sprach do der chunic her
nv mvez iv golt vergelten	vil edel Rvedeger
triwe vn– minne	die ir vns habt getan
ob irz an dem ende	woldet minneklicher lan
Wir soldenz immer dienen	daz ir vns habt gegebn
ich vn– mine mage	ob ir vns liezet leben
die herlichen gabe	do ir vn– iwer man
vns fvrtet frivntliche	zvo dirre hochgezite dan
Wie wol ich iv des gvnde	sprach Rvdeger der degen
daz ich iv mine gabe	noch diche solde wegen
mit vollen willechliche	als ich des hete wan
sone wrde mir dar vmbe	nimmer schelten getan
Erwindet	edel Rvdeger	sprach do Gernot
wandez wirt deheiner	gesten nie erbot
so rehte minnekliche	als ir vns habt getan
des svlt ir wol geniezen	ob wir bi lebene bestan
Daz wolde got	sprach Rvdeger	vil edel Gernot
daz ir ze Rine wæret	vn– ich wære tot
mit etelichen eren	sit ich ivch sol bestan
ez enwart noch nie an degenen	wirs von frivnden getan
Nv lon iv got	her Rvdeger	sprach aber Gernot
die vil richen gabe	mich riwet iwer tot
sol an iv verterben	so tvgentlicher mvot
ich trage hie iwer wafen	daz ir mir gabet	helet gvot
Daz ist mir nie geswichen	in aller dirre not
vnder sinen ecken	lit manic ritter tot
ez ist lvoter vn– stæte	herlich un– gvot
ich wæn so riche gabe	ein reche nimmer mer getvot
Vn– welt ir niht erwinden	irn wellet zvo zvns gan
slaht ir mir iht der frivnde	die ich noch hinne han
mit iwer selbes swerte	nim ich iv den lip
so riwet ir mich	Rvdeger	vn– herlichez wip
Daz wolde got	her Gernot	vn– moehte daz ergan
daz aller iwer wille	wære hie getan
vn– daz genesn wære	iwer frivnde lip
iv sol vil wol getrowen	bediv min tohter vn– min wip
Des antwrt im Giselher	der edeln voten kint
wie tvot ir so	her Rvdeger	die mit mir chomen sint
si sint iv alle wæge	ir grifet vbel zvo
die iwern schonen tohter	welt ir verwitewen ze frvo
Swenne ir vn– iwer rechen	mit strite mich bestat
wie <rehte> vnfrivntliche	ir daz schinen lat
daz ich iv wol getrowe	fver ander alle man
da von ich zeinem wibe	iwer tohter mir gewan
Gedenchet iwer triwe	vil edel kunich her
gesende ivch got fon hinnen	so sprach Rvdeger
lat die ivncfrowen	niht engelten min
dvrch aller fvrsten tvgende	so rvochet ir genædich sin
Daz tæt ich wol von schulden	sprach Giselher daz kint
die edeln mine mage	die noch hier inne sint
svln die von iv ersterben	so mvoz gescheiden [81v]sin
div vil stæte frivntschaft	zvo ziv vn– ovch dem wibe min
Nv mvez vns got genaden	sprach do der chvne man
do hvben si die schilde	also si wolden dan
striten zv den gesten	in Chriemh' sal
do rief vil lvote Hagene	von der stiegen hin zetal
Belibet eine wile	vil edel Rvdeger
also sprach do Hagene	wir wolden reden mer
ich vn– mine herren	des vns twinget not
waz mac gefrvmen Ezeln	vnser ellenden tot
Ich stan in grozen sorgen	vil edel fvrste milt
mir gab div marcgravinne	disen richen schilt
den habent mir die Hvnen	zerhowen vor der hant
ich fvrt in minneklichen	her in Ezelen lant
Daz wolde got von himele	sprach aber Hagene
vnt het ich schilt so gvten	hie ze tragene
also dv hast vor hende	vil edel Rvdeger
sone gerte ich hie zen Hvnen	deheiner <halsperge> mer
Vil gern wær ich dir gvot	mit mime schilde
torst ich diren gebieten	vor Chriemh'
doch nim dv in hin	Hagene	vn– trag in vor der hant
hey soldestv in fveren	in der <Burgonden> lant
Do er im so willechliche	den schilt ze gebne bot
do wart genvger ovgen	von weinen harte rot
ez was div leste gabe	die sider immer mer
gebot deheime degene	von Bechelaren Rvdeger
Swie grimme Hagene wære	vn– swie herte gemvot
doch erbarmet in div gabe	die der helt gvot
bi sinen lesten citen	so nahe hete getan
vil manic ritter edele	mit im trvren began
Nv lon iv got von himele	vil edel Rvdeger
ez wirt iwer geliche	deheiner nimmer mer
der ellenden rechen	so miltechlichen gebe
got sol daz gebieten	daz iwer tvgent immer lebe
Nv lon ich iv der gabe	sprach Hagene der degen
daz ich mich alles vbeles	wil gein iv bewegen
daz nimmer ivch gerveret	in strite hie min hant
ob ir si alle slvget	die von Bvrgonden lant
Des neig im do mit zvehten	der marcgrave her
die lvte weinten alle	daz disiv starchen ser
niemen scheiden chvnde	daz was ein michel not
vater aller tvgende	lag an Rvdegere tot
Do sprach ovch von dem hvose	Volker der spileman
sit min geselle Hagene	den vride hat getan
den svlt ir also stæte	han von miner hant
daz habt ir wol verdienet	do wir chomen in daz lant
Vil edeler marcgrave	ir svlt min bote sin
dise roten bovge	gab mir div margravin
daz ih si tragen solde	hie zer hochgecite
daz han ich geleisten	daz ir min zivch des site
Daz wolde got von himele	sprach do Rvdeger
daz iv div marcgravinne	noch solde gebn mer
div mære sage ich gerne	der trvtinne min
vn– gesi[82r]he ich si gesvnde	des svlt ir ane zwivel sin
Als er im daz gelobte	den schilt hvop Rvdeger
des mvtes er irtobete	dane beit er da niht mer
er lief vf zv den gesten	eiine rechen gelich
manigen slac vil swinden	slvoc der marcgrave rich
Die zwene wichen hoher	Volker vn– Hagene
wandez im ê gelobten	die snellen degene
noch vant er also chvnen	bi dem tvrne stan
daz Rvdeger des strites	mit grozen sorgen began
Dvrch mort rêchen willen	so liezen si in dar in
Gvnther vn– Gernot	si heten helede sin
Giselher stvnt vf hoher	ze ware ez was im leit
er versach sich noch des lebenes	dar vmbe er Rvdegeren meit
Do sprvngen zvo den vinden	des marcgraven man
man sah si degenliche	nach ir herren gan
div vil scharpfen wafen	si trvgen an der hant
des brast da vil der helme	vn– manic herlicher rant
Do slvgen die vil mvden	manigen swinden slac
den von Bechelaren	der ebene gelach
dvrch die liehten ringe	vaste vnz vf daz verch
si frvmten in dem stvrme	div vil herlichen werch
Daz edel ingesinde	was chomen gar dar in
Volker vn– Hagene	die sprungen balde hin
sine gaben vride niemen	wan dem einem man
von ir beider hande	daz blvot dvrch helme nider ran
Wie rehte gremliche	vil swerte drinne erchlanc
vil der schildes spangen	vz den slegen spranch
des reise ir schiltgesteine	verhowen in daz blvot
si vahten also grimme	daz man ez nimmer mer getvot
Der vogt von Bechelaren	gie wider vn– dan
also der mit ellen	in stvrme werben chan
dem tet des tages Rvedeger	mit strite wol gelich
daz er ein degn wære	vil <chven> vn– ovch vil lobelich
Hie stvnden dise zwene	Gunther vn– Gernot
si slvogen in dem strite	vil manigen helt tot
Giselher vn– Danchwart	die bede ez ringe wach
des frvmten si vil manigen	vnz vf ir ivngesten tach
Wol zeigte der marcgrave	daz er was starch genvoc
chvene vn– wol gewafent	hey waz er helde slvoc
daz sach ein Burgonde	do dwang in zornes not
da von begvnde nahen	des gvten Rvdegeres tot
Ez was der starche Gernot	den helt den rief er an
er sprach zem marcgraven	ir welt mir miner man
niht genesen lazen	vil edel Rvdeger
daz mvet mich ane maze	ine chans niht an gesehn mer
Nv mag iv iwer gabe	wol ze schaden chomen
sit ir miner frivnde	mir habt so vil genomen
nv wendet ivch her vmbe	vil edel chvene man
iwer gabe wirt verdienet	so ich aller hohste kan
E daz der marcgrave	vol zvo zim chome dar
des mvsen liehte ringe	werden missevar
do sprungen zvo [82v]zein ander	die ere gernde man
ir ieteweder schirmen	fvr starche wnden im began
Ir swert so scherpfe warn	ez enchunde niht gewegen
do slvoc Gernoten	Rvdeger der degen
dvrch helm vlins herten	daz nider vloz daz blvot
daz vergalt im wol mit ellen	der ritter chven vn– gvot
Die Rvdegers gabe	an hende er hohe erwach
swie wnt er zem tode wære	er slg im einen slac
dvrch sinen schilt gvten	vnz vf div helm gespan
da von ersterben mvose	der schonen Gotelinde man
lane wart nie wirs gelonet	so richer gabe mer
do vielen bede erslagene	die rechen also her
gelich in dem stvrme	von ir selber hant
alrerst erzvrnede Hagene	do er den grozen schaden vant
Do sprach der helt von Tronege	ez ist vns vbel chomen
wir haben an in beiden	so <starchen> schaden genomen
den nimmer vberwindent	ir lvte vn– ovch ir lant
die Rvdegeres degene	die mvzen nv sin vnser pfant
Dane wolde ir deheiner	dem andern niht vertragen
vil maniger ane wnden	dar nider wart geslagen
der wol genesen wære	ob im wart solch gedranch
swie gesunt er anders wære	der in dem blvot doch ertranch
Owe mines brvder	der tot ist hie gefrvomt
waz wir der leiden mære	zallen citen chvomt
ovch mvz mich immer riwen	min sweher Rvdeger
der schade ist beidenthalben	vn– div vil groezlichen ser
Do die rechen sahen	daz si beide waren <tot>
 di mvsen liden not
der tot der svochte sere	da sin gesinde was
der von Bechelaren	einer langer niht genas
Gvnther vn– Giselher	vn– ovch Hagene
Danchwart vn– Volker	die gvten degene
die giengen da si fvnden	ligen zwene man
da wart von den heleden	mit iamer weinens vil getan
Der tot vns sere rovbet	sprach Giselher daz chint
lazet iwer weinen	vn– gen wir an den wint
daz die ringe erchvelen	vns stvrme mvden man
ia wæn vns <got> niht langer	nv daz lebn welle lan
Den sizzen	disen leinen	sah man da manigen degen
si waren aber mvzich	da waren tot gelegen
die Rvdegers helde	vergangen was der doz
so lange wert div stille	daz sin die kvniginne erdroz
Owe mir dirre swære	sprach des kvniges wip
si sprachent al ze lange	vnser viende lip
mac nv wol vri beliben	vor Rvdegeres hant
er wil si wider bringen	heim in der Bvrgonden lant
Waz hilfet	chunic Ezele	daz wir geteilet han
mit im swaz er wolde	der helt hat missetan
der vns da solde rechen	der wil der svne pflegn
des antwrt ir Volker	der vil zierliche degn
Iane zimt niht reden vbele	deheines kvniges wip
vn– torst ich heizen liegen	alsvs edel wip
so het ir Rvdegere	vil vreislich an gelogen
er vnt die [83r]sinen degene	sint an der svne gar betrogen
Er tet so willechliche	daz im der kunic gebot
daz er vn– sine gesinde	ist hie gelegen tot
nv seht alvmbe	Chriemh'	wem ir nv gebieten welt
iv hat vnz vf den ende	gedienet Rvdeger der helt
Welt ir des niht gelovben	man solz ivch sehn lan
dvrch ir hercenleide	so wart daz getan
man trvoch den helt verhowen	da in der kvnic ersach
den Ezeln degenen	so rehteleide nie geschach
Do si den marcgraven	sahen toten tragen
ezn chunde ein schribêre	geprieven noch gesagen
die manigen vngebære	der wib vn– man
von ir hercen swære	al da bezeigen began
Do wart der Ezeln iamer	so starch vn– also groz
als eins lewen stimme	der riche kunic erdoz
mit hercen leidem wofe	alsam tet ovch sin wip
si chlageten vngefvge	des gvten Rvdegers lip

<Do> hort man allenthalben	iamer also groz
daz palas vn– tvrne	von dem wofe erdoz
do hort ez ovch von Berne	ein Dietriches man
dvrch disiv starchen mære	wie balder gahen began
Do sprach er zvo dem fvrsten	hort	min her Dietrich
swaz ich her gelebt han	so reht vnmvgelich
gehort ich klage nie mere	als ich nv han vernomen
ich wæn der kunic Ezele	ist selbe zv dem schaden chomen
Wie moehtens anders alle	haben solhe not
der chvnic oder Chriemh'	ir einez daz ist tot
von den chunen gesten	dvrch ir nit gelegen
ez weinet harte sere	vil manic vz erwelter degen
Do sprach der helt von Berne	mine lieben man
nvne gahet niht ze sere	swaz hie hant getan
die ellenden rechen	des get in michel not
vn– lat si des geniezen	daz ich in minen vride bot
Do sprach der chvne Wolfhart	ich wil dar gan
vn– wil der mære vragen	waz si haben getan
vn– wilz iv sagen denne	vil lieber herre min
als ich ez rehte ervinde	waz div rede mvege sin
Do sprach der herre Dietrich	swa man zornes sich versiht
ob vngefvgiv vrage	denne da gesiht
daz betrvebet rechen	vil lihte danne ir mvot
iane wil ich niht	Wolfhart	daz ir die vrage da zin tvot
Do hiez er Helpfrichen	vil balde dar gan
vn– bat in daz ervinden	an Ezelen man
oder an den gesten selben	waz wære da geschehn
done het er nie von lvten	so grozer iamer mer gesehen
Der bote vragte balde	waz ist hie getan
do seit man im div mære	da ist vil gar zergan
swaz wir frevden heten	in der Hvnen lant
hie lit erslagen Rvdeger	von der Bvrgonden hant	[83v]
Die mit im dar in chomen	der ist einer niht genesen
done chunde Helpfriche	leider nimmer wesn
iane sagt er siniv mære	so reht vngerne nie
der bote do hin widere	vil sere weinende gie
Waz habt ir vns erfvnden	sprach do Dietrich
wie weinet ir so sere	degen Helpfrich
do sprach der chvne reche	ich mac wol balde chlagen
den gvten Rvdegere	hat vns her Gernot erslagen
Do sprach der helt von Berne	daz ensol niht wellen got
daz wær ein starchiv rache	vn– ovch des tivfels spot
wa mite hete Rvdeger	an in daz verscholt
ia ist mir daz wol chvende	er ist den Bvrgonden holt
Do sprach der chvene Wolfhart	vn– heten siz getan
so solt ez in allen	an ir lebn gan
ob wirz in vertrvgen	des wæren wir geschant
ia hat vns vil gedienet	des gvten Rvdegeres hant
Der vogt Amelunge	bat iz ervarn baz
vil harte seneliche	er in venster saz
do hiez er Hildebrande	zvo den gesten dan
daz an in erfvnde	waz da wære getan
Der stvrme chvne reche	meister Hildebrant
weder schilt noch wafen	trvger an der hant
er wolde in sinen zvhten	zv den gesten gan
von siner swester chinde	wart im ein strafen getan
Do sprach der grimme Wolfhart	welt ir dar blozer gan
sone mag ez ane ein schelten	nimmer wol gestan
so mvzet ir lasterliche	tvon die widervart
ob ir dar chomet gewafent	daz eteslicher wol bewart
Do garte sich der wise	dvrch des tvmben rat
e iz erfunde Hildebrant	do waren in ir wat
alle Dietriches rechen	vn– trvgen swert enhant
dem helde was iz leide	vil gerne het erz erwant
Er vragte war si wolden	wir wellen mit iv dar
waz ob von Tronege Hagene	dest wirs getar
gein iv mit spotte sprechen	des er chan wol gepflegen
do er die rede gehorte	da von gestattes in der degen
Do sach der chvne Volker	wol gewafent gan
die rechen von Berne	die Dietriches man
begvrtet mit den swerten	ir schilde vor der hant
er sagtez sinen herren	vzer Bvrgonden lant
Do sprach der videlære	ich sihe dort her gan
so rehte vientliche	die Dietriches man
gewafent vnder helme	si wellent vns bestan
mich nimt des michel wnder	waz wir den rechen haben getan
In den selben ziten	chom ovch Hildebrant
do sazter fvr die fvze	sinen schildes rant
er begvnde vragen	die Guntheres man
owe	ir gvten degene	waz het iv Rvdeger getan
Mich hat min herre Dietrich	her zv ziv gesant
ob erslagen hete	iwer deheines hant
den edeln marcgraven	als vns ist geseit
wir [84r]enchvnden vberwinden	niht div groezlichen leit
Do sprach der grimme Hagene	daz mære ist vngelogen
wie wol ich iv des gvnde	het ivch der bot betrogen
dvrch Rvdegeres liebe	daz lebte noch sin lip
den immer mvgen weinen	bediv man vn– ovch div wip
Do si daz rehte erhorten	daz er wære tot
do chlagten in die degene	ir triwe in daz gebot
den Dietriches mannen	sah man træhene gan
vber bærte vn– vber chinne	in was vil leide getan
Der herzoge vzer Berne	Sigestap do sprach
nv hat gar ein ende	genomen der gemach
den vns ie fvogte Rvdeger	nach vnser leide tagen
frevde ellender diete	lit von iv degenen erslagen
Do sprach von Amelvngen	der degen <Wlfwin>
vn– ob ich hivte sæhe	tot den vater min
mir en wrde nimmer leider	denne vmbe sinen lip
owe	wer sol nv troesten	des gvten marcgraven wip
Do sprach in zornes mvote	der chvene Wolfhart
wer wiset nv die rechen	so manige hervart
also der marcgrave	vil diche hat getan
owe	vil edel Rvdeger	deich dinen tot gelebt han
Wolfprant vn– Helpfrich	vn– Helmnot
mit allen ir frivnden	si weinten sinen tot
vor svften mohte vragen	niht mer Hildebrant
er sprach nv tvot ir degene	dar nach min herre hat gesant
Gebt vns Rvdegeren	so toten vz dem sal
an dem gar mit iamer	lit vnser vrevden val
vn– lat vns an im dienen	daz er ie hat began
an vns vil grozer triwen	vn– ovch an manigem vremden man
Wir sin ovch ellende	als Rvdeger der degen
wes lazet ir vns biten	lat in vns after wegen
tragen	daz wir nach tode	lonen noch dem man
wir hetenz pillicher	bi sime lebene getan
Do sprach der kunec Gvnther	nie dienest wart so gvot
den ein frivnt frivnde	so nach tode tvot
daz heiz ich stæte triwe	swer die chan began
ir lonet im von schulden	wander iv liebe hat getan
Wie lange svln wir vlegen	sprach Wolfhart der degen
sit vnser trost der beste	ist von iv tot belegen
vn– wir sin leider mere	mvgen niht gehaben
lat in vns tragen hinnen	da wir den rechen begraben
Des antwrt Volker	niemen in iv git
nemt in in dem hvse	da der degen lit
mit sinen tiefen wnden	gevallen in daz blvot
so ist ez ein voller dienest	den ir hie Rvdegere tvot
Do sprach der chvne Wolfhart	lat sin	her spileman
irn dvrfet vns niht reizen	ir habt vns leit getan
toerst ich vor mime herren	so chomt irs in not
des mvzen wir ez lazen	wan er vns strit mit iv verbot
Do sprach der [784v]videlære	der vorht ist gar ze vil
swaz im verbivtet	derz allez lazen wil
daz enchan ich niht geheizen	rehten heldes mvot
div rede dvhte Hagenen	von <sime> hergesellen gvot
Welt ir den spot niht lazen	sprach aber Wolfhart
ich entrihtiv liht die seiten	swenne ir die widervart
ritet gegen Rine	daz irz wol mvgt gesagen
iwer vbermveten	mag ich langer niht vertragen
Do sprach der videlære	swenn ir die seiten min
verirret gvoter done	der iwer helmes schin
mac wol trvebe werden	von der miner hant
swie ich halte geriten	in der Burgonden lant
Do wolder zvo zim springen	wandaz in niht enlie
Hildebrant sin oehaim	in vaste zim gevie
ich wæn dv woldest woten	dvrch dinen tvmben zorn
mines herren hvlde	wir heten immer mer verlorn
Lat ab den lewen	meister	er ist so grimme gemvot
chvmt er mir zen handen	sprach Volker der helt gvot
het er die werlde alle	mit siner hant erslagen
ich slah in daz erz widerspel	nimmer mere darf gesagen
Des wart vil harte erzvrnet	der Bernære mvot
den schilt gezvchte Wolfhart	ein sneller degen gvot
alsam ein lewe wilder	lief er vor in dan
im wart eine gæhez volgen	von sinen frivnden getan
Swie witer sprvnge er pflæge	fvr des sales want
doch ergahet in vor der stiegen	der alde Hiltebrant
er wolde in vor im lazen	niht chomen in den strit
si fvnden daz si svochten	an den ellenden sit
Do gespranch zvo Hagene	maister Hildebrant
div swert man hort erchlingen	an ir beider hant
si waren harte erzvrnet	vil wol erchos manz sint
von ir beider wafen	gie der vivr roter wint
Di wrden do gescheiden	in des strites not
daz taten die von Berne	als in ir chraft gebot
zehant do wande Hildebrant	von Hagene balde dan
do lief der starche Wolfhart	den chvnen Volkeren an
Er slvoc den videlære	vf den helm gvot
daz des swertes ecke	vnz an die spangen wot
daz vergalt mit ellen	der chvne spileman
do slvoger Wolfharten	daz er strvchen began
Fivr vz den ringen	des hiwen si genvoc
haz ir ieslicher	dem andern vaste trvoc
do schiet do von Berne	der degen Wlfwin
ob er ein helt niht wære	des enchunde niht gesin
Gvnther der vil chvne	mit williger hant
enpfie die helde mære	von Amelunge lant
Giselher der starche	div liehten helm vaz
der frvmt er da vil manigez	von blvote rot vn– naz
Danchwart	Hagenen brvder	was ein grimmech man
swaz er da vor hete	in strite getan
den Ezeln rechen	daz was gar ein [85r]wint
alrest vaht tobeliche	des kvnen Adrianes kint
<Gerbart> vn– Wichart	Helpfrich vn– Rischart
die heten in manigen stvrmen	vil selten sih gespart
des brahten si wol innen	die Guntheres man
do sach man Wolfpranden	in stvrme herliche gan
Da streit er als er wote	der alde Hildebrant
vil manic kvner reche	vor Wolfhartes hant
mit tode mvse vallen	von swerten in daz blvot
svs rachen Rvdegere	die rechen <kvne> vn– gvot
Sigestap von Berne	als im sin ellen riet
hey waz er in dem sturme	der herten helm schriet
den sinen vianden	Dietriches swester svon
der chvnde in dem stvrme	bezzers nimmer niht getvon
Volker der vil starche	do er daz ersach
daz Sigestap der chvene	den blvtigen bach
hiw vz herten ringen	daz was dem degene zorn
do spranger im begegene	do hete Sigestap verlorn
von dem videlære	vil schiere al da daz lebn
er begunde in siner chunste	al solhen teil da gebn
daz er von sime swerte	mvse ligen tot
daz rach der alde Hildebrant	als im sin ellen daz gebot
Owe vil liebes herren	sprach meister Hildebrant
der hie lit erstorben	von Volkeres hant
nvne sol der videlære	langer niht genesen
zorn der Hildebrandes	chunde grimmer niht gewesen
Do slvger Volkere	daz im div helmbant
stvben allenthalben	zvo des sales want
von helme vn– ovch von schilde	dem chvnen spileman
da von der videlære	do den ende da gewan
Do drvngen zvo dem strite	die Dietriches man
si slvgen daz die ringe	vil hohe wæten dan
vn– daz man ort der swerte	inme gewelbe stechen sach
si hiwen vz den helmen	den heize <vliezenden> bach
Do sach von Tronege Hagene	Volkeren tot
daz was zer hochgecite	sin aller meistiv not
die er da hete gewnnen	an magen vn– an man
owe wie grimme Hagene	den helt rechen began
Nvne sol es niht geniezen	der alde Hildebrant
min helfe lit erslagene	hie von des heldes hant
der beste hergeselle	den ieman gewan
den schilt den rvchter hoher	do gie er howende dan
Helpfrich der vil starche	Danchwarten slvoc
Gvnther vn– Giselher	den was ez leit genvoc
do si in sahen vallen	in der starchen not
er het wol vergolten	mit sinen handen sinen tot
Swie vil von manigen landen	gesamnet wære dar
vil fvrsten chreftekliche	gegen ir chleinen schar
wæren die kristen lvte	wider si niht gewesen
si wæren mit ir ellen	vor allen heiden wol genesen
Die wile gie do Wolfhart	beide wider vn– dan
allez [85v]howende	die Gvntheres man
er was die dritten chere	den palas zende chomen
ia het er den chunigen	so vil der rechen da genomen
Do rief der starche Giselher	Wolfharten an
ovve daz ich so grimmen	vient ie gewan
edel ritter chvene	nv wendet gegen mir
si chomen zv ein ander	sit mit ellenthafter gir
Wolfhart gein Giselhere	chert in den strit
do slvg ir ietwedere	vil manige <wnden> wit
so rehte chreftechliche	er zvo dem kunige dranch
daz im daz blvot von fvzen	al vber daz hovbet sin <gespranch>
Mit grimmen slegen swinden	der edeln Vten chint
enpfie vil pitterliche	den chvenen rechen sint
swie chvne Wolfhart wære	er mohte niht genesen
vor dem ivngen kvnige	niemen dorfte chvner wesen
Do slvg er Wolfharte	dvrch eine prvnne gvot
daz im von der wnden	vil sere vloz daz blvot
er wnte zvo dem tode	den Dietriches man
ez enhet ân einen rechen	ander niemen getan
Also der chvne Wolfhart	der wnden enpfant
den schilt liez er do vallen	hoher an der hant
hvber daz starchez wafen	daz was scharpf genvoc
dvrch helm vn– dvrch ringe	der helt do <Giselhern> slvoc
Si heten beide ein ander	den grimmen tot getan
done lebt ovch nv niht mere	der Dietriches man
wan Hildebrant aleine	do er den neven vallen sach
im wæn vor sime tode	so rehte leide nie geschach
Ovch warn gar gevallen	Guntheres degene
niwan si einen zwene	er vn– Hagene
si stvnden in dem blvote	tief unz an div knie
Hildebrant harte balde	hin vber sinen neven gie
Er besloz in mit armen	vn– wolde in tragen dan
mit im vzem hvose	er mvse in ligen lan
er was ein teil ze swære	wider in daz blvot
enpfiel er im vz handen	do blicht vf der degen gvot
Do sprach der totwnde	vil lieber oeheim min
irn mvget an disen ziten	mir niht frvom gesin
nv hvtet ivch vor Hagene	ia dvnchet ez mich gvot
er treit in sime hercen	einen grimmigen mvot
Vnde ob mich mine mage	nach tode wellen chlagen
den næhsten vn– den besten	den svlt ir daz sagn
daz si nach mir niht weinen	daz ist ane not
vor eines kuniges handen	lige ich hie herlichen tot
Ich han ovch so vergolten	hier inne minen lip
daz ez wol mvgen beweinen	der gvten ritter wip
ob ivch des iemen vrage	so mvget ir balde sagen
vor min eines handen	ir lit wol hundert erslagen
Do gedaht ovch Hagene	an den spileman
dem <der> alde Hildebrant	sin lebn an gewan	[86r]
do sprach er zv dem kvnige	ir geltet miniv leit
ir habt vns hinne erbvnnen	vil maniges rechen gemeit
Er slvog vf Hildebranden	daz man wol vernam
Balmvngen diezen	daz Sivride nam
Hagene der chune	da er den rechen slvoc
do widerstvnt im Hildebrant	der im vil wenic iht vertrvoc
Der Wolfhartes oeheim	slvog ein wafen breit
vf Hagenen von Tronege	daz ovch vil sere sneit
done chunder niht verwnden	den Gvntheres man
do slvog aber in Hagene	dvrch eine prvnne wolgetan
Also meister Hildebrant	der wnden enpfant
do vorht er schaden mere	von der Hagenen hant
den schilt warf er vber rvcke	der Dietriches man
mit der starchen wnden	der helt vil chvome danne entran
Dar inne was niemen lebnde	als ich gesaget han
niwan die einen zwene	Gunther vn– ovch sin man
mit blvte gie bervnnen	der alde Hildebrant
er brahte leidiv mære	da er sinen herren vant
Do saher trvrechliche	sizzen hie den man
leides michel mere	der fvrste do gewan
als er Hildebranden	ersach von blvte rot
do vragt er in der mære	als im div sorge gebot
Wan sagt ir mir	meister	wie sit ir so naz
<worden> von dem blvote	oder wer tet iv daz
ich wên ir mit den gesten	zem hvse habt gestriten
ich verbot ez iv so sere	do wær ez pillich vermiten
Swie vbel disiv mære	mir sten ze sagene
er sprach	dise wnden	slvoc mir Hagene
do ich vz dem hvse	wolde wenden
wie chvom <ich> mit dem lebene	dem selben valande entran
Do sprach der Bernære	vil reht ist iv geschehn
do ir mich frivntschefte	den helden hortet iehn
daz ir den vride brachet	den ich in het gegeben
hete ihs niht immer schande	ir soldet vliesen daz leben
Nvne zvrnet niht so sere	min herre Dietrich
an mir vn– minen frivnden	der schade ist gremlich
wir wolden Rvdegeren	getragen haben dan
des enwolden vns niht gvnnen	des kvnec Guntheres man
So we mir dirre leide	ist Rvdeger doch tot
daz mvz mir sin ein iamer	vor aller miner not
Gotelint div edele	ist miner basen chint
ach we der armen weisen	die da ze Bechelaren sint
Riwen vn– ovch leides	mant in do sin tot
er begvnde starche weinen	des gie dem helede not
owe getriwer helfe	der ich verlorn han
iane vberwinde ich nimmer	des kunic Ezeln man
Er sprach ze Hildebrande	mvget ir mir doch sagen
wer der degen wære	der in da hat erslagn
er sprach	daz tet mit chreften	der starche Gernot
vor Rvdegers handen	[86v]mvos ovch der degn ligen tot
Er sprach	meister Hildebrant	nv saget minen man
daz si sich balde wafen	ia wil ich dar gan
vn– heizet mir gewinnen	min liehtez wichgewant
ich wil selbe vragen	die helede vz Burgonden lant
Do sprach meister Hildebrant	wer sol zvo ziv gen
swaz ir habt der lebenden	die seht ir bi iv sten
daz bin ich alterseine	die andern die sint tot
do erschracter dirre mære	des gie dem rechen groziv not
wander leit so grozez	zer werlde nie gewan
er sprach	unt sint erstorben	alle mine man
so hat min got vergezzen	ich was ein kunic rich
nv mag ich wol heizen	der vil arme Dietrich
Wie chundez sich gefvgen	sprach aber Dietrich
daz si alle sint erstorben	die helde lobelich
von den strit mvden	die doch heten not
wan dvrch min vngelvcke	in wære vremde noch der tot
Owe vil lieber Wolfhart	sol ich dich han verlorn
so mac mich balde riwen	daz ich ie wart geborn
Sigestap vn– Wlfwin	vn– ovch Wolfprant
wer sol mir danne helfen	in der Amelvnge lant
Helpfrich der vil chvene	vn– ist mir der erslagen
Gerbart vn– Wichart	wie solde ich die verklagen
daz ist an minen frevden	mir der leste tac
owe daz vor leide	niemen sterben ne mac

o> svchte der herre Dietrich	selbe sin gewant
do half	daz er sich wafent	maister Hildebrant
do chlaget also sere	der chreftige man
daz im daz hvs erdiezen	gein siner stimme began
Der helt gewan do widere	rehten mannes mvot
in grimme wart gewafent	do der degen gvot
einen <schilt> vil vesten	den nam er an die hant
nach schaden in do troste	der vil chune Hildebrant
Do sprach von Tronege Hagene	ich sihe dort her gan
den herren Dietrichen	der wil vns bestan
nach sinne starchen leide	daz im ist hie geschehn
man sol daz hivte chiesen	wem man des besten mvge iehn
lane dvnchet sich von Berne	der herre Dietrich
nie so starch des libes	vn– ovch so gremelich
vn– wil erz an vns rechen	daz im ist getan
also reite Hagene	ich tarr in rehte wol bestan
Die rede erhorte Dietrich	vn– Hildebrant
er gie da er die rechen	beide stende vant
vzen vor dem hvse	geleinet an den sal
sinen schilt den gvten	den sazte Dietrich zetal
In leitlichen sorgen sprach do Dietrich
wie habt ir so geworben	Gunther	ein chunic rich
ich ellender reche	waz ist an mir getan
alles mines trostes	des bin ich eine bestan
Ivch endvhte niht der volle	an [87r]der vil grozen not
do ir vns Rvdegeren	den rechen slvget tot
nv habt ir mir erbunnen	aller miner man
ia het ich iv degenen	solher leide niht getan
Gedenchet an ivch selben	vn– an iwer leit
tot der iwer frivnde	vn– ovch div arebeit
ob ez iv gvten degenen	beswæret iht den mvot
owe wie rehte vnsanfte	mir tot der Rvdegers tvt
Ez <gescach> in der werlde	nie manne leider mer
ir gedahtet vbele	an min vn– an iwer ser
swaz ich frevden hete	div lit von iv erslagen
iane chan ich nimmer mere	die mine mage verchlagen
Iane sin wir niht so schuldich	sprach do Hagene
ez chomen her zem hvse	die iwern degene
ze vlize wol gewafent	mit ir schar so breit
mich dvnchet wie iv div mære	niht ze rehte sin geseit
Waz sol ich anders gelovben	mir sagtez Hildebrant
do mine rechen gerten	von Amelunge lant
daz ir in Rvdegere	gæbet vz dem sal
do tat ir niwan spottens	die chvnen helde her zetal
Do sprach der kunec von Rine	si iahen wolden tragen
Rvedegeren hinnen	den hiez ich in versagen
Ezeln ze leide	vn– niht den dinen man
vnze daz do Wolfhart	dar vmbe schelten began
Do sprach der helt von Berne	ez mvese et also sin
Gunther	kunec edele	dvrch die zvhte din
so ergezzet mich der leide	die mir sint getan
vn– svnez	ritter chuone	so wil ich gar die schulde lan
Ergip dich mir ze gisel	dv vn– ovch din man
so wil ich ivch behvten	so ich beste chan
daz iv hie zen Hvnen	niemen niht entvot
ir svlt an mir niht vinden	niwan triwe vn– gvot
Nvne welle got von himele	sprach do Hagene
daz sich dir ergeben	zwen degene
die dv so wærliche	sihest gewafent stan
daz hiez ein michel schande	vn– wær ovch vbele getan
Irn svlt ez niht versprechen	sprach aber Dietrich
Gunther vn– Hagene	ia habt ir beide mich
so sere beswæret	min herce vn– ovch den mvot
welt ir mich ergezzen	daz irz vil pillichen tvot
Ich gibs iv mine triwe	vn– gihtes iv min hant
daz ich mit iv rite	heim in iwer lant
ich beleite iv nach den eren	oder ich gelige tot
ich wil dvrch ivch verchiesen	der minen grozlichen not
Nvne gewæhent sin niht mere	sprach aber Hagene
von <vns> enzimt daz mære	niht ze sagene
daz sich iwer ergæben	zwene also chvne man
nv siht man niemen mære	bi iv wan Hildebrande stan
Des antwrt Hildebrant	ivch mohte wol gezemen
den fride mines herren	ob ir den rvchet nemen
ez chvmt noch an die stunde	vil liht in churcer cit
daz ir in gerne næmet	vn– in iv danne niemen git
Ja neme ich ê die svone	sprach do Hagene
ê ih [87v]so lasterliche	von eime degene
flvhe	meister Hildebrant	als ir habt hie getan
ich wande dar ir kundet	baz gein viande stan
Do sprach meister Hildebrant	zwiv verwizzet ir mir daz
nv wer was der vf eime schilde	vor dem Waschenstein saz
do im von Span Walther	so vil der frivnde slvoc
ovch habt ir noch ze zeigen	an iv selben genvoc
Do sprach der fvrste Dietrich	wie zimt daz helede lip
daz si svln schelten	sam div alten wip
ich verbivt iv	Hildebrant	daz ir iht sprechet mer
mich ellenden rechen	twingent grozlichiv ser
Lat hoeren	frivnt Hagene	sprach do Dietrich
waz ir ê redetet	ir rechen lobelich
do ir mih gewafent	zvo ziv sahet gan
ir iahet daz ir eine	mit strite woldet mich bestan
Iane lovgent iv des niemen	sprach Hagene der degen
ine welle ez hie versvochen	mit stichen un– mit slegen
ez ensi daz mir zebreste	daz Nibelunges swert
mich mvet daz mines herren	vn– min ze gisel ist gegert
Do der reche erhorte	den grimmen Hagenen mvot
den schilt vil balde zvchte	der snelle degen gvot
wie balde gein im Hagene	von der stiegen spranch
Nibelunges swert daz gvote	vil lvot vf Dietriche erchlanch
Do wesse wol her Dietrich	daz der chune man
vil grimmes mvtes wære	schermen im began
der voget von Berne	vor angestlichen slegen
wol erchander Hagenen	er was ein vz erwelter degen
Ovch vorht er Balmungen	ein wafen starch genvoc
vnder wilen Dietrich	mit listen wider slvoc
vnze daz er Hagenen	mit strite doch betwanch
er slvog im eine wnden	div was tief vn– lanch
Do daht der herre Dietrich	dv bist in not erwigen
ih han es luzzil ere	soltv nv tot geligen
ich wil ez svs versvchen	ob ich ertwingen chan
dich mir zeinem gisel	daz wart mit sorgen getan
Den schilt lie vallen Dietrich	sin sterche div was groz
mit beiden sinen armen	er Hagenen vmbesloz
do wart von im betwngen	der vil chvene man
Gunther der vil edele	dar vmbe trvrin began
Hagenen bant do Dietrich	vn– fvrt in da er vant
die edeln Chriemh'	vn– gab ir bi der hant
den chvnisten rechen	der ie swert getrvoc
nach ir vil starchem leide	do wart ir liebe genvoc
Vor frevden neich dem rechen	daz Ezeln wip
immer si dir sæli	din herce vn– ovch din lip
dv hast mich wol ergezzet	nach aller miner not
ich sol ez immer dienen	mich enwendes der tot
Do sprach der herre Dietrich	ir svlt in lan genesen
vil edeliv kvniginne	ez mac vil wol noch wesen
daz ivch sin dienst ergezzet	des er iv hat getan
er sol des niht engelten	daz [88r]man in siht gebunden stan
Do hiez si fvren Hagenen	an sin vngemach
da er lac beslozzen	vn– da in niemen sach
Gunther der kunec edele	rvfen do began
war chom der helt von Berne	er hat mir leide getan
Do gie im hin begegene	der herre Dietrich
daz Gunthers ellen	daz was so lobelich
ern beite do niht mere	er lief her fvr den sal
von ir beider swerten	hvp sich ein vngefvger schal
Swie vil der herre Dietrich	lange was gelobt
Gunther was so sere	erzvrnet vn– ertobt
wander nach starchen leiden	sin herce vient was
man sagtez noch fvr wnder	daz do Dietrich ie genas
Ir ellen vn– ir sterche	beide warn groz
palas vn– tvrne	von den slegen doz
do si mit swerten hewen	vf die helme gvot
ez het der kunic Gunther	einen herlichen mvot
Sit twange in der von Berne	sam Hagenen ê geschach
daz blvot man durch die ringe	dem helde vliezen sach
von eime scharpfen swerte	daz trvoc her Dietrich
doch het gewert Gunther	nach mvde lobeliche sich
Der herre wart gebunden	von Dietriches hant
swie kunige niene solden	liden solhiv bant
er daht ob er lieze	vngebunden wesen
daz si zwene inme lande	niemen liezen genesen
Der vogt von Berne	der nam in bi der hant
do brahter in gebunden	da er Chriemh' vant
do was mit sime leide	ir sorge ein teil benomen
si sprach	chunic Gunther	sit mir groze willechomen
Er sprach	ich soltv nigen	vil edel swester min
ob iwer grvezen moehte	genêdichlicher sin
ich weiz ivch	kvniginne	so zornic gemvot
daz ir mir vn– Hagenen	vil swachez grvzen getvot
Do sprach der helt von Berne	vil edel kuniges wip
ez enwart nie gisel mere	so gvoter ritter lip
als ich iv	frowe here	an in gegeben han
nv svlt ir die ellenden	min vil wol geniezen lan
Si iach si tæt iz gerne	do gie der chune man
mit weinenden ovgen	von in balde dan
si rach sich gremliche	daz Ezeln wip
den vz erwelten degenen	nam si beiden den lip
Si lie si ligen svnder	dvrch ir vngemach
daz ir sit dewedere	den andern nie gesach
swie ez verlobt hete	daz vil edele wip
si daht	ich geriche hivte	mins vil lieben mannes lip
Do gie div kuniginne	da <si> Hagenen sach
wie reht erbolgenliche	si zvo dem rechen sprach
welt ir mir geben widere	daz ir mir habt genomen
so mvget ir mit dem lebene	wider zen Burgonden chomen
Do sprach der grimme Hagen–	[88v]<div> rede ist gar verlorn
vil edeliv kvniginne	ia han ich des gesworn
daz ich den hort iht zeige	die wile deheiner lebe
der minen edelen herren	vn– in niemanne gebe
Er wiste wol div mære	sine liezen in niht genesen
wie mohte ein vntriwe	immer stercher wesen
er vorhte	so si hete	im sinen lip genomen
daz si danne ir brvoder	lieze heim ze lande chomen
Ich bringez an ein ende	gedaht daz edel wip
do hiez si ir brvoder	nemen den lip
man slvog im abe daz hovbet	bi hare si ez trvoc
fvr den helt von Tronege	do warde im leide genvoc
Also der vngemvote	sins herren hovbet sach
wider Chriemh'	do der reche sprach
dv hast ez zeime ende	nach dime willen braht
vn– ist ovch rehte ergangen	als ich mir hete gedaht
Nv ist von Bvrgonden	der edel kunec tot
Giselher vn– Volker	Danchwart vn– Gernot
den hort den weiz nv niemen	wan got vn– min
der sol dich	vælændinne	immer wol verholn sin
Si sprach	so habt ir vbele	geltes mich gewert
so wil doch ich behalten	daz Sivrides swert
daz trvoc min holder vriedel	do ir im namet den lip
mortlich mit vntriwen	sprach do daz iamerhafte wip
Si zoch ez von der scheiden	daz enchunder niht gewern
do dahte si den rechen	des libes vol behern
si hvbez mit ir handen	daz hovpt si im abe slvoc
daz sach der kunic Ezele	do was im leide genvoc
Wafen	sprach der furste	wie ist nv tot gelegen
von eines wibes handen	der aller beste degen
der ie chom ze stvrmen	oder ie schilt getrvoc
swie vient ich im wære	ez ist mir leide genvoc
Do sprach meister Hildebrant	iane genivzet si es niht
daz si in slahen torste	swaz halt mir geschiht
swie er mich selben bræhte	in angestliche not
idoch so wil ich rechen	des vil chvnen rechen tot
Hildebrant mit zorne	zvo Chriemh' spranch
er slvoc der chuniginne	einen grimmen swanch
ia tet ir div sorge	von dem degene we
si mohte lvzzil helfen	daz si so angestlichen scre
Do was gelegen aller	da der veigen lip
ze stvchen lac verhowen	do daz edel wip
Ezel vn– Dietrich	weinen do began
si chlageten iæmerliche	alle ir mage vn– man
Div vil michel ere	was da gelegen tot
die lvte heten alle	iamer vn– not
mit leide was verendet	des kuniges hochgecit
als ie div liebe leide	an dem ende gerne git
Ine chan ivch niht bescheiden	waz sider da geshach
wan christen vn– heiden	weinen man do sach
wibe vn– knehte	vn– manige schone meit
die heten nach ir frivnden	div [89r]aller grozisten leit
Ine sage iv nv niht mere	von der grozen not
die da erslagen waren	die lazen ligen tot
wie ir dinch an geviengen	sit der Hvnen diet
hie hat daz mære ein ende	daz ist der Nibelunge liet

o> svchte der herre Dietrich	selbe sin gewant
do half	daz er sich wafent	maister Hildebrant
do chlaget also sere	der chreftige man
daz im daz hvs erdiezen	gein siner stimme began
Der helt gewan do widere	rehten mannes mvot
in grimme wart gewafent	do der degen gvot
einen <schilt> vil vesten	den nam er an die hant
nach schaden in do troste	der vil chune Hildebrant
Do sprach von Tronege Hagene	ich sihe dort her gan
den herren Dietrichen	der wil vns bestan
nach sinne starchen leide	daz im ist hie geschehn
man sol daz hivte chiesen	wem man des besten mvge iehn
lane dvnchet sich von Berne	der herre Dietrich
nie so starch des libes	vn– ovch so gremelich
vn– wil erz an vns rechen	daz im ist getan
also reite Hagene	ich tarr in rehte wol bestan
Die rede erhorte Dietrich	vn– Hildebrant
er gie da er die rechen	beide stende vant
vzen vor dem hvse	geleinet an den sal
sinen schilt den gvten	den sazte Dietrich zetal
In leitlichen sorgen sprach do Dietrich
wie habt ir so geworben	Gunther	ein chunic rich
ich ellender reche	waz ist an mir getan
alles mines trostes	des bin ich eine bestan
Ivch endvhte niht der volle	an [87r]der vil grozen not
do ir vns Rvdegeren	den rechen slvget tot
nv habt ir mir erbunnen	aller miner man
ia het ich iv degenen	solher leide niht getan
Gedenchet an ivch selben	vn– an iwer leit
tot der iwer frivnde	vn– ovch div arebeit
ob ez iv gvten degenen	beswæret iht den mvot
owe wie rehte vnsanfte	mir tot der Rvdegers tvt
Ez <gescach> in der werlde	nie manne leider mer
ir gedahtet vbele	an min vn– an iwer ser
swaz ich frevden hete	div lit von iv erslagen
iane chan ich nimmer mere	die mine mage verchlagen
Iane sin wir niht so schuldich	sprach do Hagene
ez chomen her zem hvse	die iwern degene
ze vlize wol gewafent	mit ir schar so breit
mich dvnchet wie iv div mære	niht ze rehte sin geseit
Waz sol ich anders gelovben	mir sagtez Hildebrant
do mine rechen gerten	von Amelunge lant
daz ir in Rvdegere	gæbet vz dem sal
do tat ir niwan spottens	die chvnen helde her zetal
Do sprach der kunec von Rine	si iahen wolden tragen
Rvedegeren hinnen	den hiez ich in versagen
Ezeln ze leide	vn– niht den dinen man
vnze daz do Wolfhart	dar vmbe schelten began
Do sprach der helt von Berne	ez mvese et also sin
Gunther	kunec edele	dvrch die zvhte din
so ergezzet mich der leide	die mir sint getan
vn– svnez	ritter chuone	so wil ich gar die schulde lan
Ergip dich mir ze gisel	dv vn– ovch din man
so wil ich ivch behvten	so ich beste chan
daz iv hie zen Hvnen	niemen niht entvot
ir svlt an mir niht vinden	niwan triwe vn– gvot
Nvne welle got von himele	sprach do Hagene
daz sich dir ergeben	zwen degene
die dv so wærliche	sihest gewafent stan
daz hiez ein michel schande	vn– wær ovch vbele getan
Irn svlt ez niht versprechen	sprach aber Dietrich
Gunther vn– Hagene	ia habt ir beide mich
so sere beswæret	min herce vn– ovch den mvot
welt ir mich ergezzen	daz irz vil pillichen tvot
Ich gibs iv mine triwe	vn– gihtes iv min hant
daz ich mit iv rite	heim in iwer lant
ich beleite iv nach den eren	oder ich gelige tot
ich wil dvrch ivch verchiesen	der minen grozlichen not
Nvne gewæhent sin niht mere	sprach aber Hagene
von <vns> enzimt daz mære	niht ze sagene
daz sich iwer ergæben	zwene also chvne man
nv siht man niemen mære	bi iv wan Hildebrande stan
Des antwrt Hildebrant	ivch mohte wol gezemen
den fride mines herren	ob ir den rvchet nemen
ez chvmt noch an die stunde	vil liht in churcer cit
daz ir in gerne næmet	vn– in iv danne niemen git
Ja neme ich ê die svone	sprach do Hagene
ê ih [87v]so lasterliche	von eime degene
flvhe	meister Hildebrant	als ir habt hie getan
ich wande dar ir kundet	baz gein viande stan
Do sprach meister Hildebrant	zwiv verwizzet ir mir daz
nv wer was der vf eime schilde	vor dem Waschenstein saz
do im von Span Walther	so vil der frivnde slvoc
ovch habt ir noch ze zeigen	an iv selben genvoc
Do sprach der fvrste Dietrich	wie zimt daz helede lip
daz si svln schelten	sam div alten wip
ich verbivt iv	Hildebrant	daz ir iht sprechet mer
mich ellenden rechen	twingent grozlichiv ser
Lat hoeren	frivnt Hagene	sprach do Dietrich
waz ir ê redetet	ir rechen lobelich
do ir mih gewafent	zvo ziv sahet gan
ir iahet daz ir eine	mit strite woldet mich bestan
Iane lovgent iv des niemen	sprach Hagene der degen
ine welle ez hie versvochen	mit stichen un– mit slegen
ez ensi daz mir zebreste	daz Nibelunges swert
mich mvet daz mines herren	vn– min ze gisel ist gegert
Do der reche erhorte	den grimmen Hagenen mvot
den schilt vil balde zvchte	der snelle degen gvot
wie balde gein im Hagene	von der stiegen spranch
Nibelunges swert daz gvote	vil lvot vf Dietriche erchlanch
Do wesse wol her Dietrich	daz der chune man
vil grimmes mvtes wære	schermen im began
der voget von Berne	vor angestlichen slegen
wol erchander Hagenen	er was ein vz erwelter degen
Ovch vorht er Balmungen	ein wafen starch genvoc
vnder wilen Dietrich	mit listen wider slvoc
vnze daz er Hagenen	mit strite doch betwanch
er slvog im eine wnden	div was tief vn– lanch
Do daht der herre Dietrich	dv bist in not erwigen
ih han es luzzil ere	soltv nv tot geligen
ich wil ez svs versvchen	ob ich ertwingen chan
dich mir zeinem gisel	daz wart mit sorgen getan
Den schilt lie vallen Dietrich	sin sterche div was groz
mit beiden sinen armen	er Hagenen vmbesloz
do wart von im betwngen	der vil chvene man
Gunther der vil edele	dar vmbe trvrin began
Hagenen bant do Dietrich	vn– fvrt in da er vant
die edeln Chriemh'	vn– gab ir bi der hant
den chvnisten rechen	der ie swert getrvoc
nach ir vil starchem leide	do wart ir liebe genvoc
Vor frevden neich dem rechen	daz Ezeln wip
immer si dir sæli	din herce vn– ovch din lip
dv hast mich wol ergezzet	nach aller miner not
ich sol ez immer dienen	mich enwendes der tot
Do sprach der herre Dietrich	ir svlt in lan genesen
vil edeliv kvniginne	ez mac vil wol noch wesen
daz ivch sin dienst ergezzet	des er iv hat getan
er sol des niht engelten	daz [88r]man in siht gebunden stan
Do hiez si fvren Hagenen	an sin vngemach
da er lac beslozzen	vn– da in niemen sach
Gunther der kunec edele	rvfen do began
war chom der helt von Berne	er hat mir leide getan
Do gie im hin begegene	der herre Dietrich
daz Gunthers ellen	daz was so lobelich
ern beite do niht mere	er lief her fvr den sal
von ir beider swerten	hvp sich ein vngefvger schal
Swie vil der herre Dietrich	lange was gelobt
Gunther was so sere	erzvrnet vn– ertobt
wander nach starchen leiden	sin herce vient was
man sagtez noch fvr wnder	daz do Dietrich ie genas
Ir ellen vn– ir sterche	beide warn groz
palas vn– tvrne	von den slegen doz
do si mit swerten hewen	vf die helme gvot
ez het der kunic Gunther	einen herlichen mvot
Sit twange in der von Berne	sam Hagenen ê geschach
daz blvot man durch die ringe	dem helde vliezen sach
von eime scharpfen swerte	daz trvoc her Dietrich
doch het gewert Gunther	nach mvde lobeliche sich
Der herre wart gebunden	von Dietriches hant
swie kunige niene solden	liden solhiv bant
er daht ob er lieze	vngebunden wesen
daz si zwene inme lande	niemen liezen genesen
Der vogt von Berne	der nam in bi der hant
do brahter in gebunden	da er Chriemh' vant
do was mit sime leide	ir sorge ein teil benomen
si sprach	chunic Gunther	sit mir groze willechomen
Er sprach	ich soltv nigen	vil edel swester min
ob iwer grvezen moehte	genêdichlicher sin
ich weiz ivch	kvniginne	so zornic gemvot
daz ir mir vn– Hagenen	vil swachez grvzen getvot
Do sprach der helt von Berne	vil edel kuniges wip
ez enwart nie gisel mere	so gvoter ritter lip
als ich iv	frowe here	an in gegeben han
nv svlt ir die ellenden	min vil wol geniezen lan
Si iach si tæt iz gerne	do gie der chune man
mit weinenden ovgen	von in balde dan
si rach sich gremliche	daz Ezeln wip
den vz erwelten degenen	nam si beiden den lip
Si lie si ligen svnder	dvrch ir vngemach
daz ir sit dewedere	den andern nie gesach
swie ez verlobt hete	daz vil edele wip
si daht	ich geriche hivte	mins vil lieben mannes lip
Do gie div kuniginne	da <si> Hagenen sach
wie reht erbolgenliche	si zvo dem rechen sprach
welt ir mir geben widere	daz ir mir habt genomen
so mvget ir mit dem lebene	wider zen Burgonden chomen
Do sprach der grimme Hagen–	[88v]<div> rede ist gar verlorn
vil edeliv kvniginne	ia han ich des gesworn
daz ich den hort iht zeige	die wile deheiner lebe
der minen edelen herren	vn– in niemanne gebe
Er wiste wol div mære	sine liezen in niht genesen
wie mohte ein vntriwe	immer stercher wesen
er vorhte	so si hete	im sinen lip genomen
daz si danne ir brvoder	lieze heim ze lande chomen
Ich bringez an ein ende	gedaht daz edel wip
do hiez si ir brvoder	nemen den lip
man slvog im abe daz hovbet	bi hare si ez trvoc
fvr den helt von Tronege	do warde im leide genvoc
Also der vngemvote	sins herren hovbet sach
wider Chriemh'	do der reche sprach
dv hast ez zeime ende	nach dime willen braht
vn– ist ovch rehte ergangen	als ich mir hete gedaht
Nv ist von Bvrgonden	der edel kunec tot
Giselher vn– Volker	Danchwart vn– Gernot
den hort den weiz nv niemen	wan got vn– min
der sol dich	vælændinne	immer wol verholn sin
Si sprach	so habt ir vbele	geltes mich gewert
so wil doch ich behalten	daz Sivrides swert
daz trvoc min holder vriedel	do ir im namet den lip
mortlich mit vntriwen	sprach do daz iamerhafte wip
Si zoch ez von der scheiden	daz enchunder niht gewern
do dahte si den rechen	des libes vol behern
si hvbez mit ir handen	daz hovpt si im abe slvoc
daz sach der kunic Ezele	do was im leide genvoc
Wafen	sprach der furste	wie ist nv tot gelegen
von eines wibes handen	der aller beste degen
der ie chom ze stvrmen	oder ie schilt getrvoc
swie vient ich im wære	ez ist mir leide genvoc
Do sprach meister Hildebrant	iane genivzet si es niht
daz si in slahen torste	swaz halt mir geschiht
swie er mich selben bræhte	in angestliche not
idoch so wil ich rechen	des vil chvnen rechen tot
Hildebrant mit zorne	zvo Chriemh' spranch
er slvoc der chuniginne	einen grimmen swanch
ia tet ir div sorge	von dem degene we
si mohte lvzzil helfen	daz si so angestlichen scre
Do was gelegen aller	da der veigen lip
ze stvchen lac verhowen	do daz edel wip
Ezel vn– Dietrich	weinen do began
si chlageten iæmerliche	alle ir mage vn– man
Div vil michel ere	was da gelegen tot
die lvte heten alle	iamer vn– not
mit leide was verendet	des kuniges hochgecit
als ie div liebe leide	an dem ende gerne git
Ine chan ivch niht bescheiden	waz sider da geshach
wan christen vn– heiden	weinen man do sach
wibe vn– knehte	vn– manige schone meit
die heten nach ir frivnden	div [89r]aller grozisten leit
Ine sage iv nv niht mere	von der grozen not
die da erslagen waren	die lazen ligen tot
wie ir dinch an geviengen	sit der Hvnen diet
hie hat daz mære ein ende	daz ist der Nibelunge liet